الرد على الموضوع

الجزء الثالث 

تفاصيل حجوزاتنا 

[ATTACH=full]693709[/ATTACH]

مخططي اللي انقلب بسبب بروشور 

البرشور هو عباره عن كتيب من صفحتين او 3 يعني تكون عدد صفحاته قليله 

ويكون فيه معلومات ودعايه عن شي معين

تخطيط رحلتي 

اول مره خططت رحلتي للنرويج عن طريج الدنمارك

ومدة الرحله بالكروز 7 ليالي 

وتنطلق منكوبنهاجن وفيها كل الاماكن اللي أباها من صوب النرويج 

وحجزت الفندق في كوبنهاجن وباقي بس أحجز الكروز 

وبالصدفه وانا أبحث بين أوراقي طاح في ايدي بروشور خاص 

بالكروز MSC

تخيلوا هذا البرشور محتفظه فيه من كم سنه وناستنه 

وكنت أحلم أسافر ع هاي السفينه بالذات 

لأنه من زمان شفت مسلسل تركي وكان البطل هومهند[ATTACH=full]693710[/ATTACH]

وفي المسلسل مهند زار هاي السفينه ع اساس بيسوي عرسه فيه 

وتجننت يومها ع هاي السفينه وما أتذكر كيف حصلت بروشورهم 

واحتفظت فيه من يومها ونسيته

وشاءت الصدفه قبل لا أحجز الكروز اني أشوف البروشور 

وكان في البرشور عارضين أنواع واحجام السفن اللي عندهم 

وكانت السفينه اللي بنطلع فيها من كوبنهاجن ثالث أصغر وحده من مجموع 11 سفينه واسمها 

MSC Sinfonia 

يوم شفتها صغيره طاحت من عيني وضقت [ATTACH=full]693711[/ATTACH]

تعرفون عاد بنت شربت تبا كل شي من الزين [ATTACH=full]693712[/ATTACH]

سرت أشوف أكبر وحده من اسطولهم ولقيت اسمها 

MSC Splendida

بحثت عنها وبغيت أعرف وين تسير

والصدفه الحلوه طلعت انها تسير صوب النرويج والاماكن اللي اباها بالضبط 

بس مدتها أطول 11 يوم وتطلع من هامبورغ

قلت خلاص هاي اللي اباها [ATTACH=full]693713[/ATTACH]

كلمت بوعيسى وقال

بس المده طويله وأخاف ماترتاحون 

قلتله هاي تجربه ولازم أخوضها وان شاءالله تعجبنا بس أهم شي ابا السفينه العوده [ATTACH=full]693714[/ATTACH]

شفتوا القدر وين خذانا [ATTACH=full]693715[/ATTACH]

هاي صورة البرشور

وشوفوا من أي سنه عندي 

[ATTACH=full]693716[/ATTACH]

هاذيل هم ال 11 سفينه 

[ATTACH=full]693717[/ATTACH]

بجزأ الصوره وبقربها أكثر 

[ATTACH=full]693718[/ATTACH]

[ATTACH=full]693719[/ATTACH]

بعد ما أستقريت ع هاي الرحله دخلنا موقعهم ويلست اتفرج ع الغرف

وقلت لبوعيسى أهم شي ابا بلكونه 

واخترت غرفه سويت مع بلكون ولكن

كل مايحاول بوعيسى يحجز مايقبل وماعرفت ليش 

وبعدين بوسعد الله يطول بعمره عطاني الموقع اللي اقدر أحجز منه 

وهو يكون خاص بوكلاء السفر 

يعني مب خاص بهاي الشركه انما شركات الكروز المتنوعه مثل 

نرويجان و MSC وغيرها 

رابط الموقع

Cruise Deals - Discount Cruises Travel, Cruise Ship Deals, Cheap Offers, Vacations & Packages

حطينا بياناتنا من اسم السفينه والتاريخ والبلد اللي بتنطلق منها و...الخ 

طبعا انا كنت عارفه كل هالمعلومات من موقعهم

وبعدين قام بوعيسى بالحجز عن طريقهم

وهالموقع عندهم ميزة التواصل معاهم بالشات أون لاين 

فاذا عندكم أي استفسارات مب واضحه تقدرون تسألونهم مباشر

ويحتاج تكونون تعرفون انجليزي واللي ماعنده لغه 

ومايعرف حد ممكن يساعده الافضل

في رآيي يحجز عن طريق مكاتب الشركات السياحيه

بعد ماحجز بوعيسى وخصموا من البطاقه ارسلولنا رقم الحجز بالايميل 

وصارتنا كم مشكله [ATTACH=full]693720[/ATTACH]

المشكله الاولى : اختيار الغرفه 

الصراحه انا مب متأكده اذا الخطأ منهم أو من بوعيسى 

شاكه فيه هالريال [ATTACH=full]693721[/ATTACH]

أنا كنت طالبه سويت ببلكونه 

ولما بوعيسى أرسل البيانات أرسلوا لنا مخطط السفينه وعطونا 4 غرف نختار بينهم 

وانا شفت في الصوره انه الغرفه فيها بلكونه 

فأخترت وحده منهم وحطينا رقم الغرفه في الطلب ، ولكن 

لما وصلت هناك اكتشفتانها مب سويت[ATTACH=full]693722[/ATTACH]

واكتشفت فيها عيب ثاني لايغتفر [ATTACH=full]693723[/ATTACH]

كل هاي التفاصيل عقب بخبركم عنها في الاجزاء اليايه 

عشان نمشي معاكم خطوه خطوه [ATTACH=full]693724[/ATTACH]

