يتألف هذا المجمع من خمسة أبراج - ثلاثة أبراج سكنية، و برج مكاتب، إلى جانب البرج الذي يحتضن فندق جميرا في أبراج الاتحاد. ويشتمل الفندق على مجموعة من المواقع الفريدة للمناسبات الاجتماعية ومرافق مميزة للمؤتمرات والاجتماعات و382 من الغرف والأجنحة الفاخرة التي تعرض أجمل المشاهد للخليج العربي.
سواء كنت تفضل قضاء الوقت بالاستجمام في أحد المسابح الثلاثة، أو التنزه على الشاطئ الخاص البديع، أو الأختيار من أفضل مراكز التسوق في الشرق الأوسط، أو حتى الاستمتاع بالرعاية والعناية في منتجع تاليس سبا الصحي، فإننا متأكدون أنك لن تجد لخدماتنا مثيلاً قط.
في البداية بخبركم عن قصة حجزنا في هذا الفندق الفخم
اول شيء دخلت على موقع بوكينج و شفت فندق الحمرا بابوظبي و شفت الخيارات جميلة و الشقه فيها غرفتين و سعرها كان خيالي تقريبا 350 لليوم فحجزت و توكلت على الله
وصلنا ابوظبي و الشارع امام الفندق فيه تصليحات و بصعوبة وصلنا للفندق و اول ما دخلت عيبني الديكور و كان فيه جلسة سدو جميلة و انا كنت في الاستقبال اكلم الحرمة و اسالها عن الغرف
و زوجي ينزل الاغراض من السياره و عيالي واقفين عند راسي و يقولون اساليهم عندهم حوض سباحة و انا اقول عندهم لاني شفت في الموقع الفندق كان يطل على الكورنيش
لكن الصدمة الاولى انه الفندق داخل المدينة و بعدها قلت بتأكد سألت عندكم حوض سباحة ؟؟؟؟؟ ردت لا هاي كانت حالتنا
قلت كيف انا حجزت و تأكدت انه عندكم قالت لا عندنا فندق ثاني و تقدرون تركبون الباص و يوصلكم للفندق اي وقت حبيتوا
كلمت زوجي و قلت الفندق ما فيه حوض سباحة و احنا اهم شيء حق طلعتنا للفنادق هو حوض السباحة
فرجعت و كلمت المسؤول و قال زوجي خلاص بنكنسل الحجز و اتصلوا على موقع بوكينج و اعتقد كان في بريطانيا و كلمت الموظف هناك و الحمدلله كانوا متعاونين جدا جدا و ما سحبوا و لا درهم
للامانه الفندق ممتاز للسياح اللي يرغبون في المبيت فقط لانه موقعه في وسط المدينة و كل شيء متوفر بالقرب منه
عاد هني رجعت للبحث
دخلت موقع بوكينج و دورت على الفنادق و كلها فل لانه وقت اجازة عيد الاضحى
و اول ما شفت الفندق تذكرت اني قايلة المرة الياية بحجز في هالفندق و رب ضرة نافعه
و توجهنا على طول للفندق و تفاجأنا بالازدحام فقلت اكيد ما بنحصل غرفة فاضية
توجهنا الى الاستقبال و الحمدلله عندهم غرف فاضية و سألهم زوجي عن السعر المباشر و السعر من بوكينج و كم الفرق
و اخيرا سألهم اذا بيحصل خصم من مكان عمله قالوا نعم في خصم و كان هذا الافضل
الحين طلبوا بطاقة العمل !!!! وينها ؟؟؟ ناسينها في البيت بالاخص في السيارة لانه طالعين بسيارة ثانية طيب و الحل
عطاهم رقم البطاقة قالوا ما ينفع اوكي بنخلي الاهل يصورونها و يطرشونها على الايميل بعد ما ينفع
اخيرا قالوا خلاص تفضلوا و حياكم الله بدون البطاقة
الحجز كان بدون فطور لكن طلبناه مع الفطور لاني كنت متأكده انه فطورهم لذيذ و لا يعلى عليه طلعت الغرفة تقريبا
1200 مع الفطور و بعد الخصم يمكن 950 ما اذكر كم بالضبط بس السعر كان ممتاز
قبل لا نتوجه للعشاء اذكر انه اخونا سعود بن محمد كان مسوي تقرير عن مطعم الفنر و انه موجود في فندق الريتز
عاد انا ما صدقت خبر على طول قلت وجهتنا لمطعم الفنر لانه اللي في دبي ما حالفني الحظ اني اجربه من كثر الزحمة اللي فيه
