بمناسبه السنه الجديده خليني نحكيلكم قصه صارت...

[Ali Fakree Eldin ElSallabi]

بمناسبه السنه الجديده
خليني نحكيلكم قصه صارت معايا من 3 سنين وانا في مالطا ليله راس السنه
الي فاضي وعنده راس يقرا والي مصدع وميبيش يقرا ايدير لايك مجامله وخلاص
الساعه 8 في الليل كنت مقمعز مع جروب اصحابي ( 2 ليبين وبنتين مالطيات وواحد هولندي ووحده المانيه ) كلهم تعرفت عليهم غادي لاني كنت مسافر بروحي السنه هذكي وكنا كلنا انخططو شن حنديرو ووين حنحتفلو بالسنه الجديده
قالولي حنعدو لمكان في valetta( عاصمه مالطا )ايعدوله جميع المالطين والاجانب في هذكي اليوم
والمكان عباره عن نافوره قديمه يلاها محطه حافلات وجنبها شارع طويل وواسع ايزينو فيه كله وفيه 3 مسارح ايديرو عليهم في حفلات شعبيه مغنيين وفرق بوب وهكي وفي نهايه الشارع ساحه كبيره ومسرح كبير يلتمو فيه الناس كلهم عشان يحضرو حفله مغني معين وفي السنه هذكي كانت جايه مغنيه اسمها carly rae jepsen

المهم وافقت
وبعدها لمينا بعضنا ع الساعه 11 عشان انعدو بدري ونحجزو مكان
بحتت في تليفوني لقيته 5 في الميا
وانا بنصور اكيد
فقلتلهم تو انعدي للهوتيل نشحنه وانجيكم غادي في الحفله
طبعا هما رقالهم وايهزبو فيا ومعقبو كلمه مقالوها ليا بس المهم اني عديت للهوتيل شحنت تليفوني وع الساعه 11 وتلت طلعت من الهوتيل
طلعت بسرعه وشحنت 30 في الميا بس
(كان عندي شحن مقلد بطئ بكل يالله يشحن )
و قعدت قريب ربع ساعه اندور في تاكسي
عشان التاكسيات ايغلو في اسعارهم ويختفو ليله راس السنه وخصوصا للناس الي ماشيين فاليتتا.. التاكسي الي انوقفه ييقولي منيش ماشي لفاليتا عشان زحمه
ييا اما ايقولي سعر خيالي وايصيع مع انهم بالعداد مفروض
المهم
وصلت غادي والتحمت بالجماهير العريضه
وكانت زحمه مش عاديه وجو سمح بكل
وانا انرن علي اصحابي ومن كثره الناس والزحمه التليفون مبش ايعلق
مره
مرتين
عشره
محصلتهمش بكل
والساعه 12 قربت وانا حاصل في النص بين الناس ومش عارف اصحابي وين
وبيني وبينكم
جروبات الناس السعداء جدا اصابتني بكاابه
انا مش مهيج زيهم وراقيلي
جت الساعه 12 وانا مزلت انكلم
5 4 3 2 1
والعاب ناريه والناس كلهم يحضنو في بعضهم وهاببي نيو يير وانا ماد وجهي وراقيلي وانبحت ايمين وايسار اندور في قروب اصحابي
المهم يأست من اني نلقاهم
عديت خذيت مكان بعيد فيه دروج وخذيت معايا عصير ووجبه اكل مكسيكي وقمعزت بروحي والناس ايمرو عليا ومزالو في قمه السعاده
قعدت في المكان نص ساعه وانا في قمه الكاابه ودره الكبد والي زادها بزياده ان تليفوني طفا
كابه وقاعد بروحي متنح
وفجاة نحس بضربه علي راسي جايتني من لاوره
تلفتت لقيت واحد صاحبي واجد ليبي نعرف انه عايش في مالطا بس ليا واجد مشفتش ومكلمتش لما وصلت
المهم بعد السلامات و و و
قاللي كنك قاعد بروحك
وانا مع التزليط وجو منبيش انبين روحي وحداني قتله : تعبت من النط والاحتفال جيت انتريح شويه
#كذاب_اوي
المهم قالي تعال قمعز معانا قاعد غادي انا واصحابي
عديت للمكان الي مقمعزين فيه لقيت حياه مليئه بالالوان والفرح وقروب سعيد بكل مقمعزين ايبصرو وايهدرزو شباب وبنات ويضحكو والابتسامه ماليه وجوهم ومفيهمش ولا واحد ليبي غير صاحبي
قمعزت معاهم ساعتين وانسيت اصحابي والي جاب اهل اصحابي واستمتعت وغيرولي جو الكابه 200 في الميا وقلت لصاحبي ياريتني طلعت معاك من البدايه والله فيكم جو

