دائمًا كلمة "المطبخ الآسيوي" تشمل أكلات كثيرة عند مطاعم القاهرة، صحيح فيه حاجات كثيرة مشتركة بينه وبين الأكل الصيني وأخذوا كثير من الأطباق وعدلّوا فيها بمرور السنين. لكن الأكل التايلاندي عنده نقاط قوة تميزه عن الصيني. هناك مطاعم اسيوية في القاهرة، تقدم بعض الأطباق التايلاندي، لكن مطاعم قليلة تختصصت في المطبخ التايلاندي.
بيرد كيدج - Birdcage
من المطاعم الفخمة اللى لها صيت في القاهرة "بيرد كيدج - Birdcage" في أنتركونتننتال سميراميس، ويعتبر واحد من أفضل –لو ما كانش الأفضل فعلًا– المطاعم التايلاندي في العاصمة، تخيل لما مكان يجمع بين فخامة فندق عالمي مع لمسات متقنة من الشرق الأقصى النتيجة هـتطلع شكلها إيه؟ كمان المطعم يعتبر من أحسن الأماكن من ناحية الأسعار بالمقارنة مع شكل المكان وجودة الأكل اللي تظهر في منيو مختصرة بس معمولة باحترافية.
روين تاي - Ruen Thai
روين تاي - Ruen Thai" أثبت نفسه كواحد من أجمد مطاعم الأكل التايلاندي، روين تاي واحد من مطاعم دوسيت ثاني ليك فيو في التجمع الخامس، وأكيد التجربة هناك مكلفة بس الموضوع فعلًا يستاهل من ناحية المكان والطعم وكل حاجة.
ساباي ساباي - Sabai Sabai
المكان ملك لرجل مصري وزوجته التايلاندية، وصحيح مكان "ساباي ساباي - Sabai Sabai" مش جذاب خالص –في عمارة سوبر ماركت مترو القديمة في الزمالك– بس يعتبر من أهم المطاعم الملتزمة بالتقاليد التايلاندية في القاهرة، مع أجواء الشرق الأقصى الهادئة، المطعم يقدم أطباق بكميات كبيرة ونكهات متنوعة وينقصهم بس تضبيط الشكل، بس يعوضه شخصية المكان الخاصة.
يام ين - Yam Yen
"يام ين - Yam Yen" هو جوهرة ثمينة مستخبية في المعادي، بس عنده مشكلة وهي تفاوت الأسعار –يعني المقبلات أسعارها قريبة من الأطباق الرئيسية–
يام ين يتميز بحديقة ونافورة ومدخل خشبي مع ديكورات من البامبو، أما الأطباق –اللي منها حاجات كمياتها أصغر مما تتخيل– ممتازة وتتميز بالدقة والطعم اللطيف.
كمالا - Kamala
هو المطعم الوحيد معانا اللي مش مقصور على الأكل التايلاندي، كمالا في كونراد القاهرة يعتبر من المطاعم القليلة اللي بـ تحافظ على مستوى كل حاجة في المنيو الآسيوية. المنيو فيها اختيارات متنوعة تشمل أكل صيني وأندونيسي، وطبعًا الأكل التايلاندي وأكلات من أماكن ثانية، كمالا بشكل عام مكان ممتاز، والأطباق التايلاندي تحديدًا حكاية، خصوصًا أطباق الكاري، نفس الكلام بالنسبة للطبق المعروف باد تاي.
