N
Nada Abdrabou
:: مسافر ::
أظن إن البوست ده ممكن يبقى مهم لأي حد لسه مجربش السفر برة مصر وتحديداً البنات لمختلف الأسباب والإيشوز اللي بنعاني منها
المهم .. أنا بقالي فترة طويلة بحاول أسافر ودايماً الخطط بتبوظ عشان تحويشة فلوس تتصرف أو سفارات مش مستعنية تديني الفيزا ياكش يولعوا كلهم أنا قررت أروح لبنان هوب فتحت موقع skyscanner.com اللي بقى مزاج عندي أفتحه كل شوية أشوف الطيارات رايحة فين وجاية منين بكام؛ لقيت إن تذاكر السفر للبنان هتكلفني حوالي ٢٣٠٠ جنيه ذهاب وعودة .. تمام نحجز، الإقامة بقى قررت إني مش هانزل في أوتيل ولا هوستيل .. هوب فتحت موقع couchsurfing.com دورت على ناس عايشين في وسط البلد يستضيفوني .. هوب لقيت حد عايش في أشهر منطقة في الحمرا وجنب الجامعة الأمريكية؛ وحد تاني عايش في ضيعة في الجبل؛ وحد تالت متفرغ يوم يفرجني بيروت من أولها لآخرها .. ربنا بعتلي حدود كتير أوي من السما
فضلت عندي نقطة القلق الوحيدة إن يبقى فيه سخافة في المطار بأي شكل بسبب الباسبور ذو الورق الأبيض بتاعي ده! فهمت إن أهم نقطة يبقى معايا ٢٠٠٠ دولار ومش مطلوب تصريح أمني واتّكلت
محصلش سخافة أوي بس مفيش حد عديت عليه في مطار القاهرة مسألنيش كام سؤال من نوعية رايحة ليه؟ هاتنزلي فين؟ صحابك مين؟ معاكي ٢٠٠٠ دولار؟ راجعة امتى؟ .. المهم كله عدّى ووصلت لمرحلة الطيارة وطلعت برة مصر أخيراً وعدّيت من مطار رفيق الحريري في بيروت like a boss مش مصدقة حظي اللي وقعني في كل الناس اللي تجنن دي في المطار من أصغر لأكبر ضابط لبناني
السهل في لبنان؛ بيروت تحديداً إنها تتجاب من أولها لآخرها في يوم مثلاً ومعظم الأماكن مشي، وده اللي أنا عملته أول ما وصلت، نزلت استكشفت منطقة الحمرا من أول الشارع الشهير نفسه وكام شارع حواليه ليهم نفس الملامح في الشوبينج والمطاعم والكافيهات، وبما إن السفرية بتاعتي بميزانية محدودة ف كنت شايلة موضوع الشوبينج من حساباتي تماماً أو أي مطاعم غالية .. بالمناسبة اتفاجأت إنهم لسه بيتعاملوا بالليرة مع الدولار، يعني أدفع بالدولار آخد الباقي ليرة أو دولار أو الاتنين مع بعض
ملحوظة عالماشي: الدولار ١٥٠٠ ليرة .. يعني لو حاجة بمبلغ ١٥ ألف ليرة مثلاً بنقسم ال ١٥ ألف على ١٥٠٠ يطلع المبلغ بالدولار
تاني يوم كان دور أبليكيشان ShowAround في حياتي .. مهمتها إني بحدد مدينة أنا رايحاها وأشوف حد من أهل المدينة دي (فيه محددين سعر معين للساعة وفيه من غير فلوس حبّا في السفر وتبادل الثقافات) على حسب اهتماماته والطريقة اللي يقدر يساعدني بيها في استكشاف المدينة دي، حظي وقعني في بنت مدمنة أكل وعارفة كل نقطة في بيروت ايه الأكل الحلو اللي فيها وايه اللي يتجاب منها وعندها استعداد للتمشية اللانهائية عنها وخدنا بعضنا الساعة ١٠ الصبح فطرنا الأول في مكان لبناني جميل كده اسمه ( ت مربوطة ) فيه شوية مكدوس عجب ابتدينا التمشية من الحمرا للكورنيش؛ رحت شفت الروشة وكملنا شوية تمشية على الكورنيش .. بعد كده سيرفيس لأسواق بيروت
ملحوظة تاني: وسائل المواصلات في بيروت كانت التاكسي -وده غالي- وكان فيه أوبر بس مجربتوش، والباص -وده جربته بس من بيروت لمدينة تانية بس جوه بيروت بيفضل كتير جداً على ماييجي بسبب الزحمة ووقوفه المتكرر في أماكن كتير- والسيرفيس .. اللي هو عربية أجرة عادي بس تتعامل كسرفيس ممكن يركّب أي حد تاني على الطريق حتى لو العربية هاتتملي، في حالات السواق لما بتقوله المنطقة ويحب يتأمر يقول ( ٢ سيرفيس ) يعني تدفع شخصين ٤٠٠٠ ليرة بدل ٢٠٠٠ أو يقول تاكسي، بالتالي نفكسله ونستنى واحد غيره هياخد سيرفيس واحد ٢٠٠٠ ليرة
