الرد على الموضوع

بسم الله الرحمن الرحيم

الحلقة الثالثة (Kruger National Park)

السلام عليكم ورحمة الله وبركاته

النهارده معادنا مع واحدة من أقوى حلقات التقرير ان شاء الله

ومع إحدى البقاع الرئيسية اللى من أجلها شدت الرحال الى جنوب أفريقيا

طبعا اول ما حد يسمع انى رايح جنوب أفريقيا يا كان يقولى حرامية وقطاع طرق

يا يقول حيوانات وغابات وده لان جنوب أفريقيا فيها الكثير والكثير من حدائق الحيوانات الخاصة

والمحميات والحدائق الوطنية العامة

والتى فى صدارتها بلا منازع 

كروجر بارك

[ATTACH=full]613458[/ATTACH]

Kruger National Park | South African Safari and Lodging Guide

متنزه كروغر الوطني هو أكبر المتنزهات الوطنية في جنوب أفريقيا. يغطي المتنزه مساحة قدرها 18989 كم مربع، ويمتد لمسافة 350 كم من الشمال إلى الجنوب، و60 كم من الشرق إلى الغرب

مكان كروجر فى أقصى اشمال الشرقى من جنوب أفريقيا

عند الحدود مع موزمبيق وزيمبابوى

[ATTACH=full]613459[/ATTACH]

وفى كروجر تم تصوير أشهر أفلام الحيوانات على اليوتيوب 

أكبر المدن القريبة منه هى مدينة نيلسبرت فى جنوب أفريقيا

فى كروجر فى كذا طريقة للتمتع بها

ممكن تختار المبيت فى المنتجعات بداخل البارك "أسعاره غالىة"

او تاخد معاك خيمة وتبات فى كامب 

او تقعد فى اكواخ او خيام تبع الكامب

او تعمل زى ما عملنا كده تختار مكان تلف بيه بسيارتك لمدة يوم

مع العلم ان البارك كبيرة جدا على الأقل 3 ايام علشان تلفها كلها

كان اختيارنا نلف فى المنطقة الجنوبية نتيجة لقربها من نيلسبرت

بوابات الحديقة بتفتح من الساعة 6 صباحا وبتقفل 6 المغرب

طبعا إستيقذنا من الفجر وصلينا الفجر وانطلقنا بسيارتنا الى كروجر

قررنا الدخول من بوابة malelane فى أقصى الجنوب وتقريبا تبعد 45 دقيقة عن نيلسبرت

وصلنا البوابة فى حدود الساعة السادسة

دخلنا ملينا الابليكيشن للدخول وتم تفتيش العربية علشان ممنوع الصيد

ودفعنا رسم الدخول وكان 520 راند للشخصيى تقريبا

وللاسف مفيش غير خريطة للبارك متوفرة غير باللغة الألمانية

كانت مش مشكلة لان معايا الخريطة على الايفون

وبصراحة الطرق فى داخل البارك منظمة وفيها لوحات إرشادية عند كل تقاطع

فى كروجر او فى افريقيا عموما فى اكبر خمس حيوانات

الأسد- الفيل- الجاموس الأفريقيى- وحيد القرن- الليوبارد (حاجة بين النمر والفهد)

وطبعا كان التارجت لينا نشوف الخمسة دول

نظرة عامة على خط السير هندخل من malelane وهنمشى ل skukuza ومنها الى lowe sabie ثم crocodile bridge والخروج من malelane مرة اخرى

طبعا البارك فىها الطرق الرئيسية مرصوفة وفى طرق بتبقى وصت الغابات وطرق رملية هى

طبعا الطريق اللى قولتلكم عليه مش مشيناه بالظبط

كنا بندخل كتير فى الطرق الفرعية علشان تكون فى فرص اكبر لرؤية الحيوانات

السرعة فى البارك أخرها 50 فى الطرق المرصوفة و 40 فى الطرق الرملية

ملحوظة الخريطة اللى فوق دى خريطة الطرق الرئيسية

وفى طرق فرعية كتيير جدا هتلاقوها فى موقع البارك pdf لكل جزء من البارك "شمال ، جنوب، شرق ... الخ"

