B
Bedo Abd El Samad
:: مسافر ::
كنت نزلتهم قبل كدة ع 3 أجزاء ده بوست واحد ليهم كلهم 
دي تجميعة لردود، مواقف، محادثات، دروس حياة، سميها زي ما تسميها من ناس قابلتها وانا مسافر سواء مسافرين زيي أو أهل بلد، كُبار أو صغار.
دول كاتبهم أولًا لنفسي عشان أفضل فاكرهم وثانيًا عشان الناس تتسلى بقرايتها، تعرف الناس التانية بتفكر ازاي، مصدر للإلهام أو تساعدك ف حسم قرارٍ ما، أو ممكن تستمتع بالحكاوي وخلاص من واحد مجرد ذاكرته كويسة وخطه إلى حدٍ ما حلو
____________
* مجهولة -مضيفة طيران هندية ع الخطوط السعودية كانت خارج الخدمة ومروحه جنبي ع الطيارة للهند- :" انت عارف انا كنت بكره المسلمين الأول من ساعة متولدت واحنا طبيعي بنرضع كره باكستان بس لما اشتغلت كنت قاعدة ف أوضة مع واحدة باكستانية، عارف .. سهل أوي نكره حاجة احنا مش عارفينها، دلوقتي هي أقرب لقلبي من أي حد عرفته من محيط حياتي، لما تشوفها وهي بتاخد بالها مني وانا عيانة والعكس، هتعرف إن مفيش فرق بين لون وعرق ودين لما تحب حد
___________
* مجهولة(٢) -كانت بتسمع أغاني وفجأة اديرتلي- "عارف أنا مكنتش اجتماعية زمان كنت بدرس واشتغل وبس، بس واحده واحده اكتسبت جرأة الكلام مع الغرباء وبقيت اتحدى نفسي كل مرة، ازاي هنتعلم من بعض طول محنا ساكتين، لما كلمتك دلوقتي وفتحت موضوع كسبت التحدي مع كسوفي للنهاردة -بتبتسم- الحياة عبارة عن شوية انتصارات صغيرة.
___________
* مجهولة(٣) : مش مهم نعرف اسم بعض، الموضوع كدة ممتع أكتر، وتقريبًا لو اتقابلنا تاني مش هنفتكر شكل بعض، بس المهم اننا هنفتكر اننا انبسطنا ف الكام ساعة اللي دردشناهم دول مع حد غريب.
_____________
* مجهول -ده كان موظف سيخي لشركة الطيران اللي كان معايا لمّا الboarding pass بتاعي ضاع ف مطار الهند وبمعجزة لقيته ولحقت طيارتي بعد ربع ساعة بعد موقف عصيب- بصلي وابتسم :" تبيّن أن الله لديه خطط لك ف ماليزيا اليوم.. رأيت.. لا تفقد إيمانك أبدًا".
________
* جون -سنغافورة ٢٠ سنة- "انت عارف إن التجنيد عندنا إجباري من ١٨ سنة! يعني بنوصل ١٨ نروح ع الجيش علطول لمدة سنتين، بعدين بنخرج المفروض لسه هنبتدي حياتنا ومش عارف هدرس ايه فقلت اسافر سنة أعرف انا بحب إيه وهدرسة، يمكن حوار الجيش ده خلى هيبقى اختياري لمجال دراستي أنضج، بس حاسس إن كان بدري شوية احساس إن واحد صاحبك يموت ف ايدك وانت عندك ١٨ سنة ده مش ممكن تنساه، عارف .... غالبًا شكلي لما اروّح هرجع للجيش".
_________
* عُمر كارونا -مالطا ٣٤سنة- :" سؤال انت مش متجوز ليه محدش بيسأله عندنا، طالما انت مبسوط دايمًا -من غير مخدرات- محدش هيسألك ع أي حاجة، أهم حاجة إنك مبسوط!"
___________
* عُمر(٢) :" في فرق كبير بين سائح ومسافر الأولاني أي حاجة وحشة هتحصله هيتأفف ويضايق ومش هيبقى مرن إنما التاني بيتقبّل أي حاجة ويعتبرها درس أو جزء م التجربة".
_________
* عُمر(٣):" أنا بحترم كل الأديان والثافات وعشان كدة لما مكنوش بيبيعوا خمرة بليل وأنا ف إندونيسيا عشان شهر رمضان معترضش عشان دي عاداتهم، بس ليه وانا راكب الأتوبيس السواق وقت الإفطار وقفه ونزل وسابنا ساعة إلا ربع بيفطر ورجع من غير ميعتذرلنا حتى، في ناس عيّانة وناس وراها مواعيد كانت محتاجه توصل المدينة التانية... اعتقد إن كل الآلهة أكدت ع احترام الوقت!"
__________
* عُمر (٤):" مستغرب من اسمي طبعًا، أنا مسيحي أوروبي ياسيدي بس عارف إن اسمي عربي، بس صدق أو لا تصدق عُمر كان اسم مشهور أوي لمواليد السنة اللي اتولد فيها ف مالطا، كلنا متسميين ع اسم ممثل مشهور أوي، عُمر الشريف".
_____________
* طوم -هولندي ٢٩سنة- :" مش متخيل إن في ناس بتتولد وتكبر وتعيش وتتجوز وتخلف وتموت ف نفس الشارع، الحياة فيها كتير لازم يتشاف، المشكلة إنهم أكتر ناس مش بيفهموا تفكيرك وبيحكموا عليك، ببقى نفسي أقولهم بس سافروا مرة وانتو هتفهموني".
____________
* طوم (٢): "عارف نفسي يعملوا ف خانة الديانة أوبشن جديد اسمه "مسافر" أو حتى ديانة جديدة عبارة عن شخص بيتقبل كل عرق ودين ولون، معندوش حاجز لعقله مع أي حد مش بيكره حد.... أكيد هيبقى شىء عظيم وسط الحروب الطائفية والعرقية اللي مالية العالم دي".
______________
* سوزانا- ألمانيا ٢٣ سنة- :" أنا مش عارفه، مش مؤمنة بربنا أو قوة عليا... بس بحاول أبقى شخص كويس طول حياتي ولو في ربنا ف الآخرة هقوله (شفت أنا كنت كويسة طول حياتي أهه دخلني الجنة بقا )
_____________
* سوزانا(٢) :" مش عارفه أدرس إيه لحد دلوقتي، بس هما بيقولوا إني غبية ومليش ف التعليم طول حياتي، بس مش عارفه هجرب لما ارجع م السفر يمكن اطلع بعرف".
