اليوم رحلتي غير عن رحلاتي السابقة وفي البداية أحب أنوه أنه للأسف الموضوع بيكون بدون صور لأن جوالي خرب ولاعاد اشتغل وكانت فيه الصور
وبحاول ان شاء الله اختصر الاحداث.
( القاهرة رحلة الغصب )
الله يسلمكم هذي الرحلة جت صدفه وغير متوقعه وزيادة على كذا مصر كانت من ضمن الدول الي كنت حاطها من ضمن القائمة السوداء وما أفكر أزورها
رحلتي كانت رحلة عمل دورة تدريبية ولمدة أسبوع في القاهرة
مصر بناءاً على كلام الي أعرفهم ومن خلال بحثي - مع التقدير لشعبها والدوله لكن الصورة الي وصلت لي- هي عبارة عن مدينة رخيصه دقها الفقر ملوثه نسبة النظافة معدومه وخاصه الاكل التسمم شئ طبيعي التسول في كل مكان ومن كل شخصية مهما كان مستواها المعيشي وزحمه ولعب في الاسعار ..الخ
فكنت متردد قبل السفر هل أخذ زوجتي وولدي الصغير أو لا .. المهم قررنا نتوكل على الله ونشوف هذي الديره وخاصه أنها من الدول الي لازم تشوفها في حياتك للمعالم والاثار الي فيها
وصولي كان عن طريق الخطوط السعودية صالة 2 مطار القاهرة الدولي
مفعل تجوال انترنت من موبايلي لمدة شهر ب 350 ريال
تنقلاتي كنت مرتب نفسي بستعمل اوبر وكريم
السكن محجوز
المطاعم قبل لا اروح محدد اماكنها في قوقل ماب
حولت من مطار الرياض بالصراف تقريبا 3000 ريال سعودي دولارات مع أني ما احب هذي الحركه في أغلب سفراتي اسحب من الصرافات الي في المطار أو ما أوصل الدوله لكن مصر من خلال البحث اجمعوا على انك لازم تصرف قبل تروح
بسم الله نبداء الاحداث ..
مطار القاهرة كان في مخيلتي أنه مطار قديم وشعبي ومتهالك ، لكن انبهرت يوم وصلت طلع مطار جديد شبيه بمطارات بعض الدول جديد ونظيف وعملي
نزلنا مع ممر السعادة على قولتهم ثم نمشي ممر طويل الى ان نوصل للجوازات وهي عباره عن ساحة كبيرة وفيه كم سرا وقبلها فيه اعمده تعبي فيها ورقة دخول البلد .. طبعاً مافيه قلامه تعبي فيها الورق يا تاخذ من احد ولا يمكن يجيك عامل ويعطيك قلم بغرض أنك تكرمه لكن المقصد أنه ما عطاك القلم الا عشان تعطيه مقابل لكن بأسلوب
ما أحب هذي الحركات تسوي نفسك تخدمني كرماً منك لكن فعلياً تبي شئ من ورى الخدمة
وثانياً المطارات مفروض توفر منطقة فيها اقلام لتعبئة المستندات
وفيه كم بنك على اليمين للي يبي يحول لكن يوم رحت لهم قالوا قفلنا مافيه بتحصل في الصاله الثانيه
وخلصنا من الجوازات وجلسنا ننتظر الشنط عند السير ويحرص الواحد يراقب شنطته لان وانا واقف شفت شنطتي الا اشوف واحد سعودي طلع الشنطه يحسبها حقته ثم جلس يقراء الورقه الي عليها ثم رجعها لوه مستعجل وشالها وطلع وانا ما دريت كان راحت علينا... واذا خلصت تنطلق للمخرج وبتحصل سرى قبل التفتيش
وصلنا عن المشرف قال من وين قلت السعوديه وشاف الجوازات ثم سالني معكم شي قلت لا
قال اجل توكل على الله بدون تفتيش .. الاجانب يوقفهم ويدخلون من البوابة ويحطون شنطهم
المهم اول ما تطلع بتحصل صاله ثانيه صغيره فيه موظفين ينادونك على اكشاك تعال تاكسي المطار غير سواقين التكاسي الي يقولن محتاج سيارة
المهم انا خليتهم لاني ابي احول فلوس وطلعت مع ممر على اليسار فيه مكاتب تاجير وصرافين وحصلت في اخر محل محل صرافه الا خلص الدوام حقه الساعه 7:30م وقال قفلت دبر عمرك
يوم شفت كذا قلت اجل مالي الا الفندق احول منه الدولارت الي معي
المهم قبل اوصل مصر كنت بحثت عن موقف اوبر في المطار زي عندنا عشان اعرف وين اتوجه
وكان مكتوب تطلع وتتوجه للدور الارضي المواقف .. الوصف ما كان واضح قلت اسال احد الموظفين طلع موظف من موظفي تاكسي المطار
قال مواقف اوبر بعيد تحتاج مشي لانه عند صالة رقم 3 في المواقف وترى السعر مايفرق واحنا سياره جديده موديل السنه ومدري وشو وبس ب 250 جنيه
انا قبل باحث اوبر ياخذ تقريبا لوسط القاهره في حدود 130 جنيه الى 160 جنيه
قلت لا بس وصف لي ...
تطلع من الصاله وتروح يمين شوي بتشوف قدامك بعيد شوي مواقف سيارات مشي تقريبا بالكثير عشر دقايق الى ان توصل صالة رقم 3 بتشوف مصريين وفيه سمر كثير مدري سودانيين ولا مصريين الشاهد استاحشت شوي لانه ليل وكلهم شباب ومعي عيالي
نزلت للمواقف ودقيت على اوبر وقال انا عند موقف رقمه كذا .. مقسمين المواقف على حروف زي مواقف الاسواق الي تقسيمات A B C D
فمثلا C5 عباره عن مربع في نفس المواقف
وبدينا رحلة القاهرة مع سواق اوبر نسيت وش سيارته بس كنت مختار اوبر سيليكت اظاهر لكن اغلب سياراتهم نوعيتها صينيه واحلا سياره جتني صني لكن ماعليه كان مشغل تكييف ونظيفة
كنت مسجل له اللوكيشن فندق نوفتيل النيل القاهرة في الزمالك
وقلت له واضح عندك المكان فندق نوفتيل الزمالك قال ايه .. ونمشي واتابع معه على قوقل ماب لان خريطة اوبر اوقات تمشي على خط ويكون فيه طرق بديله لقوقل لكن ما دققت بتكلم عنها في رحلاتي الجايه
بس جلست اتامل في القاهرة لأني أبي اخذ تصور عن المدينة قبل لا اوصل للفندق واخذ لمحه عامة عنها وعن شعبها
لعلي حسيت بارتياح عقب المطار واوبر وبديت اقارنها بالصوره الي في راسي الى الان الامور افضل من ماهي في مخيلتي
.
الى ان وصلنا لجسر النيل وهو مشهور عندهم الي عند فندق سميرا ميس الانتر كان مليان زحمه واقفين على الجسر والي على الارض ويضحكون والي يبيع يمين ويسار لانه كان يوم جمعة والجو حلو كان فيه نسناس لطيف وخاصه اني جاي من الرياض قيض حر
قلت زين المنطقة الي سكنت فيها توفقت فيها انها ونيسة وامنه .. الفندق قريب من الجسر
يوم نزلنا للفندق ماقالي سواق اوبر اي شئ كنت متوقع بيجلس يتفلسف طول الطريق ويرطن
ونزل نزل الشنط ولا قال شئ مافيه ماتخلي يابيه ولا ربنا يكرمك بس سلام عليكم
الفندق عند الباب تفتيش وعسكري ويرحبون .. الفندق ما اختلف علي كثير لاني اعرف سياسة فنادق ايبس ونوفتيل فنادق اقتصادية عملية نظيفة مريحة بسيطه .. حلوه للي بس يبيها عشان ينوم واغلب يومه طالع
وسالته عن تحويل العملات قال فيه جهاز صراف حط العمله ويحولها لك بدون بطاقة ممتاز جداً وريحني كثير وبالنسبه لي اعتبره فكره ممتازة ومعممينها على جميع الفنادق عندهم سكنت في ثلاث فنادق وكلها موجوده عندهم هالمكينه
دخلنا الغرفه كانت ريحتها دخان على طول نزلت وقلت له غيرها لي .. ماقال شئ عطاني غرفه في دور غير المدخنين
الى هنا نكتفي كبدايه وبكره ان شاء الله نكمل لكم باقي التفاصيل
بسم الله نستكمل يومنا الأول في القاهرة أول ما وصلنا تقريبا الساعه 10 الليل وشوي جوعانين ونبي ناكل شئ عشان ننوم زين
ويبي لنا مويه
المهم يوم نزلنا قالت المعزبه خل نمشي شوي ونشوف لو الحنطور بيقربنا وهي من وصلنا وخاطرها تركب الحنطور وانا دايخ بس اتصبر ام العيال
وش نسوي
الشاهد وصلنا للحناطير متجمعين عند حديقة الجزيرة اظاهر يطيرون بك يالله اركب يالله قلت له بكم وكيف اللفه
قال ب 350 لفه كبيرة والصغيره ب 250
انا فعليا مالي مزاج اركب وزادها علي يوم قال لي السعر استكثرته على حصان شوي ويموت وخياس
المهم يمين يسار معيين مايبون ينزلون عن ال 250 جنيه قلنا اجل مايحتاج بنجيكم بكره <-- حركة مفاصله قديمة
واصلا مالي مزاج فيها خاصه اليوم عقب الطيارة
والمهم ذكرنا اننا محتاجين مويه عشان حليب الولد واكله وعشان القهوه والكيف
واروح لواحد من الاكشاشك الي يبيعون مويه وحلويات وجرايد
واخذ لي 5 قوارير مويه صغيرة .. عاد مدري بكم مويتهم عطيته 10 جنية قلت ان زادت بيرجع الباقي
شوي الا يقولي الميه ب15 جنيه والا انت نسيت يابيه او باشه وكان فيه جنبي مصري وزوجته ولا قالوا شي
الشاهد عطيته ولا قلت شي بس جلست في خاطري احسه لاعب علي
هي فعلياً ما تسوى لكن زي ماقلت لكم ما اواطن الاستغفال انا قلي ب 50 ريال القارورة عشان منطقة سياحية ولا تقولي هي سعرها 50 ريال على اساس انها في مصر كلها نفس السعر
المهم خذت المويه ورجعت للمدام كنا مخططين نروح لمطعم يقاله زوبا "Zööba" عنده فلافل وكشري وفول وهالطقة يعني مطعم شعبي مودرن
قلنا لحق الحنطور اللفه تروح من جهة المطعم قال لا .. قالت ام محمد خل نطلق رجولنا ونشوف القاهرة وانا خايف تتعب من المشي والساعه 11 الليل تقريبا <-- قبل لا اسافر قايلين لي فيه بلطجيه وشحاتين
وانا نمشي وهالفكره تدور في راسي مع المنطقة كانت منتعشة وعالم رايحه وجايه وهيصه
الى ان وصلنا لمنطقه عند منتزه وقفنا عند المدخل لان صاير مكان ونيس طلبت اوبر
طبعاً اوبر مرتين او ثلاث مقلبني لانه ما يحدد مكاني بالضبط بسرعه لازم انتظر واتاكد انا مكاني صح ولا في الجهه المقابله
الشاهد شوي الا يقولي السواق وصل ويرسل لي انا وصلت .. في البرنامج فيه محادثه مع السواق واغلبهم يردون مايبون يدقون عشان مكالمه دوليه
واشيك على الخريطه واحصله بعيد شوي عند واكلمه قلت له ارجع شوي قال بحاول لكن الطريق رايح مافيه رجعه .. ومشينا الى ان وصلنا له
