B
Basem Bennis
:: مسافر ::
اعتراف خطير لأول مرة هقوله ! أنا مدمن !
متأكد ان العنوان صادم لناس كتير بالذات الي يعرفوني شخصيا ! أيوة بعترف لكل الناس ... أنا مدمن !
بس أنا مدمن سفر وطيارات وبس ، متفهمنويش غلط ههههههه ! فعلا بالنسبة لي السفر ادمان ... ممكن يكون السفر أكتر من كده كمان ... السفر بالنسبة لي حياة زي المية والهوا مقدرش استغنى عنه بسهولة وبتعب جامد لما بقعد فترة كبيرة من غير سفر ...
تجربتي في السفر بدأت من وانا عمري أسبوعين بس ويمكن ومن وأنا جنين لسه في بطن ماما فعلا ههههههه ومن بعدها اتعلقت بحاجه اسمها طيارات طول حياتي تقدروا تقولوا قلبي متعلق بطيارة.
يمكن اسعد اوقات حياتي لما بكون فعلا على طيارة ، جناني بالطيارات وصل اني كنت احب اشتري طيارات لعبة كتير وبدأت اعرف انواعهم من وانا طفل صغير وحتى جيمز الاتاري وقتها كانت اغلبها طيارات ، اتولدت في مصر وبعدها عيشت طفولتي بره مصر وانا صغير مع أهلي ، وخلال الفترة دي كل لما نيجي مصر كل سنة أجازات ، كنت ساعات مبنمش من كتر الفرحة اني عارف اني هركب طيارة بكرة ، وكان اهلي دايما يخلونا نزور معالم مصر السياحية ويحاولوا يعرفونا تاريخها أنا وأختي عشان يربطونا أكتر بمصر وثقافة بلدنا.
خلال طفولتي و لغاية دلوقتي كنت كمان احب اتابع الأفلام الوثائقية عن دول العالم والحاجات الخاصة بالطبيعة والحيوانات وثقافات الشعوب وكمان كان اتعرض وقتها في التليفزيون المصري ولأول مرة مسلسل ياباني اسمه أوشين خلاني اعشق حاجه اسمها اليابان وزود شغفي بالسفر اكتر بشكل غريب.
وبعد كده رجعت أعيش في مصر وانا حوالي 12 سنه وفي الوقت ده بدأت أحب القراءة واروح مكتبات عامة كتير وهناك بدأت أقرا كتير كتب عن بلاد العالم بالذات كتب الأدلة السياحية لأهم الدول والمدن السياحية ، تقريبا قريت عن كل المدن المهمة في العالم وتاريخها ومعالمها وكمان كانت فترة بدايات الانترنت في مصر (أيام مكان النت بالاتصال بالتليفون الأرضي وتعتبر غالي جدا ) كنت احب اشوف العالم وساعدني اني اسفر على النت لاماكن كتير مشفتهش من خلال القراء بس.
وانا عندي حوالي 14 سنة ماما نصحتني أقرا كتاب حلو جدا أحاول ادور عليه في المكتبة لما لقتني عندي شغف بدول العالم والسفر عن أدب الرحلات للكاتب المصري الشهير أنيس منصور ، الكتاب اسمه 200 يوم حول العالم ومن ساعتها حبيت أنيس منصور جدا وكان مثلي الأعلى وقلت لازم في يوم من الأيام أبقى زي أنيس منصور وألف العالم بأي طريقة .
كبرت شوية وقررت أدخل كلية السياحة واتخصصت في الارشاد السياحي الانجليزي وخلال فترة الجامعه بدأ شغفي يزيد بالتصوير الفوتوغرافي جدا والتاريخ والجغرافيا والانثروبلوجي والطبيعة بشكل عام وكمان بدأت أشارك في بعض ألأنشطة الثقافية والسياحية مع بعض المراكز الثقافية والسفارات زي المركز الثقافي البريطاني وكمان منظمة الثقافة اليابانية والسفارة اليابانية والصينية ساقية الصاوي الخ ... واتعرفت على ثقافات كان نفسي اكتشفها اكتر من زمان بالذات اليابان ، وحتى ستايل أكلي بدأت اغير اكلي واربطه باكل دول كتير من العالم ، واتخرجت واتعرفت على ناس من جميع دول العالم خلال فترة عملي كمرشد سياحي في مصر ده الي شجعني اني الف العالم أكتر من الوقت ده من خلالهم . وبعدها أخدت ماجستير في السياحة بسرعة في وقت قياسي . دراستي تعتبر كانت قريبة من هواياتي الحمدلله وكانت علاقاتي بناس كتير أجانب ساهمت بشكل كبير اني اعمل الحمدلله بحث متميز خلال فترة دراستي وقتها من خلال مراجع نادرة من جميع انحاء العالم .
