ويسعدني ان التقي وياكم في تقريري اليديد عن الكويت الحبيبه بعد ماتكلمنا عن رحلتي لقطر واعيش معاكم تجاربي فيها واتمنى تستفيدون منها
رحلتنا كانت قبل سفرت قطر وبالتحديد في شهر 11 / 2014
ووقتها سافرت أنا وبناتي بس وهناك استقبلتنا صديقتي أم أحمد واللي سفرتنا مخصوص كانت عشانها
وقضينا 3 أيام كانت روعه وماحسينا بالوقت وتمنينا لو يلسنا أكثر
لفينا فيها أسواق ومولات ومطاعم وكافيهات
وبخبركم عن تجاربي في هاي السفره ولكن بدون ترتيب للاحداث
وببدأ أول شي
بالطيران
سافرنا وقتها ع طيران العربيه من مطار الشارجه اللي عدال بيتنا ( أحلى شي )
يعني اذا يزعلني بوعيسى آخذ شنطتي وما أروح بيت أهلي انما أروح المطار وع أول طياره أسافر هههههههههههههههههههه
أمزح وياكم لو صحيح جان كل شهر بزعل مره هههههههههههههههههه
وجان بوعيسى سكر عني مطار الشارجه بسببي
الفندق
في نفس السنه سافرت مرتين للكويت
مره يمكن في شهر 5 ممتأكده بالضبط ووقتها سكنا في فندق جميرا وخذينا سويت من غرفتين وصاله وكان فيه مطبخ صغير وعزكم الله حمامين
ولوبي الفندق كان وايد جميل وشرح وحتى سويتنا حلو
بس ماعيبني بوفيه الريوق
المره هاي حبينا نغير وسكنا في فندق
Symphony Style Hotel Kuwait
فندق سينفوني
وخذينا سويت من غرفه وصاله وفيه حمامين
الفندق حلو وع البحر وكل شي فيه زين بس حسيت انه جميرا كان أشرح وأونس
وقلت مره ثانيه مابسكن الا في جميرا
قالوا نحن نبا نجرب الريوق برع في مطاعم ثانيه بعد نقاش
وصلنا لاتفاقيه أول يوم نجرب ريوقهم في الفندق وثاني يوم برع
واليوم بعطيكم ريوق فندقنا الحلو الصراحه حبيته أكثر من ريوق فندق جميرا مع انه بوفيه جميرا كان أكبر بس كانت بعض الاطباق مب لذيذه بس هاذيل ريوقهم حلو ولذيذ
1-سوق العربيد في فتره يلستنا هالكم يوم مرينا ع سوق العربيد والصراحه عندهم جلابيات ( دراريع ) تجنن واسعارهم رخيصه ، ولكن عيبهم انه تختار الموديل اللي تحبه وياخذون قياسكم ويخيطونها لكم ونحن سرنا أول يوم واستلمناهم بعد يومين ونحن سايرين المطار للاسف ماصورته
2- سوق المباركيه دخلنا فيه واتشرينا منه بعض الأغراض وماطولنا فيه البنات مب عاجبنهم يبون نروح مكان ثاني
3- مول 360
سبق زرته في المره اللي طافت وتسوقنا منه بس هاي المره زرناه لأجل مطعم عقب بخبركم عنه
4- الافنيوز مول هذا المول العجيب اللي وايد حبيته واتمنى يسوون فندق ملاصق له عشان أسكنه في السفره اللي طافت تسوقنا منه ، بس في هاي السفره خليناها كلها مطاعم وسينما بعطيكم صور عنه في الاجزاء اليايه
معلومه مهمه أنا خبرتكم انه يلستا 3 أيام بس عقب تذكرت انه نحن بس يلسنا يومين في الكويت وصلنا الخميس العصر ورجعنا يوم السبت فليل
قبل لاأبدا بجزء اليوم أحب أقولكم وفي كثير منكم يعرفون هالشي انه الكويت مشهوره بمطاعمها المتميزه ورغم انه عندنا في الامارات وبالتحديد في دبي مطاعم أشكال والوان الا اني جربت مطاعم في الكويت ماسبق جربتها عندنا وقبل سفرنا بناتي ماعندهم شغله الا يجمعون معلومات وعنوانين عن المطاعم ومحلات حلويات عشان يجربونها فأعملوا حسابكم اللي بيزور الكويت لابد ويزيد وزنه شوي
وكان هالمطعم من ضمن بحث البنات وصمموا الا نتريق فيه ، وطبعا لابد من تحقيق رغباتهم
عنوان المطعم
Address: Arabian Gulf St., Opposite Seef Palace, Kuwait City Arabian Gulf Street, Kuwait City, Kuwait Phone:+965 2246 5049 هو مقابل قصر السيف
في هاليوم بعد ماخلصنا مشاويرنا يينا الافنيوز في البدايه كان في نيتي أتسوق بس حسيت نفسي مالي بارض للتسوق وأبا أروق نفسي خليت البنات يتمشون وأنا وصديقتي وحبيبتي أم أحمد دخلنا كوفي هارفي نيلكز وشربنا القهوه ويلسنا ندردش ونتفرج ع اللي ساير واللي راد وعقب تعشينا في مطعم بزه بخبركم عنه في الجزء الياي المكان جدا جميل وراقي وراااايق أنصح بزيارته وهو موجود في الجراند أفنيوز في الدور الثاني