اللينك ده فى الخريطة بالتفاصيل Kruger Park Map

نبدأ جولتنا فى البارك

أول حيوان شوفناه كان الغزلان واللى طول ما انت بتتحرك فى البارك هتشوفها

واكتر حيوان موجود هناك 

[ATTACH=full]613460[/ATTACH]

ومع اول طريق فرعى دخلنا فيه 

[ATTACH=full]613461[/ATTACH]

كان فيه فيل واقف بعيد بس للأسف معرفناش نصوره

اليوم شكله هيمشى حلو فى نص ساعة شوفنا أول واحد من الخمسة 

معظم الطرق الفرعية بتبقى مدكوكة بطريقة كويسة

بس فى اماكن بتبقى صخور وجبال عالية والسواقة صعبة جدا

بس دى نادرة جدا جد يعنى امشي فى اى طريق ولايهمك

ورجعنا للطريق الرئيسى ومفيش غير شوية غزلان وفيل 

[ATTACH=full]613462[/ATTACH]

فين الحيوانات

[ATTACH=full]613463[/ATTACH]

مناظر طبيعية رائعة

[ATTACH=full]613464[/ATTACH]

[ATTACH=full]613465[/ATTACH]

البارك لا نهاية لها [ATTACH=full]613466[/ATTACH]

[ATTACH=full]613467[/ATTACH]

وأخيرا بعد تقريبا ساعتين مشى 

لقينا حيوان جديد

نسور [ATTACH=full]613468[/ATTACH]

[ATTACH=full]613469[/ATTACH]

وزى ماقلتلكم المفروض شهر مارس ده اخر موسم الأمطار

بس من كلام الناس هناك ان السنة دى جفاف ومفيش مطر

والصورة الجاية دليل على كده

ده من فوق احد الانهار فى البارك

[ATTACH=full]613470[/ATTACH]

الوقت بقى الساعة 9 تقريبا والشمس بدأت تسخن

ونسيت اقولكم ان اليوم ده كان متوقع درجة الحرارة توصل فيه ل 35 مئوية

والغزلان واقفين تحت شجرة من الشمس

[ATTACH=full]613471[/ATTACH]

وبعد تقريبا 4 ساعات وصلنا skukuza

[ATTACH=full]613472[/ATTACH]

طبعا كنا محبطين احباط شديد 

مفيش حيوانات

الجو حر جدا

المايه اللى معانا سخنت وتعبنا من قاعدة العربية

المهم نزلنا نتمشي شوية فى الكامب

ده المبنى الرئيسى والاستقبال 

[ATTACH=full]613473[/ATTACH]

ودى خريطة الكامب

[ATTACH=full]613474[/ATTACH]

[ATTACH=full]613475[/ATTACH]

ومربيين هناك حيوانات 

خنازير [ATTACH=full]613476[/ATTACH]

[ATTACH=full]613477[/ATTACH]

كملنا مشى فى الكامب

[ATTACH=full]613478[/ATTACH]

الاكواخ دى بتتأجر بالليلة

وومكن بتجيب الكرفان بتاعك وتقعد فىه او فى خيمة

وفى اماكن مخصصة لكده

ومتقلقش من حاجة

شايفين الكشك ده

[ATTACH=full]613479[/ATTACH]

ده فيه كل حاجة هتحتاجها

كهربا و بوتجاز للطبخ و حتى فيه ماية مغلية جاهزة للشاى

رجعنا تانى ناحية الاستقبال ولقينا الخريطة دى

[ATTACH=full]613480[/ATTACH]

ده الجزء الجنوبى من البارك وكل واحد شاف حيوان بيحط مكانه على الخريطة فى اليوم اللى احنا فيه واليوم السابق

احنا مكناش شوفنا غير فيل اول ما دخلنا حطينا مكانه وشوفنا فين أقرب مكان على الخريطة

