انا طبعا في بالي مخاسير ومصاريف العطله الصيفيه فكيف العب بالحلال وانقص ع عمري فلوس الصيف
بس لاجل عين تكرم مدينه وقلت كلا وكلا كيف لصديقتي الزواج من دوني شلون ما اتحرش فيها واوصيها بسعيد الحظ زوجها
المهم انا ما علمت الحب ( اقصد صديقتي ) الا قبل اسبوع اني يايه البحرين وأمري ع الله خسارة قصدي وناسة سفره وفندق ومطاعم مندي اي باه الشوق الشوق ذابحني مو لأي احد غير للبخاري والمندي اللي بشارع المعارض اليمني ومحمد نور
المهم يوم الخميس الموافق 28/5/2015. تم تجهيز المقرودات الحقائب الرولي بو7 كيلو بس كويتيه تصير 10 كيلو
ويوم الجمعه ٢٩/٥/٢٠١٥. انا طبعا صايمه كالمعتاد لي ماشاءلله ١٥ يوم صايمه لو تدرون شنو كتبت قبل لا اكتب صايمه ؟؟. ( مسافره ) ماعلي دين ولا اني مطلوبه ولله الحمد لكن صيام الحلفان اللي نحلفه ومانفذه او مايكون صحيح او او المهم الصيام تطوع مني ادور الأجر شتبون مني تناشبوني .....
صحيت من النوم الساعه مادري جم صليت اسرع سريع واخذت مفتاحي المدلل ورحت حق ،،،،، حلويات هيل وزعفران( نقوه ) فرع الجابريه ،. شريت للحبايب ولأخ ومتابع منذ عصر منتدى العرب المسافرون وكل ما اييي ويشرف الكويت لازم معاه شي للفراخ او للبيت المهم نفس الشخص تصادفنا في تايلاند وبنفس الفندق ياقرادة حظي المهم وطلب يشوف الفراخ من شرف ونور الكويت وقلت ابشر وسلام عليكم انتهى الموضوع فالكريم يكرم ولازم ارد صوغته اللي كل ما اييي ايبلنا حتى من سافر تايلاند قبل فتره مانسانااا ياويل حالي يا مزنه هههه اخذت له وللصديقه
اول الخساير ااااا قصد بالعافيه عليهم مطرح مايمري يسري يابشوات ،،،، تتهنون والله مامن خساره في معرفتكم وصوغتي
المهم قلنا خل نروح من بعدها الى المطار الدولي نتعشى ونتفطر ونتسحر يوووو صح ماكو صيام ماكو صيام ،،،،
طبعا ماتدرن انتو انني وبكل قوة لم احجز لحد الأن هذا اللي يقولك جهز الدوى قبل الفلعه بالضبط ينطبق عني
المهم رحت وشفت بالمكاتب ع جم التذاكر واقرب رحلات للبحرين وع اي خطوط طبعا انا عبيطه وداخله ع حبيبي google وشايفه كل شي الساعه والطيران وشركاتهم والاسعار المهم رحنا وشفنا دبل بالاسعار طبعا طنشت ورحت اتعشى الجوع شنو كافر
طلبنا احلا معكرونه مشكله حلزوني ع باستا ع فوتوشيني وع مربعه ومدلدله ومادري ايش وربيان ودجاج وبروكلي وووو صلصه بيضاء يا عم وجبن وسبايسي واشططططططططح
ومن ثم نقول الحمدلله بعد الطعام يا اعيال ويا كبار
نتابع التقرير ونكمله في احداث وتعب السفره اللي بعدها ماصارت كانت بدايتها احداث بأحداث
شي خيال وربي اول مره تصيرلي هالاحداث من انوي ع سفر
ومن ثم نقول الحمدلله بعد الطعام يا اعيال ويا كبار
قلبي نقزني ياعالم انه في شي شي شي شي
شنو عاد مادري مادري مادري
وسبحان الله بعد ماعرفت قلت خيره من قال كل تأخيره وفيها خيره
سبحان الله ياناس وياعالم ارجع اقول الصدقه الصدقه الصدقه
تصدقو عن نفسكم وبيتكم واحبابكم ووووو ترحالكم وكل شيء
الفرخه كانت بالسياره عند نزولي للشراء الحلويات من هيل وزعفران
ومن بعد ماخلصت شراء والتحريك قالت بقولج شي بس مو اللحين من تمشين قلت شنو في قولي انا قلت بدوخ راسي وتوريني سنابات اللي ميننتني فيهم اهي تابع ولازم انا اتابع معاها يارب شهالبلاء والقهر ( سوووق مكياج سفر اكل هدايا حب عشق زعل ضيم صخام )
المهم قالتلي في ياهل بعمر١٠ سنوات ضرب طق الدريشه وقالها مح...... المهم تقول كسر خاطري وطلعت من جنطتج فلوس وعطيته
قتلها عليه بالعافيه صدقه عنا وعني وعن اهلي وكملت الطريق