بعد ماطلعنا من كافيه هارفي نيكلز تمشينا شويه وعقب سرنا صوب السوق القديم والجزء هذا وايد حبيته وانا أمشي فيه ، له متعه خاصه اخترنا مطعم بزه وقتها ماكنت يوعانه بس أبا أجرب كل شي ، والغاليه أم أحمد رشحتلي هالمطعم وأنا من النظره الأولى عجبني لديكوراته الحلوه واللي فيها من الماضي الصراحه حبيته وايد واعطيه 10 / 10
لازلنا في الافنيوز الصراحه مول الافنيوز من اكثر المولات اللي اعجبت فيها بصوره عامه من بين كل مولات الدول الثانيه ان مشيتوا صوب قسم الماركات الاجواء هناك غير ، تحسون كأنكم تمشون في مدينة راقيه مدينه للطبقه الارستقراطيه وياحلات كوفيهاتها ويلساتها وخصوصا اللي تابعه للماركات مثل كفالي وهارفي نيكلز ولو سرتوا صوب القسم التراثي بعد هذا عالم ثاني من الجمال ، وفيها من ريحة الماضي والديكورات والمطاعم والجدران وغيرها اللي يحسسك انك تعيش في عبق الماضي ولكن بشكل جميل شعور وراحه نفسيه وأنا أتمشى في هالسكيك ولو سرنا صوب المول من الجهه الثانيه واللي يشبه المولات المعتاده بعد تحس بالراحه لوسع المكان وكثرة المحلات وتنوعها الافنيوز مول ماينشبع منه ولاينمل ومايكفيه زياره وحده ولو كل يوم بس اتمشيتوا فيه بعد ماينمل
اليوم بآخذكم لمطعم جميل ومايقل جمال عن مطعم بزه ديكورات حلوه وفيها من التراث خدمه ممتازه وأكل وأطباق لذيييييذه اعطيه تقييم 10 / 10
صور متنوعه من تجربتنا لهاليوم في مطعم كاشونه
اتذكر كان آخر يوم لنا في الكويت وقررنا نسير نتغدى فيه وكان ختامها مسك لأحلى غداء وأحلى جمعه
Address: #16 Ground floor, 244 Abdulaziz Bin Abdulrahman Al Saud Phone:+965 2227 1439
Expressway, Fnaitees, Kuwait
Open today · 2:00 – 10:30 pm
معلومات من النت
جربة فريدة مــن نوعهـا يعيشهــــا زوار مطعـــم «Pop a loop» في مجمع ديفون
حيث يستطيعون التمتع بالأطباق المفضلة لديهم في أجواء لا تخلو من المرح والخيال والطرافة في بعض الأحيان
فانتظار وصول الطبق عبر الـ «rollercoaster» فيه الكثير من المتعة والحماس ويجعل من وقت الطعام وقتا مسليا.
ويعتبر مطعم «Pop a loop» من «المطاعم الذكية» في العالم
وهو المطعم الأول في العالم العربي الذي يعتمد هذه التقنية المتطورة في تقديم الطعام وهي حركة فيزيائية سريعة لا تحتاج إلى الكهرباء وتستغرق رحلة الطبق عبره أقل من 10 ثوان، وعن الفكرة يقول صاحب المطعم محمد العنجري إن فكرة المطعم ألمانية ويوجد له 4 فروع في ألمانيا، وهذا هو الفرع الأول الذي يفتح خارج ألمانيا في العالم وهو تجربة فريدة من نوعها في الكويت وتحاكي الأفكار الشبابية من خلال الحركة والديكور.
ان ما يميز المطعم هو أن الزائر يقوم بطلب طعامه عبر شاشة موضوعة على الطاولة، ويمكنه التعرف على كل الأطباق من خلال لمس الصورة بها ورؤية الطبق قبل طلبه، وبعد الانتهاء من الطلب ينتظر الزبون فترة تتراوح بين 15 و20 دقيقة كحد أقصى ليصله طبقه مرقما برقم الكرسي الخاص به. والجدير ذكره هو أن قائمة الطعام تتميز بأنها تتغير كل فترة حرصا على التجديد.
ما مهمة الموظفين في المطعم فهي تقتصر على مساعدة الزبائن على إتمام طلباتهم في حال احتاجوا الى ذلك وطبعا تأمين كل سبل الراحة التي تساعد على الاستمتاع بالأطباق التي يمكن اختيارها من ضمن قائمة عالمية متنوعة تتناسب مع كل الأذواق فهي تشتمل على الأطباق الكويتية والبرغر والباستا والسلطات والمقبلات والحلويات وغيرها.
انطباعي عنه
اول مره زرت هالمطعم كان قبل كم سنه في يوربابارك في المانيا وكان وقتها توا فاتح يديد
وعجبتنا فكرته وحبينا أطباقه
وقبل لا أسافر الكويت قريت عنه انه موجود في الكويت وهو الفرع الوحيد اللي خارج المانيا
وفي المانيا قريت انه عندهم 3 فروع
لما دخلت المطعم حسيته وايد صغير في الحجم مقارنه باللي في المانيا وماحبيت ديكوراته
ولكن لابد من تجربته لأنه فعلا مطعم متميز بفكرته العجيبه
ولما يلسنا وساعدنا الموظف في اختيار أطباق وعلمنا نكيف نختار من المنيو
طلبنا وبدأت مرحلة الضحك والوناسه ع كل جدر ينزل علينا
والأهم وبدون مبالغه
أطباقه وااااايد لذيذه الصراحه ماتوقعته جيه
المطعم يستحق التجربه والتكرار
وحاولوا تسيرون بدري او تحجزون قبل لاتسيرون عشان تحصلون مكان لأنه صغير وممكن يكون مزدحم
