يلا بينا نبدا المسابقه المنتظره احنا كجروب...

[Moutaz Mohamed]

يلا بينا نبدا المسابقه المنتظره

احنا كجروب Traveller experience و جروب Cairo hiking بنؤمن ان مصر فيها ٢٧ محافظه و فيها اماكن كتير جدا حلوه بس لاسف مش كل المصربين يعرفوها نتيجه ان مفيش دعايه كافيه ليها.

عشان كده قررنا اننا نخلي المسابقه كلها عن مصر عشان كلنا نعرف الاماكن ديه و نبدا نفكر ازاي نستمتع بيها.

ايه هي شروط المسابقه؟

المسابقه هتكون عن احسن تقرير هيتعمل عن مصر سواء مغامره او مزارات سياحيه او برنامج سياحي انت عملته بنفسك داخل اي محافظه.

مثال عن يوم كامل لمجمع الاديان في مصر القديمه:

_تركب خط رقم ١ لمترو الانفاق اتجاه حلوان.

_تنزل محطه ماري جرجس

_هتخرج تلاقي الكنيسه المعلقه و الدخول مجانا و هتلاقي داخل الكنيسه ناس متبرعين من ابناء الكنيسه عشان يشرحلك تاريخ الكنيسه مجانا

_ و بعد كده هتلاقي مجموعه كنايس في نفس المنطقه و تعرف خط سير العائله المقدسه.

_ بعد كده تتحرك علي المعبد اليهودي و هتلاقي بردوا شخص يشرحلك تاريخ المعبد و ده مجانا

_ بعد كده تروح منطقه الفسطاط و تتفرج علي الاعمال اليدويه سواء ملابس او فضه او اعمال خزف

_بعد كده تطلع علي جامع عمرو بن العاص.

في مزارات كتير جدا و اماكن كتير جدا سواء المنيا ، اسوان، النوبه ، الاقصر ، وادي الوشواشي , الهرم , منطقه الازهر ,......,.......

عايزين كل واحد يكتبلنا شرح مفصل و جو مغامره زي ازاي تروح المكان ده و التكلفه.

اهم شرط انك تحط صوره ليك في المكان ده.

ممكن طبعا تشارك بكذا تقرير و اعلي تقرير هياخد Like هو الي هيكسب رحله لفردين مقدمه من Mikle Azmy مؤسس جروب Cairo hiking.

استلام الجائزه هيكون في مقر شركه Cairo hiking و هيتم اختيار رحله من الرحلات المقدمه من Cairo hiking الي المسابقه.

الفائز لن يتحمل مع المرافق اي مصاريف خاصه بالرحله طبقا لبرنامج الرحله سواء انتقالات او اقامه او طعام او مزارات.

التقارير هتتم تحت بوست المسابقه و هتستمر من اليوم حتي يوم ٣١/٣ الساعه ١١:٣٠ مساءا و سوف يتم اعلان اسم الفائز يوم ١/٤ و الرحلات ستتم في نفس الشهر.

ملحوظه

-سيتم استبعاد التقارير التي لا تحتوي علي صور شخصيه من داخل المكان الخاص بالتقرير.

- يفضل كتابه التكاليف الخاصه بالرحله و اذا تمت مع شركه يفضل كتابه انها تمت مع شركه دون كتابه اسمها.

نتمني حظ سعيد لكل الاعضاء

#Traveller_Experience
#cairohiking
G.S: Flyin.com

 

[Mostafa T. Mohamed]

سينا بالعربيه ( طابا-راس شيطان-نويبع-وادي الوشواشي-دهب-شرم الشيخ-محميه راس محمد)
اولا خدت العربيه وطلعت على نفق الشهيد ومن هناك لطريق نخل بوسط سيناء ( ملحوظه بس الطريق ممنوع سير الاجانب فيه)
ومن هناك بعد 5 ساعات تقريبا وصلت طابا وروحنا قلعه صلاح الدين وبعد كده الفيورد باي
من هناك ساعتين بتكون في منطقه راس شيطان ومن هناك بتقدر تعمل سفاري لوادي الوشواشي وهي افضل مكان فعلا ممكن تشوفه في مصر
عباره عن مجموعه جبال لافه حوالين بعض ومياه الامطار مالياها والجبال عامله منطات طبيعيه روعه
بعد كده دهب
دهب معروفه بالهدوء والسنوركلنج وفيها تاني احسن مكان غطس في العالم كله البلو هول
-فيها برضو ال 3 بولز وشط الاجونا ومحميه ابو جالوم مناطق كتير كلها للغطس
الاماكن معظمها بتتراح بالجيب هناك وتكلفه الجيب مش غاليه وبتشيل ل 10 اشخاص
بالنسبالي احسن اماكن للاوتيلات هناك المشربه بتبقى قريبه من المدينه وكلها حركه
-شرم الشيخ ومحميه راس محمد هي ساعه بالظبط من دهب تقدر تدخلها بالعربيه او اليخت من سقاله ترافكو بيوديك المحميه وجزيره تيران بتوعوم وتعمل وقفات سنوركلنج فيها
الانشطه في شرم كتير جدا طبعا من بانانا او باراسيلينج
افضل اماكن السهر في قريه الف ليله وليله المكان هناك روعه ومبني كأنك في قلعه علاء الدين وكلها من التراث الهندي
هجط صور للاماكن في ال replies

