رحله بالكروز الى النرويج

[جودى]

الرحلات البريه والبحرية



بسم الله الرحمن الرحيم

يسعدني صباحكم ومساكم


وبالحب نلتقي وياكم في رحلة يديد ومغامره يديده


والسموحه اني تأخرت في التقرير


واليوم قلت بنزل لو مقدمه صغيره عشان أحط عمري في الامرالواقع


وابدأ التقرير

الجزء الأول

​

مقدمه

رحلتي هاي لاكانت ع البال ولا ع الخاطر

من قبل شهور وانا أستعد واجهز لرحلة الصيف واللي كانت بتكون ولاول مره الى أمريكا

بدينا بحجوزات التذاكر والسكن والسياره وجهزت المعلومات المطلوبه ... الخ

وفي شهر 6 صدمنا بوعيسى وقال سفرة الصيف بتتكنسل نهائي بسبب ظروف عمله

وبعد تفكير ومناقشات قررنا انه انا والبنات نسافر أي بلد لو حتى 10 أيام

وبوعيسى والاولاد يظلون في البيت

ورغم انه البنات كانوا متضايقين انه حلمهم في أمريكا مابيتحقق

الا انه فكره انه نحن بروحنا هاي أسعدتهم

الحين عاد هداوه دخلت في حوسه ، مب عارفه وين نسافر

ودي ببلد يديده وفي نفس الوقت أقدر أدبر حالي فيها مع البنات

وانا أبحث وأفكر

تذكرت رغبتي في زيارة النرويج وفكرت نسافر النرويج ولكن اذا سرنا بروحنا بتكون صعبه

لازم نسير عن طريق شركه سياحيه لأنه الاماكن المعروفه عندهم تبعد عن اوسلو بالساعات

وعقب تذكرت سالفة الكروز

ويلست أبحث وأدور عن كروز يودينا للاماكن اللي ابا أشوفها من النرويج ..

يلست أدور تقارير تساعدني بس ماحصلت

ولقيت مره رد من الردود لمشرفنا qa6ar911 وفيه كان يتكلم عن الكروز

فحسيت انه عنده فكره عن الكروزات

وع طول راسلته وبفضله عرفت ارتب اموري

فكل الشكر والعرفان لخويي ومشرفنا القدير

أبو سعد

والصدفه انه هو كان في نفس الوقت يفكر برحله بالكروز

والحين عندكم تقريرين دسمين مني ومن بوسعد

وكل واحد منا أختبر شركه مختلفه من شركات الكروز

وكل واحد منا جرب بلدان مختلفه

فالفايده ان شاءالله بتكون كبيره لكم

يلا اترياكم تتجمعون عشان نبدأ التقرير

​

 

[جودى]

الجزء الثاني

معلومات عن الكروزات

فيه الكثير من الكروزات اللي تسير رحلات لكثير من بلدان العالم

وكل شركه من هاي لها اسطول من السفن بأشكال

واحجام ومسميات مختلفه ع حسب الوجهه

ومن هاي الكروزات

* نرويجيان

Norwegian Cruise Line (NCL) - Kreuzfahrten


* رويال كاريبيان

Welcome to Royal Caribbean International


* شركه دزني كروز

Disney Cruise Line | Official Website


* كوستا كروز

Vacation Cruise Packages, Cruise Travel Deals, All Inclusive Cruise Holiday


* شركه msc

http://www.msccruises.com/gl_en/


* برنسيس كروز

Cruises – Cruise Vacations – Princess Cruises

ستار كروز

Star Cruises


كريستال كروز

CRYSTAL CRUISES

ريجنت سيفن كروز

All Inclusive Cruises | Luxury Cruise | Regent Seven Seas Cruises

لوفتنر كروز

Lأ¼ftner Cruises - River Cruises on Europe’s most beautiful waterways


سيلفرسي كروز

Experience All-Inclusive Ultra-Luxury Cruises | Silversea

كونراد كروز

Cruise Vacations | Luxury Cruises | Cunard Cruise Line

هولند أمريكا كروز

Cruises, Cruise Ship Deals, Travel Cruises - Holland America Line


* الكروزات اللي معلمتنهم بنجمه * هاذيل أكثر معروفات

أما رحلتنا كانت ع كروز​

MSC

أسم سفينتنا

Splendida


​

موقعهم ...

MSC Splendida - MSC Cruise Ship - Cruise Liner - MSC Cruises Fleet


وهذا موقع ممكن عن طريقه تحجزون من وكلاء السفر لجميع الكروزات

Cruise Deals - Discount Cruises Travel, Cruise Ship Deals, Cheap Offers, Vacations & Packages


كروز MSC

عندها اسطول ومنتشره في بحار مختلفه ولها أحجام وأشكال ومسميات مختلفه

وتقوم برحلات لعدة اماكن وبلدان مختلفه

في وقتنا كانت لها رحلتين تنطلق من هامبورغ لنفس الاماكن وبنفس المده يعني

الرحله الاولى كانت من تاريخ 12 / 8

الرحله الثانيه كانت من تاريخ 23 / 8

والكابتن مره سولفنا وياه وخبرنا انه في شهر 12 بتكون عندنا في دبي

انتوا تقدرون تعرفون من موقعهم من وين تنطلق وووين تسير

فيديو تتعرفون من خلاله ع سفينتنا Splendida


https://

معلومات تفصيليه عن سفينتنا

السفينه تستوعب 4363 مسافر
اما طاقم العمل فعددهم 1730 موظف وعامل

عدد الكبائن فيها 1637 كبينه منها 43 لذوي الاحتياجات الخاصه


عدد الطوابق وتوزيعاتها

هاي شخابيطي ع الصوره

18 طابق منها 14 طابق للمسافرين

وانا هناك ماشفت الدور 18 ولاكان هالرقم في المصاعد اللي نركبها

لانه هالدور مخصص للناس اللي حاجزه غرف السويت يعني

للـ VIP

وهاي صور من النت الدور 18 وعباره عن مسبح خاص

واستراحه وكوفي وغيره من خدمات مميزه

ومن الادوار 8 الى 13 كلها غرف مختلفه

انواع الغرف


انواع الغرف المتوفره في السفينه

بعطيكم من أقل مستوى لأعلى مستوى

1-الغرف الداخليه وهاي مافيها لاشباك ولابلكونه والصراحه

شفتها ع الطبيعه وجميله ولاعليها غبار ، واللي بيسكنها يقدر

يطلع متى مابغى ويلس برع ويتفرج ع البحر

هاي الغرفه اسمها

INSIDE

عندهم منها 294 غرفه وتكون الاسره عباره عن دبل

وممكن تطلبون اضافه سريرين مفرد

وهاي الاسره تكون معلقه في السقف مجرد تنسحب وتفتح عند الطلب

فيها طبعا حمام خاص وتلفزيون وكل الغرف في السفينه مكيفه

فلاتحاتون هالشي

شوفوا السرير الاضافي كيف نازل من السقف

هذا من تصويري

2- النوع الثاني من الغرف هي لها طله ع البحر بشباك واسمها

OCEAN VIEW

وهاي منها 93 غرفه وسريرها دبل وممكن اضافة سريرين مفرد حسب الطلب

نفس المخطط السابق بس هي بشباك

3- هالنوع يسمونه غرف البلكونه

Palcony

هاي شرات غرفتنا

منها 1143 غرفه وفيها سرير دبل وكنبه تتحول سرير لشخصين

4- غرف السويت واسمها

SUITE

منها 36 غرفه فيها بلكونه كبيره ومطل أجمل

وتكون الغرفه أكبر وأوسع وفيها كنبه تتحول الى سرير لشخصين

طبعا كل ماعلى المستوى كل ماكانت المميزات أفضل

4- غرف الديوكس سويت

DELUXE SUITE

ومنها 66 سويت وطبعا تكون كبيره وفيها كنبه تتحول لسرير لشخصين

وكنبه كبيره ثانيه وما أدري اذا تتحول الى سرير ولا لا

بالاضافه لك المميزات الثانيه من التيلفون والتيلفزيون والميني بار والمكيف والحمام

5- هاي النوع من الغرف هي خاصه للعوائل واسمها

EXECUTIVE & FAMILY SUITE

وعندهم من 3 سويتات ولكن مافيها بلكونه انما شباك كبير أو باب سلايدنج

بالاضافه انه فيها صاله منفصله عن غرفة النوم وفيها كنبه تتحول الى سرير

وكل الخدمات فيها

6- وآخر نوع من الغرف هي الرويال سويت

ROYAL SUITE

وعندهم بس اثنين واحد كان مالي بس تنازلت عنه ههههههه

فيها بلكونه كبيره

وكل شي فيه موجود والسويت كبير والحمام كبير وفيه بانيو

دوخت

باجر ان شاءالله نكمل الجزء الثاني

تصبحون ع خير

​

 

[جودى]

​

نتابع الجزء الثاني

معلومات عن كروزنا

بعد ماخلصنا الغرف وانواعها الحين بنتكلم عن المطاعم اللي فيها

ثانيا : المطاعم المتوفره ع كروزنا

تقريبا 7 مطاعم غير الكوفيهات واللاونج والبارات

1- مطعم L'Olivo

2- Villa Verde Panoramic Restaurant

3- Pago Buffet

جدا كبير هالمطعم وله جلسات تطل ع البحر ولكن مسكر بزجاج

وبعد له جلسات خارجيه تطل ع المسابح

وهذا أكثر مطعم نيلس فيه

4- La Reggia Restaurant

5- Santa Fe Tex Mex

6- L'Enoteca

7-L'Equatore Covered Pool

كوفيهات متنوعه

بالنسبه لجميع المطاعم والكوفيهات كلهم تدفعون وقت الطلب ماعدا


مطعم البوفيه مجانا وهذا مفتوح 24 ساعه


ومطعمين من غير وهم


Villa Verde Panoramic Restaurant


و


La Reggia Restaurant


وهاذيل تحجزون في واحد منهم وقت حجزكم في الكروز


وهم يخصصون لكم طاوله تكون لكم طول الرحله


وهاذيل مايقدمون فيهم الا وجبة العشاء وتكون مجانا


بخبركم أكثر عنه لما بعطيكم التفاصيل اليوميه






ملحوظه


بعض الصور من النت وبعضهم من تصويري





تابعوني في

تكملة الجزء الثاني من التفاصيل التعريفيه بسفينتنا

​

 

[جودى]

نتابع ...

تكملة الجزء الثاني من تفاصيل سفينتنا

محلات التسوق

يتوفر في السفينه 8 محلات للتسوق متوزعه ومتنوعه

بالاضافه الى الاكشاك او البسطات اللي يعرضون فيها منتجاتهم من اللبس والعطور وغيره

كأنه سوق شعبي بس بدون أكل

صالون للتجميل مختلط

النوادي والجيم وجلسات الريلاكس والاسبا

متوفره في السفينه وعددها 6 متنوعه

سطح السفينه

حلو التمشي عليه وخصوصا وقت الغروب

اللوبي

في هالمكان يكون الرسبشن ويلسات ودايما اييبون عازفة بيانو

أحلى مافي المكان هي السلالم أرضيتها مرصعه بالكريستال

غرفه خاصه للسيجار

للاسف نسيت أدخل وأصور من داخل

مركز صحي للعلاج


يعني مستشفى صغير ، الصراحه مادخلته


مره احتجت ومارحت

أماكن الترفيه

هي كثيره ومتنوعه في السفينه

1- حمامات سباحه متنوعه منها داخليه ومنها خارجيه

2- ملعب تنس أرضي

3- سينما 4D

4- سيارة فيراري أوفورميلا نسيت الاسم وتلعبون بطريقة 3D

5- نوادي متنوعه للاطفال والمراهقين

6- ديسكو


أكثر اللي يرقصون فيه هم الشواب هههههه

7- صالة البولينج

8- صالات القمار


والسموحه بس هذا موجود ولازم تعرفونه

9 - Art Gallery

في هالمكان يصورونكم اذا تحبون ويعلقون صورتكم واللي يحب يشتريها

9- مكتبه

10 - مسرح


وتقريبا يوميا تقام عروض

11- العاب اكترونيه برسوم

12 - صاله بجانب المسبح وفيها تنس طاوله والعاب ثانيه

وهاي الالعاب تكون بفلوس وبالايجار يعني مب كلشي ببلاش

هذا جداول لكل طابق وشوفيه


الطابق 4 من السفينه

الطابق 5

الطابق 6

الطابق 7

الطابق 14

الطابق 15

الطابق 16

الطابق 18 وهو خاص لغرف سويتات

هاي الاماكن مخصصه للـ VIB

هذه الصورة تم تصغيرها . الحجم الافتراضي لها هو 1024x768.

وهذا مخطط السفينه للمصاعد وهي اللي باللون الأخضر


ووين ما أنا مسويه بالقلم سهم هنيه موقع غرفتنا

وأي معلومات اضافيه بتحصلونها في موقعهم


تصدقون اني وانا أعد التقرير اشوف أماكن في السفينه ماشفتها وانا هناك

عافانا الله دومي جيه أعرف المعلومات أكثر يوم أسوي التقرير


بالنسبه للاسعار

أنا ماتطرقت للاسعار

لأنه الاسعار تختلف حسب نوع الغرفه وعدد المسافرين والوجهه

فما أقدر أخبركم عن الاسعار ولكن عقب بخبركم كم طلع علينا

اما انطباعي عن السفينه وسلبياتها وايجابياتها بنخليها عقب

أسويلكم تشويق

سامحوني لرداءة بعض الصور لانها من النت

بس الصور العدله والحلوه من تصويري

تابعوني في ...

الجزء الثالث وتفاصيل حجززاتنا

​

 

[جودى]

الجزء الثالث

تفاصيل حجوزاتنا

مخططي اللي انقلب بسبب بروشور

البرشور هو عباره عن كتيب من صفحتين او 3 يعني تكون عدد صفحاته قليله

ويكون فيه معلومات ودعايه عن شي معين


تخطيط رحلتي

اول مره خططت رحلتي للنرويج عن طريج الدنمارك


ومدة الرحله بالكروز 7 ليالي

وتنطلق منكوبنهاجن وفيها كل الاماكن اللي أباها من صوب النرويج

وحجزت الفندق في كوبنهاجن وباقي بس أحجز الكروز

وبالصدفه وانا أبحث بين أوراقي طاح في ايدي بروشور خاص


بالكروز MSC

تخيلوا هذا البرشور محتفظه فيه من كم سنه وناستنه


وكنت أحلم أسافر ع هاي السفينه بالذات

لأنه من زمان شفت مسلسل تركي وكان البطل هومهند

وفي المسلسل مهند زار هاي السفينه ع اساس بيسوي عرسه فيه

وتجننت يومها ع هاي السفينه وما أتذكر كيف حصلت بروشورهم


واحتفظت فيه من يومها ونسيته

وشاءت الصدفه قبل لا أحجز الكروز اني أشوف البروشور

وكان في البرشور عارضين أنواع واحجام السفن اللي عندهم


وكانت السفينه اللي بنطلع فيها من كوبنهاجن ثالث أصغر وحده من مجموع 11 سفينه واسمها

MSC Sinfonia

يوم شفتها صغيره طاحت من عيني وضقت

تعرفون عاد بنت شربت تبا كل شي من الزين

سرت أشوف أكبر وحده من اسطولهم ولقيت اسمها

MSC Splendida

بحثت عنها وبغيت أعرف وين تسير


والصدفه الحلوه طلعت انها تسير صوب النرويج والاماكن اللي اباها بالضبط


بس مدتها أطول 11 يوم وتطلع من هامبورغ

قلت خلاص هاي اللي اباها

كلمت بوعيسى وقال


بس المده طويله وأخاف ماترتاحون

قلتله هاي تجربه ولازم أخوضها وان شاءالله تعجبنا بس أهم شي ابا السفينه العوده

شفتوا القدر وين خذانا

هاي صورة البرشور


وشوفوا من أي سنه عندي

هاذيل هم ال 11 سفينه

بجزأ الصوره وبقربها أكثر

بعد ما أستقريت ع هاي الرحله دخلنا موقعهم ويلست اتفرج ع الغرف

وقلت لبوعيسى أهم شي ابا بلكونه

واخترت غرفه سويت مع بلكون ولكن

كل مايحاول بوعيسى يحجز مايقبل وماعرفت ليش

وبعدين بوسعد الله يطول بعمره عطاني الموقع اللي اقدر أحجز منه

وهو يكون خاص بوكلاء السفر

يعني مب خاص بهاي الشركه انما شركات الكروز المتنوعه مثل

نرويجان و MSC وغيرها

رابط الموقع

Cruise Deals - Discount Cruises Travel, Cruise Ship Deals, Cheap Offers, Vacations & Packages



