ريومه، ما أعتقد عندي شي أقدر أقوله زيادة قلت كل اللي عندي ووضحت وجهة نظري وانا متمسك برأيي وأحترم رأيك بس ما أشوف النقاش بيني وبينك له قاعده صلبه او حتى ممكن يكون مثمر عشان نستمر
أخوي عبدالمجيد، ماودي أحبطك. لكن بعض الجامعات اللي ذكرتها صعبه جدا جدا جدا جدا بالقبول خاصة للبكالوريوس. مثلا نسبة القبول للبكالوريوس في هارفارد حوالي 6.1% وهذي نسبة منخفضة مقارنه باسماء اخرى
نسبة القبول في ستانفورد للبكالوريوس حوالي 6.6%
نسبة القبول للبكالوريوس في جامعة كاليفورنيا لوس انجلوس 41.45%
جامعة فلوريدا فيه عدة جامعات بهالأسم لكن احد أقواها نسبة القبول للبكالوريوس 44.1%
نسبة القبول للبكالوريوس في جامعة بتسبرغ 56.1%
(نسبة القبول ترمز لنسبة المقبولين من الطلاب المتقدمين للبكالوريوس يعني لو تقدم 1000 طالب لهارفارد راح يقبلون 61 طالب منهم فقط)
الموضوع مو إحباط، لكن تحتاج شي إستثنائي عشان تدخل بعض هالجامعات للبكالوريوس. وغالبا هالجامعات يطلبون عليك السات (إختبار قبول للبكالوريوس مثل القدرات لكن بالأنجليزي) حتى لو كنت طالب أجنبي. درجتك بالقدرات جدا ممتازه ما شاء الله فاحتمال لو شديت حيلك باللغة تجيب درجة ممتازة بالسات وتدخل بعض هالجامعات. للمعلومية لاتستهين بانك جايب درجة ممتازة بالقدرات، أنا تقريبا درجتي بالقدرات قريبه من درجتك (87) ويوم اختبرت الجي ار اي (اختبار قبول للدراسات العليا) جبت درجة عالية نوعا ما بسبب اني حسيت الاختبار سهل خاصة بالجزء الكمي
طبعا فيه امور ثانية تساعدك بالقبول مثل انك تتطوع عدد ساعات كبير او انك تنشيء مجموعة تطوعية مثلا. يعني اشياء مثل كذا تثبت انك نشيط وفيه عندك شي مميز مو كل الطلاب عندهم مثل انك تكون مؤلف كتاب او عندك مدونه لها عدد متابعين كبير وتكتب مقالات، مثل أن تكون كاتب صحفي، أو مثل انك تكون مصور مشهور أو مثل أنك تتكلم أكثر من 4 لغات أو زرت عدد دول كبير بالعالم خلال فترة قصيرة (كبير يعني أكثر من 30 دولة)
الاشياء هذي تساعدك على انك تحصل على قبول في جامعات مثل هارفارد وغيرها. كل الناس يتمنون يدخلون مثل هالأسماء لكن صدقني بعضها تحتاج استثمار من ايام المرحلة المتوسطة عشان اذا تخرجت من الثانوية تكون عندك المؤهلات اللي تدخلك.
مثل ما نصحتك قبل ادخل بكالوريوس في جامعة من افضل 100 (مثل جامعة بتسبرغ) ركز على نفسك خلال فترة الـ 4 سنوات حقت البكالوريوس حاول تطور لغتك، تجيب معدلات عالية، وتشترك بأكبر عدد من الأندية الطلابية في الجامعة وتحاول ترأس لك واحد منهم، حاول تتعلم لغة ثالثة مثلا الأسبانية وصدقني راح تتخرج وانت عندك المؤهلات اللي تدخلك جامعة مثل ستانفورد أو هارفارد
