السلام عليكم انا كنت بخطط لرحلة سياحة لالمانيا انا و زوجي و ٣ اولاد ،،انا...

[Sohaila Khaled]

السلام عليكم انا كنت بخطط لرحلة سياحة لالمانيا انا و زوجي و ٣ اولاد ،،انا اخويا مقيم هناك و عايزة اقدم ع فيزا سياحة طبعا عرفت ان من اهم الأوراق الحساب البنكي لآخر ٣ شهور ..
سؤالي الاول هل هيفرق الحساب ده باسم مين انا او زوجي (مع العلم أني مش بشتغل حاليا )بس انا اللي حسابي البنكي active
تاني سؤال انا دخلت ع موقع.TLS و هما طالبين أوراق معينة بس اخويا بيقولي زودي أوراق تانية تثبت انك راجعه تاني زي صور من رخصة عربيتي و عربية زوجي أوراق من النادي مثلا ان الأولاد مشتركين في الفرق الرياضية ، اي عقود عقارية نملكها ،، هل ده مفيد فعلا و لا التزم بالورق المطلوب فقط ..
انا ناوية ان شاء الله نقضي يوم رايح جاي في فرنسا و يوم رايح جاي في هولندا و حاسبة التكاليف اقدم ورقة بردة ب دة و لا انا متفائله جدا و نسبة الرفض كبيرة ،،

 

[Khaled Badry]

الاوراق مطلوبة من المتقدم الرئيسي وطالما حضرتك مش بتشتغلي يبقي الزوج هو المتقدم الرئيسي , هتلتزمي بقائمة الاوراق علي موقع التقديم فقط , ممكن ارفاق اوراق القيد للاولاد في المدرسة , الاصول العقارية طالما مش بتجيب دخل ملهاش قيمة , موظفين ال TLS في غالبا بيرفضوا استلام اي اوراق غير مطلوبة من السفارة ومفيش داعي ذكر رحلات فرنسا وهولندا او ان لحضرتك اخ مقيم في المانيا .

 

[Ragia Mohamed Abdelmon'em]

خلى اخوكى يعملك دعوة موثقة من هناك..بيكون فيها اسمة و شغلة و عنوانة..و بياخدوا منة كل تفاصيل شغلة و مرتبة و مساحة شقته عشان لو هيستضيفكوا..الورقة دى قوية جدا انا اخدت الفيزا بيها ..كمان قدمى معاها صورة ال id بتاعة

 

[Marwan H. Soliman]

ايوه فعلا مفيد كل الاوراق اللي قالك عليها ، اثبتات انك راجعه

 

[Mahmoud Lamloum]

اي أوراق مش مطلوبه محدش حيستلمها انا سافرت انا و مراتي بكشف حسابي بس و هيا مش بتشتغل و لا ورق املاك و لا حاجه

 

[Samar Taweel]

Eman Eltaweel

 

[Enass Attia]

انتي حتقدمي فيزا سياحه
اهم حاجه ان الحساب يكون مغطي المده اللي حتقعديها
وخدي بالك ان الورق بيكون مترجم والتزمي بالأوراق المطلوبه
وحجوزات الفنادق للمده كلها بالايام وطبعاً عادي ان الاسره كلها طالعه سياحه مادام التكاليف متغطيه
واعملي برنامج لفرنسا وهولندا
بس انا شايفه يوم واحد قليل قوي ومجهد
لو ماعندكيش وقت كافي اختاري بلد واحده علشان تستمتعي انتي والأولاد
ان شاء الله حتتقبلي

 

[Mohamed Riad]

نصيحة اكتبى اللى هتصرفيه تقريبياً فى الرحلة لانهم بيقارنوها بالدخل ومتبالغيش فى الارقام، اكيد الاوراق اللى تثبت رجوعك مهمة جداً، بس متزوديش الورق قوى عشان ميقلقوش، اللى اعرفه ان لازم لكل واحد حساب بنكى او حساب مشترك بينكوا، انا كان بيطلبوا منى كدا بس دا كان اقامة مش فيزا، جايز الفيزا الوضع مختلف.

 

[Amr Ibrahim Diab]

حاول تفكك من المانيا اساساً وركز مع فرنسا والافضل بقي انك تصبر لان شكلك اول مرة واليومين دول بترفض جامد وخاصة كمان بعد الحادث الاخير

 

[Amr Ibrahim Diab]

نسيت اقولك بقي وموضوع اخوك ماتجبشي سيرته خالص بقي لانك كدة وش مش راجع بالنسبه للسفارة

 

[Roshy Rahim]

F

 

[Marwa Abdo]

معلش سؤالي الأخير اقدم ع الفيزا قبلها بقد إيه ؟!

 

[Enass Attia]

من حقك قبلها ب٣شهور
وكمان خدي بالك سفاره المانيا زحمه وبيبقى مافيهاش مواعيد
فقدمي بدري