حطينا بياناتنا من اسم السفينه والتاريخ والبلد اللي بتنطلق منها و...الخ

طبعا انا كنت عارفه كل هالمعلومات من موقعهم

وبعدين قام بوعيسى بالحجز عن طريقهم

وهالموقع عندهم ميزة التواصل معاهم بالشات أون لاين

فاذا عندكم أي استفسارات مب واضحه تقدرون تسألونهم مباشر

ويحتاج تكونون تعرفون انجليزي واللي ماعنده لغه


ومايعرف حد ممكن يساعده الافضل

في رآيي يحجز عن طريق مكاتب الشركات السياحيه

بعد ماحجز بوعيسى وخصموا من البطاقه ارسلولنا رقم الحجز بالايميل

وصارتنا كم مشكله

المشكله الاولى : اختيار الغرفه

الصراحه انا مب متأكده اذا الخطأ منهم أو من بوعيسى

شاكه فيه هالريال

أنا كنت طالبه سويت ببلكونه

ولما بوعيسى أرسل البيانات أرسلوا لنا مخطط السفينه وعطونا 4 غرف نختار بينهم

وانا شفت في الصوره انه الغرفه فيها بلكونه

فأخترت وحده منهم وحطينا رقم الغرفه في الطلب ، ولكن


لما وصلت هناك اكتشفتانها مب سويت

واكتشفت فيها عيب ثاني لايغتفر

كل هاي التفاصيل عقب بخبركم عنها في الاجزاء اليايه

عشان نمشي معاكم خطوه خطوه

المشكله الثانيه


عقب ماحجزنا طرشولنا رقم الحجز

وعقب تمينا نقرأ عن تفاصيل هاي الرحله من موقعهم وعرفنا انهم

يطلعون رحلات سياحيه مع قروبات لكل منطقه ننزل فيها


وكل منطقه يطلعون كم رحله وبمده مختلفه يعني ممكن رحله تكون مدتها

3 ساعات ووحده 7 ساعات و ... الخ

وكل رحله بسعر مختلف

طبعا انا شفت انه مثل هاي الرحلات وايد بتفيدنا انا والبنات دامنه بروحنا


وطلبت من بوعيسى يحجزلنا الرحلات اللي اخترتها مع البنات


وهاي المره دخلنا ع موقع MSC وحاولنا نحجز الرحلات


ولما كان يختار الرحله اللي نباها يطلبون رقم الحجز ولما نحط

الرقم اللي عطونا ياه مايقبل

حاولنا كم مره وع مدى أيام وفي الاخير بوعيسى كلمهم أون لاين

ع الشات من الموقع اللي حجزنا منه


وقالوله انه هالشركه اللي حجزت منها (وهي وسيط ) شركه موثوقه

والرقم صحيح ولكن تواصل وياهم مباشره


وخبروه كيف يتواصل ويالشركه

وبعد ماتكلم معاهم طرشوله رقم ثاني ومن عقبها قدرنا ندخل موقع MSC ونحجز


وفعلا بوعيسى حجز وقاللي هناك بتدفعين الرسوم وطبعلي ورقة الحجز مالت الرحلات

وهناك كانت الصدمه بسبب هاي الورقه وكانت هاي المشكله الثالثه

التفاصيل عقب بخبركم عنها في التفاصيل اليوميه

هذا الموقع اللي فيه برامج الرحلات اللي ع رحلتنا



Cruise Northern Europe, MSC SPLENDIDA, 12 August 2015 - MSC Cruises Global Website​

تفاصيل حجوزتنا

تاريخ رحلتنا في الكروز

من تاريخ 12/ 8 الى 23 / 8

المده 11 ليله

تاريخ يلستنا في هامبورغ

من تاريخ 23 / الى 26 / 8

ولكن عقب مددنا الى 29

عقب فكرت أمدد بعد بس خفت ع بوعيسى ومنه

أتخيله اييني المانيا ويمطني من شعري ويرجعني البلاد

ههههههههههههههههههه


تكلفة رحلتنا ع الكروز

طلع علينا بــــ 6,057.25 دولار


بالاضافه الى ضريبه يوميه ندفعها عن كل شخص 8.5 يورو

هذا السعر يشمل الغرفه لنا نحن الثلاث ( أنا وبناتي الله يحفظهم )

وشامل الوجبات الثلاث من البوفيه وأي اكل من بوفيه مدة 24 ساعه

وعقب بخبركم أكثر عن مطعم البوفيه وشو يقدم

وبعد هالسعر شامل حجز في مطعم ثاني ويقدم عشاء

بس لازم يتم الحجز قبل السفر ومره وحده وعقب خلاص ماتحتاجون حجز

ومن أول مره تدخلون المطعم بتلقون كراسيكم محجوزه لكم طول الرحله

سواء حضرتوا ولا لا

وهالمطعم يقدم وجبة العشاء بس من اختياركم من المنيو

ونحن حجزنا قبل لانسافر

وبعد شامل السباحه في الاحواض

وحضور العروض في المسرح

والجيم وبس

وهاي كانت صدمتنا

لأنه الباقي كله برسوم

أي العاب أي مشروبات من الكوفيهات أو أكل غير اللي ذكرتهم يكون حسابه غير

وأي العاب تكون برسوم تدفعونها ع حسب اللعبه

الاسبا برسوم هذا مقبول

الصالون برسوم وهذا مقبول

بالمختصر كل شي بالفلوس

وما أدري عن باقي شركات الكروز اذا نفس النظام ولا غير


فندقنا في هامبورغ


حجزنا في فندق بارك حياة من موقع بوكينج


وهذا موقعهم

http://hamburg.park.hyatt.com/en/hotel/rooms.html​

حجزنا غرفه حقنا نحنا الثلاث وطلبنا فيها سرير اضافي

وطلع المبلغ 661 يورو حق أول 3 أيام

وعقب تضاعف المبلغ لما ضاعفنا الايام

حبيبتي فني جيرل هي رشحتلي ياه بعد ماجربته وفعلا طلع ممتاز

شكرا حبيبتي فني

مدة رحلتنا كلهاتقريبا 17 يوم

سافرنا ع طيران الامارات ع البزنس


بالنسبه للمواصلات

ما احتجنا هناك مواصلات

لأنه رحلتنا الاولى في السفينه ورحلاتنا الترفيهيه والاستكشافي كانت

مع القروبات السياحيه

وفي هامبورغ كنا ساكنين في السنتر ومانحتاج مواصلات

والمطار كانت مواصلات طيران الامارات موفرتنها لنا في السيره والرجعه



تابعوني في...

الجزء الرابع وتفاصيل رحلتنا يوم بيوم

​

 

[جودى]

الجزء الرابع

برنامج رحلتنا

انطباع عن رحلتنا بالكروز

اليوم بكسر القاعده وبخبركم عنانطباعي قبل لا أدخل في التفاصيل

والسبب

اباكم تعيشون شعوري واحساسي اللي عشته في هاي الرحله

هاي الرحله من الرحلات الجميله في حياتي

فاقت كل توقعاتي

ما توقعت اني بحبها هالكثر وأحب البحر اللي علاقتي معاه ضعيفه

المتعه والجمال مب في المناطق اللي زرناها في النرويج

هاي بالنسبه لي مثل أي رحله لأي بلد

ولكن الجمال كان في الكروز

الناس اللي معانا واقصد المسافرين تحسونهم كأنهم معاكم

يعني ماشعرنا بالوحده من كثر مالناس طيبين وحبوبين

وحتى العاملين كانوا وايد يحبونا ويعتنون فينا لأنهم عارفين انه نحن بروحنا

فخامة السفينه وجمالها تعطيك شعور بالراحه والمتعه

تعدد الانشطه ماتخليك تشعر بالملل وودك بوقت أطول

بناتي جدا استانسوا وتعرفوا ع بنات فرنسيات في سنهم تقريبا

وصاروا يلعبون معاهم ولازالت علاقتهم مستمره

وهذا شي جميل

بالنسبه لي واكثر متعه وسعاده حسيتها في الكروز هي هاذيج


اللحظات اللي كنت أيلس فيها مع نفسي وانا مجابله البحر


واستمع للأغاني واقرأ كتاب

واحيانا أتأمل وأفكر في أمور كثيره بذهن صافي

ماسبق حسيت او عشت مثل هالاسترخاء مثل اللي حسيته في هالسفينه

فعلا الانسان يحتاج مثل هاي اللحظات

تصدقون كنت أوقات اتمنى ماتوقف السفينه وماننزل

وأوقات لما نطلع رحله أكون متشوقه ابا أرجع للسفينه

طافوا 11 يوم بسرعه وكنت أتمنى لو يلسنا أكثر

اتمنى اللي بيجرب رحلة الكروز انه فعلا يحاول يستمتع بوقته

ويعيش لحظات جميله مثل ماعشناها

تخطيط رحلتنا

هههههههههههههههههههههه

والله كل ما أحاول أبدا في التفاصيل اليوميه

اشوف جدامي معلومات لازم أقولها قبل

شو أسوي يعني

هاي تفاصيل رحلتنا الكروزيه

الانطلاق ع كروز MSC

من ميناء هامبورغ تاريخ 12 / 8

الساعه 6 المغرب تتحرك السفينه

العوده بتاريخ 23 / 8 لميناء هامبورغ

المدة 11 يوم

نو الغرفه : غرفه مع بلكونه ومطل ع المحيط


خط رحلتنا بالكروز

12 / 8 هامبورغ الانطلاق

13 / 8 في البحر

أول توقف بيكون في أول منطقه في النرويج وهي

14 / 8 Alesund, Norway

10:00 17:00

هالوقت اللي بنقضيه في منطقة Alesund

المده 7 ساعات

يوم 15 / 8 بنقضيه في البحر

يوم 16 / 8 الوصول الى منطقة

Honningsvag, Norway 15:00

Honningsvag, Norway − 02:00

بنوصل الساعه 3 العصر وبنظل الى الساعه 2 بعد منتصف الليل

يعني 11 ساعه عندنا نستكشف فيها هالمنطقه

تاريخ 17 / 8 بنوصل لمنطقة

Tromso, Norway


13:00 21:00

وبنوصل الساعه 1 الظهر الى 8 المساء

المده 7 ساعات

تاريخ 18 / 8 بنقضيه في البحر

تاريخ 19 / 8 بنوصل الى منطقة

Molde Fjord, Norway

08:00 18:00

المده 10 ساعات بنقضيه فيها

تاريخ 20 / 8 بنوصل لمنطقة

Hellesylt/Geiranger, Norway

08:00 18:00

المده 10 ساعات بنقضيه فيها

تاريخ 21 / 8 نوصل لمنطقة

Bergen, Norway

07:30 18:00

وبنقضي المده 10 ساعات ونص فيها

تاريخ 22 / 8 بنقضيه في البحر

ويوم 23 / 8 بنوصل هامبورغ


موقف صار وكان بيغير خطة السفر

قبل مانوصل بيرجن بيومين يتني فكره وكنت بغير مخطط سفرنا

فكرت انه لما نوصل بيرجن ننزل ومانكمل الرحله معاهم

ونظل في بيرجن يوم

وعقب نسافر بطيران داخلي الى اوسلو عاصمة النرويج

ونظل كم يوم وهنيه ممكن نرجع من أوسلو ع الامارات

أو نطولها ونرجع من هامبورغ

وتميت أفكر في هاي الفكره بروحي بدون ما أخبر البنات

لأني عارفه انهم بيوافقون ع هالاقتراح لأنه في خاطرهم يسيرون اوسلو

تميت أتشاور مع بوعيسى وهو ماكان متشجع وايد لأنه مايبانا نتأخر أكثر

وبعد نقاش وتفكير قررت اني أظل ع برنامجنا

واتعوذ من الشيطان ومن افكاري الجنونيه

معلومات جمعتها

قبل لا أسافر يلست أدور في النت والانستا والاستعانه بصديق لين

جمعت بعض المعلومات الموجوده في بعض مناطق النرويج

لأنه كنا مقررين انه بعض المناطق مانطلع فيها مع القروبات السياحيه

ونتمشى فيها بروحنا ونستكشفها

وكنا مختارين 3 مناطق بس نطلع فيها مع القروبات السياحيه

يعني بس 3 رحلات

لكن اللي صار عقب غيــــــــــــــــر

وعقب بتعرفون الاسباب

المعلومات اللي جمعناها

أولا مدينة Alesund

هاي بدون قروب سياحي وبنيلس فيها 7 ساعات


الاماكن السياحيه اللي فيها


1- فيها تله مرتفعه ولازم نصعد لها ونسأل كيف نسيرلها وفوق مطعم وفيو

Fjellstua Utsiktspunkt


2- أكواريوم واسمه

Atlanterhavsparken alesund akvarium


3- مزرعه أسمها

Ytste-skotet


4- بحيرتين وسط الجبال وهاذيل فيهم مباني مطموره

NORANGSDALEN (( THE queens route ))

هاي المنطقه من أضيق الوديان في النرويج

متحف الكنز

Exhibition : therunde treasure , bird mountain

and silver of the sea


5- شلال وقريب واسمه

Dynjafossen waterfall

Gudbrandsjuvet


6- جزيره فيها بط غريب شكله وطيور مهاجره والجزيره جبليه
اسمها

Rundebranden


7- بعد الباص السياحي


ثانيا : قرية Tromso

بنيلس فيها 6 ساعات
الانشطه الموجوده فيها :


1-تزلج مع غزلان الرنه

2-التزلج مع الكلاب الهاسكي وغالبا تكون في الحدود بين

النرويجج والسويد وفنلندا التي تسمى لاب لاند

lapland

3-مشاهدة الحيتان والدلافين

4-ركوب الخيل

5-جوله بحريه وسط الجليد

6-جوله بالهيلوكوبتر

7-كيبل كار ونشوف الفيو من فوق

8-استئجار قارب خاص ورحله لصيد السمك في البحيرات المتجمده

9-المتاحف زيارة الجامعه اللي فيها تقدر تشوف الشفق بالضبط اذا ماشفته بعينك


10- رؤية الشفق القطبي في الشتاء



11-استئجار الدراجات الثلجيه في وديان منطقة لاب لاند


ثالثا : منطقة Honningsvag


بنيلس فيها بنوصل 3 الظهر وبنتم لين ثاني يوم 2 فليل

بنطلع هاي الرحله مع القروب

King crab safari bus experience:

2,5 ساعه

بنبحث عن رحلات ثانيه حق باقي اليوم وفكرت أييب المعلومات من المكتب السياحي


بس هذا اللي جمعته في وقتها وكان البرنامج مب واضح بالنسبه

يعني كيف بنسير لي مكان سياحي

ولكن عقب انتظمت امورنا لما طلعنا في الكروز وبدأت تتضح عني الامور أكثر وأكثر

وان شاالله عند كل منطقه بنزورها وقتها بعطيكم معلومات أكثر


أشياء لازم تاخذونها معاكم في رحلة الكروز

1- حسب خط رحلتكم ووقت رحلتكم يتحدد اللبس اذا شتوي أو صيفي

ولكن نصيحتي هاتوا ثياب خاصه حق السفينه غير اللي بتلبسونها

في الرحلات أو المناطق اللي بتنزلون فيها ولازم تكون ثياب مريحه ومناسبه

بالنسبه للصبايا

هاتوا معاكم شيل أو اسكارفات الشعر غير عن اللي بتطلعون فيهم

لأنه هاي الاسكارفات بتستعملونها يوم بتمارسون انشطه في السفينه

أو بتسيرون المطعم فممكن تتوسخ أو تضرب فيهم الريحه

يعني اللي تلبس اسكارفات ماركات لاتلبسها في السفينه

السفينه شرات بيتكم متكشخين بس بالبسيط

فهمتوني صح

2- هاتوا لبس رياضي وهذا للجنسين حقق الجيم ن طبعا حق اللي يبا

3- هاتوا لبس للسباحه للجميع حتى لو البلاد بارده لأنه في مسابح داخليه ودافيه

والصبايا لبس مايو اسلامي

نحن ماخذينا معانا لأنه ماندخل المسابح المختلطه بس انا أخبركم للعموم

4- الحذاء لازم يكون مريح للرحلات ونعال مريح حق السفينه

أنا كنت ماخذه نعال عزكم الله بس ألبسه في السفينه مريح وعملي

لأنه السفينه كبيره والمشي فيها وايد

5- لازم تاخذون شاحن متنقل احتياطي هذا وايد مهم

6- لاتشيلون شنط كبار ولا لبس وايد خليكم في الوسط لأنه الغرف

ماتكون واسعه وايد وبتتوهقون وين تحطون شنطكم

7- شيلوا معاكم كتاب تقرونه في بعض الاوقات

8- شيلوا معاكم بعض الالعاب مثل البته وحد يسميها ورقه أو زنجفه

وغيرها من الالعاب للتسليه

9- شيلوا معاكم دواء لدوار البحر في حالة احتجوتوا له

10- خزنوا بعض الافلام والبرنامج اللي تبونها في اللاب توب

عشان تشوفونها وتقضون بعض الاوقات معاها

بناتي كانوا جيه مسوين

بالنسبه لي كان جوي غير ، كان رفيقي الكتاب

ملاحظه مهمه وااااايد

الارسال في السفينه في بعض الاوقات يكون مقطوع لأنكم تكونون في نص البحر

والنت في السفينه بالايجار وكان غاااااالي وايد وبتيكم سالفته من خلال الا حداث

فيعني ممكن اتمون ساعات طويله بدون خدمه ولا اتصال

باختصار دورولكم شي مفيد تشغلون وقتكم فيه

تقريبا هذا كله اللي ذكرته لين الحين​

تابعوني في الجزء الخامس

يوم الوصول

​

 