زووم اكتر على الخريطة 

[ATTACH=full]613481[/ATTACH][ATTACH=full]613482[/ATTACH]

واضح ان منطقة نهر سابى دى مليانة حيوانات فقررنا ناخد لفة فيها 

كل كامب بيبقى فى محطة بنزين وحمامات واوقات سوبر ماركت صغير

وبيبقى حواليها زى سور صغير ومكهرب علشان الحيوانات متدخلش

ولو هتقعد فى كامب منهم بيبقى ممنوع الخروج منه بعد الساعة 6 المغرب ولحد 6 الصبح 

بس الميزة فى سكوكوزا ان الاستقبال كان فيه مايه ساقعة [ATTACH=full]613483[/ATTACH]

شربنا وملينا مايه 

[ATTACH=full]613484[/ATTACH]

الطريق s83 ثم H12 بعد كده H1 تانى لسكوكوزا

خرجنا من الكامب بعد ما ريحنا وشربنا وتوجهنا الى نهر سابى

[ATTACH=full]613485[/ATTACH]

[ATTACH=full]613486[/ATTACH]

[ATTACH=full]613487[/ATTACH]

وواضح كده ان النهر فيه مايه عكس الباقى

والمعروف ان الحيوانات بتبفى جنب الاماكن اللى فيها مايه

بس فى عز الظهر والحر ده مش هيطلعوا

بس نجرب حظنا 

العيور من فوق النهر

وسيارة واحدة بتعدى وعلى الباقى الانتظار

[ATTACH=full]613488[/ATTACH]

ووصلنا الجهة الشمالية من النهر

واللى كانت مليانة حيوانات على الخريطة اللى شوفناها فى الكامب

ومشينا فيه شوية ولقينا ده

[ATTACH=full]613489[/ATTACH]

فيل [ATTACH=full]613490[/ATTACH]

وكملنا مشى على ضفاف النهر ولقينا زحمة كتير وناس واقفة مش بتتحرك

فيه ايه ياجدعان

[ATTACH=full]613491[/ATTACH]

ده باينه هو ولا ايه [ATTACH=full]613492[/ATTACH]

اه هو فعلا 

ملك الغابة الاسد [ATTACH=full]613493[/ATTACH]

فينك من زمان يا اس اس [ATTACH=full]613494[/ATTACH]

الحمد لله كنت خلاص فقدت الامل انى اشوفه لان الاسود مش بتتطلع من اماكنها الا الفجر والمغرب بس

وطول اليوم نايمة

ومن الواضح انهم مجموعة اسود واشبال

طبعا الناس مسابوهمش فى حالهم غير لما شبل طلع من تحت

[ATTACH=full]613495[/ATTACH]

بينى وبينه متر [ATTACH=full]613496[/ATTACH]

[ATTACH=full]613497[/ATTACH]

طبعا قفلت الشباك وفضلنا ماشيين جنبه بالعربية

[ATTACH=full]613498[/ATTACH]

لحد ما دخل فى الغابة جوه واختفى

والباقيين نايمين تحت عند النهر ومش باينيين

قررنا ان خلاص هدفنا الاول من زيارة البارك خلاص حققناه

وقررنا نكمل المسيرة حول منطقة النهر ونسيب الاسود شوية

كده 2 من 5 اسد وفيل 

ولقينا فى طريقنا فيل تانى

[ATTACH=full]613499[/ATTACH]

واذ فجأة لقينا ده قاعد 

[ATTACH=full]613500[/ATTACH]

ايه ده [ATTACH=full]613501[/ATTACH]

استنوا استنوا

ده واحد من الخمسة 

جاموس افريقى [ATTACH=full]613502[/ATTACH]

بس الصورة من بعيد شوية فا مش باين للاسف

الطريق ده مليان حيوانات

3 من 5 (اسد وفيل وجاموس) باقى 2 بس

يا مسهل يارب

نكمل فى طريق النهر 

ايه ده كمان 

[ATTACH=full]613503[/ATTACH]

