شارع المشاهير walk of fame

لوجىى

:: مسافر ::
إنضم
12 ديسمبر 2018
المشاركات
1,005
مستوى التفاعل
1
النقاط
0
العمر
40
السلام عليكم ورحمة الله وبركاته

بسم الله الرحمن الرحيم

الحمد لله تمت الرحلة والأمور طيبة وكل شي تمام

صراحة كانت مصادر تخطيطي لهالرحلة الجميلة هذا المنتدى الرائع وأعضائه اللي لقيت منهم كل التفاعل

استفدت كثير من التقارير الموجودة في المنتدى

وبما إني مالي ذيك الخبرة في التقارير

حبيت فقط أذكر بعض النقاط والملاحظات اللي استفدتها من الرحلة

المسافرون: أنا وزوجتي

هذا كان مخطط رحلتي لمدة 17 يوم

1- لوس انجلوس: 23 سبتمبر - 27 سبتمبر ( 4 ليالي ) .... ثم بالسيارة إلى
2- سان فرانسيسكو : 27 سبتمبر - 30 سبتمبر ( 3 ليالي) .... ثم طيران إلى
3- لاس فيغاس : 30 سبتمبر - 3 اكتوبر ( 3 يالي) ثم بالسيارة إلى
4- سان دييغو : 3 أكتوبر - 6 أكتوبر ( 3 ليالي) .... ثم بالسيارة إلى
5- لوس انجلوس .... ( 3 ليالي) .

رحلتي كانت على خطوط ال KLM

من البحرين إلى أمستردام ثم إلى لوس أنجلوس ومدة الرحلة 21 ساعة

والرجعة صار تغيير على الرحلة وحولوني على خطوط لوفثانزا الألمانية ( أحسن شي سووه)
18.png


صراحة ال KLM متعبة نوعا ما لكن الحياة تجارب

التذكرة للشخص كانت 3000 ريال

انطلقنا من البحرين الساعة 12:30 الفجر والوصول إلى لوس أنجلوس الساعة 11 الصباح

والحمد لله ماخذنا ساعة في مطار لوس انجلوس من دخلنا لين استلمنا السيارة

حجز السيارة كان عن طريق موقع كار رنتال وكان من فئة كومباكت من شركة الامو

الاستلام في لوس انجلوس والتسليم في سان فرانسيسكو لمدة 6 ايام (استلام 23 سبتمبر وتسليم 28 سبتمبر)

طبعا الميزة اللي عجبتني إنك تقدر تحجز السيارة من الفئة الأقل ولوصلت عندهم تاخذ سيارة اكبر بنفس المبلغ + السيارة يكون مأمن عليها لأن رنتال كار شركة بريطانية فإجباري السيارة يكون مأمن عليها شامل وماتحتاج تدفع مبلغ تأمين ( معلومة منقولة)

( حجزي فئة كومباكت المفروض يكون أكسنت أو صني من هالفئات بس يوم وصلت أخذت كورولا وبنفس السعر لأن أصلا يقول لك اختار اي سيارة موجودة في الصف الفلاني وتحصل المفتاح داخل السيارة)

كلفتني السيارة لمدة ست أيام شامل كل شي + شريت تانكي بنزين من عندهم 920 ريال و التسليم مجاني في منطقة أخرى.

بالنسبة للسكن سكنت في منطقة اسمها Gardena تبعد تقريبا 20 دقيقة عن المطار في فندق

Best Western Plus Gardena Inn & Suites
فئة الفندق: 3 نجوم
سعر الليلة شامل الضريبة: 510 ريال
الفندق جدا نظيف فطورهم كان أقل من عادي ( من التجربة أشوف امريكا يفضل فطورك برة الفندق)
ميزته فيه غرفة غسيل في كل دور يكلف الغسيل مع التنشيف حول 3-4 دولار بس ( تغسل بنفسك)
المنطقة تعتبر عادية يعني فيه بقالات ووالمارت قريب ومحطات وجميع الخدمات يمك ( لكن تحتاج سيارة)

كنت أحتاج تقريبا 30 دقيقة إلى سانتا مونيكا و 50- 45 دقيقة إلى ايرفاين وهوليوود نفس الشي 30-35 دقيقة تقريبا لكن دام عندك سيارة اسكن اي مكان تبيه أهم شي نظيف وترتاح فيه خاصة بالنسبة لي السكن فقط للنوم .