وطلع واحد شباب حركاته نفس حركات احمد حلمي في فلمه عسل اسود يوم رجع من امريكا كشه طايره ومعلق خرابيط على المرايه ومشغل اجنبي وسيارته متكسره
بس اعجبني انه يسرع مايسحب رجوله ولاحظتها في اغلب سواقين اوبر يستعجلون في السواقه بعكس الي عندنا اذا السرعه 100 يمشي 50 واذا السرعه 80 يمشي 40
بس سواقة المصرين مشي حالك يذبون على بعض وعاادي ومايعترفون بالمسارات وفجاءه يفرملون واحد قرر ينزل من السياره ولا التاكسي شاف له زبون وحتى لو ما اشر له يوقف يساله تبي توصيله
المهم وصلنا للمطعم تقريبا الساعه 11 الليل ودخلنا مافيه احد الا انا احسبهم بيقفلون بس قابلنا بابتسامه
وتبون سفري ولا محلي .. الي حسيته ان هالمطعم تخصصه سفري لان المحل صغير وجلسات صغيره يمكن ثلاث طاولات بس
جلسنا وطلبنا فلافل بالحبه طلبت يمكن اربع حبات قلت بنجربها وفول
المدام كانت بتطلب كشري بس نفسها زينه يوم شافت الصاجه حقت الكشري مكشوفه هونت قالت لا خلاص
بالمناسبة المحل نظيف وفيه ناس اعرفهم يقولون ان اشهر كشري في مصر يبيعه واحد في الشارع
المهم جابوا الفلافل وانا اول مره اكل فلافل مصريه كنت اسمع عنها بس الي اعرفها غير حقتهم
حقتهم تجي كانها مصلحه يدوي بدون الملعقه وفيه زي الحبوب قاسيه شوي كانه فول مبشور
الشاهد ما اعجبتنا كلنا فول والفول بعد عادي كنت متوقع الفول المصري شئ خيالي
لكن لو خيروني بين فولهم ولا اخذ لي قلابه من اي محل عندنا باخذ قلابه اطعم
بس ينوكل موب شين بس اشلون اشرحها زي لو جابوا لك ببسي وسفن كلها بشربها وبستمتع فيها لكن لو خيروني باخذ ببسي
المهم لمسنا شوي ثم قلنا لهم هاته تكوي سفري
وطلعنا وطلبنا اوبر ... هالمره جلسنا تقريبا نص ساعه ننتظر اوبر
السواق جهازه فيه مشكله شوي طلع لي انه جنبنا شوي صار بعيد عن مكاننا واكلمه يقول قريب واكلمه واحاول اوصف له الى ان وصل ويوم ركب جلست اوصف له لان اللوكيشن عنده موب مضبوط
ورجعنا للفندق وخذ لك احلا نومه
ومع اشراقة ثاني يوم لنا على الظهر تقريبا
وفتحنا الستاره فشفت منظر يفتح النفس اشجاار كثيره خضراء <-- لون اخضر اخضر اهل الرياض بيفهمون وش اقصد باخضر اخضر من كثر ما جانا غبار هذي السنة نسينا لون الشجر
لان الغرفه كانت اطلالتها على المدينة لكن كانت حلوه لانها تطل على نادي وحديقة وبرج القاهرة
فكانت العماير بعيدة المنظر جميل صراحة
المهم على ما ضبطنا القهوة واكلنا الوليد ولبسنا قلنا خلنا نروح لسوق كايروا فيستفال مول ونتغداء هناك
طلبنا اوبر من الفندق الى السوق تقريبا خذ علينا 20 ريال سعودي
السوق هذا اظاهر راعيه التاجر الاماراتي الفطيم واظاهر انه نفس سلسلة فيستفال الي في دبي الي جنبه ايكيا لان هذا بعد جنبه ايكيا
السوق مرتب وذوق واهم شي يميزه فيه نافوره راقصه حولها مقاهي ومطاعم حلوه جلساتها وجديد السوق
هو في منطقة سته اكتوبر او التجمع الخامس في هالمناطق الجديدة ومعروف عندهم Cairo Festival City
ومادحين لنا مطعم عنب بيروت اكل شامي
فيه جلسات خارجيه مباشره على النافوره وفيه داخليه
كثيرين هذي الايام يفضلون الداخليه عشان التكييف لكن عيب مصر ان التدخين مسموح في كل مكان تدخين وشيشه لو في المصعد ما عندهم اي مشكله
فجلسنا على النافوره وكانت حلوه والجو كان لطيف واتوقع الليل بيكون الجو اروع واروع لان اذا اشتغلت النافوره مع الهواء يجيك رذاذها
بعدها خذنا لفه على السوق سريعه ودخلنا كارفور موجود داخل السوق خذنا مويه وموز وزبادي المراعي
رجعنا للمويه تذكرون يوم قلت لكم احسه لاعب علي راعي الكشك يوم يقولي ب 15 جنيه 5 قوارير
في كارفور نفس المويه سعرها 2.5 جنيه هو موب ذاك الفرق نص جنيه بس طريقته وهو يقول انت نسيت ولا
ولا هو حس اني ما اعرف كم سعرها
المهم لفينا بسرعه لاني مستعجل عندي موعد المغرب فطلعنا نهاية العصر من السوق وحطيت عيالي في الفندق ثم نزلت لان عندي موعد في فندق سميرا ميس الانتر يوم شفت الزحمه واوبر يبي لي انتظر كم دقيقه ويمكن يضيع وانا متاخر اصلا قلت رح رجليه بيني وبين الفندق جسر النيل
قوقل قبل لا اوصل مصر كان يقولي الطريق مشي بين الفندقين 20 دقيقه وياخذ بي لفه يعاملني كاني سياره موب امشي على رجولي المهم ما اقتنعت في كلام قوقل قلت بمشي على رجولي ويوم مشيت فعليا الطريق خذ مني اقل من 10 دقائق
ويوم جيت ادخل فندق الانتر من باب السيارات قال معليش مع مدخل المشاة
انا ما استوعبت وش يقول ومتاخر كملت الا يقولي مره ثانيه وياشر بيده ممنوع مع مدخل المشاة ... !! قلت وين قال بعد اللفه
فلسفه
والف الا احصل مدخل ودرج وعنده تفتيش وادخل ويوم دخلت باب الفندق الا تفتيش ثاني نفس الاول
كل فنادقهم فيها تفتيش عند الدخول ويدققون الا نوفتيل فيه تفتيش بس ما يدققون
فندق سميرا ميس هذا فندق قديم وله شعبيه عند ناس كثير بس بالنسبه لي ما اعجبني جوه جو التميلح والدخان
المهم خلصت موعدي ورجعت مع نفس الجسر وكان الجو يرد الروح هواء رايق وعالم على الجسر تقول داخل منتزه موب جسر وحناطير تمر جنبك ومزيكا مصريه مدري وش يقولون دخل كلمات على بعض المهم تكون على الايقاع
خذت عيالي ونزلنا عشان ناخذ الحنطور الي رحنا له اول يوم وقال لنا ب 350 جنية ورجعت لنفس الي امس ونفس كلامه قلنا له فيه ب 200 جنيه ركبنا مافيه مانبي وقام يصارخ زي المصاريه لين جو بيتضاربون في الافلام على اخوياه ياقدعااان فيه حد بياخذ على 200 وقاموا يتكلمون مع بعض الا شوي جاء واحد وقال يالله الا خويه الثانيه مدري وش يقوله زي الي بيتضارب معه ليش تاخذ مكاني وانا اقول في نفسي يالله السلامه
المهم ركبنا الحصان عظامه مبينه الضعيف هالك
ومشينا شوي ثم يوقف <-- هالحركه سووها معنا مرتين وبقولكم عنها بعدين
وخذ بنا لفه بالنسبه لي تعتبر شئ اقل من العادي ولا تستاهل مدري لاني في طفولتي تشبعت منها كان الوالد الله يطول بعمره دايم يودينا في الطايف للمنتزهات ويركبنا خيول وجمال وحناطير فخلاص مالها طعم او لاني كاره مصر
المهم ولدي مبلم مع هالمخلوق اول مره يشوفه في حياته
بعدها قلنا بنروح نتعشاء في مطعم يقاله سكويا Sequoia
مكانه حلوه على زاوية الزمالك على النيل مباشره احس نهاية العصر بتكون فيه دلع مقهى ومطعم
بعد الساعه 7 مساءاً مافيه اطفال بس مدري وش يسوون عاد عقب سبع انا جيته العصر
المهم يوم وصلنا للمطعم قالوا لنا انه يجتاج حجز قلنا نشوف انا شخصين يمكن يمشونا ويوم وصلنا على طول قال لازم حجز وممنوع اطفال قلنا طيب وشلون قال فيه مطعم جنبنا اسمه بيت ورد قلنا لا نبي هذا
قال فيه Left Bank وهم اصلا عباره عن ثلاث مطاعم لهم مدخل واحد قلنا ايه عادي ودخلنا هالمطعم
موب شين بس خاطرنا في ذاك المطعم
وطلعنا على الساعه 11 او 10 وشوي وقلنا خل نتمشى ونشوف المنطقه على رجولنا وجلسنا نمشي موازين للنيل ونتفرج على العالم وكان فيه ناس يمشون فيه حركه كان يوم سبت اجازة كلنا طالع يتمشى
الى ان وصلنا لمنطقه خلاص تعبنا وتاخر الوقت طلبنا اوبر ورجعنا للفندق
احس اني سويت دعاية لاوبر
مفروض يعطوني مشاوير مجاناً
ترى جالس اكتب اليوميات في الدوام فعشان كذا جالس اكتب بسرعة ومختصر قدر الامكان لان مافيه صور
يالله نراكم على خير ان شاء الله مع يوم جديد واحداث جديد
رحلتي كانت زي ماقلنا رحلة عمل في المقام الأول كان عندي دورة تدريبية وانطلقت من الصباح على اساس ان الدوام بيكون الساعة 9 الصباح
ويومها وخذ لك توتر كل شوي قايم من النوم اشيك على المنبه الى ان جت الساعه ثمان وشوي واقوم اتجهز ونزلت الا اشوف الفطور قلت ياولد مر شف فطورهم خذك حاقه تصحصحك
واخذ لفه على الفطور حقهم ( مرتدلات واجبان ومربى معلب وانواع مخبوزات وكوروسونات وواحد يصلح اومليت وفول وفلافل وكريب صغيرات وفواكه مقطعه .. الخ) يعتبر مقبول بالنسبه لي بس انا مستعجل وابي اصحصح ومدري عن نظافتهم الشاهد خذت لي ملعقة فول وخبزتين عشان اصحصح
بالمناسبة انا كنت حاجز في نوفتيل من موقع الشركة https://www.accorhotels.com
لانه عطاني سعر ارخص سعر وشامل افطار والسعر فقط للعملاء الي مسجلين في الموقع وبدون تسجيل سعرهم زي سعر بوكينج
ومن خلال تجاربي لاحظت ان الواحد اذا جاء يبحث واعجبه فندق لايحجز على طول من اي موقع ابحث عن اسم الفندق في اكثر من موقع وحتى لو قال لك اقودا ولا المواقع الي تعطيك ارخص موقع ان هذا الموقع ارخص سعر موب صحيح
لان فيه مواقع تعطيك السعر بالضرائب ومواقع زي بوكينج بدون ضرائب فاذا جيت تحسبها او تدفع في الفندق تكتشف ان السعر قريب من الموقع الثاني والي كان بيعطيك غرفه افضل باطلاله او معها فطور او حتى يكون الموقع الثاني سعره ارخص مع الضرائب
نرجع لنوفتيل واسمي وكانت ثاني تجربه لي للفول المصري ..
..