 

[Mohamed Mansour Ali]

من احلى و اسرع الرحلات الى طلعتها و رغم انها متعبة جدا الا انهم كانوا من احلى ايام حياتى
دهب - سانت كاترين و كنت اول مرة اروح كل الاماكن دى
شركة سياحة التكلفة 210 جنيه
السعر يشمل الباصات و الانتقالات هناك و البلو هول و الجلوس فى استراحة و عدة السنوركلينج ماعدا اللايف جاكيت (15 جنيه) و جبة غداء هناك فى الاستراحة (ماجبتهاش شكل المطبخ صعب ) الممشى السياحى دهب و رحلة صعود جبل موسى فى كاترين مع مرشدين بدو و عدينا على دير سانت كاترين و احنا راجعين وقفنا فى عيون موسى
و كان فيه انشطة تانية للى حابب زى سفارى البيتش باجى و دايفنج بفلوس زيادة
و عدينا على شرم من بره برضه فى الطريق و احنا رايحين
المناظر الطبيعية و الجبال و البحر فى دهب و السمك و السنوركلينج وهمى سبحان الله
دهب الممشى دمه خفيف و الكافيهات اسعارها كويسة و معاملتهم حلوة جدا
الجبل حكاية لازم تستعد كويس لبس كوتشى و كشاف و شيكولاته صعب فعلا و متعب للناس متوسطى اللياقة بس تجربة جميلة جدا لازم تجربها و لو مرة فى العمر هترجع بذكريات كفاية الاستراحات و احنا طالعين بالليل و الكوميديا و الناس الى بتشد بعض عشان يكملوا و الناس الى مفرهدة و بتعافر
كل ده كان فى الخميس بالليل اتحركنا و وصلنا مصر السبت المغرب
الميزة سعر اقتصادى و حاجات كتير و متنوعة بحر و جبل و تمشية
العيب طبعا الارهاق الشديد و انك تقريبا مابتنمش يومين او لو بتعرف تاخد غفوات فى الصبح و فيه ناس بتنام فى الباص ولا اكنها فى الشيراتون

 

[Mohammad Hijażi]

☆اسوان☆
بلد النوبة الجميلة ،بلد الاستجمام والاسترخاء بتشوف فيها احلي نيل واطيب شعب ممكن تتعامل معاه
اولا هنتكلم ازاي توصل لاسوان
في 3 وسائل :
1:القطار وده الاسباني درجة اولي مكيف ب135 والvip ب235 ده بيوصل من محطة رمسيس لاسوان في 14 ساعة او اكثر .
2:جو باص من مدينة نصر او ميدان عبدالمنعم رياض للاقصر وبعد كده من الاقصر لاسوان بالقطار او بمكيروباص او بيجو 7 راكب ويفضل القطار،اعلي درجة فيه اسمها ايليت بلس ب220 جنيه .وبيوصل من القاهرة للاقصر في 7 ساعات ونص او 8 بالكتير.
3:الطيران طبعا ديه احلي واريح واسرع وسيلة بتوصل في حوالي ساعة وربع واما السعر فمتغيير جدا للاسف .
لما توصل بقي بالسلامة ●اول حاجة واقرب مزار للمحطة هي مقابر النبلاء في البر الغربي لاسوان واللي فيها بردو جبل ابو الهوا ويفضل تتراح بالفالوكا بجنيه واحد من علي المرسي علي الكورنيش اما المزار نفسه فبحوالي 10 جنيه مش عارف بالظبط .●تاني حاجة هي جزيرة النباتات وبردو بتتراح بالفالوكا وديه فيها اشجار ونباتات نادرة .●ثالث حاجة هي متحف النوبة بيتراح بتاكسي وهو قريب جدا من المحطة يعتبر اخر الشارع ومواعيده من 9 الصبح ل1 ظهرا ويفتح تاني من 4 عصرا ل9 مساء.●رابع مزار هو المسلة الناقصة وهي قريبة من مستشفي اسوان العسكري ومش بعيدة عن المتحف بردو وديه عبارة عن مزار موقع انشاء المسلات قديما وديه مسلة اتشرخت منهم فسابوها مكانها كأثر فرعوني ،لذيذة الي حد ما.●خامس مزار معبد فيلة الجميل اللي انا متصور فيه ده وهو من المعابد المميزة الجميلة ومكانه علي جزيرة وسط النيل نظرا انه تم نقله قديما علشان غرق جزء كبير منه في مكانه الاصلي ده بتروح للمرسي بتاكسي وبعدين تركب مركب تدخلك للجزيرة جوا التذكرة ب10 جنيه والمركب ب60 جنيه وبيفتح من 7 الصبح لحد 4:30 -5 عصرا والصوت والضوء بيبدا من 6:30 اول عرض ومتوفر باكثر من لغة .●سادس مكان الخزان وده اللي تم انشاءه في عصر الاحتلال البريطاني لمصر مفيهوش حاجة تتزار من رأيي .●سابع مزار هو السد العالي مكانه بعييد عن المحطة بس قريب من المطار وهو جميل الي حد ما للصور التذكارية.●ثامن مزار هو تمثال رمز الصداقة وهو قريب جدا من السد العالي .●تاسع مزار هو معبد ابو سمبل الجميل الفظيع الرهيب من وجهة نظري بس ابوسمبل تبعد عن اسوان ب300 كيلو تتراح طيران او مواصلات من موقف الاقاليم لو هتأجر عربية وتسوق انت يبقي هتجيب تصريح من الغرفة السياحية اعلي مول الراية علي الكورنيش بعد فندق هلنان .
☆☆ يوجد معبد كوم امبو بمدينة كوم امبو اقرب من اسوان ب35 كم
☆☆ يوجد معبد ادفو يبعد عن اسوان حوالي ساعة ونصف بالسيارة.
☆معبد كلابشة ومعبد وادي السبوع ومعابد عمدا بتتراح من ضمن البرنامج السياحي للكروز اللي بتبقي من اسوان لابو سمبل اللي بتستغرق حوالي 6 ايام ذهابا وايابا .
☆جزيرة هيسا توجد بالقرب من معبد فيلة .
☆غرب سهيل (القري النوبية وجزيرة بربر )بتتراح يا بالسيارة او بالمركب .وبها فندق يسمي اناكاتو غير مصنف سياحيا.
☆جزيرة التمساح معنديش معلومات عنها .
♢اي استفسارات اخري انا تحت امركوا ويارب اكون افادتكوا .