اليوم الأول ريحت فيه بعد تعب الرحلة

اليوم الثاني: توجهت إلى إيرفاين عالم دزني
حجزت التذاكر عن طريق موقعهم وأخذت الهوبر ( تروح دزني لاند + دزني كاليفورنيا أدفنشر وتتنقل بينهم) وخذت الفاست باس ( ماكس باس) يكون عن طريق الأبلكيشن حقهم وجدا جدا جدا فادني واختصر علي وقت
تكلفة التذاكر كانت 589 للشخص .
وتكلفة موقف السيارة : 75 ريال
ملاحظات لدزني:
أنا استخدمت موقع اسمه https://www.isitpacked.com/
هالموقع يطلع لك أيام الزحمة في مدن الألعاب ويعطيك نصيحة هل تشتري فاست باس أو موضروري وكلامه مطابق للي شفته صراحة ورحت في وسط أسبوع وماكان إجازة مدارس وهالشي ساعدني إني أخلص الحديقتين في يوم واحد لكنه شي متعب وتحتاج تكون هناك قبل تفتح البارك بساعة عشان تستفيد من الوقت كامل أما غير كذا أشوف صعبة تخلصهم ثنتينهم في يوم

الصباح قبل أروح دزني مريت وال مارت وخذت لي سناكات وماي حق هناك لأن هناك كل شي السعر مضاعف
شنطة ظهر بس وأمورك في السليم.

طلعنا من هناك وتعشينا ورحنا ريحنا في الفندق بعد يوم متعب وجميل

اليوم الثالث كان الجدول لهوليوود وسانتا مونيكا وبفرلي هيلز
علامة هوليوود استخدمت احداثيات اخوي مقدام ورحت لها وكان الطريق جميل وممتع

بعدها نزلت شارع المشاهير Walk of fame
وقفت السيارة في مجموع هوليوود هايلاند ( أشوفه مكان جدا ممتاز توقف فيه )
إذا وقفت هناك اشتر من أي محل في المجمع ويعطونك 2-3 ساعات مجانا ( تقدر تاخذ شي من ستار بكس ويختم لك على تذكرة المواقف بس احرص انك تاخذ التذكرة معاك لاتخليها في السيارة عشان تختمها وهالطريقة موجودة في مجمعات كثيرة في الأماكن السياحية)

شارع المشاهير لو بس بتتمشى مايحتاج أكثر من 2-3 ساعات

بعدها رحت لبفرلي هيلز تمشيت فيها بالسيارة صراحة منطقة جدا راقية وآخر شي رحت سانتا مونيكا وقفت في ال Public Parking قريب سانتا مونيكا بير ( يكون قدام ماكدونالدز اللي قريب شارع الثيرد ستريت)

الشاطئ جدا جميل وماتمل منه .

اليوم اللي بعده الخطة كانت يونيفرسال ستوديوز
خذت التذكرة عن طريق موقعهم ب 420 ريال للشخص ونفس الشي كثير نصحوني وقالوا لي لازم الاكسبرس بس يوم شيكت الموقع في اليوم اللي بروحه كاتب لي إنها أصلا مو ضروري وفعلا كنت خلصت أغلب الألعاب بسرعة يعني دخلت 10 الصباح ماجات 2 أو 3 إلا انا خالص كل الألعاب بعد ما انتهيت تغديت في مطعم ( Blaze pizza جدا ممتاز وسعره مناسب
موقف السيارة تكلفته: 94 ريال

طبعا في موقع ثاني لتذاكر يونيفرسال وارخص لكن تحتاج تحجز قبل بفترة عشان يرسلون لك التذاكر
undercovertourist.com

اليوم الأخير كنت مخليه للاستمتاع بطريق ال HWY1 إلى سان فرانسيسكو وصراحة انصدمت من جمال الطريق وماودي يخلص خذته في 12 ساعة كنها ساعتين
وهذا وصف اخوي مقدام للطريق وكيف تروح إلى سان فرانسيسكو عن طريقه

hwy 1 واسمه ايضا CA 1 هو الطريق الاجمل
وحلاة هذا الطريق من بعد بيسمو بيتش الى مونتري