_______________
* حاتم -مصري ٣٤ سنة- :" ٢٣ سنة هههههه صغرتني أوي، يعم أنا ٣٤ اتخرجت وشتغلت واتجوزت وطلقت كمان، كانت بنت ناس مش حِمل مرمطة وانا كنت برضه غشيم حبتين قلتلها عاوزه إيه قالتلي نتطلق قولتلها ماشي، بس يا سيدي قمت مأجر شقتي وابتديت أسافر".
_______________
* حاتم (٢):" عارف مصر دي قهوة عشان تفضل فيها يا تبقى حاجة من اتنين يا صاحب القهوة اللي شغلته يلم فلوس من زباينه الدكاترة والمهندسين والظباط والسواقين يا تبقى موظف بيشتغل ويطلع ميتينه وبيروح يقعد وخلاص ويدي فلوس لصاحب القهوة الفلوس لحد عنده".
________________
* حاتم(٣):" انت أسنان! أبويا برضه دكتور سنان، بس دي شغلانه تقصف العمر والضهر يا جدع، أنا ابويا اقسم بالله كان بيتأوه وهو نايم ... كنت اسمعه بليل واروح أسأله مالك يا بابا تعبان ألاقيه نايم، بس كان دايمًا يقولي ان عيادته والعيانين عنده بالدنيا".
________________
* فرانك فوس -هولندي ٤٧ سنة- :" متكلمنيش عن ظروفك ومشاكلك واحباطك ويأسك!، أنا أمي انتحرت وانا عندي سنتين، أخويا الأول انتحر وانا عندي ١٢ سنة، وأخويا الكبير انتحر وأنا عندي ١٤ سنة!، اتجوزت ٣ مرات وطلقت، كل ده قاعد معاك دلوقتي ف دولة ف آخر العالم بضحك!".
________________
* فرانك(٢):" أبويا كان شخصية قذرة جدًا، كرهته طول حياتي وهفضل أكرهه لحد مموت هو السبب فكل حاجة، العلاقات الچينية هراء، مش محتاج تحب عشان هو مجرد خلفك، العلاقات والمواقف والحياة هي اللي بتخلق الحب مش شوية چينات وشبه بينكم".
______________
* فرانك(٣):" انا اتجوزت ٣ مرات وفشلوا، لو هنصحك بحاجة متتجوزش.. متتجوزش.. ولو اتجوزت لو حسيت للحظة إن مفيش حب انسحب علطول، الطلاق أحسن ١٠٠ مره من علاقة من غير حب".
_____________
* فرانك(٤):" بعد كل اللي مريت بيه ف حياتي قررت أعيش ليومي وبس -بيرفع الكاس- أهم حاجة اني لو مت بكره هموت مبسوط".
_______________
* فرانك(٥):" لو حطيت فدماغك إن أي شغل بتعمله هيخلي حد مبسوط هتتحمل كل حاجة الشعر اللي كنت بلمه وانا بنضف الحمامات كنت بقول ده بيخلي النزيل اللي هيقعد ف الأوضه مبسوط، دا خلاني أقوم بالشغل ده لسنين".
__________
* فرانك(٦) -فرانك، عملت ايه ف مشكلة الفيزا عشان سفر بعد بكرة
-مش عارف هتتحل ازاي، بس دي مشكلة بكرة.. خلينا ننبسط النهاردة
___________
• فرانك(٧):" انا عارف انك مبتحبنيش أشرب كتير، بس أنا بشرب من وانا عندي ١٢ سنة، شربي الكتير ميختلفش عن ادمان الآخرين للسجاير حتى لو مش بيشربوا، كلا الحالتين حاجة لعينة متحكمة فيك".
__________
* فرانك(٨):" انت شخصية كويسة جدًا وعندك طاقة وذكي، بس مشكلتك بتقلق كتير، الكلية والنجاح والتقدير، انا شخص ممكن تقول محصّلتش تعليم كويس، بس انا شخص سعيد، السعادة عمرها مكانت مرتبطة بشهادة، احنا .. احنا اللي بنخلقها وبنضيعها ورا سعينا ورا المظاهر والثروة".
____________
* فرانك(٩):" انا بعت كل حاجة ف هولندا وسافرت، بسافر من غير فلوس، المكان اللي بيعجبني بقعد اشتغل فيه، لو زهقت منه باخد شنطتي واروح مكان تاني فبلد تانية، انا عارف إني مش هرجع هولندا تاني، غالبًا هموت سعيد وشنطتي ع ضهري ف مكانٍ ما ف العالم".
-وما تدري نفس ما تكسب غدًا وما تدري نفس بأي أرض تموت
-جميلة أوي الجمله دي... غالبًا هعملها تاتوو ع ضهري ... وما تدري نفس بأي أرض تموت!!!.... عظيم!
____________
* كريش -ماليزي هندي الأصل ٥٩ سنة-:" أنا كنت شغال عامل ف بنك، بس بعد ما طلعت معاش، حطيت كل فلوسي ف المكان ده -هوستيل- بحب الناس بحب اتكلم معاهم، عملت المكان ده عشان اتكلم مع الناس، اعملهم مكان رخيص يحسوا بيه بالراحة والنقاء بعيد عن الفنادق الغالية، بس ع الشجر والغابة، ممكن تتمنى ايه أكتر من كدة".
___________
• كريش(٢) :" السيدات اللي جم م السودان قاعدين لوحدهم ع باب الأوضه هاتهم هنا يقعدوا مع الناس ويندمجوا، متستغربش .. مبعرفش أشوف حد قاعد لوحده أو حزين ف مكاني".
_________
• كريش(٣):" بتسألني عن ديانتي ليه! انا سألتك عن ديانتك! انا حبيتك من غير أي شروط مش مهم، بلاش السؤال السخيف ده، وأنا هندوسي يا سيدي يلا هات سيفين نحارب بعض م المخزن -بيضربني ف كتفي وبعدين حضني-
_____________
• كريش(٤):" انا هطبخلكو النهاردة بس أكل نباتي -بيبصلي بطرف عينه- بس عارف إن رجل اللحمه هنا عاوز يقتلني دلوقتي".
___________
• كريش(٥):" هتروح ع الترابيزة تاخد أكلك هتلاقي حِلّه مكتوب عليها x دي اللي فيها لحم خنزير ماشي عشان تاخد بالك".