في يوم كنت بتفرج على فيلم مصري اسمه حرامية في تايلاند ومتصور هناك ، ودي كانت البداية الحقيقية في سفري حول العالم وكانت أول رحلة اسكشافية ليا وأنا كبير ولوحدي بدون أهلي كانت عندي وقتها حوالي 20 سنة ، رحلتي الى تايلاند الأولى كانت كورس مهم جدا ليا في السفر وحضرت لكل شي لوحدي من النت بدون الاستعانه بشركه سياحة من مصر وبأقل التكاليف وشنطتي على ضهري وطرت على هناك .
ومن بعدها انطلقت لكذا دولة من دول شرق أسيا وبعدها لدول كتير حول العالم لغاية دلوقتي . وتقريبا عدد الدول الي زورتها لغاية دلوقتي حوالي 54 او 55 دولة كده شفت خلال رحلاتي حاجات حلوه كتير واماكن مكنتش اتوقع اروحها وناس كتير جدا اتعلمت من كل شخص قابلته حاجه جديدة ، شفت كمان مواقف وحشة جدا جدا علمتني دروس في الحياة وبدفع تمنها لغاية دلوقتي شفت ناس سعداء جدا وشفت ناس تعيسة جدا ومرضى ولاجئين ومجرمين وطيبين .
المرحلة الأهم في حياتي الي خلتني اسافر كتير جدا حول العالم بعد محصل الثورة في مصر وسيبت عملي كمرشد سياحي في مصر بسبب ظروف مصر هي وقت لما اضطريت اقدم وقتها على وظيفة مضيف جوي في طيران الامارت وسبحن الله رغم ان المتقدمين كانو حوالي فوق ال 1200 شخص مصري واجنبي تم التصفية لحالي 9 أشخاص انا كنت واحد منهم وخلال الفتره دي سافرت دول ومدن كتير جدا في حياتي وقدرت أزور جميع قارات الكرة الأرضية وزورت مئات المدن في العالم لغاية مسيبت شغلي في الطيران ودبي ورجعت اسافر كمسافر عادي تاني برده ، وادمان السفر في دمي. منكرش ان السفر كمضيف جوي احيانا بيبقى ممتع عشان بتسافر جميع دول العالم بكل سهوله بس تعبني جدا جدا صحيا ونفسيا احيانا برده وكان سبب مهم اني اقرر اسيب الطيران كمهنة وارجع لحريتي كمسافر عادي برده لان ده ليه طعم تاني احلى بكتير برده من السفر كمضيف جوي.
قبل مسيب الطيران بأيام بسيطة قررت أبدأ مشروع ثقافي خاص بالسفر وبدأته من دبي وبعدها في القاهرة وكانت أول خطوه فعالة فيه الي هو بيدج على الفيسبوك وبلوج أعرض فيه صور ومعلومات وقصص يوميات رحلاتي وتجاربي المتواضعه في رحلاتي حول العالم وسميته أونلاين ايرلاين أو طيران أونلاين.
أونلاين ايرلاين هي الخطوط الجوية الخيالية او الافتراضية بتاعتي الي بتوديكو لدول كتير حول العالم من مطار أونلاين ايرلاين ومقره ع الفيسبوك ... بتعيشوا معايا تجاربي في السفر مع الكابتن والحالة بتاع الطيارة (باسم بنيس) ، دي كانت البداية الي بعتبرها حلم بسيط حلمته من طفولتي وقريب جدا هيبقى قناة على اليوتيوب وبلوج وفي يوم من الأيام أونلاين ايرلاين هتكون مركز ثقافي فعال على أرض الواقع انشالله في مصر ودول العالم بينشر ثقافة السفر وتبادل الثقافات لأن العالم بقى صغير جدا لدرجة منتخيلهاش وللاسف لسه فيه ناس متقدرش تسافر ... وكمان في يوم من الأيام هنشر خلاصة تجاربي في السفر في كتاب هيكون بمثابة طيارة بتنقلكو برده لأماكن كتير في العالم زي كتاب أنيس منصور الي قريته وأنا صغير بمعنى أوضح هتقدر تاخد طيارة أونلاين ايرلاين وتروح بيها لأي حته في الدنيا وانت قاعد في مكانك.