في البداية اسلك الطريق 101 الى بيسمو بيتش ثم الطريق رقم واحد الى مونتري بعدها ترجع للطريق 101 الى سان فراسيسكو

طلعت 8 الصباح تاريخ 27 سبتمبر ووصلت 8 المغرب سان فرانسيسكو

في شغلة حاب أوضحها
قبل تحجز الطيران الدولي تأكد من المؤتمرات الموجودة في سان فرانسيسكو لأنها تحدد كثير أسعار السكن وتوفرها لأن الفنادق مو كثيرة فبسرعة تتعبا هناك أنا صار لي هالشي واضطريت احجز فندقين

أول ليلة سكنت في شارع لومبارد
Coventry Motor Inn
تكلفة الليلة 911 ريال
https://www.booking.com/hotel/us/cov...s=1&#hotelTmpl
المنطقة ماعجبتني كثير وكانت اشوي وحشة بس الفندق نظيف جدا وانتيك وميزته مواقف السيارة مجانية
اليوم الثاني نقلت أغراضي الفندق الثاني
Harbor Court Hotel
https://www.booking.com/hotel/us/har...s=1&#hotelTmpl
تكلفته مع الضريبة و (resort fee) :
942 ريال لكنه جدا نظيف وكل مكان تقدر تروحه مشي ( يونيون سكوير أو البير) ومتوفرة بقالات ومطاعم مشي وبالنسبة لي السكن هناك أفضل بواجد من اليونيون سكوير وزيادة على كذا كان جدولي لليوم إني اخذ الباص السياحي فالميزة الفندق يعطيك خصم على تذكرة الباص وأرخص حتى من الاونلاين
الباص السياحي كان شركة Big Bus ومع الخصم أخذت التذكرة ب 45-48 دولار تقريبا للشخص

وأشوف الباص السياحي جدا ممتاز ويخليك تغطي المدينة كاملة في يوم واحد

اليوم الأخير كان للتمشي فقط في يونيون سكوير والبير 39

نقطة مهمة جات على بالي بالنسبة للأشخاص اللي يحبون يشترون المغناطيس للثلاجات والميداليات والأكواب لايشترون من الأماكن السياحية
حاولوا تشوفون والمارت أو CVS أو WAlgreens يبيعونهم يمكن بنص السعر وموجودين في كل مدينة

وسان فرانسيسكو كلش ماتحتاج سيارة

بعدها رحت للمطار عن طريق شتل حق الفندق ( يمر على أكثر من فندق ويجمع ركاب لكن يوصلك المطار على الوقت اللي انت تبيه ومايتأخر ) وكان السعر للنفر 13 دولار تقريبا
وكان حجزي على خطوط الساوث وست بقيمة 360 ريال للشخص مع شنطتين مجانا لكل راكب وكل شنطة 20 كيلو

واتجهت إلى لاس فيغاس

السكن كان في فندق VENETIAN
https://www.booking.com/hotel/us/the...s=1&#hotelTmpl
جدا ممتاز الفندق حجزته قبل أروح بأسبوع أو بأسبوعين لأن طبيعة فنادق فيغاس ترخص كثير قبل وقت الوصول باسبوع أو اسبوعين فحاول تتلقط الفرص

أخذت الليلة ب 583 ريال مع رسوم الفندق والضريبة وكل شي واشوفه سعر جبار بالنسبة لفخامة الفندق
حضرت شو O" by Cirque du Soleil وكان جبار وممتع لأبعد حد

سعر التذكرة حجزتها قبل شهرين يمكن ب 488 ريال للشخص
والباقي كان تجول في الفنادق العظيمة هناك وجلست فيها 3 ليالي وصراحة حتى لو زيادة ماتمل منها ( طبعا جوي أحب الفوضى اشوي
29.png
)

فيه شي جميل بعد تشتري تذكرة حق باص ب 8 دولار للشخص لمدة يوم كامل وتقدر تتنقل على شارع الستريب لمدة 24 ساعة وفيه خط سير له

