M
Mandela Mando
:: مسافر ::
اولا كلنا عارفين ازاي نطلع الفيزا والموضوع ده شرحهولنا استاذ Bahaa Aldeen Farouk اكتر من مره وبعد كده تحدد امتي انت رايح وتعمل تأمين السفر بتاريخ الفترة اللي حتقضيها كلها وكمان حجز المكان اللي انت حتقعد فيه طول فترة الرحله علشان ممكن ظابط المطار في جورجيا ممكن يسألك عن الاوراق دي. بالنسبه لحجز الطيران ارخص تيكيت حتلاقيه تبع شركة اير كايرو في حدود 4000 الي 4500 ودي شركه بتعمل رحلات اسبوعية لجورجيا بس من مطار شارم ايام الاحد والخميس ومن مطار الغردقه يوم السبت وانا شخصيا حجزت 11 يوم بدايه من الاحد 26/2 الي الخميس 9/3 بسعر 4300 وحجزت هوستيل اسمه anchi hostel من علي بوكينج وده كان احلي حاجه في الرحله لاني قابلت واحد مصري شغال هناك اسمه يحيي هاشم عرفني كل خرم ابره في جورجيا وازاي اعمل كل حاجه بأقل التكاليف وكمان الهوستيل نظيف وامان وكمان ليك خزنه خاصه وده مهم جدا وكلفني الهوستيل لمده 11 يوم حوالي 165 لاري. نصيحه اهم شئ اول ماتعدي من مطار جورجيا حتلاقي مكان تغير منه عمله اوعي تغير اكتر من 20 دولار اولا علشان تشتري خط (واهم شئ في الخط انك تاخد باكيدج نت علي حسب استخدامك وتشحن حوالي 2 لاري مكالمات) اول ماتطلع من باب المطار اوعي تتعامل مع اي سواق تاكسي لانهم نصابين وغاليين جدا جدا (علشان انا اتنصب عليا في 50 لاري اول مانزلت البلد) استني اتوبيس رقم 137 بنص لاري فقط(50 تتري) تقدر تحاسب السواق وتقولو علي العنوان اللي انت عاوز تروحو وهوه حينزلك اقرب مكان ليه. بعد ماتوصل الهوستيل بتاعك تقدر ترتاح ولما تقرر انك تنزل البلد روح اقرب محطة مترو واشتري كارت المواصلات ب2 لاري واشحنه بحوالي 5 مبدأيا وكل مايخلص من اي محطه تقدر تشحنه تاني بأي مبلغ والكارت ده حتستخدمه في المترو والباص والقطار والتليفريك بسعر رمزي جدا وشحنه ساهل جدا. اهم محطه لازم تكون عارفها هيه محطة ديدوباي لان دي زي موقف عبود تقدر تركب اي ميكروباص(اسمه في جورجيا ماشوتكا) لاي مكان تروح تقضي فيه يومك وترجع في نفس اليوم بسعر رخيص اوي يعني انت لو حتعمل يوم الي كازبيجي تبع شركة سياحه ده حيكلف الفرد في حدود 50 الي 60 دولار في نفس الوقت انت تقدر تركب ماشوتكا من ديدوباي ب12 لاري وتعيش انت المغامره وتفهم عادات البلد بنفسك وده احلي حاجه في الرحله من وجهة نظري (التكيف والاندماج مع اهل البلد) في وسط البلد حتلاقي اماكن صرافه كتير تغير منها عمله بس اختار احسن سعر وخلي بالك علشان فيه شركات بتاخد نسبه من 9% الي 11% خلي بالك من النقطه دي علشان انت اولي بفلوسك لانها حتنفعك ماتستهونش بيها. اي سؤال تاني انا تحت امركم وامر الجروب كله بس بلاش الخاص علشان الكل يستفاد