جزيرة كوسوماي koh samui الرائعه

[جودى]

السلام عليكم حبايبي

أشكر من كل قلبي الغاليه أم عزيز اللي بذلت جهدها باخراج هذا الفيديو الجميل واللي يختصر


رحلتي بتنسيق جميل ...


جزاج الله الف خير

عرض بسيط لبعض الصور و اللقطات من الرحله



. ​

 

[جودى]

يسعدني صباحكم ومساكم ​

اليوم حبيت أتشارك وياكم بتفاصيل رحلتي الجميله لجزيرة كوسوماي في تايلند ​

​

واللي كانت بتاريخ
​

21 / 12 / 2014
​

الى​

​

24 / 12 / 2014
​

مدة 3 ليالي
​

وسافرنا من مطار بانكوك ع طيران اير بانكوك
​

وكان حجزنا عن طريق النت ولكن للاسف نسيت كم سعر التذكره ، ولكن ​

​

ممكن تعرفون الاسعار عن طريق موقعهم
​

http://www.bangkokair.com/eng/pages/home
​

​

​

وبالنسبه للسكن
​

في البدايه حجزت السكن عن طريق بوكينج وحجزت في فندق بانيان تري كوسوماي
​

فيلا من غرفتين نوم وحمام سباحه خاص مدة 3 ليالي طلع علينا بـ 13 الف درهم
​

موقعهم ع النت
​

http://www.banyantree.com/ja/ap-thailand-koh-samui​

​

​

وقبل سفرنا بفتره لما حسبت السكن والطيران والاكل والسياحه في هاي المده
​

شفت انه المبلغ بيطلع وايد كبير فوق الـ 20 الف
​

وشفته مايسوى وكنت بكنسل رحلة الجزيره وبكتفي برحلتنا للعاصمه بانكوك
​

أساسا نحن سافرنا لبانكوك تاريخ 19 / 12 وعقب سافرنا
​

الجزيره وبعدها رجعنا لبانكوك وكملنا رحلتنا لين 2/ 1 / 2015​

​

المهم كلمت بوعيسى والعيال واتفقنا نلغي رحلة الجزيره ودخلت بوكينج وكنسلت حجزنا
​

وعقب قلت في خاطري شوفي خيارات ثانيه يمكن تحصلين شي مناسب
​

المشكله ماكانت في السكن لأنه السكن متوفر وكثير وفيه كل المستويات ، المشكله كانت فيني
​

مب أي سكن يدخل راسي وهاي جزيره وانا خاطري بفيلا وفيها حمام سباحه خاص
​

وأنا أدور وأبحث فجأه
​

حصلت اللي أدور عليه ​

​

حصلت منتجع 5 نجوم والفلل عندهم عباره عن فيلا فيها غرفة
​

نوم وحده وحمام كبيره وحديقة وحوض سباحه خاص ​

​

والمفاجأه الأكبر انه هاي الفيلا قيمتها ف اليوم 500 درهم بدون استرجاع
​

ع طول حجزت فيلتين عدال بعض
​

وحده لي مع بوعيسى ، والثانيه للعيال البنتين مع عبادي
​

وطلع الاجمالي 3000 درهم مع الافطار
​

ع طول حجزتها وغامرت وتوكلت ع الله وحجزتها بدون استرجاع ​

​

اسم الفندق
​

أكس 2 ساموي​

​

​

​

​

موقعهم في بوكينج
​

X2 Samui​

​

موقعهم ع النت
​

http://x2resorts.com/resorts/samui/​

​

طبعا الصور والتفاصيل عقب ان شاءالله

بالنسبه للمعلومات عن الجزيره
​

قبل سفري بحثت عن معلومات عنها ومالقيت الكثير
​

وبعطيكم اللي جمعته من تقارير الاعضاء جزاهم الله خيرها عنا ​

​

جزيرة كوسوماي


ماذا تفعل في كوسوماي: عرض القرود


رحلة السفاري على الفيله او بالسيارات او بالدراجات ذات الاربع عجلات
تعليم الطيخ التايلندي


الشلالات: شلال Na Muang وشلال Hin Lad
مطعم يقع جبل
التنقلات والمواصلات:التكاسي (ولكن لايوجد بها ميتر وتبدأ المشاوير ب 100 بات وانت زايد)
فندق الرينسانس
هي أحد العلامات التجارية التابعة لشركة ماريوت العالمية​

قرب الفندق من منطقة التسوق في شاطئ "شوينغ​

​

وبعض المعلومات خذيناها من ولد أخويي ​

ومن الفندق اللي سكنا فيه ​

​

​

​

​

تابعوني في
​

تفاصيل رحلتنا لجزيرة كوسوماي​

 

[جودى]

يوم الذهاب للجزيره




قصتنا قبل رحلتنا للجزيره

تعرفون هداوه لازم عندها قصص وحكايات ومغامرات ومواقف ومقالب

ولا مابكون أنا


يوم وصولنا لبانكوك

الله يسلمكم نحن سافرنا بانكوك يوم 19 ووصلنا بانكوك بالليل متأخر

أول مره أحجز توقيت خايس جيه وكانت لها اسبابها

المهم لين وصلنا الفندق وحطينا راسنا بنرقد يمكن صارت الساعه 3


اليوم الثاني

ثاني يوم الصبح من نشينا من النوم ع طول سرنا المستشفى

كانت عندنا فحوصات وفي المستشفى تريقنا وماخلصنا الا العصر

وكنا وايد منهكين وتعبانين

وعقب ماخلصنا سرنا سنتر سيام براغون عشان نآكل لين الحين

ماتغدينا وتقريبا الوقت كان المغرب

تغدينا وتمشينا شوي وعقب رجعنا الفندق


تصريف الفلوس وتأجير السياره

خليت العيال في الفندق يرتبون حالهم وانا وبوعيسى

ع طول سرنا شارع العرب عشان نصرف فلوس

وبغينا نأجر سياره توصلنا الفجر للمطار عشان رحلتنا للجزيره

وحصلنا سياره فان كبيره وجديده واتفقنا مع صاحبها انه ايينا الفندق ع الساعه 5 الفجر

وعطيناه أرقامنا وعطانا أرقامه والحلو انه طلع أخوه يشتغل في الجزيره سواق

وعطانا رقمه عشان نتواصل وياه هناك

وعقب رجعنا الفندق


مرض بوعيسى المفاجئ

قبل لانوصل الفندق كنت أحس بوعيسى تعبان ويقوللي أنا حاس بالتعب

ومن وصلنا الفندق ونحن نمشي في الممر باتجاه غرفتنا تقريبا

كنا عدال الغرفه الا بوعيسى يرجع كل اللي في معدته

ركضنا أنا والعيال نفازعه وكان الوقت متأخر

وبعد ما أرتاح شويه الا يرجع مره ثانيه وعقب ثالثه

خفت عليه وع طول اتصلت في الفندق وطلبت ايييني طبيب

وقمت عطيت بوعيسى خلطه من زنجبيل بودر مع ماي وبعد ماشربه بشوي بعد رجع للمره الرابعه

