أنت تستخدم أحد المتصفحات القديمة. قد لا يتم عرض هذا الموقع أو المواقع الأخرى بشكل صحيح.
يجب عليك ترقية متصفحك أو استخدام
أحد المتصفحات البديلة.
بسم الله الرحمن الرحيم
رحلة قطر هي رحلة مكملة لدولة الكويت
تاريخ الرحلة 16 / 12 /2016
الاعضاء انا و زوجي و ابنائي الثلاثة الله يحفظهم
المدة ليلتين
حجزت الفندق قبل الرحلة بيوم
قمت الفجر و جهزت الاغراض و الشاي و القهوة عشان ننطلق الساعه 9
و راح زوجي يشيك على السياره قبل ما ننطلق و شوي رجع يقول السياره
مفضيه ما فيها ماي و لا زيت و يقول كيف تسوقين السياره
طبعا هاي شغلة الرياييل و الا احنا الحريم مالنا في هالسوالف المهم قالي لازم
اوديها الوكاله لانه ورانا رحلة طويله و ما يصير نجازف لان ممكن يصير شيء مب زين
قلت امري لله و ديناها الوكاله و انصدمنا صدمه قوية جدا
في قطعه اسمها راديتر مكسوره بالكامل كيف و متى صار هالشيء قلت ما ادري
و قبل اسبوعين زوجي مسوي فحص شامل للسياره و كانت تمام التمام
المهم السياره لازم تبقى عندهم و يغيرون القطعه و سعرها سعر رحله كامله
ضاق صدري و قلت مالنا غير الصبر صلينا الجمعه و سرت بيت الوالد تغدينا
و الساعه 3 و نص سرنا الوكاله و استلمنا الحبيبه و كانت بصحه ممتازه
رجعنا البيت و تجهزنا و غيرنا الشاي و القهوه و انطلقنا تقريبا الساعه 4 و نص العصر
وصلنا المغرب لمحطة ادنوك و صلينا المغرب و كملنا المسير
و الساعة 9 وصلنا الى الحدود
و بعد الحدود لابد من المرور لمحطة سحاب
و الجلوس في مطعمها المشهور
و هالمكيف في الصيف كنا نحتاجه بشده
وصل العشاء
و بالصدفه زوجي شاف ربيعه عند المحطة و نفسنا بعد نزلوا يتعشون في المطعم
و عطونا من البثيث و الجامي اللذيذ شوي لانهم متجهين الى مكة و ربي يحفظهم
كملنا المسير باتجاه خط سلوى
سامحوني على ردائة بعض الصور
حجزنا كان في فندق سفير الدوحه و تقييمه كان 7.6 في بوكينج
و هذا فندق الصفا كانت لنا تجربه فيه سنه من السنين
وصلنا الفندق
اول ما دخلنا زوجي ما عيبه الفندق و قال شكله شبابي قلت خلنا نشوف الغرفه اول و بعدين احكم
صور من اللوبي
دفعنا مبلغ ليلتين و انتقلنا للغرفة
اول ما دخلت استغفر الله كاني داخلة محل تدخين سجاير الريحه كانت تارسه الغرفة
و هاي الصالة
غرفة النوم مفتوحه على الصاله
طبعا كنا منزعجين وايد من الريحه و زوجي كلم اللي ياب الشنط و قاله بعطر الغرفه
و قلت خلاص اليوم تعبانين ندور بس الفراش و باجر بنطلع و نسكن في فندق ثاني
كلمت الريسيبشن قلتلهم كان في حد قبلنا في الغرفه يدخن قال لا بس يمكن الغرف الثانيه
اوكي انا حجزت غرفة بدون تدخين قال خلاص باجر بنقلكم لطابق اعلى و غرفة ما فيها تدخين
قلتله لا كنسل الحجز بنطلع باجر
و مواقف السيارات خارجية لانه الداخيلة صغيره او محدوده
و هذا تكرمون الحمام
و قبل ما نرقد يابولنا معطر خفف من الريحه المزعجه شوي
و ما عندهم سرير للطفل
بعدها قعدت ادور فندق و حجزت فندق كوبثورن
و انتهى اليوم اللي تعبنا فيه من بدايته
اليوم الثاني
صحينا الصبح و جهزنا الاغراض و رتبناهم
و قلت بشوف الاطلالة
نزلت اللوبي شفت الموظف تغير و قال ليش ما تكملون هاي الليله