بعد ما عرفت شنو وراااااء النقزه يييييت مباشره ع بالي الصدقه اللي بنت ١٢ سنه تصدقتها قلت ياسبحان الله يارب لك الحمد والشكر
المهم رحت عند قسم وزارة العدل في المطار قلت بله يا اخ شوف علي منع ضبط شي خو انا لاداعوشيه ولا ارهابيه ولا عندي شيكات او كميالات من دون رصيد ولاشي بس طق لك فره ع رقمي المدني وشوف يرحم امك
وهلا هلا ومرحبتين من قال يا فلانه قلت هلا اشوي واقول لبيييييه بس حامض ع بوزه المهم عليج منع سفر يا للهول ضحكت من قال المنع من شنو وليش المهم هذي سالفة لها سنه وانا كنت معانده بالدفع هيييك مو انه ماعندي فلوس لا لأني ما اخذت نتيجه مرضيه
المهم قلت يخسى الجوع ويخسى الذيب اللي مايخليني اسافر
اسحب يارجال وهاذي بطاقة البنك اسحب والاباذنك مايه
طبعا المبلغ وقدره كان ١٣٥٠ دينار كويتي سحب والحمدلله بدقايق ياعالم ان شال وانتهى موضوع المنع يا للتطور باقي بس الحريم اليوم تحمل اسبوع تولد كل شي تطور يا الهي حتى العين الصغيره صارت كبيره والبطة صارت غزال والبيضه صارت حمرا والحنطاًويه صارت بيضاء اللون تسألهم شمسوين قالولوك تتتبيعي اقصد طبيعي عاد بقلبي اقول طبيعي بعييييينكم
المهم قال متى سفرتج قلت الساعه ١:١٠ الظهر يوم ٣٠/٥/٢٠١٥
قلت كفيت ووفيت يعطيك العافيه عاد مادري من جيبه دافع اقول كفيت وفيت المهم الكلمه الحلوه صدقه بعد بس بحدود الاحترااام
المهم صار الفجر والتعب انهكني والنعاس يداعب عيناي اخذ شلالي وقلت يا الحب يا سيارتي ع درب المسيب سيبوني ودني ع بيتي فيني النوم ( ترى مانمت ) لي وقت السفر
المهم رحت العب بالانستا وتويتر واخذني الوقت لي الساعه ١٠:٣٠
بدلت انا والفرخه وكنت قبلها ب٣ ساعات حجزت من وصلت البيت
الحجز كويت بحرين. ذهاب فقط ٧٨ ديناركويتي لشخصين بالغين
بدلنا وشلنا قشنا وركبنا الحب السياره وع المطار يا نفيجيشن
خلصنا اجراءات الختم وقطع التذاكر سريع ماشاءلله
الرحله الساعه ١:٣٠ ظهراا والوصول ٢:٤٠ ظهرا
طيران الجزيره وان واي ذهاب فقط ١+١
ما اقولكم شنو شريت من مطار الكويت حرررررررره
هذا نص الخساير وانابعدي ماطرت وحلقت بسماء الكويت لي البحرين
ياحبي للسوق او محلات تبيع كل شي هههههه وياشين النفس اذا اشتهت شي وتحدك تشتريه غصب طيب ماتفكر وتقول وراك سفرات بعد
طبعا تساهيل من رب العالمين رجال الاعمال تم قطع البوردينغ والختم والمرور ابتعادا عن الزحام بعد ما اخذت ورقة العدل ودخلتها ع الداخليه عشان ينتهي اجراء اخر خطوه للمنع والحمدلله
طبعا ماتدرون اني للحين ماحجزت فندق
المهم ركبت الطياره وتأخرت ع حجز الفندق والسبب لازم انزل صوره بالمنتدى اطمن العالم واقول اني مسافره وتضبيط صور وكذا حركات المهم ما احب احد يفقدني ههه يا عيارهتغيبين وماحد يدري عن ارضك ومكانك وش علومك بكيفك تبين تعلمين وبكيفك لا
حجزت فندق وانا بالطياره واهي باول مرحله الطيران يعني بعدها الوصلة مالت الانترنت فيها روح
وكان اختيالي ليلتين فندق ايبس العائلي الجديد في البحرين
حبيت اجربه من بعد ماجربت الفندق نفسه في كذا مكان
وخليت باقي الايام اشوف لي فندق اخر كالمعتاد ما احب اجلس بفندق واحد
وحسابي غرفه سوبر لشخصين مع الافطار ٥٧ دينار كويتي
موقع الحب بوكيينغ. ( فندق ايبيس )
**** فندق للأمانه جميل وممتاز للعوائل يعني من دون تردد احجز وانت مطمئن بعيد عن البارات والدسكوات والشباب الصيع والازعاج ،،، هذا مايبحث عنه رب الاسره لعائلته وحتى الناس المحترمه ،،
فندق جديد له ٤ شهور فاتح اثاث راقي غرف مناسبه حماماتهم عزكم الله ممتازه الاستقبال خدوم وبشوش ومتعاون هدوء
قريب من سيتي سنتر و مول الدانه ومايبعد عن السيف الا ٥ دقايق سياره طبعا..