كان فيه مطعم في نفس الفندق اسمه Grand Lux Cafe صراحة جبار والمالك نفس مالك شيز كيك فاكتوري وموجود له فرعين واحد في فينيشيان والثاني في بلازو
ميزة اللي في فينيشيان يقدمون الأطباق اللي حق وجبة الغدا إلى 12 في الليل ومفتوح 24 ساعة
( هالمطاعم عندهم الأطباق شي يسمونه Big Portion و شي Lunch portion ) لأن احجامهم كبيرة فتقدر تطلب الأصغر

اليوم الأخير
أخذت السيارة من شركة ثرفتي لمدة ست ليالي ( 7 أيام) بقيمة 1126 شامل التأمين وشريت آخر تانكي بنزين من عندهم وخذت سيارة من فئة الكورولا والاستلام مطار لاس فيغاس والتسليم مطار لوس أنجلوس

وسميت باسم الله واتجهت إلى سان دييغو الجميلة الهادئة
الطريق كان تقريبا 5 ساعات

جلست لمدة 3 ليالي رحت للأولد تاون والسي بورت فيلج والداون تاون ولاهويا بيتش وكهوف لاهويا وقمة جبل سولداد

كلها أماكن جميلة ومريحة بعد ضجة لاس فيغاس

السكن كان في فندق لا بأس به بالنسبة انه فندق حق نوم ومواقفه مجانية ويعطيك جو استوائي وموقعه أشوفه من أفضل المواقع يكون في وسط سان دييغو كل الأماكن السياحية ماتبعد عنك أكثر من 15 دقيقة بالسيارة


Kings Inn
قيمة الليلة : 400 ريال وحتى أقل
https://www.booking.com/hotel/us/kin...s=1&#hotelTmpl
بالنسبة للداون تاون جميل جدا وعادي تروحه كل يوم وما تمل منه وأفضل شي توقف في مجمع هورتون بلازا وتاخذ الكرت حق المواقف معاك وتروح محل Macy's بدون ماتشتري شي منهم بس قل لهم ختموا لي على ورقة المواقف وتحصل لك 2-3 ساعات مجانا

كانت خطتي إني أروح وأنا طالع من سان دييغو إلى لوس أنجلوس إلى دزرت بريميوم اوت لت

لكن الشغلة اللي حاب أوضحها هي إن دايما التسوق والأوت لت تاخذ وقت كثير خاصة بعد لو كان عدد العايلة كبير

فالأفضل تحدد ولو بشكل تقريبي المحلات اللي تحتاجها في الأوت لت وعليه تقرر وين بتروح ولا غير كذا بيضيع وقت كثير عليك

فشيكت الدزرت بريميوم اوت لت لكن ماحصلت كل المحلات اللي أبيها هناك مع إنه كبير جدا فاختصرت على نفسي وكنت كل يوم بعد ما أخلص الأماكن السياحية لكل يوم في ساندييغو أروح ل Las America OUTLET

وكان فيه كل المحلات اللي أحتاجها ( فيه بالراحة 150 محل) يبعد 20-25 دقيقة عن وسط سان دييغو
وفيه شغلة مهم تسويها تدخل موقع
https://www.premiumoutlets.com/

وتسجل فيه ويعطونك عضوية مجانية ويعطونك خصومات خاصة بالعضوية وأول ماتوصل تروح للانفورميشن سنتر ويعلمونك الخصومات ويعطونك دفتر أو يطبعون لك بعض الخصومات للمحلات
وهم لرحت بعض المحلات اسأل هل عندهم خصم زيادة عن المعروض

مثلا كوتش يعطيك خصم 10% زيادة لو شريت منهم ب 500 دولار واكثر

فيه محلات مثل Ross و Marshalls و TJ MAXX
هذيلي ياخذون البضاعة اللي تزيد من الأوت لت ويجيبون ماركات بولو وتومي ومايكل كورس ودكني وفي الغالب أسعارها أرخص من الاوت لت لكن يبيلك تتعب وانت تدور وتلقط لك شي