المشكله الثانيه 

عقب ماحجزنا طرشولنا رقم الحجز

وعقب تمينا نقرأ عن تفاصيل هاي الرحله من موقعهم وعرفنا انهم 

يطلعون رحلات سياحيه مع قروبات لكل منطقه ننزل فيها 

وكل منطقه يطلعون كم رحله وبمده مختلفه يعني ممكن رحله تكون مدتها 

3 ساعات ووحده 7 ساعات و ... الخ 

وكل رحله بسعر مختلف

طبعا انا شفت انه مثل هاي الرحلات وايد بتفيدنا انا والبنات دامنه بروحنا

وطلبت من بوعيسى يحجزلنا الرحلات اللي اخترتها مع البنات 

وهاي المره دخلنا ع موقع MSC وحاولنا نحجز الرحلات

ولما كان يختار الرحله اللي نباها يطلبون رقم الحجز ولما نحط 

الرقم اللي عطونا ياه مايقبل [ATTACH=full]693725[/ATTACH]

حاولنا كم مره وع مدى أيام وفي الاخير بوعيسى كلمهم أون لاين 

ع الشات من الموقع اللي حجزنا منه 

وقالوله انه هالشركه اللي حجزت منها (وهي وسيط ) شركه موثوقه

والرقم صحيح ولكن تواصل وياهم مباشره 

وخبروه كيف يتواصل ويالشركه

وبعد ماتكلم معاهم طرشوله رقم ثاني ومن عقبها قدرنا ندخل موقع MSC ونحجز

وفعلا بوعيسى حجز وقاللي هناك بتدفعين الرسوم وطبعلي ورقة الحجز مالت الرحلات 

وهناك كانت الصدمه بسبب هاي الورقه وكانت هاي المشكله الثالثه [ATTACH=full]693726[/ATTACH]

التفاصيل عقب بخبركم عنها في التفاصيل اليوميه [ATTACH=full]693727[/ATTACH]

هذا الموقع اللي فيه برامج الرحلات اللي ع رحلتنا 

Cruise Northern Europe, MSC SPLENDIDA, 12 August 2015 - MSC Cruises Global Website

 تفاصيل حجوزتنا

[ATTACH=full]693728[/ATTACH]

 تاريخ رحلتنا في الكروز 

من تاريخ 12/ 8 الى 23 / 8 

المده 11 ليله 

 تاريخ يلستنا في هامبورغ 

من تاريخ 23 / الى 26 / 8 

ولكن عقب مددنا الى 29 [ATTACH=full]693729[/ATTACH]

عقب فكرت أمدد بعد بس خفت ع بوعيسى ومنه [ATTACH=full]693730[/ATTACH]

أتخيله اييني المانيا ويمطني من شعري ويرجعني البلاد [ATTACH=full]693731[/ATTACH]

ههههههههههههههههههه

 تكلفة رحلتنا ع الكروز 

طلع علينا بــــ 6,057.25 دولار

بالاضافه الى ضريبه يوميه ندفعها عن كل شخص 8.5 يورو

هذا السعر يشمل الغرفه لنا نحن الثلاث ( أنا وبناتي الله يحفظهم ) 

وشامل الوجبات الثلاث من البوفيه وأي اكل من بوفيه مدة 24 ساعه

وعقب بخبركم أكثر عن مطعم البوفيه وشو يقدم[ATTACH=full]693732[/ATTACH]

وبعد هالسعر شامل حجز في مطعم ثاني ويقدم عشاء

بس لازم يتم الحجز قبل السفر ومره وحده وعقب خلاص ماتحتاجون حجز 

ومن أول مره تدخلون المطعم بتلقون كراسيكم محجوزه لكم طول الرحله 

سواء حضرتوا ولا لا 

وهالمطعم يقدم وجبة العشاء بس من اختياركم من المنيو

ونحن حجزنا قبل لانسافر

وبعد شامل السباحه في الاحواض 

وحضور العروض في المسرح 

والجيم وبس 

وهاي كانت صدمتنا[ATTACH=full]693733[/ATTACH]

لأنه الباقي كله برسوم

أي العاب أي مشروبات من الكوفيهات أو أكل غير اللي ذكرتهم يكون حسابه غير[ATTACH=full]693734[/ATTACH]

وأي العاب تكون برسوم تدفعونها ع حسب اللعبه 

الاسبا برسوم هذا مقبول

الصالون برسوم وهذا مقبول

بالمختصر كل شي بالفلوس[ATTACH=full]693735[/ATTACH]

وما أدري عن باقي شركات الكروز اذا نفس النظام ولا غير 

 فندقنا في هامبورغ 

حجزنا في فندق بارك حياة من موقع بوكينج 

وهذا موقعهم

 

http://hamburg.park.hyatt.com/en/hotel/rooms.html

حجزنا غرفه حقنا نحنا الثلاث وطلبنا فيها سرير اضافي 

وطلع المبلغ 661 يورو حق أول 3 أيام 

وعقب تضاعف المبلغ لما ضاعفنا الايام [ATTACH=full]693736[/ATTACH]

حبيبتي فني جيرل هي رشحتلي ياه بعد ماجربته وفعلا طلع ممتاز

شكرا حبيبتي فني [ATTACH=full]693737[/ATTACH]

مدة رحلتنا كلهاتقريبا 17 يوم 

سافرنا ع طيران الامارات ع البزنس 

 بالنسبه للمواصلات

ما احتجنا هناك مواصلات

لأنه رحلتنا الاولى في السفينه ورحلاتنا الترفيهيه والاستكشافي كانت

مع القروبات السياحيه 

وفي هامبورغ كنا ساكنين في السنتر ومانحتاج مواصلات 

والمطار كانت مواصلات طيران الامارات موفرتنها لنا في السيره والرجعه 

 

 تابعوني في... 

 الجزء الرابع وتفاصيل رحلتنا يوم بيوم  

[ATTACH=full]693738[/ATTACH]