المصروفات:
١٣٥٠+٥ + ٧٨ + ٤٤ ؟ +٥٣
توصيل المطار لي الفندق ١٠ دينار بحريني ،، تاكسي الفندق لي مجمع كونتري مول ٥ دنانير بحريني ،،، كوستا٥،٦٠٠ بحريني
تاكسي من كونتري لصالة الافراح في البديع ٥ بحريني ،،، ومن البديع لي مطعم الترويئه ٥ بحريني ،،،، العشاء ١٠،٨٠٠ بحريني ،،، تاكسي من المطعم لي الفندق ٦ بحريني ،،،
هذي مصاريفي لليوم الاول طبعا حالف علي بوطاهر صاحب التاكسي ماياخذ الا ٥ دنانيير مادري شقصته مع ٥ دنانيير هه كل مكان ٥ دنانيير بس عليه بالعافيه انا ارتحت له ورجال كبير وقلت زين لله طيحني برجال كبير ومحترم ويخاف الله فينا واخذت رقمه وبلشت عاد كل اشوي ادزله وتس اب يامعيد عيد الرزق ع الله عليه بالعافيه واقوله يالله تعال اخذنا للمكان الفلاني وخدوم وسريع الاستجابه ومحترم راح تكون سفرتي معاه ان شاءلله مالي خلق ادور تاكسي او اطيح بهندي مايفهم وما افهمه وينصب علي او غشيم او دبل املا لو ڤـِكس ...
الساعه ٥ العصر مادري المغرب لا لا العصر الشمس للحين تقتل ماكان فيني حيل وقوه اني استمر صاحيه صارت العين تعورني ظهري جسمي كله مرهق ومتعب فـ نمت ووقت تلفوني ع ٧:١٠ يصحيني واللحمدلله صحيت بالتوقيت ماشاءلله علي لو عندي دوام ولا موعد لشيء ما جان بعد المنبه بعشرين ساعه اصحى ..
فيفا اشتراك انترنت ٥ و٣ مرتين الصبح واحد قيقا خلصت بسرعه فرديت اشتركت ب ٥
انا روحتي للبحرين يا ناس يامتابعين كانت لحضور العرس ولله الحمد رحت ع الساعه٩:٣٠ مادري١٠ وجلست لي١٢:٣٠ غصب خلوني اطلع اعراسهم اهل البحرين حلوه وبسيطه وجميله وناس بشوشه وطيبه وراقيه واخلاق شعب حبيب وطيب ومسالم فديتهم صديقاتي هههه
طبعا المستحى قتال عندي انا بنيه خجوله وايد يستحي من نفرات واللي معاي بعد تستحي فما تعشينا بالعرس وع لحم بطنا من الكويت يابعد روحي من اذكر اسمها اشتقتلها عياره توج طايره منها خفي علينا يالنومانسيه اقصد الرومانسيه المهم لذلك استحلف علينا الجوع مانرجع الفندق الا ناكل ونتعشى
طلبت شي خفيف لانه الوقت متأخر ونحن لطفاء ماناكل مثل بعض الناس شي دسم ودهن ومادري ايش
فطلبت كبدة دجاج وكبدة غنم وفتوش وعصير ليمون نعناع وافوكادو وعلينا بستين عافيه اللحين الواحد يقدر يرد الفندق وينام واهو مرتاح نفسيا
تبديل سريع بدأ النوم يداهم العين وتشطيب سريع ع المكياج والزينه والى اخره ونوم قتالي بعد لفه سريعه ع حسابي في بعض البرامج ومن ثم تصبحون ع الف خير نهاية سعيده في ربوع اول ليله في البحرين شارع السيف ......