[جودى]

الجزء الخامس

يومياتنا في الكروز

يوم الوصول 12 / 8 / 2015

مقدمه

ههههههههههههههههههههههههههههههههههه

ههههههههههههههههههههههههههههههه

لوسمحتوا


محد يفرني بالبيض والطماط

هاي المقدمه مهمه

هههههههههههههههههههههههههههههههههه

ابا أكتب ومب قادره من كثر ما أضحك وأنا أتخيلكم تتذمرون وتقولون

لوعتي جبدنا خلاص ادخلي في الرحله

ههههههههههههههههههههههه

انزين خلوني أخبركم عن شي مهم

توقيت وتاريخ رحلتنا

رحلتنا بالسفينه يوم 12 / 8

والسفينه بتتحرك الساعد 6 المغرب من هاليوم

ونحن طيارتنا بتوصل الظهر

كانت موعد اقلاع طيارتنا ع الساعه 9 الصبح والوصول 1.40 الظهر

كان عندي اختيارين

الاول انه نوصل هامبورغ تاريخ 11 يعني قبلها بيوم وثاني يوم نطلع ع السفينه

والاختيار الثاني

انه نسافر في نفس يوم الرحله يعني من المطار الى السفينه

بعد تفكير أخترت


الثاني

لأنه فيه وقت كمن ساعه قبل لاتتحرك السفينه

طبعا هاي مغامره مني

لأنه لاسمح الله لو صار أي تاخير من الطياره أو أي سبب ومالحقنا ع السفينه وراحت عنا

وقتها مافي أمل نلحق عليهم وبتروح فلوسنا وبتروح علينا الرحله

وبيكون هذا حالنا

ولكن الحمدالله مرت الامور بسلام مثل مارتبتها

خلصتي ياختي من الرغي

يالا خوشي في اليوميات وريحينا

ان شاءالله يلا نخش ع بركة الله

يوم الوصول

تجهزنا ويتنا سيارة المطار تاخذنا من البيت وتاخرنا ع الدرويل وجان يروح عنا

الحمدالله بوعيسى وعيسى وسايقنا موجود

رتبنا عمارنا وطلعنا المطار وسارت الامور ع خير وركبنا طيارتنا

غدايي

وصلنا هامبورغ

استقبلتنا السيارة الخاصه بطيران الامارت

وهذا سايقنا يركب شنطنا

ماشاءالله وايد شالين شنط

وانطلقنا للميناء

كنت طابعه العنوان احتياطي

عموما الميناء معروف

بدينا نشوف السفينه

سفينتنا

وصلنا الميناء


وأول مانزلنا لقينا هالكاونتر ياخذ عنا شنطنا

وعطيتهم رقم رقم غرفتنا اللي من قبل محددتنها

عقب ماحطوا الاستكر اللي فيه رقم غرفتنا سلمونا أظن ورقه ما اتذكر شو بالضبط

بس عطونا شي

هم دخلوا الشنط ونحن سرنا صوب المدخل الرئيسي

بيسلمونا شنطنا داخل السفينه

دخلنا الصاله وكانت المفاجأه

الصاله كبيره مثل المطار ، وناس وايد

أول مادخلنا عطونا عصير ترحيبي

عقب سرنا صوب طاوله حاطين عليها اوراق ولازم ناخذها


ونملي البيانات اللي عليها وعقب يعطونا رقم

هاي هي الورقه اللي عبيناها

عطونا رقمنا وسرنا عند الكراسي ننتظر

كل شي منظم عندهم ومرتب ورغم كثرت العدد بس مافيه ازدحام وخرابيطنا

كله بالدور واللي يقولون رقمه يوقف ويسير عند الكاونتر

والباقيين ايلسون وينتظرون في هدوء وراحه

قلت للبنات أنا بتمشى وبصور للمنتدى وبرجعلكم

وأنا أمشي واصور جان أشوف ناس واقف هالصوب


وركزوا ع البنت اللي بتطلع في الصوره

هاي البنت وقفت بكلمها


وكنت حابه أسالها عن النظام وانا مفكرتنها أجنبيه

جان تطلع عربيه من المغرب

ع طول رحبت فيني بالعربي وطبعا انا فرحت وماصدقت اني شفت عربيه ويانا


وموظفه بعد

يعني كل اللي أباه بقدر أسألها ياه

سالتها وجان تقوللي كم رقمكم ، خبرتها عن رقمي

قالت سيري هاتي البطاقه وانا بعطيج بدالها بطاقه ثانيه


وهاي البطاقه تدخلكم ع طول عند الكاونتر الخاص

بالـ VIB والحالات الخاصه مثل اللي ع كرسي متحرك وغيره

طبعا أنا طرت من الفرح اني حصلت واسطه وبدخل بسرعه بدون انتظار

عرب مانيوز عن سوالفنا

رجعت عند البنات وقلتلهم تعالوا ورايا


وشرحتلهم السالفه

سلمتنا البطاقه وع طول ع الكاونتر

عطيناهم جوازاتنا وورقة حجزنا


ونسيت بعد شو عطيتهم أظن الورقه اللي عبيناها

المهم هنيه صار شي

وااااااااايد مهم

في السفينه عندهم نظام خاص في الدفع

يعني ونحن هنيه ع الكاونتر سألوني


بأي طريقه بتدفعين داخل ؟

قلتلهم ببطاقة الفيزا


وسلمتهم بطاقة بوعيسى وما أدري ليش ماانقبلت


والحمدالله كانت بطاقتي معاي وانقبلت

ممكن تحبون تدفعون كاش بدال البطاقه


في هاي الحاله تعطونهم مبلغ معين بس اللي ما أعرفه

هل المبلغ هذا أنا أحدده ولاهم


الصراحه ما أدري ونسيت أسأل

انزين الحين شو اللي سووه بطاقتي وليش خذوها ؟

الله يسلمكم يربطون بطاقتي الفيزا ببطاقة الغرفه لي وللبنات

لأنه كل واحد منا له بطاقه بأسمه للغرفه

وبعدين لما نكون داخل أي شي بنشتريهندفع ببطاقة الغرفه كأنها بطاقة الفيزا

يعني محد يدفع كاش في أي شي

واللي بيحط في بطاقته كاش بدال الفيزا نفس الشي بيستعمل بطاقة الغرفه

ليش هالنظام ما أدري ؟


بس في رأيي الشخصي ممناسب

في حالة لو ضاعت البطاقه

في هاي الحاله ع طول تبلغون الرسبشن وهو يلغي كل البطاقات


ويصدرلكم بطاقات يديده

في هاي الرحله مره وحده بنتي ضيعت بطاقتنا وغيرت كل بطاقاتنا

عقب ماخلصنا اجراءاتنا سلمونا بطاقتنا


وومكتوب ع البطاقه اسمنا ورقم غرفتنا

وسلمونا هاي البطاقات واللي فيها نحصل ع ماي معدني مجاني


وكل وحده منا لها رزمه من هاي البطاقات

في البدايه ماكنا نعرف هالشي


وعقب عرفنا بعد ماصارلنا موقف بخبركم عنه في أحداث رحلتنا

عقب ماخلصنا عند الكاونتر ونحن سايرين صوب المخرج للدخول للسفينه

شفت هالحلوات في استقبالنا

زخوني بنات بالي وحاولا يقنعوني اشتري منهم

وعطوني عرض حق الاسبا وقالولي لو خذيتي من هنيه بتحصلين خصم

فكرت وقلت أنا بسوي مساج بسوي


وأكيد هاذيل مايجذبون

فخذيت بكج حق جلستين مساج


ورغم انه بالخصم بس كان غالي

تقريبا الجلستين طلعوا عليه بـ 1000 درهم

بعد ماخلصت معاهم تجدمنا صوب المغادرون

بعد ماعبرنا الجهاز صعدنا السلالم

​

في داخلنا فرحه وحماس تسبق خطاوينا

ونحن نعبر من فوق خذينالكم صوره

شوفوا الناس وهي تنتظر دورها والطوابير

الحين بندخل الخرطوم كأنه بندخل الطياره

​

أشوف شنطنا من فوق وهي تدخل السفينه

وقربنا ندخل السفينه


وقرب الحلم يحقق

وندخل بريلنا اليمين ونقول


بسم الله

تابعوني في الجزء الخامس

وأول يوم في السفينه

 

[جودى]

الجزء السادس

النرويج

تم تجميع المعلومات من الاخ Ra7la من الانستا


جزاه الله الف خير

النرويج بلد الطبيعه والجمال والامن والامان

هي بلد الشلالات والانهار والبحيرات

بلد معروفه بجمال طبيعتها مثلا

مساحتها من الجنوب الى الشمال تتعدى 2000 كيلومتر

والمدن الكبيره فيها قليله واغلبها قرى ريفيه وسط الجبال

واشهر المدن فيها

اوسلو وبيرجن

تكثر فيها الشلالات والبحيرات والجبال والانهارات والغابات والثلوج

وتتميز بالفيوردات والخلجان

فاذا بغيت تشوف جمال الطبيعه والارياف فانته تحتاج الى سياره

والافضل انك تسكن في بيرجن لأنها اقرب للاماكن السياحيه المعروفه

ويتوفر في بيرجن مطار

وهي تبعد عن اوسلو 7 ساعات تقريبا بالسياره

والافضل تأجر سياره وتسوقها بنفسك لأنه التكسي وايد غالي

وممكن تسير بيرجن بطيران داخلي ، واعتقد ممكن بالقطار

افضل وقت لزيارتها


مابين شهر 5 الى أول شهر 10

ومعروفه في الصيف لاتغرب الشمس عنها وبالشتاء يكون العكس ظلام دامس

وتتميز في الشتاء بالشفق القطبي

النرويج تحتاج فيزت الشينجن


سلبياتها

1- انه اغلب شوارعها تكون في الجبال واذا ممتمرس في السواقه فصعب انك تسوق

وخصوصا انه الشارع واحد والسرعه ماتتجاوز 80 و90

والمسافات بين المناطق كبيره وطويله بالساعات ، طبعا حسب المناطق

ممكن وحده تبعد ساعه والثانيه 5 ساعات أو أكثر هذا يعتمد ع حسب موقعك

2- النرويج تعتبر من البلدان الغاليه مقارنه بأوروبا

خاصه في المطاعم والضرائب

3- الاكل صعب وان وجد يكون غالي والمطاعم الحلال موجوده في المدن الكبيره

والافضل انه تعمل حسابك انك تطبخ وفي هاي الحاله لابد يكون سكنك في

أكواخ أو شقق أو بيوت

4- الشوارع الضيقه في الجبال

5- كثرة الانفاق فيها

6- أغلب الارياف خاليه من البشر

7- عدم وجود أماكن ترفيهيه للاطفال

8- لما تسافر النرويج مب بسهوله تقدر تزور بلد ثانيه قريبه منها مثل باقي دول أوروبا


ايجابياتها

1- مافيها عنصريه واي شخص هو حر في لبسه وشكله يعني

المنقبات والملتحين لايحاتون هالشي

2- اغلبهم يتكلمون انجليزي فهي تعتبر اللغه الثانيه

3- تتميز بالاماااان

4- التخييم في أي مكان والشواء مسموح عند الانهار والبحيرات بس طبعا تراعون النظافه

5- فيها الكثير من الانشطه اللي ممكن تقوم فيها

6- الشعب النرويجي شعب مبتسم ومسالم ومتعاون



اليوم الثالث

منطقة ALESUND

ALESUND

عمرها 100 سنه وتحيط بها عدة جزر متصله في بعض وتقع في الشمال الغربي من النرويج

وبها مطار اسمه VIGRA

ويوجد طيران يومي من العاصمه اوسلو

وتبعد عن جرانجير GEIRANGER ساعتين وعن أولدن وسترين ساعتين ونص

الاماكن السياحيه الموجوده فيها

1- فيها تله مرتفعه لها مطل ع القريه وفوق مطعم

اسم المطل

Aksla Utsiktspunkt

2- أكواريوم واسمه

Atlanterhavsparken alesund akvarium

3- مزرعه أسمها

Ytste-skotet

4- بحيرتين وسط الجبال وهاذيل فيهم مباني مطموره

NORANGSDALEN (( THE queens route ))

هاي المنطقه من أضيق الوديان في النرويج

متحف الكنز

Exhibition : therunde treasure , bird mountain

and silver of the sea

5- شلال وقريب واسمه

Dynjafossen waterfall

Gudbrandsjuvet

6- جزيره فيها بط غريب شكلهم وطيور مهاجره والجزيره جبليه
اسمها

Rundebranden

7- جوله في الباص السياحي

8- جوله بالقطار السياحي

9 - الكياكي
​

تفاصيل هذا اليوم

الوصول الساعه 10 الصبح الى منطقة ALESUND

وآخر صعود للسفينه بيكون الساعه 4 ونص

هاي بدون قروب سياحي وبنيلس فيها 7 ساعات

أحداث هاليوم

بالنسبه للجو في النرويج


قبل لانسافر باسبوع كان ولد أخويي راجع من النرويج وخبرني

انه الجو وايد بارد وغيوم وأمطار ووصاني ناخذ شتوي

وانا كنت أشوف درجة الحراره 18 أو أقل شويه فقلت الجو حلو ومب بارد وايد

لكن لما خبرني هو قلت يمكن النرويج غير جوها

قمنا حطينا أغلب لبسنا شتوي وقليل صيفي وهذا كنا شالينه حق هامبورغ

وهاللبس هو اللي نقذنا

وهناك كان الجو تعيس من سرنا نحن والدنيا كلها مشمسه وشمسهم حاره

وهاي من الامور اللي تناحست ويانا وضيقت خلقنا

واللي يقهر في السفينه قبل لانوصل هاي المنطقه قال الكابتن في الميكرفون

انه انتوا محظوظين لأنه الجو جميل ومشمس

والاجانب فرحانين

ونحن ماغطين بوزنا شبرين

نتابع معاكم

نشينا بدري وتريقنا في البوفيه

يامحلات الزيتون مالهم لذيذ ووملحوته قليله

نتريق وجدامنا ملامح قرية اللاساوند

وطلعنا من السفينه

المطلوب عند خروجك انه بطاقتك تكون معاك وأقصد بطاقة الغرفه

وفي المجله الاخباريه مكتوب وين المخارج

ولاتنسون العوده الساعه 4 ونص

ونحن طالعين خذيت معاي جوازاتنا وبطاقة فيزا وجزء من الفلوس والباقي تركته في الخزنه

في العاده ماآخذ جوازاتي معاي بس في رحلتنا هاي بالكروز

فكرت انه أفضل تكون معاي عشان لو صار وتأخرنا عن السفينه لأي سبب وراحت عنا ممكن نلحقهم ع المنطقه الثانيه