_____________
• كريش(٦):" عارف اني مش هقدر اخليك تقعد هنا اكتر من كدة ولازم ترجع لدراستك ف مصر، نصيحتي متفكرش ف الفلوس، الفلوس ولا حاجة، عيش سعيد وافتكرني!".
___________
• كوتشي- ماليزي هندي الأصل ٦٠ سنة- :" -كريش دا من أجمل الشخصيات المكافحة اللي ممكن تقابلها فحياتك
-اه بس غريبة جاب فلوس المكان ده منين
-من شغله فالبنك
-بس دا كان مجرد عامل!!
-هههههههههه متواضع كريش أوي، مكملّكش الحكاية.. كريش بدأ كعامل بيمسح المكاتب! لكن طلع معاش وهو مدير نفس البنك! لا مستحيل يا صديقي".
____________
• ڤيلو -ماليزي هندي الأصل ٥٥ سنة- :" انا وكريش وكوتشي مع بعض من ساعة متولدنا كريش بقا مدير بنك وأنا سواق تاكسي وكوتشي مقاول طرق، شغلانات مختلفة ف البرستيچ زي مبتقولوا، بس اديك شايف لسه مع بعض -بيبصلهم الاتنين وبياخدهم حضن وبيضحك- الهنود بيفضلوا دايمًا مع بعض للنهاية، لا يمكنني إبدال هؤلاء الحمقى بأي ثمن".
____________
• ڤيلو(٣):" -عاوز ايه عشان اطبخهولك يوم سفرك
* -لا يعم أخاف تحطلي لحم خنزير ولا حاجة
* -كشّر كدة- اللي بين أي اتنين ف الدنيا هو ثقة .. مش مهم ديننا ايه، دا معتقدك وعمري مخون ثقتك.. بس قولي يعم مبتكلهوش ليه دا طعمه حلو أوي
____________
• ڤيلو(٤):" -يلا عندنا حفلة شوا دلوقتي
* -حفلة شوا !!
* -أه أبو "باردي" صاحبنا مات ورايحين نحرقه
* -!!!!
* - يبني احنا هندوس نسيت ولا ايه البس يلا
____________
• ڤيلو(٥):" احنا بنحرق عندنا الأموات عشان بالنسبالنا الجسد مجرد وعاء للروح لما بتسيب خلاص ملهوش لازمة وبعدين يروح يبعث لحياته الآخرى
____________
• ڤيلو (٦):" انت فحياتك التانية أكيد هتكون نمر أو أسد .. حبك للحمة دا مخيف !... لو كل العرب كدة فكلكم مخيفين
_____________
• طومي وايرينا -هولنديين ٣٤،٣٦ سنة- :" انا مبعرفش أبقى شديد ع ابننا خالص بخليها هي اللي تلعب دور العقاب ده، مش مكسوف اني مش بعرف اعمل كدة، الحياة بسيطة بينا بنقسم الواجبات على حسب قدرة كل واحد فينا، يعني المفروض مسافرين بنتفسح اهو بس هو كان شقي بقاله يومين، فقررنا نعاقبه بواجب يحله، مبنرضاش ناخد منه حاجات اللي بيحبها عشان ممكن يضايق، لكن لقينا طريقة نعاقبه ونفيده بيها بنفس الوقت... الواجب".
___________
•داريل واتس -بريطاني ٢٥ سنة- :"
-داريل! بس الناس لما بتشرب يا بتبقى صرحاء أوي....يا أغبية أوي
-ومين قالك إن الصراحة أوي مش غباء أوي.
_____________
•داريل(٢):" انا كنت شغال باريستا ف "كوستا" كنت بشتغل كل يوم مع صحابي ونخلص نخرج نسكر ونشرب مخدرات ونروح ننام نصحى للشغل، وهكذا .. بس مع الوقت قلت لازم أوقف الهبل ده! حسيت ان حياتي بتضيع مني! روتين وحياة غلط ! سبت الشغل وخرجت أسافر أشوف الدنيا!".
_____________
•داريل(٣):" ستيف قابلتها واحنا ف الجامعة ومكناش قريبين أوي، كنا صحاب سلام سلام يعني، دخلت معاها القسم -هي أكبر مني بسنة- كنا ف رحلة لألمانيا تبع الكلية، وبس حصل اللي حصل... مع إني كنت قايل إني حاخد راحة من العلاقات من آخر علاقة نهيتها، بسس -بيبتسم- القدر دايمًا ليه خطط تانية، الحب مبيستأذنش قبل ميفتح الباب".
________________
•داريل(٤):" ستيف! أوقات كتير بتبقى متسلطة-بيضحك-، وإحساس الرياسة عالي عندها وبتحب تمشي رأيها، وساعات بتبقى حزينة مرة واحدة كدة، وبتقلق كتير، ومبتعجبهاش تصرفاتي كتير -بيبتسم- بس تقريبًا ف معظم مواقف الجدال هى بتبقى صح للأسف، أنا عارف إني كسول جدًا معترف ب ده وبنام للضهر وهى بتكره ده جدًا، يمكن احنا علاقة النقيضين، ممكن
".
___________
•داريل(٥):" -بيدو، مالك صاحي زعلان كدة
-فاضلي أسبوع وأروّح، زعلان إني حسيب المكان وكدة، مشاعر وكدة يعم
-بيحدفني بالمخدة- دا لسه أسبوع بحاله، أسبوووع، هتضيع ٧ أيام ف الزعل عشان حاجة ف المستقبل لسه، مش اتفقنا اليوم بيومه! قوووم خلينا نشوف هنروح فين النهاردة".
________________
•داريل(٦):"خطتي ياسيدي إننا نسافر ف آسيا شوية، وبعدين ناخد ڤيزا عمل لاستراليا نشتغل سنتين هناك، وبعدين نرجع انجلترا ف أجازة الكريسماس نشوف أهلنا، وبعدين نطلع أمريكا الجنوبية نشتغل ونسافر شوية وبعدين نيوزيلندا، لفّة طويلة مش مهم، طالما احنا بُعاد عن البيت ونسافر كل حاجة هتبقى كويسة".
