مسآء الخير طبعآ السفر مش كله جو سمح و حيآة...

[Räniă Õrfałi]

مسآء الخير

طبعآ السفر مش كله جو سمح و حيآة لونهآ بآمبي .. أكيد فيه نآس تعرضو لحوآدث سرقة وهمآ مسآفرين .. اللي عنده موقف يحكيه خلي نستفيدو ونتعلمو ..

بالنسبة ليآ انسرق نقآلي ف اسطنبول ف وسط الشآرع .. كنآ مصبيين ع إشآرة المشآة والنآس متجمعين وكآنت زحمة بكل .. لمآ ولعت خضرآ وتحركنآ حسيت بحركة بسيطة عالشنطة ( يده خفيفة تبآرك الرحمن ) ولمآ حطيت يدي ف الجيب وإذ بالفون مش قآعد .. طبعآ لآ دآعي للسرد الدرآمي قعدت نبكي ونخبط ف وسط الشآرع .. ومستحيل ينعرف من الدعآك .. روحت نجر ف أذيآل الخيبة للفندق وبس هكي

 

[Heba Fadiel]

في اسطنبول انسرق مني دبش جديد بشكايره مازلت مالبسته ومن خفة اليد ماتذكرتش وين انسرق مني بالضبط
ومره كويش خويا انسرق في الجامع

 

[ʚĩɞ Rooibra]

مره في السعودية

و اول يوم وصلني فيه و ماشين كلنا مع بَعضُنَا فجأة
راحت بنت خالتي هههههه و قعدنا ندورو فيها و نبكو و حالتنا حاله بعد ممكن ثلاث ساعات تلاقينا بيها

هي سببها سرحانه و طريق زحمه بكل تمشي ورانا فقدتنا و فقدناها

 

[Aimen S K Fayad]

عجبتني يدة خفيفة تبارك الرحمن
ياخذ سوك ويعوضك خير اصلا هذا عليش السفر مش كويس

 

[Eman Elseleni]

مره في السعودية انسرقت شنطتي وانا انصلي فيها دولارات كلهن وفلوس ليبيات وسعوديات ونقالي

 

[Fadwa El-Feituri]

يانا عليا توا يبن ينوضن عليا المواجع لو نحكي قصتي

في شهر 10 إللي فات كنت في باريس، وصلنا بعد الظهر وكنّا حاجزين في هوتيل بجنب الأوبرا والأجواء الباريسية الجميلة .. درنا تشيك إن وحطينا دبشنا وغيرنا وبعدها طلعنا ..
طبعاً أنا من الفرحة قلت لهلي نبي نبرمها كلها كعابي ونستمتع بالجو والقهاوي والناس والدنيا الدايجة، وفعلاً هذاك اليوم شحورت هلي ورايا أنا ماسكة خريطة الموبايل ونمشي بيهم وهم يلهدوا ورايا مساكين ..

روحنا تقريبا الساعة عشرة ونص وأنا مازلت قمة في الفرحة .. وإذ بالصدمة والفاجعة وقهرت عمري
نخش لداري أنا وأختي نلقاها مقلوبة على بعضها وحاجتي كلها حايسة .. خشيت نجري نلقى الماك بوك حبيبي راح فيها ومسروق بعدها نبرم على شنطتي نلقى بعيد عنك مش معقب عليا حاجة، عطور على كريمات على شنطة Furla جديدة .. حتى محارم سارقهن

طبعا أنهرت وأنقهرت ونزلت هارجت الريسيبشن متاع الهوتيل وجت الشرطة وعلى أساس داروا محضر وقصة بس فص ملح وذاب طبعاً يأخذن سوي وخلاص
كملت السفرة هذكاهي كلها بكاوات

 

[Nosa OB]

كويش زوجي أديدس انسرق من الغرفه في الفندق شكينا في الهاوس كيبنغ و احنا في ماليزيا مشكله احنا سكانا في 3فنادق و معرفنش في اي فندق انسرقنا

 

[Šârâh Äłdrögé]

الحمدلله ما عمريش تعرضت لحاجات زي هذي
والسفريات كان لونهن بامبي

 

[Khaled Edhass]

موقف واحد صارلي. . في المدينة المنورة. . لما راحت شنطة الوالدة. .بكل ملابسها وحاجاتها. . كل شيء فيها جديد. . و لما دورتها من فندق لآخر. . عرفت أن الشخص اللي طاحت عنده .. اختفى. . أسوء ذكرى في رحلاتي. .

 

[Radia Ali]

في المطار انسرق عطر جديد مازال حتى ما خفظنا بنته ههههه.
Fituri

 

[Muaad Mussa]

بدل ما تقولي يده خفيفة الله يعطيه قصة ، تقولي تبارك الرحمن
واضح انك طيبة هذا اعلاش خنبوا منك

 

[Ainour Alfakhry]

في مصر انسرقت مني المحفظة فيها 800 مصري و فلوس ليبيات مش مذكرة كم كانن

 

[Furat Assadeg Eghribil]

طول عمري نسافر لكن في اسطنبول انسرق تليفوني مرة من يدي كنت نبي ندير سيلفي ومرة تانية انسرقت شنطتي فيها تليفوني واوراقي في اسطنبول، كذلك عليك شعورر

 

[Aya Óò]

انا مواقفي كلها ونا صغير ديما انريح من هلي ويلقوني نبكي و مرتين انخطفت
مرة الي نذكرها على الحدود بين مصر و ليبيا كنت راقدة في السيارة و هلي نزلين وقت تفتيش الشناطي المهم فتحت الباب ونزلت لقيت قدامي راجل ومراته صعايدة ولا ماني عارفة قتلهم ماما وين قالولي تعالي انشيلوك لماما قاعدة هناك قتلهم به ☺ اول ما مسكت ايد الولية لفوني في نسولة ولا جلباب مش عارفة وقعدو يبجرو بيا شور حدود مصر مشعارفة انا دخت المهم مانندري على شي الا شفت ضويا شرطة و ماما جايا تجري تبكي و خواتي و خوتي و الشرطة مسكو الراجل و الولية ضربوهم طريحة سودة اترعش وانا جريت لماما قتلها نا اندور فيك و مش حاسة اني كنت مخطوفة

 

[ام طه]

وانا عروس شنطة متاعي في المطار تم تبدلها وشكله الشخص اللي خذاها كان متلخبط لكن لما روح ولقى فيها حاجات قيمة وغالية وتوصل لالاف الدولارات انصفط عليها