ونفسي الشي نفس الطعم الي كلته في زوبا اللهم حق زوبا كثرت طحينه وزيت عليه .. بس ماش مهوب مثل فولنا حق ابو يمن
وانطلق للدوره
وحسيت اني متاخر قلت ياولد خلني اخذ اوبر يقربني مابقى شيء على الساعة 9
وقلت خلني اجلس على الاتجاه الي من جهة فندق الانتر عشان مايجلس يلفلف ونتاخر
اطلبه وانتظر ويقولي شوي وجايك .. وكل شوي يلف ويخربط .. ويرسل لي تراني وصلت .. وادق عليه اقول وينك يقول انا عند اللوكيشن قلت وين انا عند الدوار وهو يقول انا عند الدوار
وقام يقول شفت التمثال خليه وراك وتعال انا عامل تنبيه اظاهر قال كذا قصده مشغل فليشر تنبيه
واناظر البرنامج واحصله في اللوكيشن في الجهه الثانيه واجيه ركض يالله بس خلصنا خل نلحق وموقف عكس اتجاه الفندق
كانك يابوفلان ماغزيت
ولا حر اقوله شغل المكيف وننطلق البرنامج يقول 8 دقائق لكن زحمه الدوار واقف قدامي وانا توترت اول يوم وتتاخر ياشينها
الى ان وصلت ونفس الحركه اليوم الي قبله جيت ادخل مع السيارت لان قلت لاوبر نزلني على الشارع ويوم جيت ادخل قال مع مدخل المشاة
وادخل وانا الهث وادخل الا مافيه الا انا
ماتسوى علي الركضه والخرشه
شوي الا بدو يتوافدون ولا طلعونا الا الساعه وحده وشوي وعاد في الطلعه قلت امش كعابي اسرع لك ومنها حركه ولا يضيع وقتي على شيء ما يسوى
هي الشمس حاره بس لاني اتفرج على النيل وفيه هواء يعني مخففه علي لكن لو ولدي معي منيب ماشي
وارجع الا ام محمد مولمه لي القهيوه ومحمد حايس الدنيا في الغرفه يلعب بسم الله عليه
وعاد المعزبه في خاطرها مطعم ساكويا الي قلت لكم رحنا له وقال حجز وادق عليهم وقلت له ابي حجز اليوم .. قال معليش اليوم مقفلين انا كاني سمعته يقول صيانه او نظافه لكن يوم مرينا جنبه لقينا فيه ناس
الشاهد قلت له اجل احجز لي لبكره غداء
وقالت ام محمد مادحين لي مطعم يقال له هيدا لبنان Hayda Lebanese restaurant
جيناه العصر نايم جوه اتوقع في الليل يقلب نظام شيش ومزيكا وردح
خذنا اوبر وانطلقنا طبعا ما يعرف المكان وقلت له امش على اللوكيشن وجلست على راسه اقوله لف الحين ومدري ايش الى ان وصلنا ويوم جينا ندخل الا الصدمه
درج طويل نازل تحت وانا معي عربية ولدي فوق عشر درجات لانه عباره عن قارب متوقف على النيل ثابت
زين ان عربية ولدي خفيفه وشلتها ولا كان عقوبة النزله
ماعليه المطعم بس لاتاخذون مني تقييمات عن اكل المطعم انا بس باوصف لكم المكان والجلسات لان الناس اذواقهم تختلف
يوم عبينا الحمد لله طبعا عبينا اقصد فيها نفسي لحالي لان المعزبه تلمس بس وولدي ماذاق شيء من اكلهم خايفين عليه
من التحذيرات الي وصلتنا قبل نوصل وسالفة التسمم والنزلات المعوية
طلعنا قلنا وين نروح وقت الغروب حلو ناخذ لفه على النيل يالله وين اماكنها وبحثت في النت وعرفت انهم يسمونها فلوكا او فلوكه زي كذا القوارب الي تاخذ بك لفه على النيل
بس السؤال الحين كيف نركبها كيف ننزل لها
وطلبنا اوبر وحطيت اللوكيشن الفندق ويوم ركبنا سالته من وين نركب هالقوارب قال انا اعرف فيه مكان جنب منتزة الجزيرة قلت حلو جنبنا طيب بكم ؟؟ يعني تقريبا
عشان ما يلعبون علي واعرف افاصلهم
قال منيب متاكد ماقد ركبته
بس حاول تفاصلهم ويضحك لانه عارف انهم بيلعبون علينا
وابن الحلال وصلنا لمكانهم مشينا زي الجسر الصغير وفيه اولاد صغار قال عاوزين لفه مدري قارب قلت ايه بس بكم قال تعالى للمعلم ويطلع لنا واحد اهلا وعاوز لفه كبيره ولا صغيره الكبيره حول الجزيرة والصغيره مدري وين الكبيره تسوى تشوف اشياء الصغيره الي فهمته رايح جاي
قلت طيب بكم قال مانختلف الي يجي بس انتا عاوز صغيره ولا كبيره
قلت الكبيرة بكم قال ب 800 جنية
انت لازم اي سعر يعطونك تسوي نفسك منصدم وتقول غالي لان فعلياً هم زايدين السعر لانك خليجي
لو ان هالسعر ثابت عليك وعلى غيرك واهل الديرة كان ماجادلتهم
المهم يمين يسار الى ان وصلنا ل 500 جنية
وانطلقنا قارب وش طوله ومافيه الا انا ويالله خذ لك مزيكا مصريه كلماتها حفله والسواق مكيف معها ومعلي الصوت
شوي قلنا له قفلها صكت راسنا
شوي قال عندكم في الجوال اشغل لكم اي شئ .. قلنا لا <--- نفسيات
بس لاشغلتها في الجوال تطلع في التصوير اوضح
المهم كانت اللفه حلوه لكن التوقيت ماوفقنا فيه المفروض ماخرينا شوي لين تخف الشمس قبل المغرب بشوي بس حلوه تستاهلالواحد ياخذ لفه وكل ماكثر عددكم كل ماطلعت احلا واونس
واظاهر تقدري تركب مثل هالمراكب مشتركه تطلع على الشخص ب 5 جنية <-- هالمعلومة قالها لي ولد يسوق حنطور من اهل البلد
وانا في القارب مرينا مطعم ساكويا خوينا يوم اقولكم مريناه ولقيت فيه ناس جالسين ومرينا منطقه لقينا شباب يتسبحون في النيل ومعهم غنم ينطلونهم في النيل ويسبحونهم وبعدهم بشوي لقينا واحد جالس يسبح الحصان حقه وهو معه في النيل
بقد حاقات قميلة وشفنا وحده ساكنه في قارب ومعها بنتها وجالسه تنشر ملابسها طبعاً غير المقاهي والمطاعم والمباني على اطراف النيل بس ركزت على الاشياء الملفته
ووصلنا بالسلامه ورجعنا للفندق رجليه لانه قريب الا فيه ناس باسطين يبيعون كل شئ
حاقه ساعه بارده ولا ترمس شئ زي الفصفص عندهم ولا مدري وشو كل شئ يبيعونه وانا في الطريق شفنا عروس جالسه تتصور في الحديقه كثيره مناسبات الاعراس الي شفتها خلال هالاسبوع الي جلسته تقريبا بشكل يومي الله يوفقهم
ورجعنا للفندق عشان نتجدد ونتنظف ونصلي ونتنشط <-- بدون نوم
انا ماعندي مشكله في السفر اطلع الصباح بدري بس اقدر ارجع اريح واخذ لي غطه والمدام لا تكره شيئ اسمه نوم في السفر نطلع من الصبح مانرجع الا الليل عشان مافيه وقت وعسانا نلحق كل الاماكن
المهم تنشطنا ثم قررنا نطلع فقلنا خلنا نروح ناكل لنا شئ
ورحنا لمطعم صراحه لقيتهم مادحينه في تويتر وقريت عنه في قوقل واعجبني ديكوره The Republic
جوه هادي وذوق انصح فيه صراحه .. شفنا المنيو وقلنا مالنا الا مكرونات ومالنا الا خضار ولا سي فود
وحصلنا سي فود وطلبناها ويوم وصل طلبنا الا انصدمنا انا بالنسبه لي كنت جوعان وماكان عندي مشكله اجرب الطبق لكن المدام ارتاعت وزياده على سمعت مصر ان اكلهم وسخ قالت وش ذا وراها كذا ؟؟؟
جتنا اسبغتي لونها اسود
واناديه اساله هذا طلبنا انا طالبين اسبغتي سي فود عاديه ليه كذا سودا قال هي تجي كذا لان مخلوط معها حبر الحبار وصدقوني طعمها حلو بيعجبكم وان ما اعجبتكم ما عليكم ابدلها لكم
والله واحط عليها شوي ليمون واسمي طلعت مضبوطه زي ما قال ولو رحت مره ثانيه بطلبها افضل وجبه كلتها في مصر
ويوم خلصنا وشبعنا الوقت قبل المغرب بشوي قلنا خل نروح لخان الخليل وقالت المدام عشان نجرب قهوة الفيشاوي المدام متحمسه اكثر مني لهالمنطقة
يالله خل نشوف يقولون شعبي وعندهم هدايا والخ
طبعاً من ضمن التوجيهات انتبه من الشحاذين في هذه المنطقة بالذات واساليب النشل وتجمع الاطفال ومنطقة شعبية جداً وتراها ميب صالحه لك
حطيت في اللوكيشن لاوبر ووصل لنا وكان منفس مدري وش فيه الشاهد ويوم قربنا قال ترى ابنزلكم على اليمين لان ما اقدر ارجع للوكيشن الي انتو حاطينه هنا اقرب شئ ما اقدر ادخل جوا قلت طيب قال فيه سلم تحت الارض نفق عشان توصل للجهه الثانية وكانوا حاطين شبك بين الشارعين عشان محد يقطع الشارع عقب الجسر ومع ذلك شاقين الشبك ويقطعون
المهم نزلنا الا بدينا نشوف العينات وعلى طول المدام هونت وخافت من المنطقة قلت لها هذي مصر صدق الي نسمع عنها
طبعا نزلنا تحت الارض وانا نازلين الا اشوف عائلة خليجيين قلت لها شوفي ربعنا هناك لعلها تطمنت شوي وقالت اجل خل نروح معهم قلت تعالي بس مايكون الا كل خير - طبعاً انا قبل لا نوصل وانا كنت متوتر وموب جايز لي المكان وزدت يوم نزلت بس دامنا وصلنا ونزلنا خلاص خل نشوفه ونطلع- والله ونطلع من الجهه الثانيه وندخل المنطقة على طول ذكرتني بسكك وشوارع مكة المكرمة ايام اول قبل التوسعات الشبيكة وطقتها
شارع ضيق ومحلات يمين يسار وباسطين على الشارع ويبيعون ذكريات ولا اقمشه وجلابيات والي عصيرات
فكنت مستغرب .. ونمشي ونتفرج وخذنا لنا شئ كنا ندوره من هالتحف والذكريات هنا ارخص من باقي الاماكن في مصر بفرق كبير
وثم جلسنا نبحث عن قهوة الفيشاوي طبعاً قوقل عطاني طريق عجيب دخلني في سكك ضيقه تكفي شخصين بس هو حلو خلاني استكشف مع انها تخوف شوي لان معي حرمتي وبزر
وياسلام على الفيشاوي
انا كنت متخيلها زي المسلسلات المصريه تكون قهوه على زاويه ومفتوحه من الجهتين شغل نظيف
انسدمت انها عباره عن ممر وطاولات صغيره متلاصقه في بعض
وغيمه حوله من الشيشه والدخان
المهم دامني وصلت قلت اجلسي واطلب كبايت شاهي وحده عن قولت دامني تعنيت له
ويقول بس طيب الولد اسمه ايه موش عايش شيشه
وشوي يجيك واحد معه عود يقول عايز تقسيمات وعقبه واحد اكواب تبي نكتب اسمك عليها شوي واحد معه سلاسل يقول عاوز اي اسم لو حتى اسم حماتك الي بتكرهها
شوي يجون بزران معهم بلونات ويحطون البلونه في يد ولدي عشان يصيح ويقول ابيها
وشوي يمر واحد معه مجموعة كتب اسرار الحب ومدري وشو وما لقى الا انا يجيني
شوي ووصل الشاهي واشربه بسرعه ونطلع الحساب 20 جنيه كباية شاهي بنعناع وقارورة مويه
الشاهي ب 15 جنيه والمويه ب 5 جنية
بعدها كملنا لفه على المحلات ثم طلبنا اوبر وطلعنا
طحت في اوبر ساكت لكن اوقات احب اسالهم شوي عشان اغير جو الطريق الا ينطلق ويسولف لي عن الاكل
وشوي خشيت به على السياسه
يحبون هالسوالف
الى ان وصلنا الفندق بحمد الله ونطلت راسي عقب هاليوم الحافل ونمت من غير رايي
احس اني الهث من سرعة الكتابة
ان شاء الله تكونون استمتعتوا هالمره وما اكون طولت عليكم