مقدرش انكر ان السفر خلاني ادوب في ثقافات دول كتير وغير في شخصيتي كتير ووخلاني افهم شخصية الانسان في اي حته في الدنيا من مجرد اني ابص في وشه ، فهمني حقايق كتير كنت فاهمها بشكل تاني ، خلاني اتقبل كل الثقافات والاختلاف ، خلاني اقدر يعني ايه انسان وانسانية ويعني ايه طبيعه ونباتات وحيوانات ، خلاني افهم البيئة الي عايشين فيها بمنظور تاني ... خلاني أنمي مهاراتي وثقافتي بشكل كبير كاني بقرأ مليون كتاب وبأخد كورسات ، خلاني اعرف عن فنون وموسيقى من كل حته في الدنيا وأحب حاجات غريبة على ناس حواليا ، ناس كتير حواليا مكنوش ومازالو مقتنعين بكلامي وبيقولي اني اهبل أوشخصية مجنونة لأقصى حد وضيعت فلوس كتييير جدا في التفاهات دي ، ناس كتير قالولي ازاي متشتغلش في التدريس في الجامعه مثلا وانت شخص متفوق جدا وتعيش الحياة الواو من وجهه نظرهم ونمطية جدا من وجهه نظري ومملة ، وناس كتير بدأو يشوفوني بنظرة تانية لما بدأت بعض الصحافة أو تليفزيون بدؤا يتكلمو عني او يطلبوني اظهر في لقاءات معاهم ونفس الناس دول مكنوش أصلا فاهمين يعني ايه بلوجر سفر او كاتب أدب رحلات ، نفس الناس الي اتريقت عليا وقتها بدؤا يفهمو انا بعمل ايه ونظرتتهم لتفاهتي وجناني (من وجهه نظرهم السابقة ) بقت نظرة تقدير أو غيرة حتى أحيانا ، ناس كتير فاكرين ان السفر دي رفاهية بس ميستحقهاش الا الاغنياء بس ، بس في النهاية لحد اللحظة دي أقدر أقلكو رحلتي لسه مستمرة و هقول لكل انسان في الدنيا كل واحد فينا يعتبر مسافر في رحلة طويله أو قصيرة على الأرض ، حاول تعيشها بقدر الامكان بالطريقة الي تحبها طالما مبتضرش حد بس لازم تسيب فيها بصمة حلوه في كل الي حواليك او مجتمعك والطبيعة الي عايش فيها ومش لازم تبقى زي بقية الناس حتى لو هيقولوا عنك مختلف أو مدمن سفر .
كل كلمة في المقال ده حكيتها من قلبي ومن جوايا بجد وجايز مكنش احسن واحد بيصور أو أحسن واحد بيكتب عن السفر حتى خالص ولسه على قدي جدا وفي بداياتي بس فعلا حبيت أوصل لكل الناس ان السفر مش مجرد رحلة وفسحة ورفاهية بس ، السفر يعتبر تجربة حياة ، و مفهومه أعمق بكتير ويمكن ده الحاجه الوحيدة الي ادمانها مفيد جدا بجد ... ومتأكد ان رسالتي في يوم من الأيام ان شاء الله هتوصل بالشكل الي انا عايزه وهتغير ثقافات ناس كتير كانو بالنسبة لهم ركوب الطيارة بس مجرد حلم كبير .
✈ الي نفسه يعيش تجربتي المتواضعة ويسافر حول العالم ببلاش ومن مكانه دلوقتي حالا أو يعرف عني أكتر ادخل على:
الصفحة الخاصه برحلاتي حول العالم أونلاين ايرلاين : www.facebook.com/onlineairline
على الانستاجرام : basembennis
أو على الموقع بتاعي: www.basembennis.com
باسم بنيس
متأكد ان العنوان صادم لناس كتير بالذات الي يعرفوني شخصيا ! أيوة بعترف لكل الناس ... أنا مدمن !
