ازاي تحافظ على شنطة سفرك من الضياع : موقف صعب جدا وبيهدد ان الاجازة تتدمر...

[Bahaa Aldeen Farouk]

ازاي تحافظ على شنطة سفرك من الضياع :
موقف صعب جدا وبيهدد ان الاجازة تتدمر .. لو شنطة سفرك ضاعت او موصلتش علي الرحلة وانت مسافر. ويا سلام لو في الشتا !
● اشتري شنطة سفر مميزة بالوان مختلفة عن الأسود والبني ولو دي الوان شنطتك لازم تحط استيكر ملون يميز الشنطة.
. ●بلاش تقفل الشنطة بقفل لكن ممكن تغلفها افضل.من الإجراءات الامنية المتبعة في اغلب المطارات تفتيش شنط عشوائية بشكل يدوي.
● اكتب بياناتك الشخصية علي الشنطة بالانجليزي ويكون منها رقم داخل دولة الوصول . وكمان بيانات الاتصال في بلدك الأم لحد من أقاربك
● اي الكترونيات او مجوهرات او ادوية مهمة لازم تكون في الهاند باج. مع حجوزات الفنادق والتذاكر وصورة من الجواز .ويا ريت لو معاك طقم خروج وطقم للنوم .
● تصوير الشنطة بالموبايل صور واضحة .ممكن تحتاجها .
● الحذر الحذر الحذر من رحلات الترانزيت .لان 90% من الشنط المفقودة بتضيع في بلد الوصول الاول..والحل انك توصل المطار بدري جدا وتتأكد من موظف الكاونتر ان استيكر الترانسفير موجود وواضح علي الشنطة . ( انا بحط 2 استيكر زيادة للتاكيد).
طيب شنطتنا ضاعت لا قدر الله , نتصرف ازاي ؟؟
مهم جدا نحتفظ بالبوردنج واستيكر الشنط لأن ده المرجع الأهم لشركات الطيران في البحث عن الشنط الضايعة واثبات قانوني لملكيتك ليها.
كل مطار موجود فيه مكتب لشركات الطيران وهناك بتعمل شكوي عن الشنط وبيطلبوا منك رقم ليك في البلد .وغالبا بتوصل الشنط علي اول رحلة من بلد السفر.
لو حصلك موقف زي ده , قولنا اتصرفت ازاي ؟ و كان على اي شركة طيران
By: Haytham Sleem
#أين_أشيائي #travel_secrets

 

[Eman Farouk]

حصل فعلا وبلغت في lost & found واستلمتها بعد ٣ ايام...بعد مانزلت اشترى هدوم من البلد الى وصلتها

 

[د. علاء السيد محمد]

مقال ممتاز

 

[Nadiah Ahmed]

يا نهار ابيض،علي الفصلة :-D

 

[Samri Hassan]

حصلت معاي مرتين وعلى نفس الخطوط.
المرة الأولى وصلت بعد اسبوع. المرة التانية وصلت بالرحلة البعديها

 

[Ezzat Elhenawy]

حصلت على السوسرية ولما رجعت الشنطة لقيتها مكسرة وبايظة
أخدت منهم (١٠٠٠ج م ) تعويض

 

[Rasha Yahia]

حصلتلى في السعودية والحمد لله اتاخرت 3 ساعات بس والناس هناك كانوا بيساعدوا بقلبهم لحد ما جت على الرحلة اللي بعدها

 

[Ahmd Bdwy]