وبعد احتياط مصوره ع الفون برنامج الرحله

فأعرف التوقف الثاني وين بيكون ومتى

ياحسره ع بلكونتنا

أول ماطلعنا من السفينه شفنا جدامنا خيمتين

وحده حق باص سياحي يجولنا في المدينه


والثانيه قطار سياحي

قلنا أول شي بنسير نصرف

وهنيه بعد بوعيسى كان له موقف وبسببه تبهدلنا

قبل لانسافر وانا أقوله صرفنا فلوس بالكرونا النرويجيه

وهو يقول

مافي داعي أكيد في السفينه بتحصلون صراف

ولما صعدنا ع السفينه دورت صرافه وماحصلت

وفي هاليوم تبهدلنا لين قدرنا نصرف

أول شي

سرنا مول ندور محل صرافه ومال الفونات عشان نشتري بطاقات

ولمادخلنا المحل وطلبنا نصرف قال أنا ما أصرف

ودخلنا محل ثاني عطانا بطاقات الفون وفيها بكج

ولكن ترددنا نآخذها قلنالها بنفكر

وقابلنا وحده سوريه مقيمه وجزاها الله خير ساعدتنا

سألناها

عن أفضل شركه ناخذ منها البطاقات مع خدمة النت

وخبرتنا عن شركة My Call


وقالت بتحصلونها في سوبرماركت سفن الفن

ودلوني عن مكان التصريف وقاللي برع المول

طلعت مع بناتي أدور محل التصريف

وكل ما أسأل يوصفولي المكان

شفنا مطعم هندي في السنتر

مشينا وايد وفي الاخير طلعلي المكتب السياحي للمعلومات

استغربت شو علاقتهم بالتصريف

وانتظرت دوري ولما سألتهم قالوا

مانصرف هنيه ودلتني بالضبط المحل اللي يصرف

وتخيلوا كان هذا المحل قريب أول مادخلنا السنتر

ورجعنا نمشي مسافه لين وصلنا لمحل السوفينيير وطلع هو اللي يصرف

صرفنا جزء من اليورو

وطلع علينا اليورو = 8 كرونا

وعقب سألناهم عن سوبرماركت سفن الفن ودلونا

السنتر وايد حلو والمكان وايد جميل بس الجو تعيس وشمس وشمسهم قويه

المهم اشترينا البطاقات وهاي اسعارها

سعر السيم كارت = 49 كرون

سعرGB1

= 69 كرون

كل وحده منا خذت 2 GB

وخذينا وقت طويل لين خلصنا هاي الشغله

وبردنا ع عمارنا بماي بارد واذكر الماي كان وايد غالي ممتذكره كم بالضبط

يمكن الدبه الصغيره بشي وعشرين درهم

بعد ماخلصنا رجعنا عند الخيم عشان نحجز الباص السياحي

وكنا فرحانين انه اشتغلت الخدمه

وتخيلوا شكلنا

كل وحده منا عينها في فونها نمشي ونعبر شوارع لين وصلنا للخيم ههههههههه


عافانا الله مب شايفين خير هههههههههههه

ملاحظه مهمه

الواي فاي في السفينه ماكان مجانا ولا في أي مكان في السفينه

الا اذا كان عند قوم VIB

والمشكله انه الاشتراك وايد غالي

يعني الساعه كانت 17 يورو تقريبا 80 درهم

الصراحه وايد مبالغ


والبنات الله يهداهم مرتين أجروا الواي فاي من السفينه من مصروفهم


ولاكانوا يرضون يعطوني دقيقه

يقولولي اذا تبين أجري بروحج ماما

كله هذا عشان مارضيت أشركهم ع حسابي هههههههههههه


وانا مره


كنت أبا أكلم بوعيسى ضروري



وهذا من غير انه الارسال أحيانا يقطع نهائي حسب المنطقه اللي نمر فيها




يتبع ...



​

 

[جودى]

نكمل معاكم تفاصيل يومنا

سرنا الخيمه الخاصه بالباص السياحي

وحجزنا


طلع علينا 200 كرون للشخص

خبرونا انه موعد الباص الياي بيكون عقب ساعه

وعقب تحسفنا انه ماخذنا القطار والسبب

انه أحلى وأونس وأرخص وبيمر تقريبا ع نفس الاماكن


وكان بيتحرك بدري ومابنتريا مده مثل الباص

الخط الاحمر هي الاماكن اللي بيمر فيها القطار

المفروض كنا نشوف الخيارين وعقب نقرر مب ع طول نحجز

لما شفنا انه عندنا وقت قررنا نرجع السفينه ونضبط عمارنا ونرجع قبل مايوصل الباص بشويه

معلومات عن الباص

رجعنا عند موقف الباص وانطلقنا

أول محطه اخترناها هو المطل

Aksla Utsiktspunkt​

وشفنا القطار واصل نفس المكان

الفيو من فوق

لو الجو مغيم جان الدنيا غير


سفينتا

المطعم واليلسات اللي فيه

ولابد انه نبرد ع عمارنا

وعقب ماتمينا فتره فوق

رجعنا ركبنا الباص مره ثانيه

ولما وصل السنتر عدال المكتب السياحي نزلوني البنات وقالوا

بنسالهم عن تأجير السياكل

لكن ماحصلوا فسألوا عن الكاياك Kayak

الصراحه انا عقب تضايقت اني سمعت كلامهم ونزلت

لانه حرام دفعنا هالمبلغ حق الباص السياحي ومانزلنا الا منطقه وحده

وعقب ردينا وين ماكنا الصبح

كان الاولى نكمل ويا الباص ونشوف المنطقه

لكن الله يهديهم ماعطوني فرصه أفكر

ع العموم سرنا ندور وين يأجرون الكاياك

حصلناه

وهم ركبوا القوارب ونسيت بكم أجرناها

وانا سرت أدورمطعم قريب منهم وأقدر أصورهم

طلبت شوربه لين خلصوا البنات

وعقب ماخلصوا تيلسنا نسولف

وعقب شفنا انه لازم نرجع السفينه خلص الوقت

والحمدالله السفينه قريبه منا

وقتها ماكنت متضايقه كنت مبسوطه لفرحتهم ووناستهم وماكدرني الا الجو شويه

عقب مارجعنا السفينه وريحنا شوي ع الساعه 7 سرنا المسرح نحضر الشووو


وكان هاليوم هو اليوم الاسباني

الشو كان أسباني والاكل في المطعم كان أسباني

وعقب ماخلص سرنا المطعم وتعشينا



وهنيه صارلي موقف

تعرفون الاسبانيين مشهوريين بأكلها اسمها بايلا بفواكه البحر يعني بالسي فود

وكانوا حاطين صينيه كبيره فيها هاي الاكله

وحطيتلي منها شويه وكنت بروحي

يلست أتغدى وكنت توني مآكله لقمتين من البايلا وكانت لذيذه وااااايد

شوي واللي يايين البنات وفي ايدهم أكلهم وبنتي لما شافت طبقي


قالتلي

ماما هذا فيه خنزير

عصبت وقلتلها

ماتشوفينه انه كله سي فود

قالت


انا كنت بغرف منه وجان أقرأ انه في خنزير

تنرفزت وسرت أتأكد بنفسي

وفعلا طلع فيه خنزير

يعني ليش يخربون الاكله علينا

كانت وايد لذيذه

وعقب تمشينا ويلسنا نصور ورغم الوقت متأخر الا انه الدنيا منوره

ماكانت الدنيا تظلم وهالشي وايد حبيته

عقب يلست ويالبنات في المطعم

وفليل بعد ماينتهي العشاء يعني من بعد 10 ونص يكون هادي وشويه ناس فيه

نآخذ زاويه أنا والبنات ونيلس نلعب بألعاب نحن يايبينها

ونتسلى بخفايف آخر الليل

والعيايز اللي حوالينا يبتسمون لنا

والموظفين مبسوطين علينا


الصراحه كنا مسوين جو

وعقب رجعنا غرفنا ونمنا أحلى نومه


على طاري النوم في السفينه

الحين عرفت ليش اليهال كانوا يرقدون يوم نهزهم شويه شويه

كنت أحس وانا حاطه راسي ع المخده كأنه حد يهزني بهدوء

كأني ع سرير طفل بس تدوخون وترقدون

هههههههههههههههههههه

كان حلو

موقفي مع بوعيسى عشان التصريف

لما رجعنا السفينه وخبرت بوعيسى عن بهدلتنا حق التصريف

وطبعا لومته

قاللي المفروض انه فيه تصريف في السفينه

سيري واسألي الرسبشن

يوم سالتهم


طلع صح عندهم وسعرهم افضل لأنه بدون فايده

انزين ليش مايخبرونا ، أكيد في ناس شراتنا مايدرون

والا يمكن كانوا موضحينه في الاوراق اللي عطونا ياها وانا ما أدري

ع العموم هالميزه موجوده في السفينه

وبوعيسى يافرحته يوم عرف انه موجود قال

شفتي ماقلتلج

قلتله انته قلت صرافه وماشي صرافه

موقفي مع الواسطه الكبيره

تذكرون مشكلة الرحلتين اللي خسرتهم

اليوم بخبركم كيف حليتهم


في هاليوم لما سرت أشيك ع حجوزاتي للرحلات اللي حجزناها بالنت

خبروني انه مموجود حجزنا ووقتها ماعرفت السبب

وحاولت أتدارك الموقف وأحجز اللي أقدر عليه من الرحلات

وخبروني انه رحلتين مابقدر أحصلهم

الرحله الاولى

وهي رحله بالباص لمشاهدة القباقيب العملاقه وهاي مدتها أعتقد 3 ساعات

والرحله الثانيه والاهم وهاي مدتها من 7 الى 8 ساعات في جرانجير

ومنها بنركب قطار وفيها وايد أشياء جميله

حاولت معاهم بس ماشي فايده

عاد طلعت من عندهم وأنا ماغطه بوزي شبرين وشويه وبصيح

حزينه ومكتئبه

وأمشي وانا مب في حاسيتي

كنت وايد مقهوره وحزينه وأحس الاشياء الحلوه ما أحصلها

أول شي الغرفه والبلكونه التعيسه والجو والحين الرحلات اللي أباها

وأنا أمشي ييت صوب محل العطور وكان بالصدفه عثمان المغربي

واقف برع المحل ومن شافني ع طول سألني

شوبلاج ليش زعلانه

انا من النوع اللي يبين علي الحزن والزعل ما أعرف أداري

عاد من سألني ماصدقت أني حصلت حد أكلمه خصوصا بناتي ما أعرف وينهم

ومانقدر نتواصل ماشي ارسال

وانا كنت في وضع تعييييييس ونفسيه خايسه

فضفضتله وخبرته عن مشكلتي وشويه وكنت بصيح جدامه

بعد هو ماقصر دار ويايي وعصب عليهم وقال

مب ع كيفهم اذا انتي حاجزه وهذا حقج

وعطاني أحلى فكره

قاللي

كلمي مدير السفينه وهو المسؤول عن كل شي وعطاني أسمه ورقم تحويلته

ونحن نرمس فجأه ركض ودخل المحل

وأنا مب فاهمه السالفه واركض وراه ههههههههههههههه

أقوله شوبلاك

قال هذاك هو المدير

وكانت عنده جوله تفقديه

وقاللي سيري وراه وكلميه

سرت وراه وشفته يرمس وقفت أترياه يخلص كلامه

هو لاحظ اني أنتظره ع طول التفتلي وياني

سلمت عليه وقلتله انته فلان

قال نعم

قلتله انا عندي مشكله

قاللي شو مشكلتج

خبرته انه زوجي حجز بالنت الرحلات اللي نباها وهنيه يقولولي انه هاي الرحلات ممحجوزه

وقلتله عندي ورقة الحجز وراويته ياها

ع طول من شاف الورقه قاللي

زوجج حجز وماكمل عملية الحجز

يعني هو اختار الرحلات وحطاهم في سلة المشتريات وماكمل لين الدفع

عاد أنا وقفت فاجه حلجي ومبققه عيني وقلتله

What

في خاطري هاتولي بوعيسى حيا أو ميتا

طبعا الدخنه تطلع من راسي ومن اذنيه من الغيظ اللي فيني

بس ماسكه نفسي ومب عارفه شو أقول

اللي قهرني انه بوعيسى في هاي الامور شاطر وأحسن مني مليون مره

وأنا واثقه فيه لدرجة ما أراجع وراه

المهم أنا بسرعه تمسكنت جدامه وقلتله

انا ما ادري وهو معتقد انه حجزه صحيح ونحن يايين هاي الرحله بدون زوجي ولا أي ريال معانا

وأول مره في حياتي أسافر ع كروز

واذا مابحصل هاي الرحلات معناته انه سفرتي هاي كلها اختربت

وشويه وبصيح جدامه

ماسكه نفسي غصب

كسرت خاطره وقاللي

لاتحاتين بتروحون كل الرحلات اللي تبونها

زين ماحبيته ع راسه هاذيج الساعه

صدق انه طلع نشمي

ع طول اتصل في الموظفه اللي في المكتب السياحي وخبرها انه تعطيني الرحلات اللي اباها

وعقب قاللي سيري عند فلانه وبتخلصلج شغلج

شكرته وايد

ومره من المرات تصادفت وياه في السفينه وكنت مع بناتي

يانا وسلم علينا

وعرفته ع بناتي وسألني

اذا اموري طيبه وشكرت مره ثانيه

أنا رجعت عند المكتب وسالت عن البنت اللي خبرني عنها

وطلعت هي اللي قالتلي فل

بس هاي المره المعامله غير

رحبت فيني ويلستني ع القنفه وتعاملت ويايي كأني شيخه

وانا أقول في خاطري


بعد الاجانب عندهم هالسوالف

المهم قالتلي

شو اللي تآمرين فيه طويلت العمر ههههههههههههههههه

قلتلها أبا رحلة القباقيب اللي في الباص

قالت تم

وقلتلها

أبا رحلة فلام

قالت هاي الرحله فيها مشكله

صاير حادث كبير في قرية افلام وموقفين القطار وننتظر منهم خبر

وقبل مانوصل بيوم لهاذيج المنطقه بنتأكد من الخبر

اذا فتحوا المجال بتكونون فيها واذا لا بتتكنسل نهائي

وحجزت بدالها رحله طويله احتياطي بدل هاي في حالة لو ماسمحولنا
عاد لما نوصل هاذيج المنطقه بخبركم شو اللي صار

عقب ماخلصت وياها طلعت فرحانه من عندها وشفت البنات في ويهي


قلتلهم

انتوا وينكم أنا عشت وضع صعب بسبب

ويلست أخبرهم بالسالفه كلها ونحش في ابوهم ونتحرطم

وعقب كلنا سرنا عند عثمان وشكرته واشترينه منه وايد عطور

اليوم الثاني اللي قضيناه في السفينه

هذا اليوم قضينا في الراحه والاسترخاء والاكل


واليوم كان اليوم الايطالي

الشو في المسرح ايطالي والاكل ايطالي


بعد ماتريقنا

البنات ساروا يأجرون العاب ويلعبونها



وأمهم عايشه جو ثاني بروحها

وقت الغدا نتجمع في المطعم وعشان اليوم ايطالي فكانوا مسوين أصناف متنوعه من الباستا

قسم الساندويشات موجود كل وطول اليوم بس يكون متنوع

الفواكهه والحلويات طول اليوم وتكون متنوعه

شوف كيف الزحمه

زاد وزنا في هاي الرحله من كثر المغريات


وعقب كم يوم يوم شفت الوضع جيه قمت أسوي كونترول ع عمري

ودايما عندا بزار في الايام اللي تبحر يوم كامل وساعات في أيام ثانيه

وداما عندهم خصومات وعروض

ومحلات متنوعه عندهم

وساعات نتجول في السفينه

وساعات نتيلس في اللوبي ونتفرج

مرينا ع المكتب السياحي خذينا تذاكرنا حق باجر

سرت الجيم بروحي وسويت رياضه ع الاجهزه ولكن شديت ع نفسي وايد


وأنا ماعندي لياقه وطلع عليه ثاني


في الجزء الياي بخبركم شو صارلي

حضرنا الاستعراض الايطالي في المسرح

وفي أوقات أيلسها مع نفسي وأقرأ في كتاب

والحلو انه الدنيا ماتظلم


هالمنظركان وقتها 11ونص فليل

تابعوني في الجزء الخامس

واليوم 5 من رحلتنا الى قرية Honningsvag

​

​

 

[جودى]