استيقظت من النوم ع الساعه ٤ الفجر صليت صلاة الصبح ورديت نمت اقصد اكمل كتابتي لهذا التقرير لين مايرجع النوم يداعب عيوني الثنتين ،،،
الساعه٢ صحيت من النوم ياللأسف راح النهار كله حتى الريوق ماتريقت المهم احب بالسفر جلسة الافطار وكتابة التقرير
صلاة وتبديل وتضبيط ورحنا مشي مجمع الدانه اللي مافيه شي غير مطعم بوفيه في الدور الاول وقباله كشك مادري مطعم مكشوف للأيس كريم حلو ولولوهايبر مجمع مقابل ولاصق في الفندق ومايستحق الروحه له او العنوه لكن اللي ميت جوع ومستعجل عنده هذا المجمع وبعد بنص الوقت صار خاطرك ايس كريم روح اخذلك ايس كريم واذا ناقصكم شي لولو هايبر مايقصر وفي الدور الارضي مكاتب تأجير سيارات ومحل نظارت وعدسات
( مصاريفي ٢+٣،٥ )
اخذت تاكسي من الفندق حق مطعم محمدنور بشارع المعارض
ب ٤ بحريني بعدها طلبت غدى ع الساعه ٥ ب٢ بحريني ومن ثم تاكسي لمجمع ستي سنتر٤ بحريني مباشره ع الكوفي صداع خطير وادور قهوه عربيه مافي ياقرادة حظي طلبت المهم كوفي حار وللفرخه موفي ايس ٦ بحريني بعدها فراره بهالمحلات الى ان دخلت محل احذيه تكرمون وشريت ٤ احذيه ب **** ومن ثم رحت لمحل gusse شريت حقيبه ب ٥٤ كويتي ومن ثم دخلت الحواج للعطور والمكياج اخذت عطر مو موجود في الكويت ب ٤٨ بحريني طبعا انا اتنفس العطور واشربها كيفي عشقي الأبدي العطور مستحيل ما اشتري مستحيل املك مايقارب ١٣٠ عطر وبعد اشتري وكل عطر بسعره الفلاني المهم هذا العطر اسمه دمشق ع عود خطيييير اشوي عليه موجود في دبي بعد واستغربت حصلته في البحرين وبعدها رحنا جلسنا في كوفي انتظر صديقتي تبي اتييني تسلم علي اهي بحرينيه ومن عرفت بوجودي لزمت تشوفني وين ما اكون فيه قتلها حياج يالغاليه وتسامرنا بالحديث لي الساعه ١٢ فجرا وتوادعنا ع لقاء قريب باذن الله
اخذت ايس كريم لذيذ بعد موموجود في بلادي ع ٤ بحريني
وع باب الخروج ابي اطلع خلاص صار وقت الزحمه لخروج العالم من دار السينما المهم اخذت تاكسي قتله ابي عشاء ودني لمطعم اكسترو طلبنا ٤،٣٠٠ بحريني ودقيت عليه يازين سيارته بس والفلاش اللي مشغله المهم لي الفندق اخذ ٧ لانه وقف عند مطعم فاست فود طلبت الفرخه وجبه سريعه ب١،٥٠٠ وردينا للفندق والنعاس يلعب في عيوني واكتب لكم التفاصيل وانا ابي انام فقلت اكتب اخاف اقعد من النوم الصبح ناسيه كل شي
ودمتم بخير وتصبحون ع الف خير بعد واحلام سعيده لي وبعدها لكم واللي قاعد توه اقول صح النوم
مصاريفي لليوم الثاني في ربوع مول ستي سنتر ومطاعم البحرين وتكاسيهم النار
مع هالجلسه الحلوه بمجمع ستي سنتر والروقان طلبت من رب العباد وقلت ،،،،،،
و إني يالله تمنيتُ الكثير ، وكل الكثير بيديك فقل له كنّ ليكون.
دايم في شخص له ابتسامه خاصه تطلع من قلبك كل ماتتذكر كلامك معاه.
دايم في شخص له ابتسامه خاصه تطلع من قلبك كل ماتتذكر كلامك معاه.