 

[Noha Mohammed]

رحلة الأقصر وأسوان <‏3
مبدئيا الرحلة كانت مع الشباب والرياضة بمبلغ 250 ج، من يوم 13ل20 اكتوبر 2016 ‎‎
ركبنا القطار من محطة مصر يوم 13 الساعة ‏8 م ووصلنا الأقصر حوالي ‏9 ص ، السكة طويلة طبعا بس القراية والمزيكا تهون أي جراح ‎‎‏
وصلنا مدينة الشباب في المطود ودي قرية صغيرةجنب الأقصر حوالي نص ساعة بالباص ،بعد ما استلمنا الغرف نزلنا روحنا معبد الكرنك والأقصر اللي هما اعظم حاجة ممكن تشوفوها م حيث الحجم وجمال العمارة،بعد كدة روحنا اتغدينا الوجبة الكبيرة اوي دي ‎‎‏ وروحنا معبد الكرنك تاني عشان نحضر عرض الصوت والضوء ‎‎
تاني يوم فطرنا وروحنا معبد حتشبسوت ووادي الملوك اللي هيبهركم ازاي الالوان والرسومات لسة موجودة لدلوقتي ‎‎‏ وبعد كدة روحنا معبد مدينة هابو ورغم جمال نقوش المعبد ده وكونها غائرة حافظ عليها رغم كل ده المعبد مش مشهور اوي ‎‎‏ بعد كدة روحنا اتغدينا ونزلنا في جولة حرة ركبنا حنطور النفر بخمسة جنيه واكلنا فرايز من مكدونالد وطبعا روحنا السوق اشترينا هدايا صغيرة زي ميداليات ومحافظ ‎‎‏ ‎‎
‏-تاني يوم ركبنا الباص وروحنا اسوان ،الطريق ‏3 ساعات وصحرا كومبيليتلي ‎‎
وصلنا مدينة الشباب اللي بتطل ع استاد أسوان وتعتبر منطقة وسط البلد ،روحنا بليل حضرنا الصوت والضوء ف معبد فيلة وروحنا السوق اشترينا فسيخ ب35 وب70 وكركديه وتمر هندي وتوابل .
تاني يوم ركبنا المركب وروحنا جزيرة النباتات وشوفت شجر البن ‎‎‏ وبعدين روحنا القرية النوبية ركبنا جمل هناك ورسمنا حنة وشوفنا التماسيح وشربنا شاي بالنعناع روعة <‏3 أكتر حاجة لفتت نظري هي جمال النيل ف اسوان وطول المسافة اللي مشناها بالمركب للقرية النوبية "أكتر م نص ساعة" ملقناش حد رامي ورق أو زبالة في النيل ‎‎‏ روحنا استريحنا ونزلنا متحف النيل اللي بيحكي عن دول حوض النيل وبعدين ركبنا المعدية مع أهل اسوان ب2 ج بس ‎‎‏ وروحنا السوق تانية اشترينا توابل تاني وسندوتشات طعمية وبطاطس ب3ج بس ‎‎‏ ‎‎
تاني يوم روحنا المسلة الناقصة ومتحف النوبة والسد العالي وبليل خرجنا في جولة توديعية لأسوان ‎‎
وتاني يوم رجعنا للقاهرة الشريرة تاني ‎‎‏ ‎‎
لو التقرير عجبكم اعملولي لأيك عشان اخر مرة كسبت فيها كانت ايام ما كنا بنلاقي الفلوس الفضة في الشيبسي ‎‎‏ ‎‎