____________
<في يوم داريل لقى كتيبات عن الإسلام بالإنجلش فورهالي وقالي نتسلى فيها العصر كدة نقراها كانت بتتكلم عن مبادىء وأساسيات وغلطات شائعة يعني عن الإسلام>
•داريل(٧):"ومن آداب الحرب قال الرسول (ص)لا تغلوا ولا تمثلوا ولا تغدروا ولا تقتلوا شيخاً فانياً ولا صبياً ولا امرأة ولا تقطعوا شجراً إلا أن تضطروا إليها،ولا راهب في صومعته و ممممم .. واضح انكم دين إرهاب فعلًا".
______________
•ستيفاني ويلد "ستيف" -بريطانية ٢٦ سنة- :" داريل كسول جدًا ومزعج ساعات جدًا جدًا، دايمًا بيكسل يصحى للشغل، بيكسل يعمل أي حاجة، عاوز ينام طول النهار، ويلعب ع ال psp السخيف بتاعه،
دايمًا بيتصرف زي الأطفال! بس اعمل ايه!.......... ده طفلي أنا".
________________
•ستيف(٢):" داريل مش عاوزنا نتجوز بس عاوز أطفال، وأنا لا عاوزانا نتجوز ولا عاوزه أطفال، فاتفقنا اننا نسافر ونسيب القدر يخططلنا، وما سيكون سيكون".
_______________
•آندي -ماليزي هندي الأصل ٥٥ سنة- :"
-آندي، ايه الصور اللي ع تيشرت-ك دي؟!
-دي صورتي أنا ومراتي، ودي صورة بناتي التلاته
-بَضحك-ومش بتتكسف وانت لابسه ف الشارع
-اتكسِف! -وبصلي بجدية- اتكسف من أحلى حاجة ف حياتي! ".
_____________
•موهان -ماليزي هندي الأصل ٥٥ سنة-:" أنا وآندي صحاب من أيام المدرسة، حلم السفر كان بيطاردنا كلنا لاستراليا بس مكنش في فلوس، فاتفقنا اننا هنجمع كلنا ونبعت واحد مننا يشتغل وبعدين يبقى لينا رجل هناك ويبعت هو يجبنا واحد ورا التاني، وبعتنا آندي -عشان كان أشطر واحد فينا- بس مقعدتش كتير صاحبته قعدت تزن عليه يرجع ومستحملش ورجع واتجوزها، كلنا كنا غضبانين عليه عشان ضيع فرصتنا الوحيدة للسفر!
بس دلوقتي وبعد ٣٥ سنة بنقعد ونفتكر ونضحك، ونشكر ربنا ع الحياة اللي ادهالنا وزوجاتنا وأولادنا وأحفادنا وكل الذكريات السعيدة اللي عشناها مع بعض".
_______________
•مارك وألڤيرا -هولنديين ٥٢، ٢٣ سنة- :" ناس كتير بتبصلي باستغراب وساعات احتقار -بيضحك- عُمر محد فكّر لأول وهلة إني أبوها دايمًا بيفكروا ف راجل مُسِن عنده مراهقة متأخرة وشاقطها بالفلوس، عشان كدة لاقيتنا قاعدين ف جنب شوية، مامتها اتوفت من سنتين وكنا واعدينها نسافر، قعدت هي فأوضتها بالأيام تعيط، لحد مقررت إننا مش هنقضي حياتنا ف الحزن، جبت التذاكر وقولتلها احنا هنسافر نلف الدنيا... هي لسه صغيره ومليانة طاقة أكيد بواجه صعوبات لما اجي اطلع جبل أو أعوم -بيضحك- أيام الثمانينيات ولّت، بس عمومًا لما تجوز وتخلِّف بنت... هتكتشف انك ممكن تتحمل أي حاجة ف الدنيا إلا دمعتها!".
______________
•ألڤيرا:" يوم ما ماما ماتت حسيت إن الدنيا انتهت خلاص، بابه القوي اللي قدامك ده كان محطم جدًا، ويوم ما دخل عليا الأوضة بالتذاكر... عرفت ساعتها إن هو وهيفضل أحلى حاجة حصلت ف حياتي والدنيا كلها".
_______________
•عُمر النقّاب -شيف سوري مقيم بماليزيا ٢٣ سنة- <بعد مخلّص تليفون مع أهله بصلي>
:"ياخي ملعون هالغربة، عم تسمع صوتهن هناك وقلبك عم يتقطع هنا".
______________
•عُمر(٢):" بقالي هون أربع سنين، آخر عيد شفت فيه أهلي من ٤ سنين، ما بعرف أرجع لبلدي وديرتي، حتى ديرتي ما بقت هناك عشان أرجعلها، وأهلي رحلوهم لمنطقة تانية، الله لا يسامحهم ولاد الحرام .. الله لا يسامحهم".
________________
•لورين لوڤوك -فرنسية ٣٣ سنة- :" أنا مستعدة أبقى أم طبعًا! وعمري مكنت خايفة.. بس أبقى أم م الشخص الصح! أنا خلصت تعليمي وابتديت أسافر العالم كله ودخلت وخرجت من علاقات وتجارب عادي جدًا، حياتي موقفتش ولا قعدت ف مدينتي مستنية زوج! أنا خرجت أدور ع زوج ! نصيحتي ليك لو محتار ف جدية علاقتك مع حد، شوف انت حتحب يكون ليك أطفال منه ولا لاء".
__________________
•لورين(٢):" أنا مؤمنة بعلاقة روحية مع قوة عليا، مش مؤمنة بأديان، بص كدة هتلاقي كلهم بيقولوا نفس الكلام حب متكرهش، متزنيش، متخونش، متغلطش، ليك هدف الحياة ، اعبد الإله -ع حسب كل ديانة-، واحنا بس اللي هنتمتع بالنعيم الباقي لاء فتعالي معانا، لازم تعترف إن الموضوع محير، ليه أبقى مع أي فرقه ف دول ايه الاختلاف، أنا بس مؤمنة -بتشاور لفوق- بحاجة ف السما".
________________
•زوي -استرالية ٢٧ سنة- :" إنك يبقى عندك شريك حياة مش بتحبه دي حاجة سيئة، بس النفوس بتتغير، لكن إنك تشتغل حاجة مبتحبهاش دي الأسوأ ع الإطلاق! طبيعة الشغل ما بتتغيرش !".
_________________
•أروة -مصرية نمساوية ٢٥ سنة- <كنت بتكلم وهي جاية من ضهري وأول مره نتقابل>
:" القفا ده قفا مصري".