في العاده الزنجبيل ممكن يمسك الزواع ولكن معاه مالحق يسوي مفعوله ع طوله رجعه

خليت العيال يرقدون والحمدالله كنا مآخذين غرفتين بينهم باب

ووصل الطبيب وعطى بوعيسى ابره توقف الترجيع وعطاه ادويه

وبعدها قدر يرقد شويه

وظليت أنا أردد الاغراض لين الساعه 3

ويمكن غفلت نص ساعه ورجعت قمت أتجهز وأصحي العيال

وخليته هو نايم لين آخر الوقت عشان يرتاح


مقلب ماتوقعناه

استوت 5 ونص والسايق ما أتصل

نتصل عليه ومايرد

في الأخير قررنا ننزل ونسوي شيك أوت ونترك بعض من

شنطنا في الامانات

وطول هالوقت ونحن نتصل ومحد يرد

حسبي الله عليه مثل ماسوى فينا هالمقلب

وعقب الحمدالله الموظف دبرلنا سياره

وكانت الساعه 6 ونحن أعتقد طيارتنا كانت ع الساعه 8 ونص او 9

كان الوقت قصير بس الحمدالله لحقنا وطرنا الى جزيرة كوساموي ولكن

تخيلوا التعب والارهاق اللي عشناه واللي أنا عشته في هاليومين

خصوصا قبل سفرنا من الامارات أصلا انا كنت ناشه بدري وأعابل كل شي قبل السفر

صدق تعبت وهلكت وكنت أحاول أتماسك واكون قويه عشانهم

والحمدالله عدت ع خير

والحمدالله طرنا بدون أي مشاكل ولاتعقيدات في المطار

انتظروني في تفاصيل وصولنا

وأحداث هاليوم ​

 

[جودى]

يوم وصولنا للجزيره

وصلنا مطار كوساموي

وركبونا في الباصات المكشوفه

الاجراءات كانت سريعه ومطارهم أو صالة القادمون كانت صغيره

ما اتذكر كم كانت رحلتنا بالضبط يمكن ساعه أو ساعه ونص

وبعد ما استلمنا الشنط شفنا كاونتر وعن طريقه نأجر مواصلات للسكن

أجرنا سياره خاصه تودينا المنتجع وما أتذكر كم كلفتنا السياره

وصلنا المنتجع والمسافه كانت تقريبا 40 دقيقه


يتبع ...​

 

[جودى]

وصولنا المنتجع



وصلنا المنتجع وكنا تعبانين ومنهكين

سوينا الشك ان وعطونا الفلل وكانوا عدال بعض

انبهرنا بالفلل وعجبونا بس كنا تعبانين ومانبا الا نرقد

والجو كان يخبل غيم ومطر




طلبنا غدا من مطعم المنتجع











وكنا طالبين بعد باستا بس نسيت أصورها






حد تغدى وحد ماقدر يقاوم النوم

وعقب رقدنا كلنا لين العصر

أول مانشينا قررنا انه نتسبح في الحوض

وجهزنا عمارنا وحتى بوعيسى الحمدالله استوى بخير وطفينا كلنا في الحوض






وكان الوقت قبل المغرب ، وكان كل شي جميل

وبعد ماتسبحنا بشوي دخل علينا المغرب وبدأت تظلم وبدت تطلع


الطياييييير










نحن في الحوض وهم ع الليدار يطلعون من مخابئهم

وبدت الحشرات تطير مني ومناك

هاي هي الجزر الاسيويه للاسف

من شفنا جيه كلنا لصقنا في بوعيسى ونحن نصرخ وعقب طلعنا كلنا من الحوض

ياروح مابعدك روح

وقررنا مانتسبح الا في النهار ، لكن

هل تسبحنا عقب ولا لأ ؟

بتعرفون هالشي من تفاصيل رحلتنا

شوفوا الحين صور منتجعنا وعقب بنكمل سوالفنا

هذا مخطط منتجعنا







المنتجع عباره عن 27 فيلا


متوزعين في صفين مجابلين بعض























تقريبا كلهم قوم بوغرفة نوم وحده مع حمامها وحوض السباحه

اما الفيلا رقم 6 وهي أكبر بس ما أدري كم غرفه

والفيلا رقم 4 فهي لأصحاب المنتجع مثل ماخبرنا الموظف

ووقتها كانوا يسون صيانه لفيلتهم وماكانوا موجودين جان سلمنا عليهم وعطيتهم ملاحظاتي

المنتجع مب كبير وماكان فيه ناس وايد وهالشي أنا ما أحبه

أحب وجود الناس حواليه ما أحب الهدوء الكبير بهالشكل

لكن كمنتجع وايد حلو وله سلبيات بخبركم عنها ان شاءالله

لو كنا سايرين قروب مع كم عائله من أهلنا وسكنا هالمنتجع

أتصور وايد بنستمتع وبنسوي جو فيه

ومب بعيده فليل نيلس ندق ونغني ونسوي سهرات

وعقب يحطون الخليجين في القايمه السوداء بسببنا


هذا باركن السيارات ومدخل الفندق






وعلى طول من دخلنا في ويهنا الرسبشن

وهو مفتوح في الهواء الطلق وبدون أي حواجز

وحصلت بس صوره وحده للرسبشن












المنتجع فيه حوض سباحه عام

في نهاية هذا الممر ايينا الحوض والمطعم ونطلع ع البحر











المسبح العام العائلي





































وفيه مطعم يقدم بوفيه افطار

وما أدري اذا يقدم وجبات ثانيه

بس أعتقد ممكن أي وقت تيلسون فيه وتشربون اي مشروبات تبونها وبفلوس طبعا


مدخل المطعم


























وفيه حديقة مطله ع البحر وع المسبح












في محل صغير يبيع بعض ادوات السباحه والتسليه

وفيه شاطئ خاص ويلسات ع البحر


















وبس هذا كل اللي فيه

قلتلكم ترا هو صغيرون وحليوي

الحين بندخلكم فيلتنا


































يالقهر ماأدري وين اختفت صور الغرفه والحمام
أنا متأكده اني صورتهم

طلعتكم صوره من النت


وممكن تشوفون أكثر من موقعهم







تابعوني في ..