 

[Ramadan Mohamed]

"اسوان بلد السحر والجمال "

اولا هنبدأ من بعد الوصول الى اسوان وهنبدا بأول مزار واعتقد أفضل مزار للبداية للتعرف على تاريخ اسوان والنوبة والسد العالى ويكون عندك خلفية بتاريخ المدينة وحضارة النوبة وهو
" المتحف النوبى" مش هتحتاج اى مواصلة لأنة داخل مدينة اسوان هتمشى على كورنيش اسوان الهادى وهتلاقية بعد فندق كتراكت وتذكرتة 10 جنية بعد ما تخرج من المتحف هتروح تانى مزار قريب من المتحف ومش هنتحتاج مواصلة بردو ١٥ دقيقة مشى وهو "المسلة الناقصة" وهى مسّلة من الجرانيت منحوتة وأضخم مسّلة وجدت فى مصر ، وتذكرته 10 جنيةبعد ما تخلص المسلة تروح راجع تانى بقى وتدخل على فندق مشاهير العالم أولد كتراكت بما أنة اصبح شبة مزار سياحى موخرا .
فى يوم تانى هتبدا جولة النيل وفيها كام مزار مع بعض هنبدأ
"مقابر النبلاء" (قبة ابو الهوا) وهى عبارة عن ٦ مقابر فرعونية واجمل مكان للتصوير . على كورنيش النيل هتعدى بالموتور بجنية وترجع بجنية ، بعد ما ترجع تروح تتمشى على الكورنيش للاخر لحد ما توصل معديةجزيرةاسوان ومن هناك هتعدى لجزيرة اسوان بجنية لزيارة "متحف الحفائر الاثرية" (متحف الاينكس) ومعاة "مقياس النيل " كان بيستخدموة الفراعنة لقياس منسوب النيل هتخلص المتحف وترجع وتتفق مع موتور عشان تروج "جزيرة النباتات " فيها انواع أشجار فواكة وتوابل تذكرة 5 جنية .خلصت الجزيرة بتكمل الرحلة فى النيل للوصول" للقرية النوبية " ممكن تكمل مع الموتور للقرية وممكن تنزل جزيرة بربر وتاخد جمل من هناك وتدخل بية القرية تشوف التماسيح وتتصور معاها وترسم حنة وتشترى الهدايا النوبية تكلفة رحلة الموتور 200 جنية .
فى يوم ثالث هتبدا جولة بالتاكسى .لزيارة" السد العالى "وتذكرتة 2 جنية خلصت زيارة السد العالى وانت وراجع أوقف شوف "رمز الصداقة " المصرى الروسي .وخلف الرمز هتلاقى "مرسى جزيرة "معبد كلابشة " وتذكرتة 10 جنية والموتور من 60ل 80وانت راجع فى طريقك هتزور "متحف النيل " متحف جميل بيحكي تاريخ النيل والسد وافريقيا تذكرة 8 جنية وراء المتحف هتنزل بالتاكسى على مرسى "معبد فيلا " تذكرة 10 هتعدى بموتور للجزيرة من 60 ل80 تكلفة لكل المزارات التاكسى 150 جنية .فية صوت وضوء فى فيلة يبدا من ٦ مساء تذكرة 25
يوم رابع ودة " معبد ابو سمبل" تحجز من الفندق المقيم فية فى ميكروباص سياحى 120 جنية للفرد رحلة ذهاب وعودة . بعض مزارات الاخرى "دير الانبا سمعان "هو دير تاريخى من القرن السادس الميلادي فى البر الغربى خلف جزيرة النباتات "معبد كوامبو "ومتحف التماسيح " شمال مدينة اسوان ٤٥ كيلو، "معبد ادفو"( حورس) شمال مدينة اسوان ١٥٠ ك .
وأخيرا اخر يوم...لازم تاخد جولة فى سوق اسوان السياحى وتشترى منتجات اسوان والسودان من توابل وتذكارات وعطور وأنواع البلح وغيرة . الصور من أقصى الجنوب معبد "ابو سمبل "

 

[Anette Boutros]

