E
Eman ElAmir
:: مسافر ::
عن الترحال سألوني : الفلوس ؟
أول سؤال في كل لقاء عن السفر "نجيب فلوس منين؟ " طبعا السؤال مبني إن السفر غالي وإنه مش في استطاعة كل شخص الحصول على المبالغ دي للسفر. كانت عندي نفس القناعات أول ما فكرت أسافر وكان شغلى الشاغل أجيب فلوس منين ؟
السفر مش مكلف التكلفة الرهيبة اللي متخيلنها بالعكس فيه حلول كتير جدا وبسعر منطقي. خلينا الأول نتكلم إزاي نجيب فلوس للسفر بعدين إزاي نقتصد في صرفها.
مبدئيا هنقسم الناس اللي عايزة تسافر شرائح . طالب . شخص بيشتغل. رب أسرة
الطالب. طبعا هتكون لسى بتاخد مصروف وممكن تكون بتشتغل في الصيف مثلا. أولا انت راس مالك وقتك. ممكن تبتدي بحصالة صغيرة كدة أو دفتر توفير صغير تحوش فيه فلوس. أي هدايا بتجيلك بسبب نجاح أو عيد ميلاد اطلب انها تكون نقدية أو تكون حاجة ليها علاقة بالسفر شنطة مثلا . كوتشي حاجة تستفيد منها في رحلتك .
أي فلوس أو عيدية مثلا بتاخدها حاول تخلي جزء كبير منها للسفر. ممكن تعمل Adventure jar أو برطمان السفر وتطلب مساهمة من أهلك وأصحابك فيه بدل الهدايا المعتادة. ممكن توفر تمن خروجة من الخروجات هتتغدى فيها مثلا إنك تاكل في البيت قبل ما تنزل وتكتفي مثلا انك تشرب حاجة. مش لازم مطعم فخم ولا كافيه فيه minimum charge ممكن تتمشوا ولا تروحوا مول مش كل مرة خروجة مكلفة لازم تضحى بحاجات عشان حاجات تانية تعيش.
أي فلوس تتبقى من خروجة أو سفرية حطها في صندوق دعم السفر. ممكن تعمل صفقة مع العيلة إن المبلغ اللي هتحوشه هتاخد أده أو نصه دعما لفكرتك.
ممكن تشتغل حاجات في البيت بمقابل مادي . ترتب البيت تكوى الهدوم تغسل العربية مش عيب خالص ومفيش مانع ناخد عليها فلوس . في الآخر هي خدمة بمقابل مادي وممكن تطلع كريم وتعملهم تخفيض.
ممكن تشتغل حاجات أونلاين ودي منها أفكار كتير . ادخال بيانات . تفريغ برامج. تسجيل كتب . حاجات بسيطة في وقت الفراغ وتطلع منها بفلوس كويسة تساهم في الرحلة.
طيب الشخص اللي بيشتغل بقى . ممكن تدخل جمعية بمبلغ صغير ودي تبقى مخصوص عشان السفر. لو عملت جمعية ب 300جنيه في الشهر هتجمع 3600 جنيه تقدر تطلع بيهم رحلة صغيرة 5 أيام مثلا. ممكن تكبر المبلغ حسب امكانياتك. هتبتدي أولوياتك تتغير . لبس جديد ولا احوش واسافر. خروجة غالية ولا المبلغ ده ممكن يزود أيام للرحلة. ممكن تشترك في الكروت اللي بتعمل عروض تقسيط للسلع بدون فوايد مقابل اشتراك شهري زي مثلا Premium. عندهم فنادق وتذاكر طيران وبكدة تقسط التذكرة بنفس سعرها على 10 شهور.
لو أخدت علاوة أو زيادة سنوية اعتبر انها مجاتش وحوشها للسفر. طلعت مأمورية وخدت بدل سفر برضوا حاول تحوش جزء منه. صندوق الزمالة والحاجات اللي الزملاء في العمل بيعملوها احتفال عيد ميلاد ولا اتجوزت ولا أي مناسبة. ممكن تبقى ظرف فلوس مش هدية . مش عيب تقولهم على فكرة. مرة صحابي جابولي في عيد ميلادي voucher أطلع بيها رحلة بمبلغ معين كملت عليهم وعملت فيزا شنجن ووفرت مبلغ كبير في السفرية.
شغلانة جزء من الوقت ولا مثلا حاجة عليها overtime برضوا نواية تسند الزير وتشجع الفكرة.
رب الأسرة بقى اللي مطلوب منه مصروف بيت وولاد ومدارس ومسكين عليه حمل تقيل. انت مش مسكين ولا حاجة زي ما قدرت توفر لأي حاجة كنت عايز تعملها أو مراتك كان نفسها فيها. تغيير ستاير ولا طقم كوبيات عجبها. ممكن تحوشوا تمن الكلام ده وتطلعوا بيه رحلة. حتى الولاد نفسهم ممكن تجيبوا لهم حصالة مرسوم عليها طيارة أو خريطة ويبقوا عارفين إن أي مبلغ هيتحوش فيها هيساهم انهم يتفسحوا ويطلعوا رحلة.