تعجبني الالوان اللي جذي والديكور والاضاءه فقلت لابد من المشاكسين يشاركوني بمشاكساتي ما اقصد احد اقصد خيالي
بدأنا مشوار التسوق والمخاسيرررررر
لاتستغرب ولاتحتتر مع ليمونه حزينه مش حتخسر بيزاتك واخ قلبي وعلي بالعافيه من زمان مومتسوقه وطلعت حرتي هني وبهالمحل ليش مادري
طبعا هذا الشيء توني اكتشفه بهالمحل انه عنده لاصقات حق التضبيط واذا تكرمون يابنات اخذتو منهم احذيه ذات كعب عالي مرات تكون الارضيه ملساء فالاصق مايخليك تتدحرجي وتزلقي ويافشيلتاه وبعد عندهم حق الحذاء وانتم بكرامه اذا اشوي كبير عليكم هاللصقات تصغر وعندهم بعد اللي بأخر الحذاء مرات مع المشي يسوي احمرار او جرح بالرجل فالاصق يمنع وهلا بالمعلومه الطيبه
امنيتي اصحى وانزل للفطور طبعا تحققت بفضل الرحمن وع الساعه ٩ صحيت وبدلت بعد ماصليت الصبح قضاء طافتني الصلاه بسبب التعب واخذني النوم عنها ربي سامحني ع غفلتي الطائشه ،
الفطور رهيب عجيب وبسيط لكن لذيذ متعدده الاصناف وخدمه راقيه ونظافه ومكان يشرح الصدر وطله ولا اروع اخ ياذكريات تتتتااااييييلاااننننــ ،،،، اخاف اكمل الكلمه يسحبون التقرير اهل بوابة البحرين بحبكم أووووي يافديت المده بس ابوووووي يالشيييييخه تاااأاامرين أمووورررر ( الواو ) لابد منها في الكلام
المهم اخذت اول شي كوب كوفي لاتيه يعني الاخت امريكيه طل بس الصداع ذابحني احم احم مرتين وخلاص اكتفيت ،،
بعدها اشطح ع الماعون واخذلك من بعض الأصناف حته يعني الاخت مسويه رجيم اقصد تحافظ ع الرشاقه طل البحرين ورشاقه مايمشي الموضوع بتاتا يا مندي السعد ومحمدنور وكل يوم ايس كريم ،،،، ماعليه النادي ناطرني في الكويت احرق السعرات اللي بلعتيهم ياليمونه في البحرين حيلهم بينهم وبين الكريزي ياويلتاه
وبعدها شرفت الفرخه وانزلت وحطيلي وسويلي يلا مناك روحي عني انا مسافره تروأه ع الاخر مالي خلقج روحي انتي خدمي نفسك بنفسك زمن الدلع باح جا وقتي عاد يابت الماعون قمت اتحمس اروح الشوط الثاني ياميسي بعده ماخلص النهائي كان كوب موكا بعد ماخلصت الماعون التاني
وقعدت بنفس المكان عاجبتني اشراقة الشمس والطله البهيه اتصفح المنتدى والانستقرام الى ان حان النعاس يغلبني يقلبني يتشغلب بعيني
صعدت ونمت لي ١٢ اسرع من الصارخ اتروش بالسعودي اقولها اشطف بالكويتي بعد اسبح بالعاميه المهم وابدل واتعطر واتزكرت انا والفرخه وياالتاكسي تعال اخذنا ع مادري وين اسمها منطقتهم بيت صديقة مال انا في عزيمة غدى طبعا انا قبل لا انام الظهر سويت حجز ومددت المده للفندق لهدوءه ونظافته حتى في بيتي موجذي هدوء يارباه ياميسي ما اروعك ما اعظمك الدوري قالو شنو لنا لنا احم احم وعشرين احم يالبرشا يامعذبهم
حجزت وخلصت ومن نزلت الظهر بروح دفعت بالماستر ٦٨ كويتي
وكنت جايبه حلو من هيل وزعفران اللي اهو نفسه نقوه وكتبت الاسم والرقم عشان راعين الحلو يمرون ياخذونه قتلكم قصته فوق مايحتاج اعيد واكرر مرتين
وركبنا التاكسي محملين بالهدايا للعروس ولأهل العروس وعلبة حلو مشكله من هيل وزعفران بعد عيب داخله بيت الناس ايد ورا وايد جدام مايصير
مسافة الطريق كانت ٢٠ دقيقه بالضبط اخذ منا ٧ بحريني جزاه الله الف خير متعاون معانا بالسعر اقصد العداد متعاون
واحلى تحيه لبنت الكويت والفرخه وزغرطي يا ام حسنين هههه كللووووش ترى مو انا العروس يا حجه العروس نايمه بالعسل ماتدري عنا خليني بس اتغدى يرحم امك لا ارجع ع هالزغروطه المنيله هههههه ( اتغشمر ) حلوه ترى الزغاريط كلللللوووووش
الفال لكم يارب تتزوجون ونفتك من العزابيه وفرارتهم بالمجمعات والشوارع والبلدان زحمه يادنيا زحمه .....