وبداء يومنا الجديد تقريبا زي الايام الاولى اصحى بدري انزل للدوام بس هالمره ما افطرت ما اشتهيت اكل فو ويكبس علي في الدورة وابلم مع المحاضر
فانطلقت مباشره للدورة وهالمره قلت خلك ذيب لا يصير فيك زي الي صار ذيك المرة
ورح للدورة رجلية .. والله واروح ونفس الموضوع ادخل مع مدخل المشاة
وادخل القاعة مافيها احد جاي بدري
انا بطبعي اذا عندي موعد احب اكون متواجد قريب من المكان او في المكان قبل الموعد المحدد مثلا لو مواعد واحد ما اعرفه الساعه عشر لازم اكون في المحيط حوله الساعه تسع ونص عشر الا واوقات انتظر الى ان تجي عشر ثم ادق عليه ولا ادخل عليه
الشاهد فيه ناس معنا ساكنين في نفس الفندق ويجون المحاضره متاخرين ليه مدري
جاء المحاضر وجلسنا نسولف الى ان يجتمعون البقية
الى ان دق جرس الطلعة نهاية الدوام
وانطلق لعيالي عشان ما يروح علينا اليوم وعشان نرجع بدري
بس هالمره رجعت القهوه ميب جاهزه انا جهزتها
واليوم موعدنا مع مطعم ساكويا الي حجزناه امس حاجزين على الساعه ثلاث الى ثلاث ونص
يبعد عن السكن بالكثير 15دقيقه بالسياره
خذنا اوبر شباب والي استغربته اغلب الاماكن يقولون ما نعرفها او ماقد رحنا لها؟؟ فيه اماكن كثيره في الرياض ماقد رحت لها بس اني سمعت عنها او قد مريتها ذولا مدري هم صادقين ويسلكون لي يقولون ماقد رحنا لهالاماكن ولا مانعرف حتى الاهرامات اسالهم عن الاسعار يقولون مانعرف
المهم وصلنا وبكل ثقه عند الاستقبال السلام السلام عندي حجز في ساكويا لثلاث اشخاص
يطقطق وكانه ماحصل اسمي
قلت امس مكلمكم امس مدري قبل امس باسم مشاري وهذا رقم جوالي
وشوي قال ايوه حصلته تفضل
وهالمطعم زي ماقلت لكم قبل هو عباره عن ثلاث مطاعم متصله في مدخل واحد بس ساكويا هو افضلهم من ناحية الجلسات لانه صاير على زاوية الجزيرة ومكشوف كله
دخلنا الا فيه طاولات فاضيه لكن في الشمس وحطونا في الوسط كان المكان حلو لكن حر شوي زي القارب لونا متاخرين شوي كان بيطلع احلا بس المشكله بعد 7 المساء مافيه اطفال وقريت في تعليقات الناس مدري تويتر او قوقل ماب انهم يعيبون عليهم انه بعد الساعه 7 يفرضون عليك مبلغ مدري هو حد ادنى للحساب او شئ ثاني بس يفضل الواحد يتاكد في مطاعم مصر الي هم يعتبرونها خمس نجوم اذا فيه حد ادنى للفاتورة للشخص او لا عشان ما يصدمونك بالفاتورة
المهم غامرنا هالمره وطلبنا ملوخيه مع اني منيب حريص عليها بس ام محمد اشتهتها واستغربت انها طلبتها مع ان نفسها اشين مني
بس خذنا سادة بدون فراخ ولا ارانب <-- ماكان عندهم ارانب ولو عندهم اصلا ماطلبتها
وطلبنا شئ مكتوب بيتزا تركيه اظاهر كذا كان اسمها
ويوم جابوها الا فطاير لحم قطعتها ثم سالناهم مافيها جبن ؟؟ قال لا هي تجي كذا نسميها بيتزا لكن بدون جبن فقلنا بدلها لنا مانبيها وبدلوها ولا حسبوها علينا
وطلعنا من عندهم بعد ماشبعنا الحمد لله .. بس وين رحنا عقب ؟؟
ثم وجهنا على الاهرامات هالكلام اظاهر الساعه اربع وانطلقنا مع اوبر الى ان وصلنا للاهرامات فيه تفتيش
الا يقول وين ؟؟ قال الاهرامات قال مقفلين من الساعه 4 العصر
وش السوات وين نحول قلنا خل نروح لسوق مول العرب Mall of Arabia دامه اقرب شئ لنا وكنا حاطينه من ضمن الاشياء الي بنروح لها
هو سوق مقبول ومرتب لكن لو قارنته بين سوق كايرو فيستفال بانصح بفيستفال واحسه ارقة منه واحدث واونس
هالسوق فيه نافوره في الوسط وعليها مقاهي ومطاعم لكن عاديه وفيه سوبر ماركت وسينما
تمشينا فيه وتقضينا الى ان انقلبت روسنا قلنا خل نتعشاء الا ونشوف مطعم خوينا اسمه ليلى عندنا في الرياض شامي واتوقع انه موجود في الخليج لان اغلب الي دخلوا فيه من جلسنا ياسعوديين او خليجيين
وبعدها رجعنا للبيت بعد ماقلبت روسنا السيارة من مشوار لمشوار وسواقة بايخه
وجانا يومين حر ورطووبه بعكس اول ما وصلنا كان الجو حلو
هذا اليوم كان مختصر لكن انقلبت روسنا وضاع علينا اليوم بسبب مشوار الاهرامات الضايع
اليوم هذا نسيت اقولكم الليله الي قبل عقب ما رجعنا عقب المشاوير كان لازم اجهز الشطن قبل لا اقوم الصباح واروح للدورة لان بنغير الفندق والتشيك اوت الساعه 2 الظهر لان مكلم الريشيبشن قبل وقلت لهم متى اخر وقت لتسجيل المغادرة تقدرون تعطوني لان عندي دورة ولا اقدر اجي قبل وحده قالوا خلاص ثنتين واي تاخير بنحسب عليك بالساعة
المهم ليلتها رتبت اغلب الملابس لكن ولدي وزوجتي يحتاجون لاغراض الصباح قلت اجل ان قمتي تولمي عشان نكون جاهزين ...
وصحيت الصباح وزي الروتين اليومي الى الدورة .. في ثاني يوم في الدورة سالة المشرف او المنسق متى اخر يوم لنا ومتى تسليم الشهادات لاني مخطط اطلع مع الاهل لشرم ..؟؟ قال هو ان شاء الله الخميس الشهادات لكن خل نشوف
ويوم جاء نهاية الدوام قالوا بنسوي لكم زيارة رسمية يوم الثلاثاء او الاربعاء وغالبا بتكون الثلاثاء
لكنهم معلقينا ما اكدوا شئ فماحجزت الى الان شي وحاط في بالي غالبا بيكون بكره الاربعاء اخر يوم ومنها اسوي تشيك اوت ونروح لشرم
المهم جاء الاثنين ونفس الشئ ما اكدوا لنا وثم قالوا احتمال بكره تولمهم الي هو يوم الثلاثاء وجينا ولا صار شي ثم قالوا الاربعاء الزيارة وبتكون الظهر وانا حاط في بالي بسافر ...
المهم نرجع لذاك اليوم الي اقولكم مارتبت اموري للسفر بس حجزنا اخر يوم في فندق سوفتيل على اساس بنجلس ليلة ومن بكره بنطلع الظهر ونروح لشرم نجلس فيها ليلتين ثم نرجع للقاهرة على المطار مباشرة يوم الجمعة <--- هذي الخطة
رحت للدورة الا يقولون بكرة احتمال مافيه زيارة الى الان ماعطونا موافقة فبنجي عادي محاضرة
<-- تكرار بس عشان تسلسل الاحداث
كذا تعليقة ولا احب هالخربطه المهم في البريك رحت للمنسق قلت له هل حضور الزيارة اجباري لو ما حضربت بيترتب شئ علي ؟؟ لاني مخطط افسح العيال وكذا
قال هي الزيارة لكم لكن مافيه مشكلة لكن تسليم الشهادة لزم احد ياخذها يوم الخميس قلت عادي انسق مع واحد من الشباب
قال زين بكره نشوف قلت زينين
واجلس لكم باقي المحاضره بالي موب مع المحاضر ماغير اقلب في الجوال من موقع لموقع احسب وارتب اموري واشوف الرحلات من القاهرة لشرم
طلع عندهم ثلاث رحلات الصباح والعصر والليل
انقلب راسي ولخبطه احس وقتها تشتت
الصباح الاقلاع الساعة 6 او 7 يعني لازم اكون في المطار من 5 الفجر واذا وصلت وش بسوي الصباح صعبه ماتصلح
الظهر الاقلاع الساعه 4 يعني لازم اطلع اركض وارتب اغراضي وركض على المطار ولا اعرف اجراءاتهم تتاخر ولا لا يعني كم احتاج في المطار ...
لكن خلها هذي خيار مطروح
الليل الاقلاع الساعه 10 يعني نوصل تقريبا 11 وشوي الليل فراح علينا اليوم ولازم نحجز ليله في الفندق ومنب نايمين بتروح علينا خسارة
قلنا حلو مالنا الا رحلة العصر .. المشكلة ان رحلة العصر الي هي بكره الخميس والعودة الجمعة الظهر
ورحلتنا للسعودية الاقلاع الساعة 7 الليل قلنا يالله اسم اننا نشوف شرم
لكن يوم شفنا التذاكر تطلع علينا شخصين وطفل رضيغ تقريبا 3000 ريال غير الفندق
الصراحه استكثرتها على شرم وخاصه انها ليلة وحده ومنب متهنين نركض ماتسوى
جلست اقلبها اقلبها الى ان خلصة المحاضرة ورجعت الفندق واشاور الحجه
الجد انا متحمس عشانها في خاطرها تروح لشرم ولا انا زي ما قلت لكم قبل مصر كلها من الاساس قبل لا اروح ما هضمتها ولا هضمت شرم الشيخ احسها ميب عائلية لانها تعتمد على البحر والالعاب المائية وحفلات فمدري مع ان اعرف كثير عوائل يروحون لها ويمدحونها لكن مدري ماش ما ارتحت لها احسها ميب جوي
المهم واشرح لها الموضوع وصدع راسي وهي رحمتني يوم شافتني مختبص وانقلب راسي من التفكير
قلنا الحين خلنا نطلع من الفندق نروح للفندق الثاني ونمخمخ
طبعا فندق سوفتيل قريب من فندق نوفتيل ويتبعون شركة وحده لكن يعتبر سوفتيل ارقى من نوفتيل
فندق سوفتيل موقعه يعتبر من اجمل مواقع الفنادق في القاهرة صاير على زاوية جزيرة الزمالك ومباشرة على النيل مافيه شارع يفصله على النيل زي باقي الفنادق
في الفندق فيه كم مطعم ومقهى جلساتهم مطله على النيل مباشرة
خذنا لنا غرفه مطله على النيل .. الفندق حلو ومرتب ومليان ربعنا
محتلينه
بس عيب الفندق الشرفه او البلكونة مافيها خصوصية يعني لو جلست انا في البلكونة والغرفة الي جنبي جلسوا نقدر نتقهوى مع بعض من قرب البلكونتين ولا فيه ساتر او حاجز بين بعض وحتى اقدر اشوف البلكونة حقت الغرفه الي تحتي وحتى لوني ملقوف وقربت لزاوية البلكونه حقتي بقدر اشوف جزء من الغرفة الي جنبي
والعيب الثاني صوت الردح طول الليل دي جي يوصل للغرفه مع اننا في الدور رقم 6
والعيب الاخير دورة المياه مافيها شطاف اغلب الفنادق الي رحت لها نظامهم زي الاوربيين الشطاف داخل الكرسي نفسيه
مدري وش عاجبهم فيه
لكن بشكل عام انصح بهذا الفندق
وصلنا للفندق وحطينا اغراضنا وقلنا خل نستمتع في الفندق الحين ثم نفكر في شرم
فنزلنا للوبي عشان نقرر وين نروح الاهرامات ما يمدينا نروح لها مافيه وقت وفيه شئء اسمه عرض الصوت والضوء في الاهرامات يجلسون على كراسي ثم يشغلون لمبات على الاهرامات وابو الهول ويحكون قصة وكذا انا ما رحت له لكن فيه في اليوتيوب يكون مسائي
ونجلس في اللوبي نفكر وين نروح له ..؟؟
قلت فيه محل مكرونه يمدحونه وتقييمه حلو من العرب والاجانب O's Pasta
او مطعم لوكيشن كل العالم تمدح فيه لكن احس جوه حوسه الي زحمه وطاولات جنب بعض واكلهم عادي
انا نبي اكل رايق ونظيف فقلنا خل نروح لذا
وننطلق باوبر ونفسي الشي يوم حسيته تعدى لفه صرت اوصف له الطريق
ووصلنا للمطعم الا مكان صغير ونزلنا بدرج بدرج بسيط يوم دخلنا الا ينظفون العمال ويقولون لسى مافتحنا الساعه 4 او اربع ونص الشاهد كان باقي بس ربع ساعه على الوقت الي يقولون قلنا طيب بنجلس