الجزء السادس في اليوم 5

ورحلتنا الى

HONNINGSVAG

الوصول بيكون الساعه 3 الظهر

المغادره بتكون الساعه 2 عقب نص الليل

لازم الكل يكون في السفينه 1.30 بالليل

طبعا أنا من أول يومين مرتبه حجز كل الرحلات لكل لمناطق وحق هاي المنطقه

كنت حاجزه لها 3 رحلات ولكن الغينا وحده وتمينا ع ثنتين


الرحلات الثلاث

ا- جوله في المدينه ع دراجات ام 4 تواير

وهاي تكنسلت لانه طلبوا رخصه لقيادة الدراجات

خساره كنا متحمسين انا والبنات نركبها

2- رحله للقباقب العملاقه

KING CRAB SAFARI BY BUS

سعر الشخص الكبير = 115 يورو

والطفل = 82.90 يورو

3- رحله الى North Cape

سعر الشخص الكبير = 75 يورو

والصغير = 55 يورو

هاي أوقات الرحلات الثلاث

حسب المبين في الورقه انه الرحله الثانيه هي رحلة القباقب بتكون

من الساعه 7.5

والعوده الساعه 9.45 المساء

والرحله الثالثه وهي لكيب نورث بتكون من

الساعه 10.5 الى الساعه 1.45 عقب نص الليل

لاتحاتون انه الوقت متأخر كأنه المغرب ماتظلم عندهم أبدا وهذا أحلى شي


تفاصيل هاليوم

صحيت بدري قبل البنات

واليوم الجو مشمس

تجهزت وسرت اتريق عنهم

شاله ويايي حليب رينبو

لازم شي يقند الراس ومايقنده الاالكرك

عقب الريوق أيلس حق تأملاتي وسرحاني ههههههههه

هدوء وتأمل واسترخاء

وايد خذينا راحتنا لين وصلنا القريه الساعه 3

موعدنا مع القروب لرحلة القباقيب الساعه 7 وربع

يعني عندنا 4 ساعات نقضيها في القريه

قلنا بننزل نتمشى فيها ونستكشفها

أول مانزلنا سرنا للمكتب السياحي عشان نسأل عن الانشطه والاماكن اللي ممكن نزورها

شفنا انه المنطقه مافيها الكثير واشهر الاماكن فيها هي اللي حاجزين فيها

قررنا نتجولنا ونتمشى فيها ، بس اليوم عندي شعور بالالم في ريلي

وأحس كأنه فيني شد عضلي ومب قادره أمشي عليها عدل

تمشينا شويه

وشفنا هالمبنى جدامنا وفيه مكان مسواي من الثلج

مثل كهف ثلجي مسمينه أيس بار

قررنا ندخله

أول مادخلنا كان فيه محل يبيع هدايا اشتريت من عندهم بته يعني ورقه عشان نلعب فيها

وحجزنا تذاكر ودخلنا الايس بار بس نسيت كم دفعت

بعد ماندخل في هاي الغرفه يلبسونها بالطوا عشان نتحمل البروده

بس صدق يدفي

يلا ناخذ جوله فيه

كل جزء منه مهيأ للتصوير

مثلا هاي الزلاجه كنا نيلس عليها ونتصور

المكان وايد صغير

كهف من الثلج تدخلون داخله وتتصورون

قدمولنا عصائر مجانيه

عقب ماخلصنا حسيت اني تعبانه من ريولي ومابغيت أمشي وايد عشان ما أرهقها

فقررت أرجع السفينه والبنات قالوا بيتمشون شويه وبيرجعون بعدي

رديت السفينه أريح لين موعد الرحله مع القروب

البنات تمشوا في القريه وحصلوا متحف تاريخي وقرروا يدخلونه

وبعد ماخذوا لفه فيه ماعجبهم وعقبها رجعوا السفينه

وظلينا مع بعض لين موعدنا مع القروب

كنت متضايقه وايد في هاليوم ومن وايد اسباب

اولها ريولي اللي احسها مب طبيعيه صحيح هي ماتألمني وايد

بس أحس اني مب قادره أمشي عليها عدل فكنت أعرج وانا وامشي

والسبب الثاني القريه كيئبه ومافيها شي وأقول في خاطري هاي النرويج

هاي ثاني منطقه أمر فيها وين الجمال اللي بشوفه في النرويج

والسبب الثالث كان موضوع خاص مضايقني


وهذا كله تيمع عليه من عقب ماطلعنا من السفينه
كان يومي نكد والحمدالله

تابعوني في تكملة هاليوم

​

​

​

 

[جودى]

نتابع تكملة اليوم 5

رحلتنا مع القروب

كان التجمع في الدور 7 في كوفي

أنا سرت بدري مع البنات وطلبنا هوت شوكليت

عقب يونا وعطيناهم التذاكروعطونا الستيكرات وهاي نلزقها علينا بحيث انها تبين

وهالرقم اللي في الستكر هو رقم الباص

عقب ماتجمعنا طلعنا برع السفينه عند تجمع الباصات

وركبنا الباص والباص عليه نفس الرقم اللي ع الاستكر

بالنسبه للكراسي


كل واحد يختار الكرسي اللي يباه وفي حالة نزلنا في أي مكان كل واحد يرجع مكانه

انطلقنا في أول رحله لنا ونحن كلنا حماس

تذكرون وين رحلتنا اليوم ؟

عند القباقيب

وصلنا للمكان المطلوب ولكني تفاجأت

انا كنت متوقعه بنسير عن شاطئ البحر وبنشوف القباقب وهي تطلع ع الشاطئ

ما أدري ليش كنت راسمه في خيالي هالمشهد

الواقع

وصلنا عند النهر او بحيره ما أدري شو أسمها وعدالها كم بيت وخيم

ودخلنا بين البيوت لين وصلنا لجسر

ولقينا بعض السياح هناك وشفنا القباقيب الكبار والناس تتصور معاها

نحن بعد يلسنا نتصور وسوينا أفلام غير عن الناس

تعرفون عاد بنات شربت يوم انهن يشلن قباقيب كبار وتنغز


هههههههههههههه

عقب ماخلصنا تصوير وعرض

قاموا يطلعون القباقيب من الاحواض ويقطعون القباقيب بكل قسوه جدامنا

الحرمه كانت مجرمه وهي تقطعن

عقب جمعونا ويلسونا في خيمه

ووقتها لكنت أعري ( أعرج ) وأنا أمشي لازلت أتألم

كان الجو بارد واليمعه في الخيمه حول النار دفتنا

ومثل ماتشوفون الجدر اللي يطبخ في الوسط هذا فيه القباقيب كانوا يسلقونها

عقب دخلت المرشده ويلست تعطينا معلومات بس أنا كنت في وادي ثاني وما أدري شو قالت

يمكن كنت أفكر متى القباقيب بتخلص وبآكلها

هههههههههههههههه

لأنه الطبخه بتطول والمرشده خلصت رمستها

طلعنا من الخيمه والكل سار يتمشى

الا انا يلست ع الكراسي اللي برع عشان ريولي ممساعدتني أمشي وايد

كانوا عدالي أجانب وبدأوا يفتحون ويايي حديث وعرفت انهم يهود

وكانوا متخوفين اني آخذ موقف ضدهم

ولكن انا تصرفت معاهم عادي وسولفت شويه ويا


هم وعقب قمت عنهم اجر ريولي وامشي صوب بناتي

وبعدها نادونا ودخلنا الخيمه عشان يوزعون علينا القباقيب

وكانوا البنات اللي يشتغلون يحضرون الاطباق ويجهزولنا الوجبه

صحن فيه ليمونه وخبزومايونيز

وعقب وزعوا علينا صياني خشب كل واحد منا حاطاها ع ريوله

عقب وصلت صواني القباقيب المسلوقه

عاد أنا قلت في خاطري شكله يلوع الجبد ما بآكل منه

عاد استحيت أرده وقلت بتذوق شوي منه


من تذوقته ماتتخيلون كيف كان لذيــــــــــــــذ


والجماعه ماقصروا كل شوي يمرون علينا بصينية القباقيب اذا حد يبا زياده


ونحن وكل الموجودين كل شويه ناخذ ونآكل الصراحه ماينشبع منه وهم بعد كانوا مسوين وايد


وعقب ماخلصوا انتظرنا برع لين يوصل الباص

عقب شرف الباص بعد ماجمدنا من البرد

انطلقنا بالباص الي نورث كيب


انطباعي عن الرحله

كانت حلوه وتجربه يديده علينا بس كنت أتوقعها أحلى من جيه



تابعوني في الجزء الاخير من هاليوم

والحادث اللي صارلي

​

​

​

 

[جودى]

نتابع الجزء السادس من اليوم 5

والرحله الثانيه مع القروب الى

نورث كيب

معلومات عنه

هو جرف الجبل الحاد واللي يرتفع 307 متر فوق المحيط المتجمد الشمالي

ويمثل نقطة النهايه للقاره الاوروبيه

وهو رأس الشمال النرويجي يقع في أقصى شمال النرويج​

على شواطئ جزيرة ماغرويا


ضمن بلدية نوردكاب Nordkapp في مقاطعة فينمارك


وهو الزاوية الشمالية القصوى في أوروبا


. الطريق الأوروبي E69 السريع ينتهي في محطة رأس الشمال النرويج


حيث يعتبر نقطة جذب سياحي


في الشتاء تكون المناظر خلابه من هالمنطقه ورؤية الشفق القطبي الشمالي


وفي الصيف ممكان مشاهدة الشمس بعد منتصف الليل​

​

موقعهم السياحي

Nordkapp


تفاصيل هاليوم

بعد ماخلصنا رحلة القباقيب انطلقنا الى نورث كيب بالباص

في البدايه نزلولنا في مكان كان فيه محل مسواي من الخشب ويبيع سوفنيير

وبرع المحل كان واقف واحد من القبائل المعروفه عندهم مع حيوان الرنه والناس تتصور معاه

نزلنا وانا لازلت أعرج بريولي

بالنسبه لريولي والمها

حبيت أخبركم عن موقع الالم وين بالضبط في ريولي ؟

الله يسلمكم تعرفون المنطقه بين القدم والركبه من ورا

نحن نسميها تبانه وحد يسميها بطه

المهم الالم في العضله اللي في هالمكان وكانت في الريل اليمين

هذا المحل اللي دخلناه بس انا مادخلته ماكان لي خلق

مشيت لين حيوان الرنه

الله لايشممكم ياه كانت ريحته خايسه

يادوب صورت شوي ورجعت صوب الباص

وانطلقنا الى


نورث كيب أو كيب الشماليه

نمر ع بحيرات ومناظر طبيعيه

وصلنا نورث كيب والكثير معانا من الباصات السياحيه

بركن الباص وبدت الناس تنزل


وهنيه صارلي الموقف أو الحادث


اللي عكر مزاجي لباقي اليوم

وأنا نازله من الباص وتوا بنزل ريلي ع السلم جان أصرخ جدام الناس

حسيت كأنه شي انقطع في ريولي من مديتها عشان أنزل


سبحان الله نفس الشي صارلي من سنوات في لندن

ومن صرختي وقفوا كل الناس اللي حواليي يطالعون شوفيني

انا تجمدت مكاني من الالم لا أنا قادره أرد ورا ولا أنزل

وعقب ساعدوني الناس أنزل من الباص وتميت واقفه فتره أتألم


والناس متعاطفه ويايي بس مب عارفين شو يسوون

مسكوني بناتي ومشوني لاقرب كرسي ويلست

عاد كسروا خاطري بناتي اني خربت عليهم الطلعه


فقلتلهم انتوا سيروا تمشوا ويا الناس وصوروا وانا بيلس هنيه أترياكم

بعد اصرار مني هم راحوا

أنا ظليت مكاني أكسر الخاطر وعيني ع المكان اللي الناس تمشي فيه


خاطري أشوف اللي يشوفونه

بعد شويه قررت أغامر واسير صوبهم وما أضغط ع ريولي في المشي

عاد هنيه ماتتخيلون كيف مشيت بصعوبه وكيف كنت اسحبها سحب

وشوي امشي وشويه أوقف أريح وأتألم

ووصلت عند السياج وهم بعدهم الناس بعيدين عني

شوفوا هم وين وأنا وين

يلست اصور وارتاح وعقب قلت بكمل صوبهم

عقب كملت سحب


والبنات طبعا ما أشوفهم وأكيد هم في هاك المكان يصورون ويتصورون

تقربت شوي

أنا مسويه زوم ولا أنا بعدني بعيده عنهم

شفت اني مابقدر اكمل

ريولي وايد تالمني وامشي بصعوبه

لما شفت حالتي جيه قررت أسير صوب الكوفيهات


الحلو في المكان انه فيه

مبنى كبير فيه

كوفيهات ومطعم واظن بقاله ومتحف وحمامات ويلسات حلوه تطل ع المكان

ومحل يبيع هدايا وأعتقد فيه مصلى ممتأكده بس قريت عن هالشي

اتصلت ع بناتي وخبرتهم اني أترياهم في الكوفي


وانا يلست في الكوفي ورفعت ريلي ع كرسي ثاني وظليت أنتظرهم

عقب يوني البنات ويابوا بعض الحلو

الحلو ماكان حلو ماعجبنا

بعطيكم بعض الصور من تصوير البنات وحركاتهم للنورث كيب

عقب رجعنا الباص وطبعا بناتي ماسكيني فديتهم

ودايما اذا ينزلولنا اي مكان يخبرونا متى نكون في الباص

ورجعنا السفينه وكان الوقت جدا متأخر عقب نص الليل

عالم صايعه ههههههههههههههه

شوفوا السماء كيف منوره بالليل كأنه المغرب

انطباعي عن الرحله

المكان يستحق الزياره


بسبب ظروفي الصحيه ما استمتعت فيه ولاشفت المكان عدل

أعتقد المكان يباله زياره قبل المغيب وعقبه عشان تستمتعون بالمناظر

بالاضافه انه المبنى فيه الكثير بس نحن ماشفنا شي

وحليلهم البنات من دخلوا المبنى انشغلوا فيني وماتمشوا فيه

وبعد مابركن الباص في المكان المخصص لهم والقريب من السفينه

قالتلي المسؤوله تبين كرسي متحرك

يا الله ماتتصورون كيف فرحت بهالاقتراح قلتلها ياليت

وانتظرت لين ماطرشولي من السفينه موظف معاه الكرسي


ركبوني فيه ودزاني لين باب الغرفه في السفينه

وكانت معانا مسؤوله من السفينه

في البدايه كنا نبا نسير العياده في السفينه ولكنها مسكره في هالوقت


وقلتلهم خلاص باجر الصبح بسير

وأول ماوصلت الغرفه طلبت ثلج لرولي


وشرحتلهم ليش ابا ثلج عشان اييبولي كميه

فلقيتهم يايبين لي ثلج محطوط في كيس وجاهز للكماده

ويلست فتره أسوي كمادات بالثلج وعقب خذيت حبه للعضلات مع مرهم خاص للعضلات

وكنت أفكر كيف بتكون حالتي باجر وكيف بقدر استانس باقي الايام




تابعوني وبتعرفون شو صار في ريلي

وكيف قضيت باقي رحلاتنا

في اليوم 6

​

 

[جودى]

الجزء 6 واليوم السادس

اليوم بنزور مدينه أسمها

ترومسو Tromso

معلومات عنها

المعلومات جمعتها من أخونا elr7al من الانستا


تقع ترومسو في منتصف منطقة الشفق القطبي ( أضواء الشمال )


وأفضل وقت تشوفونه بوضوح بيكون في ( 12 و 1 ) ويستمر الى شهر ابريل

بالليل تتزين المدينه بالانوار ولاتجد بيت واحد يطفئ الكهرباء في بيته

تتوفر في المدينه محلات المسلمين واللي يبيعون لحوم مذبوحه ع الطريقه الاسلاميه


وفيها مسجد ومركز اسلامي




من الامور المهمه اللي لازم نعرفها انه




الشمس تختفي من 26 نوفمبر الى 15 يناير


وفي الصيف لاتغرب الشمس عنها أبدا من 18 مايو حتى 26 يوليو


وتسمى بظاهرة الشمس منتصف الليل




وتكثر في المدينه الكثير من الفعاليات ومن هاي الفعاليات :



* ركوب زلاجات كلاب الهاكسي وتسمى Lapland


* ركوب زلاجات حيوان الرنه وهو من فصيلة الغزلان

* مشاهدة الحيتان في المحيط أو البحر النرويجي


* ركوب الهليكوبتر ومشاهدة ترومسو من أعلى


* ركوب طائره صغيره تاخذ جوله في سماء المناطق المجاوره والجزر


* جوله في المحيط لصيد الاسماك


* جوله في البحيرات المتجمده وممكن عمل دائره في وسط البحيره وتنزل خيط فيها وتصيد سمك


* فيها متاحف وممكن زيارة الجامعه التي فيها صاله كبيره تستطيع من خلالها


انك تشوف الشفق بالضبط اذا ماشفت الشفق بعينك


* استئجار الدرجات الثلجيه في وديان منطقة Lapland


* ركوب التلفريك ومنه تشوف مدينة ترومسو


* ركوب الخيل

سلبيات ترومسو ..