تفاصيل هذا اليوم​

 

[جودى]

العشاء في المطعم اللبناني


أول ماوصلنا لما سوينا شيك ان كان في الرسبشن موظف أجنبي

وكان هو مدير المنتجع يمكن كان استرالي ممتذكره عدل

المهم هالمدير كان وايد طيب ومتعاون وتم وايد يسولف ويانا

والبنات تموا يسألونه عن الالعاب البحريه والانشطه الموجوده في الجزيره

وبعد سألناه عن مطاعم تقدم أكل حلال وخبرنا عن مطعم لبناني

وعموما في الجزيره ماشي وايد مطاعم تقدم أكل حلال


نرجع لتفاصيل هذا اليوم الطويل

بعد ماطلعنا من الحوض مصروعين من الزواحف والحشرات

تسبحنا ولبسنا وقررنا نطلع ندور مطعم نتعشى فيه


واول ماوصلنا الرسبشن الا نشوف الطياطيير مصطفه ع ليدرا ( جدار ) الرسبشن من كل صوب

حشا انصرعنا منهم وحسيت عبادي بدأ يخاف

وحليله زيغناه ههههههههههههه

المهم سألناهم كيف نقدر نسير المطعم

قالوا هم عندهم خدمة تأجير السياره والساعه بـ 400 بات تقريبا بـ 50 درهم

بس ناسيه هالمبلغ حق كم ساعه احتمال ساعه أو 4 ساعات

أوووف ليش ناسيه هالمعلومات

والقهر لما أسأل البنات أو بوعيسى عن أي معلومه كلهم يقولون

مانذكر


الحمدالله كانت السياره متوفره

وأفضل تحجزون السياره قبلها بفتره عشان تضمنون انها موجوده

طلبنا من الموظفه تسال المدير عن العنوان وتعطي السائق بس للاسف ماحصلناه

فاعتمدنا ع نفسنا

شغلنا جوجل ماب وحطينا اسم المطعم وطلعلنا مكانه وتمينا نحن ندلي الدريول

تخيلوا فليل والاضاءه قليله والدرب طويل خذينا أكثر من نص ساعه


ورغم هذا كنا نوجه السايق ونقوله وين يمشي ووين يلف لين


وصلنا للمطعم بدون مانخربط ماشاءالله علينا


حتى هو استغرب هههههههه

أول ماوصلنا كان المطعم فاضي وهالشي ما أحبه

أستقبلونا الموظفين اللبنانيين بحفاوه وسالناهم وأكدوا انه أكلهم حلال ( في ذمتهم )

يلسنا وتعشينا وكان مستوى أكلهم جيد

بس عبادي هو اللي أكثر حب أكلهم بس عشان قالوا انه حلال

الولد من وصل بانكوك وهو متعقد من هالموضوع وكله قرفان منهم ومن أكلهم ، حتى قالنا :

مره ثانيه أنا مابسافر وياكم اي بلد أسيوي بس اوروبا

والسبب انه متعقد من أيام كوريا لما تلعوزنا ونحن ندور اكل مناسب

ومن الروائح الخايسه اللي كنا نشمها في كوريا

فخلاص ربط في مخه انه تايلند مثل كوريا


الحين بتركم تشوفون عشانا في المطعم اللبناني

ع فكره المطعم له فروع في العاصمه بانكوك

ماصورت وايد المطعم كنا يوعانين

المطعم له يلسات مطله ع البحر ويلسات داخليه

في البدايه يلسنا صوب البحر بس كان هوا وشويه برد فخفت نمرض فقمنا ودخلنا داخل


في فترة سفرنا كان الجو معتدل ولكن تكثرفيه الامطار والرياح

هاي طلباتنا

بعد ماتعشينا رجعنا مع السائق اللي خليناه يتريانا

خفنا مانحصل سياره تكسي

وبعد وحليله اشتريناله عشا ويانا

وفي ردتنا مرينا اشترينا خبز سلايس للريوق في حالة لو ماقمنا حق ريوق الفندق

وانا شاله ويايي أجبان وعسل وجام لزوم الافطار

ولما وصلنا المنتجع حسيت عبادي خايف من الطياطير لأنه فعلا عددهم كبير

خفت انه يلعوزني فليل ومايرقد بسبب هالموضوع

ويتني فكره اني أحول خوفه لشي ثاني

وقلتلهم

شو رآيكم نعدهم كل يوم
ويلسنا نعدهم ونضحك وطلعوا 17 واحد

وعبادي نسى خوفه واندمج وعاش الدور وكل يوم يعدهم

بس هذا مامنع انه أول ليله عاشها بصعوبه ولعوز خواته ومارقد بسرعه

انا بعيده الحمدالله خواته كلوها ههههههه




تابعوني في أحداث اليوم الثاني

والمغامرات اللي عشناها في الجزيره​

 

[جودى]