طبعا هالمحلات موجودة في أغلب مدن كاليفورنيا

آخر ثلاث ليالي كانت في لوس أنجلوس وسكنت في هالفندق
Best Western PLUS Avita Suites
https://www.booking.com/hotel/us/bes...al&type=total&

قيمة الليلة : 530 ريال مع الفطور وفطورهم كان منوع وكويس
وكان في منطقة اسمها Torrance وكان كل شي قريب مني في مجمع قريب ووال مارت والمواقف مجانية
ونفس الشي تاخذ بين 30-45 دقيقة للأماكن السياحية شمال لوس أنجلوس
وهو من فئة 3 نجوم ونظيف جدا والغرف كبيرة وواسعة ويوميا تنظيف للغرف

شفت عندي وقت فاضي في هالثلاث أيام وقلت خلني أشيك موقعنا الحبيب
https://www.isitpacked.com/

وحجزت لألعاب السكس فلاقز كانت تبعد من الفندق تقريبا ساعة
حجزت التذكرة العادية ب 230 ريال للشخص وكان الانتظار حول 15-20 دقيقة في اللعبة
لكنها ماتصلح لأصحاب القلوب الضعيفة
14.png
تحس اشوي وتطير من اللعبة
وقيمة الموقف كان 94 ريال في اليوم

دخلت 10 ونص الصباح وماخلصت ألعاب إلا عالساعة 5 ونص لأن العابها كثيرة جدا

وفيه يوم قضيته في فينيس بيتش ( عجبني أكثر من سانتا مونيكا) وقفت فيه لمدة 3 ساعات ب 10 دولار

من الأشياء اللي عرفتها متأخر
24.png
في مطعم صاحبه لبناني ومنتشر في لوس أنجلوس في أغلب المناطق اسمه zankou chicken عنده شاورما يحبها قلبك ومشوياته طيبة ودايما زحمة عنده وحتى أجانب كثير يجونه وأسعاره بالنسبة لمطاعم الوجبات السريعة هناك جدا ممتاز يعني تطلع وجبتين مع مشروب وأطباقه كبيرة ممكن 30-33 دولار

ذكرت شغلة لازم تجربونها في محل شوكولاته في مجمع ذا جروف في لوس أنجلوس اسمه سيز كاندي (SEE'S CANDY) عنده صراحة لازم تمرونه وله فرع في سان فرانسيسكو بعد.

وبالنسبة للمحطات لمن تبحث في جوجل ماب يطلع لك كل محطة وكم سعر البنزين فيها ودايما الدفع كاش يكون ارخص من الكردت كارد وأرخص محطة شفتها في لوس أنجلوس هي محطات ARCO


وشغلة ضرورية
بالنسبة للبطايق الائتمانية
كان عندي فيزا السفر من البنك السعودي للاستثمار وأشوفها جبارة بكل معنى الكلمة جد ماتحتاج كاش ولو زاد مبلغ تقدر ترجعه في حسابك بدون رسوم وبنفس سعر الصرف
ماستر كارد من البنك الاهلي كان سعر الصرف فيهاا 3.96 ريال للدولار صراحة كان مبلغ صرف عالي
اما الاستثمار كان 3.75 ريال للدولار

بالنسبة للتكاليف هذا ملخص تقريبي لها لشخصين
تذاكر دولي + داخلي: 6796 ريال
تكلفة تأجير السيارة+ تأمين شامل + شراء آخر تانكي بنزين + الضريبة: 1658 ريال
تكلفة دزني+ يونيفرسال+ شو لاس فيغاس+ سكس فلاغس: 3458 ريال
تكلفة الفنادق: 9385
المصروف اليومي لكامل الرحلة تقريبا: 7000 ريال ( أكل +بنزين + شرب + مشتريات أخرى)


في تاريخ 9 اكتوبر كانت الرجعة من مطار لوس أنجلوس إلى مطار البحرين وكانت من أسعد السفرات بالنسبة لي وصراحة شعبهم جدا طيب وخدوم ومتعاون

وحاب أشكر أعضاء المنتدى مرة ثانية وبالأخص ابو معتز اللي كان خير عون لي في التخطيط
 
أعلى