* غلاء المطاعم فيها


* برد شديد لأنها في القطب الشمالي




بالنسبه للسكن فيها


المدينه فيها فنادق 5 نجوم وأكواخ جميله وراقيه وأسعارها تبدأ من 400 درهم الى 900 درهم باليوم


ممكن من هالموقع تشوفون أنواع الاكواخ ومعلومات عنها


Hjem - Tromsأ¸ Camping

بالنسبه للمواصلات فيها ..

الافضل انك تستأجر سياره فيها

ولو ما أستأجرت فعندهم مواصلات متوفره وممكن ياخذونك للانشطه اللي فيها


تفاصيل هاليوم

تذكرون أمس يوم رقدت وانا كنت أتألم من ريولي

اليوم صحيت متأخره خصوصا انه أمس راقدين متأخر ولكن ولله الحمد اشعر بتحسن كبير في ريولي

اعتقد كمادات الثلج لها تأثير كبير في علاج تمزق الاربطه او العضله اللي في ريولي

بالاضافه للمرهم والحبه الخاصه لآلام العضلات

أصبحت أفضل ولكن ظليت أعري وانا أمشي


وانا سايره المطعم الصبح شافني الموظف اللي ينظف الغرف في القسم الثاني

وهوهندي وسألني عن حالتي وليش أعري وخبرته اني أتألم منها


قاللي انا بيبلج فكس فركي ريولج منه

قلتله أوكي وشكرته


وفعلا عقب شاف بنتي وعطاها ياه وحطيت منه ورجعته له قبل بيوم من نهاية الرحله

وصلنا مدينة ترومسو الساعه 1 الظهر

للاسف اني مارتبت اي رحله مع القروب ولعدة أسباب

اولها اني شفت فيها وايد انشطه وفكرت اني بنقدر نسير بروحنا وبيكون أوفر علينا

ولكن كنت غلطانه

والسبب الثاني انه الرحلات المقترحه اغلبها ماعجبتنا واللي عجبتنا كانت فل


وماحاولت فيها

السفينه رست في منطقه بعيده عن سنتر المدينه بـ 4 كيلو ولكن الحلو فيهم ولأنهم جدا منظمين

كانوا موفرين شاتل يوصل للسنتر برسوم 16 يورو للشخص

وموفرين وايد باصات


واعتقد كل ربع ساعه يتحرك شاتل


ومحددين لنا انه آخر شاتل للعوده بيكون الساعه 7 ونص

ياويله اللي بيتأخر

آآآه ع جو هاليوم تعيييييس

شمس وحر

في الاحوال الجويه مكتوب انه مشمسه جزئيا


أي جزئيا الا شمس تسطع ع خمرت راسنا لين نضينا منها

استغفرالله مب نحاسه فينا

تصدقون هاي المنطقه صوب القطب الشمالي والحر مايعرفونه


والشمس اذا تطلع في اشهر معينه ومعروفه هالمنطقه بشدة البروده

بس عشان نحن ييناهم انقلبت الاحوال عندهم حر وشمس من صوب


وريولي متعطله من صوب ثاني


صدق الحاله تعيسه والياي أتعس

ركبنا الشاتل ونزلنا في السنتر وهالمكان اللي نزلنا فيه هو مكان مواقف الباصات ( الشاتل )

أول مانزلنا سرنا المكتب السياحي عشان نسأل عن الرحلات اللي نباها

في هالمبنى الابيض المكتب السياحي

وكان مزدحم

لما وصلنا الدور سألناهم عن رحلتين نبا نسيرلهم

الاولى رحلة لحيوان الرنه وهناك فيه خيم وممكن نيلس في الخيم ويقدمولنا وجبه من لحم الرنه

والرحله الثانيه

المزالج اللي تجرها الكلاب


واعتقد في الصيف حسب ماخبرتنا الموظفه مانقدر نركب هاي المزالج بس نسير ونشوفهم

وفي الشتاء بس نقدر نركبها

النحاسه انه هالرحلتين ممتوفرات وطلعوا بدري


وقالت ليش ماخذيتوها مع القروب من السفينه

وعقب دلتنا ع مكتب وقالت جربوا يمكن تلحقون عليهم قبل لايسيرون

ونركض لين المكتب الثاني وشفناه مسكر وشفنا باص واقف


ونركض عندهم وسألناهم عن الرحله اللي نباها

وقالوا نحن آخر باص يطلع وتاسفوا انه فل

ورجعنا المكتب السياحيوسألناهم اذا نبا نسير القمه بالكيبل كار

لانه ماعندنا اختيار ثاني

خبرونا انه نقدر نشتري تذكرة الباص حق يوم كامل ونتنقل فيها


قلنا بنشتري التذكره وبنسير القمه بالكيبل كار


وعقب بنتجول بالباص في المدينه وممكن نوقف في مكان ثاني ننزل فيه

هاي تذكرة الباص

كانت قيمة التذكره بـ 90 كرونا للشخص

ورقم الباص اللي بيودينا للكيبل كار كان رقم 26

سرنا وين مكان توقف الباص ومشينا لين السنتر وعرفنا الموقف

والجو خايس

وصل الباص وركبنا فيه وركبوا معانا ناس بيسيرون نفس المكان


وأعتقد انه فيه منهم من كروزنا

نزلنا الباص قريب من الكيبل الكار

هنيه صارلي موقف عنصري

ونحن في الباص كانت في وحده كارهتنا يمكن عشان نحن عرب ومسلمين

لما نزلنا من الباص نزلوا معانا معظم اللي في الباص ومن بينهم هاي البنت

وكنا نمشي مع الناس اللي نزلوا وسايرين صوب الكيبل

وأنا أمشي مع بناتي وماسكه فوني فجأه طاح عني في الارض


فقمت التقطته بسرعه وحطيته في شنطتي

جان اتيني البنت ومدت ايدها تبا الفون


في البدايه مافهمت شو تقول

واتحسب ترمس عشان فوني طاح

وعقب فهمت منها انها تقوللي انه هالفون مب فونج


فقلتها فوني

وقالت حق وحده تمشي قريب منا انه هذا فونج عندها

ردت هاذيج وهي مستغربه وقالت

هذا مب فوني

قفطت هاي الخايسه وراحت بدون حتى ماتعتذر وانا مثل الهبله مب فاهمه شو السالفه

وعقب فهمت انه في وحده مضيعه فونها وهاي الخايسه لما شافت فوني طاح


وانا شلته بسرعه فكرته انه فون الحرمه وأنا سارقتنه

عاد اللي قهرني مب عشان بس ظنت فيني سوء وهو مايخصها


انما ما اعتذرت ومشت ولا كأنه صار شي

صحيح هي انحرجت جدام الجميع بس كانت صدق حقيره

يمكن حد يسأل :


ليش ماسويتلها مشكله وسكت

باختصار الشي اللي أقدر أطنشه أطنشه مب كل موقف بوقف عنده وبتضارب

لا أنا في بلدي ولاعندي وقت أضيعه مع هالاشكال

بالاضافه انه نحن بروحنا صبايا وما ابا مشاكل مع حد


نرجع لتفاصيل هاليوم

وصلنا عند الكبل كار وكان الجو شمس وحر ويلوع بالجبد

والاخيس انه الطابور طويييل لين شباك التذاكر

فديتهم بناتي كانوا هم واقفين في الطابور وانا يلست ع الكرسي بسبب ريلي

والناس اصلا تشوفني أعري ( أعرج ) وانا أمشي

هذا من غير انه وحده من بناتي فيها احتقان وتعبانه شوي

تقريبا انتظرنا ساعه ونحن فطسانين من الحر ونبا نشرب ماي ومافي حد عدالنا يبيع ماي

وعقب وصل دورنا وحجزنا التذاكر وكان الشخص ب 150 كرونا

عقب ماحجزنا كنا واقفين في الطابور بعدنا مادخلنا داخل المدخل


فصار هنيه موقف جميل ومعاكس للأولي

ونحن واقفين كانوا جدامنا عائله وحده مع زوجها وعيالها

لما شافتني واقفه قالتلي

تعالي ادخلي داخل يعني خلتني اتجاوز الطابور


لما طليت من الباب لقيت مثل يلسه واستراحه قبل الدخول للكيبل

شكرتها ودخلت ويلست

مسكينه كسرت خاطرها اني واقفه وهم يشوفوني اسحب اريولي فجدمتني ودخلتني

وعقب بناتي دخلوا ويلسنا ننتظر موعد وصول الكيبل

ودورنا حد يبيع ماي أو مكينه اللي فيها بارد اوماي وللاسف ماحصلنا

لو ندري الوضع بيكون جيه كنا أشترينا قبل لانركب الباص

كنت كارهه نفسي وكارهه الرحله وودي كنت أرجع للسفينه

وصل الكيبل وركبنا الحمدالله بعد معاناه

وصلنا القمه وشفنا جدامنا كوفي ويلسات

من التعب اول شي يلسنا في الكوفي وساروا البنات يشترون ماي وغيره

الغريبه انه كانوا حاطين جيك في ماي وكاسات بلاستيك ويقدمون الماي مجانا

في وقتها استغربت ممتعوده من الاجانب ع المجان كل شي عندهم بفلوس

المهم بنتي صبتلي ماي وشربته وكان باااارد ولذيذ

أول مره أشرب ماي طعمه حلو جيه


تحسون انه ماتشبعون منه ممثل ماينا من كاس واحد انتفخ بطنا

شربت يمكن 3 كاسات وخلص الجيك وعقب سرت بروحي أكلم الحرمه عشان تصبلي ماي

وكانت الصدمه

فتحت الحنفيه وصبت ماي

وانا أقول في خاطري معقوله هذا ماي اللولب جيه لذيذ وحلو ويسرسح

مابتصدقون خليتها تترس الجيك مرتين وما أدري كم كاس شربت


يمكن 10 من عطشي ومن حلاته

وردت الروح فيني وقررنا نطلع من المبنى ونتفرج ع المدينه ترومسو من فوق

في ناس يالسه برع فرحانه بالشمس


أصلا محد يلس داخل غيرنا ههههههههههههههه

متشبعين من الشمس

في البدايه مشيت مع البنات وعقب هم اتجدموا عشان يصورون


ويتصورون وأنا تمشيت ع راحتي أصور

الصراحه المكان جميل لو الجو غير

مدينة ترومسو

فيه ناس تروح تمشي وما أدري شو في الجهه الثانيه

لا أنا قادره أسير ولا أقدر أخلي بناتي يروحون وأنا ما أعرف شو في هالمكان

حق كتاكيتكم

أنا كتاكيتي كبروا ربي يحفظهم

هذا هو المبنى اللي وقف فيه الكيبل وفيه الكوفي

وهاي الحافه وقفنا عندها وصورنا وتصورنا وفيه سياج للحمايه

شوفوا قمم الجبال لازال عليها بقايا ثلوج

عقب ماخلصنا نزلنا

وعقب رجعنا بالباص لين تجمع الباصات

عقب رجعنا السفينه بالشاتل في الوقت المحدد


سرنا غرفتنا وشفنا هالهديه الحلوه من الهندي اللي ينظف غرفتنا

ريحنا شويه وعقب سرنا حضرنا العرض في المسرح

طبعا عروضهم جميله وماتتفوت


عقب ماخلص العرض سرنا تعشينا

وفليل يلسنا في المطعم نلعب ورقه

وانتهى هاليوم اللي كان أحلى شي فيه هي يلستنا في السفينه


حسيت ردتلي روحي







تابعوني في اليوم 7

وأحداثه

​

 

[جودى]

نتابع معاكم ..

الجزء السادس في ..

اليوم 7 و 8

تاريخ 18 / 8 بنقضيه في البحر

تاريخ 19 / 8 بنوصل الى منطقة

Molde Fjord, Norway

08:00 18:00

المده 10 ساعات بنقضيه فيها


معلومات عن عن مولد

هي مدينه وبلديه نرويجيه في مقاطعة موره ورومسدال ، وتعد المركز التجاري

سنتر المدينه بسيط وجميل وهي بالاساس ليست مدينه ذات فعاليات كثيره

من الاماكن السياحيه في هاي المنطقه والمشهوره فيها هو

اتلانتك أوشن

هو طريق المحيط الاطلسي وهو طريق يصل طوله لـ 8.3 كيلومتر

عنوانه



6530 Averø


وهذا فيديو عنه ، شوفوه كله

مكان مهيب ورهيب وأتخيل لو كنا عبرناه بهاي الاجواء


جان بنعيش لحظات من الاثاره الحقيقيه



https://

ولكن اللي شفناه وعشناه شي غير

كان شي اقل من عادي وبتعرفون هالشي من تفاصيل هاليوم


رحلات ممكن القيام فيها في مولد



* صيد السمك

اسم المزار

Fishing trip on the fjord

عنوانه


Årønes Gård

6421 Molde

*زيارة لعدة كهوف في مولدي ومناطقها القريبة

أسم المزار

Caving in the Romsdal area

عنوانه

Torget 4

6413 Molde

أنصح بفندق

(MoldeFjordstuer)

حيث يتميز بإطلالة فريدة متميزة

عنوان الفندق :

Julsundvegen 6, 6412 Molde

( المعلومات السابقه جمعتها من الاعضاء ومن أخونا رحال )



تفاصيل هاليومين


تاريخ 18 وهو اليوم السابع قضيناه في البحر

راحه واسترخاء وأكل ولعب كالعاده

واليوم اللي عقبه وصلنا لمدينة مولدي الساعه 8 الصبح

ولازم نرجع السفينه الساعه 5ونص

والساعه 6 بتتحرك السفينه

اليوم مرتبين رحلتنا مع القروب

واخترنا نزور اتلانتك أوشن اشهر مكان عندهم في هالمنطقه

تكلفة الكبير = 79.90 يورو

والصغير = 55.90 يورو

ومدتها 4 ساعات

كل يوم في مكتب الرحلات موجوده قايمه بالرحلات لكل منطقه بالتفاصيل






بناخذ جوله في المنطقه وعقب بنسير هالشارع

اليوم الجو مشمس وحار شوي والامواج هاديه





مثل كل مره يخبرونا وين نتجمع ويعطونا استكرات وعقبها نسير للباص


ونبدأ رحلتنا






نسيت ليش صورت هالمبنى والشو هو بالضبط







تجولنا في المنطقه وما أذكرها ولا أتذكر شو شفت فيها






عقب وصلنا لمرتفع او مطل ونزلنا الباص عنده

واعتقد كان فيه مبنى تاريخي












الباصات نزلوا تحت وبركنوا

















نزلنا عند الباصات















عقب كملنا الى أتلانتك اوشن






وصلنا للمكان المطلوب ولكن

الجو شمس وماشي أمواج

اذا ماشي متعه أبدا والشارع هذا حاله حال اي شارع ثاني

نزلنا نتمشى وعطونا مده قصيره ، ويادوب تصورنا وماحصلنا وقت نتيلس في الكوفي اللي عداله

ورجعنا الباص وماحسينا فيه بشي مميز مع انه مميز بس يباله أجواء معينه



صور متنوعه للمكان











































































بعدها رجعنا السفينه وريحنا شويه وعقب سرنا أجرنا العاب ويلسنا نلعب


















وعقب سرنا حضرنا العروض في المسرح

























وانتهى هاليوم واللي أعتبره يوم مافيه شي مميز





تابعوني في اليوم 9 في

جرنجير


​

 

[جودى]

اليوم التاسع

اليوم رحلتنا بتبدا من HELLESYLT

الى GEIRANGER


مقدمه

اليوم غير

اليوم من أجمل الرحلات اللي بنقوم فيها

اليوم رحلتنا طويله وايد تقريبا 7 ساعات

تكلفة الرحله للشخص = 135 يورو شامله الغداء

ولأنه الرحله طويله خذينا معانا هاندباك فيها بعض الاشياء الضروريه اللي ممكن نحتاجها