بس أنا مدمن سفر وطيارات وبس ، متفهمنويش غلط ههههههه ! فعلا بالنسبة لي السفر ادمان ... ممكن يكون السفر أكتر من كده كمان ... السفر بالنسبة لي حياة زي المية والهوا مقدرش استغنى عنه بسهولة وبتعب جامد لما بقعد فترة كبيرة من غير سفر ...
تجربتي في السفر بدأت من وانا عمري أسبوعين بس ويمكن ومن وأنا جنين لسه في بطن ماما فعلا ههههههه ومن بعدها اتعلقت بحاجه اسمها طيارات طول حياتي تقدروا تقولوا قلبي متعلق بطيارة.
يمكن اسعد اوقات حياتي لما بكون فعلا على طيارة ، جناني بالطيارات وصل اني كنت احب اشتري طيارات لعبة كتير وبدأت اعرف انواعهم من وانا طفل صغير وحتى جيمز الاتاري وقتها كانت اغلبها طيارات ، اتولدت في مصر وبعدها عيشت طفولتي بره مصر وانا صغير مع أهلي ، وخلال الفترة دي كل لما نيجي مصر كل سنة أجازات ، كنت ساعات مبنمش من كتر الفرحة اني عارف اني هركب طيارة بكرة ، وكان اهلي دايما يخلونا نزور معالم مصر السياحية ويحاولوا يعرفونا تاريخها أنا وأختي عشان يربطونا أكتر بمصر وثقافة بلدنا.
خلال طفولتي و لغاية دلوقتي كنت كمان احب اتابع الأفلام الوثائقية عن دول العالم والحاجات الخاصة بالطبيعة والحيوانات وثقافات الشعوب وكمان كان اتعرض وقتها في التليفزيون المصري ولأول مرة مسلسل ياباني اسمه أوشين خلاني اعشق حاجه اسمها اليابان وزود شغفي بالسفر اكتر بشكل غريب.
وبعد كده رجعت أعيش في مصر وانا حوالي 12 سنه وفي الوقت ده بدأت أحب القراءة واروح مكتبات عامة كتير وهناك بدأت أقرا كتير كتب عن بلاد العالم بالذات كتب الأدلة السياحية لأهم الدول والمدن السياحية ، تقريبا قريت عن كل المدن المهمة في العالم وتاريخها ومعالمها وكمان كانت فترة بدايات الانترنت في مصر (أيام مكان النت بالاتصال بالتليفون الأرضي وتعتبر غالي جدا ) كنت احب اشوف العالم وساعدني اني اسفر على النت لاماكن كتير مشفتهش من خلال القراء بس.
وانا عندي حوالي 14 سنة ماما نصحتني أقرا كتاب حلو جدا أحاول ادور عليه في المكتبة لما لقتني عندي شغف بدول العالم والسفر عن أدب الرحلات للكاتب المصري الشهير أنيس منصور ، الكتاب اسمه 200 يوم حول العالم ومن ساعتها حبيت أنيس منصور جدا وكان مثلي الأعلى وقلت لازم في يوم من الأيام أبقى زي أنيس منصور وألف العالم بأي طريقة .
كبرت شوية وقررت أدخل كلية السياحة واتخصصت في الارشاد السياحي الانجليزي وخلال فترة الجامعه بدأ شغفي يزيد بالتصوير الفوتوغرافي جدا والتاريخ والجغرافيا والانثروبلوجي والطبيعة بشكل عام وكمان بدأت أشارك في بعض ألأنشطة الثقافية والسياحية مع بعض المراكز الثقافية والسفارات زي المركز الثقافي البريطاني وكمان منظمة الثقافة اليابانية والسفارة اليابانية والصينية ساقية الصاوي الخ ... واتعرفت على ثقافات كان نفسي اكتشفها اكتر من زمان بالذات اليابان ، وحتى ستايل أكلي بدأت اغير اكلي واربطه باكل دول كتير من العالم ، واتخرجت واتعرفت على ناس من جميع دول العالم خلال فترة عملي كمرشد سياحي في مصر ده الي شجعني اني الف العالم أكتر من الوقت ده من خلالهم . وبعدها أخدت ماجستير في السياحة بسرعة في وقت قياسي . دراستي تعتبر كانت قريبة من هواياتي الحمدلله وكانت علاقاتي بناس كتير أجانب ساهمت بشكل كبير اني اعمل الحمدلله بحث متميز خلال فترة دراستي وقتها من خلال مراجع نادرة من جميع انحاء العالم .