اليوم الثاني في جزيرة كوساموي



نشينا انا وبوعيسى من النوم بدري وخلينا العيال راقدين ياخذون كفايتهم من النوم

ونحن تمشينا لين مطعم المنتجع وشالين الجبن ويانا

اليلسه حلوه

الريوق لابأس فيه مب هذاك الزود

لاتنسون انه المنتجع مافي حد الا نحن

ويمكن عايله أجنبيه ريال ويا زوجته

واظن روحوا عقب لأنه ماشفناهم

وثاني يوم شفنا الاسيويات وعقب بعد ماشفناهم

توا بوعيسى يقوللي انه منتجعنا كان فل ، هم قالوله جيه

بس انا متأكده انه جذابين

عنبوه فل وماشفنا حد طلع من فيلته

فل والمطعم فاضي والرسبشن فاضي والمسبح فاضي والشاطئ فاضي

كيف فل بالله عليكم


هاي صور ريوقنا

اخترنا طاولتنا تطل ع البحر

وفه يلسات من صوب الحديقه

ما أدري ليش ماصورت صور أكثر لليلسات

مع انه المكان كبير

وطلبنا بيض وسوولنا ياه

وهذا الشيخ اللي مرتز ويانا في كل سفراتنا

وعقب ماخلصنا ريوقنا تمشينا ع البحر

وعقب رجعنا عند العيال وريقناهم وتجهزنا واستعدينا

لأول انطلاقه حقيقه في الجزيره واللي عشنا فيها وايد مغامرات




قبل لآ أنتقل لأحداث هذا اليوم خلوني أخبركم بسلبيات المنتجع

ورغم انها ماتعتبر سلبيات كبيره

أكبر سلبيه في نظري

كانت الوانالمنتجع

وأقصد المطعم اليلسات ديكورات الفلل

تشوفون الغالب اللون الابيض والاسود والرمادي

وخصوصا المطعم كئيب رغم انه يلسته وموقعه ممتاز

من وجهة نظري المنتجع محتاج لألوان فريحيه

كوشنات فيها زخارف وورود

المنتجع محتاج من يرويه بالالوان ويضيف بهجه وسعاده

لم شفت الصور من موقعهم شفت انه فيه مخدات برتقاليه محطوطه ع الارض

مجابله الشاطئ بس لما كنا هناك ماشفتها

ولما كلمت المدير في هاي النقطه

خذا نفس عميق ورد وهو متطفر

الظاهر بعد هو يعاني من هاي النقطه ، وقال

انه أصحاب المنتجع وهم استراليين يحبون هاي الالوان ومايحبون الوان ثانيه

قلتله اللي يحبونه يسووونه في بيتهم ع ذوقهم ، ولكن حق البزنسس لازم يشوفون أذواق الزبائن

السلبيه الثانيه

المنظر الخلفي من الفيلا ممعتنين فيه

مثلا غرفتنا جدارها الامامي والخلفي كله زجاج

والحمام عزكم الله الجزء الخلفي منه زجاج ويطل ع الجهه الخلفيه

وهالمكان ميت وفيه بقايا أوساخ ومن رأيي

انه يسوون حديقه جميله من الورود والاشجار

وتكون نظيفه ومرتبه وتعطي منظر جمالي للخلفيه المطله ع الغرفه والحمام

السلبيه الثالثه

الريوق كان مقبول ولازم يهتمون فيه

مب شرط الكميه انما في الاختيارات والتنسيق

لأنه اذا الزبون عجبه المكان من كل النواحي فهو بيجذب زبائن غير

السلبيه الرابعه

موقع المنتجع كان شوي بعيد عن الحياه ومركز المدينه

في الأخير

رغم السلبيات اللي قلتلكم ياها الا انه مايمنع انه المنتجع حلو وسعره حلو

ويستاهل التجربه



تابعوني في مغامراتنا في هاليوم ​

 

[جودى]

يوم المغامرات

قبل مانبدأ برحلة اليوم خلوني أخبركم عن موقع فندقنا

هاي خريطة الجزيره

لها عدة شواطئ بس أشهرها شاطئ ليماي وهو اللي تتركز فيه الكثير من الفنادق

وسنتر ليماي هو الحيوي واللي فيه تكثر المطاعم والاسواق

تشوفون السهم

هنيه موقع فندقنا

عاد لاتضحكون عليه أنا مال أول وبدائيه أصورلكم من فوني وأحددلكم بقلمي

الدائره الثانيه اللي عقب فندقنا هنيه موقع فندق بنيان تري اللي كنا بنسكن فيه

والدائره اللي فوق هذا فندق W

مثل ماتلاحظون انه نحن شويه بعيد يعني المطار كان يبعد ساعه أو ساعه الاربع

بس تدرون ماكنا نحس بالبعد

ولما نتمشى بالسياره نيلس نتفرج ع الجزيره



رحلة اليوم


لما سرنا عند الرسبشن سالناهم عن مكان مناسب نزوره

والاماكن كثيره

وبعد مناقشات طلبنا منهم نزور شلالات وتكون قريبه منا والجزيره فيها وايد شلالات

شوفوا موقعها من الخريطه

أجرنا السياره لمدة كم ساعه بمبلغ معين

نسيت كم ؟

وقلنا بنزور الشلال وعقب بنزور مكان فيه صخره معينه ع البحر مثل معلم سياحي

والمنظر من هناك حلو للتصوير حسب كلامهم

وبنسير كم مكان ، ولكن اللي صار وتفاجأنا فيه


لما وصلنا مكان الشلال اكتشفنا انه المكان سياحي ويشمل عدة أنشطه

الشلالات

عروض للقرود

عروض للطيور

ركوب الدراجات

ركوب الفيله

وفيه كوفي شوب

والصراحه ما أدري اذا فيه أشياء ثانيه ماانتبهت عليها

انبهرنا بالمكان ويلسنا فيها تقريبا 4 ساعات

اللي يبا يسير مثل هاي الرحله لابد يراعي هالنقاط :

1- تسيرون بدري

2- لبس ملابس قطنيه خفيفه

3- جواتي أو نعله مريحه

4- اليهال لبسوهم كابات تحميهم من الشمس

5- ماتحتاجون ماي وعصاير هناك موجود

6- ممكن مظله لو مطرت فجأه

7- لبس السباحه وفوط ولوازمه للشباب واليهال للي يبا يتسبح عند الشلال

نتابع رحلتنا


أول مانزلنا سرنا الكاونتر وحجزنا تذاكر

للشلال

ولركوب الفيله حق العيال بس أنا وبوعيسى مابغينا

وحجزنا حق ركوب الدراجات انا والعيال بس

المكان حلو ومرتب

عشان نشوف الشلال لازم نركب سياره جيب ونربط الاحزمه وفيه كرسيين فوق السياره الجيب اللي يبا ايلس فوق

البنات صعدوا فوق عشان يصورون وانا وبوعيسى وعبادي ركبنا ورا في الجيب مع الاجانب

وتحركت السياره اللي تصعدنا ع جبل وتمشي في ممرات وعره

تخبطنا عدل والبنات فوق أسمع صريخهن ، الصراحه خفت وحده منهن تطيح

وعقب مسافه وقفت السياره ونزلونا

وبدينا نمشي ع جسور متهالكه وحبال لين نوصل الشلال

وهنيه عندي ملاحظه

صحيح المكان مب خطر وايد بس المفروض هالجسور يضبطونها ويخلونها أكثر أمان

لو لاسمح الله حد طاح ممكن يتعور لأنه تحت كله حصا

طبعا أنا اوقف وانا ع الجسر واصور الشلال

وبعد ماعبرنا الجسور وصلنا لمنطقه وجابلنا هالشلال اللي صورته لكم ، ولكن هاي كانت المرحله الأولى

