بعض الاماكن للفطارفى البحرين

[جوومانه]

بسم الله الرحمن الرحيم



وين نتريق ؟؟..... سؤال كل ويك اند وكل اجازه لازم ينسأل عل الاقل عندي في البيت ومع انه الريوق بره البيت صار من روتين الويك اند لازم نقعد لنا ساعه نفكر وين نروح وشنو نختار

​

حبيت افتح هالموضوع لطرح تجارب الريوق " الفطور " في مطاعم و كوفي شوبات وحتى الكفتيريات في البحرين واذكر فيه بعض الاماكن الي جربتها مع تقييمي الخاص للمكان .​

واي شخص عنده تجربة في اي مطعم ياريت يذكرها لنا عشان الكل يستفيد​

وراح ابدا مع اول مكان :​

روشيه في منطقة العدليه​

مدخل المحل​

قعدات من الداخل​

بعض الاطباق​

المحل صغير وهادئ ونظيف
القعدات حلوه ومريحه بس الجدران شوي يبي لها تضبيط في الالوان
الاكل لذيذ والاسعار متوسطه​

قبال المطعم في محلهم الثاني يبيع موالح وحلويات للضيافه عندهم رنقينه لذيذه جدا لا تطوفكم​

​

 

[جوومانه]

زعفران

له عدة فروع : المحرق , الرفاع, باب البحرين
تجربتنا كانت في فرع باب البحرين

المكان حلو وسياحي جدا وسط المنامة القديمة

عندهم صينية ريوق مثل الي في الصوره الاولى يكون فيها كذا نوع وفي اطباق ثانيه بالطلب مثل بيض واومليت وهالشغلات

الاكل لذيذ والطعم قريب من طباخ البيت الا السندويجه الى حاطة صورتها ما تقبلت الطعم كباب مع متاي

الاسعار مناسبة جدا
​

 

[جوومانه]

رايس بول ​

​

المطعم اصله هندي بس قلب الحين وقام يقدم ريوق
موجود في مجمع السيتي سنتر في الطابق الارضي قبال ليكلاند وباث اند بدي قريب كارفور​

وله فرع ثاني في السيف الطابق الاول من القسم الجديد يم ياس اصفهاني قبال مايا كافيه​

هذا جزء من المنيو مع الاسعار
عندهم صواني للريوق وعندهم بيض واومليت انواع وصاج بحشوات مختلفه خفيف ولذيذ واطباق ثانيه متنوعه بالاضافه لمشروبات بارده وساخنه​

المطعم نظيف وديكوراته حلوه
الخدمه بطيئه حبتين
الاكل جيد كطعم​

 

[جوومانه]

​

I Hop​

المطعم الامريكي غني عن التعريف
فتح صارله حوالي السنه في سيتي سنتر - البحرين
في الطابق الاول عند دبنهامز​

المطعم اكله دسم جدا شخصيا اذا تريقت فيه ما اتغدى يومها
الاسعار متوسطه الى مرتفعه
البان كيك

الخدمه بطيئة جدا اول زياره كانت اول ما فتح نطرنا 45 دقيقه عشان نحصل طاوله و40 دقيقه عشان يوصل طلبنا قلنا يمكن عشان الضغط اول ما فتحوا بس طلع هذا السستم الطلب وايد ياخذ وقت عشان يجهز​

 

[جوومانه]

شاي كافي ​

في منطقة السنابس قبال مجمع البحرين " جيان " مباشرة​

المحل صغير جدا ودايم مزحوم حتى ايام الدوامات​

ديكورات المحل من التراث , السقف مغطى بحصير والطاولات فيها حبات دومنا كديزاين​

الاكل لذيذ والسعر معقول
المحل صغير مثل ما ذكرت الي ناوي يا يروح من وقت كلش يا متاخر كلش من 9-11 في الغالب راح تنطرون الين ما تحصلون طاوله​

و بالعافيه للي بجربه​

 

[جوومانه]

