يومكم طيب من غير إعتصامات ✋...

[Swiss Ice]

يومكم طيب من غير إعتصامات

#الرحلات_المدرسية
أعتقد وبشدة أنها من مشتقات السفر، ولكن للأسف مافي تركيز عليها من جانب نظامنا التعليمي الأمر الزي أدى إلى إرتفاع مستوى الرتابة داخل المؤسسات التعليمية، ناهيك عن الجهل التام بما تزخر به بلادنا من خيرات ولو كانت على عدد أصابع اليد.

بالنسبة ليا رحلات مدرستي كلهن كانو في #غابة_النصر_الدجافة كلها كلها أشجار دجافة وتراب ومساحات واسعة تتمشو فيها والا تلعبو فيها + لازم يكون اليوم مشمس عشان تضربك الشمس فوق راسك + لازم يكون السواق شيباني ميحبش المزيكا + فقط لا غير.

ممكن الشيء الوحيد الحلو في الموضوع أنك تفرغ طاقات في الجري(السباق) في الكورة، أو يزيد طولك وأنت تلعب في كورة الطائرة ❤ أو تطلع من جو الطالب المثالي المهزب ويلقوك فوق الشجرة أو أنك تشوف أبلتك النازكة على حقيقتها وهي اطيب في المكرونة بفستان الرحلات وما إلى زلك ...

أحكولنا عن رحلاتكم المدرسية ووين كانت وشن ضافت عليكم آنزاك ؟

 

[Maloka El]

رحلاتي المدرسية كلهن فلبوسكو

 

[Mohammed Mansour]

عصيان *

 

[Heba Kord]

نمشي نصلي الظهر ونجي نحكيلك

 

[Bushii Alabeedi]

رحلاتي المدرسيه كلهن فالبوسكو وفالثانوي شالونا ل قبر جيرة وشعفتني ابله النشاط وكرهتني فالرحلات

 

[Ajaweed Fathi]

ديما لغابة جدايم و صبراته
و طريق كلها غناء و نطيبوا مبكبكه و يدرولنا جو العاب حبل و هكي و كوره
و في الباص :
ياسواق اجري ع الميه ماتخافش ع البتاريه
سوقنا ماقنينته رب يخليله اميمته
ذكريات حلوه ❤

 

[Fatma Elbarghathi]

رحلات مدرستي الابتدائية كانن ل شحات .اوجلة .جالو و هكي مدن قريبة من بنغازي بس انا محضرتش إلا رحلة شحات
كانت مش عادية بكل ❤

 

[Sara Albasir]

خطرتي عليا رحلة الخنساء درنها ايام الزهى للبوتزيرة
عليك جو يوم هذكي مازال بين عيوني وغنالنا المغني الترهوني ولا الهوني نسيت من
مهم انظني كانت اللحظه الوحيدة اللي في حياتي حضرت فيها حفلة لايف
الله يمسيها بالخير مديرتنا ابله جميلة بن عامر

 

[Abeer Ruhaet]

هو ما فيش غيره و يحلفو براسه " البوسكو"

 

[نسمة الصباح]

انا اكثر وحده مشيت رحلات مدرسيه هههه
مره مشينا لمصنع الشكولاته
ومرات لمنتزه بنغازي البوسكو
و مشينا لمنتزه بودزيره
من أحلي ذكريات

 

[Hajar Alferjani]

المنتزة اي كي اي البوسكو ^^

 

[Amany Al Selini]

كلهم لمسرح الطفل ولا البوسكو ولا احاجاات هك

 

[Łûjãîń Ãm]

بوسكو بس ، ناخذ فيه يوم عطله

 

[Amira Gashout]

الرحلات المدرسية وين ما كانت حلوه ببساطة لان معاك صاحباتك ... مشيت اكتر من رحله واني في الابتدائي لكن ما نتفكرش فيهم هلبا ورحلة وحده في الاعدادي مشينا لي أثار صبراته و جدايم احلى ايام كانت

 

[Senda Ab Kredan]

بداية شهر 12 بيديرو رحلة في مدرستي اللي قريت فيها الإبتدائي والاعدادي ، اعتقد في المدارس كلها بيديروها هي
بيرفعوهم لجامعة طرابلس حسيتها فكرة حلوه عجبتني هلبا خير من متاعاتنا قبل

 

[Halema Bouhdema]

رحلاتنا كانن في البوسكو أو بودزيرة
ومرات يشيلو فينا لمصنع الشوكولاتة وفيه مصنع آخر نسيته
ذكريني مجهولة الهوية

 

[Alaa Aimable]

معمريش ماشيه رحله مدرسيه ، او بالاحرى اصلاً مدرستنا كانت مش داعمه لفكرة الرحلات والجو اللي هكي للاسف

 

[فاطمة الفاخرى]

يا سواق إجرى ع المية وماتخافش ع البتارية
وزردة فى الباكور لحم حولى وخبزة تنور
هذين رحلات الطفولة

 

[Wahab Elmansury]

الله الله هذي صوره من احدى الرحلات المدرسيه ههههههههه

 

[Radia Ali]

أحلى ذكريات الطفولة رحلاتي المدرسية: غابة، مصيف، ملاهي، ميناء، إلخ. ووحدة من الرحلات ركبونا سفينة كانت أول تجربة لي.