تسمحولى أقولكم إزاى قضيت ٥ أيام فى روما ... بصراحة أنا لما سافرت إيطاليا...

[Sameh Mohamed Mohamed]

تسمحولى أقولكم إزاى قضيت ٥ أيام فى روما ... بصراحة أنا لما سافرت إيطاليا حسيت انى مش فى بلد غريب وشعبها طريقتهم فى الكلام تحس انها شرقى بس أسلوبهم مودرن ودمهم خفيف واول ما نزلت مطار روما وانا عند ختم الجوازات كلمت واحد ايطالى بأنى اول مرة ليا فى روما ومبسوط اوى ولما عرف انى مصرى قالى احنا بنحب محمد صلاح كنت فخور اوى من جوايا لانى محستش بأى عنصرية منهم ، وكمان روما ناسها كانوا حلوين وطول الوقت مزيكا في الشوارع وكأنك في فيلم قديم حلو، الايطاليين بيهتموا بجمال التفاصيل فى كل حاجة ولو هاديت بنت وردة مثلا كأنك ملكت قلبها شعب بيعشق الرومانسية .. اللى ما وقعش فى غرام إيطالية يبقى مجربش الحب ، وكمان روما بلد الموضة والأزياء والفن وموديلات اللبس جامدة وكمان العربيات تحفة وكمان بالنسبة للجو جميل برد خفيف ورذاذ مطر مع مزيكا في الخلفية. أرض روما نظيفة والمية بتاعتها نقية وفى كل مكان قرب الفاتيكان تلاقى نافورة مية صحية جدا .. وبالنسبة انا اللي دفعني امشي حافي معظم الوقت، لان الارض نضيفة جدا بس الارض مدببة شوية بس من جمال المنظر بتنسى أي حاجة. المدينة فيها اماكن تاريخية وآثار كتير. أصلا مبانيها العادية ذات التراث الكلاسيكى شبية للمبانى القديمة فى اسكندرية والزمالك بس تحسسك انك في متحف جميل مش هاتلاحق على جمال المناظر المبانى والطراز المعمارى هاتاخد صور فى كل مكان معظم الشوارع مليانة كافيهات واجمل قهوة وسبريسو تشربة هناك وكمان البيتزا الايطاليه اسمها الباستا حاجة لوز العنب مع العلم أن الشيفات هناك مصريين
يا جماعة بجد إيطاليا ليها سحر خاص ، أنصحكم تسافروا روما ونصيحة وانتوا مسافرين ايطاليا ناموا كويس واصحوا فايقين عشان تستمتعوا بكل لحظة وابعدوا عن الكسل بلاش نضيع وقتنا في النوم ومانسيبش حاجة مانشوفهاش. دى كانت تجربتى لايطاليا وانبسط جدا لما عملتها .. سافروا ايطاليا vine in Italia هاتعجبكم بجد