الاقصر واسوان �انا حجزت مع شركة سياحة علشان مكنتش عارفة اجيب سعر كويس للمركب لوحدي لكن لما وصلت هناك اخدت ارقام المركب اللي نزلت فيها واللي جنبها
انا رحت طيران من القاهرة الاقصر ورجعت اسوان القاهرة علي نايل اير فضلت متابعة الاسعار لحد ماروحت ورجعت ب١٣٠٠ جنيه! نزلت من الطيارة ركبت عربية لمرسي الكروز ورجعت عربية للمطار.
الرحلة بتكون من الاقصر لاسوان ٤ ليالي ٥ ايام. الابحار بيكون كام ساعة في اليوم لمدة ٣ ايام تقريبا (يعني اول وآخر يوم المركب راسية)
اول يوم : البر الشرقي للاقصر (رحت معبد الاقصر ومعبد الكرنك. كان نفسي اروح هناك متحف التحنيط بس ملحقتش)�
وركبت معدية الاهالي عديت للبر الغربي بسعر المهر الشرعي ؟ ٢٥ قرش شربت سحلب ورجعت.
تاني يوم: البر الغربي للأقصر: وده مكان بسيط. فيه مزارع القصب وتشوف قطر القصب. ومكان هادي مفهوش مدارس ولا جامعات (لانها في البر الشرقي). المزارات :معبد حتشبسوت وده روعة و وادي الملوك. جمال المقابر دي ان الالوان كما هي لانها مش بتتعرض للشمس. كمان بتعدي علي تمثالي ممنون جمال جدا
ثالث يوم: ادفو وتركب الحنطور للمعبد. ثم ابحار لكوم امبو وتنزل مشي للمعبد. المعابد عادية هنا لكن بعد كده الكروز بتعدي علي حاجة اسمها هاويس إسنا (وده مكان منسوب المياه مختلف فيه علي الجنبين. المركب بتدخل في مجري ضيق ويتقفل عليها بوابة من كل ناحية. القبطان قال ان ده اهم وقت عنده في الرحلة. بتشوف المركب بتترفع كذا متر لفوق بسبب ارتفاع الميه
رابع يوم: السد العالي وحاجة مش فاكراها. وممكن تروح فيه جزيرة النباتات فيها نباتات من كل انحاء العالم ومنظر النيل روعة(الصورة اللي حطاها). والقرية النوبية و دي فيها النوبيين ممكن تعرف هم مين وتزور مدرسة ليهم وتسمه لغتهم. كمان هما بيربوا التماسيح وبيرسموا حنة حلو قوي. النوبة منطقة نضيفة قوي مفيهاش ورقة في الارض.
خامس يوم: ممكت تروح معبد ابو سمبل (اللي في الصورة) جميل جدا. هو بعيد شوية ٣ ساعات ونصف رايح وزيهم راجع. هو جميل جدا ويستاهل وممكن يتراح طيران كمان.

الكروز تجربة جميلة و وقت استرخاء، مركب فيها يجي ٦٠ غرفة ومطعم و السطح بتاعها جميل في الغروب وفيها بيسين صغير. كمان كل يوم بترسي عند مكان مختلف فبتنوع.
الاقصر واسوان فيها اماكن اكتر تتراح لكن مع مواعيد تحرك الكروز ممكن متقدرش تروح كل حاجة (حاجات زيادة عن البرنامج المكتوب). مكان جميل للي عايز يفهم تاريخه او بس يروح بعيد عن زحمة القاهرة.�ملحوظة: ممكن تروح من اسوان الي الاقصر ٣ ليالي ٤ ايام
وممكن تحجز عدد الليالي اللي يعجبك كمان بس تتآكد من المرسي اللي هتكون فيه علشان تعرف تتحرك ازاي، يعني انا قعدت ٦ ايام ٥ ليالي لانها كانت هتفضل راسية اليوم ده في مكانها.

 

[Yasmin Elkafafy]

قررت قرار سريع وروحت حجزت تزكرة القطر من محطه مصر ورجعت وقولت لاهلى انا مسافرة اسكندرية بكره.
تزكره القطر كانت ب30 جنيه وكنت منبهرة بالنضافه ايه دا مكنتش متخيله كدا ابدأ بعديها بشوية جيه واحد كدا بيبع مايه وشاى وحاجة ساقعه وساندوتشات الاسعار ما بين 5 جنيه لحد 20 جنيه وودى اول مرة اعرف ان فى حاجات بتتباع فى القطر ودا طبعا هيوفر عليا انى اشترى مايه او سناكس من الطريق