السفر هيبقى مشروع جماعي للأسرة حتى لو هتسافر كل سنة أو سنتين مرة المهم الفكرة تكون موجودة وهتلاقي البيت كله مشجعك تاخد خطوة. بيعوا حاجات مش محتاجينها. بطلوا تشتروا بسبب ومن غير سبب. اعملوا قايمة بالمشتروات الضرورية. مش لازم تروحوا سوبر ماركت كبير وتقعوا ضحية العروض الرهيبة. نفعوا بقالة صغيرة جنبكم واللي هتوفروه حطوه في صندوق السفرية.
حاجة كمان مهمة ممكن تدوروا في مقتنياتكم عن حاجات مش محتاجينها وتقدروا تبيعوها أو تبدلوها بحاجات تانية تنفعكم في السفر.
طيب حوشنا الحمد لله وعملنا جمعيات وبقى معانا فلوس نطلع رحلة.
هنسافر بأقل تكلفة ممكنة . طيران شارتر من مطارات محلية زي برج العرب وشرم الشيخ والغردقة. هننزل في فندق نجمتين ولا بيت شباب ولا هناخد سرير في أوضة ولا حد هيستضيفنا على كنبة في بيته. هنركب مواصلات عامة ونوفر مصاريف تنقلات. حلول كتير وأفكار كتير وانت وشطارتك.
ممكن تسافروا تشتغلوا في مزرعة أو تطوع في مشروع هيوفر عليكم بند من بنود السفر سواء تذكرة أو إقامة أو أكل.
الأفكار كتير وكل يوم فيه حلول أكتر بس احنا ندي نفسنا فرصة نفكر بشكل مختلف والظروف هتغير لصالح خطتنا.
الخلاصة السفر مش غالي والفلوس موجودة بس احنا هنغير بنود الصرف وهنغير قناعتنا ونعتبر السفر مشروع محتاج خطة عشان نوصل له. اخرجوا برة محيط ال comfort zone وخرجوا الدايرة اللي حواليكم كمان عشان الناس تشوفكم بالوضع الجديد اللي اخترتوه لنفسكم.
حوشوا .. قسطوا.. استغنوا عن حاجات مش مهمة.. انطلقوا وشوفوا الدنيا.
تسافروا وترجعوا بالسلامة.
إيمان الأمير
أول سؤال في كل لقاء عن السفر "نجيب فلوس منين؟ " طبعا السؤال مبني إن السفر غالي وإنه مش في استطاعة كل شخص الحصول على المبالغ دي للسفر. كانت عندي نفس القناعات أول ما فكرت أسافر وكان شغلى الشاغل أجيب فلوس منين ؟
السفر مش مكلف التكلفة الرهيبة اللي متخيلنها بالعكس فيه حلول كتير جدا وبسعر منطقي. خلينا الأول نتكلم إزاي نجيب فلوس للسفر بعدين إزاي نقتصد في صرفها.
مبدئيا هنقسم الناس اللي عايزة تسافر شرائح . طالب . شخص بيشتغل. رب أسرة
الطالب. طبعا هتكون لسى بتاخد مصروف وممكن تكون بتشتغل في الصيف مثلا. أولا انت راس مالك وقتك. ممكن تبتدي بحصالة صغيرة كدة أو دفتر توفير صغير تحوش فيه فلوس. أي هدايا بتجيلك بسبب نجاح أو عيد ميلاد اطلب انها تكون نقدية أو تكون حاجة ليها علاقة بالسفر شنطة مثلا . كوتشي حاجة تستفيد منها في رحلتك .
أي فلوس أو عيدية مثلا بتاخدها حاول تخلي جزء كبير منها للسفر. ممكن تعمل Adventure jar أو برطمان السفر وتطلب مساهمة من أهلك وأصحابك فيه بدل الهدايا المعتادة. ممكن توفر تمن خروجة من الخروجات هتتغدى فيها مثلا إنك تاكل في البيت قبل ما تنزل وتكتفي مثلا انك تشرب حاجة. مش لازم مطعم فخم ولا كافيه فيه minimum charge ممكن تتمشوا ولا تروحوا مول مش كل مرة خروجة مكلفة لازم تضحى بحاجات عشان حاجات تانية تعيش.
أي فلوس تتبقى من خروجة أو سفرية حطها في صندوق دعم السفر. ممكن تعمل صفقة مع العيلة إن المبلغ اللي هتحوشه هتاخد أده أو نصه دعما لفكرتك.
ممكن تشتغل حاجات في البيت بمقابل مادي . ترتب البيت تكوى الهدوم تغسل العربية مش عيب خالص ومفيش مانع ناخد عليها فلوس . في الآخر هي خدمة بمقابل مادي وممكن تطلع كريم وتعملهم تخفيض.