قال لا الدوام الساعه كذا المهم طلعنا وخليناهم وعلى طول وجهنا لسوق كايرو فيستفال سيتي قلنا المكان عارفينه وفيه جلسات حلوه ومطاعم زينه نعرفها
وانطلقنا هالمره ودانا مع طريق غريب عجيب غير الطريق الي نروح معه العاده هو ابعد من الي رحنا قبل الطريق هذا دخلنا لشوارع مصر الحئيئيه شعبيه ومرين سوق الخضار عندهم وبالمناسبة الجحه او الرقيه او الحبحب عندهم ينباع ب 2 جنية
المهم جلسنا في الطريق يمكن 50 دقيقه على ما وصلنا للسوق وانا جوعااانين وصلنا تقريبا على المغرب
ونتجه للنافورة مباشرة عند المطاعم ورحنا لمطعم Ovio وانا والمدام نقول هالشعار مار علينا بس مدري وين
اكله ايطالي وخذنا من عندهم بيتزا ومكرونه سي فود وسمك سلمون كل اكلنا بحري
حلو اكله اعجبني بس الي بيروح لكايرو فيستفال زي ماقلت قبل اجلس عند النافوره ابرد لك
والحمد لله شبعنا وصحصحنا ورحنا ندور في السوق على مزاج
وانا ندور شفنا محل تحف وهدايا <--- تذكرون يوم قلت لكم ان اسعار خان الخليل ارخص من باقي القاهرة
حصلنا تحف كنا شايفينها عند خان الخليل ولا خذناها سعرها هناك بحدود 250 جنيه هنا حصلناها بكم ؟؟
1000 جنية ومعيي يكاسر وصعبه وقام يتفلسف هذي شغل نظيف مصنوع من مدري وشو والي في السوق ارخص لانها مصنوعه كذا <-- انا ما يهمني القطعه شكلها واحد وماتسوى هالسعر وش ابي بالغاليه وهي نفس الفكرة وخليناه
وكملنا لفلفه في السوق الى ان حان موعد الرحيل ونطلب اوبر ونفس الحركه يرسل لي انه وصل ولا اشوفه واقول وينك يقول انا عند اللوكيشن شوي الا يلغي الطلب ثم اطلب مره ثانيه واركز في الخريطه عشان ما اغلط ويلطعنا حول 10 دقائق وكم مره تصير اكتشفت ان اغلبهم يقبلون طلبات
ويكون لين الحين معهم زباين
والزبون اوقات يتاخر في النزول او يغير رايه فيتاخر علي
المهم وصل خوينا وقلنا له وصلنا للفندق خلنا نروح نحلل الليله الي حجزناها فيه
وصراحه اعجبني جو فندق سوفتيل تحسه ونيس وجلساته الخارجيه على النيل حلوه ونظيفه بس ناقصه واحد يفصل الردح الي فاجرين الصوت فيه
ضوضاء ماتخليك تسترخي وتستمتع بالنيل ونسيم النيل
دخلنا الغرفه حطينا اغراضنا ونزلنا نتكي نتقهوى على النيل فيه مطعم ومقهى مغربي يمدحونه وحتى لو سالت الرسيبشن بيقترحه لك وكان مليان اغلب الناس عليه مافيه بس كان اغلبه شيشه
والجلسات فل
ومزيكا جو مصر كذا
المهم شفنا المقهى حقهم تحت نسيت وش اسمه المهم له جلسات داخليه وخارجيه وجلسنا في الخارجيه كان الجو وقتها شوي رطب انا خذت لي حاقه سأعه
تبرد علي (فانتا) ولاحظة المصريين يحبون الفانتا
والحقه خذت حاقه سوخنه وخذينا حلا
يوم حسينا اننا طفينا وولدي فطس من الحر ومن من الجلسه في العربيه قلنا يالله نكمل السهره في الغرفه
انا صراحه داايخ وابي اطلع الغرفه من وصلنا بس يالله اهم شئ الأسرة أذا اسعدتهم اسعدوك
وحطيت راسي ونمت وراي دوام الصباح
وانتهى يومنا بسلام وقربت ساعة الحسم بقى لنا يومين اظاهر على موعد رجعتنا ان شاء الله تكون مشوقه
.. دقيقتين استرجع احداث اليوم قبل لا انطلق في السرد
بسم الله
اليوم زي ماقلنا كنا في سوفتيل الجزيرة كان حجزنا ليلة وحدة اصبحت الصباح بنشاطي المعهود
امحق الا غصب قايم بدري
وانطلق واطلب اوبر لان هالفندق ابعد عن فندقنا الاول ومشوار وشمس حاره مايمدي وبدت المحاضره ... الخ
جاء البريك واتشوف للمنسق حق الدورة ابي اكلمه
الا اشوفه رايح للقاعة وانقز الحقة .. بيشتغل شغل اللوقية السلام ازيك يابيه وربنا يخليلك الولاد وربنا يكرمك .. لا تصدقون بس يقالي اعطي جو فكاهي
السلام السلام ازيك معليش ياحق امس مرسل لك واتساب بس شكلك مشغول وما رديت علي <-- تحسفت اني قلت كذا احس بايخه زي الي تبي تحجر لواحد وانا جايه يقالكم باسلوب
المهم قلت له انا مكلمك قبل كم يوم بخصوص اخر يوم لنا وانا مرتب اموري اني بسافر وانتو الان ماحدتوا موعد للزيارة وانا كلمت واحد من الشباب يقول ماعنده مانع يستلم الشهادة عني
قال خلاص اوك ماعندك مشكله
وعلى طول ارسل للمدام تراهم عطوني افراج اببحث عن رحلات الان بشكل جدي واجلس ابحث وتوترت مره
لانه خلاص الوقت الضائع زي ماسويت اليوم الي قبل من تفكير لان طلع لي نفس الرحلات مافيه وقت
وجد صدع راسي لان تعليقه تبي تسافر وتبي تبسط الي معك وفي نفس الوقت الوقت يركض وتبي تسوي تشيك اوت من الفندق
وارجع ركض للفندق اول ما خلصت المحاضرة
ونرتب اغراضنا حتى القهوه ما تهنيت فيها
المهم رتبنا اغراضنا وطلبناهم ياخذون الاغراض وعقبها نزلنا سويت تشيك اوت وكانوا طالبين مني تامين قلت لهم بعطيكم 100 دولار كاش قالوا بس لازم نحجز اي مبلغ على البطاقة قال بنحجز 10 جنيه قلت مافيه مشكله وعطوني فاتوره اني مسلمهم كاش 100 $
قلت طيب فيه 100$ دوبيزيت دافعها انا بترجعونها على البطاقة ولا اشلون ؟؟
هي استغربت قالت موب طالع عندي شي
وانا اصلا مولم فاتورتها واوريها قالت اصبر شوي
وراحت تكلم مديرهم وجابتها لي وقالت لي معليش لانه موب طالع في السيستم <--- انتبه للمبالغ الي تدفعها اول ما توصل لو انك تعبان ولا ترمي فواتيرك لانهم ينسون لانهم يغلطون والحلال غالي
وجلسنا في اللوبي نكمل محادثات التشيك اوت هم وطاح بقى الحين شرم الشيخ ...
ومن موقع لموقع وكلهم زي ماقلت متفقين على الرحلات والمبلغ
في النهاية قررنا اننا نكنسل شرم على امل ان شاء الله اني اعوض المدام برحله خاصه لشرم لو ويكند طبعاً هي تقول ماهقيت لكن قلت لها قلي ان شاء الله زي ما جت القاهرة يمكن تجي شرم
المهم وقررنا اننا نجلس اليوم وبكره في القاهرة وبحث سريع على الفنادق من بوكينج وحجزنا في كمبنسكي
على حضنا مافيه الا اجنحه واحجز جناح مطل على المدينة .. لان قارنت السعر مع سوفتيل عشان ما نطلع طلع ارخص من سوفتيل وما كنت ادري انه جناح اصلا الا يوم وصلنا لهم
المهم قلنا الحين خل نروح للفندق ثم نروح ناكل لنا شئ .. فرحت استلم الاغراض الا يقولي واحد مشرف عند الشنط انتا غرفه 15 16 17 غرفتنا كان رقمها 616
قلت له لا بس 16 !! ودخلت الغرفه حقت الشنط ويقولي موش 14 و15 و 16 مع بعض قلت لا هي فضيه ووحده سوداء قال هذي قلت هاه لا وش ذي !!
هي ناقصه الحين حريص على كل شئ وتكنسلت السفره وفي النهاية تضيع الشنط وياخذونها ناس بالغلط
قلت المهم لا تصير طلعت من الفندق تاكدوا ويدورون وتتقلب وجوه الي يشتغلون
وكلم فلان ودور هنا
قلت المهم شفوا الكاميرات لا يصير احد خذها ويخرب المزاج فندق خمس نجوم ويضيعون.. والمدام لين الحين ماتدري عن شئ رايحه تمشي الولد يوم شافتني تاخرت الا تجي قالت لين الحين ما جابوها قلت الا ضيعوها
ويقلب وجهها ويتحول لمارد
الا المشرف على طول يرد لا لا موقوده راحوا يتاكدوا من الموظف فوق .. فريحة شوي ثم شافتني انا خلقه منفس ومختبص قالت تذكر الموظف انت الي خذها قلت لا ما جاء في بالي فندق زي كذا يضيع
شوي الا جاء موظف وقال للمشرف لقيناها مع مدري من هو فوق .. وعلى فكره انا مرسلها قبل لا انزل ومسوي تشيك اوت وراحت جابت لي التامين وجلسنا نتشاور وقت كل هالفتره والاغراض ما نزلت ولا هوب موسم زحمه زحمه
المهم يوم شفتها كانهم صابين مويه باااارد علي
مافيها شئ مهم او يسوى لكن مهما كان فيها ملابسنا وفيها اغراض الولد والقهوه وفكرة انهم يضيعون شئ لك تغبنك لوني انا ارميه في مكان اهون
الشاهد يوم جابوها واطلب اوبر ويجينا ورحنا للفندق الثاني
الفندق صراحه هاادي جداً للي يبحث عن الهدوء والاسترخاء يحجز فيه مع اني قبل لا اروح للقاهره كان من ضمن الخيارات لكني ماتحمست له لان حسيت ديكوراته قديمه من الصور وفيه ناس تقول اثاثه اندق من الاستخدام مع ان سعره يعتبر مقبول لفندق 5 نجوم
مدخل الفندق صاير على زاويه قاتله الفندق ومدخله صاير صغير ولا فيه لوبي لوبي عليه الكلام مايحسسك انه فندق 5 نجوم
المهم يوم جيت عند الريسبشن قلت له تراني ماكنت ناوي اجيكم بس شاءت الاقدار فياليت تتوصى لي باطلاله حلوه قال لا ماعليك مضبوطه حتى فيه اطلاله جزئيه على النيل قلت زين
ويوم طلعنا طلعت الغرفه جناح غرفة نوم معها دورة مياة وانتو بكرامه وغرفه ثانيه جلوس ومعها دورة مياه ثانيه
الي مع غرفة النوم فيها بانيو والثانيه بس شور ونفس الحكايه مافيه رشاشات الشطاف
الاثاثه حلو ونظيف فخمه الغرفه مدري هل عشانه جناح والغرف العاديه هي الي مندقه على قولتهم
وفيه شرفه عند غرفة الجلوس تطل على بيت حلو حوله حدايق كان المنظر حلو يفتح النفس مع اننا ماجلسنا فيها لكن كاطلاله على المدينه العاده تشوف بيوت قديمه ولا حوش او مستودع او مكيفات
حاط له اللوكيشن الهرم الاكبر واول ما ركبنا قلت له الاهرامات قال طيب ومعه اي باد حاطه على رجله فيه الخريطه ويمشي ويناظر فيه يوم حسيت الولد ماش كل شوي يناظر حركات واحد مبتلش
واساله اللوكيشن موب واضح عندك الاهرامات بنروح قال اوك
المهم شوي الا يوقف ويسال واحد الاهرام من فين ويوصفون له وثم نمشي مسافه يوقف عند واحد ويساله قلت له اسمع انا بمشبك على اللوكيشن امش بس ونمشي ومصر يمشي على الدرب الي قالو له عنه قلت ماعليك منهم امش على الي اقول لك انت بتودينا طريق بياخرنا 20 دقيقه وانا الوقت موب في صالحنا لانوصل ثم يرجعونا زي ذيك المره
ولازم اجلس فوق راسه قبل كل لفه اكرر له ... جينا في طريق وقلت بتروح سيده الا الرجال ماسك اليسار وموقف عند الاشاره قلت الحين وين بتروح انت الطريق سيده شف الناس تمشي ليه واقف مع الي بيروحون يسار وكانه ما اقتنع المهم مشينا يوم قربنا نشوف روس الاهرام من الخط قلت له الحين بتروح يسار قال ايه باخذ يوتيرن وروح يسار نفس كلام اللوكيشن يوم قربنا الرجال اشوفه ماسك سكه خطاء ناوي يتعدى الا اقوله الحين شمال مع هنا ومصر يناظر الايباد حقه يتاكد