في رحلتنا هاي مرينا ع وايد أماكن

ونزلنا في كم مكان

وبعض الاماكن كانوا يعطونا 10 دقايق ننزل ونتصور

وبعضها نص ساعه وبعضها أكثر من ساعه

طبعا ع حسب المكان اللي بننزل فيه

تفاصيل هاليوم

اليوم الجو مشمس مثل باقي الايام

قومت البنات من الساعه 5 ونص الفجر

كانوا بيذبحوني البنات

كل ما أوعيهم يعصبون ويقولون

ليش من الحين ماما بعده عندنا وقت

وعقب وأكتشفت اني مخربطه في الوقت

ههههههههههههههههه

عادي تحصل في أحسن العائلات

هههههههههههههه

عقب نشينا وتريقنا وسرنا مكان التجمع في السفينه واستلمنا الستيكرات

وطلعنا برع السفينه عند تجمع الباصات

وسفينتنا اليوم رست في مرسى HELLESYLT

وهنيه صارلنا موقف طيح قلوبنا

لما سرنا مكان التجمع شفنا كم باص بس ماشفنا باصنا

تجننا

كيف وين باصنا نحن ممتأخرين

معقوله راح عنا

وعقب شفنا ناس عندها نفس رقم باصنا ويدورون مثلنا


شويه ارتحت لأني حسيت انه حد ويانا في نفس المشكله معناته في أمل

وانتشرنا مثل المجانين ندور ونسأل


وعقب اكتشفنا انه موقف الباصات مب هالصوب ونحن مغلطين في المكان ويوم وصلنا عندهم

لقينا وايد باصات متجمعه


اااااااااااااه ردت فينا الروح

وهذا خط سيرنا

في البدايه زرنا الشلال اللي كان قريب من موقف الباصات

والمكان جميل ويباله وقت أطول نتيلس عداله

انطلقنا في الباص ونحن نمشي نشوف مناظر جميله حوالينا

وعقب وصلنا عند منطقة HORNINDAL LAKE

وهاي البحيره تعتبر أعمق بحيره في اوروبا وعمقها 514 متر

قبل البحيره نزلنا في هالمكان وكان فيه حمامات عزكم الله وقالوا

اللي يحتاج يسير من الحين لأنه عقب بنكون مده طويله بدون حمام

المكان جميل

نحن يلسنا نتمشى ونتصور وماسرنا صوب الحمامات لانه الطابور طويل

عقب كملنا طريجنا

وصلنا عند البحيره العميقه

نزلنا نصور ونتصور

بعدها زرنا قريه جميله أسمها

Stryn

نزلنا وتمشينا فيها

وعقب ركبنا الباص ومشينا نزلنا عدال مطعم عشان نتغدى فيه بس المكان وااايد حلو

هاي صورة المكان ، كانوا حاطينها لوحه في المكان

جوله حوالين المكان

والكفار نزلوا تسبحوا في البحيره البارده

ههههههههههههههههههههه

بصراحه المكان جميل ويباله برزه

دخلنا المطعم

يلسنا مكس

ويابولنا أول شي شوربه

وعقب الوجبه الرئيسيه

وآخر شي الحلو

بالاضافه للمشروبات البارده والحاره

الاكل كان أقل من عادي وبناتي ماطاعوا يتغدون وانا تهبشت شوي

حشى أكل مرضى

الحمدالله ع النعمه

يتبع

​

 

[جودى]

نتابع معاكم أحداث هذا اليوم

كملنا جولتنا عقب الغداء

تجولنا ع جبال سترين وشفنا شلالات ووبحيرات

لين وصلنا لمرتفع dalsnibba

ويرتفع 1500 متر عن الارض

وهو مكان جميل وخلاب ويطل ع جرنجيير

تعالوا ويايي وعيشوا معانا هاليوم

أول شي مرينا ع شلالات

نزلنا عشان نصور ونتصور

المكان فيه نزله تقربك من الشلالات

أنا نزلت شويه وبناتي تعمقوا شويه

شوفوا النزله اللي تقربكم من الشلال

وعقب كملنا فوق الجبال

أرتفعنا لقمم جبال كلها ثلوج وبحيرات

مكان جميييل والجو حلو وايد

بس الشمس ياليتها مغيمه

الجو المغيم يدخل في قلبي سعاده وشعور غير

نزلونا واستمتعنا بالمشي ع الثلج واللعب فيه شوي

وتصورنا وصورنا

من هاي النزله أنا نزلت وبناتي يقولولي

ماما لاتنزلين عن تطيحين

شوفوا الزمن كيف تغير

لما كانوا صغار كنت أخاف عليهم يطيحون

والحين هم كبروا وخايفين انا أطيح

بس امهم بعدها شباب ماعيزت هههههههههههههههه

نزلت منها مثل القطوه

عقب ركبنا الباص والصراحه ماشبعنا من المكان

وارتفعنا لفوق

ويلست اصور الطريج

عقب وقفنا ويلسنا نصور من فوق الجبال

الحافه خطيره

وبعدها رجعنا لجرانجيير وشفنا مناظر جميلهوتوقفنا عند نقطة


FLYDAL

فيها مطل جميل ومشهور

نزلنا وصورنا وتصورنا

عقب نزلنا لميناء جرانجير بس السفينه ماتقدر توقف قريب من المرسى

يمكن عشان كبيره

سفينتنا وقت في البحر بعيده عنا ولكن طرشولنا قوارب خاصه تاخذنا للسفينه

وكل قارب يشيل 150 شخص

الامور كلها قمة في الامان والتنظيم

ولأنه أعدادنا كبيره والشمس مب راضيه تودرنا قلت للبنات نحن


مابنوقف في الطابور بنكون آخر الناس

ويلسنا نتمشى ونتفرج ع المكان اللي كان فيه الكثير من المحلات


والمطاعم والكوفيهات وسوبرماركت واشياء ثانيه

تجولنا لين تعبنا وعقب يلسنا ع الكراسي في الظله نتريا لين يخف الطابور وندخل القوارب

صور للمكان

أخيرا وقفنا في الطابور وركبنا قاربنا

دقايق ووصلنا لسفينتنا

طبعا قبل الدخول للقارب يتأكدون من هويتكم من خلال بطاقة غرفتهم

لأنه فيها كود وفيها كل المعلومات عنكم

انتهت رحلتنا واللي أعتبرها من أجمل رحلاتنا في النرويج

تابعوني في آخر محطة لنا في النرويج

في بيرجن

​

​

 

[جودى]

بيرجن Bergen

معلومات عنها

تم تجميع هاي المعلومات من تقارير الاعضاء ومن الانستغرام

هي المدينه الثانيه بعد العاصمه أوسلو

فيها مطار اسمه بيرجن

من شركات الطيران الداخلي واللي ممكن تنقلك مثلا من اوسلو الى بيرجن

طيران SAS

طيران NORWEGIAN

مدينه جميله وفيها أسواق ومطاعم وسوق سمك شهير ومدن ترفيهيه

وفيها الكثير من المسلمين ، ومحلات تجاريه آسيويه وملحمه حلال

من المطاعم العربيه اللي فيها

مطعم صاحبه سوري ويقدم وجبات حلال واسمه

Jihad Bergen Pizza

العنوان

Kong Oscars Gate 3,5017 Bergen

وفيها النافوره اللي تتركز حواليها المقاهي والجلسات الجميله ومناسبه للتمشي فيها

وفيها مطل تصعدله بالكيبل كار وله اطلاله جميله ع المدينه

أسم المطل Floyen وفي الاعلى موجود مطعم وكوفي

والصعود له من عند ميناء Bryggen

وهو أهم المواني على الساحل الغربي للنرويـج​

والذي يعج بكثير من السفن السياحية التي ترسي فيه وتتناثر على جنباته المقاهي

كما يوجد بها بحيرة رائعة واسمها

Austrevagen

وبعد فيها رحلات يومية لعدة جزر قريبة من بيرجن

ومن هالرحلات

Norway in a nutshell

تستغرق تسع ساعات ويتم

من خلالها المرور على أشهر المظايق والفيوردات

ومشاهدة المناظـر الطبيعية​

ومن الاماكن السياحيه المهمه اللي قريب منها وتبعد ساعه تقريبا عن بيرجن

شلال Steinsdalsfossen

وهو في قريه Norheimsund

ميزت هالشلال انك تقدر تعبر من تحته

يوجد للمديـنـة بطاقة ولها خصم في كثير من الفعاليات تسمـى

بيرجن كارد

موقع بيرجن مناسب لزيارت قرى مهمه وقريبه منها

مثل

VOSS , ROLDAL , KINSARVIKS , FLAM , AURLAND , ODDA , ULVI

تفاصيل عن بعض هاي القرى

قرية KINSARVIKS

تبعد عن بيرجن ساعتين وهي منطقه تطل ع أجمل المضايق


وفيها عدة شلالات وأنشطه مثل القوارب والهليكوبتر

منطقة Eidfjord

هي تبعد عن بيرجن ساعتين تقريبا وفيها خدمات وكوفيهات ومطاعم حلوه

قرية VOSS

تبعد عن بيرجن ساعه ونص تقريبا 95 كيلو

تستحق السكن فيها اسبوع وتتجولون فيها وحواليها

وفيه مطعم عربي صاحبه مغربي ، واسمه

Pizzeria & Kabab

فيها شلال جميل وحلو اليلسه عداله وممكن تفرش وتتغدى جنبه أو حتى تشوي

أسم الشلال Tvindefossen

قرية FLAM

صنفت كأجمل قرية في العالم في غرب النرويج

تبعد أوسلو 5 ساعات وتبعد عنها تقريبا ساعتين من بيرجن

تقع وسط الجبال وبها محلات كبيره وسوق ومطاعم وفنادق جميله

القريه فيها 4 شلالات كبيره ونهر طويل يقطع القريه


وبها عدة أنشطة تستطيع ان تقوم بها

منها رحلات بحريه بالقوارب تاخذك بجوله في االمضائق المائيه Fjord

وفيها قطار سياحي ياخذك لقمة الجبل عند الثلوج

وفيه مكان تستأجر منه سيكل وتتمشى بالقريه وع النهر وجنب الشلالات

ومن أكبر فنادقها

Flamsbrygga Hotel


قرية أورلاند AURLAND

هي تبعد عن فلام 8 كيلو

فيها 3 أسواق وتقدر تشتري كل أغراضك منها

وفيها 3 فنادق وأفضل فنادقها Aurland Fjordhotel


قرية ROLDAL

قريه بوسط الجبال وتعتبر من القرى القديمه والهاديه وفيها كنيسه

قديمه جدا والقريه فيها أكواخ للسكن ومحلات كبيره

أقرب مدينه هي Odda وتبعد 40 كيلو عنها

وفي طريقك لهاي المدينه بتشوف 10 شلالات كبيره وأنهار جميله

أكبر شلال فيها أسمه Latefoss

وأجمل وقت لزيارتها في شهر 5

فنادق ينصح بهـا في بيـرجـن

Augustin Hotel-1

Grand Terminus -2

Det Hanseatiske Hotel-3

InCity Hotel-4

Thon Hotel Bergen Brygge-5

Radisson Blu Royal Hotel, Bergen-6

P-Hotels Bergen-7

Best Western Hotel Hordaheimen-8

Thon Hotel Bristol, Bergen-9

Radisson Blu Hotel Norge, Bergen-10


Bergen - World Heritage City - Bergen


تفاصيل هاليوم

Bergen

بنيلس فيها 14 ساعه

وهي هاي آخر رحله لنا في النرويج

اليوم المفروض اليوم رحلتنا أحلى رحله ومختلفه عنهم كلهم

وهي بتكون جهة فلام وبتكون بالقطار ومدتها

9 ساعات

وهاي تفاصيلها

Norway in a nutshell full day, lunch included
Pass through the historic Bryggen and Hanseatic district before heading to the village of Voss. This popular winter resort is set by a tranquil lake. A train will take you through pastoral countryside and up to Myrdal, in the mountains; here we will board the Flam Line, one of the most spectacular railroads in Europe. Upon arrival in Flam that lies on Norway’s longest fjord (204 km), the Sognafjord, you will have a short presentation about the village before continuing to Stalheimskleivene zigzag road; lunch will be served in a nearby hotel. Your afternoon tour will continue by bus to Tvinde Waterfalls for a brief but worthwhile photo stop! Return to Bergen via Voss. Please note: the excursion includes a long train ride through a series of tunnels and several winding curves before arriving at the restaurant. This tour is not suitable for guests who are claustrophobic, have walking difficulties or use a wheelchair.

​

لكن للاسف الرحله هاي تكنسلت بسبب حادث وكانوا مسكرين الطريج

نحن كنا حاجزين رحله ثانيه مع الكروز في حالة لو ماقدرنا نسير هاي الرحله

واللي متابعني بيتذكر سالفتي مع مدير السفينه لما بغيت هاي الرحله

الرحله الثانيه اللي حجزناها مدتها 8 ساعات

التجمع المفروض الساعه 9 وانا كأني ديج ( ديك ) ناشه من 5 ونص

شو أسوي خلص الرقاد عندي هههههههههه

طلعنا في الباص مع القروب ومرشدنا افتتح حديثه بتعليقه ع الجو ويقول

هذا الاسبوع أفضل أسبوع لأنه الشمس طلعت عندنا وقويه وهذا نادر يحصل عندنا

صدق وقتها حسيت انه نحن نحسين وايد

تحركنا في البدايه وخذينا جوله في مدينة بيرجن

وعقب مرينا ع كنيسه وهاي الكنيسه لها قصه

ما أبا أصدع راسكم بسالفتها بس الحدث المهم في هاي الزياره انه

البنات نزلوا ويالناس يتفرجون ع الكنيسه

وانا رقدت في الباص

وعقب كملنا مشي واتذكر يابونا عدال بيت ع جبل بس مانزلنا وهذا البيت كان له قصه

قصته انه صاحبته كانت مسافره تتفسح وهي في الخارج شافت في الاخبار

انه حجر كبير عملاق تزحلق من أعلى الجبل ومر عدال بيتنا وطاح ع الارض

ولو هالحجر طاح ع بيتها كانت سحقه ولو كانت فيه جان راحت فيها

ما أدري شو صار في الحرمه لما قرت الحادث أكيد انصعقت من الصدمه بس صاار بيتها مشهور

عقب كملنا مسيرتنا لين الميناء وركبنا مع الباص في العباره وعبرنا للصوب الثاني

ونحن في العباره ممكن تنزلون حق الحمام أو اذا بغيتوا شي من الكوفي

وبعدها انطلقنا في الجهه الثانيه ومشينا مسافه طويله

ما أدري كم من الوقت خذينا بس خسنا من المشي في الباص

الصراحه رحلتنا في جرانجير لو طويله ماحسينا فيها من كثر ماننزل ونتفرج ع كثير أماكن

عقب نزلونا في مكان عدال البحر ويلسنا نتصور شوي

وعقب كملنا

مشينا ومشينا لين وصلنا لفندق في منطقه معينه

المنطقه جدا جميله

وفي هالفندق بيكون غدانا


وكنا وقتها يوعانين وايد ومن يوعي نسيت أصور اسم الفندق

الناس ع طول سارت عزكم الله الحمامات وكانت طوابير كبيره

وعقب سرنا المطعم

عاد الغدا هاي المره كان بياض ويه مب شرات هاك المطعم اللي أكله كان للمرضى

اخترنا طاوله وخذينا راحتنا في الأكل

السلطات متنوعه وأحلى سلطه آكلها كانت كراب سلط ( سلطة القباقيب )

الكراب سلط اللذيذه

صلصة اللحم الخاصه بالباستا كانت من الخنزير

كنا نسألهم عن الاكل اللي فيه خنزير ونتجنبه

قضوا ع الحلو ماخلولنا شي

وعقب ماتغدينا تمشينا خلف الفندق واللي كان يطل ع بحيره ومناظر جميله

تفرجنا وصورنا بس ماتهنينا لأنه حان موعد انطلاق الباص

وكالعاده كنا آخر الناس

يتبع ...​

​

​

 

[جودى]

نتابع معاكم رحلة بيرجن

بعد الغدا كملنا وسرنا عند منطقه فيها شلال جميل وهالشلال الميزه اللي فيه انه نمشي من وراه