بنغير الغرفه قلت خلاص حجزنا مكان ثاني
و انطلقنا الى سوق واقف
ما شاء الله في السوق زحمه من الصبح
ساحة الحمام
سوق الطيور
اتجهنا لمطعم شاي الشموس لكن للأسف ما شيء مكان و كلهم في الانتظار
اتجهنا للمخبز الموجود بالقرب من سوق الطيور
و شفناه يسوي فطاير
و هاي اسعار الفطاير و انواعها
خذنا فطاير متنوعه و قلت بشوف مكان للجلوس و الشاي
حصلنا هالقهوة ورا المخبز
و هاي جلسات مشي حالك مقابل القهوه
و هذا فندق الريان و فيه مطعم شاي الشموس
تصوير لين ما يوصل الاكل
شاي كرك
وصلت الفطاير بعضها حلو و الباقي ما فيهم طعم
و كانت عباره عن فول و سبانخ و لحم و جبن و زعتر
خلصنا و رجعنا لمحل شاي الشموس للبهارات و المخللات
بغينا بعض البهارات كانت توصيه من ربعنا و ما حصلنا عندهم كان مخلص
تمشينا شوي و قلنا بنرجع في الليل
تجهيزات لليوم الوطني
تحف مغناطيسيه اول مره اشتري منهم
و رجعنا لفندقنا عشان ناخذ القالوصه خليناها عندهم لسهولة التنقل
فريج بن درهم ما يذكركم بمسلسل كويتي
مطعم جريب الفندق
اعلام دول الخليج
مسجد قريب من الفندق
خذنا القالوصة و انطلقنا لفندقنا الجديد
فندقنا الجديد كوبثورن قريب من سوق واقف
حجزنا غرفة عائليه عبارة غرفتين متصلتين بينهم باب
غرفة الاولاد
غرفتنا
الاطلاله
تكرمون الحمامين نفس الشيء
هذا الباب
الميني بار
الممر بين الغرف
جلسة في اللوبي
المسبح قريب من الاستقبال
صلينا الظهر و العصر و اتجهنا الى كتارا
الكورنيش
وصلنا الى كتارا
مع وصولنا الى كتارا انهي تقريري لليوم
و تابعوني غدا بتكملة جولة كتارا
دمتم بود
صباح و مساء الخير
نكمل جولتنا في كتارا
و هذا مواطن يحتفل باليوم الوطني على طريقته
فندق سانت ريجيس قريب من كتارا
تنظيم حركة السير فالمنطقة بعدهم شغالين فيها
جباتي و كرك كافيه
المسجد الكبير
و هاي المناره اليهال مستمتعين فيها يركبون فوق و يدورون حواليها
المكان فيه وايد مراكز و مكتبات ثقافيه
و هذا مسرح كتارا الروماني للعروض
مطعم ايطالي فكرنا نتغدى فيه بس بعدين قلنا بنشوف اكيد في مطاعم اكثر
طائره تحلق في سماء كتارا
مطعم زعفران الهندي و عليه زحمه
مطعم ارض كنعان
تجهيز مسرح للعروض
الاستعداد لفعاليات اليوم الوطني
لوزار للمأكولات البحرية
اخترنا مطعم ارض كنعان فلسطيني اردني
طبعا المطعم مزدحم و قعدت اصور لين يوصل دورنا
و هذا الوجه مصنوع من ادوات حديدية
صوره اقرب ( ملاس , ملة , جدر , مواعين ) , و غيرها الكثير
باتجاه حمامات المطعم
احنا قعدنا بعد هالحاجز لكن حاليا في عايله موجوده
جلسات المطعم
مفتاح حديدي كبير خارج المطعم
نظرة تأمل
وصل دورنا بعد انتظار نص ساعه تقريبا
وصلنا للمنيو
طلبنا مشاوي مشكله
بغيت منسف بس للأسف ما عندهم غير لحم و طلبت مقلوبة دجاج
عصير برتقال و ليمون بالنعناع و اعتقد بيبسي
العيال شبعانين و كلوا تناتيف من الطبقين
بس السعر كان غالي تقريبا 200 و شوي او 300 ما اذكر بالضبط كم
صور من المطعم
و عندهم اغراض للبيع اعشاب على زيوت على عطور و غيرها
الحمدلله الاكل كان لذيذ و حبيت المقلوبه وايد و كان وياها روب
طلعنا نكمل تمشيه في كتارا