_______________
____________
__________
خليك فاكر إن كل واحد له طريقة تفكير وتحليل للأمور، خد اللي يعجبك وتُف اللي ميعجبكش
أو استمتع بالقراية وخلاص
دي تجميعة لردود، مواقف، محادثات، دروس حياة، سميها زي ما تسميها من ناس قابلتها وانا مسافر سواء مسافرين زيي أو أهل بلد، كُبار أو صغار.
دول كاتبهم أولًا لنفسي عشان أفضل فاكرهم وثانيًا عشان الناس تتسلى بقرايتها، تعرف الناس التانية بتفكر ازاي، مصدر للإلهام أو تساعدك ف حسم قرارٍ ما، أو ممكن تستمتع بالحكاوي وخلاص من واحد مجرد ذاكرته كويسة وخطه إلى حدٍ ما حلو
____________
* مجهولة -مضيفة طيران هندية ع الخطوط السعودية كانت خارج الخدمة ومروحه جنبي ع الطيارة للهند- :" انت عارف انا كنت بكره المسلمين الأول من ساعة متولدت واحنا طبيعي بنرضع كره باكستان بس لما اشتغلت كنت قاعدة ف أوضة مع واحدة باكستانية، عارف .. سهل أوي نكره حاجة احنا مش عارفينها، دلوقتي هي أقرب لقلبي من أي حد عرفته من محيط حياتي، لما تشوفها وهي بتاخد بالها مني وانا عيانة والعكس، هتعرف إن مفيش فرق بين لون وعرق ودين لما تحب حد
___________
* مجهولة(٢) -كانت بتسمع أغاني وفجأة اديرتلي- "عارف أنا مكنتش اجتماعية زمان كنت بدرس واشتغل وبس، بس واحده واحده اكتسبت جرأة الكلام مع الغرباء وبقيت اتحدى نفسي كل مرة، ازاي هنتعلم من بعض طول محنا ساكتين، لما كلمتك دلوقتي وفتحت موضوع كسبت التحدي مع كسوفي للنهاردة -بتبتسم- الحياة عبارة عن شوية انتصارات صغيرة.
___________
* مجهولة(٣) : مش مهم نعرف اسم بعض، الموضوع كدة ممتع أكتر، وتقريبًا لو اتقابلنا تاني مش هنفتكر شكل بعض، بس المهم اننا هنفتكر اننا انبسطنا ف الكام ساعة اللي دردشناهم دول مع حد غريب.
_____________
* مجهول -ده كان موظف سيخي لشركة الطيران اللي كان معايا لمّا الboarding pass بتاعي ضاع ف مطار الهند وبمعجزة لقيته ولحقت طيارتي بعد ربع ساعة بعد موقف عصيب- بصلي وابتسم :" تبيّن أن الله لديه خطط لك ف ماليزيا اليوم.. رأيت.. لا تفقد إيمانك أبدًا".
________
* جون -سنغافورة ٢٠ سنة- "انت عارف إن التجنيد عندنا إجباري من ١٨ سنة! يعني بنوصل ١٨ نروح ع الجيش علطول لمدة سنتين، بعدين بنخرج المفروض لسه هنبتدي حياتنا ومش عارف هدرس ايه فقلت اسافر سنة أعرف انا بحب إيه وهدرسة، يمكن حوار الجيش ده خلى هيبقى اختياري لمجال دراستي أنضج، بس حاسس إن كان بدري شوية احساس إن واحد صاحبك يموت ف ايدك وانت عندك ١٨ سنة ده مش ممكن تنساه، عارف .... غالبًا شكلي لما اروّح هرجع للجيش".
_________
* عُمر كارونا -مالطا ٣٤سنة- :" سؤال انت مش متجوز ليه محدش بيسأله عندنا، طالما انت مبسوط دايمًا -من غير مخدرات- محدش هيسألك ع أي حاجة، أهم حاجة إنك مبسوط!"
___________
* عُمر(٢) :" في فرق كبير بين سائح ومسافر الأولاني أي حاجة وحشة هتحصله هيتأفف ويضايق ومش هيبقى مرن إنما التاني بيتقبّل أي حاجة ويعتبرها درس أو جزء م التجربة".
_________
* عُمر(٣):" أنا بحترم كل الأديان والثافات وعشان كدة لما مكنوش بيبيعوا خمرة بليل وأنا ف إندونيسيا عشان شهر رمضان معترضش عشان دي عاداتهم، بس ليه وانا راكب الأتوبيس السواق وقت الإفطار وقفه ونزل وسابنا ساعة إلا ربع بيفطر ورجع من غير ميعتذرلنا حتى، في ناس عيّانة وناس وراها مواعيد كانت محتاجه توصل المدينة التانية... اعتقد إن كل الآلهة أكدت ع احترام الوقت!"
__________
* عُمر (٤):" مستغرب من اسمي طبعًا، أنا مسيحي أوروبي ياسيدي بس عارف إن اسمي عربي، بس صدق أو لا تصدق عُمر كان اسم مشهور أوي لمواليد السنة اللي اتولد فيها ف مالطا، كلنا متسميين ع اسم ممثل مشهور أوي، عُمر الشريف".
_____________
* طوم -هولندي ٢٩سنة- :" مش متخيل إن في ناس بتتولد وتكبر وتعيش وتتجوز وتخلف وتموت ف نفس الشارع، الحياة فيها كتير لازم يتشاف، المشكلة إنهم أكتر ناس مش بيفهموا تفكيرك وبيحكموا عليك، ببقى نفسي أقولهم بس سافروا مرة وانتو هتفهموني".
____________
* طوم (٢): "عارف نفسي يعملوا ف خانة الديانة أوبشن جديد اسمه "مسافر" أو حتى ديانة جديدة عبارة عن شخص بيتقبل كل عرق ودين ولون، معندوش حاجز لعقله مع أي حد مش بيكره حد.... أكيد هيبقى شىء عظيم وسط الحروب الطائفية والعرقية اللي مالية العالم دي".
______________
* سوزانا- ألمانيا ٢٣ سنة- :" أنا مش عارفه، مش مؤمنة بربنا أو قوة عليا... بس بحاول أبقى شخص كويس طول حياتي ولو في ربنا ف الآخرة هقوله (شفت أنا كنت كويسة طول حياتي أهه دخلني الجنة بقا )
_____________
* سوزانا(٢) :" مش عارفه أدرس إيه لحد دلوقتي، بس هما بيقولوا إني غبية ومليش ف التعليم طول حياتي، بس مش عارفه هجرب لما ارجع م السفر يمكن اطلع بعرف".