سبق عطيتكم معلومات عن هالشلال ، ارجعوا لبداية تقرير بيرجن

وصلنا المنطقه اللي فيها الشلال

أول مانزلنا تمشينا عند مجرى الشلال ويلسنا نتصور قبل مانصعد فوق عند الشلال

عقب صعدنا فوق عند الشلال وكانوا مسوين ممر نمشي من وراه بس ماتقدرون تلمسونه

ولكن يرش عليكم رذاذ منه

وبعد ماخلصنا تجول وتصور عند الشلال وحواليه

حان وقت العوده

ولكن صارتلنا مشكله ماكانت ع البال

الله يسلمكم باصنا اخترب ومارضى يشتغل

ولأنه هم منظمين فعلى طول حلوا الموقف

جزء منا ركبوهم في باصات ثانيه مع قروبات ثانيه كانوا معانا في نفس المكان

وجزء منا ركبوهم في تكاسي

وأنا وبناتي كان من نصيبنا تكسي يكفي 9 راكب

أنا وبناتي يلسنا أول صف بعد السايق في السياره وخلينا الاجانب ايلسون في الكراسي اللي ورا

وشخطها راعي التكسي ووصلنا لين السفينه في الوقت المحدد

ورجعنا سفينتنا وودعنا بيرجن

ريحنا في غرفتنا وهذا اليوم الوحيد اللي يلست فيه في البلكونه

شغلت محمده عبده ويلست فوق كرسيين عشان أشوف البحر

كان الجو جميل ومنعش

استمتعت باليلسه ع انغام فنان العرب

تخيلوني وانا يالسه فوق هالكرسيين بس بدون الطاوله اللي تحتهم

لقطات من مدينة بيرجن

والساعه 9 سرنا المسرح عشان نحضر العرض

ونحن يالسين ننتظر يبدأ العرض

لفوا بنتين وشاب وشالين لوحه مكتوب عليها حضن مجاني

ويالسين يلفون ع الناس ويحضنون العالم

ومن ضمن البنتين كانت اربيعتنا المغربيه

طبعا كان لنا من الحب جانب

تحاضنا وياها وبسناها وهديتها علبة تمر كانت مآخذتنها ويايي المسرح

كنت أفكر أدورها عشان أعطيها ياها وسبحان الله يتني عشان تحضني بدون ماتدري

عقب بدأ العرض وكان من أجمل العروض

رووووووووووووووعه

والصور ماتعبرصح عن العرض

والجميل في العرض انه بعض موظفين السفينه شاركوا فيه مثل وداعيه

وقدموا عرض جمييييل وعرضوا حروف تكون فيه كلمة شكرا بكل اللغات

الكتابه تكون مضاءه وفي الصور مايبين هالشي بس في الواقع كان جميل

ضج المسرح في هاليوم من التصفيق والتصفير والصراريخ

حسينا بجو ثااااني

وهداوه وبناتها متحمسين ومتفاعلين وياهم

وخلص العرض وكنا وايد مستانسين وفكرنا انه اليوم ختام العروض


بس تفاجأنا ثاني يوم فيه عرض ثاني بس أقل جمالا من هذا بس كان جميل

وسرنا عقب تعشينا وتمشينا شوي في السفينه

وأخر الليل يلست هداوه يلست كيف ع صوت عبدالكريم عبدالقادر

وتأملات

انتظروني في

اليوم الأخير في الكروز

والاجراءات المهمه لمغادرة السفينه

​

​

 

[جودى]

الجزء الأخير من تقريري الكروزي

​

اليوم قبل الأخير في الكروز

كنت حزينه في داخلي انه الرحله بتنتهي

وانه الجو الجميل اللي عشته بينتهي

ولكن

كان في داخلي حماس لهامبورغ وللتسوق فيها

أحداث هاليوم

قمت الصبح بدري كعادتي وسرت تريقت وبعد فتره سرت موعدي في الاسبا

كنت مآخذه موعد لليوم الأخير كنت عارفه اني بكون محتاجه لهالمساج

قضينا هاليوم في الاسترخاء والأكل والتسوق من السفينه وتوضيب شنطنا

وكان فيه عرض بس اليوم اللي كان قبله كان أحلى بوايد ياليته خلوه آخر عرض

بعد هذا كان حلو مثل كل عروضهم

مثل هاي العروض تذاكرها غاليه لو تحضرونها برع وفي السفينه كانت مجانا

فيشكرون ع عروضهم الرائعه

نصيحه لاتفوتون ولاعرض

صارلنا شي في هاليوم ماتعودنا عليه طول رحلتنا

هاليوم كانت الامواج وايد عاليه ورياح شديده لدرجة انه حسينا بالخوف

وتذكرت تايتنك ودورت منو بيكون بطلي ههههههههههه

عاد نحن خفنا وايد لأنه السفينه وايد كبيره فكيف تهتز بهاي الصوره

كانت تهتز بصوره مش طبيعيه

وأنا تعبت وحسيت بغثيان وخذيت دواء حق هالشي


بخبركم سالفة الدواء


خبروني انه في الرسبشن فيه دواء يعطونا ياه حق دوار والبحر بس ممكن يرقدني ويخليني خموله

وانا ما ابا جيه ، فسرت عند الصيدليه اللي في السفينه واشتريت منهم الدواء وكان عباره عن لبان ( علوج )

ونمضغه 10 دقايق وعقب نعقها

وأنا يالسه في المسرح أمضغ اللبان ، أنا ما أدري انه 10 دقايق امضغها واعقها

فتميت أتعلج اللبانه وبعد فتره بديت أحس انه حلجي تخدر واقول لبنتي حلجي متخدر

قالت من متى تمضغينها قلتلها يمكن من نص ساعه أو أكثر

قالت ماما بس 10 دقايق

ضحكت ع عمري وعقيتها وتميت ما أحس بحلجي وخذا وقت لين فج التخدير

ولما يينا بنرقد كان السرير والغرفه يهتزون بقوه وبعدني اشعر بشوي دوخه

وفي نفس الوقت كنت أحاتي بناتي وكنت أطمنهم وانا من داخلي مرعوبه

وعقب توكلت ع الله وتشهدت ورقدت وقلت اللي الله كاتبنه بيصير

وصلنا هامبورغ الساعه 8

طلعنا من السفينه بنظام ودفعات

وايد عجبني تنظيمهم وترتيبهم وبهاي الطريقه ماتستوي زحمه أو ربكه

كيف قدروا ينظمونا جيه وبدون ازدحام

الله يسلمكم قبلها بيوم كانوا عاطينا استكرات للشنط

وهاي الستكرات ملونه وعليها أرقام وحروف

وهم مقسمينا لدفعات وكل دفعه لها لون ورقم

وكل لون محددله متى يطلع من السفينه ومن أي مخرج

يعني مب ع كيفكم تطلعون من أي باب ومن أي مكان

شو نسوي بالاستكرات

نحن كانت استكراتنا لونها أخضر

هاي الاستكرات نثبتها ع الشنط

واذا فرضا الشنط كانت أكثر من عدد الاستكرات

في هاي الحاله تطلبون من الرسبشن زياده قبل وصولكم بيوم

بعد ماتثبتون الاستكرات ع الشنط تحطون الشنط عن باب الكبينه من برع قبل الساعه 1 فليل

نحن حطينا شنطتين كبار برع الغرفه وخلينا معانا هاندباكتين

وهم مخبرينا من أمس انه اللي خروجه متأخر مايتم يسحب الشنط في الممرات

انما يسير الطابق 6 ويحط الهاندباك ويعطونا كارت عشان قبل مانطلع نسير ونستلمهم

شو يسوي اللي مايبا يسلمهم شنطهم

اللي مايبا يحط استكرات ويحط شنطه برع يخبرهم وهو يخبرونه من أي مخرج يطلع وشو يسوي

ومهما كان توقيت خروجنا من السفينه


يجب ع كل الركاب انه يطلعون من الكبينه الساعه 7 ونص

لما خبريتهم انه توقيتنا متأخر ممكن انه نتأخر في الغرفه

قالوا

لا ... لأنه فيه رحله ثانيه عقبنا ومحتاجين ينظفون الغرفه

وفعلا بعد مانطلع كانت الرحله الثانيه للكروز للنرويج بتطلع بنفس برنامجنا

طبعا هم يخبرونكم بالوقت ويعطونكم ورقه فيها كل التعليمات مع هاي الاستكرات

مثلا

نحن استكراتنا خضرا رقم 2

تجمعنا الساعه 10 وربع عند المخرج 6

شي مهم

بيعطونكم كشوفات السحوبات اللي سويتوها في السفينه

وانتوا هنيه تراجعونها واذا كل شي صحيح فيها توقعونها وتسلمونهم ياها في الرسبشن


وعقب يسحبون من بطاقة الفيزا

أما اذا فيه أي استفسار أو مشكله عندكم في هاي الحاله تراجعونهم وتتأكدون من الحسابات قبل لاتوقعونها

أنا الحمداالله كنت كل كم يوم آخذ منهم كشف الحساب وأراجعه


ولما ييت اليوم الأخير وشفت الكشف كامل شفت انه كل الحسابات صحيحه


ووقعت ع الكشف وسلمته بدون تأخير

نصيحه هالشي بيوفر عليكم وقت وجهد كبير


تفاصيل اليوم الاخير في السفينه

صحينا بدري

شفت كشف الحساب حاطينه تحت الباب

وحاطين نسختين وحده لي ووحده لهم أوقعها وأسلمها لهم

قمنا كلنا ولبسنا وانقسمنا قسمين

البنات ساروا يسلمون الهاندباك في الدور 6

وانا نزلت أسلم الكشف للرسبشن

واتفقنا نتلاقى في المطعم

لما نزلت الرسبشن لقيته زحمه وطوابير


بس الحلو انه لقيت موظف يلف علينا ويسألنا

هل بنسلم الكشف بس ولا عندنا استفسار

اللي بيسلم الكشف شراتي يعطيه هو الكشف مافي داعي يوقف في الطابور

واللي عنده استفسار أو مراجعه للكشف ينتظر في الطابور

طبعا هالشي وفر عليه الوقت والجهد

سلمته الكشف وسرت المطعم أتريق

وبعدها يوني البنات وبعد هم ما أتأخروا وتريقنا ويلسنا لين الساعه 10 الا ربع

وصلنا هامبورغ

عقب ماتريقنا سرنا ناخذ الهاندباك وسرنا صوب المخرج المحدد لنا

طلعنا بسلاسه ونظام ودخلنا الترمينال وكأنه في مطار

بس هنيه ماشيكوا ع الجوازات

وعقب نزلنا تحت نستلم شنطنا

ويلسنا ندورهم بين الشنط وحصلناهم وخذيناهم وطلعنا برع القاعه عشان ناخذ تكسي يوصلنا للفندق

وهنيه بدت المعاناه في انتظار تكسي

هو فيه مكان مخصص للتكاسي ولكن عليه طابور طويل وزحمه

والجو برع شمس

غلطتي والشي اللي مافكرت فيه

اني ماحجزت من فندقنا سياره توصلنا من الميناء لين الفندق

والمشكله الاكبر

انه في هاليوم كان فيه سباق الدراجات ( السياكل ) في هامبورغ ومسكرين وايد شوارع

كان أتعس يوم من أيام رحلتنا

فديتهم بناتي وقفوا في الطابور أكثر من ساعه وأنا يلست ع صوب ويالشنط أتريا ايي دورنا

ولما يادورنا كان من نصيبنا أخيس سواق تكسي

خال وروحه في خشمه ومتطفر من الحر والزحمه

طيب نحن شو ذنبنا

عاد أول ماركبنا ومشى شوي قال

الطرق كلها مسكره والشوارع زحمه وأنا بنزلكم عند محطة القطار الرئيسيه

ومن هناك سيروا فندقكم

الحمدالله اني سبق زايره هامبورغ وأعرف موقع فندقنا

وأعرف انه المحطه بعيده وايد عنا ونحن صعب نمشي بهالشنط كلها

وهاي غلطتي الثانيه اني شليت معاي وايد شنط

ع الاقل أول ماوصلت هامبورغ لو أول شي تركت بعض الشنط في الفندق في الامانات

لين أرجع من رحلة الكروز جان أفضللي بوايد بدال ما أشل كل شي ويايي

نرجع لقصتنا مع سواق التكسي

عاد يوم خبرني انه بينزلني عند محطة القطار هنيه انصعقت وقلتله

نحن أول مره أني هامبورغ ومانعرف شي وما أندل أي مكان ولا أعرف كيف أوصل للفندق

بليز انته ودينا

( وأنا في خاطري ودي أضربه وأقول يوم انته مالك خلق ليش تاخذ زباين وتتكس فيهم )

قلتله انته حاول تنزلنا أقرب مكان نقدر نسير مشي لين الفندق

أو بعطيك رقم الفندق وكلمهم يطرشولنا سياره للمكان اللي تحدده وهم ياخذونا

عقب الله هداه وسخره لنا وقال

أوكي بسير المنطقه اللي فيها فندقكم وبشوف وين أقدر أنزلكم في أقرب مكان

قلتله أوكي

عقب قلت في خاطري

الحين ماشي عندج حل ياهداوه الا تهدين هالافريقي وتكسبينه في صفج

فقمت وفتحت وياه حديث ، وسألته :

انته من وين

قال : من غانا

قلت في خاطري

حلو

عاد أنا هنيه فتحت وياه أكثر ويلست أخبره اني زرت جنوب أفريقيا

ويلست أمدح فيهم وكيف الافريقان شعب طيب ...الخ

وخبرناه أنه نحن من الامارات وقاموا بناتي يسولفون وياه

ترا نحن نسولف وواقفين في الشارع مايتحرك يمكن ساعه

وسويناله تلطيف جو

وماوعينا بالريال الا نخ

وقام يسولف ويضحك وينكت ويانا وطلعنا الطيبه وخفة الدم اللي فيه

وحتى عرفنا تفاصيل حياته هههههههههههههههههههههههه

وعقب ماسولفنا وايد سكتنا كلنا

ملينا من الرمسه وتعبنا كلنا

والصراحه ما الومه الجو خايس حر وشمس والشوارع بعضها مسكره وزحمه

فما ينلام انه نفسه في خشمه

وتمينا أكثر من ساعه في نفس الشارع

وبدأ يتأفف ويتذمر وأنا خايفه يعصب مره ثانيه وينقلب مزاجه

ففكرت في شي ثاني أروقه ههههههههههههههههههههههه

لو ريلي ماسويتله جيه هههههههههههههههههههه

فكرت أحطله أغاني وأربشه في السياره هههههههههههههههه

سألته عادي أحط أغاني

لازم نشاوره طويل العمر ههههههههههههه

قلتله بحط عربي ، قال أوكي

حطيتله راشد الماجد بس ماعيبه

قمت فتحت وياه موضوع ايجار السياره ليوم كامل وهنيه تحمست وفرفش

وقلتله عطني رقمك بخليك تودينا الاوت ليت وكم مكان

واستانس حس انه بيكد من ورانا

طبعا أنا ماكنت ناويه يودينا أي مكان لأنه القطار أوفرلي بس كنت أعشمه عشان أكسبه

وعقب تحرك الطريج وشاف شرطي واقف وساله اذا الطريج مفتوح لين الفندق

وما أدري شو قاله الشرطي بس أخيرا تحركنا ووصلنا لمنطقه قريبه من الفندق

ولين هنيه ومايقدر يسير داخل

وقفنا وقال الفندق قريب وخبرنا وين اتجاهه

شكرناه وحاسبناه ونسيت كم عطيته

ونزلنا نمشي ونجر شنطنا ونسأل الناس وين فندقنا

وماكان بعيد وايد ومن دخلنا السكه اللي فيها الفندق وشافنا الموظف من بعيد يانا يركض ويدز الشنط عنا

عاد هنيه فرينا الشنط في السكه وخليناه هو اييبهم ونحن دخلنا الفندق نسوي شيك ان

وانتهى هاليوم التعيس والمتعب وبدأت

أحلى أيامنا في هامبورغ

ما اعتقد اني بكتب عن أيامي في هامبورغ لأني مشغوله هاي الفتره بس

صدق كانت أيام جميله لدرجة مددنا فيها 3 ايام زياده

بعد ماكانت 3 سويناها 6 وكان ودنا أكثر

أول شي اعتدل الجو وكان يخبل كله غيوم وأمطار وبروده

ثاني شي موقع فندقنا الأكثر من رائع وسط السوق

وثالث شي التسوق اللي ينعشنا ويسعدنا في حياتنا وخصوصا أسواق هامبورغ وايد حلوه

وقضينا أوقات غير عن الكروز وكل رحله كان لها مذاقها الخاص

وأخيرا

شكرا لكم ولمتابعتكم ومشاركاتكم

والسموحه عن تأخيري عليكم

وان شاءالله نلتقي معاكم في

بلاد جديده وتقاريري جديده بنكهة هداوه

​

​