المسافر يمر على مطارات كثيرة .. قوانينها مختلفة عن ما تعود عليها
و الاجراءات مرات تكون معقدة .. و مرات من سهولتها تستغرب
هالموضوع ... اتمنى الكل يطرح مواقف صعبة مر فيها ... و ممكن الكل يستفيد منها
هالمواقف بالذات .. لما نتذكرها بعد فترة .. في الغالب نضحك عليها
اتذكر وحدة من العضوات تأخروا عن الطيارة و ظلوا يركضون بالمطار عشان يلحقون عليها
و كانت تضحك بالتقرير ... لكن انا متأكدة ان الموقف مر عليها بصعوبة شديدة
و هذا مثال للي اقصده
الحين نبدا بموقفي الجميل
كنا راجعين من مطار فرانفكورت في 2012 ... راجعين ديرتنا
زوجي ملتحي ... بس لحيته خفيفة ... لكن في ذاك اليوم لحيته كانت شوي اكثف لان صار له فترة ما حلقها
و انا والحمدلله متحجبة
يعني واضح ان احنا عرب و مسلمين
مرينا في الاجراءات العادية و اتذكر رحنا خلصنا التاكس فري
و اغراضنا اللي عليها تاكس ... كنا مخلينها بشنطة نحملها معانا بالطيارة
وعليها قفل و كان المفتاح مع زوجي
لما دخلنا شنطتنا على الجهاز للتفتيش الثاني
فجأة سكروا المسار اللي احنا فيه و حولوا المسافرين على مسارات ثانية
وشنطتنا للحين داخل الجهاز
الموظفة نادت الموظف اللي جنبها
طلعوا شنطتنا و رجعوا دخلوها
و رجعوا طلعوها و دخلوها اكثر من مرة
و في كل مرة ... يشوفونا بنظرة رعب !!!!
قامت الموظفة لبست قفازات
و راحت نادت موظف ثاني يتهيئ لي انه مسؤولهم
ونفس الشي يدخلون الشنطة و يطلعونها و نظراتهم لنا تخوووف
واكثر من موظف تجمع على الشاشة يطالع الشنطة
بعد شوي جاهم شرطي
و الكل حتى المسافرين صاروا يخزون فينا
على طول جا في بالي ... انهم شاكين فينا عشان مسلمين
و حاولت اتذكر الشنطة وشفيها ... لكن نظراتهم ربكتني و والله ذاكرتي خانتني
وماقدرت اتذكر شي
قلت يمكن خليناها بمكان و احد حط فيها شي
و بعدين تذكرت انها مقفولة
بعدين قلت يمكن لما فتحناها بالتاكس فري
احد حط فيها شي و ما انتبهنا
وظلت التساؤلات براسي
لحد ما التفت علينا الشرطي و المسؤول
سألونا .. الشنطة وشفيها ؟
جاوبهم زوجي باللي تذكره .. و انا اضفت اني كنت شارية اكسسوارات من شوارفسكي
طالعوا في بعض و واضح مو مقتنعين
قالوا الشنطة مقفولة فتحوها
ما ادري ليش وقتها انا اخذت المفتاح من زوجي ... و من زود الارتباك و الخوف
كل ما حاولت ادخل المفتاح بالقفل
يدي ترجف بقوووة و ما يدخل
عصب المسؤول وقال فتحيها بسرعة
حاولت اتمالك اعصابي و فتحتها
تجمعوا علي كلهم .. و أشروا على مكان محدد بزاوية الشنطة
و ساألوني ... شنو داخل بهالمكان
قلت ما ادري ... لان جد ما كنت قادرة اتذكر شي بس في نفس الوقت متأكدة ماعندي شي مخالف
دخلت يدي و انا اسمي و استغفر
كان المس كرتون صغير بحجم اليد و سحبته
و اول ما طلعته كلهم توزعوا من الخوف
من بعيد يسألني المسؤول ... شنو داخل هالكرتون
إبتسمت و قلت له ... بيضة فابريجيه (مو اصليه طبعا ههههههه) بس عشان يفهم بسرعة
هي علبة مجوهرات على شكل بيضة .. اصلها روسي و الاصلية تكون مطعمة بمجوهرات و تكون جدا غالية
مثل هالصورة
قال فتحي الكرتون
فتحته و طلعتها و كانت مغلفة بورق بس شفاف و شافها
فجأة كل الموظفين يضحكون ... خصوصا اول موظفة مسكت بطنها و تضحك
مافيه الا انا و زوجي نطالع في بعض و نقول شفيهم !!!!!!!
الموظفة قالت لي اجي اطل معاها بالشاشة
و فجأة !!!!!!!!!!!!!!!!!!
وضحت الصورة
شكل البيضة في الجهاز كان مثل قنبلة يدوية
الكريستالات على البيضة كانوا كأنهم حواف القنبلة المتعرجة
و رجول البيضة كانت كأنها حلقة الامان للقنبلة
ضحكت بخوف ... و مشونا و ركبنا الطيارة
وليومكم .. لا زلت اضحك على موقف القنبلة .. و البيضة ما استخدمتها كرهتها خلاص
بإنتظار مواقفكم .. الصعبة الطريفة ... في مطارات العالم