[ATTACH=full]613504[/ATTACH]

زرافة يا جمالو يا جمالو [ATTACH=full]613505[/ATTACH]

كده نبقى خلصنا الطريق الشمالى من اللوب حول نهر سابى 

هنرجع تانى من الجنوب فى اتجاه سكوكوزا

[ATTACH=full]613506[/ATTACH]

جفاف برضه 

وفى اى مستنقع او مكان فيه مايه لازم تلاقى ده

[ATTACH=full]613507[/ATTACH]

فرس النهر 

بس للاسف طول الوقت هو قاعد تحت المايه

باين ظهره البنى الغامق من فوق المايه 

بيطلع يخطف نفس وينزل تانى ومعرفتش اصوره 

نكمل طريقنا فى اتجاه سكوكوزا 

[ATTACH=full]613508[/ATTACH]

ووصلنا لطريق مسدود وفيه عربة النقل دى

[ATTACH=full]613509[/ATTACH]

[ATTACH=full]613510[/ATTACH]

وبتعدى النهر فوق السكة الحديد تقريبا لنقل البضائع 

وصلنا سكوكوزا كان وقت الظهر صلينا ظهر وعصر

وملينا المايه تانى وقولنا نمشى نفس اللوب بس بدل ما نرجع يعد ما نخلص شمال النهر

لا هنكمل فى اتجاه lower sabi

مشينا فى نفس الطريق وتقريبا كل الطريق الشمالى مكانش فيه حيوانات خالص

تقريبا ناموا تانى [ATTACH=full]613511[/ATTACH]

بس كان فيه قرود بتتخانق ومعرفتش اصورها 

بعد مخلصنا شمال النهر ورجعنا بدل ما ندخل فى اتجاه الغرب ناحية سكوكوزا 

دخلنا للشرق فى اتجاه لوير سابى

واول حاجة لقينا ده

[ATTACH=full]613512[/ATTACH]

[ATTACH=full]613513[/ATTACH]

[ATTACH=full]613514[/ATTACH]

[ATTACH=full]613515[/ATTACH]

ده شكله ظبى 

بس نوع كبيير شوية

وتقريبا على الساعه 1 كده لقينا كل الغزلان مرة واحدة نزلوا يشربوا من النهر

ورجعوا تانى وكانوا بيجروا فى كل مكان 

سبحان الله منظمين جدا

طول الطريق كان النهر على ايدينا الشمال وطبعا مليان حيوانات

[ATTACH=full]613516[/ATTACH]

[ATTACH=full]613517[/ATTACH]

قطيع من الافيال الصغيرة والكبيرة 

ودى بعض المناظر الطبيعية من الطريق

[ATTACH=full]613518[/ATTACH]

[ATTACH=full]613519[/ATTACH]

[ATTACH=full]613520[/ATTACH]

ومرة اخرى زرافة

[ATTACH=full]613521[/ATTACH]

ونسر واقف على الشجرة

[ATTACH=full]613522[/ATTACH]

[ATTACH=full]613523[/ATTACH]

ولقينا دول

[ATTACH=full]613524[/ATTACH]

[ATTACH=full]613525[/ATTACH]

[ATTACH=full]613526[/ATTACH]

قطيع من الافيال بيعدى الطريق فى اتجاه النهر

[ATTACH=full]613527[/ATTACH]

وفيل صغي مع امه 

جميل جدا ما شاء الله

ولقينا الاسد ده بين الاشجار 

[ATTACH=full]613528[/ATTACH]

الناس حاولوا كتيير يطلعوه بره دون جدوى 

ومازلنا نسير فى بجانب النهر

[ATTACH=full]613529[/ATTACH]

وواضح تغيير البيئة فى المنطقة دى الى الحشائش الصغيرة 

واصبح افق الرؤية واسع

[ATTACH=full]613530[/ATTACH]