وكان خوش غدى ماشاءلله طبخ ام البيت تسلم ايدك يا ام العروس
وسوالف ودردشه وضحك وحكايات الى ان شرفت العروس فديتها تعرف السنع وخلت زوجها ايبها عندي عفيه عليج شاطره من اول شي خليكي قدعه يا ست حتى لا تبجين بعدين وووطني ورورور
الى الساعه ٤،٣٠ من دون لايحسون ارسلت وتس اب للتاكسي تعال اخذني وخلال ربع ساعه شرف توادعنا بالأحضان قتلهم ربما اروح وماتشوفوني قالت الا بشوفك بعد موووو بكيفك
ويا التاكسي اخذني ع المحرق بعد عيني ااااابي اشووووف السوووق مالكم يالأخو
وقال اخليكم وارجع السيتي ومن تخلصون علميني قلت لااااع يالغالي وين تخليني بين هالهنود والباكساتنيين والبنغاليه وما اعرف ايييش لا ابوي خلك معانا وخل ابو العداد شغال ويحسب
بس انت تبقى ناطرنا بالسياره قال ابشري براحتك
اخذناها فراره بمحلات العبي بس والله مادخلنا غيرهم ومحل للدراريع كنت بشتري للقرقيعان بس تذكرت يمكن اكون مسافره حزتها ليش اشتري وادفيهم بالخزانه موناقصه دفا الخزانه الدولاب مالي مليان
وبعدتقريبا ساعتين والله ناسيه بس كأني طلعت ع الساعه ٩ قال خلصتو قلت اي قال ها ملزمه تروحين الدمام والا الخبر قلت لا ياشيخ خلاص شريت بمايكفي ب ٢٠٠ بحريني ماقصرت
قال في محل للقهوه العربيه اللي مدووووختني تبين وتقولين البحرين مافيها قهوه عربيه ونزلت اشتريت نص كيلو من محل الجزيره ع ٣ بحريني و بعدها قال ها وين بتسيرون قلت امواج ياعم الشيخ بدنا نتعشى ونشوف امواج البحرين زبحتونا اقصد ذبحتونا امواج وأمواااج قال ابشري نزلنا وراح وقال قبل لاتمشون بنص ساعه بلغيني حتى امركم
تمشينا والله المكان حلو ويشرح القلب ومطاعم كثيره كأنه المارينا عندنا واختارت الفرخه مطعم صيني مادري ياباني مادري اسيوي المهم كان زحمه عليه وشكله لذيذ وانه حقا لذيذ
وطلبنا ٣ اطباق ياويلتاه كلها ربيان نودلز بالخضار واللحم والربيان وربيان مشوي بالصلصه وديناميك مو الممثله لا الصوص عليه مادري وش اسمه بس مقارب لاسمها ام خشم وعصير اناناس لي طبعا وليمون لها طلع احسابنا ٢١،٥ بحريني
بعدها لازم شاي منعنع حق هالدسومه اللي واقفه بالبلعوم اتجهنا للجهه المقابله ودخلنا كافيه بعد ايام بيروت واحتسيت من ذالشاي المنعنع وقعدنا نطقطق بالانستقرام والسناب والوتس اب الى الساعه ١ و احسابنا كان ٣،٥ بحريني بعدها ارسلت مسج تعال يالتاكسي رجعنا الى الفندققق خلاص النوم النوم قتال ...
اخذنا وع السريع للفندق احسابه ٨+١٩ == ٢٩ يستاهل عليه العافيه ....
وكان في استقبالنا مفاجأه علبتين كيك ولكن كيك يخلي النيم صاحي والصاحي عرقوووز اقصد منعنش صج حلووو يهبل ولذيذ وكان بوقته بعد هالدسم اللي اكلناه في المطعم بأمواج طبعا المفاجأه كانت من اصحاب اللي خذو الحلو اللي مخليته لهم عند الرسبشن كثر الله خيركم ويعطيكم العافيه واخجلتوني يا اهل البحرين بكرمكم ،،، مرسي اووووي وادري انهم متابعيني بالمنتدى كالمعتاد سابقا تشكرات ولاتعيدونها موبصالحكم لاني اعشق الحلو بس مو اي حلوووو هااااا ولكن اختياركم لصنف المشكل للكيف ميه ميه تسلمون
ملاحظه امواج طريقته بحر او بحيره صناعيه سد ويمينها مطاعم وكافيهات وشيش ويسارها كذلك ومطاعم مختلفة الأصناف والبلدان وبره الحوطه او مرسى الأمواج في كم فندق للي يبي يسكن بجانب امواج لكن بعيد عن السيف والبديع والمعارض والمنامه ....
