#قصه_حزينه_صارت_معايا_وانا_مسافر شويه نكد...

[Ali Fakree Eldin ElSallabi]

#قصه_حزينه_صارت_معايا_وانا_مسافر

شويه نكد خلوني انككد بيه عليكم وانا نذكر في رحلتي سنه 2014
اقرو القصه للاخر وقولولي شن رايكم
طويله شويه بس انشاللله حتعجبكم واتنكدو زيي ما انا كنت متنكد في وقتها

القصه صارت في تونس 2014
كنت مروح من المانيا وجوي سمح ومهيج اخر هياجه في رحله مش عاديه شملت عده بلدان
( المانيا فرنسا بولندا هولندا )
وكانت اخر محطه تونس ومنها الي الغاليه بنغازي
المهم
كانت رحلتي من تونس للابرق الساعه 1 في الظهر وانا واصل من بولندا لتونس الساعه 8 في الصبح قعدت انراجي في رحلتي وجوي سمح وفي جيبي خمسين يورو ديما انخلي فيهن احتياط عشان نقضي بيهن اخر ساعات في رحلتي قبل منروح
وفجاءه
تليفوني رن فيبر
الحاجه اترن عليا
قالتلي الغي سفرتك ليبيا وتعال الحقنا لمصر عشان الوضع الامني في بنغازي مش تمام و و و و و و........ الخ
قالتلي نحنا مسافرين بكرا لمصر
وانتا لازم تلحقنا
قلتلها حاضر
وفتت رحلتي لليبيا وكلمت صاحبي في ليبيا حجزلي فندق في تونس نقعد فيه الليله عشان انوض تاني يوم نحجز لمصر
نضت تاني يوم وماشي نحجز ومزالت السعاده باديه علي وجهي
كلمتني الحاجه ( ربي يحفظها وايطولي في عمرها )
وقالتلي محصلنش حجز الا يوم الجمعه الجايه
فتعال ليبيا وتو انعدو مع بعضنا
تسحاب عندي طياره خاصه

#وكانت_هذه_الصدمه_الأولي

المهم سكرت التليفون وعلامات التعاسه والغضب بدن يطلعن علي وجهي
وعديت للخطوط الليبيه بش انغير التذكره بتاعي علي اقرب موعد لليبيا
خشيت للمكتب ومعايا جواز سفري وشنطه السفر وشنطه صغيره انحط فيها علي كتفي
قالتلي الموظفه فرق تغيير التيكت 40 دينار تونسي واقرب رحله بعد بكره
قلتلها باهي شويه انصرف اليورو الي عندي وانجي
طلعت بنصرف
تباعدت شويه
طحت في شرطه
قالولي كيف ممعاكش اثبات هويه ( طروح توانسه يبو فلوس )
المهم خلوني يلاهم نص ساعه بعدها طلقوني بعد مسكرت راسي اني مش حنعطيهم فلوس
يأست من اني نلقي صرافه فاتحه
رديت للمكتب
#لقيته_مسكر
وعندهم جوازي وشنطه سفري
!!!!!!!!!!!!!!!!
#وكانت_هذه_الصدمه_الثانيه

الدنيا دارت بيا وانا مش عارف شن اندير خبطت ع الباب برمت يمين يسار مفيش اي امل او اي حد قاعد جوا
وكان يوم خميس
والجمعه عطله ولازم انعدي السبت بش ناخذ حاجاتي
وقفت في الشارع
انتأمل في االناس الي ماشيين بلا اي هدف
والحمد لله ان تليفوني كان معايا
كلمت صاحبي الي قاعد في تونس حكيتله القصه وقتله اليوم نبي نطلع من الموود السئ هذا لعند منرد حاجاتي
وكلمت صاحبي الاخر بتاع ليبيا قتله احجزلي في هوتيل يومين لعند السبت
كسدت مع صاحبي الي في تونس في قهوه لعند الساعه 12
وعديت للهوتيل بنرقد
الهوتيل مبش يستقبلني عشان طبعا معنديش جواز او اثبات هويه بالرغم من ان الحجز صحيح
بس قالي اقل حاجه سيب عندي مائه يورو كضمان
وانا في وقتها مكنش عندي
ولكم ان تتخايلو الموقف
واقف في شارع الحبيب بورقيبه الساعه 1 في الليل _( فاضي مفيهش مخلوق )
بلا جواز سفر
او شنطه
او دبش ( ملابس )
وشحن تليفوني 4 في الميا
وصاحبي انرن عليه 5982 مره ميردش عشان تاني يوم كان عنده عمليه