علي ولّم معناها بطاط في الماضي كنا وايد نستخدم هالكلمه بس الحين تطورنا و قمنا نقول
بطاط و بطاطس
و هذيل ورود ما ادري مجرد اضاءات او يقعدون فيهم في البحر
و هاي الساحه فيها كراسي و اليهال يلعبون مع بعض بس الجو باااااااااااااااااارد و هوا شديد
تعديل و صباغة مجسمات و مسارح
هذا كشك يبيع سميت تركي
و هذا كشك مصري بتاع الكشري و المحاشي
و في كشك يبيع كستنا و كريب و بان كيك و العيال طبعا خذوا دونات بالنوتيلا
براقع مطوره
و الكثير من القاعات
و ختمنا جولتنا في كتارا
طبعا المكان جميييل جدا و كبير و يستحق يوم كامل اذا في فعاليات او نص يوم من العصر لليل
و خاصة مع الجو بارد لكن احنا وقتنا ضيق و عندنا اماكن كثيره ما زرناها
السلام عليكم
بعد الجولة الجميله في كتارا انتقلنا الى منطقة الوكره
و كانت توصيه من معارفنا بزيارة السوق القديم فيها تابعوا الجولة الجميله الاخرى
وصلنا السوق و قبل ما ننزل لبسنا الجاكيتات و تدفينا اكثر
الجو بارد و الارضيه كلها سيراميك
و هذا اعتقد مطعم او كافيه
بصراحه المكان يحسسكم بانكم عايشين في الماضي حبيناه واااااايد
حاليا و انا احط الصور تذكرت المكان و حنيت له بصراحه كأنكم عايشين في فريج
و حواليكم جيرانكم و اهلكم بصراحة ابدعوا بالتصميم
المكان عباره عن محلات و دكاكين و مطاعم
هذا المحل وايد عجبوني اغراضه بس طبعا غالي
هذيل وايد حبيتهم صغار للشوربه كل واحد ياخذ مله قعدت ادور زوجي عشان اشتريهم
بس للأسف ما اعرف وين اختفى تموا في خاطري بس اكيد بحصلهم عندنا في السوق
و هذا محل ثاني و بعد اغراضه رووووعه
دخلت المحل و سألت الفلبينيه عادي اصور ترددت و بعدين قالت اوكي
هذا مطعم تونسي
مسجد و متوفرين المساجد بكثره في المكان
و الحين بننتقل لجهة البحر
اللي على البحر كلهم مطاعم و كافيهات
الاسامي بروحها توّنس
مسجد آخر
صلينا المغرب و العشاء لان المكان بصراحه نظيف جدا
طبعا اليهال مستمتعين بالمراكب الموجوده على طول الشاطيء
و هذا يبيع عصاير و سحلب و حلويات بغيت سحلب قال ارجعي بعد 10 دقايق لانه مب مخلص
رجعت و خذت السحلب و اشوفه بارد يقول حار حطيت ايدي على الجدر اقوله دافي يقول عشان الجو
صدقته و خذت السحلب و كان ابرد من الدافي
و خلص تقريري لليوم و بكمل باذن الله غدا
تصبحون على خير
صباح و مساء الخير على الجميع
نكمل جولتنا في سوق الوكره
و الحين نشوف مطعم النوخذه
الديكورات عجييييييييبه بصراحه ابدعوا جدا جدا في التصميم
ابداع لآخر حد و الالوان و التناسق جميل جدا
المطعم مب بس للأكل لا تقدرون تعتبرونه متحف صغير
فيه عدة جلسات و ترضي كل الاذواق
و هذي آخر صوره للجلسه الخارجيه
للأسف كنا شبعانين و ما عندنا طاقه للأكل و الا الجلوس في المطعم و تذوق الاكلات
اكيد بيكون له طابع آخر و شفت المنيو طبعا مهتمين بالاكل الخليجي
كملنا التمشية في السوق باتجاه الخروج لكن من مدخل آخر
طلعنا من الوكره و اتجهنا لسوق واقف مره اخرى
رجعنا لمحل الشموس لان بغينا بهارات و قال المغرب توصل بس للأسف ما لقينا شيء
و خذنا الموجود
و دخلنا السوق و كانت الزحمه فضييييييعه جدا