وبعد هالمشاوير الخطيره والشاقه لليوم ما اقدر انام من دون لا اتروش اسبح عشان انام وانا منعنشه ونظيفه واحس نفسي خفيفه
طبعا اهم شي شربت قهوه في بيت صديقتي عربيه يعني الاخت سهاري الليله وتشير الساعه الأن ٤:٤٤ فجرا طارت النومه بعد التسبوحه تبالها
وعلمتهم ع طريقتنا لعمل القهوه واكثر من طريقه وشنو نضع فيها من مكونات ووو. ( تراني خوش وحده طباخه ماهره وسنعه اعلم )
وتصبحون ع الف خير واحلام سعيده كالمعتاد لي ولكم يارب احلم احد يايبلي رقيييي ابي رقيييي
مصروفات اليوم ::
الفندق٦٨ دينار ،، التاكسي ٧ دينار ، عبي ٥٢+٢٨+١٠٥
اخذت شالات ٣ حبات ع ١٢ بحريني ،، التاكسي من بيت ارفيجتي لي سوق المحرق وانتظرنا لي ماخلصنا وبعدها ودانا ع امواج اخذ١٩ بحريني ،، المطعم عشاء٢٢ بحريني ،، كافيه ٣،٥٠٠ بحريني ،، وردينا نفس التاكسي اخذ ٨ بحريني
صباح الخير ومساء الخيرات
وصيام مقبول وتقبل الله طاعتكم
اكمل معكم باقي يومياتي في دانة الخليج البحرين
٢/٦/٢٠١٥
مساء الخير طبعا ماراح اقولكم متى قعدت من النوم عشان لاتقولون حرام فيك السفر بس بقول وراح اسوي نفسي ما قريت تعليقكم الساعه٥ المغرب ياويلتاه يا ليمونه راح منك نص اليوم
اسرع سريع صلاة وبعدها تبديل وتضبيط وتجهيز وع اللوبي ارسل مسج للتاكسي تعال اخذنا ع السيف طبعا قبل لا انزل صداع فعملت لنفسي قهوه عربيه بالغلايه مالت الفندق ستيل فماعليها شر بتغسل وتتنظف زي ماكانت وروأت مزاجي مع حبات كاكاكاو مادري كيك
وياني التاكسي وع السيف والعالي طبعا المجمع كلوووو تنزيلات تخفيضات حتى محلات الساعات العالميه والملابس السبورتيه
المهم اشتريت لعمري طقم ملابس وساعه للفرخ الكبير بما انه يصادف عيد ميلاده ٣/٦ واشتريت ٣ عطور وبعد شي حلو هاند ميد يعني صناعه يدويه اخذتها للسفر وطلعات السياره فنجان قهوه عربيه واستكانه للفرنسيه والتركيه وللشاي بتاع كلوو مع الصندوق حقهم للحفظ اخذتهم بصراحه للسفر اتشيحط بعدين عليكم واووو وشي
مجمع العالي رحت له كان شبه اغلب المحلات مسكره مغلقه فبكرا بروح مجمع البحرين واكتفي به سيد جنيد واصغر علي موجوده محلاتهم وبعدها سحبت مصاري اخ ياقلبي وانا كل يوم اسحب ولكم مليييينا فلوس
المهم وارسلت للتاكسي تعال و٥ دقايق والا اهو في الخارج ينتظرني بوابه٥ وع فندق مادري ايش اسمه نتعشى انا والفرخه اللي معي فطفط عشاء فاخر لشخصين كامل تشكيلة مقبلات وصنف. مشريات بحريه وصنف مشويات لحم وعصير عصير وماي وبس والله واعوذ بالله من كل منكر ويبعده عني وعن متابعيني بالذات وع الساعه ١ خلصنا التاكسي ناطرني ارسلت له مسج تعال والله اني نشبه بس ماعليكم مستربح من وراي كأني ماخذته لي يوم كامل معي وبالاخير صار بدي غارد تدرون ليش راح اعلمكم السالفه
وانا طالعه من الفندق اللي فيه المطعم وتوني صعدت اركب السياره الا يتفضل رجال عند الباب ومعاه ورده حمرا يامال اليهد اللي ياخذك وش تبي الا السايق يغلق الباب اتوماتيك طبعا هذا اللي خلاني بعد احب التاكسي لسيارته اتوماتيك وجديده ونظيفه الله يبعده عن شر الحوادث ويمفيه وياخذ خيرها يارب انما يستاهل الدعوات قولو امين معاي المهم وكانت الدرايش الجامات مفتوحه يقول للسايق اسمه عباس طبعا افتح الباب بكلمهم قال شتبي فيهم قال بس بعططيها هالورده ومادري ايش جان يقول لا ماراح افتح ويلا روح قال انا رجل دبلوماسي والله وحياة امك ان شاءلله وزير انا شسويلك شتبي وجع توجعك ملاحقني شتبي يخرب بيته الحلو بالسالفه اني فترة وجودي بالمطعم ولا ادري عنه بس كنت اشوفهم مجموعة رجال وياكلون
