أنت تستخدم أحد المتصفحات القديمة. قد لا يتم عرض هذا الموقع أو المواقع الأخرى بشكل صحيح.
يجب عليك ترقية متصفحك أو استخدام
أحد المتصفحات البديلة.
السلام عليكم و رحمة الله و بركاته
من عدة اسابيع و دولتنا تشهد سقوط الامطار في بعض المناطق الشمالية و الشرقيه
و احنا ما غير نشوف في التلفزيون و نتحسف لان الوقت ما يناسبنا نتجه لهذي المناطق
لكن الحمدلله من اسبوعين كنا في اجازة و قلنا نتوكل على الله و نتوجه للوادي و ندور المطر
للأسف خذتني النومة و قمت بسرعة بسرعة سويت الشاي و القهوة و حطيت المكسرات و طلعنا بعد
صلاة الجمعه و هاي الصور من الطريق
و علمنا مرسوم على الجبال
آثار المطر
قعدنا ندور على مطعم و للاسف ما حصلنا غير واحد و مكتوب انه مطعم و مطبخ للاعراس و المناسبات
و عندهم برياني قعود و صالونه و مجبوس و القعود هو الجمل الصغير
و خذنا صحن برياني و صحن مجبوس
و انا خذتلي صمون و جبن و شيبس من الدكان
مدخل الوادي
فرشنا الحصير و قعدنا نتغدى لكن الهوا ذبحنا
طبعا ما كنت مجهزة عدة البر و ناسية لانه من زمان ما طلعنا للبر
مشينا حالنا بالموجود
و انتقلنا نشوف منسوب المطر
و ما شاء المكان مزدحم
بدأ الجو يغيم
و هذا واحد متهور صاعد الجبل بالسياره بس ما قدر يكمل الله يهديهم الشباب
الوادي بعده يعتبر جاف قليلا لانه الامطار خفيفه و في ايام معينه
الصورة فيها ضفدع دوروه
و هذا واحد ثاني لانه الاول ولدي خلاه يطيح في الماي
يتنا رياح قوية مع غبار شردتنا من المكان
انتقلنا لجهة السد و ما شاء الله مطورين المكان و مسوين حدايق خضراء
شوفوا الجبل الحين و شوفوه بعد شوي
غيمت الدنيا
توني انتبه لقوس قزح
شوفوا هذا الجبل
و طاح المطر
هذا السد
زاد المطر و قلنا بنشوف مسيد نصلي فيه العصر و طلعنا من السد و الوادي
كل ما اتجهنا جهة الذيد نشوف الدنيا مغيمة و وصلنا سناب من شارع الفجيرة و خورفكان
و الامطار عندهم غزيره
شفنا منطقة سكنية جديده و فيها مسيد جديد
الحمدلله خلصنا الصلاة و احنا طالعين ما نشوف الا الغبار ما قدرت افتح عيوني
و رجعنا مرة ثانية للوادي
الناس بعدهم في اماكنهم
وقت الرجوع للوادي السيارات وقفت في الشارع من الزحمة و اقول لزوجي هذا كله
من السناب اللي طرشته لانه كل شوي واحد يتصل فيه و يقول انتوا وين و عندكم مطر
خذنا يمكن نص ساعه مع في الروحه يمكن خذنا 10 دقايق
هذا مدخل الوادي و كان واقف شرطي يحرك الناس و يقول اطلعوا الوادي في الطريق ياي صوبكم
و شردنا قبل ما نغرق
رجعنا لمنطقة مليحه و السيوح باتجاه الشارقة
و قلنا بننزل شوي نستمتع في البر و فرشنا الحصير
قبل المغرب بربع ساعة تحركنا عشان نلحق على الصلاة
و مرينا منطقة الخوانيج و خذنا برجر من مطعم اسمه ( على ذوقك )
البرجر عندهم لذيذ و موقهم بتحصلونه في قوقل ماب
خلصت طلعتنا و ان شاء الله المرات القادمة اكون مجهزة العدة كاملة و نعرفكم على اماكن جديدة
في الامارات
دمتم بود