في الطريق عدينا على zaytouna bay ده المشهور باليخوت اللي راكنة في الميناء بتاعته؛ وحي الأشرفية، المفروض إن دي أحياء الناس الغنية أوووووووووي وعندها جزينة كبينة يا أوناني
وصلنا الأسواق اللي هي خليط بين الindoors وال outdoors .. غالية إلى حد كبير بس التمشية فيها حلوة وفيها شياكة كده
المحطة اللي بعدها كانت چيمايزه .. الشارع ده حوار .. هو شارع سكني عادي بس كله مطاعم وكافيهات وشوية بارات، فيه بيوت قديمة شكلها حلو جداً والتمشية فيه ليها موود كده لدرجة مخلية البلدية بتحاول تقلّل الرِجل عليه بإنها حاطة بين كل كام متر يافطة "منطقة سكنية" اللي هو خلّوا عندكم دم وروحوا اتمشوا في حتة تانية؛ أو بإنهم بيفرضوا على المحلات والمطاعم والبارات يقفلوا بدري عشان الشارع ميبقاش قلق ويروحوا للبديل اللي هو شارع مار مخايل ..
چيمايزة كان فيه محطة الغدا في مكان اسمه طبلية مسعد، ملوش أي دعوة بالطبلية أو بمعنى أصح اتضح إن الطبلية هنا مقصود بيها لوح التقطيع الخشب اللي الأكل بيتقدم عليه المكان ده برضه عليه شوية ساندوتشات بالحجم العائلي كبييييرة جدا ومحدش يقدر يخلصها .. وزي ما قلنا عالمكدوس من شوية هانقول هنا إن عليهم فتّوش عجب
تكملة التمشية كانت لشارع مار مخايل اللي بدايته مع آخر چيمايزه، ده بقى معروف بالـnight life .. عبارة عن bars & pubs & clubs جنب بعض واحد ورا التاني، بالنهار هدوء طبعاً مفيش أي حاجة بس بالليل كان حاجة تانية خالص
نهاية رحلة التمشية دي كانت قعدة في كافيه اسمه إم نزيه .. كافيه ومطعم أكله حلو جداً وقعدته أحلى وفيه في المدخل بتاعه لوحة كبيرة بيتحط عليها أي رحلات سياحية أو day use هايتعمل وبأسعار حلوة جدا مناسب لأي حد ممكن يكون محتاج أنشطة تتعمل أو عايز يعمل حاجة مختلفة في رحلته
تالت يوم كان يوم المغامرة الأعظم في حياتي رحت جونيه ودي طريقها ٣٠ دقيقة في العادي بالباص من بيروت بدولار؛ بس نظراً لأن الأوتوستراد كان مزحوم زحمة كوبري أكتوبر يوم الخميس الساعة ٦ فالطريق أخد ساعتين تقريباً مكانوش مملين بالنسبالي لأني بتفرج على الطريق المبهر في حد ذاته بين البحر والجبل .. وصلت طلعت الجبل ونطّيت paragliding at harissa .. مش محتاجة اتكلم عن التجربة دي كتير بس أي حد غاوي أدرينالين يتجه على هناك فورااااا
بعدها كمّلت الرحلة على البحر مع حد من صحابي road trip من جونيه لبيبلوس أو جبيل -على حسب مين بيسميها ايه - دي كانت محطة بس على الطريق شفت فيها قلعة جبيل وكملنا للوجهة الرئيسية اللي هاقضّي فيها بقية الليلة وتاني يوم
للبترون اللي رحت فيها ضيعة تنّورين .. اللي برضه مفيش شبر منها ميخليش الواحد واقف متنّح من الجمال وسلام الروح اللي بيحسّه .. كنت قاعدة في بيت عائلة بيطل على مجموعة جبال رهيبة كده هي مركز التسلق الأساسي هناك .. وبعد ماوصلت بشوية سمعت أصوات أجراس الكنيسة بعدها ترانيم صلاة بصوت فيروز عالية جداً والجبال عاملة صدى صوت رهيب مع غروب الشمس مع شوية صوت عصافير كده على نهر جميل جنب البيت .. أنا مجربتش دماغ المخدرات بس أكاد أجزم اللي أنا كنت حاسة بيه ساعتها ده كان دماغ دماغ طبيعة بقى
بالليل عملنا كامب عالجبل بما إن الأماكن دي مفهاش أنشطة أوي غير أي حاجة ليها دعوة بالطبيعة والsightseeing .. تاني يوم في تنورين برضه طلعنا في الجبل فوق شوية كمان لمكان سياحي مشهوووووور جداً اسمه بلوع بلعا .. اه الإسم صعب واه هو المقصود بيه البلاعة لأن هو عبارة عن جزء كهوف وجزء عميييييييق جداً لتحت على كذا مرحلة مش باينله آخر فهو بيبلع أي حاجة تنزل فيه ده برضه نقطة تانية ينفع فيه تسلق الجبل أو نتفرج عالمكان بس وننبهر بيه زي اللي قبله واللي قبله وفيه وقت في السنة اللي هو آخر الشتا لما التلج بيبتدي يدوب بيكون المكان ده فيه نقطة انبهار زيادة وهي الشلالات !!