الى ان وصلنا لنفس المدخل حق خوينا ذاك اليوم عند التفتيش ونفس الشئ وين معايا ضيوف وندخل الا اشوف عسكري معه واحد تاكين على جنب يسولفون وفيه طريق يوصل فوق وفيه على اليسار مدخل اسطبلات وفيه حناطير وخيول ولوحه مكتوبه بالابيض والاسود تسعيرة ركوب الخيل والجمل الخ ب 100 جنيه للنصف ساعه للشخص
وواحد ياشر على سواق اوبر وقف وقف ادخل هنا ويدخلنا مع التراب ويقول خلاص وقف هنا ماتدخل السيارات قلت طيب اشلون مافيه تذاكر قال الا قدام بس السيارات ماتدخل انتا خليجي تتعامل زي المصري <--- انتبه من هالجملة
انا من دخل في هالسكه وانا ما ارتحت قلت له ليه طيب مانروح مع السيارات هناك قال انتا زي المصري هذا بس الخواجات قلت ماشاء الله هم احسن منا قال عيب انا بنضبطك .. الى الان ما اقتنعت حتى هو حس فقام مسك البطاقه الي معلقها على رقبته ويقول شوف انا من المرور والسياحه شغل رسمي طبعاً كرت اي واحد يسويه بس ماش الموضوع كله موب مريح بس لان فيه شرطه مخليني اكمل معهم
وقال انزلوا وحق اوبر يروح تركبون الحنطور هذا يوصلكم لمكتب التذاكر قلت وينه طيب بنروح له لازم نركب قال ايه عشان نوصلكم وماتدفع الا هناك
وركبنا حنطور صغير موب زي الي في القاهره هذا يكفي ثلاث اشخاص متراصين بس كرسي واحد
المهم ونمشي شوي يبعدنا عن المدخل وفي رمل الا يقول تبون تشوفون وش قلت كيف اللفه وبكم
قال فيه كبيره ووسط وصغيره ونلف على وعلى وعلى يقولون لك اماكن كثيره يحسسك بتلف مصر بكبرها ومعالم العالم كلها
قلت له انا مانبي الا هالثلاث اهرامات نشوفها من قريب وابو الهول الخرابيط الباقيه خلها لك
قال خذ اللفه الكبيره واظاهر هي اصلا مافيه الا لفه وحده بس عشان يزيد السعر
لانه يوم شافني صامل على الاهرام وابو الهول قال يالله الكبيره وب 1800 جنيه
وشو الي الف ؟؟
قال بتروح لهالمكان وذا المكان قلت وش الي الف قال شف انا من السياحه وشغلنا نظامي الخراط انا ما مشت علي سالفت السياحه بس مافيه الا هو تلقي الركبان والله لوني لحالي ولا مع خويي اني اقوله لا هونت ابنزل ورح در لحالك المهم يمين يسار نزل الى 1400 جنية طبعاً انا في البداية كنت احسب باللفه 1400 طلع يقصد على الشخص قلت وشو طيب اللوحه الي برى الي مكتوب للنص ساعه ب 100 جنيه للشخص ؟؟
قام بلم شوي وقال اي لوحه <-- جحد على طول
قلت فيه لوحه عند المدخل لونها اسود
قال انا من السياحه اشغلتنا انت وسياحتك قال بص انتا خليجي وزي المصري نعاملك بالجنيه لو اجنبي كان يورو ولا دولار قلت الا الخواجه هو الي مدلعينه يدخل بالسياره وماينلعب عليه المهم كم اخرتها قال 1400 قلت 1000 تبي مع انه والله ماودي ومستكثرها وعقب هالنصب مايستاهل لو 1 جنيه واحد بس حر وخياس وعن قولت بس نبي نشوف هالاهرامات قام قال السواق خلاص ياعم ماعليك يعني يقالك انه زعلان والسواق ضبطني الحين
وعطا السواق فلوس اظاهر 40 جنيه ثم مشينا ثم قالي السواق اسم الولد ايه قلت محمد قام يحاول يضحك محمد ويسولف وبص يابو محمد انا اسمي كذا واذا بسطتك ابسطني اوكي اوكي وقام يرطن كلمات انقليزي امثله الفلوس تروح وتجي ومدري وشو وانا اسلك له المود قلب
واشوف الطريق الي بنمشي فيه رمل ويخضك خض وبنمر بمنطقة زباله <-- جد زباله موب وصف
وبزران جالسين يجمعون فس الزباله وذا يسولف يقول يقول هنا صورو فلم وينصب ويقولي انه ينصب يعني يقاله ينكت وثم دخلنا في دواعيس حواري صدق قديمه هذي الحواري هي نفسها الي كنت متخيل اني اشوفها في مصر شوارع تراب وحفر وتجمعات مويه ودكاكين صغيره وواحد يطبخ في الشارع وذبان والحرمه الي تمشي معها خبز والي يمشي بحمار وانتو بكرامه
هو حلو انك تشوف هالاشياء ومستمتع بالمناظر شئ جديد لكن تعرفون شعور المستمتع لكن تحس فيه ريبه في الموضوع خاصه وانهم بادين الفلم من بدري
نمشي وهو كل مامرينا على احد يسلم .. هالمنطقه اسمها نزلة السمان
ونمشي ونمشي الى ان وصلنا لمنطقه فيها سيارات وفيها حناطير وفيه زي المكتب ويقول لي الحين بنقص التذاكر معك الجوازات قلت ايه راح ثم جاني قال الحين بتنزلون تدخلون المكتب هذا وتقابلوني من الجهه الثانيه المهم نزلنا جينا ندخل المكتب قال اموضف من وين قلت السعوديه قال معكم اثبات قلت ايه تونا بنطلعه من الشطنه قال يالله تفضلوا فيه تفتيش
طبعاً للمعلوميه وتاكيداً لسالفة الفلم الي في البداية ان هالمكتب فيه له طريق يوصله غير الي جينا معه للاهرام وطريق الخواجات الطريق الي دخلنا معه من جهة فندق الماريوت لكن هالطريق ينزلك على الاهرام مباشره وفيه حناطير وفيه حياه وتقدر ماتاخذ حنطور اصلا ولا لو تبي تجي لعروض الصوت والضوء فالواحد الي ناوي يجي للاهرامات اول مره يروح لمكان عروض الصوت والضوء عشان ينزله عند مكتب التذاكر مباشره
المهم طلعنا من المكتب الا قدامنا ابو الهول واقف ولفينا على كلام راعي الحنطور وجلسنا نمشي عاد المدام تقول عساه بس ما انحاش وخذ دراهمنا وعربية الولد معه .. الا اشوفه ياشر من بعيد تعالوا
وركبنا وبدت الرحله ويسولف هذا هرم وهذا هرم وكل هالمعلومات شايفها في ناشونال جوغرفيك بس ماشي معه على اساس انها معلومات جديده
وشوي يغني عاش سلمان عاش سلمان ثم قالي انت تحب الملك سلمان ؟؟ قلت له اكيد انت ماتحب السيسي
لاني ادري انهم ما يحبونه عشان الضرائب وزاد اسعار الغاز والبنزين ولانه ما قالها الا عشان يعني يقاله بيبسطني مايدري انهم غابنيني
ونمشي ووصلنا الهرم تعالوا اصوركم صور احتراف ارفع يدك انقز ياسلام على الضحكه اضحك ضحكه مصريه الخ .. مايدري انه قفل مزاجي من بدايته فلا تحاول
جينا عند الجمال
عندها واحد صعيدي العمده يالله اركبوا خذوه فغلوه راحت المدام ركبت ويوم شفتها ركبت ركبت مع اني منيب متحمس ومسكت ولدي وانا اركب مابي انقرص زي القرصه الاولى قلت بكم ياحج قال ماعليك انتا سعودي زي المصري
ايووه مصري اجل بكم
قال انت كريم عادي الي يجي لو 200 ريال سعودي قلت لا انا بخيل وبختلف معك بكم علمني قال عادي الي يجي ويخلون الجمل يمشي مايوقف عشان
ويقفل المود زياده لاني ادري اني بتمشكل معهم في الرجعه والحين بنوديك لصوره بانوراميه تتصورون وتجون
وللمعلوميه الي بيروح لايفكر يركب يروح للثمامه ولا الطايف اللفه ب 10 ريال واطول واونس من لفتهم
يمشون خمس دقايق وثم يرجعونك تشوف الهرمين من جهة اليسار
يوم رجعنا ونزلنا قلت كم حسابنا قال يكفي اخذ الولد قلت لا الولد مايسوى فلوس الزبده كم قال الي يجي انت كريم والي يجي راضي فيه قلت قلي كم منتب راضي بالي بيجي وانا ناوي اعطيه 200 جنيه ولا بعد متوصي له ولا حده 50 جنيه
ويمين يسار قال 1000 جنيه قلت وشو انا اصلا كنت جايب معي 1500 جنيه
قلت وش الي ب 1000 قبل ماخذين مني الف وانت تبي الف بعد ماعندي قل غيرها ولا تسوى شئ وقايل لك بنختلف قال انا اعاملك معاملت المصري زينا لوك اجنبي كان قلت لك بالدولار ولا اليورو بس عشانك عربي زيينا
ماعندي ثم يمين يسار قال خلاص شف جب الي تجيب انا راضي ناظرت البوك وثم ناظرتهم قلت بزودهم شوي داممهم متجمعين علينا قلت ما معي الا 400 جنيه الا ينهبلون كلهم الي يسحبون الجمال ويقالك الصعيدي ماسكهم لا يسوون شي خلاص عندي ثم قال لا اشلون خلاص خليها مايحتاج يعني يقاله بيحرجني
يارجال ماعندي الا ذي وفعلياً هو زارفني ولا النص ساعه للشخص على تقييم دولتهم ب 100 جنيه وانا ماجلسنا ولا عشر دقايق وعطيته دبل وتبي تستغفلني بعد
المهم جاك السائق البطل حق الحنطور الي قال لي اول ما مشينا ماعليك بضبطك وببسطك وبعطيك كل شئ باسعار حلوه ومنيب مخليهم يلعبون عليك وهو من الاساس متفق معهم اجل منتب مخليهم يلعبون علي ثم قال خلاص يابو فلان يكلم الصعيدي عندي ماعليكم خلاص ورحنا ونمشي متوجهين لابو الهول ويوقف ويصور نفس الشئ ثم مشينا فيقول لنا منيب موديكم لسوق العطور الفرعونيه هذي حقت الخواجات يلعبون عليهم فيه سوق التحف قلنا لا تودينا شئ خلاص شرينا تحف من خان الخليل وانا اصلا ما شرينا بس باين الكتاب من عنوانه كل واحد ناوي يلهط لك هبره
وطبعا مشينا مع نفس الطريق الحواري حقت نزلة السمان الشعبيه وقبل نهاية الطريق الا نقابل عائله خليجية يمكن سعوديين بس واضح انه صاير لهم نفس الفلم حقنا وزياده على كذا مركبينهم حنطور يرثى له الكرسي حقه تحس انك جالس على خشبه مافيه سفنج وبدون مظله فنزلنا وبدلنا معهم لاننا خلاص وصلنا للنهايه ولا فيه شمس
المهم يمشينا مع سكه بين البيوت واشوف الطريق السريع بعيد قدام فيقول لي هاه يابو محمد انبسطت قلت ايه بنبره زي الي عن قولت بس اسلك ثم قال اتفقنا ابسطك وتبسطني وانا قبل مانوصل عند الريس عشان ما يشوفني الله يكرمك ماتنساني ووقف وانا اصالا من اول ماقال هالجمله في البدايه كنت متوقع
المهم واطلع بوكي واشوف ماعاد فيه شئ واطلع 50 جنيه لانه في الاساس ماخذ مني هو وخويه بس قلت هذي اكراميه
طبعا لو تحسبها بالسعودي تعتبر طفسه 10 ريال اعطيها عامل مغسلت السيارات ينبسط اعطيها عامل المطعم يستانس
المهم هو يوم شافها قلب وشها ثم قال ايه خليها خلاص وزعلان قلت طيب خلاص امسك 100 حلوين فيها بكره قال لا خلاص خليها ويمين يسار وانتوا اول ناس اخذهم اليوم مع انه خلاص بيخلص دوامهم قلت هذي 150 فيهم بركه امسك واحطها في جيبه ويقول لا خليها ماتجيب لو نص كيلو لحمه <--- هذا الاسلوب الي ما احبه والي لاحظته في مصر
يتلزق فيك عشان يسوي خدمه من نفسه ثم ما يرضيه اي شئ