وواضح اختفاء اشعة الشمس ورا السحب

وكان فعلا نقطة تحول كبيرة فى الاجواء لان الحرارة كانت شديدة

لان فى معظم الوقت كان صعب تشغييل تكييف العربية 

لان كل شوية تلاقى حيوان تفتح وتصور فكان الحل الامثل اغلاقه

وتقريبا ده اليوم الوحيد فى الرحلة كلها اللى فتحنا فيه تكييف العربية

الاجواء عامة كانت جميلة[ATTACH=full]613531[/ATTACH]

وافراس النهر مرة اخرى فى احد المستنقعات 

وصلنا lower sabi بس مدخلناش الكامب 

اتجهنا جنوبا فى اتجاه crocodile bridge

وبعدنا عن النهر و رجعنا للمشى فى وسط اليابس

وكنا ماشيين على الحدود مع دولة موزمبيق

ويمكن الجبال اللى هناك دى فى موزمبيق مش جنوب افريقيا

[ATTACH=full]613532[/ATTACH]

[ATTACH=full]613533[/ATTACH]

يمكن نلاقى حيوانات جديدة

وبالفعل 

[ATTACH=full]613534[/ATTACH]

احد اشهر حيوانات افريقيا 

الزيبرا او الحمار الوحشى او الحمار المخطط

[ATTACH=full]613535[/ATTACH]

[ATTACH=full]613536[/ATTACH]

ويمكن هو اجمل الحيوانات فى الشكل اللى شوفناه فى البارك

[ATTACH=full]613537[/ATTACH] 

وده اثناء عبوره الشارع

[ATTACH=full]613538[/ATTACH]

[ATTACH=full]613539[/ATTACH]

[ATTACH=full]613540[/ATTACH]

يعيشون فى قطعان برضه

ولقينا ده

[ATTACH=full]613541[/ATTACH]

[ATTACH=full]613542[/ATTACH]

اسمه النو وهو شبه الجاموس بس اصغر شوية 

[ATTACH=full]613543[/ATTACH]

[ATTACH=full]613544[/ATTACH]

وشايف فى الافق بعض الاراضى اللى متعدلة عن طريق البشر 

اذا اقتربنا من اخر البارك من الجنوب

وبالفعل وصلنا crocodile bridge

[ATTACH=full]613545[/ATTACH]

الكامب هنا اصغر شوية من سكوكوزا

بس ميزته انه فى سوبر ماركت صغير وكافيه

وجنبه على طول باب للبارك يطلعك على الطريق بره

قررنا الراحة قليلا 

وجبت الايس كريم ده

[ATTACH=full]613546[/ATTACH]

طعمه جميل جدا

[ATTACH=full]613547[/ATTACH]

وبرضه مربيين خنازير

بعد الاستراحة القصيرة كان باقى تقريبا ساعه وربع على موعد اغلاق البوابات الساعة السادسة

فقررنا المجازفة وشوفنا اقرب طريق يودينا malelane ودى البوابة اللى دخلنا منها

ويمكن نشوف حيوانات جديدة

[ATTACH=full]613548[/ATTACH]

[ATTACH=full]613549[/ATTACH]

هنمشى S25 بعد كده S114 للبوابة

[ATTACH=full]613550[/ATTACH]

كان طريق ترابى

[ATTACH=full]613551[/ATTACH]

[ATTACH=full]613552[/ATTACH]

طائر واقف عند البركة

ومرة تانية نشوف الزيبرا

[ATTACH=full]613553[/ATTACH]

[ATTACH=full]613554[/ATTACH]

وقرينا على وقت الغروب

[ATTACH=full]613555[/ATTACH]

[ATTACH=full]613556[/ATTACH]

كنا ماشيين بسرعة عالية علشان نلحق البوابات

[ATTACH=full]613557[/ATTACH]

وفجأة ومن غير محد يتوقع

[ATTACH=full]613558[/ATTACH]

ايوه هو

وحيد القرن [ATTACH=full]613559[/ATTACH] 

وده احد اندر الحيوانات فى افريقيا واللى قرب ينقرض

[ATTACH=full]613560[/ATTACH]