في يوم كنت بتفرج على فيلم مصري اسمه حرامية في تايلاند ومتصور هناك ، ودي كانت البداية الحقيقية في سفري حول العالم وكانت أول رحلة اسكشافية ليا وأنا كبير ولوحدي بدون أهلي كانت عندي وقتها حوالي 20 سنة ، رحلتي الى تايلاند الأولى كانت كورس مهم جدا ليا في السفر وحضرت لكل شي لوحدي من النت بدون الاستعانه بشركه سياحة من مصر وبأقل التكاليف وشنطتي على ضهري وطرت على هناك .
ومن بعدها انطلقت لكذا دولة من دول شرق أسيا وبعدها لدول كتير حول العالم لغاية دلوقتي . وتقريبا عدد الدول الي زورتها لغاية دلوقتي حوالي 54 او 55 دولة كده شفت خلال رحلاتي حاجات حلوه كتير واماكن مكنتش اتوقع اروحها وناس كتير جدا اتعلمت من كل شخص قابلته حاجه جديدة ، شفت كمان مواقف وحشة جدا جدا علمتني دروس في الحياة وبدفع تمنها لغاية دلوقتي شفت ناس سعداء جدا وشفت ناس تعيسة جدا ومرضى ولاجئين ومجرمين وطيبين .
المرحلة الأهم في حياتي الي خلتني اسافر كتير جدا حول العالم بعد محصل الثورة في مصر وسيبت عملي كمرشد سياحي في مصر بسبب ظروف مصر هي وقت لما اضطريت اقدم وقتها على وظيفة مضيف جوي في طيران الامارت وسبحن الله رغم ان المتقدمين كانو حوالي فوق ال 1200 شخص مصري واجنبي تم التصفية لحالي 9 أشخاص انا كنت واحد منهم وخلال الفتره دي سافرت دول ومدن كتير جدا في حياتي وقدرت أزور جميع قارات الكرة الأرضية وزورت مئات المدن في العالم لغاية مسيبت شغلي في الطيران ودبي ورجعت اسافر كمسافر عادي تاني برده ، وادمان السفر في دمي. منكرش ان السفر كمضيف جوي احيانا بيبقى ممتع عشان بتسافر جميع دول العالم بكل سهوله بس تعبني جدا جدا صحيا ونفسيا احيانا برده وكان سبب مهم اني اقرر اسيب الطيران كمهنة وارجع لحريتي كمسافر عادي برده لان ده ليه طعم تاني احلى بكتير برده من السفر كمضيف جوي.
قبل مسيب الطيران بأيام بسيطة قررت أبدأ مشروع ثقافي خاص بالسفر وبدأته من دبي وبعدها في القاهرة وكانت أول خطوه فعالة فيه الي هو بيدج على الفيسبوك وبلوج أعرض فيه صور ومعلومات وقصص يوميات رحلاتي وتجاربي المتواضعه في رحلاتي حول العالم وسميته أونلاين ايرلاين أو طيران أونلاين.
أونلاين ايرلاين هي الخطوط الجوية الخيالية او الافتراضية بتاعتي الي بتوديكو لدول كتير حول العالم من مطار أونلاين ايرلاين ومقره ع الفيسبوك ... بتعيشوا معايا تجاربي في السفر مع الكابتن والحالة بتاع الطيارة (باسم بنيس) ، دي كانت البداية الي بعتبرها حلم بسيط حلمته من طفولتي وقريب جدا هيبقى قناة على اليوتيوب وبلوج وفي يوم من الأيام أونلاين ايرلاين هتكون مركز ثقافي فعال على أرض الواقع انشالله في مصر ودول العالم بينشر ثقافة السفر وتبادل الثقافات لأن العالم بقى صغير جدا لدرجة منتخيلهاش وللاسف لسه فيه ناس متقدرش تسافر ... وكمان في يوم من الأيام هنشر خلاصة تجاربي في السفر في كتاب هيكون بمثابة طيارة بتنقلكو برده لأماكن كتير في العالم زي كتاب أنيس منصور الي قريته وأنا صغير بمعنى أوضح هتقدر تاخد طيارة أونلاين ايرلاين وتروح بيها لأي حته في الدنيا وانت قاعد في مكانك.