سرنا جهة المطاعم و اخترنا مطعم طاجين المغربي
اخترنا جلسه داخليه لانه برع كله شيش و تدخين
ذبحتنا الاضاءة وايد خافته و ما نشوف عدل
طلبنا حريره و بسطيلة دجاج لذيذه و سندويشات نقانق صوصج بس محموس
يعني حمسة نقانق بس للأسف كانت وايد حاره و طلبها ولدي الصغير و ما قدر ياكلها
كملنا تمشيه و خذنا عصاير من الاكشاك و ذره مشويه و طلعنا من السوق ما قدرنا نكمل
من الزحمه و الحلات نصها سكرت و حصلنا دراجة عند سيارتنا و شوي وصل راعي الدراجه
و شاف عيالي قال بتركبون عاد عيالي خاطرهم بس مستحين و قال اركبوا عادي و قعدوا
و صورتهم و ذبحوني يمكن 20 صوره او اكثر
و رجعنا للفندق و يوم وصلت اشوف اخويه مطرش واتس اب يقولي سوق واقف بعد
انصدمت قلت كيف عرفت يقول طفت وراكم و سحبت جاكيت ولدج و لا حسيتوا فيني
قلت و الله من الزحمه ما نحس بشيء
طبعا كان يوم سبت لكن اعتقد الاحد اجازه لهالسبب كلهم في سوق واقف
جهزت الاغراض و سكرت الشنطه لاني خذت شنطة وحده بس و حطيت فيها ثياب
حق يومين و الباقي في القالوصه ما نزلناهم و نمنا استعدادا للمغادره غدا
اصبحنا الصبح و طلعنا نتريق في سوق واقف و بالتحديد مطعم الشموس في خاطرنا
نجربه من العام اللي طاف
و هاي العربة يوم رجعنا كانوا حاطين فيها تمر و قهوة و مكسرات و فواكه
بس للأسف ما قدرت اصور كنت شالة اغراض في ايدي
وصلنا لمطعمنا و الحمدلله ما فيه زحمه و اخترنا طاولة خارجيه
نشوف المنيو
طبعا وايد خلطات بيض عندهم
و هذا رقم طاولتنا
قعدنا وايد ننتظر حد يعبرنا و يشوف طلباتنا بس كلهم مشغولين داخل
لانه طاولتنا عند محل البهارات و ما يشوفونها
وصلت طلباتنا بيض و طماط و بلاليط ( شعيريه حلوه )
بيض و لوبا ( لوبيا ) وايد حبيناه و من كم يوم طبقت الوصفه عندي و طلعت لذيذه
سألناه عن الخبز قال عندنا خبز صاج
و طبعا زوجي ما عجبه الصاج و سار يابلنا خبز من الخباز
امس خذت خلطة كركم و زنجبيل يحطونها مع الحليب و اليوم طلبت حليب بالزنجبيل و الكركم
قلنا نجرب الخلطة و طلبنا طبعا كرك
و الحمدلله الريوق كان لذيذ
تمشينا شوي بس بعدها المحلات مسكره
و دخلنا للكافتيريا اللي ورا فندق ارميله و عنده حلويات شعبيه و هاي العصيده
البثيث
البلاليط
الساقو
خذنا شويه عصيده و بثيث حق الطريج و طعمهم لذيذ
رجعنا الفندق و خذنا اغراضنا و اتجهنا الى وجهتنا الجديده ( الكويت ) مودعين قطر الحبيبه
و هذيل خيام في بر قطر
وصلنا الجوازات
بعد الجوازات وقفنا عند المحطة الاولى و خذنا قهوة و شاي لان الفندق ما فيه مطبخ
و ما لقيت مكان يسوي قهوة عبينا الدلال و انطلقنا
شاطيء سلوى و فيه تعديلات حديثه حدايق و جلسات و سوالف حلوه
دراجات مسافره
جمال على طول الطريق
الشوارع نصها قديمه و النص الثاني حديثه
باقي على الدمام 290
قهوة سعوديه في النخاع
الهوا كان شديد جدا و البروده تزيد
قطار سريع
ودعنا الدمام متجهين الى الخفجي
و الحمدلله قضينا يومين من احلى الايام في قطر و ان شاء نعيد الزياره مرات و مرات
و نشوف جوانب من التقدم و الازدهار دائما فيها
و انتظروني قريبا في بوابة الكويت
دمتم بود
كيف و متى صار هالشيء قلت ما ادري 