المرحله الثانيه نصعد الجبل وبعض الصعدات فيها درج وبعضها منحدر نمشي عليه

قال بوعيسى لين هنيه وبس ومافي داعي نسير المرحله الثانيه

انا والبنات احتجينا وقلناله نبا نشوف الشلال العود

قال المكان خطر ويزحلق

قلناله مثل ما الاجانب يركبون نحن بعد

تحت اصرارنا ماقدر المسكين يعترض

وبدينا المرحله الثانيه

ونفس الملاحظه واللي فعلا مستغربه منها

ليش مايعدلون هالمكان ويحافظون ع سلامة الناس

مستحيل في اوروبا تلقون أماكن سياحيه مثل جيه وممهتمين فيها

توكلنا ع الله

بوعيسى ماسك عبادي وأنا والبنات كل وحده شاله عمرها

وبدينا مرحله صعبه من التسلق

نمشي ونشوف الماي اللي نازل من الشلال

الصراحه المكان وعر وصعب ويزحلق ولازم تتحذرون وايد

وتكون نعلتكم مناسبه والافضل تكون جوتي

وصلنا بعد جهد كبير

وصلنا وعرقنا وايد من الحر والمجهود

وكنا وايد عطشانين ، بس الحمدالله شفنا هاي الصندقه في ويهنا

ع طول تناولنا شي بارد نشربه وكان فيه طاولات وكراسي

يعني هي استراحه وعداله الشلال العود

والناس عدال الشلال ، منهم يتسبح ومنهم يتصور ومنهم يالس يتفرج

ووايد يهال وعوائل

عاد انا وبناتي سرنا عدال الشلال وهناك كلها أحجار كبيره لازم تحاسبون وانتوا تمشون

بوعيسى وياعبادي يلسوا عند الاستراحه وهالثنين دوم متعاونين علينا

وطبعا بوعيسى مب عايبنه انه يينا هنيه

الصراحه أنا ما الومه لأنه كان وايد خايف علينا

المكان حلو وأحلى من الشلال الصغير

وانا بعد انشغلت بموضوع ثاني

الله يسلمكم لفت نظري واحد هندي يصور زوجته بكاميرا احترافيه

وهي تسوي حركات وهو يصورها وياخذلها اللقطات

وانا فاجه حلجي أتفرج هههههههههه

لين يانا النداء من بوعيسى

يالا بنروح من هالمكان

رجعنا عنده وجان نقوله

يقولون فيه بعد مرحله ثالثه وشلال ثاني فوق وطيور

مافي داعي أقولكم الجواب

رجعنا نجر أذيال الخيبه انه ماصعدنا المرحله الثالثه هههههههههههههههه

وطبعنا رجعنا من نفس الاماكن ونفس الجسور والمنحدرات وكله وفي الأخير ركبنا السياره الجيب

وهاي المره البنات ركبوا ويانا لأنه فيه أجانب خذوا مكانهم اللي فوق

وعقب مانزلنا سرنا النشاط الثاني

​

 

[جودى]

نتابع معاكم مغامراتنا


عقب ماخلصنا جولتنا عند الشلال يادور ركوب الفيله

وهالنشاط بس حق اليهال أنا وبوعيسى مابغينا ، سبق ركبنا الفيل ومالنا خاطر

اركبوا عيالي وراحوا في جوله مع الفيل وأنا وبوعيسى يلسنا في كوفي شوب نشربنا شي ومجابلين منصة ركوب الفيله

ونتريا العيال يوصلون عشان نصورهم

سامحوني مابقدر اعطيكم اليوم الا هالجزء الصغير

فيي رقاد ، ان شاءالله بكمله في أقرب فرصه

بس عندي لكم خبر حلو

حصلت صور زياده للشلال ما انتبهت عليهم ، بنزله تحت صور الشلال


تابعوني ...

​

 

[جودى]

نتابع فعاليات هذا اليوم



بعد ماخلصوا العيال ركوب الفيله سرنا عند النشاط الأحلى وهو ركوب الدراجات

عاد أنا تحمست أركب الدراجه وبيني وبينكم كنت خايفه لأني من زمان ماركبت

لبسونا خوذه وكل واحد من عيالي ركب دراجته

وكان معانا أجانب وكنا مجموعه وطلعوا معانا اثنين من المرشدين

واحد جدامنا بدراجته والثاني ورانا

في البدايه استغربت ليش نحن قروب وليش هم معانا ، ولكن

بعد ما انطلقنا معاهم قلت الحمدالله انهم معانا

يمشونا وسط الزراعه في ممرات خاصه ووعره بالاضافه انه فيه صعدات ونزلات ومنحيات

وساعات نمشي ع الماي وع حصى وع طريق مرصوف وع رمله

والأخطر انه نمشي والفيله تمشي عدالنا

ونحن منطلقين فجأه دعمني عبادي

ودخل جزء من دراجته في دراجتي

والله الحمدالله الله سلمنا نحن الاثنين

وتمينا فتره واقفين لين ماقدروا يفكون الدراجتين والاجانب متضايقين لأنه معطلينهم

وبعد مافكها الريال قال لعبادي انه يركب معاه

طبعا عبادي احتج يبا بروحه

وانا قلت الحمدالله انه الريال عصب وخذاه معاه في دراجته

أرتحت وبعدها انطلقنا عدل

وانا أسوق وأنبه البنات

تصدقون طلعت انا أسوق أحسن عن بناتي وشفت اني وايد أعرف أتحكم فيها

يمكن عشان أنا أسوق سياره وعندي خبره

وماتتخيلون كيف انبسطت وااااايد استانست ماتوقعت اني بعيش هاي المشاعر

حسيت اني رجعت صغيره

فله والله لايفوتكم

بعد ماخلصنا ركوب الدراجات

خلص الوقت ولازم نطلع لأنه مافيه شي نسويه

عروض القرود والثعابين فاتنا مالحقنا عليهم

كان السائق يتريانا طلبنا منه يودينا نتعشى في مطعم من اختيار البنات




تابعوني ..

​

 

[جودى]

نتابع معاكم


بعد ماخلصنا مغامراتنا سرنا مطعم ايطالي

ونحن في الطريج وقفنا عند مكان ويلسنا نصور بس مااعرف وين هالمكان

وعقب ماصورنا ، سرنا صوب مطعمنا واسمه

وهذا موقعهم ع النت

http://www.drfrogssamui.com/



انطباعي

مطعم راقي وجميل والمنظر اللي يطل عليه غايه في الروعه وانصح فيه

دخلنا المطعم وكان فاضي لأنه نحن سايرين بدري

لاهو وقت غدا ولاوقت عشاء

ووجبتنا هاي هي الغداء والعشاء

المطعم كبير

هاي طاولتنا

المطل الجميل

كان الجو كله هواء ورياح

وعموما هاي الفتره تكثر الرياح والامطار في الجزيره

هذا الممر يودينا للحمام عزكم الله

وانا أمشي هنيه جان اشوف الشيخ طيطار يترياني

وانا سايره الحمام شفت العاملات وهم يشتغلون

بس مافي داعي تشوفون كراكيبهم

طلباتنا

الصراحه صورت في البدايه ومن اليوع نسيت أصور باقي أطباقي

طبعا غربت الشمس وليلت

وعقب مماخلصنا طلبونا تكسي وردينا منتجعنا




تابعوني في

اليوم الثاني وكيف قضيناه


​

 