باستل - Pastel

موقعه في مجمع الضلع في منطقة الهملة

عبارة عن تي لاونج ومحل بيع شوكولا
المحل صغير وضيق وترتيبه غريب شوي
سوفات كبيره مع طاولات صغيره يدوب تكفي الاكل .... كنا ثنين بس بعد ما كفتنا الطاوله من صغرها حامل السكر حطوه لنا عالكرسي !!!
المحل على طول مزدحم والخدمه بطيئة
الريوق عندهم نوعين من الصواني : ريوق بحريني وريوق هندي
وعندهم انواع متنوعه من السندويشات
الاكل لذيذ الاسعار متوسطه ​

 

[جوومانه]

مينوس

في منطقة العدلية Block 338 بعد ليلو مباشره في الشارع الداخلي

عجبني المطعم مريح وهادئ
صاحبة المطعم كانت متواجده وتباشر الطاولات وتاخذ رايهم في الاكل والخدمه
المضيفات بشوشات وخدمتهم سريعه
الاكل شعبي والطعم نفس طباخ البيت وعندهم تنور يخبزون فيه الخبز و الفطاير ويجيبونها دايركت لكم
الاسعار ممتازه​

 

[جوومانه]

مادو - Mado

المطعم التركي الشهير فتح اول فرح له في البحرين من فتره قصيره في مجمع الإنماء بالرفاع

​

خيارات الريوق محدوده نسبيا وكلها انواع أجبان وعسل وبرك
الخدمه بطيئة جدا مع انه كنّا من وقت هناك قبل الزحمه
الأسعار مقبوله
المكان مزحوم على طول وراح تنطرون عشان تحصلون مكان الا اذا رايحين من وقت

تجربه جيده بس ما أظن أكررها في القريب

 

[جوومانه]

لاشوكولا

له 3 فروع في ضاحية السيف ، المنطقة الدبلوماسية ومجمع الإنماء في الرفاع
الاكل لذيذ جدا ومتنوع
عندهم فطور شرقي و أمريكي و فرنسي ومن فترة قريبه بدو يقدمون الفطور البحريني الشعبي
الأسعار معقوله
الخدمه ممكن تتأخر أوقات بسبب الازدحام اغلب الوقت

​

 

[جوومانه]

بسطه

له ثلاثة فروع : درة البحرين ، الرفاع يوز، مجمع الريادات في عالي

المطعم يقدم الاكل الشعبي للوجبات الثلاث
الاكل لذيذ وقريب من طباخ البيت
الأسعار مقبوله
الخدمة بطيئة

​

 

[جوومانه]

​

Kunefeci - كونفجي

اليوم جربنا كوفي شوب فاتح جديد في مجمع السيف
في التوسعه الجديده عند بوابة رقم 10
تابع ل MADO التركي

المكان مزدحم وطابور انتظار طويل
بس احنا على طول دخلونا لانه موجود طاوله على عددنا لكن نطرنا حوالي دقيقه عشان يوصل الطلب
ووصل على دفعات متباعده يعني على بال ما زوجي خلص طبقه بعدين وصل طبقي و أطباق اليهال وصلت بعدها بفتره أطول

يمكن لانه المطعم جديد وعليه إقبال كبير بس لازم يكونون مستعدين لهالشي وكلمناهم عن هالملاحظه واعتذروا لنا


تقييم العام للمطعم

الاكل 8/10

الخدمة 6/10

الأسعار 8/10


​

 

[جوومانه]

مطعم دارسين

موقعه في متحف البحرين الوطني
فيه قعدات داخليه وخارجيه
اختيارنا كان ريوق بحريني وريوق أمريكي و الاثنين للأسف ما كانوا جيدين من حيث الطعم
الخدمة بطيئة جدا حوالي ٤٥ دقيقه عشان يوصل الطلب و مو كامل خلصنا الريوق البحريني بعده وصل الامريكي وبعد ما خلصنا اكل وصل الشاي !!!
​

 

[جوومانه]

فوشن

مطعم وكوفي شوب فرنسي غني عن التعريف
موقعه في مودا مول

جودة الطعام : ١٠/١٠
الخدمة : ١٠/١٠
الاجواء العامة للمكان ١٠/١٠

 

[جوومانه]

فطوري في لاشوكولا

​