السلام عليكم ورحمة الله وبركاته
أسعد الله مسائكم جميعاً
بداية انا اعتذر من إدارة المنتدى إذا كان هذا القسم المناسب للموضوع ام لا
وثانياً . انا أضع بين يديكم تقرير بسيط لمن أراد الذهاب للعلاج لعيادات مايو كلينك ب روشستر
نسأل الله للجميع الشفاء العاجل ..
ثالثاً.. انا صراحة قبل السفر بحثت كثير عن مايخص المدينة والمستشفى
و وجدت بعض المعلومات البسيطة .. لكنها لم تكن كافية
او انها قديمة..
لذلك حبيت اشارككم بعض المعلومات والاقتراحات عسى أن تفيدكم ولو بالشي القليل
طبعاً انا راح أبداء بالتقرير مابعد استخراج الفيز وعند السفر
طبعاً وانت في المطار ( اي مطار سواء الرياض او جدة)
يجب عليك التأكد أولاً ان وزن العفش عندك مايتجاوز 23كجم
وكذلك يجب عليك تغليفه ..
إضافة مهمة : إذا كان المريض لديك كبير بالسن .. اطلب من مكتب الرعاية الخاصة توفير عربة عند وصولك مطار واشنطن . او نيويورك .
بالنسبة للدرجة الافق مسموح لكل راكب حقيبة واحدة .. وإذا كان لديك اكثر يجب دفع الرسوم .
بالنسبة لدرجة الاعمال مسموح لكل راكب حقبتين مجاناً .
مدة الرحلة لواشنطن قرابة 13 ساعة ونصف ..
بعد وصولك واشنطن ومباشرة اول ماتطلع من باب الطائرة وبنهاية السكاي
راح تجد عامل الولشيرت إللى هو يساعدك بدفع الكرسي المتحرك ..
طبعاً راح تمر على مكت المقريشن اولاً وراح يتأكد من الواز وتبصم ويصورك ومن ثم يضع ختم الدخول .
بعض الموظفين عرب ..
بعد كذا تروح تستلم حقائبك وتتوجه لداخل المطار وراح تصادف نقطة تفتيش اخرى
يسالك أسئلة روتيبنه مثل كم معك من المال .. وليش جاي هنا .. وبعضهم ياخذ الجواز ويرجعه لك مباشرة بدون اسئلة ..
النقطة الاهم الان إذا كان لديك ترانزيت وعندك رحلة مواصلة ..
تنزل تحت للقطارات النفقية .. ويجب عليك التأكد أي قطار تركب ..
لانه في a > b > c
وقبل لاتنزل تروح لمكاتب الخطوط وتقص البرودنق وتشحن حقائبك ..
بعد هذا وبعد ماتنزل راح يصادفك تفتيش اخر
هنا راح تنزل كل شي مثل ( الساعة ، الجوال ، الحزام ، الجزمة ، وانتم بكرامة ... الخ ) وتمررها داخل السير
وتمشي تدخل بحجرة صغيرة وترفع يدك مدة 5 ثوان وتخرج .
وتكمل مسيرتك للقطارات ..
بعد ماركبت القطار واتجه فيك للبوابات .. ابحث عن رقم البوابة وانتظر النداء ..
هذا طبعاً كله فيما يخص مطار واشنطن دالاس والاجراءات اللي راح تواجهها ..
طبعاً إللي معه كرسي متحرك التفتيش راح يواجه فوق ومافيه زحمة بعكس التفتيش اللي اسفل .
لانه لهم اولوية ..
اقلعت من مطار واشنطن وتنزل في مطار مينيابلوس
المطار جداً كبير وانتبه تضيع فيه
بعد ماتنزل تتوجه مباشرة للاسفل عشان الحقائب ..
ولاحظ أنك إذا نزلت تحت ما راح تقدر ترجع فوق ..
استلم حقائبك واطلع .. وراح تلاقي طبعاً سيارات الاجرة او مكاتب التأجير ..
مينيابلوس تبعد عن روشستر قرابة 77 ميل مايعادل 123 .. ساعة وربع
طبعاً بحكم السرعة محددة عندهم ماتتجاوز 65 ميل مايعادل 110 كم
بعد ماوصلت المدينة
في عندك اكثر من خيار
الفنادق متوفرة وكذلك السكن المفروشة ..
الفنادق تقريباً تبدا من 47 دولار ليلة واحدة طبعاً غرفة لشخصين
والسكن المفروش لازم اقل شي شهر والسعر يبداً من 2400 دولار للشهر
طبعاً تكون جاهزة كاملة من ناحية المفارش والتي في والانترنت وقنوات عربية وكذلك ادوات المطبخ مع وجود غسالة ملابس وملحقاتها ..
طبعاً قبل كل شي
لابد اولاً أن تستخرج رقمي أمريكي ..
وثانياً تفتح حساب بنكي في أحد البنوك المتوفرة ..
ولاتقلق اغلب الفروع يوجد عندهم مترجم عربي أو موظف عربي ويساعدك .
بالنسبة للمستشفى
اول ماتوصل هناك مباشرة تتوجة لمكتب انترناشينونال الدولي
وتخبرهم بوصولك ..
راح يجي معك مترجم ويعطونك فورمة تعبيها
فيها اشوية اسئلة عن المريض وكلها بسيطة ..
بعد كذا يعطونك اوراق عددها تقريباً 6 أو 7 اوراق فيها معلومات عن المريض والتشخيصات الطلوبة
والاهم المواعيد ..
وراح تلاقي عند كل موعد تفصيل عن الوقت والمبنى والمكتب ..
وكذلك في مكتب الانترناشينونال
تقوم بإرسال اوراقك وصور جوازاتك للسفارة إذا كانت نفقات العلاج على الحكومة ..
والافضل ترسلها عن طريق الايميل لسرعة إرسال المخصصات المالية بحسابك ..
طبعاً ترسل ورقة حسابك البنكي + صورة ختم الدخول مع الفيزا لجميع المرافقين المخصصين معك + تعبئة الاوراق وتجدها عند المكتب ..
كذا تكون خلصت جميع امورك واستمتع بالمدينة ..
وتقيد بأنطمة المرور من ناحية السرعة ماتتجاوز 35 داخل المدينة وربط حزام الامان .. الوقوف قبل الاشارة ..
دائما وابد تقيد بالاشارة عند اي منعطف .
كذلك إعطاء الاولوية للمشاة عند العبور ..
عدم ضغط الهرن باستمرار .
عدم وضع النور على العالي .
هذا مالدي من معلومات .. أتمنى اكون أفدتكم ...
وأي شخص لديه أي استفسار يتفضل ..
كذلك أي شخص راح يجي ع المدينة يتواصل معي وانا راح اساعده ..
انا موجود بالمدينة حتى تاريخ 10 ابريل 2015 قابله للتمديد ...
تحياتي للجميع
