في البدايه سوف اسرد التفاصيل بكل دقه - التفصيل الممل - لكي يستفيد من يريد السفر الي اورلاندوا -- المدينه الساحره -- سوف تكون البدايه عند التفكير بالسفر لأمريكا خصوصاً اننا اول مره نزور امريكا ....
حيكون هناك اقسام للرحله بداية من التأشيره وحتى عودتنا الي مطار جده .
المكان المملكه العربيه السعوديه - جده - عائله مكونه من زوجان - و اربع اطفال - الأعمار - 3 -6-10-11 سنه
نلتقي في القسم الأول للرحله - التفكير في السفر - التأشره ( فيزا سياحه ) شراء التذاكر والفندق .
بدأنا في التفكير للسفر لأمريكا قبل الرحله بخمس اشهر اخترنا الوقت المناسب بعد معرفة اجازات المدارس في امريكا مهم انك ما تروح وقت اجازات المدارس وكان الوقت في شهر اكتوبر 2013 طبعاً لازم تخطط بكل دقه للرحله عشان تنبسط ولا تواجه صعوبات وتبحث في النت عن كل شي يخص اورلاندوا وعدم الأستعجال .......
اود ان اضيف اليكم تجربتي مع الفيزا الامريكيه واضيف بعض الاستفسارات التي بحث عنها ووجدتها بصعوبه طبعاً هيا اضافات بسيطه ولاكن مهمه للجميع .
في البدايه وبصفتي اول مره اسافر لأمريكا - وكمان رحله عائليه بحثت في الانترنت الين ما دوخت وراودتني اسئله كثيره عن صعوبة التأشيره وطبعاً كل الاصحاب والاقرباء يسولك فاهمين في كل شي ههههه والي يقول لا انتا رحت اليمن ما يعطوك انتا رحت بلاد الواق واق ما يعطوك دعابه يعني --- ولازم كشف حساب مليان فلوس ولازم ولازم يعني بصراحه كنت راح الغي الرحله عشان الصعوبات الي سمعتها .
والان جاء وقت الجد بديت في الأجراءات طبعاُ تروح لموقع السفاره في الانترنت وطبعا تتدور في الانترنت ماراح تتعب راح تعرف كل شي عن الطلبات وكيف تعبي الاستماره .
طبعاً اخوكم عبيت واحد ابليكشن وضفت العائله فيه وسكرت علي بالي ان واحد ابليكشن وخلاص وبعد ما سألت وعرفت ان المفروض كل شخص رايح لامريكا يعبي ابليكيشن لوحده مع صوره مهما كان عمره من 0 الي اي عمر وسويت جميع الطلبات والصور المطلوبه للجميع طبعا اهم شي في الابليكشن رقم الجواز وتاريخ الميلاد الباقي كله عادي اسئله عاديه .وتأخذ الجواز القديم طبعاً هذا في الطلبات وتعريف من العمل وكشف حساب يعني تروح معاك ملف اوراق وتصور الجواز الصفحه الاولي وتأخذ معاك صفحة التأكيد الي تجيك بعد ما تخلص الاابليكشن .
المهم سويت موعد ودفعت الفلوس طبعا فيها تعب تروح البنك وتتدفع ويبغالك فيزا او ماستر كارد عشان تتدفع للموعد مو مهم بأسمك بأي اسم . بس يعني رايح لامريكا وما عندك فيزا او ماستركارد صعبه شويه
وجاء وقت الموعد طبعا خووف اول مره وانا وزوجتي ما عمري دخلت السفاره . .
المهم تفتيش للنساء وتفتيش للرجال وما تأخذ معاك لا جوال والأفضل ما تلبس جزمه رباط لانه الجزمه تتفتش بجهاز الاشعه مثل المطار حتا مفتاح السياره ياخذوه منك ويعطوك تذكره يعني بالمختصر اي شي معدني ما يدخل . حتى الجوال لا ...
المكان في الداخل كأنك في بنك قدام الصرافين قزاز ضد الرصاص ومايك عشان تتكلم مع الشخص الي خلف القزاز
يعطيك رقم موظف الأمن وتجلس الين يجي رقمك طبعا لو ما انتبهت يناديك حارس الامن ويقلك روح للشباك وجاء رقمي وما انتبهت وناداني الامن وقلي روح للشباك .
وكان شكل الي علي الشباك هندي او باكستاني ورحت انا وزوجتي واول شي يقولك اعطيني الورقه الي طبعتها من الموقع حق السفاره وبعدها يشيك عليها واول سؤال يسالك انتا مولود فين طبعا اذا سالك بالانجليزي وما رديت علي طول يقلب عربي ويقلك انت وين انولدت هههههههه طبعا لا يسلك في اي بلد مولود انت بالغه العربيه الفصحى . وبكل ادب واحترام
ويبداً يسألك الاسئله الروتينيه ليش رايح امريكا كم بتقعد .. بس ويقول حط اصابعك عشان البصمه طبعاً لي ولزوجتي . انا علي بالي ان المقابله انتهت طلع الموضوع غير.
المهم رجع قالي ارجع وانتظر بالصاله .
انتظرت حوالي نص ساعه وسمعت اسمي فلان الفلاني والاسره .
قلت جاء وقت الجد وجيت عند الشباك وطبعاً بأبتسامه قالي صباح الخير وطبعا بدأ يتكلم انجليزي اول شي قالي حط اصبعك عشان تبصم وحطيت اصابع اليد كلها يمين او شمال زي ما تبغا . هذا الشخص هو القنصل .
وبدأ يسالني وطبعاً قلت لو سمحت نتكلم بالعربي عشان زوجتي ماتتكلم انجليزي كثير وضحك وتكلم عربي وسأل رايح فين في امريكا وليش رايح .وفين شغال بس.
وبعدها فيزتك مقبوله تصلك خلال اربع ايام روح فيدكس ادفع .
معقوله لا سالني كشف حساب ولا جوازك القديم ولا فين سافرت اخر خمس سنين ولا شي ولا شي
بجد ما توقعت انها سهله كذا وناس محترمه ومبتسمه ويرحبوا فيك بجد ما توقعت .
بعد 3 ايام استلمت الجوازات من البريد