#وكانت_هذه_الصدمه_الثالثه


دارت الدنيا وحسيت بالذل والمهانه وانا واقف مش عارف شن اندير
شعور سئ جدا جدا جدا
وجيبي فيه خمسين يورو
و6 دينار تونسيات فقط لا غير
تحركت من مكاني نحو المجهول
ومريت علي انسان متشرد راقد في الشارع وقتله السلام عليكم
قالي عليكم السلام
وبعدها صببا من مكانه وجا ماشي باتجاهي
وقالي (وحنترجملكم كلامه الي اللغه الليبيه ): خويا انحس فيك تبرم من بدري كأنك تائه او اتدور في حاجه لو تبي ممكن انساعدك
بحتت فيه بنظره عميقه وخنقتني وانا انقوله
(ربي جابك ليا من السماء )
وقتله ان مشكلتي كلها حاليا اني نبي نشحن تليفوني
قالي حاضر
وخذاني لبار بتاع صاحبه نشحن فيه تليفوني
وقعد يحكيلي ان صاحب الحوش الي هوا ساكن فيه لززه من الحوش عشان مسددش 40 دينار حق المبيت له اسبوعين
فعشان هكي له اسبوعين يرقد في الشارع
قتله ان لو ربي طلعني من المحنه الي انا فيها توا انشالله حنساعده بكل مايعطيني ربي من قوه
اخيرا بعد الشحوره هذي كلها ناض صاحبي ( الي كنت مكسد معاه في القهوه والي انرن عليه ميردش) يشرب في اميا لقاني ران عليه , رن عليا
وفهمته القصه قالي تعال بات عندي
جيته في الشقه بتاعه بعد مودعت صاحبي المتشرد ( وطبعا قلته اني حنجي لمكتب الخطوط يوم السبت ولازم انشوفه غادي )
بتت عند صاحبي يومين
ونضت يوم السبت
عديت دغري لمكتب الخطوط وطبعا صرفت اليورو الي عندي تونسي
خشيت للمكتب ( هزبني صاحب المكتب وقاللي كيف تنسي جوازك وشنطتك عندنا )
وحكيتله القصه قالي
توا اقرب حجز من تونس لليبيا
بعد اسبوعين
اسبوعيييييييييييييييييييييييييييييييييييييييييييين
عشان الخطوط التونسيه والافريقيه لغو رحلاتهم والخطوط الليبيه الوحيدات الي يخدمن
#وكانت_هذه_الصدمه_الرابعه

قالي معندكش حل الا انك تستنسي علي الويتينج بلكي ايركبوك وبلكي لا
عديت سلكت فلوس الحوش علي صاحبي المتشرد
ورديت للشقه وانا مش عارف شن حندير في حياتي وفي الازمه العجيبه الي صارت معايا
والفلوس التونسي الي عندي ميتحملنش اقامه اكثر من يومين تلاته بالكثير
كملت الفلوس التونسي الي عندي دزيت علي فلوس من صديقه ليا قاعده في مالطا ( مفيش تحويل من ليبيا في هذكي الوقت )
وكل يوم انعدي من 8 الصبح لل2 في الظهر للمطار انراجي ومنركبش وانروح لشقه صاحبي والناس بالمئات في المطار ايراجو زيي
وعلي اليوم العاشر
كنت مكمل الفلوس الي عندي بالكامل مش فاضل منهن الا 40 دينار تونسي
وصاحبي يبي ايروح من تونس خلاص كمل كل حاجه عنده ويبي ايسلم الشقه
حجزت بيهن غرفه في احقر وارخص هوتيل في تونس ونضت الصبح خذيت شنطتي
وتوكلت علي الله شور المطار
وفي راسي فكره وحده
ياصابت يا خابت
راجيت الركاب كلهم يركبو عشان يبدو في الوايتينج
راجيت
وراجيت
واخيرا قالولي مفيش مكان خلاص الطياره امتلت
#وكانت_هذه_الصدمه_الخامسه_والاخيره