وصلنا مسيد الشيخ زايد الله يرحمه تعبت و انا احاول اصور صوره مرتبه
وصلنا فندق الريتز و صعدنا لين البوابة و بعدين اكتشفنا انه المطعم ورا الفندق
يعني اول ما تدخلون تاخذون يمين على طول باتجاه الفلل و ندخل المواقف
المواقف فاضية و استانست وايد و هني التماثيل برع المطعم
عيالي تخبلوا على هالجيب الازرق و يننوني وياهم
و هاي حليلها تخض اللبن
المروي في الكويت يسمونه الكندري
هاي غرف الفندق
الجلسات الخارجية فيها ارضي و فيها كراسي بس من الحر محد يالس برع
السحارة و الخيش
هذا المطعم فاضي من الداخل و فيه عدة جلسات
اخترنا جلسة اخر شيء و محد غيرنا يالس و اول شيء الضيافه نخي ( دنقو ) ( حمص )
طلبت شوربة عدس
ولدي طلب مجبوس دياي
انا طلبت بلاليط ( شعيرية )
و زوجي طلب صحن كباب لحم
مع روب
طلبي عصير اناناس و ولدي عصير مانجو و دايم يطلب و ما يشرب و 2 نامليت على نكهات متعدده بس زوجي قال بيجرب العادي و طعمة ماي غازي
و الحلو عصيدة بوبر و قهوة بس العصيده طعمها ابدا مب حلو
و هاي الجلسة الارضية عيالي كانوا يبغونها بس اختكم ما تقدر
المساند و الدوشق نفسه بالضبط كان في كل بيوتنا قديما
و الحلو في المطعم فيه جلسات ثانية عند المطبخ و مثل ركن يبيعون فيه سوالف اول و هذا سيكل راعي الدكان
مداخن و بخور للبيع
المكشة و المهفة و خيش البقوليات
غواري و دلال نحاس و فنايين قهوة و مرش كلها قديمة و للبيع
صحون اول للبيع و نفسهم يستخدمونهم في المطعم
و هاي الصحون البرتقالية اشتريت منهم 2
و هذيل لين الحين نستخدمهم و مالنا غناة عنهم
هاي الرفوف في الاستقبال
و هذا لبس العاملات و الحين يلبسونه في المناسبات بس اكثر شيء للاطفال
تيلفوناتنا قبل و المنبه ( السنطور )
و هذا النامليت المشكل
هذا يكون ويا المروي
طلعنا من المطعم تقييمي له ممتاز جدا جدا و الاكل بصراحة تراثي من الدرجة الاولى لدرجة انه المجبوس كلته و تذكرت مجبوس يدتي الله يرحمها قبل 20 سنه نفس الطعم بالضبط
و المكان تراثي بحت و حاطين اغاني ميحد حمد و عيالي ما يلسوا من كثر ما يترقصون على الكرسي بس الحمدلله محد غيرنا في المطعم بس بعدين يلسوا يمكن ثلاث عوايل فقط
اللي ما يحبون الاغاني الصوت مب عالي و اغاني تراثية قديمة يعني ما فيها من الاغاني الحديثة اللي تلوع الجبد
و السعر كان ممتاز بس نسيت كم
شوفوا على اليسار هذيل الابراج الخمسة و مثل ما ذكرت قبل شكلهم و انتوا يايين من صوب الكورنيش كانهم غراندايز اذا تذكرونه
و هذا قصر الامارات للاسف ما دخلته بس المرة اليايه ان شاء لازم ازوره
هاي الكراسي عند غرفتنا
الممر بين الغرف و الرسمة جمييييييييييله
و ردينا للغرفة و و صلينا و على طول للنووووووووم
بس بخبركم عن سالفه
قعدت حق صلاة الفير الا اسمع صريخ و اصوات عالية و اللي عندي ما شاء الله كلهم نايمين و ما يحسون بشيء
وايجت ( طليت ) من فتحة الباب ما لقيت حد ادور من وين الصوت اشوف من الدريشة الشارع فاضي
و شوي اسمع الصوت عند الستارة حطيت راسي جريب من بداية الستارة الا اسمع اللي في الغرفة الثانية
الله يستر عليهم بس صوتهم كان واضح جدا و يوم خبرت زوجي يقولي ليش تتجسسين على الناس
قلت ما اتجسس بس الصوت كان واضح يعني ما شيء عوازل قوية بين الغرف و لازم تنتبهون من هالشيء
بس للاسف نسيت اخبر ادارة الفندق
و خلص يومنا على خير و القاكم في اليوم الثاني من الاجازة