الأكل هنا برضه حكاية لوحده وكان في مطعم مش قادرة أقرر أنهي فيه أحلى الأكل نفسه ولّا الڤيو اللي بين الشجر وجنب النهر وفوق النهر وحوالين النهر مطعم اسمه وادي الدير .. والفكرة إن زي ما فيه شلالات بتظهر في البلوع في الشتا ومش موجودة في الصيف؛ المطعم ده موجود في الصيف ومش موجود في الشتا عشان النهر بيبقى فايض ومالي المكان كله مية!!
وبس كده ٤ أيام نمت فيهم بمعدل ساعتين تلاتة في اليوم وبالعافية لأني مكنتش عايزة أضيّع ولا دقيقة من غير ماكون بعمل فيها حاجة حتى لو بتمشى بس اتفرج على الناس هناك
في المجمل السفرية دي قامت على:
Skyscanner.com
Couchsurfing.com
Showaround App
سهلة جداً وتجنن جداً وممكن تبقى رخيصة جداً جداً ف روحوا لبنان يا جماعة .. لبنان بلد جميل D:
المهم .. أنا بقالي فترة طويلة بحاول أسافر ودايماً الخطط بتبوظ عشان تحويشة فلوس تتصرف أو سفارات مش مستعنية تديني الفيزا ياكش يولعوا كلهم أنا قررت أروح لبنان هوب فتحت موقع skyscanner.com اللي بقى مزاج عندي أفتحه كل شوية أشوف الطيارات رايحة فين وجاية منين بكام؛ لقيت إن تذاكر السفر للبنان هتكلفني حوالي ٢٣٠٠ جنيه ذهاب وعودة .. تمام نحجز، الإقامة بقى قررت إني مش هانزل في أوتيل ولا هوستيل .. هوب فتحت موقع couchsurfing.com دورت على ناس عايشين في وسط البلد يستضيفوني .. هوب لقيت حد عايش في أشهر منطقة في الحمرا وجنب الجامعة الأمريكية؛ وحد تاني عايش في ضيعة في الجبل؛ وحد تالت متفرغ يوم يفرجني بيروت من أولها لآخرها .. ربنا بعتلي حدود كتير أوي من السما
فضلت عندي نقطة القلق الوحيدة إن يبقى فيه سخافة في المطار بأي شكل بسبب الباسبور ذو الورق الأبيض بتاعي ده! فهمت إن أهم نقطة يبقى معايا ٢٠٠٠ دولار ومش مطلوب تصريح أمني واتّكلت
محصلش سخافة أوي بس مفيش حد عديت عليه في مطار القاهرة مسألنيش كام سؤال من نوعية رايحة ليه؟ هاتنزلي فين؟ صحابك مين؟ معاكي ٢٠٠٠ دولار؟ راجعة امتى؟ .. المهم كله عدّى ووصلت لمرحلة الطيارة وطلعت برة مصر أخيراً وعدّيت من مطار رفيق الحريري في بيروت like a boss مش مصدقة حظي اللي وقعني في كل الناس اللي تجنن دي في المطار من أصغر لأكبر ضابط لبناني
السهل في لبنان؛ بيروت تحديداً إنها تتجاب من أولها لآخرها في يوم مثلاً ومعظم الأماكن مشي، وده اللي أنا عملته أول ما وصلت، نزلت استكشفت منطقة الحمرا من أول الشارع الشهير نفسه وكام شارع حواليه ليهم نفس الملامح في الشوبينج والمطاعم والكافيهات، وبما إن السفرية بتاعتي بميزانية محدودة ف كنت شايلة موضوع الشوبينج من حساباتي تماماً أو أي مطاعم غالية .. بالمناسبة اتفاجأت إنهم لسه بيتعاملوا بالليرة مع الدولار، يعني أدفع بالدولار آخد الباقي ليرة أو دولار أو الاتنين مع بعض