_______________
* حاتم -مصري ٣٤ سنة- :" ٢٣ سنة هههههه صغرتني أوي، يعم أنا ٣٤ اتخرجت وشتغلت واتجوزت وطلقت كمان، كانت بنت ناس مش حِمل مرمطة وانا كنت برضه غشيم حبتين قلتلها عاوزه إيه قالتلي نتطلق قولتلها ماشي، بس يا سيدي قمت مأجر شقتي وابتديت أسافر".
_______________
* حاتم (٢):" عارف مصر دي قهوة عشان تفضل فيها يا تبقى حاجة من اتنين يا صاحب القهوة اللي شغلته يلم فلوس من زباينه الدكاترة والمهندسين والظباط والسواقين يا تبقى موظف بيشتغل ويطلع ميتينه وبيروح يقعد وخلاص ويدي فلوس لصاحب القهوة الفلوس لحد عنده".
________________
* حاتم(٣):" انت أسنان! أبويا برضه دكتور سنان، بس دي شغلانه تقصف العمر والضهر يا جدع، أنا ابويا اقسم بالله كان بيتأوه وهو نايم ... كنت اسمعه بليل واروح أسأله مالك يا بابا تعبان ألاقيه نايم، بس كان دايمًا يقولي ان عيادته والعيانين عنده بالدنيا".
________________
* فرانك فوس -هولندي ٤٧ سنة- :" متكلمنيش عن ظروفك ومشاكلك واحباطك ويأسك!، أنا أمي انتحرت وانا عندي سنتين، أخويا الأول انتحر وانا عندي ١٢ سنة، وأخويا الكبير انتحر وأنا عندي ١٤ سنة!، اتجوزت ٣ مرات وطلقت، كل ده قاعد معاك دلوقتي ف دولة ف آخر العالم بضحك!".
________________
* فرانك(٢):" أبويا كان شخصية قذرة جدًا، كرهته طول حياتي وهفضل أكرهه لحد مموت هو السبب فكل حاجة، العلاقات الچينية هراء، مش محتاج تحب عشان هو مجرد خلفك، العلاقات والمواقف والحياة هي اللي بتخلق الحب مش شوية چينات وشبه بينكم".
______________
* فرانك(٣):" انا اتجوزت ٣ مرات وفشلوا، لو هنصحك بحاجة متتجوزش.. متتجوزش.. ولو اتجوزت لو حسيت للحظة إن مفيش حب انسحب علطول، الطلاق أحسن ١٠٠ مره من علاقة من غير حب".
_____________
* فرانك(٤):" بعد كل اللي مريت بيه ف حياتي قررت أعيش ليومي وبس -بيرفع الكاس- أهم حاجة اني لو مت بكره هموت مبسوط".
_______________
* فرانك(٥):" لو حطيت فدماغك إن أي شغل بتعمله هيخلي حد مبسوط هتتحمل كل حاجة الشعر اللي كنت بلمه وانا بنضف الحمامات كنت بقول ده بيخلي النزيل اللي هيقعد ف الأوضه مبسوط، دا خلاني أقوم بالشغل ده لسنين".
__________
* فرانك(٦) -فرانك، عملت ايه ف مشكلة الفيزا عشان سفر بعد بكرة
-مش عارف هتتحل ازاي، بس دي مشكلة بكرة.. خلينا ننبسط النهاردة
___________
• فرانك(٧):" انا عارف انك مبتحبنيش أشرب كتير، بس أنا بشرب من وانا عندي ١٢ سنة، شربي الكتير ميختلفش عن ادمان الآخرين للسجاير حتى لو مش بيشربوا، كلا الحالتين حاجة لعينة متحكمة فيك".
__________
* فرانك(٨):" انت شخصية كويسة جدًا وعندك طاقة وذكي، بس مشكلتك بتقلق كتير، الكلية والنجاح والتقدير، انا شخص ممكن تقول محصّلتش تعليم كويس، بس انا شخص سعيد، السعادة عمرها مكانت مرتبطة بشهادة، احنا .. احنا اللي بنخلقها وبنضيعها ورا سعينا ورا المظاهر والثروة".
____________
* فرانك(٩):" انا بعت كل حاجة ف هولندا وسافرت، بسافر من غير فلوس، المكان اللي بيعجبني بقعد اشتغل فيه، لو زهقت منه باخد شنطتي واروح مكان تاني فبلد تانية، انا عارف إني مش هرجع هولندا تاني، غالبًا هموت سعيد وشنطتي ع ضهري ف مكانٍ ما ف العالم".
-وما تدري نفس ما تكسب غدًا وما تدري نفس بأي أرض تموت
-جميلة أوي الجمله دي... غالبًا هعملها تاتوو ع ضهري ... وما تدري نفس بأي أرض تموت!!!.... عظيم!
____________
* كريش -ماليزي هندي الأصل ٥٩ سنة-:" أنا كنت شغال عامل ف بنك، بس بعد ما طلعت معاش، حطيت كل فلوسي ف المكان ده -هوستيل- بحب الناس بحب اتكلم معاهم، عملت المكان ده عشان اتكلم مع الناس، اعملهم مكان رخيص يحسوا بيه بالراحة والنقاء بعيد عن الفنادق الغالية، بس ع الشجر والغابة، ممكن تتمنى ايه أكتر من كدة".
___________
• كريش(٢) :" السيدات اللي جم م السودان قاعدين لوحدهم ع باب الأوضه هاتهم هنا يقعدوا مع الناس ويندمجوا، متستغربش .. مبعرفش أشوف حد قاعد لوحده أو حزين ف مكاني".
_________
• كريش(٣):" بتسألني عن ديانتي ليه! انا سألتك عن ديانتك! انا حبيتك من غير أي شروط مش مهم، بلاش السؤال السخيف ده، وأنا هندوسي يا سيدي يلا هات سيفين نحارب بعض م المخزن -بيضربني ف كتفي وبعدين حضني-
_____________
• كريش(٤):" انا هطبخلكو النهاردة بس أكل نباتي -بيبصلي بطرف عينه- بس عارف إن رجل اللحمه هنا عاوز يقتلني دلوقتي".
___________
• كريش(٥):" هتروح ع الترابيزة تاخد أكلك هتلاقي حِلّه مكتوب عليها x دي اللي فيها لحم خنزير ماشي عشان تاخد بالك".