[جودى]

السلام عليكم


اليوم حصلت صوره للجيب وفيها بناتي طبعا بعد ما أخفيت صورهم


قلت بنزللكم الصوره عشان تشوفون الصوره

​

 

[جودى]

نتابع معاكم اليوم الثالث من رحلتنا الجميله في
جزيرة كوساموي


​

اليوم الاول كان يوم الوصول

اليوم الثاني يوم رحلة الشلال ومغامراتنا

اما هاليوم فهو يوم حافل

واستعدوا بطلعكم من الصبح لين فليل متأخر

أول طلعه كانت لزيارة فندق بنيان تري

قلنا مايستوي لازم نزور فندقنا اللي كنسلناه

وفكرنا نتريق فيه دام انه ريوق فندقنا مب هاك الزود

وأجرنا السياره وسرنا الفندق

الدائره هو فندق بنيان تري

وفندقنا تحت اللي عليه سهم

قبل مانسير طلبنا من فندقنا يحجزون لنا الريوق في بانيان تري

واول ماوصلنا الرسبشن سألناهم عن مكان المطعم

المطعم كان وايد زحمه

ماقدرت أصور وايد اليلسات بسبب الزحمه والمطعم كبير وفيه يلسات داخليه وخارجيه

بس من كثر الهواء محد يلس برع

شوفوا الستائر كيف تطير من شدة الرياح

وهاي الحرمه تشتغل أشغال يدويه للبيع

بالنسبه للبوفيه ما اتذكر كم سعر الشخص بس دفعنا الاجمالي تقريبا 500 درهم

والصراحه ماعجبنا وايد البوفيه

عقب ماخلصنا ريوقنا قمنا تجولنا شوي في اللوبي

وحصلنا يلسه رايقه حتى بوعيسى يلس ومارضى يتحرك

الصراحه ما الومه

لقطه عامه لغرف بانيان تري وفللهم

كلمناهم انه يراوونا غرفهم ولكن قالت فل

بس سمحولنا نركب البجي ونتفرج ع المنتجع

بس بوعيسى مارضى يتحرك من مكانه وعبادي تم وياه وانا والبنات خذينا جوله

حمام السباحه

شوفوا الرياح كيف شديده

يلسات ع البحر واعتقد مطعم بس من الرياح مول محد يالس برع

تخيلوا حالتنا في هالهواء

أحس كنا بنطير

لقطه من بعيد

لقطات من فوق ع المنتجع

انطباعي عن الفندق

جدا راقي ونظيف ولكن

مثل ماقلتلكم ماعجبني البوفيه

وسعره جدا غالي

والرسبشن والمطعم بعيدين عن السكن ولازم التنقل يكون بالبجي الا اللي يبا يمشي مسافه طويله


أخيرا
لقطتي البانوراميه

تابعوني في جولتي الثانيه في هاليوم
​

 

[جودى]

نتابع معاكم جولتنا الثانيه في هاليوم


بعد ماتريقنا قلنالهم يطلبونا تكسي وسرنا لجولتنا الثانيه الى..

حلبة سباق السيارات

أسمه ...

لما وصلنا شفنا الحلبه مقسمه قسمين ، قسم للصغار وقسم للكبار

والاسعار تختلف حسب البكجات والاعمار

حاولوا البنات يقنعوني أشارك وياهم بس رفضت

وقتها كان الجو مشمس وحار ومالي بارض

بوعيسى سار وياعبادي

وانا سرت في قسم البنات عشان أصورهم

وهم استمتعوا بس أنا ماكان لي خلق وايد ، صورتهم وعقب يلست أشرب ماي بارد

وارتاح لين يخلصون



كاونتر التذاكر

الاستراحه

عبادي مستعد ويسلم عليكم

ربي يحفظه ويسلمه

وبعد ماخلصنا كلمناهم يطلبونا تكسي عشان نسير وجهتنا الثالثه



تابعوني ...​

 

[جودى]

نتابع جولاتنا لهاليوم



الجوله الثالثه


بعد ماخلصنا من حلبة سباق السيارات ركبنا التكسي وسرنا مول


هذا المول شفناه أول يوم ونحن طالعين من المطار لين المنتجع وفكرنا نزوره


أسم المول

عنوانه

أول ماوصلنا ودخلنا حسينا انه المول شرح وكبير بس نحن متفقين انه مابنتسوق


لأنه تنتظرنا اسواق بانكوك ، انما الهدف من الزياره انه


نتمشى ونتفرج ع المول ونشوف اذا فيه أنشطه

الصراحه ماطولنا في التمشي ع طول دخلنا ستاربكس

يلسنا وريحنا لأنه كنا تعبانين من الحر ومن يلستنا في جولتنا اللي قبل مال السيارات

بعد العيال قالوا بيتمشون وقروا انه فيه بيت الرعب

قلتلهم انتوا سيروا واخذوا أخوكم وياكم وانا وابوكم بنسير نتمشى بروحنا

العيال حصلوا بيت الرعب ودخلوه

وحصلوا سينما 6D

أما أنا وبوعيسى طلعنا من المخرج الخلفي وشفنا شجرة الكريسماس

وهاي لقطه ليليه

اكتشفنا انا وبوعيسى انه المخرج الخلفي يطلعنا ع شارع طويل

كله مطاعم ومحلات بس أنا شفت شي ثاني

شفت هالمحل

فيدا اسبا

قلت لبوعيسى تعال بنسوي أنا وانته فوت مساج

وسوينا مدة ساعه ​

ياسلاااام عدلت المزاج

عقب ماخلصنا سرنا عند العيال ومشينا شوي في المول وعقب

وقفنا تكسي وسرنا وجهتنا الرابعه


انطباعي عن المول

المول جميل ويستحق الزياره

والمنطقه الخلفيه حلو التمشي فيها وممكن تتغدون أو تتعشون فيها

وفيه بعد مول ثاني وايد عجبني شكله

بس للاسف مامدانا نزوره ولكن شفته في البروشور

تابعوني في جولتنا الرابعه
​

 

[جودى]

