بص هو بالنسبة للأقامة ف افضل مكانين هما ميدان تكسيم او تسكن فى ال old city جنب البلو موسك ، بالنسبة للبرامج اقترح عليك ان تركب ال hop on hop off حلو جدا فى تركيا و له 2 مسار بيغطوا اسطنبول كلها و تقدر تنزل منه فى كل مكان لو عجبك و كل نص ساعة بيعدى واحد تانى تركبه بردوا و تكمل المسار ..الاماكن بقى عندك واحد ميدان تكسيم و هو الميدان الاشهر و اللى دايما صاحى و كله شباب و متفرع منه شارع استقلال و الشارع ده لوحده خروجه مليان محلات و شوبينج و براندات و كله فرق موسيقية و استريت بروفورمانس .. فيه مطعم كذا دور هو و بيعمل اسكندر يجنن و محلات حلويات و اللوكم التركى و محل بن فى نص الشارع و حياتك يا شيخ تيجيبلى كيس كيلو من عنده ، و عندك منطقة ايمينانو المنطقة ع مضيق البوسفور و تجنن التمشية هناك و هناك تحت كوبرى جالاطه فيه مطاعم اسماك فريش تحفه و عندهم اكله غريبة كده هتلاقى محلات كتير بتعملها سندوتشات سمك فريش ، و من هناك لازم تاخد بووت عشان تعمل بيه رحلة البوسفور فى اسعار كتيير للبووت و للرحلة دى فى منها اللى ساعة واحده و من غير غداء و فى منها طبعا على مراكب luxury و بغداء .. و قريب من المنطقة دى هتلاقى ال ايجيبشن باز حلوو اووى ادخله و اتمشى هناك .. فى بقى بعد الايجيبشن بازر بشوية حلويين سوق شعبة اسمه اسواق بايازيد .. ملابس برخص التراب اللى هى بتتباع عندنا فى المحلات و يقولك دا تركى ياباشا و هناك القماش و الكشمير بردوا .. لازم تزور الجراند بازار و المنطقة اللى حواليه بس متشتريش من هناك الاسعار مبالغ فيها هناك ، لازم تتمشى فى منطقة اكسراى و عثمان به و هناك شوبينج مودرن و مولات حديثه .. لازم فى يوم بليل تطلع على منطقة اورتوكوى و تسهر هناك على البوسفور تجنن و لازم تجرب تاكل هناك من الاشكاك اللى بتعمل اكله غريبة بردوا عبارة عن بطاطس فرن و بيحشوها كل حاجه ممكن تتخيلها و الوافلز هناك كتيير بردوا ... اطلع رحلة جزيرة الاميرات لو حبيت .. عندك طبعا منطقة ال old city و البلو موسك و آيا صوفيا حلووووين اوووى و منطقة جلاطه تاور حلوو بردوا .. نيجى بقى ل بره اسطنبول .. لازم تطلع رحلة ل بورصا و تطلع جبال اولوداج .. و الافضل و الامتع خدها عن طريق البحر و عبارة لميناء يالوفا ، و اطلع يوم ل صبونجا بردوا .
