في شريط حياتي، مرو عليا ناس عاشو فترة طويلة...

[Swiss Ice]

في شريط حياتي، مرو عليا ناس عاشو فترة طويلة خارج البلاد والدجميل أنهم عاشو في بلدان مرموقة وليها وزنها على الخريطة الجغرافية
#ولكن وللأسف لما رجعو لأرض الوطن ولا تغيير صار فيهم ولا إنفتاح فكري صارلهم ! حتى نظرتهم لبعض الأمور الإجتماعية كلها نسخ لصق بلعكس رجعو بعقل مغلق وغير قابل للتطوير ومسكر تسكير بالمسامير صراحة

لهزا الناس يلي مرو عليا خيبو آمالي في تصديق الكلام الموجود في الصورة بشكل عام ^^

وجهة نظركم على الموضوع ؟

 

[Mansour Alawame]

انا بعد رديت من اكسفورد معش قعدت نحكي مع ناس واجد وعلى قد ما نقدر نبتعد من الاختلاط بناس

 

[Ñour Śalh]

لست معك عزيزتي في هزة النقطة
ربما القليل ، ولكن الاغليبة يصيرلهم تطور فكري هذا اذا كان عقله في الاساس قابل لهاذا الشي
اما اذا كان مثل ماتحكي ف بلاهى السفرية

 

[Alfayha'a Mif Alwerfal'e]

☑ ☑ ☑

 

[Soha Al Hashmi]

أهو انقولك السبب ... في ناس لما أتسافر لغرض شغل أو دراسه يكون غرضهم التطور العلمي و الفكري و تلقيهم مقررين يجربو حاجات جديدة و يكونو علاقات جديدة و هاذو نسبه بسيطه من الليبين عحسب ما انشوف فيهم و هاذو اللي حتى لما يروحو حينتجو و نظرتهم للدنيا حتختلف.... و أنجو للمجموعه الثانية اللي جايين و ناقمين على الأجانب علي قولتهم "الكفار" تلقيهم متقوقعين مأجرين حياش في اخر الدنيا ما يخالطوش إلا في الجالية الليبية و كان جايين خدمه تلقيهم يخدمو و يدسو باش يفشكو لما يروحو و كان عندهم نساوين دافنينهم و حارمينهم حتى من التدهوير ... و كان طلبه تلقيهم يسهرو كا ويكند و مدايرين العار و لما يشوفك ليبية مش متحجبة ما يخلي ما يقول عليك .... و للأسف المجموعه الثانية السائدة عحسب ما شفت

 

[Isra Elbarghathi]

انا الي لاحظتها من أقرب الناس ليا ،معش يقدرو يتأقلمو في ليبيا نهائي فا يدوب يجو زيارات بس

 

[Maha N Makhlouf]

على حسب التربيه ونسبة الوعي .. كلامك صح نعرف ناس واجد هكي للاسف

 

[Tamy Derna]

في ناس منفتحه وتفكيرها يحترم سواء برا البلاد او جوا البلاد وفي ناس تلقهم في البلاد راسه مسكر وع قولتك نسخ لصق وبرا البلاد مخربها بلكل مالانفتاح..يعني المقصود من كلامي الناس تختلف في تفكيرها مش كلهم زي بعضهم

 

[Alaa Aimable]

حتى اللي يتغير معش يرد لليبيا
يعني بالمختصر مايردش لليبيا الا اللي ما تغيرش وقاعد كيف ماهو

 

[جوجو ے']

انسافر ونجرب قبل

 

[Sara Albasir]

صاح في اللي مش متقبل يبقى شخص منفتح مع ان عايش بره
وفي اللي تلقاه عايش هنا ومنفتح وفكره متطور
مفروض يبدلوا
بس التطور الفكري لازم منه التخلف والرجعية اللي مازلوا عايشينها بعض الليبين غلط

 

[Mima Aboshagur]

لأنهم بكل بساطة ماعاشوش حياة الأوروبيين او الأمريكيين عاشو عادات وتقاليد الليبيين و قعدو مع بعضهم في نفس التجمعات وفي جامعاتهم برضو ماخالطوش الحياة الأجتماعية غادي مافهموش كيف الناس عايشه فايروحو بنفس التفكير و مغلق بزيادة

 

[Šârâh Äłdrögé]

ب العكس في ناس تسافر عشان القرايه
وفي اللي يقرا ويتعرف ع ثقافات وفي اللي يقرا ويسكر ع روحه ما يتعرفش ع ثقافات تانيه
وفي اللي يمشي سياحه حتى هما في ناس تتعرف ع ثقافات
وفي ناس لا
وفي نفسهم ناس تمشي العلاج
كلهم ليهم منظور معين
ان في ناس شافت ثقافة مجتمع اللي عداله ويقارن فيه ب المجتمع اللي جاي منه
في اللي يشوف الفرق ويشوف الانفتاح اللي عندهم ويتقبله
ولكن في اللي ما يتقبلاش ويرجع ب الثقافة اللي جاي منها بس ع تعصب
بس في دول لما الشخص يسافرلهن يروح منفتح واجد وعادي
زي حد يمشي ل كوريا و يمشي ل سويسرا وهولندا
عكس باقي الدول لان ثقافة ثلاث دول اللي ذكرتهن هنا فيهن نوعا ما م الثقافة اللي يتقبلها ويتعلمها المسافر منهن
وجهة نظري

 

[Rasha Yusuf]

موضوع دجميل .. فعلا في نوعية من الناس هكي ولا كإنهم طلعو برا او شافو شي جديد معندهمش استعداد ان يفتحو حتى روشن صغير على ثقافة مختلفة .. وتفكيرهم احرف من شخص مكملش تعليمه .

 

[Carol SA]

Libyans are Libyan any where on earth !!
They will not change
That's a fact
#WithAllRespect

 

[Aya ALhebri]

يعني انا وجهة نظري التربية وثقافة المجتمع تأثر واجد بالذات مجتمع زي مجتمعنا المنغلق
ملاش علاقة لانه ممكن الواحد يعيش في مكان مثلا حاجة مايرميهش في الارض هو يشوف في أهله وكيف تربى يمشي بلاده ، النتيجة انه يرميها في الارض بمعنى اخر البيئة اللي حوليه تأثر
تاني حاجة الواحد ممكن لما يشوف اكثر يقابل ناس اكثر مش من بلاده فعلا يزيد من انفتاحه في التفكير مايقعدش منغلق وهذا رأيي والنهاية الناس يختلفو

 

[Nami Cloud]

المنفتح منفتح من يومه و حاجة ثانيه انسان لو عدا عاش برا وهو كبير يعني فوق 11 سنه مستحيل حتقعد عقليته منفتحه الا لو تربا برا وحل عيونه برا

 

[Meemo Meemo]

بالعكس والله انا بابا سافر واجد وعاش برا واجد وخدا اطباع كويسة منهم يمكن يعتمد على الشخص في حد ذاته

 

[Mahabba Eldarnawi]

هذو النوعية من الناس امتا يكونوا برا يعجبوك هلبا، تلقاهم منفتحين و متحضرين، و لمّا يرجعوا لليبيا راسهم يرجع يتسكر و يصيرلهم انغلاق فِكري.
للأسف يتأثروا بالمحيط اللي عايشين فيه ليس إلا