نتابع معاكم جولاتنا في هاليوم

ترا نحن كثفنا الطلعات في هاليوم عشان باجر بنرجع بانكوك


بعد ماخلصنا جولتنا في المول قررنا نزور فندق W


هذا الفندق كان في خاطري قبل بنيان تري بس كان فل ولاغرفه فاضيه


فقلت لازم أمر واشوفه ونتعشى فيه بالمره


هذا الاستقبال

لما وصلنا الفندق انبهرنا باليلسات المطله ع البحر، وللاسف كانوا محجوزات

هاليلسات مقابله اللوبي

ونحن واقفين نتفرج ونصور جان يقومون من اللي يالسين ع وحده من هاليلسات


لما يينا بنيلس قالت محجوزه ولازم تحجوزنها ب 10 الاف بات يعني أكثر من 1000 درهم


الصراحه ما أدري اذا صادقه ولاتطفشنا بس هو صح هي محجوزه لغيرنا


ع العموم أنا ماسويتلها سالفه ويلست أتصور فيها وأصورها

طلبنا منهم نشوف غرفهم أو فللهم


والصراحه طلعوا أفضل من بنيان تري


ماقصروا وودونا بالبجي لين فيلا من الفلل نتفرج عليها وع الشاطئ بعد

وبعد ماخذينا جوله في الفندق بغينا نتعشى وسألناهم عن المطعم


قالولنا : المطعم في الطابق اللي تحت


لما نزلنا ماعجبتنا الاجواء ولا المنيو وخصوصا نحن مابناكل لحومهم

عقب كلمنا الموظفه تخبرنا عن مطعم حلال ودلتنا ع مطعم هندي


وبعد طلبتنا تكسي

شكرناها وانطلقنا صوب المطعم الهندي

تابعوني وشوفوا شو اللي صارلنا في هاليوم


ومغامراتنا عشان المطعم الهندي


والمشكله الثانيه اللي صارتلي وتضايقت وايدبسببها

​

 

[جودى]

نتابع معاكم جولاتنا في هاليوم

ترا نحن كثفنا الطلعات في هاليوم عشان باجر بنرجع بانكوك


بعد ماخلصنا جولتنا في المول قررنا نزور فندق W


هذا الفندق كان في خاطري قبل بنيان تري بس كان فل ولاغرفه فاضيه


فقلت لازم أمر واشوفه ونتعشى فيه بالمره


هذا الاستقبال

لما وصلنا الفندق انبهرنا باليلسات المطله ع البحر، وللاسف كانوا محجوزات

هاليلسات مقابله اللوبي

ونحن واقفين نتفرج ونصور جان يقومون من اللي يالسين ع وحده من هاليلسات


لما يينا بنيلس قالت محجوزه ولازم تحجوزنها ب 10 الاف بات يعني أكثر من 1000 درهم


الصراحه ما أدري اذا صادقه ولاتطفشنا بس هو صح هي محجوزه لغيرنا


ع العموم أنا ماسويتلها سالفه ويلست أتصور فيها وأصورها

طلبنا منهم نشوف غرفهم أو فللهم


والصراحه طلعوا أفضل من بنيان تري


ماقصروا وودونا بالبجي لين فيلا من الفلل نتفرج عليها وع الشاطئ بعد

وبعد ماخذينا جوله في الفندق بغينا نتعشى وسألناهم عن المطعم


قالولنا : المطعم في الطابق اللي تحت


لما نزلنا ماعجبتنا الاجواء ولا المنيو وخصوصا نحن مابناكل لحومهم

عقب كلمنا الموظفه تخبرنا عن مطعم حلال ودلتنا ع مطعم هندي


وبعد طلبتنا تكسي

شكرناها وانطلقنا صوب المطعم الهندي

تابعوني وشوفوا شو اللي صارلنا في هاليوم


ومغامراتنا عشان المطعم الهندي


والمشكله الثانيه اللي صارتلي وتضايقت وايدبسببها

​

 

[جودى]

نتابع معاكم جولاتنا في هاليوم

ترا نحن كثفنا الطلعات في هاليوم عشان باجر بنرجع بانكوك


بعد ماخلصنا جولتنا في المول قررنا نزور فندق W


هذا الفندق كان في خاطري قبل بنيان تري بس كان فل ولاغرفه فاضيه


فقلت لازم أمر واشوفه ونتعشى فيه بالمره


هذا الاستقبال

لما وصلنا الفندق انبهرنا باليلسات المطله ع البحر، وللاسف كانوا محجوزات

هاليلسات مقابله اللوبي

ونحن واقفين نتفرج ونصور جان يقومون من اللي يالسين ع وحده من هاليلسات


لما يينا بنيلس قالت محجوزه ولازم تحجوزنها ب 10 الاف بات يعني أكثر من 1000 درهم


الصراحه ما أدري اذا صادقه ولاتطفشنا بس هو صح هي محجوزه لغيرنا


ع العموم أنا ماسويتلها سالفه ويلست أتصور فيها وأصورها

طلبنا منهم نشوف غرفهم أو فللهم


والصراحه طلعوا أفضل من بنيان تري


ماقصروا وودونا بالبجي لين فيلا من الفلل نتفرج عليها وع الشاطئ بعد

وبعد ماخذينا جوله في الفندق بغينا نتعشى وسألناهم عن المطعم


قالولنا : المطعم في الطابق اللي تحت


لما نزلنا ماعجبتنا الاجواء ولا المنيو وخصوصا نحن مابناكل لحومهم

عقب كلمنا الموظفه تخبرنا عن مطعم حلال ودلتنا ع مطعم هندي


وبعد طلبتنا تكسي

شكرناها وانطلقنا صوب المطعم الهندي

تابعوني وشوفوا شو اللي صارلنا في هاليوم


ومغامراتنا عشان المطعم الهندي


والمشكله الثانيه اللي صارتلي وتضايقت وايدبسببها

​

 

[جودى]