المهم كانت ليله اكثر من رائعه وروحت قريب ال 6 الصبح وصارلي موقف واحد اخر في الصبح نحكيه لكم في قصه اخري

خطرها
تلاقيت مع اصحابي الي مفروض نمشي معاهم قالولي محصلوش تاكسيين عشان ايقسمو عليهم ارواحهم ايوصلنهم وقضو راس السنه في حوش الهولندي وقعدو ايرنو عليا واجد محصلونيش

المهم كل سنه وانتو طيبين كلكم وربي ميحرمني من منكم وع الخير انشالله معرفتنا علي قروبنا وانشالله من احسن لأحسن ...

 

[Jeje Farkash]

صحه عصير وكل عام وانت بخير

 

[Badriya Alhdad]

قبل ثلاث سنين كنت في اولى ثانوي وليلة راس السنة ثاني كان عندي امتحان على عموم الناس اللي فوقنا رايحين تقول لابسين بلك بدال سباط #حشاكم على عموم قريب طاحو علينا من كثرة الرقص مقدرتش نرقد اما الامتحان حادي بادي ورياضات اخرى كل عام وانت بخير

 

[Khaled A H Mohmed]

فندق كراون بلازا

 

[Fatma Alhaj]

ذكريات حلوه سنة سعيدة ع الجميع

 

[Doly K Mohammed]

ههههههههههههههه صار منك أنت بس فالمشيه يعني
سنة سعيدة إن شاء الله

 

[Moony Almsalati]

كل سنه وانت طيب يارب السنه الجايه نحضرها برا ليبيا ونكتبها في القروب

 

[Bushraa Elbarasi]

هههههههههه كل عام وانت بخير

 

[Sherihan Benghuzi]

المهم انت اللي كسبتها في الاخير

 

[Hayo Elmalti]

ماحسدتك الا في الوجبه الميخكو

 

[Nona Elhasse]

ههههههه سنه سعييده عليك

 

[Booji EL-Bakoush]

كثر والله خير شحن التلفونكان هضا راهو مديت وجهك في حوش الهولندي

 

[Nony Ali]

هههههههه وانا نقرى في القصه بنقولك موقف لا تحسد عليهبس بعدها حسدتك بصراحه حسيت الدنيا ضحكتلك
وانت بالف خيير ان شاءالله

 

[Dagh Amy]

هههههه سنه حلوه عليك جاني فضول نعرف موقف

 

[Ňájãţ Âbüžåkûk]

احسن شيء باهي اللي ماقعدت معاهم اشكر شحنك كل عام وانت بخير ان شاء الله

 

[Donia Hussein]

كل سنه و انت طيب يا رب

 

[ShosHo ED]

كل سنة وانت طيب شكلك مؤدب في الصورة ربي يسهلك امرك وسنة سعيدة ان شاء الله

 

[Zeze Myth]

جت من حظك

 

[Ahmed Gzeri]

انا كان مكانك راه تيلفوني علق ومشيت معاهم لحوش الهولندي وطفي علي حوشهم الضئ

 

[Nisrine Abdulsalam]

كل سنة وانت طيب