-مرحله الاكتشاف ^_^
وصلت محطه سيدى جابر ومنها على الترام اللى ودانى عند مكتبه الاسكندرية الصور على الترام بتاع اسكندرية تحفه جدا لدرجه انى لما نزلتها اصحابي فكروا انى سافرت بره مصر بعد كدا
دخلت المكتبه لقيتها زحمه جدددددددددددددددددددا ومش عارفه ليه يعنى قولت مش هضيع وقت الرحله فى طابور طويل عريض
صديقى اللى قابلنى فى اسكندرية قالى فى حاجة كدا ممكن تتعمل بدل المكتبه
دخلت قبه كدا بتعرض افلام عن الفضاء تحسها 9D وتحس انك دخلت الفضاء اصلا كنت اول مرة احس الاحساس دا مبسوطه جدا اول مرة اعرف ان مصر فيها حاجة زى دى.. بس مشكلتها نك بتحجز قبلها باسبوع

*فقره الاكل ^_^
حد اقترح عليا يودينى مكان بقا زى صبحي كابر عندنا اسمها حودة جوندور (الشاطبي)في الازاريطة قريب جدا من المجمع
حاجة كدا فظيعه حاره كلها سمك تختار اللى انت عاوزة ويجيلك السلطات والشورية والرز ببلاش
اكلت طبق مشكل حاجات فظيعه كدا هوريكم الصور وسعر الطبق 50 جنيه احنا كنا اتنين والاكل بينزل معاه سلطات وعيش ورز وشوربة وجبت جندوفلى كل كدا دا 75 جنيه

بعدين بقا روحت اكل ايس كريم الطبيعي انك تقول ايس كريم تقول عزه او سلطانه بس انا كا واحدة جربت الاتنين المرة دى اصحابي الاسكندرانيه اخدونى عند محل ايس كريم سورى حاجة كدا فظيعه والله يا جماعه اكلت 5 بولات
سعره مش غالى بس هو مقارنه باماكن كتير جربتها فى اسكندرية هو احسنهم الصراحه
*****ايس كريم تريفيلو في العصافرة *******

بما انى من عشاق الشوارع الهاديه والمبانى القديمه فا كان اقتراح من اصحابي انى اروح الحى اللاتينى ..
شارع كدا عندنا زى الزمالك كله اشجار وفيلل وقتها كنت بلف فيه بالعربيه ومشغله اغانى فرنسي الحقيقه كنت لاول مرة بشوف اسكندرية وشوارعها بعين جديدة .
بعدها روحت الجندى المجهول واتصورت هناك المكان دا ازاى حلو كدا وازاى مش منضفين حواليه؟ يعنى فى كذا مشروع بيجى يقف قدامه وناس وناس جايه المفرروض يكون فى اهتمام اكتر من كدا يعنىز
الجزء الاحلى من كل دا انى روحت عند القلعه روحت القلعه بليل وفى مكان كدا ورا القلعه عباره عن شوية صخور بتتسلقها وفى الاخر بتوصل لاحلى قمه بتخليك تشوف الكورنيش كله ^_^ هو الموضوع فيه مغامره شوية انك تطلع 6 7 صخور فوق بعض بس المنظر مع صوت البحر يستاهل انك تجازف المكان ملهوش اسم فا قررت اسميه (صخور بنت الكفافى ) منسوب ليا وكدا
اخر ساعه فى الرحله جبت لاهلى هريسه وبسبوسه من عند احمد حسنين وصديقى جابلى ميداليه مكتوب عليها اسكندرية لانى من الناس اللى بتحب الميداليات جدا *_*
دا بقا بالظبط الفرق بين انك تسافر لوحدك وتقابل ناس من اهل البلد يلففوك فيها وبين انك تروح مع رحله تلتزم ببرنامج معين ا وتعمل الحاجة اللى كل الناس بتعملها وترجع وتقول انك سافرت وكمان دى كانت اول مرة ليا استخدم برنامج #couch_surfing جوة فى فى انى اقابل ناس تخرج معايا وتلففنى البلد
وركبت قطر الساعه 9.15 كان حقير جدا ووصل متاخر بس جى غلطتى انى محجزتش رايح راجع وعرفت كل قطر شكل بيكون عامل ازاى القطر وانا راجعه كان سئ للغايه فا لازم احجز وانا رايحه رايح راجع او اول ما اوصل المحطه فى اسكندرية
سافروا يا جماعه السفر مش بره بس فى حاجات كتير حلوة جوة انتوا لسه مشفتوهاش

 

[Lobna Maher]

