الحمدالله رب العالمين والصلاة والسلام على أشرف الأنبياء والمرسلين سيدنا محمد صلى الله عيه وسلم.......
بالبداية وقبل كل شي ( من لا يشكر الناس لا يشكر الله )
أحب أشكر من القلب العضوين البارزين في هذا الصرح الرائع ( أبو العصافير (أبو هاشم ) وخبير الزولو ( أبو علي ) )
ولهم في طيات هذا التقرير بصمات سيتم ذكرها....
* جنوب إفريقيا *
( الأفرو أوروبية )
يمكن تقولون ليش كتبتها كذا...؟
بأقول متعمد والإجابة في نهاية التقرير إذا كنا من الحيين
* لماذا تم اختيارها للسياحة ؟ *
أولا أبي وجهه غير معتادة للسياحة عامة و العائلية خاصة ووقع الإختيار عليها وبحثت بالنت حصلت تقارير للأسف تعد ع الأصابع للأخوة سابقي الذكر في الشكر ومن ثم التواصل مباشرة مع أخوي الغالي أبو العصافير اللي جزمني وبقوووة للسفر إليها…
* ظريبة إختيارها *
هو السؤال الأول من كل شخص قابلت بعد ما وصلت من السفر كيف الأمن هناك ؟
لأنها بلد غير معروفة سياحياً أو يمكن بسبب الأحداث اللي صارت بكاس العالم 2010
بس أنا أقول البلد ما شفت منه ما يريب
بلد عادي والشخص هو اللي يبعد نفسه عن مواقع الشبهات الزمانية والمكانية.
* خطوط الطيران *
بدأ البحث عن خطوط طيران بعد إن تم تحديدها كوجهة سياحية والبحث عن أفضل الأسعار والمميزات وجدت الخطوط الأثيوبية هي الأرخص ولكن تقف في أديس ابابا والحمدلله ماحجزت عليها لأن مقاعدها أيضاً تفتقد لللشاشات كما ذكر أخوي الغالي أبوعزوز ووقع اختياري على خطوطنا الغالية ( السعودية ) القصيم – جدة – جوهانسبرغ والعكس التذكرة للكبير 4000 ريال و للصغير 3000 ريال تسليم الشنط بمطار القصيم والإستلام بمطار جوهانسبرغ
* تأشيرة السفر *
جنوبإفريقيا تشترط تأشيرة دخول لأراضيها وموجودة السفارة بالرياض وقنصلية بجدة فذهبت بنفسي للرياض لتخليص التأشيرات وكان يوم السبت 6/11 اللي قبل اليوم الوطني اللي أمر خادم الحرمين الملك عبدالله بأن يكون إجازة أيضاً (يعني إفتكينا من أخذ إجازة دوام) وطبيعي رحت للحي الدبلوماسي ووقفت عند المركز العسكري اللي على المدخل وقلت أبي سفارة جنوب إفريقيا ( من هنا بدأت أول علامات الإستفهام عن هذه الدولة هههههه) وكأنهم مايعرفونها قالو رح قدام فيه لوحة مبين فيها كل السفارات وهذي هي:
ولكن لم أجدها!!!!!!!!!
وبدأت البحث على إن معي قارمن إلا إنه وهقني لما بحثت فيه ودقيت عليهم عاد اللغة عندي ممتازة هههههه وأدخل موقعهم من جوالي وأتك على الخريطة وياما كبرتها وياما صغرتها المهم حصلتها بعد عنا...وحتى العسكر اللي مريتهم الصبح كل شوي أمر عليهم قلت لا يشكون فيني ههههههه
المهم وصلت وأخذ هالأوراق من عندهم وأدخل :
وحصلت داخل واحد سوداني اسمه أبو أحمد الله يجزاه خير متفاهم ومتسامح بالتعامل طبعاً أخذو جوالي ويوم قعدت أعبي الأوراق الإصور الأوراق مترجمات مصورهن بالجوال من موضوع أخوي الغالي foxx109 قلت أبي جوالي ولم يمانعو وعبيت الأوراق ودفعت الرسوم على كل جواز 237 ريال كاش.....
قال أبو أحمد بعد أسبوع!!!! قلت أنا من القصيم أرجع مشوار ثاني عشان استلمهن ؟
قال تبي تجي والا أي شركة شحن معروفة عادي يستلمون منا ويسلمونك هناك وفعلا بحثت وحصلت DHL اللي قال عادي بـ250 ريال نجيبهن لو إنهم تأخرو شوي
الغريب إن الفيزا مكتوبة بخط اليد ومو كتابة كمبيوتر.....
لابد من أخذ بعض الإحتياجات الخاصة كبعض المأكولات من معلبات و مكسرات والرز وهو أهم شي ههههههه
وشراء توصيلة كهربائية طولية (هذي لها ممارسات خاصة بالفنادق ههههههه )
وأهم شي بالرحلة ( القارمن ) شريته من أبو محمد من الرياض الله يوفقه ما قصر شريته من قبل نزول خريطة 2013 لجنوب إفريقيا ولما نزلت تواصل معي و أرسلها لي ع البريد و حملتها و فعلا خدمني كثيييير
والجهاز اللي شريت نوفي 50
# البطاقات الإئتمانية #
بطاقة الراجحي مسبقة الدفع و إستخدمتها أكثر شي
وبطاقة الأهلي مسبقة الدفع استخدمتها مره واحدة
# البطاقات العادية #
بطاقة الراجحي العادية وهي اللي استخدمتها
بطاقة البلاد العادية إحتياط ولم تستخدم
بالنسبة للفلوس الي معي ( مامعي شي ههههههه)
البطاقات اللي معي تكفي
والصراحة ما حصلت راند عندنا لا بالرياض ولا بمطار جدة وما أخذت دولار أيضاً
وتجيكم التفاصيل لاحقاً...
** تطبيقات مهمة للأجهزة الذكية **
أنا مركبهن على الآيفون منها
1-برنامج القبلة
وهو برنامج مهم جداً لمعرفة اتجاه القبلة و مواعيد الصلوات
2- برنامج NAVIGON
طبعاً موجود لأكثر من دولة و حملت الخاص بجنوب إفريقيا
3- برنامج القرآن الكريم
4-مترجم السفر
محمله بس كذا اللغة ززززينه وهذا اترجم لأي أحد يبي ههههههههه
5-كام سكنر
لطباعة الأوراق المطلوبة بدقة عالية جداً وتصديرها كصورة أو ملف PDF
6-برنامج PDF وطبعاً فيه أكثر من برنامج اللي ركبت مايخزن إلا 10 ملفات فقط
لأن أخوي الغالي خبير الزولو أرسلي على بريدي ملفات PDF وحفظتهن بهالبرنامج . وبديت أتصفحهن فيه >> من دون نت
طبعاً ما يحفظ الإ 10 ملفات لإنه مجاني واللي يشرا يحمل أكثر...
* جدول الرحلة *
تم التنسيق مع أخوي الغالي خبير الزولو حجز السكن والسيارات وما قصر معي بإيجاد أفضل الأماكن للسكن بأسعار مناسبة وأيضاً إيجاد السيارات
تم حجز 5 ليالي بولدرنس بالقاردن رووت
و ليلة بهيرمانوس
و 5 ليالي بكيب تاون
و ليلتين بجوهانسبرغ
والسعر للسكن السابق ( اسمحولي هذا عرض خاص من أخوي الغالي خبير الزولو )
وبالنسبة للسيارات كلها من شركة first
الأولي تستلم من مطار جورج وتسلم بمطار كيب تاون لمدة 11 يوم
نيسان تيدا اتوماتيك مع تامين شامل واميال مفتوحة
بسعر 3680 راند جنوب افريقي
والثانية تستلم من مطار نلسبريت تسلم بمطار جوهانسبرغ لمدة 6 أيام
هوندا سفك مع تامين شامل واميال مفتوحة
بسعر 2360 راند جنوب افريقي
وكل سيارة عند إستلامها تدفع تأمين 2600 راند ترجع لك بعد تسليمها وبعد خصم قيمة البانزين إذا كانت مو فل........
يعني انا أخذو مني حول 500 ريال ورجعولي الباقي .
على كل سيارة.
وكان من ضمن العرض الخاص ماورد علي برسالته على جوالي وهي بالصراحة مفاجأه هذي:
نجي للمتبقي من جدول الرحلة وهو بقيادة المايسترو أخوي الغالي ( أبو العصافير ) اللي ما قصر معي وأزعجته وأخذت من وقته الله يجزاه عني خير الجزاء
(( طلعت الفيزا وعطيته رقمها وقلت تصرف )) >>ههههه
اسمحلي أبو هاشم بنقل هذه الحقائق اللي يعجز اللسان عن شكرك عليها…
فلك مني الدعاء… وخدمة لاتنسى لك…
فبحث عن سكن في منطقة مبومالانجا لإنه طلب مني قبل إن ال 4 ليالي المخصصه لهذه المنطقة
هو المتكفل بها وراح يتحمل نتيجة إختياره لهذا السكن إيجاباً أو سلباً...
يعني الوعد يابوهاشم إذا قيمت إختيارك ياويلك >>ههههههه
وتم إختيار السكن في هازفيو التابعة لمنطقة مبومالانجا لمدة 4 ليالي بسعر 6600 راند
وأيضاً قام بحجز الطيران الداخلي
الأولى من جوهانسبرغ لجورج عبر خطوط كولولا
بسعر 4764 راند للجميع
والثانية من كيب تاون لجوهانسبرغ عبر خطوط مانغو
بسعر4050 راند للجميع
والثالثة من جوهانسبرغ لنيلسبريت
عبر الخطوط الجنوب إفريقية
بسعر 4930 راند للجميع
* ما حصل قبل الرحلة *
من الأشياء اللي ما كانت بالحسبان إن قبل شهر تقريباً من الرحلة واحد من العيال الله يهديه جاب العيد وانكسرت إيده.....
لله الحمد على كل حال
وله موعد قبل الرحلة بيومين قلت عل وعسى يفكون الجبس ولكن ...... مافكوه قالو توه......
فتوكلنا على الله ( واليد أحسن من الرجل )
* عدة التصوير *
Canon 5D Mark II
Canon EF 15mm f/2.8 Fisheye
Canon EF 17-40mm f/4 L USM
Canon EF 24-70mm f/2.8 L USM
Canon EF 70-200mm f/2.8 L IS USM
Canon EF 2x II Extender
Carbon Tripod
وما ننسى جهازي العزيز ( الآيفون )
اللي ما قصر أبداً...
# تنويه #
1- المبالغ كتب أكثرها بالراند الجنوب إفريقي
أبي الواحد إذا جزم يشوف وقت سفرته
ويشوف كم يساوي الراند مقابل أي عمله أخرى
ويمكن يستفاد من التقرير عدة سنوات ( واحد واثق ههههههه )
أنا وقت سفرتي
الريال السعودي = 2.13 راند تقريباً
2- الصور اللي عليها توقيعي من تصويري
واللي من دون توقيع مستعين بهن من النت
ربي يوفق أصحابهن
طبعاً السابقات أما اللحقات إن شاء الله كلهن من تصويري
إلى هنا تنتهي مقدمة رحلتي
بإنتظاركم لحجز مقاعدكم
على متن تقريرنا...
وصلنا المطار وعلى طول لتسليم الشنط
وقعد الموظف يقلب بالجواز ويشوف الفيزا ومتى تنتهي
وتقل الوضع ما جازله
يقول متى طلعتها قلت جديدة يمكن أقل من أسبوعين
وهي مدتها 3 شهور
ويشوف العائلة معي
قال وين رايح
قلت سياحة
قال سياااااحة
وش تبي بهالديرة
أو قال مالقيت الإ هالديرة
ههههههههههههههههه
هذا ثاني موقف إستغراب عن هذه الدولة
قلت شف يالغالي
هذي دولة كلااااام ثاني
وبإذن الله أرجع وأنزل تقرير عنها وتشوفه
وتحكم بنفسك…
سكت الرجال
وماااا قصر المفترض لي خمس شنط بس
أو أربع شنط وعربه هو شحن الخمس مع العربة
والوعد جوهانسبرغ الإستلام
وشوي يناديني عبدالله عبدالله
قلت سم
قال يبونك التفتيش اللي وراي
قلت الله يخاااااارجنا وش السالفه
وأروح لمهم قال أفتح الشنطة هذي لاهنت
طبعاً الشنط مقفلهن كلهن ( لإني ما أثق بأحد ) ههههههه
وفتحتها وكان معي الدافور الصغير بس من دون علبة غاز
قال هذي ممنوع
قلت وش دعوى مو إول مره أخذه معي كذا من دون غاز
قال معليش الآن تغير النظام حتى هذا ممنووووع
قلت سم طلعه الشكوى لله
وقفلت الشنطة ومشيت
وبعدها نسيت رقم من ارقام الشنط
ورجعت لموظفي السابق
قال تعاااال تعاااال سجلي إيميلك ووين بتنزل التقرير هههههههه
شكل الرجال تحسف والإ عنده حب استطلاع لهالدولة
المهم سجلت البيانات اللي يبي وعطيته وشكرته ومشيت
( أتمنى من الله تجيبه الأقدار ويشوف هالتقرير )
المهم دخلنا للصالة الداخليه
وهذي طيارتنا الأولى بهالرحلة من القصيم لجدة
وصلنا مطار جدة وطيارتنا الثانية توووووها
ياولد نمشي للهند مكتوب النداء الأخير هههههههههه
ورحت لبنك الراجحي الموجود بالمطار ياولد نبي راند جنوب افريقي قال مفيييييش
رح للبنك الأهلي قدامنا وأروح ونفس الحكايه
قالو فيه دولار تبي قلت لاااا… هههههههه
الوعد مطار جوهانسبرغ إذا كنا من الحيين
نصرف من البطاقة العادية
وهذي الطيارة الثانية من جدة لجوهانسبرغ من الداخل
وهذي لعبه للإطفال يتسلون فيها وزعوها ع الجميع...
والحين مع مناظر للسحب مع نافذة الطيارة
شكل الصور شويات بهالحلقة خل نكثثثثثثر من صور السحاب هههههههههههه
باااااانت جوهانسبرغ هي وخضارها
وصلنا بحمدلله لمطار جوهانسبرغ
وبعد الممر اللي من الطيارة للمطار
الإ هالسنافي بإنتظارنا
كما وعدني أخوي الغالي خبير الزولو
المهم مشى معنا للجوازات
وخلصنا ولله الحمد
وفيه شي بقوله ولاحظته تقريباً بكل مطار مريته عندهم
والصراحة شي مفرررررح جداً
اللي هو: يوم جاء تطبيق جواز المدام
الموظفة قامت من كرسيها وراحت ودخلت غرفه جنب الكونتر هي والمدام
بدقيقة فقط وهي جايه وختمت جوازها وتوكلنا على الله
وإذا الموظف رجل خلاص هو يقولك خل زوجتك
تاخذ جوازها وتروح لأي موظفة تختملها
( صراحة قمة التعامل وإحترام الحجاب الشرعي الكامل اللي للأسف بعض أخواتنا الله يهديهن تخلن عنه هناك !!!!!! )
اللي كنت أسمع ببعض الدول أنت تطلب موظفه عشان أطبق لزوجتك
وهذولا العكس هو يخدمونك ويعرفون وش تبي من دون تقول…
وهذي علامة الجودة بمطار جوهانسبرغ لااااازم تصور عنده هههههههه
المهم خلصنا وباقي لنا الحين رحلة داخلية وباقي معنا وقت زييييين
قلت للمرافق معنا نبي صرافة ياولد ما معي الإ فلوس سعودية ومو كثير بعد ههههههههه
وقايلي أخوي الغالي خبير الزولو دور صرافة بنك ( استاندرد بنك )
هذا فرع من فروعه بعدين أعلمكم وين مكانه
بس عشان أوضح شكله وشعاره
وهذي شكل صرافتهم
وهذي ورقة إثبات إنها سحبت 5000 راند ( اللي فيه ناس يقولون مجازفه سحبت هالمبلغ كله )
وأنا أقول توكل على الله… ومو لازم كلهن معك عط نصهم المدام ( بس لاتنسى تعدهن زين لايخلصن بسوق والا شي ههههههه )
والطريقة هذي لتفادي أي خطر لاسمح الله…
وهذي الرموز اللي ع البطاقات وتقبلهن صرافتهم
بعدها ارتححححت الصراحة لإن ما بقى من الترتيبات القوية الإ عملتهم
رحنا لكونتر خطوط كولولا لإن حجزنا عليها من جوهانسبرغ لجورج اللي هي بمنطقة القاردن رووت
وطبعاً معنا خمس شنط وتونا داخلين الدولة ( أكييييد وزنهن زااااايد ) وخاصة شنطة المووونه ههههههههه
وأنا ما أخذت شنطة عزبه استخدمت شنطة عادية للعزبة وأغراضها ( يمكن تمويه ويمكن لا ) هههههههههههه
قالو الثلاث شناط ذولي أوكي والشنطتين هذولي تدفع عليهم رسوم وزن زائد قلت أوكي
وأدفع 500 راند للشنطتين
طبعاً يعطونك ورقة صغيرة وتروح لنفس مكتبهم وكل خطوط عندهم مكتب خاص لدفع الرسوم
والدفع اللي تبي كاش والإ فيزا
وبعدها ترجع الورقة للموظف ويمشي الشنط الباقية
وندخل للصالة الداخلية بعد رحلتين وباقي الثالثة الله يعييييين
ونريح شوي وإندور بهالمطاعم والكوفيهات اللي بالصالة الداخلية عن الأشياء الحلال
وهذي لازم ينتبه لها الجميع في هذا البلد لازم تسأل قبل تشري عن الحلال
ولاتخاااااف عندهم ثقافة العلم بهالشي ويدرون إن فيه مسلمين وتحصل الإجابة غالباً
وبعض الأكل نباتي ويرمزون له باللون الأخضر وهو حلال
الحين نجي لشبكة الواي فاي
أذكر قريت بأحد المنتديات لأحد الأعضاء إن فيه شبكة دايم تحصلها وتقدر تشترك معهم عن طريق الفيزا
وبالفعل بحثت وحصلتها وبوريكم اسمها و اسعارها والدفع بالفيزا عادي
أنا الصراحة ما اشتركت ترددت شوي هل أحصلها بمكان ثاني والإ لا
على إن الشخص اللي ذكرها كتب إنه حصلها بأكثر من مكان
وأنا بعدين الصراحة بالأماكن اللي بحثت فيهن عن هالشبكة ما حصلتها
يمكن فندق عن فندق ومنطقة عن منطقة...
ووقتها داااايخ شوي بعد من أمس وحنا في سفر وللحين ما قضينا هههههههه
وهذي صورتين من الصالة الداخليه
وهذي طيارتنا في إنتظارنا…
ونادو ع الرحلة وبعدين مدري وش صار وإنتظرنا
وجت موظفه تمشي ع المسافرين تقول اللي يبي يسلم شنطته لنا ويستلمها هناك عادي
حنا معنا العربه هي اللي تضيق وقالت اخذها قلنا اييييه وتحط فيها ورقه وتعطينا النسخة الثانية
قالت الوعد مطار جورج قلنا حلوووووو
وتيسرت الإمور وركبنا الطيارة
ما أبي آحد يقول صورت داخل الطيارة أقوله الوعد بالطلعه اتضارب معك ههههههههه
لإني كنت دااااايخ جداً
ونمت وهي تمشي مع المدرج ههههههههه
طبعاً الطيارة فل والغالبية العظمى سياح والله أعلم يقالي أعرفهم هههههههه
الرحلة مدتها تقريباً ساعتين ونمت نووومه زينه ولله الحمد
وصحيت وأخذت كم صورة من النافذة
ياحلاااااااتك يالقاردن رووت
وصلنا للمطار يشبه مطار القصيم تروح رجلي من الطيارة للصالة الداخليه بس الجو تقل حول بعض هههههههه
ويوم دخلنا الإجراءات سهله وميسره
واخذت الشنط وعلى طول بحثت عن مكان للصلاة عشان أجمع جمع تأخير الظهر والعصر
وللأسف مفييييش
واحصل أحد الجنوب إفريقيين السمر وأسأله قال شف هالإستقبال
والإ فيه هاكالعجوز اللي وجهها ما يبشر بخير هي وشوشتها ههههههه قلت هذي الظاهر لو قلتها بتعصب والإ شي علينا يهالمسلمين الضعوف
المهم طنشتها والإ هالأسمر يمرها وقالها وبعدها شفنا صاله صاده شوي قال تصلح قلت تصلح عادي معي سجادة
نكمل معكم تقريرنا لساحرة إفريقيا ( جنوب إفريقيا )
بعد تعب رحلة الذهاب وأحلى نووووووومة بالفندق
شكلي والله العالم كل أحلومي طيارات رايحه وجايه ههههههههه
قمنا على أجواء فوووق الخيااااال
طبعاً هالبلكووونه مباشرة ع الحديقة وألعاب الأطفال...
ولازم يأخذون فيها طابور صباحي ههههههههه
أفطرنا... ومرينا الإستقبال وكعادة أي إستقبال هناك
تحصل عندهم ركن خاص بأهم الفعاليات
وخذ اللي يجوزلك والإ تدري خذ من كل نوع وحده وروووووق عليهن هههههههه
حنا اخترنا حديقة القرود لييييييه
لإن بجنبها حديقة الطيور و حديقة الفهود الشيتا وإيضاً حديقة للفيلة
يعني أربع أحجار بعصفور واحد قصدي أربع عصافير بحجر واحد هههههههههه
وطبعاً وضروري جداااااً القارمن حبيب قلبي عشان لا تسأل أحد ولا شي هو دليلتك هناك...
ونحط إحداثية حديقة القرود
على التنسيق التالي
ddd mm.mmm
S 33 57.888
E023 28.995
والقاردن رووت ميزتها تسكن مثلاً بولدرنس والإ بنايزنا كلها واحد
لإن المزارات قريبة لمدينة وبعيده من آخرى يعني أنا إذا طلعت من فندقي أقدر أروح يمين والإ يسار على حساب مزارك وشو...
وهذي خريطة القاردن رووت
أنا تقريباً ساكن بالوسط بـ
Wilderness
والحين مع صور للطريق يااااالله الجنة
الطرق جميييييلة وفسيحه وما فيه أي مشاكل ولله الحمد
بس التركيز مطلوب عشان ما تجيب العيد والدركسون يمين ههههههه
وصلنا لمفترق طرق فيه المزارات واضحة باللوحات
القرود والطيور والفيله يمين والشيتا 12 كم ع اليسار
طبعاً وأنا أصور اللوحة واقف ع اليمين ناااااسي أبوالشباب
المفروض أقف ع اليسار هههههههه
أول يوم أول يوم
وأشوف اللي مرو من عندي وتعدو مستغربين طبعاً ما فهمتها على طول ههههههههه
وهذي لوحة ثانية تبين حديقة القرود و الطيور يسار والفيله يمين
طبعاً أنا عيييني ع الطيور عشان
وهذولي خيول من النعمة متسدحااااات ههههههه
وصلنا للموقع وميزته إن المواقف وحده بين حديقة القرود والطيور
وطبعاً المواقف مجانية كما هو السائد بأغلبية المزارات السياحية هناك
بدينا أول شي بحديقة القرود
دخلنا وقصينا تذاكر للحديقتين وهذي ميزتهم تأخذ كل التذاكر من اللي تبدأ منه
تقريباً للجميع ب 400 راند لكلا الحديقتين
وهذا من داخل استقبال حديقة القرود وفيه منتجات للبيع أيضاً
وهذا ممر يوديك من عند المطعم والكوفي حقهم لمكان الإنتظار حتى تبدأ جولتك بالحديقة مع المرشدين السياحيين فيها ويبن بالصورة أيضاً منشورات المزارات السياحية
وهذا مكان الإنتظار
ونحصل كم قرد جايات لمكان الإنتظار شكلهن مشتاقات لشوفتنا قبل ندخل بغابتهن الخاصة ههههههههه
وهذا خوي العيال سبحان الله الصغارين تقل يتعارفون لو ما يعرفون بعض
ولااااا زود اللغة بعد هههههههه
وهذا وده يرحب فينا بس من بعييييد
لا والله ما يبنا هجججج ههههههه
وجاء وقت دخولنا مع المرشدة السياحية
وهنا نودع مكان جلوسنا بالإنتظار
الحديقة فيها أنواع قرود من إفريقيا ومن آسيا ومن إمريكا
وأنواعها مو كثيرة بس مميييزة اللي فيها
ومهيأين لها مكان مناااااسب جداً وكبير
مكانها بالتأكيد طبيييعي بهالغابات
وعمل الإنسان فيها قليييل
هذي شكلها تكملة عدد ههههههه
على منصة الأكل
توقعووون وش يسوي هالمهبووول
طبعاً السير ع الأقدام داخل الحديقة
شكله زعل علي هههههههههه
هبااااااا هيلاااااا جاء جاء يبي ياكل
يااااااازين هالجسر الخشبي ( المتهزهز )
سبحان الله برص هذا ؟
هذي بعد زيادة عدد عند القرود
طلعنا من حديقة القرود لحديقة الطيور
ومرينا سيارتنا العزيزة
وهذي حديقة الطيور
دخلنا وبنفس تذاكرنا اللي دفعنا بحديقة الطيور
ونفس الطريقة دخول الحديقة السابقة من وسط هالصالة اللي فيها الإستقبال ومبيعات
شلال صغير وطبيعي داخل الحديقة ( يالله الجنة لنا وللمسلمين أجمعين )
جااااااازلي ياولد تقل ديكنا بس فل كامل ههههههههه
منظر لإسترخااااء العين
ناااافذة الشلال
ترووووش ترووش ما يشوفك أحد هههههههه
شكله مريض المسكين وجالس ع الممر ولا يمانع من الإقتراب منه
موظف تابع للحديقة يوزع إكل الطيور
جسور خشبية جميييلة داخل الحديقة
وهذا أززززين الجسور
لازم صووورة داخل هالجسر والإ وشوله ماااادحه هههههههه
هذا الرسمي حقظم الظاهر
مو صورته اللي بلوحتهم اللي برا ؟
والآن سبحان الله وحنا مستمممتعين بدأ هطول المطر
( والمطر عند المصورين يعتبر عائق في الغالب )
ياااااااازين قطراااات المطر
ياااااازين هاللون
خلاص تصوووير زاد المطر
حطيت الكام بالشنطة استمتعنا قليلاً بالجو
وبعدها طلعنا للسيارة وقلنا نمر حديقة الفيلة قريبة من المكان
قااااامن عقب نومة الضحى هههههههه
هذي البوابة وقررريبه للحديقتين السابقتين
وصلنا للإستقبال والمطر تقل خف نزلنا قالو آخر قروب مشى قبل شوي حنا تقريباً وصلناهم 3:30 مساءً
وزيارة الفيلة على شكل قروبات وداخل الغابة مو قريب لمكان الإستقبال قالو ما فيه الإ بكر وأعتذرو بكل لطف...
وطبعاً أسعارهم للكبير 425 راند وللصغير 225 راند تقريباً
طلعنا من عندهم ورجعنا جهة ويلدرنس مكان إقامتنا
وبالطريق ونشوف لوحة حديقة أفاعي
ولوحات المزارات السياحة غالباً اللون البني بالأبيض
ومن دون تردد لفينااااا
وهذي اللوحة بعد ما دخلنا جهه الحديقة
وهي يسار الخط للي رايح نايزنا
حصلنا قدامنا سيارة وحدة فقط
وننزل الإ اللي يستقبلنا قلنا ندخل قال تفضلو لإنا حول الساعة 4 عصراً وهم غالباً من 5 - 6 عصراً كل المناشط السياحة تقفل أبوابها
يعني قبل غروب الشمس بحول الساعة
قلنا كم الرسوم قال الكبير ب 100 راند والصغير ب 60 راند
وصار اللي أستقبلنا هو صاحب هالمزرعة بنفسه
وأعجبني إستغلاله لها...
وأعجبني أيضاً وبقوووة ملازمته لنا وشرح كل صغيرة وكبيرة
العيال استمتعووو وبقووووة
وع اليسار فيه مكان كبييير ومستطيل فيه حول 3 تماسيح وكل واحد له إسم...
وهذا هو يورينا مكان التماسيح
وهذا موظف عنده وحصلناه يشرح للعائلة اللي قبلنا
هذي منطقة بالوسط ومنخفظة ( تقل حفره وفيها أنواع من الأفاعي )
الأفاعي هذي لها أكواخ خارجية بفناء المزرعة
والحين دخلنا لصاله خاصة فيها أنواع معينه من الأفاعي
سبحان الله بيوض الأفاعي
كذا خلصنا من المشاهدة الفعلية للأفاعي
وقلنا نتمشى بالحديقة لو هي صغيرة
بس جميلة ومعتني الرجال فيها وفيها ألعاب للأطفال
وهذي دورة المياه تكرمون ونظيفه
وحتى داخل الحمام تكرمون فيه المنشورات السياحية
عشان تختار منهن وأنت تعبر عن شعورك ههههههههه
وهذا إستعراض القوة بين ولدنا وولد العائلة الثانية ههههههه
خلااااص مشت العائلة الثانية وبقينا لحالنا
وهذا بيت راعي الحديقة بالخلف ما شاء الله
وبعدها إستاذنت صاحب الحديقة يوم صرنا لحالنا قلت بجلس أتقهوي هنا وبعدها أمشي
قال على رااااحتك ودورة المياة ترا ما فيها ماء حار إذا تبون أجيبلكم من البيت
قلت شكراً بس خذلك فنجال قهوة عربية مع تمر سكري وأخذله فنجال
واستاذن ومشى صراحة قمة الإحترام
ونتكي على هالكرسي ونتقهوى بعد يوم حاااافل بالمششششي ههههههه
إحداثية حديقة الأفاعي على التنسيق
h ddd mm.mmm
S 33 57.544
E023 28.455
بعدها وقبيل المغرب مشينا لفندقنا
وما وصلنا له الإ نص المغرب والوضع ولله الحمد ماااا فيه شي
