مطعم cut by wolfgang puck

[جوومانه]

السلام عليكم و رحمة الله وبركاته




ان شاء الله هالتقرير يكون خفيف وبسيط و اتمنى يعجبكم​

عن زيارتي للمطعم الخيالي أمس في فندق فور سيزونز الغني عن التعريف
​

مطعم CUT by Wolfgang Puck​

للشيف ولفغانغ باك - اشهر من نار على علم
​

و اول ما فتحوا الفندق زار المطعم كم يوم و كان فيه اكثر من عرض للناس ال VIP و بدعوات خاصة طبعا​

الفندق فيه 4 مطاعم اثنين منها لنفس الشيف و ان شاء الله نجربهم و نعطيكم راينا فيها​

للاسف ما صورت وايد لان ما كان في بالي اكتب هالتقرير لكن اليوم تشجعت و ان شاء الله تكون على الاقل المعلومات كافية
​

حجزنا في نفس اليوم و متأخر .. تقريبا الساعة 7 ونص كلمناهم .. قالوا مافيه حجز الا الساعة 10​

قلت لزوجي مو مشكلة بالعكس احسن عشان انوم اليهال و نروح مرتاحين​

تكشخنا و رحنا الفندق .. و انا من زود ما سمعت عن جمال الديكور كنت وايد متحمسة .. و من انبهاري من جمال اللوبي ما صورت
​

فندق Four Seasons Bahrain Bay يعتبر أجدد و أفخم فندق في البحرين حالياً​

تم إفتتاحه برعاية رسمية من رئيس ديوان جلالة الملك الشيخ خالد الخليفة بحضور شخصيات بارزة في المجتمع البحريني​

اللوبي خيااااال و المرة الثانية اذا رحنا بإذن الله ضروري اصوره لكم​

معلومات من الموقع الرسمي للفندق​

يتميز فندق فور سيزونز خليج البحرين بتصميم استثنائي. فهو يشمخ بارتفاع ٦٨ طابقاً على جزيرة خاصة بمساحة ٥ هكتارات (١٢ أكراً)،​

يمكن بلوغها عبر الجسر، أو عن طريق القارب، أو التاكسي المائي.​

تقع غرف الفندق الواسعة في الطابق ١١ حتى طابق ٢٨ وتتضمن ٥٧ جناحاً، تطل جميع الغرف على مناظر رائعة للعاصمة المنامة أو الخليج العربي.​

نوفر لك سبعة خيارات لتناول الطعام والمشروبات في الداخل أو في الهواء الطلق، منها مطعمان بحرينيان متميزان، ولاونج للشيف العالمي وولفغانغ باك.​

استرخي حول إحدى الخمس برك للسباحة واستمتع بمنتجعنا الصحي الذي تضيئه أشعة الشمس الطبيعية،​

كما اننا نقدم باقات من وسائل الراحة للرجال والنساء وللنساء فقط، ليصبح منتجعنا الفخم الرائد في المملكة.
​

سألنا العامل الواقف عند الباب عن مكان المطعم و قال روحوا الممر اللي على اليمين​

الممر شوي طويل لكن نتحمل عشانك يا ولفغانغ .. و لفت انتباهي ان مجوهرات البحرين يجهزون فرعهم في الفندق​

(حاسبوا على مخابيكم اذا بتودون زوجاتكم)
​

وصلنا المطعم على يسارنا و دخلنا و في استقبالنا الموظفة صعدتنا بالمصعد للمطعم .. فيه درج يصعدكم فوق و ما عرفنا عنه الا واحنا نازلين​

ودونا على طاولتنا و انا مو مصدقة الزحممممممة في المطعم .. مع انه يوم وسط الاسبوع​

( في بالي اتخيل الوضع في الويكند شلون يصير)​

الحمدلله حطونا في بوث تقريبا ملموم بعيد عن الزحمة .. و قلت معليش ما عندنا فيو على البحر بس اهم شي بعيد عنهم لاني ما احب الزحمة​

و للامانة على الزحمة لكن المكان هادئ و ما حسينا بأحد أبدا
​

اول ما وصلنا جاب لنا الويتر المنيو و عرفنا عن نفسه .. نسيت اسمه والله بس من مولدوفا​

و شرح لنا عن انواع اللحم .. و كان جدا متعاون في الشرح و يعطينا ادق التفاصيل​

طلبنا تورتليني بالجبن للمقبلات​

2 ستيك فيليه مينيون الواقيو الاسترالي ( انا بالصوص الارجنتيني و زوجي بالستيك صوص مع اضافه سبانخ و ماش بوتيتو)​

وقال وقت السويت انصحكم بالسوفليه​

كل شوي كان احد يمر علينا و يسأل اذا مرتاحين او لا او يشرح شي عن المطعم او بس يبتسم​

وحسسونا أنهم مهتمين فينا و في طلباتنا ..​

تذكرنا ان ما طلبنا المشروبات و طلبنا منيو المشروبات الغير كحولية
​

و بصراحة انا احترت شنو اختار ... قال شنو تحبين قلت له البيري و الفراولة .. قال جربي موكاتيل الروز و الكرانبيري .. قلت له يلا على ذوقك​

اول شي يابوا لنا خبز و زبد​

طريقتهم يعطونا صحن الزبدة بالاعشاب​

و صينية فيها اعتقد 6 انواع خبز و بشرحون عنهم و انتو تختارون​

انا اخترت خبز بالحبوب و خبز الزيتون و زوجي نفس الشي و كانوا لذيذين بس للاسف ما صورتهم​

اول طبق وصل كان المقبلات
​

هذه الصورة تم تصغيرها . الحجم الافتراضي لها هو 1000x563.