رحله اقصر واسوان :
طلعتها مع اهلي ركبنا قطار VIP من القاهره الساعه 9 بليل من القاهره للاسف كان بيقف كتير جدا وصلنا حوالي 1 ظهرا القطر نضيف جدا والحمامات تشبه حمامات الطياره الي حد ما وصلنا اسوان ونزلنا في نايل كروز جميله جدا اسمها Queen Nabila او طيبه وكانت خمس نجوم وصولنا متاخر ساهم اننا نضغط في بروجرام الرحله اول يوم كان كله مرهق وتعبان يادوب عملنا جوله حره في اسوان اشترينا توابل ولفينا في الاسواق وركبنا حنطور لففنا لفه حلوه تاني يوم رحنا السد العالي ومعبد جزيره فيله ورحنا بجوله نيليه رهيبه وتحفه لحد غرب سهيل ودي كانت اجمل جزء في الرحله لدرجه اني بفكر اروح رحله تانيه للنوبه بس
رجعنا من الرحله النيليه بدات الكروز تتحرك بينا في طريقها للاقصر المنظر كان روعه والكروز ماشيه في قلب النيل ورحنا معابد كتيره في الطريق ولقينا ناس بمراكب صغيره جنب الكروز بتبيع حاجات حلوه اوي ورخيصه اشترينا شال جميل ومفارش للسفره عليها رسوم فرعونيه واكسسوارات جميله ورخيصه جدا وصلنا بليل للاقصر ورحنا الصوت والضوء في الاقصر مافيش كلام يوصف المنظر بليل فعلا كأنك في مصر القديمه وانتقلت من عالم لعالم تاني يوم زرنا معابد الاقصر كلها للاسف اليوم كان مضغوط جدا نتيجه لتاخير اول يوم رحنا معبد حتشبسوت ومعبد الكرنك ومقابر النبلاء وبعدها عملنا جوله حره في الاقصر بس اهل اسوان اطيب بكتييييييير وركبنا القطر علي حوالي 6 المغرب ووصلنا القاهره 6 الصبح ماحسناش بالوقت لانه تقريبا كله نام واتمني اعيدها تاني

 

[Mena Maher]

استاذ معتز بعد اذن حضرتك انا مش قادر اكتب بوست عالجروب وعندي سؤال ومحتاج مساعدتكم
Moutaz Mohamed

 

[Karim Nour]

سافرت اربع ايام اجازة .. من ٩ شهور فاتو ولسه مرجعتش .. الارض العذراء .. ❤ سيناء

مش بشترك في المسابقه .. وبدعم الفكره

 

[Ah Med]

يا ريت الناس اللي بتكتب تجربة تكتب تاريخ الرحلة كان امتى عشان الاسعار بتختلف

 

[Sameh Mohamed Mohamed]

انا هاتكلم عن #دهب جايز هاتستغربوا لو قولت انى عايز اتكلم عنها من باب التشجيع على السفر والحديث عن جمال مصر مش علشان اكسب الجائزة المرشحة فى بداية كلامى عن #دهب احب اقولكم انها ممكن تكون إمكانياتها شبه مناطق تانية كتير في سيناء، ولكن روح دهب مختلفة تماما أقدر أقول إني تقريباً لفيت سيناء ولكن تبقي دهب "قطعة القلب المفضلة"، أكثر سبب ممكن يميزها بعد كم المزارات اللي فيها وجمالها الطبيعي يبقي الروح الموجودة هناك، الهدوء والروقان اللي مش هتلاقيه في حتة تانية"!
#دهب، مدينة عشاق السحر والجمال والبساطة والهدوء، ومكان رائع لمحبي #الدايفينج ، #والتصوير، والاستمتاع بمناظر #الجبال، هناك فى #اماكن كتير ممكن تروحها فى دهب . زى البلوهول، أو الثري بولز ورأس أبو جالوم وسانت كاترين وجبل موسى ومن مميزات دهب هي التنوع في كل شيء، أي شيء تحتاجه هاتلاقية هناك وبأسعار رخيصة ، اختيارات الاكل متنوعة وجميلة ورخيصة، ويوجد كل المستويات،ومن رأى الشخصى اعتبر الفنادق هناك للنوم فقط، وإنزل وجرب المطاعم هناك، "انا كنت دايما الصبح انزل وخد قرص طعمية سخن وشوية بطاطس، مع الفول حكااية"، أو جرب الجيرمان ، وبعدها بقى القهوة والنسكافية قدام البحر". وبالنسبة #للأقامة هناك " حسب الميزانية تتحدد أفضل الأماكن يعني أنا خلال المرات اللي روحت فيهم دهب عديت علي أغلب مستويات الفنادق من أول الغرفة اللي #ب١٥ جنية في اليوم إلي اللي #ب٢٠٠ جنية وأنا ارشح النزول في أماكن زي (سيفن هيفن، ميرامار، بنجوين، بدوين دايفرز، ودولفين، وسندباد، رينج للغرف بيتفاوت من حوالي ٥٠ جنيه فيما فوق. ميزة الأماكن دى هي الجودة وأنها كمان رخيصة وكمان "الميزة في الاماكن دي إن أغلب #backpackers وهما المسافرين المعتمدين علي الميزانيات المنخفضة، بيروحوا الأماكن دي بتبقي فرصة حلوة لو لكل المستويات والطبقات مش يعنى للأغنياء فقط زى الساحل الشمالي وبورتو سخنة ،
وبالنسبة لميزانية دهب ممكن تبدأ ب 600 جنيه
، 1-#المواصلات "رايح جاي من الترجمان- العباسية-ألماظة ب٢٠٠ جنيه". - أول لما توصل دهب هتلاقي فى المحطة تاكسيات علي هيئة عربيات هتوصلك للمدينة، والفندق، ماتدفعشى أكثر من 5 جنيةةوكمان 5 وأنت راجع للمواصلات 2- #السكن :- زي ما اتفقنا فيه مجموعة فنادق سعر الغرفة فيها من ٣٠ جنية حتي ١٥٠، وكل فئة حسب إمكانيات الغرفة والفطار، وافتكر إن فائدة الغرفة الوحيدة أنك هتنام فيها بليل وفر يعني ، يعني لو أخدنا حاجة فى الوسط غرفة ب50 في 3 أيام يعني 150 جنيه.
* بعد السكن والمواصلات بقينا 360 جنيه - بالنسبة للفسح أجمل مكان لازم تروحه في دهب منطقة اسمها البلوهول هتدفع بين ٢٥-٥٠ حسب السنوركلينج اللي هتأجره. وهتروح بجمل أو عربية، وكمان هتلاقي مناطق كتير مش هتصدق من جمالها أنها في مصر زي محمية أبو جلوم والثري بولز وجبل موسي ودير سانت كاثرين والكالور كانيون. - خد بالك يا صديقى انا مجبتش سيرة الدايفينج علشان لو عايز تغطس هتدفع أكثر من ٥٠٠ جنيه لأن تكلفة الغطسة هناك في حدود ٢٥٠ جنيه. 4 - الأكل :- بالنسبة للأكل تقريبا نفس اسعار القاهرة في كل حاجة يعني ممكن تجيب أكله تشبعك ب٣٥ جنيه فيها ربع فرخة وشوربة وسلطة وعيش وزود بفلوسك بقي. وانت داخل دهب لازم تزور الأماكن دى :