ملحوظة عالماشي: الدولار ١٥٠٠ ليرة .. يعني لو حاجة بمبلغ ١٥ ألف ليرة مثلاً بنقسم ال ١٥ ألف على ١٥٠٠ يطلع المبلغ بالدولار
تاني يوم كان دور أبليكيشان ShowAround في حياتي .. مهمتها إني بحدد مدينة أنا رايحاها وأشوف حد من أهل المدينة دي (فيه محددين سعر معين للساعة وفيه من غير فلوس حبّا في السفر وتبادل الثقافات) على حسب اهتماماته والطريقة اللي يقدر يساعدني بيها في استكشاف المدينة دي، حظي وقعني في بنت مدمنة أكل وعارفة كل نقطة في بيروت ايه الأكل الحلو اللي فيها وايه اللي يتجاب منها وعندها استعداد للتمشية اللانهائية عنها وخدنا بعضنا الساعة ١٠ الصبح فطرنا الأول في مكان لبناني جميل كده اسمه ( ت مربوطة ) فيه شوية مكدوس عجب ابتدينا التمشية من الحمرا للكورنيش؛ رحت شفت الروشة وكملنا شوية تمشية على الكورنيش .. بعد كده سيرفيس لأسواق بيروت
ملحوظة تاني: وسائل المواصلات في بيروت كانت التاكسي -وده غالي- وكان فيه أوبر بس مجربتوش، والباص -وده جربته بس من بيروت لمدينة تانية بس جوه بيروت بيفضل كتير جداً على ماييجي بسبب الزحمة ووقوفه المتكرر في أماكن كتير- والسيرفيس .. اللي هو عربية أجرة عادي بس تتعامل كسرفيس ممكن يركّب أي حد تاني على الطريق حتى لو العربية هاتتملي، في حالات السواق لما بتقوله المنطقة ويحب يتأمر يقول ( ٢ سيرفيس ) يعني تدفع شخصين ٤٠٠٠ ليرة بدل ٢٠٠٠ أو يقول تاكسي، بالتالي نفكسله ونستنى واحد غيره هياخد سيرفيس واحد ٢٠٠٠ ليرة
في الطريق عدينا على zaytouna bay ده المشهور باليخوت اللي راكنة في الميناء بتاعته؛ وحي الأشرفية، المفروض إن دي أحياء الناس الغنية أوووووووووي وعندها جزينة كبينة يا أوناني
وصلنا الأسواق اللي هي خليط بين الindoors وال outdoors .. غالية إلى حد كبير بس التمشية فيها حلوة وفيها شياكة كده
المحطة اللي بعدها كانت چيمايزه .. الشارع ده حوار .. هو شارع سكني عادي بس كله مطاعم وكافيهات وشوية بارات، فيه بيوت قديمة شكلها حلو جداً والتمشية فيه ليها موود كده لدرجة مخلية البلدية بتحاول تقلّل الرِجل عليه بإنها حاطة بين كل كام متر يافطة "منطقة سكنية" اللي هو خلّوا عندكم دم وروحوا اتمشوا في حتة تانية؛ أو بإنهم بيفرضوا على المحلات والمطاعم والبارات يقفلوا بدري عشان الشارع ميبقاش قلق ويروحوا للبديل اللي هو شارع مار مخايل ..
