سؤال قاعد نتسائل فيه ديما ؟؟ علاش كل الليبيين...

[Mohaned Krema]

سؤال قاعد نتسائل فيه ديما ؟؟

علاش كل الليبيين لما يطلعوا البرا ويستقروا يقعدو يدوروا في الليبيين باش يصاحبوهم وعرب يرافقوهم ؟؟

يعني اغلبهم بالرغم من انهم يعيشوا وسط الاجانب ماعندهمش ولاصديق منهم ، وهذا لاحظته في الغالبية العظمى الي مهاجرة مهما كان مستواها الثقافي ...

 

[Mustafa Jalal Fteita]

ما لان العربي حيفهمه اكثر من الاجنبي وانا من رأيي الشخصي نعرف نتعامل مع الاجنبي اكثر

 

[Eslam M Iswery]

نفس اللغة والتقاليد والدين

 

[Fatma Alhaj]

لان مفيش توافق مع الاجانب اولا من ناحية اللغه وانسجام وهكي لازم من عرب وخصوصا ليبين اقل شي حذاك جار بس ما تكثرش سريب مع اللييبين في الغربه عن تجربه

 

[Mohaned Krema]

يعني المفروض كتجربة بالعيش بالخارج نطلع من الايطار ونستفيد من الاجانب

 

[Mohaned Krema]

تبادل ثقافات

 

[Fairouz Shamekh]

يتونس بيه اكيد.ولان نفس التفكير والعادات ومل شي

لا قدر الله الواحد يمرض يصيرله اي شي..لما يقعد مصاحب ليبين خاصة حيصبو معاه مش،حيسيبوه

 

[Fatma Elfakhry]

ممكن الأصدقاء الأجانب تتوافق معاهم ،بس برضوا تحتاج لليبي تخفيف للغربة ولأنك مش حتنسجم إلا معاه هوا الي يفهم طبيعتك أكثر وأساليبك ، والمهم يحس بهمك

 

[Marwa Bent Elforjani]

هو الناس تختلف توا أنا لا ومنحبش نختلط مع عرب او ليبيين يعني مانحب نحتك بيهم هلبا برا لأني مقتنعة ان ايخربوا علي بعض يعني مثلا نكون ماشية انا وخوي وعندنا مثلا قراية وتصدف يعرف ليبي غادي يقعد 24ساعة جاي و24ساعة امقعمز عندك او يطلع بيك او او او الخ واني هلبا اتضررت احيانا حتى نبي نقضي وقتي مع عيلتي او نطلع معاهم بس نلقى روحي متعرفة علي ليبية نلقى كل مشاويري معاها .
بس فيه ناس عكس وفيه ناس لما تتغرب اتحن وتبدا اتحب اترافق اللي منها وفيها وعندهم مبدأ ان اللي تعرفه ومن بلادك او عربي خير من أجنبي وماتعرفاش ،،،، وهو أحيانا حقيقة الشي هدا وحتى انا تصدفني مواقف نكون برا وانحن بالدات لليبيين ومشعارفة ليش انحس اتجاههم بالانتماء فجأة بس الخلطة الهلبا هلبا مش باهي .

 

[Fatma Elbarghathi]

ممكن عشان اترايف تحكي بلهجتك أو ممكن عشان تتونس بيهم!
أنا كنت نفرح بعد نسمع حد فالشارع يحكي بالليبي، بس كنت حريصة اني نتفادى العرب و نكوّن صداقات مع الأجانب عشان تتحسن لغتي

 

[Doni Alabbar]

هههههههه يبو حد ايقرمو معاه لان الاجانب مش امتاعين كلام فاضي كل حد ف حاله ف الاغلب O

 

[Sara Elbeera]

اول ماقريت كلامك خطر عليا مثل وسامحني عليه والي هو الحمار الي تعرفه خير من الحصان الي تجهله

 

[Hend Fathi]

انا لا ليبيين لا اجانب لا عرب عايشه بروحي

 

[Hend Fathi]

بس الغالب عشان العادات والطبيعه مش نفس السلوك الاجتماعي نحس فيه. وحتي الاجنبيات نصاحبهن يقوللي نطلعوا ساعه 12 تطلعي معاناياكلا وانا طالعه 12 عليش انتعب فروحي ونشرحلهن عليش انا نصرف هكي ومانصرفش هكي

 

[Lotfia Hakiem]

ممكن عشان نفس الدين والثقافه تكون قريبه من بعضها

 

[Nouha Idris]

هو تمشي من مدينه لمدينه وادور اللي من نفس مدينتك يابال بلا تانيه يعني نا فرضا عايشه ف طرابلس وندور ف عرب بنغازي ونفرح لما نلقاهم ونصاحبهم

 

[Naseem Saad]

تي انا كان نطلع برا نصفي اي واحد عربي

 

[Elham Haman]

أنا قريب نصكر سنتين في ألمانيا وماندورش في الليبيين ولا انجي جهتهم، الا أصحاب العيلة، غير هكي لا..ونسكن بعيد عالعرب وشارع العرب منعرفاش وين ايجي..قناعتي مانخالطش عرب وليبيين، بل أجانب حتى لغة تتحسن وحتى تتغير ماتقعدش محصور بعقلية وحدة وتعرف الناس من مختلف الجنسيات كيف تعيش وتفكر..الحمدلله
برضو نلاحظ في هلبا يدورو في ليبيين وعرب، وحتى يسألو فيا ماتعرفتيش علي ليبيين مافيش جهتك ليبيين!!

 

[Eman Khalifa]

بالنسبه لتجربتي الشخصيه أول سنه كنت نتهرب من الليبيين والعرب وخايفه منهم تقول بياكلوني وكانت علاقتي مقتصره على صحباتي لي نعرفهن من ليبيا غيرها لا ... و شويه مع الناس لي يقروا معايا لغه وكلهم اجانب بس حتى هما نطلع معهم مره في شهر مش واجد ..ثاني سنه لما لغتي تحسنت قعدت اكتر علاقاتي مع الالمان لكن ماكان فيهم حد في عمري كلهم اكبر مني شيابين وعجايز بس جوي مشاء معهم وقعدنا نسافروا مع بعضنا ونتلاقوا على طول وصاموا معايا في رمضانوالحق كانت تجربه حلوووه وفتحتلي عيوني على أشياء ماكنت ننتبهلها وحسيت لغتي وثقافتي بصفه عامه تحسنت وبدا عندي تقبل او الاصح احترام مطلق للعقليات المختلفه اما السنه الثالثه حسيت بحاجتي لليبيات ولما صار شُح في الليبيات رميت ع العربيات ونحس جونا حلو وحسيت شخصيتي قعدت أقوى وقادره نوضح لليبيين والأجانب و غيرهم وين الحدود لي لازم يوقفوا عندها وأنهم يحترموا وقتي ومسؤولياتي وانا من واجبي نحترم مسؤولياتهم و نساعدوا بعضنا وقت الحاجه كل حد بما يقدر ونفس الشي نتلاقوا في وقت نكونوا فاضيين ونغيروا جو ونسيبوا ذكرى حلوى بيناتنا وبجد في لحظات تحتاج ناس يحكوا نفس لغتك وطالعين من نفس مجتمعك ويفهموك من نظرتك ومن نبرة صوتك وجودك في مجتمع مختلف ومتنوع شي حلوو لكن مايعوضك عن مجتمعك لي تحمله في داخلك

 

[Orayda S. Gaderbouh]

مش الكل هكي ... أصحابي و صحباتي كلهم ألمان و من جنسيات اخرى خاطي العربية