1- #البلوهول: أجمل مكان للغطس، والسنوركولينج في مصر ، عمق البلوهول اكثر من ١١٠ متر ١١٠ متر 2- #الثري #بولز : دي منطقة خاصة للشعاب المرجانية "متفوتكش" . 3: #وادي #جنى: عبارة عن واحة صغيرة تجد فيها خضرة ونخل ومياه في حضن الجبل. 4- #محمية #رأس أبو #جالوم: دى عبارة عن محمية طبيعية بعيدة عن دهب فى حدود ٢٠ دقيقة بالمركب، وهي محمية طبيعية،، 5_#منطقة #الكيفيز الcaves منطقة رائعة للسنوركلينج، والمميز فيها وجود الشعاب المرجانية تحت الشاطيء مباشرة. 6- #جبل #موسى #وسانت كاترين: جبل موسي وسانت كاثرين، طبعاً جبل موسي من أشهر القمام الجبلية في مصر والمميز فيه الطابع الديني لأنه المكان الذي كلم منه سيدنا موسى ربنا، والجبل فعلاً من التجارب الممتعة، تشعر معه بروح المغامرة، وطبعا لازم تشوف لحظة الشروق من أعلى الجبل، مشهد لا يعوض، بعدها رحلة النزول والتي تستمر ساعتين حتى أسفل الجبل لزيارة دير سانت كاترين.
7- #بلو #لاجون: وهو من أجمل مناطق البحر الأحمر عموم، هناك ستجلس على لسان في قلب البحر، كما أنها منطقة رائعة للتخييم مثل أبو جالوم.
8- #منطقة #الفنار(اللايت #هاوس): دة أكثر مكان أمن نقدر ننزل فيه البحر ونستمتع قدر المستطاع بالسباحة والغطس، ويعتبر كورنيش دهب .. نيجى لأخر حاجة وهى #شنطة #السفر #لدهب وانت رايح دهب، فى حاجات مهمة بشكل أساسي زى كاميرا وشورت وفانلة وكاب "لبس مريح، كوتشي مريح للجبل، كاب ونضارة شمس، لبس ثقيل شوية للبرودة أعلى الجبال، شنطة ظهر صغيرة للتجول هناك، سبراي للجلد وكريم واقي للشمس" واستمتع بقى بوقتك ونزل صورك ودلع نفسك .. have fun
اتمنى يكون البوست عجبكم ولو فى حد عندة اى استفسار تحت امركم
شكرا للجميع .. اجمل امنياتى بالحب والسعادة

 

[Sameh Mohamed Mohamed]

Doaa Mohamed Sara Rodrigues Soares Nora Mohamed Tasnim Dawood Mohamed Megahed Mohamed Khaled Noha Mohammed Mohamed Aref Ahmed Assy Ahmed Moneim Ahmed Gamal Nedal Al-Akeel Bosy Bosy Marcelo Gray لايك هنا لو سمحتم

 

[Sameh Mohamed Mohamed]

Ranya Embaby Rony Hussein Youssef لايك هنا لو سمحتم