يا شباب اية رأيكم كل واحد سافر بلد معينة وحصل معاة موقف غير من نظرتة للبلد...

[Alaa Yassine]

يا شباب اية رأيكم كل واحد سافر بلد معينة وحصل معاة موقف غير من نظرتة للبلد دي يحكية هنا ...
يعني انا مثلا قبل ما اسافر الكويت سمعت من ناس كتير ان الشعب الكويتي شعب متكبر ومعاملتة وحشة مع المصريين وكدة بس الشهادة لله انا بقالي كزا شهر هنا مالقتش منهم حاجة وحشة وفي منهم كتير بيعمل خيير لدرجة انة النهاردة مثلا خارجين من صلاة الجمعة وكان الجو حر جدا فلقينا واحد كويتي راح جاب كرتونة مياة ساقعة ووزعها علي كل المصلين اللي خارجين من الجامع واللي كان اغلبهم وافدين .. هو عمل بسيط بس فعلا غير من نظرتي للشعب والبلد دي جدا

 

[Ibrahim Hosni Elhady]

في بانكوك أول ما وصلت ونزلت وسط البلد وتايه ومش عارف أوصل للفندق
وقفت ست في الشارع واديتها العنوان معرفتش تشرحلي او مقدرتش افهم منها
وقفت توكتوك معرفش العنوان
توكتوك تاني فاصلت معاه مرضيش ومشي كلمت الفندق علي موبيلها وشرحت له المكان وفضلت واقفة معايا لغاية ما عربية الفندق جت

 

[Mohamed Mansour Ali]

الاعلام بيلعب دور كبير في بث روح الكراهية بين الشعوب و حتي الكورة بيتستغلو التعصب و يزودوه و كان الماتش معركة حربية مع ان غالبية التجارب ايجابية و دايما بتلاقي المودة و الحب و بيكون ده الشائع و الي غير كده موجود برضو بس قليل

 

[Mohamed Khairat]

مسافرتش كتير بس كل المواقف ال حصلت معايا بره مصر شوفت واتعلمت يعنى اى جمله (تقبل الآخر بجد)

 

[Mohammed Salah]

لما وصلنا جورجيا ونزلت المطار عرفت ان في باص ممكن يوصلنا الفندق ركبناه ومكانش معانا الكارت بتاع الدفع راح واحد دفعلنا والراجل ده ماسبناش الا نا وصلنا لباب الفندق وتعب معانا بجد . مرة تانية رحنا كوتايسى ومحدش بيتكلم انجليزى ومش عارفين نتفاهم مع حد وقفت معانا بنت لحد ماودتنا الموقف واتفقت مع سواق وقعدت تفاصل معاه ومسابتناش الا ما مشينا . مرة تالتة مرات صاحب الفندق طلبتلنا تاكسى ووقفت معانا قدام الفندق ولما اتاخر علينا وقفنا تاكسى تانى وقعدت تفاصل معاه وماسبتناش برضه الا مامشينا . شكرا جورجيا.

 

[Mohammed Salah]

مرة كنت في المالديف ومش عارف اوصل للفندق ومش عارف اتصل بيه وقف لى واحد واتصل بالفندق وقالهم على مكانى وطلب يبعتولى عربية ومامشيش الا ماجت العربية

 

[Hend Ali]

انا بعلقلك دلوقت من الهند ف ولايه اسمها utter paradesh ف مدينه greater noida قليل جدا لما تلاقي فيها مسلم اغلبهم هندوس بس ناس جدعه وطيبين وكرمه وبيحبوا ال foreigner مهما قولت مش هعرف اوصفهم ولا اوفي جدعنتهم معايا ع الرغم قبل ما اجي الكل حذرني من المكان عشان الاغلبيه هندوس الولايه دي نضيفة نسبه التلوث فيها لا تذكر مقارنه مع الولايات التانيه بنها وبين دلهي ساعه وبينها وبين اجرا ساعتين،،، احسن مكان تاكل منه برياني وموموز ودا عباره عن اكله صينية ف الشوراع وعشان الولايه دي قريبه من الصين انتشرت هنا وعموما اكل الشوارع هنا حاجه عظيمه والله ،،،،، دي تجربتي ال منها عرفت لا جنسيه ولا دين ولا لون ولا عادات تفرق لما تتعامل مع غيرك من باب الانسانيه وان الميديا دي ودت الشعوب ف داهيه والله وزرعت الكره بين الناس

 

[Hossam Masoud]

بكرة تعرف الكويت على حقيقتها

 

[Sara Khoury]

موقف سلبي بالمغرب
رايحة ومعتقدة اني هنبسط
لقيت كره عام للمشرقيات وعدم ترحيب
خلاني قطعت السفرة ورجعت ع طول

 

[Ahmed Kafrawy]

اصبر بس شوية انت لسه بقالة كذا شهر لما تقدم ابقى قولى رايك فيهم او لو حصلك مشكلة لقدر الله فى شغلك ابقى قولى رايك بس بصراحة alaa yassine

 

[Mohamed A Ibrahim]

نحن للاسف فريس للتعميم
كل الكلام الى اتقالى عن الجنسيات التانيه طلعت غلط
واتعلمت حاجه واحده مع تعاملى مع جنسيات كتير ان الى قدامك وبيتعامل معاك ده بشر ليه ما له وعايه ما عليه وليس له علاقه بجنسه او لونه او بلده

 

[Mohamed Mohamed]

لا تذم ولا تشكر قبل سنة وست اشهر

 

[Ahmed Gamal Mahmoud]

تجربتي مع اليابانيين والصدمة اللي اتصدمتها في التعامل معاهم
كانت فكرتي انهم شعب ودود وطيبين
بس لما روحت هناك واتعاملت معاهم اكتشفت انهم اطيب واكرم واجدع من اللي بنسمعه مليون مرة علشان تسال حد على عنوان يقوم جايبلك خريطة ويرسملك المسار ويمشي معاك شوية او انك تخش محل بسيط واللي فيه يصمم يعزمك على اللي انت عايزه ويرفض تماما انه يخد فلوس
او ان محل يفضل يديك في هدايا على الحاجات اللي اشتريتها
او ان محل يحرص اكتر منك انه يديك الفواتير علشان تسترجع الضرايب وانت مسافر
وكله كوم وكراسي المترو اللي قماشها انضف من الكراسي اللي في معارض الاثاث في مصر