السلام عليكم و رحمة الله و بركاته انا مصاب ب...

[Mohammed Almuwayshi]

السلام عليكم و رحمة الله و بركاته

انا مصاب ب sciatica و صار لها فتره موب قصيره معاي.

مفكر أوقف ترم أو اثنين و ارجع السعوديه اسوي لي عمليه هناك و بعدها ارتاح جنب الاهل
او
اسويها هنا لأن المستشفيات افضل و ع التامين

بس ما ادري كيف مع الجامعه و الملحقيه و التامين بذي الامور

نصائحكم و خبراتكم؟ ؟

مشكورين مقدما

 

[علي الغامدي]

اسال الله ان يشفيك ويعافيك ويجمع لك بالاجر والعافيه
اذا تقدر تصبر الى الصيف بحيث انك ماتدخل في اشكاليه مع الامقريشن والملحقيه فسويها فالصيف
اذا مستعجله وخارجه عن الاراده تقدر تاخذ اذن من الجامعه
حط في علمك ان الملحقيه بتوقف عنك الصرف لو سويتها في امريكا والتأمين الصحي بيتم معك فتره مؤقته فاذا فترة العلاج طويله افضل ارجع السعوديه اذا فالصيف تقدر تسوي العمليه وتخلص فترة النقاهه فسويها فالصيف

 

[Reem Alderbi]

القرار يرجع لنوع العملية و اثارها و كم مدة الريكفري و هل حتحتاج احد معاك طول الفترة ؟

من ناحية العملية:
هل العملية صعبة؟ اذا ايوه انصحك تعملها عند اهلك ( راحة/ خدمة / عناية/ اهتمام)..

اذا عملتها هنا لازم تتاكد جيد من وضعك و استعدادك .. و في احد معاك او من اهلك لو يقدر يجيك

من ناحية الدراسة :
اذا مدة الريكفري قليلة ممكن تعملها في الصيف و بكذا التامين و الصرف ساري ، اذا طويلة المدة فكذا حتحتاج تأجل و تعملها ف السعودية و ممكن تستغل فترة سمستر السبرينق مع اجازة الصيف ..

أفضل شي تستشير دكتورك و تتناقش معاه في كل التفاصيل ماقبل العملية و وقتها و بعدها .. و استخير و قرر.

الله يشفيك و يرفع عنك و عن جميع مرضانا و مرضى المسلمين .

 

[Abdulrahman Al-Shablan]

انصح هنا و اختار افضل مستشفى و طبيب، واذا الموضوع يستدعي رعايه بعد العمليه نسق مع احد مم اهلك يجي معك.. بالتوفيق اخي وانشاءالله ما تشوف شر ..

 

[HA Ali Jamal]

انا عندي سياتكا كمان وأربع فقرات انزلاق بدرجات متفاوتة وعظمة زائدة بالحوض ومع كذا فكرة العملية شايلتها من راسي ما أخفيك فكرت في فترة فيها خصوصا أنه صار معاية تنمل وشلل بالاعصاب الطرفية لكن مع الإنتباه وقلة التوتر والرياضة والسباحة الحمدلله كله تمام. راجعت في السعودية الكل كان يقول لي يلا نسوي لك عملية وبرا بيقولي ما اسوي لك عملية إلا إذا صرتي ما تتحكمي في عملية الإخراج. مع أن الألم لا يحتمل ولا يطاق ومعروف أن ألم عرق النسا ينسي ما سواه. والله ما كنت أقدر أمارس حياتي الطبيعيه لكن صرت انتبه لحركات جسمي الخطأ والقعدة بالذات . مارس السباحه والرياضة ابدا بالبسيط لحد ما تشد عضلاتك تمام . حاول تقلل حتى توقف تماما مسكنات الألم عشان تقدر تتعامل مع مقدار ألم معين . يوميا ولعدد مرات متكرر لازم تستخدم زيت حار مكان الألم . العلاج الطبيعي كمان . عارفة انك ممكن تكون جربت ذا كله . لكن صدقني شيل فكرة العملية من رأسك أفضل لك مستقبلا. وأهم حاجه اذا كنت مبتعث بمنطقة باردة يا تغيرها يا تحاول تأجل السمستر ايام الشتاء.

 

[Tawfeeq Altherwi]

انا طبيب طوارئ
عادة لا ينصح بالعملية اذا ما في ضعف في اي من الأطراف او عدم تحكم بالبول

ارى انك تراجع طبيب لين توصل الى فكرة ان العملية منصوح بها ام لا

و بعدها قرر فين تسويها

الف سلامة

 

[Meshary Al-Ghannam]

في البدايه شفاك الله وعافاك وكتبلك الاجر
اما النصيحة فهي اداكانت العملية صعبه ويبيلها عنايه وتمريض بعدالعمليه فارجع السعوديه اما ادا كنت تقدر تقعد وتسوي العمليه وتتتبه على نفسك وعندك شباب شقرديه فانكل على الله وسؤ العمليه وإذا عندك اخو يقدر يجي عندك أسبوع اوشي زي كذافتوكل