موضوع للنقاش شاهدنا في الايام القليله الماضيه...

[Ali Fakree Eldin ElSallabi]

موضوع للنقاش
شاهدنا في الايام القليله الماضيه العديد من الشباب الليبين قامو بالسفر عن طريق البحر من ليبيا الي ايطاليا
واحدهم قام بمداخله علي احدي القنوات وقال انه سعيد بسفره وانه استقر في احدي مدن ايطاليا
وان القارب الذي ذهب عليه اخذ منه 500 دينار
وانه في حاله ان الشخص ليس معه مال
يستطيع الركوب مجانا
ما رايكم في التجربه
هل فقدانك للأمل من العيشه ومن الوضع في ليبيا يسمح لك ان تغامر هذي المغامره ؟
هل هؤلاء الشباب معهم الحق فيما فعلوه
ام انهم خاطرو بحياتهم في سبيل لا شئ ؟

عطونا أرائكم
#feel_free_to_talk

 

[Awad Albarasi]

ماعتقدش ان لو ممعكش فلوس يركبوك مجانا
ونحس فيها مخاطرة مش مستحقه الا لو خلاص معش يقدر

 

[Yousra Ali]

شي منظم نحس فيه مش بلاش الموضوع كله مش لله في أمر خفي ورا هالأمر فكرني بفترة السبعينات بس السبب يختلف بكل تأكيد

 

[عطر باريسي]

كيف مايقول المثل اللي يطلع من داره يقل مقداره
مسافرين لايطاليا بدون إجراءات وتاشيره هجرة غير شرعيه كيف بيعيشو بصراحه ضد السفر بطريقه الهجرة

 

[Emma EJ]

اكيد فيه ناس ماتت من وراء الشي هذا
صح انحب انسافر بس انحب بلادي اكثر وما نبي انكون لاجئة بل سائحة.

 

[Mowada Mansoure]

منونه الحداد

 

[Alfayha'a Mif Alwerfal'e]

حسيته معتمد عالشجاعه وشنو بيدير من فايده غادي.... ولانه وضع البلاد مأساوي ومستقبل الشباب والبنات للاسف ضاع. بس حتي راحة البال والامان كويس

 

[Noor Libya]

لو سفر قانوني و حاب انك تعيش برا المدة اللي انت تبيها من سنة الى 20 سنه و تشتغل و تتعب معليش ممكن..
لكن مشي بدون اوراق لا ليبيا و لا ايطاليا ادافع عليك او اتعاطف امعاك لو صارلك حاجة و تقعد مجرد نكرة بلا قيمة لانه عمره اللي يبيع وطنه ما يلقى حد يصفقه و يقوله برافوو..
لو هو هارب خايف من الموت في ليبيا شنو ضمنه البحر مايغرقه.. الموت في بلادي و عشانها ااشرفلي 100 مرة
و مع هذا كل حد و ظروفه ممكن لو فيه عنده قصة مرض او حاجة ثانيه ممكن نعذره.

 

[Ali Fakree Eldin ElSallabi]

عموما في نسبه من الناس الي سارو نحجو وتوا عندهم مطاعم او دخل ثابت في ناس حتا سافرو من 2011 لتوا ومزالو قاعدين غادي ودارو ورقه لاجئ

 

[Nora Ahmed]

انا وحدة من الناس نصبر علي سوء الاحوال ولا نطلع و نزيد وضعي اسوء من هك.. نطلع لمكان لا تخطيط.ولا فلوس ولا مستقبل ولا اوراق رسمية.. سبهلله هك.. هذا رأيي الشخصي
بس بالنسبة للشباب والعائلات اللي طلعوا هك... منقدرش نحكم عليهم
الله اعلم الظرف والضيق اللي مروا بيه وخلاهم يهاجروا
في اللي ضاقت بيه وطلع... وفي اللي تحمس للفكرة بس ظرفه مازال يتحمل وطلع
بس كلهم ان شاء الله ربي يعوضهم خير و مانشوفوا حد فيهم منذل او حاله اسوء
وربي يصلح حال بلادنا

 

[Furat Assadeg Eghribil]