[ATTACH=full]613561[/ATTACH]

[ATTACH=full]613562[/ATTACH]

كانوا 3 

وهناك كنت بشوف اعلانات كتيير لحماية وحيد القرن 

وبيجمعوا فلوس ليه وممنوع صيده

كده الحمد لله رقم 4 من اكبر 5

"فيل و أسد و جاموس و وحيد القرن"

مش باقى غير الليوبارد ياترى هنشوفه 

المعروف عنه انه بيبقى على الشجر فكان كل تركيزنا على الشجر 

واحنا ماشيين لقينا زحمة 

[ATTACH=full]613563[/ATTACH]

وواضح كده ان فى اسد 

[ATTACH=full]613564[/ATTACH]

كانوا اتنين ذكر وانثى

واقتربت منها تقريبا لحد متر واحد

[ATTACH=full]613565[/ATTACH]

والناس حذرونى من خطورة اللى بعمله ده لانى كنت فاتح شباك العربية

المهم هى خافت منى وراحت للذكر يحميها [ATTACH=full]613566[/ATTACH]

[ATTACH=full]613567[/ATTACH]

[ATTACH=full]613568[/ATTACH]

جمال جدا ما شاء الله

[ATTACH=full]613569[/ATTACH]

وغابت الشمس واحنا لسه موصلناش البوابة

[ATTACH=full]613570[/ATTACH]

وزودنا السرعة اكثر تقريبا ضعف المسموح بيه

[ATTACH=full]613571[/ATTACH]

[ATTACH=full]613572[/ATTACH]

والطريق مش بيخلص والساعه عدت 6

[ATTACH=full]613573[/ATTACH]

[ATTACH=full]613574[/ATTACH]

ووصلنا اخيرا الطريق المرصوف 

[ATTACH=full]613575[/ATTACH]

[ATTACH=full]613576[/ATTACH]

ووصلنا البوابة تقريبا مع بدأ الظلام 

متأخرين تقريبا ربع ساعه

لكن الحمد لله محصلش مشاكل وخرجونا عادى من البوابة

[ATTACH=full]613577[/ATTACH]

لنبدأ طريق العودة الى نيلسبرت

[ATTACH=full]613578[/ATTACH]

الطريق كان فيه كارتة تمنها 50 راند

[ATTACH=full]613579[/ATTACH]

ودى المدينة بجوار البوابة

[ATTACH=full]613580[/ATTACH]

ودى صورة الطريق وزى ما قلتلكم السواقة بالليل هناك سهلة جدا وأمان الحمد لله

وصلنا البيت تقريبا الساعه 8

وقعدنا مع صاحب البيت نحكيله والراجل كان ما شاء الله محترم جدا

وكده يكون خلص واحد من امتع واجمل واطول ايام الرحلة

على الرغم اننا مشوفناش الليوبارد 

بس نسبة 4 من 5 تعتبر من big five لرحلة يوم واحد تعتبر ناجحة جدا جدا الحمد لله

التقييم للبارك واليوم

طبعا مش محتاجة كلام 10\10

شوية نصائح لو هتعملوا زيارة ليوم واحد

متنساش تملوا تانك البنزين فى العربية والمحطات موجودة فى الكامبس بس احتياطى برضه

لو الزيارة فى الصيف يبقى المايه الساقعة شئ مهم جدا يفضل لو يكون معاكم حاجة تحافظ على برودة الماء

الاكل مش مهم قوى كان معانا شوية بسكوت وسناكس كفونا اليوم الحمد لله

مستحيل تلف البارك كلها فى يوم او يومين على الاقل 3 ايام

الحيوانات المفترسة بتصطاد وقت الشروق ووقت الغروب

الصبر وانت فى البارك ممكن يعدى عليك ساعات من غير ما تشوف حيوان واحد

كده تقريبا انا خلصت كل المعلومات ليوم ولو فى اى خطأ سامحونى عليه

اراكم فى الحلقة القادمة و "صن سيتى"

تحياتى