_____________
• كريش(٦):" عارف اني مش هقدر اخليك تقعد هنا اكتر من كدة ولازم ترجع لدراستك ف مصر، نصيحتي متفكرش ف الفلوس، الفلوس ولا حاجة، عيش سعيد وافتكرني!".
___________
• كوتشي- ماليزي هندي الأصل ٦٠ سنة- :" -كريش دا من أجمل الشخصيات المكافحة اللي ممكن تقابلها فحياتك
-اه بس غريبة جاب فلوس المكان ده منين
-من شغله فالبنك
-بس دا كان مجرد عامل!!
-هههههههههه متواضع كريش أوي، مكملّكش الحكاية.. كريش بدأ كعامل بيمسح المكاتب! لكن طلع معاش وهو مدير نفس البنك! لا مستحيل يا صديقي".
____________
• ڤيلو -ماليزي هندي الأصل ٥٥ سنة- :" انا وكريش وكوتشي مع بعض من ساعة متولدنا كريش بقا مدير بنك وأنا سواق تاكسي وكوتشي مقاول طرق، شغلانات مختلفة ف البرستيچ زي مبتقولوا، بس اديك شايف لسه مع بعض -بيبصلهم الاتنين وبياخدهم حضن وبيضحك- الهنود بيفضلوا دايمًا مع بعض للنهاية، لا يمكنني إبدال هؤلاء الحمقى بأي ثمن".
____________
• ڤيلو(٣):" -عاوز ايه عشان اطبخهولك يوم سفرك
* -لا يعم أخاف تحطلي لحم خنزير ولا حاجة
* -كشّر كدة- اللي بين أي اتنين ف الدنيا هو ثقة .. مش مهم ديننا ايه، دا معتقدك وعمري مخون ثقتك.. بس قولي يعم مبتكلهوش ليه دا طعمه حلو أوي
____________
• ڤيلو(٤):" -يلا عندنا حفلة شوا دلوقتي
* -حفلة شوا !!
* -أه أبو "باردي" صاحبنا مات ورايحين نحرقه
* -!!!!
* - يبني احنا هندوس نسيت ولا ايه البس يلا
____________
• ڤيلو(٥):" احنا بنحرق عندنا الأموات عشان بالنسبالنا الجسد مجرد وعاء للروح لما بتسيب خلاص ملهوش لازمة وبعدين يروح يبعث لحياته الآخرى
____________
• ڤيلو (٦):" انت فحياتك التانية أكيد هتكون نمر أو أسد .. حبك للحمة دا مخيف !... لو كل العرب كدة فكلكم مخيفين
_____________
• طومي وايرينا -هولنديين ٣٤،٣٦ سنة- :" انا مبعرفش أبقى شديد ع ابننا خالص بخليها هي اللي تلعب دور العقاب ده، مش مكسوف اني مش بعرف اعمل كدة، الحياة بسيطة بينا بنقسم الواجبات على حسب قدرة كل واحد فينا، يعني المفروض مسافرين بنتفسح اهو بس هو كان شقي بقاله يومين، فقررنا نعاقبه بواجب يحله، مبنرضاش ناخد منه حاجات اللي بيحبها عشان ممكن يضايق، لكن لقينا طريقة نعاقبه ونفيده بيها بنفس الوقت... الواجب".
___________
•داريل واتس -بريطاني ٢٥ سنة- :"
-داريل! بس الناس لما بتشرب يا بتبقى صرحاء أوي....يا أغبية أوي
-ومين قالك إن الصراحة أوي مش غباء أوي.
_____________
•داريل(٢):" انا كنت شغال باريستا ف "كوستا" كنت بشتغل كل يوم مع صحابي ونخلص نخرج نسكر ونشرب مخدرات ونروح ننام نصحى للشغل، وهكذا .. بس مع الوقت قلت لازم أوقف الهبل ده! حسيت ان حياتي بتضيع مني! روتين وحياة غلط ! سبت الشغل وخرجت أسافر أشوف الدنيا!".
_____________
•داريل(٣):" ستيف قابلتها واحنا ف الجامعة ومكناش قريبين أوي، كنا صحاب سلام سلام يعني، دخلت معاها القسم -هي أكبر مني بسنة- كنا ف رحلة لألمانيا تبع الكلية، وبس حصل اللي حصل... مع إني كنت قايل إني حاخد راحة من العلاقات من آخر علاقة نهيتها، بسس -بيبتسم- القدر دايمًا ليه خطط تانية، الحب مبيستأذنش قبل ميفتح الباب".
________________
•داريل(٤):" ستيف! أوقات كتير بتبقى متسلطة-بيضحك-، وإحساس الرياسة عالي عندها وبتحب تمشي رأيها، وساعات بتبقى حزينة مرة واحدة كدة، وبتقلق كتير، ومبتعجبهاش تصرفاتي كتير -بيبتسم- بس تقريبًا ف معظم مواقف الجدال هى بتبقى صح للأسف، أنا عارف إني كسول جدًا معترف ب ده وبنام للضهر وهى بتكره ده جدًا، يمكن احنا علاقة النقيضين، ممكن
".___________
•داريل(٥):" -بيدو، مالك صاحي زعلان كدة
-فاضلي أسبوع وأروّح، زعلان إني حسيب المكان وكدة، مشاعر وكدة يعم
-بيحدفني بالمخدة- دا لسه أسبوع بحاله، أسبوووع، هتضيع ٧ أيام ف الزعل عشان حاجة ف المستقبل لسه، مش اتفقنا اليوم بيومه! قوووم خلينا نشوف هنروح فين النهاردة".
________________
•داريل(٦):"خطتي ياسيدي إننا نسافر ف آسيا شوية، وبعدين ناخد ڤيزا عمل لاستراليا نشتغل سنتين هناك، وبعدين نرجع انجلترا ف أجازة الكريسماس نشوف أهلنا، وبعدين نطلع أمريكا الجنوبية نشتغل ونسافر شوية وبعدين نيوزيلندا، لفّة طويلة مش مهم، طالما احنا بُعاد عن البيت ونسافر كل حاجة هتبقى كويسة".