ومادري ايش مادريت ابن الييه معجب بعزرائيل يشيلك قولو معاي امين هههههه والله ويقوله التاكسي بعد كشتي شنو يعني دبلوماسي يلا يلا ومشى حرك السياره التاكسي انا طبعا ساكته ومصدومه ومخترعه من الموقف وجرأته جان فرختي تقول انا شفته بالمطعم قتلها يولي المهم قالي التاكسي انا قتلج اي شي يصير او احد يتعرض لج دقي علي قلت الحمدلله ماصار شي واللي صار جدامك وامامك وماقصرت ههههه انما حصل تهزيئه منه موصج انصدم انه التاكسي حرك عنه ههههه وبصراحه انا خفت ع راعي التاكسي لايسوي فيه شي ع انه دبلوماسي وفعلا او شخصيه لانه كان في المطعم مع رجال بدي غاردات وبس يبخششش الستاف كله مالت بس مالت ع الاخلاق والمناصب البطاله اللي تخلي البشر تتحرش وماتحسب احساب
التربيه والاخلاق والعادات والضيوف اللي تشرف بلادهم
طبعا انا ما اهتميت له ولا عكر مزاجي ولاشي عادي ولا كأنه صار شي بس حاشني صداع من الخرعه والصدمه
ورحت كافيه طلبت لاتيه والشوكولاته الكره السائحه البلوره عاد لاتقولون ماعرفتوها المطعم بجانب البنديره @@@@ اسم المطعم اكتبه
وبالاخير بعد ماخلصنا مزاج وترويقه كلمت عباس التاكسي ياخذنا للفندق
والحين اكتب لكم التقرير والساعه مادري كم لاني تصفحت كالمعتاد المنتدى والانستقرام والسناب وتويتر يالهوي وكل واحد وله مجال لكن المحتوى شبه متشابهه شخصيتي واحده لكن في المنتدى اخذ راحتي اكثر ماراح اعلمكم السر طبعا الراحه في الكتابه والمزاح
استودعكم الله بلقاء قريب ان شاءلله مع يوميات ليمونه في البحرين
وكانت محدثكم لليوم ليمونه في ربوع السيف والعالي واشباح المطعم اللبناني بــ فندق ما
الخيل 10 العشاء 15،500 , 78 اصغرعلي ،سيد جنيد 42 ، القرشي 24 ، 2 مطعم ، 30 تاكسي مع بخشيش كان حسابه19 ، 6 بنك بيري
بهذا اليوم نسيت اكتب يومياتي وين رحت وشسويت انشغلت عن الكتابه للاسف بس لحقت اكتب مصروفاتي
تريقت اليوم بحمدلله انا وفطفط
وبعدها صععدت الغرفه نمت طبعا تريقت لأني مواصله سهر مو نايمه. وقت تلفوني ع الساعه 1 الظهر والحمدلله نمت وقعدت قبل المنبه بشوي صليت وتبدلنا وتبخرنا ونزلنا الرسبشن اخذت تاكسي. وطبعا كنت من قبلها مجهزه جناط السفر و كان عندي عطور وايد اهي اللي ابتلشت فيهم مادري وين احطهم وكراتينهم جدا كبار المهم قررت اخر قرار العطور اللي بتكون لي افتحها واخفف عني الكراتين لهم وكذلك للفراخ بعد المشكله الفراخ موعندي فكان خاطري اخذهم بكراتينهم مافتحت عطرين للفراخ تندمت ورديتهم بكراتينهم المهم ، رحنا مع التاكسي لبيت صديقتي الثانيه غدى وماشاءلله كل بناتهم ياييين 10 بنات واحنا 2 فصرنا فريق كرة قدم فريق البرشا طبعا طبعا وفريق اليوفي وشلسي ومدريد واتلتيكو والوهقه اذا كان معي اتلتيكو مدريد احب مدربهم يعجبني جدا ههههه المهم كل ما لذ وطاب مسوينه لي عشتو وانا موصيتهم من قبلها بيومين احنا ماناكل وايد
واخذ التاكسي 8 بحريني ، ع الساعه 5،30 كلمت عباس عرفتوه طبعا تاكسي شاب بحريني راقي الاخلاق والتعامل ماشاءلله ،، يقولكم الشخص ماتعرفه الا بالمواقف وهذا لا يقربلي ولايصيرلي لكن فزع فزعة اخوان ماشاءلله يوم تعرض لي الدبلوماسي وبعد غيره باليوم التالي المهم ماشاءلله حافظ العنوان اقل من 10 دقايق اهو عندي. واخذنا ع الفندق نبي نبدل ونغير ملابسنا وبعدها نروح امواج اسرع سريع بدلنا ويوم رحت الفندق ايا الزحمه اي العالم اللي منوره البحرين وع امواج من الساعه8 لي الساعه 12 كان الجو. متعب