من الاول خلك صريح وقل سعري كذا تبي ولا ماتبي بكيفك ولا عقب لازم تعطيني اكراميه وانت الي تحدد الاكراميه بعد؟؟
المهم كانت هذي الختاميه الي قفلت ابو المود لليوم ووقفنا على جنب ونزلنا في زاوية الشارع واطلب اوبر ويطلع لي يبي له 10 دقائق وننتظر وننتظر تاخر واكلمه الا يقول انا معي زبون الان بنزله في ماريوت وجايكم قلت زين
يوم جانا الا سيارته سني نيسان نظيفه ورجال مرتب وسواليف طلع كان عايش في دبي 8 سنوات ورجع الان للقاهرة فاصبح شخص ناقم على مصر
وهذا الي عدل مزاجي عقب سوالف الاهرام
فيوصف حاله يقول ولا مؤاخذه انا زي الي كان عايش في زباله وجابوني وحطوني في قصر وعلموني كيف اكل واشرب والبس وبعدين قالوا لي خلاص انت الحين تعلمت كل شئ ارجع للزباله ودبر امورك
وسواليف الى ان وصلنا لسالفة اكثر شئ مزعجة في مصر ليه تذل نفسك ليه ربنا يكرمك وربنا يخليك ونكته ليه قل من البدايه سعري 100 جنيه ولا تاخذ اكراميه فيقول حتى اني لاحظتها فيكم يالخليجيين خلاص صار زي العرف عن المصري انه مايقول اي شئ الا عشان يبي فلوس لو ضحكت معك بتفهمها اني ابي فلوس عطيتك منديل تبغا فلوس
يقول حتى معنا يالمصريين يقول اول ما بديت اشتغل كنت شغال على سياره تاكسي اجره وكنت لو طلعت مع عيالي اشرب عصير ولا مطعم كانوا ينادوني ياسطه وحرك ياسطه وحاقريني ويوم اشتغلت اوبر وسياره ملاكي صاروا يقولون يابيه ويابيه ويبون مني اكراميه والسواقه عندنا فوضى كل واحد يدخل على الثاني مافيه اعتراف بالسكك وحتى هم نفسهم اهل مصر تعودوا على الفوضى محد يزعل اذا ذبيت على الثاني او دخلت عليه شئ عادي
عندنا في مصر معطين المجال لكل الناس تبي تتكسب فلوس سو الي تبي منب قايلين لك شئ وعشان كذا العالم مبسوطه ماتبغى النظام
المهم نسيت اقولكم كنا حاطين الوجهه لمعم بيت ورد عند شارع جامعة الدول فمشى الوقت بسرعه وعدل مزاجي زي ماقلت قبل شوي روقت شوي قلت زي فيه مصري حاس بالمعانات الي حسيت فيها
هالمطعم له كم فرع هذا الفرع الي رحنا له صاير مقسوم قسمين قسم للمدخنين وقسم لغير المدخنين طبعاً قسم المدخنين اونس فيه زحمه بس عجه طايره
طلبنا كم طلب كان من ضمنها متبل
شوي الا يجينا حمص وينزل لنا ذاك الخبز المنفخ
طبعاً ناقلين من فندق لفندق وجايين من الاهرامات فاطسين جوع
واخذ لي مسحه والمدام مسحه الا تقول المدام موب كنا طالبين متبل
قلت هاه الا ؟؟ ياسي سيد يا سيد
هي كلها واحد بس هالمره مشتهين متبل من جينا ماغير ناكل حمص وبطاطا حره
جانا واحد غير الي خذ الطلب وقلنا له كيت وكيت قال من الي خذ منكم الطلب قلت اظاهر هذا وراح ناداه
يوم جاء واقوله وينقلب وجهه ويقول انتوا الحين كلتوا منه .. عاد وش يدرينا انت الي غلطت جوعانين مانفكر
تحمل غلطك ويعصب ويقول اشلون بينطل محد ماكله <--- بيزيده حمص ثاني ويمسح عليه بالملعقه ولا من شاف ولا من دري
انا بدفعه من جيبي قلنا انا الي سجلنا الطلب ونزلنا الطلب ولا انت ؟؟ وقم وعصب ويعلي صوته ويقول ويسحب الصحن ويقول خلاص انا بدفع الطلب وعلى حركته الا يشوفه المشرف ويناديه وش المشكله ويقوله كيت وكيت وعلى طول يقوله بصوت هادي رح وماعليك جب الي يبون
بعدها صار الي يجيب الطلبات واحد ثاني نفسه زينه غير خوينا الاول
عاد يوم جاء الحساب جاء خوينا الاول وماكنت فيه فتقول المدام انه يقول شلت عنكم الحمص تقول عاد هي تقول قلت في نفسي زي الي غصب يعني غلطان وبعد تبي تمن علينا
المهم طلبت اوبر واتابعه وفجاءه يوم قرب عندنا الا يوقف .. !! جلست ادور يمين يسار السياره في الخريطه قريبه ليه وقف ؟؟ وادق عليه اظاهر يعطيني مغلق
قلت مالي الا اتابع الخريطه واروح له واتقدم شوي واحصله موقف على جنب ويناظر في جواله ماتعودوا على الخرائط وااشر له ويتقدم لي .. حطينا اللكويشن على الفندق ما قصرنا اليوم
والحمد لله على السلامه وصلنا الفندق ويوم رقينا للغرفه الا الكرت ما يفتح
وعلى حظنا الا فيه الهاوس كيبر مار قام فتح لنا الباب
وتمددت شوي وغرينا ثم قلنا فندق فيرمنت ممدوح لنا فيه مطعم تاكل على انغام تقاسيم العود
ياسلاام على المزاج
والله ونطلب اوبر وهالمره جاء بسرعه وطبعاً كلمته قبل تراني في الفندق كل مره يجون ويوقفون على الشارع مع اني في الخريطه مكاني داخل الفندق يعني بديهي الراكب بيكون في الفندق قرب
المهم فيرمنت كنت ناوي احجز فيه كثير مدحوه لي لكن يوم جيت احجز واقراء عنه لقيتهم كاتبين في بوكينق (لا يمكن استيعاب الأطفال في الفندق) فهذا الي ما خلاني احجز فيه
المهم مدحوا لنا الفندق وفيه مول تحته وسينما واحلا مكان للعائلة وفيه مطعم او مقهى باب النيل
قلت حلو ويوم وصلنا الا نشوف باب المول قلت خل ندخل الفندق نفسه ثم نشوف المول الا عند الباب زحمه ناس داخله وناس طالعه ونسبت الشباب هي المسيطره وطبعا كلهم من الجماعة
وتحسك داخل فندق بعكس كمبيسكي فرق
المهم ويوم دخلنا قلنا خل نشوف المول الحين ونروح للمول !! مدري صراحة هو عباره عن دورين او ثلاثه او دورين ودور مطاعم المحلات قليله كنت حاط في بالي مول مول محلات كثير وخيارات كثيره يعني تقدر تفر المحلات بسرعه ماعندك اي مشكلة هو حلو فيه محلات وسينما ومطاعم فاست فود تحت الفندق بس بعض الناس تحب تبالغ في تصوري <--- واتوقع كثير بيعارضوني بس قلوا اني انا النفسيه حتى المدام تحب الاسواق والصجه لكن هي بعد تقول احسبه سوق رسمي موب محلات وعاديه
الشاهد خذنا لفه سريعه على السوق وطلعنا للفندق وين تقسيمات العوود بس
واسال السكيورتي ويقول اطلع الدور رقم مدري كم وناس داخله وناس طالعه وكلهم كاشخين وكلهم يدخنون والي جالسين في اللوبي يراقبون ونطلع لباب النيل حاطين له بوابه وفيه وحده استقبال وعندها شباب فيه اثنين دخلتهم وفيه واظاهر واحد قالت لا ماعندك حجز وقلت لها وش النظام حجز ولا اشلون انا اثنين وطفل
قالت والله فل مافيه مجال قلنا طيب نقدر نشوف بس الوضع كيف قالت ايه ودخلنا جلسات وفيه ستيج مسرح فيه وحده تغني او واحد نسيت بس طلع حفله اليوم ودخااان غيمه
عاد وانا طالعين الا نشوف شاايب شكله من الجماعةخليجي يالله حسن الخاتمه جاي لحاله داخل
انا منيب مطوع بس مثل هالاجواء ميب مريحه لي
المهم طلعنا وقلنا لهم مافيه مطعم ثانيه فيه نفس الجو قالنا فيه واحد نفس باب النيل في الدور مدري كم في السطح قلنا نشوف
وطلعنا الا فيه حفله ثانيه وقالي الاسامي اظاهر امير عبدالله شكلهم مشهورين عندهم لانه يقول لي الاسامي وهو منبهر يعني زي الي وااو انا ماعرفتهم الا نشوف المكان هنا اهون شوي لانه مفتوح اشرح شوي مافيه غيمة الدخان
قلنا بكم قالت لي اظاهر تقريبا فيما يعادل 1000 ريال سعودي للشخص شامل الاكل
على وش لوها حفلة محمد عبده
وخليناهم ونزلنا للوبي والا اللوبي مليان شباب حلوين وشيبان وبعضهم معه كاس شكله عصير تفاح فوار غازي
وبعضهم بيره ام نجمة بدون كحول
وانوااع الدخان
المهم انا شبعااان احس ودي اهضم قلت اطلب بيره ولا مشروب عنب مخمر بدون كحول
خذت لي عصير لمون او اناناس واحد منهم
والمعزبه خذت لها روزيتو
بشكل عام الفندق حي ونيس وجديد وفخم مدري عن غرفه لكن اللوبي تحسه لوبي فندق زي ماقلت
بس العينات الي تتوافد عليه بنات وشباب xxxx ولا واحد يجيك يوزع ابتسامات وعيونه متقلبه ويدخن والتميلح الي حاصل مدري ليه يقولون افضل فندق عائلي ؟؟ مدري كل هالمظاهر بس عشانه كان يوم سهره
المهم وانا طالعين من الفندق الا واحد قدامي جالس يدخن بيطلع الا يقول له السكيورتي معليش التدخين ممنوع هنا
انا جلست اضحك
كل مكان في الفندق يعج بريحة الدخان وما لقيت تمنع الدخان الا عند باب الخروج يعني خايف على تلويث الجو الخارجي
المهم نفس معاناتا مع سواقين اوبر اللوكيشن في الفندق ويجلسون يدورون حوله مايفكر يدخل الفندق لازم تكلمه وتشرح له
ورجعنا للفندق الحمد لله بعد يووم متعب صراحه بس الحلو فيه اننا قدرنا نشوف الاهرامات الي استغربت من كثير من الي قابلتهم يروحون لمصر كثير بس يقول ماعمري شفتها ؟؟ بالنسبه لي لو اجي لمصر واشوف الاهرامات وابو الهول يكفي
عجيبه من عجائب الدنيا واشهر معلم في مصر وشعار مرتبط بمصر ودايم تجي يعني موب نقول ماعندك وقت ولا تروح لها ؟؟ لو امرها بالسياره بس
الناس اجناس في السفر واطباع وكل واحدو له مزاج لان اعرف ناس متعتهم في السفر انه يجلس في الفندق ولوبي الفندق بس ودايم يسافر .. براحتهم
هالرد كتبته على يومين واعذروني على الاخطاء الاملائية الي تصير لاني اكتب بسرعة ولا اراجع الي كتبت الا الي تطيح عيني عليه صدفه
وان شاء الله الرد القادم بيكون يحكي تفاصيل اخر يوم لنا في مصر ام الدنيا
صراحه تلخبطت عندي الايام لكني اظاهر كاني منيب واهم اليوم الي الاخير الي قبل السفره عقب مارجعنا من الاهرامات وتغدينا رحنا لخان الخليل مره ثانيه عشان نشتري مجسمات فرقة ام كلثوم المره الي راحت شرينا ام كلثوم لحالها ونسينا فرقتها فقالت لازم الفرقه اذا تبون حفله
وعلى الطريق خذنا للصغيرين جلابيات المصاريه الي فيها هلل او قروش حقت البنات وشوي خذنا لوليدنا جلابيه مالقينا مقاسه ذيك المره
وعلى الطريق شافت ام محمد جلابيه جازت لها وخذت وشوي على الطريق ذكرنا في كل سفره لنا لازم نشتري مغناطيس الثلاجه وفيه معالم البلد الي رحنا لها او المدينة وشوي على الطريق لا لا خلاص يكفي
اغلب وقتنا راح عند حقت جلابيات البنات الصغار كل شوي هذا اللون حلو لا هذا هذا مقاسه زين لا هذا لا رجعي هذا وعطينا هذا لا هاتي الثنتين كلهم وش رايك نجيب لفلانه يالله هاتي لون ثالث
فطلعنا من خان الخليل على الفندق ثم رحنا لفيرمنت...