____________
<في يوم داريل لقى كتيبات عن الإسلام بالإنجلش فورهالي وقالي نتسلى فيها العصر كدة نقراها كانت بتتكلم عن مبادىء وأساسيات وغلطات شائعة يعني عن الإسلام>
•داريل(٧):"ومن آداب الحرب قال الرسول (ص)لا تغلوا ولا تمثلوا ولا تغدروا ولا تقتلوا شيخاً فانياً ولا صبياً ولا امرأة ولا تقطعوا شجراً إلا أن تضطروا إليها،ولا راهب في صومعته و ممممم .. واضح انكم دين إرهاب فعلًا
".______________
•ستيفاني ويلد "ستيف" -بريطانية ٢٦ سنة- :" داريل كسول جدًا ومزعج ساعات جدًا جدًا، دايمًا بيكسل يصحى للشغل، بيكسل يعمل أي حاجة، عاوز ينام طول النهار، ويلعب ع ال psp السخيف بتاعه،
دايمًا بيتصرف زي الأطفال! بس اعمل ايه!.......... ده طفلي أنا
".________________
•ستيف(٢):" داريل مش عاوزنا نتجوز بس عاوز أطفال، وأنا لا عاوزانا نتجوز ولا عاوزه أطفال، فاتفقنا اننا نسافر ونسيب القدر يخططلنا، وما سيكون سيكون".
_______________
•آندي -ماليزي هندي الأصل ٥٥ سنة- :"
-آندي، ايه الصور اللي ع تيشرت-ك دي؟!
-دي صورتي أنا ومراتي، ودي صورة بناتي التلاته
-بَضحك-ومش بتتكسف وانت لابسه ف الشارع
-اتكسِف! -وبصلي بجدية- اتكسف من أحلى حاجة ف حياتي! ".
_____________
•موهان -ماليزي هندي الأصل ٥٥ سنة-:" أنا وآندي صحاب من أيام المدرسة، حلم السفر كان بيطاردنا كلنا لاستراليا بس مكنش في فلوس، فاتفقنا اننا هنجمع كلنا ونبعت واحد مننا يشتغل وبعدين يبقى لينا رجل هناك ويبعت هو يجبنا واحد ورا التاني، وبعتنا آندي -عشان كان أشطر واحد فينا- بس مقعدتش كتير صاحبته قعدت تزن عليه يرجع ومستحملش ورجع واتجوزها، كلنا كنا غضبانين عليه عشان ضيع فرصتنا الوحيدة للسفر!
بس دلوقتي وبعد ٣٥ سنة بنقعد ونفتكر ونضحك، ونشكر ربنا ع الحياة اللي ادهالنا وزوجاتنا وأولادنا وأحفادنا وكل الذكريات السعيدة اللي عشناها مع بعض".
_______________
•مارك وألڤيرا -هولنديين ٥٢، ٢٣ سنة- :" ناس كتير بتبصلي باستغراب وساعات احتقار -بيضحك- عُمر محد فكّر لأول وهلة إني أبوها دايمًا بيفكروا ف راجل مُسِن عنده مراهقة متأخرة وشاقطها بالفلوس، عشان كدة لاقيتنا قاعدين ف جنب شوية، مامتها اتوفت من سنتين وكنا واعدينها نسافر، قعدت هي فأوضتها بالأيام تعيط، لحد مقررت إننا مش هنقضي حياتنا ف الحزن، جبت التذاكر وقولتلها احنا هنسافر نلف الدنيا... هي لسه صغيره ومليانة طاقة أكيد بواجه صعوبات لما اجي اطلع جبل أو أعوم -بيضحك- أيام الثمانينيات ولّت، بس عمومًا لما تجوز وتخلِّف بنت... هتكتشف انك ممكن تتحمل أي حاجة ف الدنيا إلا دمعتها!".
______________
•ألڤيرا:" يوم ما ماما ماتت حسيت إن الدنيا انتهت خلاص، بابه القوي اللي قدامك ده كان محطم جدًا، ويوم ما دخل عليا الأوضة بالتذاكر... عرفت ساعتها إن هو وهيفضل أحلى حاجة حصلت ف حياتي والدنيا كلها".
_______________
•عُمر النقّاب -شيف سوري مقيم بماليزيا ٢٣ سنة- <بعد مخلّص تليفون مع أهله بصلي>
:"ياخي ملعون هالغربة، عم تسمع صوتهن هناك وقلبك عم يتقطع هنا".
______________
•عُمر(٢):" بقالي هون أربع سنين، آخر عيد شفت فيه أهلي من ٤ سنين، ما بعرف أرجع لبلدي وديرتي، حتى ديرتي ما بقت هناك عشان أرجعلها، وأهلي رحلوهم لمنطقة تانية، الله لا يسامحهم ولاد الحرام .. الله لا يسامحهم".
________________
•لورين لوڤوك -فرنسية ٣٣ سنة- :" أنا مستعدة أبقى أم طبعًا! وعمري مكنت خايفة.. بس أبقى أم م الشخص الصح! أنا خلصت تعليمي وابتديت أسافر العالم كله ودخلت وخرجت من علاقات وتجارب عادي جدًا، حياتي موقفتش ولا قعدت ف مدينتي مستنية زوج! أنا خرجت أدور ع زوج ! نصيحتي ليك لو محتار ف جدية علاقتك مع حد، شوف انت حتحب يكون ليك أطفال منه ولا لاء".
__________________
•لورين(٢):" أنا مؤمنة بعلاقة روحية مع قوة عليا، مش مؤمنة بأديان، بص كدة هتلاقي كلهم بيقولوا نفس الكلام حب متكرهش، متزنيش، متخونش، متغلطش، ليك هدف الحياة ، اعبد الإله -ع حسب كل ديانة-، واحنا بس اللي هنتمتع بالنعيم الباقي لاء فتعالي معانا، لازم تعترف إن الموضوع محير، ليه أبقى مع أي فرقه ف دول ايه الاختلاف، أنا بس مؤمنة -بتشاور لفوق- بحاجة ف السما".
________________
•زوي -استرالية ٢٧ سنة- :" إنك يبقى عندك شريك حياة مش بتحبه دي حاجة سيئة، بس النفوس بتتغير، لكن إنك تشتغل حاجة مبتحبهاش دي الأسوأ ع الإطلاق! طبيعة الشغل ما بتتغيرش !".
_________________
•أروة -مصرية نمساوية ٢٥ سنة- <كنت بتكلم وهي جاية من ضهري وأول مره نتقابل>
:" القفا ده قفا مصري".
_______________
____________
__________
خليك فاكر إن كل واحد له طريقة تفكير وتحليل للأمور، خد اللي يعجبك وتُف اللي ميعجبكش
أو استمتع بالقراية وخلاص