​

اتعب و انا اقول خياااال .. حشوة الجبن لذيذة لكنها مو طاغية​

الصوص لذيذ جدا جدا​

انتظرنا الموكاتيلز اللي تاخروا شوي فيه ولما سألنا عنهم قال الويتر لان قلتي تحبين البيري​

الشيف بيسوي لج اياه بالبيري مو الكرانبيري .. بس انتظري شوي عشان يجيب البيري​

قلت معليش ننتظر الابداع​

وصل الستيك .. وشنو اقول عن الستيك​

اه يا لذته .. و طراوته .. و نكهته .. و تتبيلته .. و الصوصات بروحها خيال
​

هذه الصورة تم تصغيرها . الحجم الافتراضي لها هو 1000x563.

​

هذا طبق زوجي و انا مادري وين راحت صورة طبقي .. انا طلبته نفس الشي بس الفرق Butterfly cut عشان الستيك يكون اطرى​

والله ان اللحم يذووووب واحنا ناكله مع انا طلبناه Well Done ..​

اسمتعت بكل لقمة .. حتى بدون صوص .. اللحم بس بالتتبيلة اللي عليه خيااااااال​

وصل الموكاتيل اللي اتعب و انا اقول لذيذ .. و يستاهل الانتظار

صور السناب تصويري طبعا .. مثل ما قلت ما كنت ناوية اكتب التقرير​

طعم الروز خفيف بس مميز و الرازبيري لما ذقت الفريش كان سويت طبيعي ما شاء الله مو مثل الحامض اللي نشتريه​

خلصنا .. و حاسة اني شبعت .. بس الشوكلت سوفليه في بالي​

طلبنا السويت منيو .. و قلت لزوجي انا ما راح اغير عن السوفليه .. و اهوه جرب بنانا كريم بروليه باي .. اعتقد اسمها جذي​

وشنو اقول عن السوفليه و شنو اخلي​

لما وصل كانو اثنين شايلينه .. و الله ما اجذب .. بالعادة السوفليه يكون في صحن صغير​

بس هذا XXL الاول شايله و الثاني شايل 3 صحون صغيرة .. و قال يلا نصور​

صورت العذاب بالفيديو​

و أنا ما اعرف احمل الفيديو و الا كان حطيت لكم العذاب اللي شفته​

فتح فتحه صغيرة في وسط السوفليه و قال (أول شي عندي جوكلت عمره 10 سنوات عشان يوصل لهالنكهة القوية)​

وصب الشوكلت في الفتحة و من فوق السوفليه​

بعدين حط فوقه ملعقة فريش كريم​

وبعدين سكوب شوكلت ايسكريم​

وبعدين صب بقية الشوكلت فوق الايسكريم و قال تفضلوا​

وانا كنت بس باصيح .. عيوني شبعت قبل لا اكل .. و الحجم اصلا مخوفني​

و ريحة الشوكلت صكت بمخي

هذه الصورة تم تصغيرها . الحجم الافتراضي لها هو 1000x563.

​

​

ها .. تعذبتوا معاي​

وهذا السويت اللي طلبه زوجي .. ما فكرت حتى اذوقه لاني كنت مندمجة بالسوفليه بس زوجي يقول لذيذ

هذه الصورة تم تصغيرها . الحجم الافتراضي لها هو 1000x563.

​

كل شي عجبني بالمطعم .. من الخدمة .. للاكل .. للمكان​

بلا استثاء​

تنوع النكهات في الاكل جدا مميز .. مافيه نكهة تطغى على الثانية ..​

و الخلطات بينها مو طبيعية من لذتها​

و ما كان ودي تكمل هالليلة .. ليتنا بس حجزنا بالفندق​

لكن الجايات اكثر ان شاء الله​

فاتورتنا النهائية مع الخدمة تقريبا 132 د.ب​

و السعر لو كان مرتفع شوي لكنه متوقع​

عشان اللحم اللي اخترناه ( فيه انواع ارخص)​

وعشان المكان و مستوى المطعم بعد​

لكن اكيد تجربة بتتكرر بإذن الله​

هذي صورة ختامية لشكل المطعم من مكاننا على طاولتنا الجميلة

​

​

و ان شاء الله هالتقرير البسيط يعجبكم و يشجعكم تزورون البحرين و المطعم​

​