لأ بقی ... دی فرصتی ... شوف يا كبير ... انا هحكيلكم موقفين حصلوا معايا لانهم مرتبطين ببعض ... ضياع الشنط والرحلة كمان ... كنت مسافر تايلاند من القاهرة .. ابو ظبی ترانزيت وبعد كده من ابو ظبی لبوكيت ... تمام ... رد عليا وقولی تمام ... تمام ... ايوة كده ... نزلنا ابو ظبی ومعانا تيكت البوابة بتاعت الرحلة التانية ... ابو ظبی بوكيت ... كان رقمه GATE 52 ... فضلت الف فی المطار واتصور وكده يعنی ... المطار أساساً جامد فشخ ... المهم روحت ع البوابة قبل الرحلة بحوالی ساعة الا ربع ... لقيت الطابور طويل جدا ومش مقنع ... المهم عملت شغل المصريين وطلعت اول الصف اطقس كده لحد ما عرفت ان البوابة دی بتودی علی إيطاليا ... احيه ... بصيت ع الشاشة بتاعت الرحلات لقيت رحلة بوكيت علی بوابة 15 ... انت هتشوف الرقم قريب بس ايه بقی ... اتنفخت جری السنين ... لحد ما وصلت قبل الرحلة بتلت ساعة ... قولت الحمد لله ربنا ستر كده كده الشنط هستلمها فی بوكيت لأن الرحلتين علی طيران الاتحاد ... بتاع الامن اللی ع البوابة قالی للاسف مش هتسافر لان الشنط نزلت ... نعم حضرتك ... اه والله زمبقولك كده ... الشنط نزلت وحضرتك مش هتسافر لانك اتاخرت ... من هنا لهنا مراتی قالتلی فوكك كده كده هوه عنده تعليمات الموضوع منتهی ... طلعنا بقی فوق لحاجة اسمها مكتب تحويل الرحلات وانا كيفی بقی خدمة العملاء والقصص دی ... دخلت عليه كالاتی ... هوه التيكت ده ليه حضرتك ... قالی عشان رقم الرحلة والبوابة ... قولتله تمام ... طب معلش ممكن ادخل الطيارة من بوابة تانية قالی لأ مينفعش ... قولتله قشطة ... طيب دلوقتی انا جيت اسافر علی GATE 52 ... لقيت البوابة متغيرة والرحلة هتطلع دلوقتی من بوابة تانية ... ايه الحل ... للأمانة الراجل هدانی وقالی هبعت ايميل وهستنی الرد ... انا قولت انا كده اتسوحت ... ايميل ايه يا ابو ايميل ... المهم بعد شوية قالی كالتالی ... فی حلين ... الحل الاول ... استنی لبكره فی نفس الميعاد واسافر لبوكيت او اسافر لبانكوك ومن هناك اخد طيارة تانية داخلی لبوكيت ... طب أساساً الحل الاول فااااكس بالنسبالی لأن انا مش هبات اليوم فی المطار (وطبعاً دی كانت غلطة كبيرة بعدين هقولكم ليه) والحل التانی اصلا انا مكنتش حابه لانی عريس ومسافر شهر عسل فمكنتش عايز مرمطة وترانزيت اكتر من مرة وكده ... المهم اخترت الحل التانی لان مفيش قدامی غيره ... وكمان لان التأخير كله كان هيبقی فی حدود 4 ساعات ... قولت مش مشكلة ... علی فكرة كل ده لسه مقولتش علی حوار الشنط بس انتوا عاجبكم القصة ... صح ... ما ترودوا عليا وقولوا صح ... صح .. ايوة كده .. المهم انا كنا قلقان من مصاريف الطيران اللی انا هدفعها تانی ... بس المفاجأة بقی بجد ان طيران الاتحاد محترم وسفرنی ببلاش انا ومراتی لبانكوك ... قولت مش مشكلة بسيطة الطيران الداخلی لان انا عارف ان مفيش طيران داخلی الاتحاد من بانكوك لبوكيت بس عشان هما ناس محترمين وولاد اصول Eithad Airways بلغونی ان كمان تذاكر السفر من بانكوك لبوكيت علی حسابهم وان هلاقی حد فی انتظاری فی بانكوك عشان يعطونی تذاكر بوكيت وقد كان ... طيب فين بقی حوار الشنط ... هقولكم اهوه ... نزلنا بانكوك لقينا الناس فی انتظارنا فعلا Bangkok Airways واعطونا التذاكر وكل حاجة بس للاسف الشنط ملحقتش تطلع معانا ع الطيارة بعد ما نزلوها من الطيارة الاولی اللی كانت رايحة بوكيت ... طيب قالولنا عايزين مواصفات الشنط ... هنا بقی نرجع كام ساعة لما كنا فی مطار القاهرة .. الحمد لله واحنا بنوزن وللاسف بعد ما كان الكاونتر قفل بس فتحوه تانی لما عرفوا ان احنا شهر عسل ومسافرين وكده قالولنا صوروا الشنط احتياطی لأسوأ الظروف وقد كان واعطينا الصور للمسؤولين بعد ما كان الموبايل فاصل شحن طبعا وفضلنا نغير البطاريات وشحناه ... المهم اخدوا الصور وبعتولنا الشنط ع الفندق تانی يوم ببلاش طبعاً ... بس ... صباحكم فل وهبقی انزلكم بوست مخصوص عن ملخص المشاكل اللی حصلتلی واتحلت ازای عشان محدش يقع فيها ... سافروا واتبسطوا ... احمد بدوی

 

[Mohammed Zakaria Abou Taqa]

حصللي تأخير مرتين:
- علي الاتحاد وراجع من سيشلز لأبوظبي
- علي الاماراتيه من دبي للقاهره.