نتابع معاكم آخر جولاتنا في هاليوم

​

بعد ماعطتنا العنوان موظفة فندق دبليو

راوينا العنوان راعي التكسي بس قال أنا ما أدله

قلناله ممشكله نحن بندليك

شغلنا غوغل ماب من الاي فون وتحركنا

الحمدالله انه راعي التكسي كان ريال زين ولاجان ممكن يعصب علينا أو يطلب فلوس زياده

والسبب

انه مشيناه وايد ونحن يمين ويسار

وعقب بدينا نصعد جبل وفي الظلام وندحل سكيك في الجبل

ونصعد ونصعد

وسيارته كركوبه تعبانه وفي الأخير انقطع الطريج

ولكن جوجل ماب يبين لنا انه بعده فوق

احترنا شو نسوي

وعقب قررنا ننزل من الجبل ومانكمل

وعقب بنتي طلعت رقم تيلفون المطعم من النت واتصلنا عليهم

في البدايه مافكرنا جيه لأنه ماتوقعنا نضيع

خلينا راعي التكسي يكلمهم وعرف العنوان منهم وانطلقنا مره ثانيه في رحله طويله

وتخيلوا وين طلع مكانه

تذكرون المخرج الخلفي للمول اللي سرناله وقلتلكم ع امتداد هالشارع كله مطاعم ومحلات

طلع المطعم الهندي في هالمكان

خلوني أعطيكم صور وعقب أكمل السالفه

اسم المطعم

عناوين فروعه

وهذا الشارع الطويل اللي فيه الحياه بس من الصوره مب واضح وايد

بعد ماوصلنا شكرنا راعي التاكسي وأكرمناه انه كان طيب ويانا ودخلنا المطعم

أطباقنا

انطباعي عنه

الصراحه تعيس وما أنصح فيه

لا أكل حلو ولاشي فيه

أصلا من دخلت وشفت شكله كان ودي أقول لبوعيسى خلنا ندور غيره في الشارع بس

خفت يعصب فسكت وقبلت فيه وعقب ندمت والسبب

أكله التعيس وهالمناظر

مطبخهم صورته من الدريشه

مقرف الصراحه

ع كآبة هالمنظر لو كان أكلهم لذيذ جان غفرتلهم

لكن أكلهم ملغ ومافيه طعم والصراحه أنا نقبت الأكل يعني ماكلت عدل كنت قرفانه

وطلعت وانا مب شبعانه

وعقب ماخلصنا كنا تعبانين وقفنا تاكسي وع طول سرنا الفندق

ونحن في التكسي أكتشفت انه موبايلي مختفي

لاااااا كله ولافوني

أهون عليه يضيع بوكي ولافوني

دورته ماحصلته

قمنا واتصلنا في المطعم قلت يمكن نسيته عندهم بس قالوا مموجود

أول ماوصلنا الفندق خبرتهم انه يتصلون بفندق الدبليو ويسألونهم عن فوني

وسرت غرفتي وأنا كلي حزن وكآبه

لاعشاء تهنيت فيه ولافوني عندي

وعقب شوي اتصلوا من الفندق وخبرونا انه حصلوه في الدبليو

عاد هنيه ردتلي روحي وفرحت من قلب

​

كلمناهم في الدبليو والموظف قال يمكن أنا أييب لكم اليوم بعد ما أخلص دوامي بيتي قريب منكم

ولكن ما أدري شو كان ظرفه وماقدر اييبه واتفقنا انه باجر ونحن طالعين المطار نمر ونآخذه

ونمت هاي الليله بدون مايكون فوني عدالي

تابعوني في يوم العوده
والاكتشاف الجميل اللي ضاع علينا

​

 

[جودى]

الجزء الأخير من رحلتنا لجزيرة كوساموي

قبل ما أبدأ في الجزء الأخير أحب أخبركم عن الانشطه السياحيه واللي صورتها من البروشورات

طبعا كونها جزيره فبتشوفون الكثير من الانشطه البحريه والرحلات البحريه ​

هذا عرض مسرحي سبق حضرت مثل هالعرض ع مسرح في بانكوك

والمسرح راقي واشوف جمهور محترم

ولكن تفاجانا انه الاستعراض كله للجنس الثالث

ونحن ماكنا ندري ، فاتحذروا من هالشي

بس الصراحه كان حلو ههههههه

بعد عندهم كل سنه حفله كبير اسمه فل مون بارتي واظن

يكون في آخر شهر 12 حق احتفالات الكريسماس

وهو مايناسبنا ولايناسب العوائل للاجانب بس

مجرد حبيت أخبركم عنه لأنه الجزيره مميوه بهالاحتفال

بالاضافه للانشطه اللي نحن سويناها وخبرتكم عنها

وأكيد في أنشطه أكثر بس ما أسعفني الوقت أبحثلكم في البروشورات


يوم العوده



كانت طيارتنا العصر وقلنا بنطلع ع الراحات فطلعنا متأخرين وقضين النهار في المنتجع

نشينا ع راحتنا من النوم وتريقنا ورتبنا شنطنا وعقب تسدحنا نتريا متى الموعد

قلنا مطارهم صغير وليش نسير قبلها بفتره ونيلس ع الفاضي

خلينا نكون مرتاحين في غرفنا ونكون ع الوقت هناك

وفعلا طلعنا متأخرين واول شي سرنا فندق دبليو وخذيت فوني

وعقب سرنا المطار ولما وصلنا المطار

انصدمنا صدمة عمرنا

المطار كأنه منتجع سياحي ، عمري ماشفت مطار بهالجمال

محلات مطاعم حدائق استراحات تجنن

كانه الجزيرة في صوب ومطارهم في صوب

عشان جيه نصيحتي سيروا قبلها بساعات واستمتعوا بالمطار وأجوائه الحلوه

ماتتصورون كيف زعلنا وضيعنا الوقت ع الفااضي الا متسدحين في غرفنا

والصراحه ع هالمطار الجميل المفروض انش الصبح ونتريق ونشل عمارنا ع المطار

ونصيحه للصبايا شلوا هاندباك فاضيه يمكن تتشرون من المطار

الصراحه شفت محلات حلوه بس ماكان عندنا وقت نتفرج ونتسوق

شوفوا الصور والواقع أحلى

دخلنا وسوينا الشيك ان والامور هنيه عاديه

عقب ماخلصنا قالونا سيروا من برع وامشوا في هالممر وبتشوفون الجيت من هناك

الممر هذا كله محلات ومطاعم

الصراحه الممر جميل وراقي وكأنكم في بلد أوروبيه

شوفوا الخضار والجمال

ونحن نمشي شفنا محل أيس كريم وهو معروف وله فروع كثيره

في بانكوك في ام بي كي شفتله كم واحد منه

قلنا الا ندخل ناكل فيه الصراحه التشكيلات مغريه وايد

صور من المنيو

بردوا ع قلبوكم

أيس كريم أمريكي

نكمل جولتنا في المطار

شوفوا الممرات اللي نمشي فيها

استراحتنا أو قاعة الانتظار الجميله

تخيلوا الاستراحه مفتوحه ومطله ع مدرج الطائرات ونحن يالسين ومسترخيين ونتفرج

ياقطارنا

مع السلامه يا أحلى جزيره

جزيرة كوساموي

فيج قضينا أيام جميله

وانتهت رحلتي معاكم لجزيرة كوساموي

اتمنى انكم استمعتوا مثل ما استمتعنا نحن

ونلقاكم ان شاءالله في الردود ومع تقارير يديده

ودعواتكم لي ولاسرتي بظهر الغيب

​