قلت معش فيها الا بيات في المطار ومعش بنصبي علي حد
قعدت في المطار راقد ع الشنطه بتاعي انراجي في 16 ساعه ايمرن عشان انحاول نركب علي الطياره الي طالعه في الصبح كالعاده
لعند مشغلت دماغي شويه ع الساعه 5 في العصر وقلت خليني اندير محاوله بائسه
كلمت عممي طيار متقاعد في ليبيا سالته علي مدير مكتب الخطوط الليبيه في تونس
والغريب انه طلع يعرفه وعاطني رقمه
وبالصدفه كانت في رحله مفاجاءه جايين عليها شخصيات مهمه من ليبيا وترد في نفس اليوم الساعه 12 في الليل
كلمت الراجل وشرحتله الموضوع قالي عدي للمرحل وخوذ منه البوردينج باس
انفجعت من الفرحه
كانه قالي عدي خوذ مليون جنيه بالزبط
مع حالتي النفسيه الزفت الي كنت فيها ودره الكبد الي عشته في خلال ال11 يوم الي فاتو
كانت اسعد لحظة في حياتي لما مسكت البوردينج باس في يدي
كاني ماسك بوردينج باص لامريكا
وركبت ونزلت في الابرق
ومفهمتش اللقطه الي اديرو فيها المصريين لما ايبوسو علي ارض المطار الا لما حسيت بقيمه انك تقعد غريب في بلاد غريب وتنذل وتشحور ومحدش ايعبرك ولا يسال فيك
نزلت ع الوطا وبستها
وروحت لبنغازي ( وقصه ترويحتي لبنغازي قصه وحده اخري تبيلها بوست واحد اخر ) واول حاجه درتها اول منزلت في بنغازي
عديت سحبت 6 الاف جنيه من المصرف ورديت الفلوس الي تبيهن مني البنت ( دزيتهن لها مع واحد ماشي مالطا )
وقعدت حاط الباقي قدامي انبحت فيهن من غير اي سبب
وكاني انقوللهن وينكن وقت الذل امس واول امس

سوري طولت عليكم وانشالله تنكدتو معايا شويه وغيرتلكم مودكم
وانشالله عنممركم متنذلو ولا اتشوفوا يوم اسود جوا بلادكم ولا برا
ونصيحه مني لما تقعد مسافر وامك اترن عليك فايبر متردش عليها احسن

#غريب_في_بلاد_غريبه
#سافر_واحكي

 

[Yasmine Abdo]

الحقيقه طويله هلبه ^_^

 

[Emma EJ]

مغامرات رح تقعد ذكرى تندكر وما تنعاد

 

[Nonna Mokasabi]

كله من امك، يعطيها الخير

 

[Aisha Alathram]

مغامراتك انت مش عادية
حتى لو نكد و لما قريت توترت بس فيها جو

 

[Waled Alkraz]

نلقانه ربي يعطيك الصحه تحملت 11 يوم من الذل والتعب ودرت كل شي عشان تقعد ماسك روحك لعند ماتحصل فرصة وتروح
قريت القصة مرضت

 

[Monia Bugrain]

هههههه حلوه القصه

 

[Âhęd Ømęř]

صح نكد بس والله فيها جو ☺

 

[Sälmà Âlwåhìşhěy]

تآثرت معاگ الحق بس وجعنی المتشرد ..

 

[Abdalsalam Al Amami]

مغامرتك ف شبه م سندباد ف الشحوره. والتعب. وقصتك ممتعه والله وبالنسبه لكي استفدت منها الكثير.
ونصيحه:ديمه احسبها لقدام دير احتياطاتگ
امنووور ياصديقي

 

[Orayda S. Gaderbouh]

نبي نعرف الباقي انا ....

 

[Nona Elhassi]

عليك مشيه بشهودها السعادة اللي عشتها كلها عدت ، ليبين حظنا عطيب

 

[Bushra Al-eman]

عليك مأساه بعد دهوره في ثلاث دول ، يلا المهم انها فرجت فالنهاية و الحمدلله على سلامتك .

 

[Wo Odi]

كسرت خاطري و الله يعوينك بصبرك

 

[Selwan Elsenussi]

Fatoom S. El-Senussi

 

[Mima Aboshagur]

واوووو عليك موقف ديمة نخاف نسافر ويصيرلي هك نقعد نبكي في الشارع بعدها هههههه المهم روحت وبرضو تنحسب ضمن الذكريات المغامراتيه :-D

 

[Hanan Ja]

هههههه جو من الاخير عجبتنى المغامره

 

[Elghani Weaty]

بصراحة حاسدتك ع مغامراتك لى مستحيل نعيشوهن عشان نحن بنات

 

[Sherihan Mukhtar Ben]

انا تأثرت من غير مانعيش اللحظه معاك الحمدلله مرت علي خير
بس نستنى في الجزء ابتاع بنغازي

 

[Fatoom BK]

مابعدك والله
كان حجزت او تاكسي وروحت ليبيا بالبر كان لقيت من يساعدك او ماتخش الحدود الليبيه
تندكر وماتنعاد