ليا واجد محكيتلكمش قصص من اسفاري اليوم نحكيلكم قصه التليفونات الي ايريحن...

[Ali Fakree Eldin ElSallabi]

ليا واجد محكيتلكمش قصص من اسفاري
اليوم نحكيلكم قصه التليفونات الي ايريحن

اي حد مسافر معايا من قبل يعرف اني حنروح من غير تليفوني من قبل منسافروا
ليش ؟
عشان بختي عطيب
2012 تونس
كنا في منطقه الحمامات السياحيه
وكنت شايل معايا تليفوني وفيه الشفره الليبيه وكنت عازقه في الشنطه وانصور بتليفوني الاخر الجديد
المهم ان اخر يوم
نقلب الدنيا ع التليفون منلقاهش وكنت مستعجل فقلت اكيد حنلقاه في وحده من الشناطي
روحنا لتونس العاصمه
وقلبت الدنيا عليه لاكن بدون جدوى
خذيت تاكسي لعند الحمامات اخري وقلبت الدار الي كنت فيها في الهوتيل ع التليفون ودرتلهم مشكله ع الرسيبشن وقلتلهم التليفون فيه معلومان وحاجات مهمه وانا مواجعني فيه الا المسجات العرم
ملقيتش وروحت لليبيا من غير تليفوني

بعدها ب 5 شهور

بلجيكا 2013
ركبت في تاكسي مع واحد مسلم لما عرف اننا مسلمين سكنلنا في راسنا انه ايشيلنا لمطعم صاحبه فيه اكل اسلامي ونحنا انقولوله شيلنا لماكدونالد
المهم هوا ينفخلنا في راسنا
ونحنا مصرين علي الماكدونالد
وشكله عينه قويه ويحشم في الناس بسرعه
نزلت عند ماكدونالد
كليت
واندور تليفوني الي كان معايا وانا راكب للتاكسي
منلقاهش
وفيه صور الاحتفال الاسطوري تومورولاند ورحله ل 5 دول في اوروبا
(الحمد لله اننا شايلين معانا كاميرا كانون كان مهذا راه الذكريات كلهن راحن )

روحت للهوتيل متنكد كلمت الوكاله الي دزت التاكسي
عشان ايشوفولي بلكي الموبايل طايح في التاكسي
ملقوهش
وروحت متنكد للمره الثانيه لليبيا
وريحت موبايلين في 5 شهور

بعدها ب 4 شهور في مشيه فرنسا شعفت وشريت الmobile holder الي في الصوره تحت عشان معش ايريح مني الموبايل بكل روحت بالموبايل ونسيت الholder في الطياره

#i_cant_find_my_phone

 

[Mourad Altboly]

مشيت ل تومورو لاند قصدك؟

 

[Mustafa Jalal Fteita]

المهم تتش الفجعة في كل سفرة ✌

 

[Nonna Mokasabi]

والتاشيرة الانجليزية شن صار فيها ؟

 

[Booji EL-Bakoush]

ضريبة الهياجة تستاهل

 

[Najwa Elbai]

حمدالله علي سلامتك انت تي باهي اللي مارحتش انت

 

[Søad Essà]

المهم توسع في خاطرك واتفسح

 

[Kooky Bin Zablah]

جاتك فالريش

 

[Mohammed Alshukry]

الأخيرة فازت عليهن كلهن
ماخربتش سنتك ^_^ ^_^

 

[Aya Aldressi]

المهم تريح حاجه

 

[Aya Oun]

سلامتك انت

 

[Areej H Mohammad]

كان غير مشيت معاه للمطعم الاسلامي خيرلك ، مرابط والله العطيب والاحلى نسيت الهولدر ، وروحت بالموبايل ، ان شاءالله تلف العالم كله ، ويلف معاك موبايلك

 

[Hamid Elsaite]

ههههههههه لا شكلك محاية بكل

 

[Bella Bella]

هك واجد بصراحة

 

[فاطمة المجبري]

" كله من ذهاب الشيرة " بصوت ماما