ووصلنا لليوم الاخير من يومياتنا في القاهرة في مصر ام الدنيا مصر دي امنا
بعد مارجعنا امس وانا دايخين انا فيني طبع لازم قبل يوم السفره ارتب الشطن عشان ماتحوسني ولازم ارتبها زين عشان تتقفل بسهوله
مع اني دايخ بس احس اريح لي نفسيا اقوم وانا مروق كل شئ جاهز، وارتب الي قدرت عليه
وخذ لك نومه حلوه الحمد لله ومع اشراقة يوم جديد ماقومت العائله الكريمه قلت خلني ارتب كل شئ وهم خلهم يشبعون نوم
شوي الا تجيني المدام تقول وراك ما صحيتني قلت خلك ترتاحين قالت ابروش حمود <-- قلت في نفسي يوووه ما احب سوالف التاخير خاصه المطار
خلاص انتي خلصي بس اغراضك وقفلي شنطتك يبي لك وقت وحمودي بدبره
وادخل انا وياه الشور وشف الحفله انا الي تروشت موب هو
وابلش الحين اشلون تنشف ملابسك الي امتلت مويه ... وعلقها ووشي استشوره ... نسابق الزمن الى ان تقريبا خلصنا جلست اتفقد الغرفه قبل لا نروح لا يصير ناسين شئ ولا حمود ناطل شئ
الا احصل ملابسي عقب الشور نسيتها معلقها في الحمام وانتو بكرامه
وش بينشفها ذي واشغل الاستشوار وشوي الا يدق التلفون التشيك اوت الساعه 12 وانتوا لين الحين ماطلعتوا قلت انا عندي ليت تشيك اوت الى الساعه 2 واصلا طالب احد يجي ياخذ اللكج الشنط ولا جاني احد قالت اوكي اوكي الحين نرسل لك
ويوم شفت الوضع كذا خذت لي كيسه وربطتها بقوه عشان لاتخيس الشنطه
والحمد لله خلصنا قبل الساعه 2
رحلتنا زي ماقلت لكم الساعه 7:55 م الاقلاع
فقلنا نخلي الاغراض ونروح ناكل لنا شئ ثم نرجع ناخذ الشنط وعلى المطار
والمدام تقول لا وش رايك ناخذ الشنط معنا ونروح مباشره للمطار .. قلت وين نجلس نشحب هالشنط معنا خليها ونرجع وناخذها
وقلنا وين نروح بس الحين نتغداء عشان ما نتاخر .. المعزبه جايز لها فيرمنت قالت خل نروح له قلت يالله
وخاصه انه قريب منا ورحنا وجلسنا في اللوبي قلنا بنجرب اكلهم وطلبنا ما طاب ولذ الحمد لله
الى الان الامور تمام الا انهم تاخروا في تقديم الطلبات
يمكن مرتين او ثلاث نسالهم وين الطلب ورانا رحله منب فاضين
تقريبا نزل لنا الطلب الساعه 5 او خلصنا الساعه 5 المهم يوم خلصنا رحت وقلت لهم جبوا الفاتوره يوم تاخروا قمت وحاسبت وانا واقف وطلبنا اوبر وتاخر طلع واحد فاهي
تاخر علينا
ولا ودي الغي ويتاخر الثاني خلاص دامني صبرت ونركب واقوله فيرمنت واوصف له واضح انه من جنبها وبغى يجيب بنا العيد ويصدمنا واحد مع الابواب
وكل شوي اناظر الوقت واناظر سواقته من التوتر بغيت اقوله حول انا بسوق عنك سواقته زي وجهه ويسرع سرعة واحد عليمي .. فكنا الله
المهم نزلنا عند الفندق وخذت الشنط ويالله على المطار ولهيت عن اللوكيشن الا انتبه ان الرجال ماي يدل وبيضيع وقتنا وقمت اوصف له خطوه خطوه ولازم اقون دقيقه عشان ما يتعدى ونمشي ونص الطريق قالي لازم نعبي بنزين مووب وقته المهم قلت ما يوصل ويمشي شوي وانا ابحث في الجوال عن شئ الا جاء مفرقين لطريق واحد وراح يسار يسار يزيد علي 15 د من الوقت وثم قال البنزين خلاص ما يوصل قلت يالله عب بس انا متاخرين ومفروض تعبي من اول بس عجل علينا
ويوقف يعبي وينطلق واوصف له خطوه خطوه لا يتعدى بعد منب ناقصين بق 20 ساعه وتصير الساعه 6م طبعا انا ما اعرف اجراءات المطارات مثلا قبل رحلتنا في الرياض جلسنا عند الشنط بس تقريبا 40 دقيقه مع انه معي البوردينج
يوم قربنا عند المطار الا فيه كمين قلت يليل الحين بعد بياخرونا منب ناقصين
والحمد لله مشت الى ان وصلنا ونزلنا وتونا نمشي الا الرجال نازل يناديني يقولي الحساب خلاص ؟؟ طلع اول مره يشتغل شكله او اول يوم الفاهي
وادخل المطار خوينا نفسه الي طلعنا منه الصاله رقم 2 الا اشوف المسارات وادخل من مسار مع الناس يوم وصلنا نهاية المسار خلاص اشوف اجهزة التفتيش الا فيه واحد الي يقول رح يمين يسار الا يجي واحد ثاني من ورى ويقول رايحين فيه قلت الرياض قال الرياض خلاص هاتوا شنطكم خذ يا فلان ودها على هالسير
وانا اناظره توقعته يعني بيدخلنا على الصاله على طول بيسوي شئ
والله العظيم المسافه تقريبا اقل من 5 متر بعدنا عن جهاز تفتيش الشنط يعني خلاص الدور علينا
وانا معلميني قبل تراهم يسوون هالحركه في المطار ويتصيدون للجواز الاخضر اصلا واضح من اشكالنا والعبايه والصاله هذي لرحلات الخطوط الاسعوديه ومصر للطيران
المهم خذ شنطنا وقال ماعليكم بمشيكم وحط شنطنا في جهاز التفتيش الي مليان اصلا وفسخنا الشوزات الله يكرمكم وفيه عسكري بعد الباب يفتش يدوي ويتاكد من التذكره اذا رحلتك باقي عليه بس 3 ساعات اذا ازود بيرجعك فيه واحد رحلته الساعه 9م قال له ارجع مع ان شنطته دخلت ورجعه
ويوم حط شنطي في الجهاز الا يقولي انا مدير الشباب اكرمنا الله يكرمك قلت مامعي شئ قال اي حاقه قلت له شكرا الله يعطيك العافيه وراح
المهم بعد التفتيش فيه حقين عربيات على طول يلقطون شنطتك ويحطونها في العربيه ويقولون اي خطوط الشنط معي تندف بس مع الحوسه خلاص قفلت ولا قلت شئ بس ما احب هالحركه الي يجي يشيل ولا يشاور المهم شوي الا وحده معه فواتير تشق وتعطيك مكتوب عليها تذكرة نقل عفش او سله نسيت وش مكتوب بس مسجل انها ب 20 جنيه
هنا انا انصدمت
لا لاء فيه شئ غلط اشلون في مصر وشغالين نظامي ومرتبين الشغله صراحه وسعوا صدري وانبسطت
طلع منهم رجاء فيه امل يتنظمون هههههههه
وخلصنا وشحنا الشنط وفي الطريق للدخول لصالات الا نقابل بحرينيه كبيره شوي في السن يوم شافتنا جلست تتشكى من هالعسكر تقول عيا العسكري يدخلني من البوابه يقول معك معسل قلت له لولدي موب لي قال مايدخل الا ذا دفعتي وقال يبي 100 جنيه وعطيته
والمهم الحين معي اغراض كثيره اخاف ما يدخلونها الطياره تاخذون كيسه وتعطوني اياها داخل المدام الله يهديها رحمتها وعلى طول قالت ايه وخذتها كيسه فيها صينيه ولوحه هدايا
في المطار يحذرون لا تاخذ اي شيء ولا تنقل اي شئ من غريب
المهم قالت لها ترى رحلتنا الساعه 7 وبنروح للرياض هي رحلتها 8
المفروض تعبي بيانات الجوازات الكرت قبل الدخول وتلحقنا وجلسنا في السرى شوي شوي وصلنا للموظفه وذيك لين الحين جالسه تترجى الناس يشيلون معها اغراض ويوم جينا عند الموظفه قالت المدام ارجع لها قلت له ممنوع وسالت الموظفه قالت لا ممنوع اذا دخلت خلاص
ودخلنا نسحب رجولنا وخلاص بيفتحون باب الطياره وذي ما جت .. وقلت الحين روحي انتي اجلسي عند البوابه وانا بروح اذا سمعت اعلان البوابه بجي ركض
ورجعت لمدخل التفتيش ولا شفتها من بعيد ولفيت في السوق الحره ماها اثر ورحت لبوابة رحلتها لين الحين ما فتحوها ورحلتنا فتحوا البوابه
وش السوات الحين سالت الموظفه الي جالسه على البوابه قلت عادي اخلي هذي معك فيه راكبه كبيره في السن بتجي تاخذها قالت لا مالي علاقة ... رجعت للتفتيش اتشوف لها ماشفتها والوقت خلاص
رحت لقيت عائله بحرينيه جالسه شايب وحرمته جيته وقلت له فيه وحده كيت كيت اذا جت تعطونها اياها ؟؟
اشايب نفسه في خشمه تحسفت اني سالته حتى يوم تفاعلت حرمته معي اشر بيده عليها زي الي اسكتي بس
قلت له ادري هالشئ غلط بس وش اسوي ... كان يقدر يرفض باسلوب
المهم اظاهر فيه وحده مدري بنتهم او سمعتني وش فيك قلت كيت كيت كيت قالت اووه لا صعبه حطها عند المقهى الي عند البوابه
جيت للمقهى وسلمت وقلت لهم كيت وكيت وكيت تقدرون تخلونها عندكم انا ما اعرفها ولا تعرفني وانا بسافر دوله وهي دوله قال خلاص حطها هنا على الكرسي قلت له الحرمه شعرها اشكر وسمينه شوي ولابسه قميص عليه الوان كثيره اذا جت عطها قالي الله يجزاك خير ورحت اركض لبوابتي
الا اشوف مافيه الا يمكن 8 في الصف بيركبون واتشوف لحرمتي مالقيتها ؟؟ قلت ركبت ونست ان معها البوردينج
ولا راحت بوابه ثانيه ؟؟ واروح واجي كاني منسبه يمكن اربع مرات اروح واجي ادور
والمشكله جوالي طفى علي اليوم الصباح وماعاد يشتغل فاشلون اكلمها او اتفاهم معها
ثم لقيت واحد سعودي قلت له معك جوال يدق قال ايه قلت ابكلم المدام ابشوف وينها وادق عليها الا جوالها مغلق ياذي البلشه
وقلت ابسال الي على البوابه اذا يطلع عنده اسامي الي ركبوا الطياره او لا الا اشوفها ترض من القزازه وراي والتفت الا هي جايه ركض تضحك
وانا كذا
ودخلنا بسلام للطياره وزي ماجينا الطياره كبيره وفل الرجعه نفس الشئ فل
طبعا طول ما ركبنا في الطياره وانا مانبنا ضميرنا على الحرمه ونقول عسى وصلت اغراضها ثم نقول هي الغلطانه والي ضيق صدورنا ان الطياره تاخرت ماقفلت الباب يعني لونا منتظرينها اكثر كان امدانا نعطيها ونركب طيارتنا بس ان شاء الله انها وصلت لها .. ولو احد يوم من الايام شاف هالحرمه او سمع سالفة هالحرمه يقولها اننا حرصنا ندورها واننا ماسرقناها حطيناها لها عند بوابة طيراتها
والحمد لله على سلامتنا .. وان شاء الله ما اكون طولت عليكم وحتى وان طولت ان شاء الله ما اكون ضيعت وقتكم على الفاضي
وسعدت جداً بمروركم وطلتكم الجميلة
شكراً لكم، وإلى لقاء جديد إن شاء الله مع سفرة جديدة
ما أحب هذي الحركات تسوي نفسك تخدمني كرماً منك لكن فعلياً تبي شئ من ورى الخدمة 
.