وفي الحالتين محضر وجابوهم تاني يوم عالبيت

 

[Ahmed Hassan]

معناه ايه يا استاذ بهاء انى اعمل بوست وتلغوه ؟

 

[Malak Mikhail]

كنت مسافر من بانكوك ل دبي علي الطيران القطري و المفروض نقعد ساعة ترانزيت في الدوحة المهم اول ما وصلنا الدوحة غيرنا الطيارة بسرعة بدون ما نقعد الساعة ترانزيت و لما وصلت دبي ملقيتش شنطي و لقيتهم كاتبين أسامي الناس اللي شنطها موصلتش و انا منهم روحت طبعا علي المكتب بتاعهم في مطار دبي قالولي متقلقش شنطك جاية علي الرحلة بتاعت بالليل و فعلا اخدت رقمهم و خدو رقم حد كان معايا و بالليل كلموه و قالو الشنط وصلت و روحت استلمتها

 

[Ahmed Hassan]

هل كان فيه حاجه غلط ولا ايه الموضوع بالظبط ي bahaa aldeen farouk

 

[Ahmed Tarek Shalaby]

على الاتحاد وانا راجع من بالي بس كان بسبب ان حجزوني فابوظبي
بعدها بكام يوم اتصلوا قالولي هنوصل شنطتك للبيت وبعدها اتصلوا تاني قالولي لازم تيجي تستلمها من الجمارك

على الخطوط التركيه لما رجعت كانت الشنطه لسه فتركيا رغم انها كانت رحله دايركت واتصلوا تاني يوم وصلوها \

 

[John Samir]

Mariam Samir

 

[Ibrahim Nagy]

انا حصلت معايا مع مصر للطيران كنت نازل من المانيا لمصر رحله دايركت عادي و جاي بدري بعدين الرحله كانت مليانه فقررو يسيبو حبت شنط المهم كان فيه شنطه فيها اكل بنتي لمده شهر كانت ساعتها بيبي و هدوم وكده اهي هيا الشنطه ديه اللي مجتش و سالت قلولي كمان ٣ ايام توصل قولتلهم انا من اسكندريه قالولي مفيش خدمه توصيل طيب ابعت حد يستلمها قالولي لازم حضرتك بالباسبور طبعا ٣ ايام و رجعت تاني القاهره اخدت الشنطه ريحتها جايبه اخر الشارع عشان الاكل باظ من الحر المخزن مش متكيف بس اخدت الشنطه رميت اللي فيهاو كانت اجازه عسل

 

[Amira Magdy]

الحمدلله مفيش ضياع غير شنطه اتاخرت ومطلعتش خالص روحت اشتكى لقيتها موجوده بس عشان اتفتحت هما حطوها فكيس عشان ميروحش اللى فيها

انا مشكلتى ان كذا مره الشنط تتبهدل يعنى جديده مسافرتش بيها الا مرتين ارجع فالتالته الاقيه من غير الايد اللى بتطلع وتنزل واللى متلاقيش سوستها الغريبه رغم انى ساعتها كنت مسافره ع القطريه وكان المفروض اشتكى بس نسيت
بس الحاجه الوحيده اللى مبعملهاش وحعملها بعد كده ان اصور الشنط

 

[Ahmed Moheb]

انا كنت راجع من مطار هيثرو الي القاهره و لما رجعت في شنطه ضاعت ... قعدت ٤ ايام اروح المطار عشان موظفين المطار كل مره يقولولي انها هاتيجي الرحله اللي جايه لغايه ما ربنا سهل بس الشنطه وصله مفتوحه مليون مره و الحاجه اتبهدلت و علي فكره كنت لازق ستكر عليه كل البيانات بتاعتي ... لذلك كل مره اقف علي السير ابقي مرعوب و الله لا مالاقيش الشنطه

 

[Mahmoud Rashwan]

 

[Morena Kaci]

اكيد لسه ماعرفتش ترامب عمل ايه هههههه مانع علينا حمل اي حاجة اليكترونيك في الهاند باج

 

[Usama Elhenawy]

حصلي فعلا كنت مسافر دبي علي مصر للطيران
وعملت بلاغ وبعد لف لمدة ساعه او يزيد مشيت م المطار ، بعد ما ركبت التاكسي اتصلوا بيا وقالو انهم لقوا الشنطة وهيبعتوها ع الفندق في خلال 3 ساعات ،
وبعد اكتر من 5 ساعات مكنتش جت ع الغرفه ، اتصلت بالمطار قالوا بعتناها من اكتر من ساعتين والمفروض تكون وصلت
نزلت الريسيبشن لقيتها موجوده