ممكن تشتغل حاجات أونلاين ودي منها أفكار كتير . ادخال بيانات . تفريغ برامج. تسجيل كتب . حاجات بسيطة في وقت الفراغ وتطلع منها بفلوس كويسة تساهم في الرحلة.
طيب الشخص اللي بيشتغل بقى . ممكن تدخل جمعية بمبلغ صغير ودي تبقى مخصوص عشان السفر. لو عملت جمعية ب 300جنيه في الشهر هتجمع 3600 جنيه تقدر تطلع بيهم رحلة صغيرة 5 أيام مثلا. ممكن تكبر المبلغ حسب امكانياتك. هتبتدي أولوياتك تتغير . لبس جديد ولا احوش واسافر. خروجة غالية ولا المبلغ ده ممكن يزود أيام للرحلة. ممكن تشترك في الكروت اللي بتعمل عروض تقسيط للسلع بدون فوايد مقابل اشتراك شهري زي مثلا Premium. عندهم فنادق وتذاكر طيران وبكدة تقسط التذكرة بنفس سعرها على 10 شهور.
لو أخدت علاوة أو زيادة سنوية اعتبر انها مجاتش وحوشها للسفر. طلعت مأمورية وخدت بدل سفر برضوا حاول تحوش جزء منه. صندوق الزمالة والحاجات اللي الزملاء في العمل بيعملوها احتفال عيد ميلاد ولا اتجوزت ولا أي مناسبة. ممكن تبقى ظرف فلوس مش هدية . مش عيب تقولهم على فكرة. مرة صحابي جابولي في عيد ميلادي voucher أطلع بيها رحلة بمبلغ معين كملت عليهم وعملت فيزا شنجن ووفرت مبلغ كبير في السفرية.
شغلانة جزء من الوقت ولا مثلا حاجة عليها overtime برضوا نواية تسند الزير وتشجع الفكرة.
رب الأسرة بقى اللي مطلوب منه مصروف بيت وولاد ومدارس ومسكين عليه حمل تقيل. انت مش مسكين ولا حاجة زي ما قدرت توفر لأي حاجة كنت عايز تعملها أو مراتك كان نفسها فيها. تغيير ستاير ولا طقم كوبيات عجبها. ممكن تحوشوا تمن الكلام ده وتطلعوا بيه رحلة. حتى الولاد نفسهم ممكن تجيبوا لهم حصالة مرسوم عليها طيارة أو خريطة ويبقوا عارفين إن أي مبلغ هيتحوش فيها هيساهم انهم يتفسحوا ويطلعوا رحلة.
السفر هيبقى مشروع جماعي للأسرة حتى لو هتسافر كل سنة أو سنتين مرة المهم الفكرة تكون موجودة وهتلاقي البيت كله مشجعك تاخد خطوة. بيعوا حاجات مش محتاجينها. بطلوا تشتروا بسبب ومن غير سبب. اعملوا قايمة بالمشتروات الضرورية. مش لازم تروحوا سوبر ماركت كبير وتقعوا ضحية العروض الرهيبة. نفعوا بقالة صغيرة جنبكم واللي هتوفروه حطوه في صندوق السفرية.
حاجة كمان مهمة ممكن تدوروا في مقتنياتكم عن حاجات مش محتاجينها وتقدروا تبيعوها أو تبدلوها بحاجات تانية تنفعكم في السفر.
طيب حوشنا الحمد لله وعملنا جمعيات وبقى معانا فلوس نطلع رحلة.
هنسافر بأقل تكلفة ممكنة . طيران شارتر من مطارات محلية زي برج العرب وشرم الشيخ والغردقة. هننزل في فندق نجمتين ولا بيت شباب ولا هناخد سرير في أوضة ولا حد هيستضيفنا على كنبة في بيته. هنركب مواصلات عامة ونوفر مصاريف تنقلات. حلول كتير وأفكار كتير وانت وشطارتك.
ممكن تسافروا تشتغلوا في مزرعة أو تطوع في مشروع هيوفر عليكم بند من بنود السفر سواء تذكرة أو إقامة أو أكل.
الأفكار كتير وكل يوم فيه حلول أكتر بس احنا ندي نفسنا فرصة نفكر بشكل مختلف والظروف هتغير لصالح خطتنا.
الخلاصة السفر مش غالي والفلوس موجودة بس احنا هنغير بنود الصرف وهنغير قناعتنا ونعتبر السفر مشروع محتاج خطة عشان نوصل له. اخرجوا برة محيط ال comfort zone وخرجوا الدايرة اللي حواليكم كمان عشان الناس تشوفكم بالوضع الجديد اللي اخترتوه لنفسكم.
حوشوا .. قسطوا.. استغنوا عن حاجات مش مهمة.. انطلقوا وشوفوا الدنيا.
تسافروا وترجعوا بالسلامة.
إيمان الأمير