شوف انا عشت برا البلاد وعارفة الوضع... في اللي مشى واشتغل واعتمد على نفسه وعاش حياة كريمة ومع الوقت تحصل اوراق اقامة رسمية وفي اللي مشى كملها دفنقي معتمد عالاعانات من الدولة وهو من شارع لشارع يدوح ومن.... ل...... هذا النوع مصيره ضايع لا محالة..
وبالنسبة للهجرة غير الشرعية توا حسب الدولة اللي اطيح فيها في عائلتين من بنغازي طلعو هجرة غير شرعية من سنة بالضببببط عائلة في بلجيكا توا امورهم تمام بكل وماطولوش في الاجراءات لان ابناؤهم متفوقين فعطوهم الاولوية ومبسوطين جدا وعائلة في المانيا تبهههههههدلو بكل لعند توا مبيت بحمام مشترك لا اوراق لا دراسة ولا شي بكل تعبانين ونادمين وتوا راجعين..
يعني انت وتفكيرك وخياراتك للدولة اللي تبيها وتكون دارس الطريقة اللي توصل فيها للبلاد اللي تبيها كويس

 

[Furat Assadeg Eghribil]

بس عموما انا مع الهجرة بصفة عامة حتى عن طريق البحر عادي

 

[Ali Fakree Eldin ElSallabi]

Ethar Tarek Mohammed زي مقلتكم في ناس ينجحو وايغيرو في حياتهم

 

[علي أجويلي]

ياراجل نقعد في بلادي بمزاطها ولا نطلع ونقعد ناخد في اعانه من الدوله اقل شي هنا هلي وناسي برا اتمعيل وتروح

 

[Hadeel Sharmn]

الموضوع مش سهل وانا ضده فيه خطر علي حياته هدا غير الي بيشوفه من تبهديل وقله قيمه برا بس في نفس الوقت مش عارفين شن الظروف الي وصلت كل واحد للمرحله هادي

 

[Fatima Elomame]

كان الكل يبي يهاجر من ليبيا من قعد في ليبيا لو الشباب هضوما قعدوا في ليبيا وخدموها بعلمه مش أحسن اصلا مفش بلاد تبنى بلا شباب بس نحن للأسف الشباب يلي مامتش في الحرب هاجر

 

[Fatooma Netfa]

هي إيطاليا تستحق المخاطرة الحق
بس انا لو يعطوني الـ 500 جنيه مستحيل نركب

 

[Ali Fakree Eldin ElSallabi]

المشكله ان معظم التعليقات بنات ميعرفنش مذله انك متللقش في جيبك حتا جنيه تشري بيه خبزه لهلك الشعور هذا محبط بدرجه مش عادي وممكن ايخليك اتدير اي حاجه

 

[Swiss Ice]

#ضد وبقوة ! مهما كانن الأسباب يلي تركتهم يطلعو مافي شي يبرر طريقة طلوعهم (مثل الخفافيش) إن صح التعبير *
أرض الله واسعة لكل البشر وكل إنسان ليه حق الترحال من مكان لأخر بشرط أنه يسافر وهو #معزز_مكرم بطرق سفر شرعية وأوراق ثابتة يعترف بها القاسي والداني وإلا (أهلا بكم في جميع البلدان بنكهة السلطة !!)!
نحنا أول بلد عربي نعانو من كثرة الأفارقة وغيرهم يلي حتى هم نقدرو نبررو دخولهم لبلادنا بدافع العمل وأكل العيش وووووو (مع إحترامي للناس يلي من تلك الرقعة)
بالنهاية ربي يسهلهم ويفتحها #فقط قدام الناس يلي حاطة أهداف وتبي تصنع حالها بعيدا عن الناس يلي ماشية تبي تفرغ طاقات فقط لا غير !

 

[Ali Fakree Eldin ElSallabi]

البنات يقعدن في الحوش يصرف عليهن الوالد لعند ميستلمهن الزوج بس الشاب عليه انه ايكون مستقبله وحياته و70 الف جنيه في خلال 10 سنين من اول ميتخرج لعند ميقرر يزوج يعني في ستريس وضغط مش عادي عليه