چيمايزة كان فيه محطة الغدا في مكان اسمه طبلية مسعد، ملوش أي دعوة بالطبلية أو بمعنى أصح اتضح إن الطبلية هنا مقصود بيها لوح التقطيع الخشب اللي الأكل بيتقدم عليه المكان ده برضه عليه شوية ساندوتشات بالحجم العائلي كبييييرة جدا ومحدش يقدر يخلصها .. وزي ما قلنا عالمكدوس من شوية هانقول هنا إن عليهم فتّوش عجب
تكملة التمشية كانت لشارع مار مخايل اللي بدايته مع آخر چيمايزه، ده بقى معروف بالـnight life .. عبارة عن bars & pubs & clubs جنب بعض واحد ورا التاني، بالنهار هدوء طبعاً مفيش أي حاجة بس بالليل كان حاجة تانية خالص
نهاية رحلة التمشية دي كانت قعدة في كافيه اسمه إم نزيه .. كافيه ومطعم أكله حلو جداً وقعدته أحلى وفيه في المدخل بتاعه لوحة كبيرة بيتحط عليها أي رحلات سياحية أو day use هايتعمل وبأسعار حلوة جدا مناسب لأي حد ممكن يكون محتاج أنشطة تتعمل أو عايز يعمل حاجة مختلفة في رحلته
تالت يوم كان يوم المغامرة الأعظم في حياتي رحت جونيه ودي طريقها ٣٠ دقيقة في العادي بالباص من بيروت بدولار؛ بس نظراً لأن الأوتوستراد كان مزحوم زحمة كوبري أكتوبر يوم الخميس الساعة ٦ فالطريق أخد ساعتين تقريباً مكانوش مملين بالنسبالي لأني بتفرج على الطريق المبهر في حد ذاته بين البحر والجبل .. وصلت طلعت الجبل ونطّيت paragliding at harissa .. مش محتاجة اتكلم عن التجربة دي كتير بس أي حد غاوي أدرينالين يتجه على هناك فورااااا
بعدها كمّلت الرحلة على البحر مع حد من صحابي road trip من جونيه لبيبلوس أو جبيل -على حسب مين بيسميها ايه - دي كانت محطة بس على الطريق شفت فيها قلعة جبيل وكملنا للوجهة الرئيسية اللي هاقضّي فيها بقية الليلة وتاني يوم
للبترون اللي رحت فيها ضيعة تنّورين .. اللي برضه مفيش شبر منها ميخليش الواحد واقف متنّح من الجمال وسلام الروح اللي بيحسّه .. كنت قاعدة في بيت عائلة بيطل على مجموعة جبال رهيبة كده هي مركز التسلق الأساسي هناك .. وبعد ماوصلت بشوية سمعت أصوات أجراس الكنيسة بعدها ترانيم صلاة بصوت فيروز عالية جداً والجبال عاملة صدى صوت رهيب مع غروب الشمس مع شوية صوت عصافير كده على نهر جميل جنب البيت .. أنا مجربتش دماغ المخدرات بس أكاد أجزم اللي أنا كنت حاسة بيه ساعتها ده كان دماغ دماغ طبيعة بقى
بالليل عملنا كامب عالجبل بما إن الأماكن دي مفهاش أنشطة أوي غير أي حاجة ليها دعوة بالطبيعة والsightseeing .. تاني يوم في تنورين برضه طلعنا في الجبل فوق شوية كمان لمكان سياحي مشهوووووور جداً اسمه بلوع بلعا .. اه الإسم صعب واه هو المقصود بيه البلاعة لأن هو عبارة عن جزء كهوف وجزء عميييييييق جداً لتحت على كذا مرحلة مش باينله آخر فهو بيبلع أي حاجة تنزل فيه ده برضه نقطة تانية ينفع فيه تسلق الجبل أو نتفرج عالمكان بس وننبهر بيه زي اللي قبله واللي قبله وفيه وقت في السنة اللي هو آخر الشتا لما التلج بيبتدي يدوب بيكون المكان ده فيه نقطة انبهار زيادة وهي الشلالات !!
الأكل هنا برضه حكاية لوحده وكان في مطعم مش قادرة أقرر أنهي فيه أحلى الأكل نفسه ولّا الڤيو اللي بين الشجر وجنب النهر وفوق النهر وحوالين النهر مطعم اسمه وادي الدير .. والفكرة إن زي ما فيه شلالات بتظهر في البلوع في الشتا ومش موجودة في الصيف؛ المطعم ده موجود في الصيف ومش موجود في الشتا عشان النهر بيبقى فايض ومالي المكان كله مية!!
وبس كده ٤ أيام نمت فيهم بمعدل ساعتين تلاتة في اليوم وبالعافية لأني مكنتش عايزة أضيّع ولا دقيقة من غير ماكون بعمل فيها حاجة حتى لو بتمشى بس اتفرج على الناس هناك
في المجمل السفرية دي قامت على:
Skyscanner.com
Couchsurfing.com
Showaround App
سهلة جداً وتجنن جداً وممكن تبقى رخيصة جداً جداً ف روحوا لبنان يا جماعة .. لبنان بلد جميل D:
