فندق ascotia of queen

[لوجىى]

توجهنا الى مطار سيدني وكانت رحلتنا على طيران الإمارات الى اوكلاند وكانت الطائره ايرباص A380 شبه خاليه، بصراحه هندستها خيال الطائره هادئه جدا مقارنة بالوحش البوينق 777

وصلنا مطار اوكلاند، نيوزلاندا عندهم نظام مشدد وفي اشياء ممنوع تدخلها مثل بعض الأطعمه و الفواكه واشياء اخرى، موظفين الجوازات طلبو تفصيل كامل للرحله ، واهم شي عندهم حجز السكن و تذكرة الخروج، ولكن كانت اسألتهم كثيره مثلا عن مكان العمل و الراتب واشياء اخرى وبعد 40 دقيقه من الأسأله والإنتظار عطونا الأذن بالدخول

توجهنا لمحل شركة اتصالات Spark الشركه الأولي للإتصالات في نيوزلاند، سعر الشريحه 50 دولار نيوزلندي


واستلمت السياره الأجار من مكتب Thrifty

الخطة في نيوزلاند يومين في اوكلاند
يومين في روتوروا لزيارة المدن الأخرى القريبه
واخر يوم الرجوع لإوكلاند

AUCKLAND​

يوم الوصول - اليوم الأول



وصلنه الفندق واهوه Ascotia of Queen الفندق جدا جدا متواضع وصغير سعر الليله 26 دينار بحريني

هذي الغرفه فقط مجرد سرير، جدا جدا صغيره ولكن تفي بالغرض للفتره القصيره وكانت نظيفه

الإطلاله من النافذه

مواقف السيارات عليها رسوم بمبلغ 25 دولار لليله


اثناء الـ Check in الموظفه الصينيه قالت لنا انه موقع Booking ماخصم منكم وعليكم دفع ليله واحده !! قلت لها انه حاجز من Agoda ودفعت المبلغ كامل ، وعندي حجزين حجز لتاريخ 17 و 18 وحجز تاريخ21

نفس الليله راسلت بوكنق و اقودا واتضح فعلا ما انخصم مبلغ تاريخ 18 !! ماعرف ليش صارت هذي اللخبطه وليش اقودا خلو بوكنتق يسوون الحجز عنهم !!!


طلعنه نمشي

اعتقد انه مجمع وفيه سينما

هذي الأثنين ماعرف بأي لغه كانو يطبلون ويغنون

لفتت انتباهي اللوحه الخضراء جنب اسم هذي الفندق مكتوب عليها new zealnd owned & operated

هذي فندقنا

مطاعم مقابلين الفندق

اخذنا بيتزا بالقطع من مطعم Sal's السعر 29دولار

برج اوكلاند

مبنى الـ Ferry وتحته مقاهي ومطاعم

هذي نهابة اليوم الأول، بصراحه بعد ملبورن و سيدني مستواهم عندي افضل واحلى بكثير من اوكلاند، هل بتغير الشعور ؟؟ خلوكم متابعين

يتبع​

،،،

 

[لوجىى]

AUCKLAND
​

اليوم الثاني




خطة اليوم الثاني الإفطار و والمشي صباحا في المدينه و الذهاب الى حديقة Cornwall park و Mount Eden و حديقة Auckland Domain

الجو في الصباح كان بارد

وجهتنا كانت Elliot Stables مبنى قديم وفيه داخله مطاعم متنوعه

صور من الداخل

كلام صحيح

الكافيهات مسكرين وفقط اثنين الي فاتحين وتفطرنه عند واحد منهم اسمه Reslau

سندويش سلطة الأفكادو

قبل السفر كنت ابحث عن مطاعم في نيوزلاند حق اسوي لستة مطاعم، بس النيوزلندين اكلهم بسيط وسلطات ومع ذالك هم في المرتبه السابعه في العالم لمعدل السمنه !!

سعر الفطور 29 دولار

صور المكان من الخارج

ارتفعت الشمس واعتدل الجو، و تمشينا على المنطقه البحريه

اكتفينا بهذي القدر من المشي وقلنا نرجع حق ناخذ السياره وننطلق للحدائق، واحنا نتمشى شفنا هذي المبنى واتوقع انه مصرف او مكاتب شركات

محل هدايا اعجبني فيه هدايا اعتقد من الي فات من عيد الأب

اخذنا السياره و وصلنا الى Cornwall park الحديقه كبيره و التنقل داخلها بالسياره

نفس

الي في اعلان جبنة بوك

يدور مشاكل

هذي اسمه المكان داخل الحديقه اسمه One tree hill و المكان مرتفع ، ورحنا فوق بالسياره وفيه مواقف سيارات

وهذاك Mount Eden بنتجه له بعد هذي النقطه

وهذي السياره، كنت مأجر كامري وعطوني هذي الهايلاندر بدالها لأنه الكامري ماكانت متوفره

توجهنا الى Mount eden

كان في يوم من الأيام فوهة بركان

قبل شوي كنا هناك

مرقش

طريق العوده لمواقف السيارات

وكانت الوجهه الثالثه Auckland Domain

هذي متحف الحرب في الحديقة Auckland War Memorial Museum

وهذي محمية وروود و نباتات Domain wintergardens

دخلنا هذي المكان وكان حار وجدا رطب ذكرني في جو البحرين

مهيأ حق النباتات الأستوائيه خذت صورتين وعلى طوول طلعت

حدائقهم كبار الي نشوفه منهم فقط جزء بسيط، بعدها توجهنا شارع ponsonby road وفيه مطاعم متنوعه وافضل بكثير من منطقة الـ CBD

هذي مجموعة مطاعم داخليه Ponsonby central

وصار الإختيار على هذي المطعم المكسيكي

وبعده اخذنا جيلاتو من هذي المحل الي جنبه

وهذي كانت نهاية اليوم الثاني في اوكلاند


يتبع،،،​

 

[لوجىى]

في هذي اليوم كان البرنامج زيارة قرية الهوبتون HOBBITON MOVIE SET الي مثلو فيها فلم HOBBIT و فلم Lord of the Rings


في اليوم الثاني اذكر في الليل وكنت اتوضئ للصلاة كانت زوجتي تتصفح مجلة سياحيه لنيوزلاند اخذناها من المطار، قالت لي قرية الهوبت مايصير نروح لها بروحنا لازم مع تور

، وانه كنت متوقع انهي مكان مفتوح ودخوله برسوم، قلت لها طيب هل شركات سياحيه تنظم للزيارة المكان قالت لا هم نفسهم ينظمون التور، قلت اكيد مافي مجال للتور و عندهم اكتفاء

وانه من قبل الرحله من الصدف العجيبه و البحث في انستقرام عن صور الهوبيتون لقيت حساب اخوي فارس من خيال

وسألته في الأنستقرام عن التور ورد علي جزاه الله خير، وكان ترتيبه عن طريق الفندق

دخلت موقع الهوبيتون
V
V
V
Hobbiton Movie Set Tours > Home


واخترت التاريح و الوقت ، والحمدلله كان فيه مجال ل17 سائح، للجوله و على طول حجزت، سعر التذكره 79 دولار للشخص
​

MATAMATA - OKAUIA -ROTORUA​

اليوم الثالث



من الصباح عملنا Check out و انطلقنا متجهين الى مدينة ماتاماتا الي فيها قرية الهوبيتون وتبعد عن اوكلاند تقريبا ساعتين

في الدرب شفنا لافتة مكتوب عليها آيسكريم طازج بعد 500 متر

خففت السرعه و وصلنا وكانت بقاله في الدرب

دخلنا بكل حماس بس كان الآيسكريم شكله مايشجع و ماكان طازج باين عليه صاير له اسبوع

وطلعت بكاكاو

وصلنا ماتاماتا

وهذي مكتب الأستقبال و محل هدايا و تذكارات

عطيتهم رقم الحجز، وقالو اذا حاب تروح مع التور الي بينطلق الآن تقدر، وقلت افضل حق نكسب وقت، اذا ماكنت غلطان كنت حاجز التور الي يبدأ الساعه 10:15 ورحنا مع تور الساعه 9:30

التور منظم ومع مرشد او يشرح ويتكلم عن القريه و الفلم

المكان ملك لعائلة الكسندر، الي تمتلك هذي المزرعه الكبيره، في عام 1998 جاهم المخرج بيتر جاكسون، واخذ من عندهم الأذن للتجول في المزرعه ومشاهدتها، وهم كانو مشغولين بمتابعة مباراة للعبة الـRugby ،قالو له خذ راحتك وسكر الباب معاك

واخذ يتجول في المزرعه لمدة 4 ساعات وهم ناسيين موضوعه تماما، وبعدها بأربعة شهور جاهم اتصال من شركة New line cinema ، اتفق معهم المخرج انه يسكن في بيتهم للتصوير، وتم توقيع عقد مع عائلة الكسندر والإلتزام بالسريه التامه على المشروع، وقالهم اختارو تسكنون في اي مكان في نيوزلاند وتكاليفكم مدفوعه، بدأ انشاء المكان عام 1999 ، وبمساعده من الجيش النيوزلاندي واستخدام معداتهم الثقيله ، وعدد كبير من افراد الجيش شاركو في تمثيل الفلم، وصل عدد العاملين في موقع الفلم 400 شخص

والله اتعجب كيف شخص له قوه و نفوذ يخلي جيش بلد ثاني يشتغلون له

كل شي في هذي الصوره حقيقي ماعدا البطاطس الي على الطاوله

وهذي استراحه ويقدمون لنا مشروبات خاليه من الكحول

اول تور بدأ في القريه كان عام 2002، ويتوقع صاحب المزرعه راسل الكسندر انه التور بكون مستمر لمدة 50 سنه !!

وانتهى التور الرائع الي كانت مدته 3 ساعات، ورجعنا لمكتب الإستقبال في ماتاماتا

تمشينا شوي وشفنا مطعم تركي ودخلنا ناكل

انتهت الجوله في ماتاماتا، وتوجهنا الى منطقةokauia حق نشوف شلال wairere واهوه ارفع شلال في الجزيره الشماليه لنيوزلاند

الشلال من بعيد

وصلنا وفيه مواقف للسيارات
لمشاهدة الشلال لازم تمشي مسافة 45 دقيقه على طريق صعب شوي و وعر، ولمشاهدته اقرب تكمل مسافة 45 دقيقه اخرى، يعني 90 دقيقه طالع و 90 دقيقه نازل !

احنا فقط رحنا للإطلاله الأولى للشلال الي تبعد 45 دقيقه عن مواقف السيارات، الي معاه عائله واطفال مانصحهم بزيارة المكان ابدا، الدرب خطر و وعر ولكنه جميل ,وله متعه نفس الوقت ،والي يفكر يروح انصحه ياخذ معاه شنطة ظهر صغيره فيها ماء للشرب

وصلنا للمكان الأول لمشاهدة الشلال

ارتحنا شوي ورجعنا للنزول

وانطلقنا الى روتوروا الي تبعد عن الشلال مسافة ساعه واحده

واخيرا وصلنا الفندق وسوينا Check in الفندق اهوه Holiday inn rotorua

وهذي كانت نهاية اليوم الثالث


يتبع،،،،،

​

 

[لوجىى]

​

ROTORUA ​

اليوم الرابع



برنامج اليوم الرابع الذهاب للـ RedWoods والمرور على بعض البحيرات وبعده Skyline و ركوب التلفريك




ادخنة الطين البركاني في روتوروا

شفنا بالقرب من الفندق Te Puia قرية ثقافية وفيها عروض للسكان الأصليين وتشوفون الطين البركاني من قريب، لكن مادخلناه وتوجهنا للـ Redwoods

هذه الصورة تم تصغيرها . الحجم الافتراضي لها هو 1024x683.

الغابه كبيره، والناس فيها تتمشى وتمارس الرياضه اكتفينا بالمشي شوي ورجعنا عند البدايه وفي مكتب استقبال واستعلامات، وشرينا تذكرتين حق نتمشى في الـ الـ Treewalk
سعر التذكره 20 دولار

رجعنا للسياره وتوجهنا الى بحيرة Blue lake

هذي المنطقه فيها بعض البحيرات ومرينا على بحيره ثانيه

وقفنا في هذي المحطه نشحن السياره بترول

نزلنا عند Hamurana مكان حلو للمشي و مشاهدة مياه الينابيع

ينابيع الماء، البقعه الزرقاء ينبع منها الماء من تحت الأرض

اذكر في هذي اليوم اكلنا من كنتاكي

، لكن للأسف ماعندهم الدجاج الحار

وصلنا الـ Skyline وفيه فوق الأنشطه الممتعه مثل النزول بالحبل المعلق من فوق الجبل، وسيارات الـ Luge ومطعم اسمه stratosfare يوم وصلنا قالو انهم سكرو الألعاب وفقط المطعم فاتح

وخلينا البرنامج لليوم الخامس

رجعنا الفندق واقترحنا نروح Polynesian Spa روتوروا فيها الكثير من مياه الينابيع الحاره، وهذي السبا الأفضل في روتورا، البعض فيهم برك سباحه حاره، ولكن ليست مياه ينابيع طبيعيه حاره،

متحف روتوروا قريب من السبا

وهذي السبا

فيه برك سباحه مفتوحه وفيه غرف خصوصيه للمتزوجين او الي يحب يرتاح بروحه Deluxe والسعر ارخص من البركه المفتوحه العامه، لأنه البركه العامه عندك الوقت مفتوح، اما الخصوصيه نص ساعه فقط وكانت تجربه جدا رائعه للإسترخاء مع اني ماكنت متشجع في البدايه، الجو كان بارد ولكن الماء الحار عجيب ودك تنام فيه، الي عجبني انهم يعطونك 10 دقايق قبل وبعد النص ساعه لتبديل الملابس، وعند انتهاء الوقت يشتغل مصباح اخضر

بعد انتهاء النص ساعه ،، المكان مزحوم وفيه وايد ناس ومايصير تحجز حجز مسبق وانتظرنا 45 دقيقه ولكن شي يستحق التجربه في النهار احلى لأنه البركه تطل على البحيره ولكن في الليل ظلام وماتشوف شي،
سعر السبا 52دولار

رجعتا الفندق و الموضوع عجبني

فندق الهولداي ان الي ساكنين فيه، داخله بركه حاره، الماء عادي ولكن يمررونه على الطين البركاني تحت الأرض ويصير حااار، نزلت تحت اكمل الأسترخاء

وهذي نهاية اليوم الرابع،،،


يتبع،،،​

 

[لوجىى]

​

ROTORUA - HAMILTON - AUCKLAND
​

اليوم الخامس و الأخير


في هذي اليوم صحينه الصبح وعلى طول توجهنا الى الـ Skyline الي في اليوم الي قبله ما لحقنا عليه


اخذنا التذكره وكان سعرها 95 دولار للشخص، شامله 5 مرات ركوب الـ Luge ومره ركوب الـ Zipline

وفيه مطعم وكوفي شوب غير مطعم stratosphere الي قلت لكم عنه في الجزء السابق ودخلناه قبل لا نغادر المكان

صوره من النت للـ Zip Line ممتع و يستحق التجربه وياريت المسافه كانت اطول بكثير

ركبنا الـ Luge وجدا ممتع اشبه بسيارات الـ Kart ولكن بدون محرك، تسحب السكان/الدركسون/المقود تنطلق على المنحدر وترجعه حق توقفها ، وفي ثلاث مسارات للمبتدئين و المتوسط و المحترف، المسار المحترفين شديد الإنحدار وتنزل بسرعه عجيبه وجدا ممتعه واهوه امتع مسار بدون شك، واذا نزلنا نصعد فوق مره ثانيه

هذي الصوره الصعود بعد النزول من اللوج

وهذي اهوه

ودخلنا المطعم ناكل، نظامه عجبني مثل البوفيه تقريبا بس تدفع لكل صنف اخذته و الكميه الي اخذتها

ورجعنا نزلنا من السكاي لاين بعد 3 ساعات من الترفيه، الي يروح روتوروا ويبقي برنامج ترفيهي انصحه في الـ Skyine

ورجعنا الفندق للـ Check out نسيت اذكر سعر الليله في الفندق 35دينار البحريني

في السياره احترنا وين تكون وجهتنا قبل الرجوع لأوكلاند، في المخطط نروح Piha Beach وكان يبعد 3 ساعات عن روتوروا وساعه واحده عن اوكلاند، فكرنا هل يستحق الزياره بنقطع مسافه والوقت بيظلم ؟؟ اعتقد لا

وسحبنا عليه

صوره من النت لـ Piha Beach

وقلنا بس نرجع اوكلاند عن طريق Hamilton لنه فيه متحف سيارات صغير ابقي ازوره،

وصلنا المتحف، وفيه مطعم برجر داخله، لحسن الحظ وصلنا قبل 20 دقيقه قبل لا يسكرون دخول المتحف برسوم 20 دولار للشخص

من يذكر الكورفت من التقرير الأمريكي

؟

ورجعنا اوكلاند بعد مسافه طويله مع شوي زحمه في الشارع، ورجعنا فندقنا المتواضع Ascotia off Queen وقفنا السياره وسوينا check in وطلعنا حق نتعشى




______
في اليوم الثاني في اوكلاند واحنه راجعين الفندق بعد ما كنا في شارع ponsonby مرينه على شارع قريب من الفندق اسمه Karangahape road جدا قريب من الفندق وفيه مطاعم عربيه ومتنوعه، وقررنا نلقي عليه نظره
______






مشي 3 دقايق واحنا على شارع karangahape road، الشارع فيه مطاعم تايلنديه و عربيه هنديه ومطعم ماليزي، صفينه على الماليزي مع انه كان شكله مطعم هنود ومايشجع، تقييمه في google جيد، دخلنا وشفنه عليه اقبال بصراحه اكله لذيذ جدا

التصخين كان على الـRoti chanai واحنه نسميه في البحرين جباتي

اذكر طلبت رز صيني مقلي حار، و زوجتي برياني ماليزي ،وصار ضرب الخمس وماصورنا شي

وهذي كانت اخر ليله في نيوزلاند، البلد هادئ وارخص بشي بسيط جدا من استراليا، 5 ايام ماتوفي حقها عشان احكم على البلد اتمنى ازوره في وقت اخر واكتشف الجزيره الجنوبيه واتوقعها احلى من الشماليه واشوف باقي المدن اتوقعها ايضا احلى من اوكلاند، الطبيعه فيها خلابه واتحس نفسك معزول عن باقي العالم احسهم بسطاء جدا، ومع ذلك نيوزلاند من دول العالم الأول وانه كنت متوقع من دول العالم الثالث...

اتمنى يكون هذي الجزء مفيد ولو بشي قليل لأي شخص يخطط السفر لنيوزلاند

النهايه

يتبع في القسم الأسترالي ،،،،
​