مقدرش انكر ان السفر خلاني ادوب في ثقافات دول كتير وغير في شخصيتي كتير ووخلاني افهم شخصية الانسان في اي حته في الدنيا من مجرد اني ابص في وشه ، فهمني حقايق كتير كنت فاهمها بشكل تاني ، خلاني اتقبل كل الثقافات والاختلاف ، خلاني اقدر يعني ايه انسان وانسانية ويعني ايه طبيعه ونباتات وحيوانات ، خلاني افهم البيئة الي عايشين فيها بمنظور تاني ... خلاني أنمي مهاراتي وثقافتي بشكل كبير كاني بقرأ مليون كتاب وبأخد كورسات ، خلاني اعرف عن فنون وموسيقى من كل حته في الدنيا وأحب حاجات غريبة على ناس حواليا ، ناس كتير حواليا مكنوش ومازالو مقتنعين بكلامي وبيقولي اني اهبل أوشخصية مجنونة لأقصى حد وضيعت فلوس كتييير جدا في التفاهات دي ، ناس كتير قالولي ازاي متشتغلش في التدريس في الجامعه مثلا وانت شخص متفوق جدا وتعيش الحياة الواو من وجهه نظرهم ونمطية جدا من وجهه نظري ومملة ، وناس كتير بدأو يشوفوني بنظرة تانية لما بدأت بعض الصحافة أو تليفزيون بدؤا يتكلمو عني او يطلبوني اظهر في لقاءات معاهم ونفس الناس دول مكنوش أصلا فاهمين يعني ايه بلوجر سفر او كاتب أدب رحلات ، نفس الناس الي اتريقت عليا وقتها بدؤا يفهمو انا بعمل ايه ونظرتتهم لتفاهتي وجناني (من وجهه نظرهم السابقة ) بقت نظرة تقدير أو غيرة حتى أحيانا ، ناس كتير فاكرين ان السفر دي رفاهية بس ميستحقهاش الا الاغنياء بس ، بس في النهاية لحد اللحظة دي أقدر أقلكو رحلتي لسه مستمرة و هقول لكل انسان في الدنيا كل واحد فينا يعتبر مسافر في رحلة طويله أو قصيرة على الأرض ، حاول تعيشها بقدر الامكان بالطريقة الي تحبها طالما مبتضرش حد بس لازم تسيب فيها بصمة حلوه في كل الي حواليك او مجتمعك والطبيعة الي عايش فيها ومش لازم تبقى زي بقية الناس حتى لو هيقولوا عنك مختلف أو مدمن سفر .
كل كلمة في المقال ده حكيتها من قلبي ومن جوايا بجد وجايز مكنش احسن واحد بيصور أو أحسن واحد بيكتب عن السفر حتى خالص ولسه على قدي جدا وفي بداياتي بس فعلا حبيت أوصل لكل الناس ان السفر مش مجرد رحلة وفسحة ورفاهية بس ، السفر يعتبر تجربة حياة ، و مفهومه أعمق بكتير ويمكن ده الحاجه الوحيدة الي ادمانها مفيد جدا بجد ... ومتأكد ان رسالتي في يوم من الأيام ان شاء الله هتوصل بالشكل الي انا عايزه وهتغير ثقافات ناس كتير كانو بالنسبة لهم ركوب الطيارة بس مجرد حلم كبير .
✈ الي نفسه يعيش تجربتي المتواضعة ويسافر حول العالم ببلاش ومن مكانه دلوقتي حالا أو يعرف عني أكتر ادخل على:
الصفحة الخاصه برحلاتي حول العالم أونلاين ايرلاين : www.facebook.com/onlineairline
على الانستاجرام : basembennis
أو على الموقع بتاعي: www.basembennis.com
باسم بنيس
عادة الكلام الطويل لو ممل مش هقراه.. برافو و Go ahead