فندق hyatt times square

[nanaa]

بسم الله الرحمن الرحيم

السلام عليكم ورحمة الله وبركاته

اسمحوا لي ان اقدم لكم تقرير بسيط حول رحلتي الأخير للولايات المتحدة الأمريكية ( نيويورك - كاليفورنيا) طبعا الرحلة كانت في شهر ديسمبر 2014 .. قبل الرحلة
بتقريبا شهر كنت مجهز ومرتب جميع الحجوزات من تذاكر سفر و حجز فندق وحجز شقه وحجز سيارة

.. وراح اسرد لكم التفاصيل وماراح تكون طويلة وفي نفس
الوقت مفيدة ان شاءالله ..
حجزت على الخطوط المصرية درجة البزنس والرحلة كان فيها ان وزوجتي وبناتي الأربعه صراحة كنت متخوف من مصر للطيران هل راح تكون الرحلة مريحة او لاء
مقارنة بالخطوط القطرية اللي كنت احجز عليها لما اسافر على أمريكا

.. ولكن بمراحعة سعر تذاكر السفر بين مصر للطيران والخطوط القطرية الفرق كبير جدا أكثر
من نصف السعر وفرته بين المصرية والقطرية .. حجزت 6 تذاكر سفر على درجة البزنس (رحلات نيويورك فقط بزنس وسياحية) 2 بالغين و 4 أطفال تحت 12
سنة وكان السعر صدمة كبيرة لي ال6 تذاكر كانت قيمتها 84 ألف جنية تقريبا 42 ألف ريال قطري

!!! السعر كان فعلا بلاش لان نفس الرحلة على الخطوط القطرية
طلعت علي للتذاكر ال6 ب 125 ألف ريال قطري!!! ما أطول عليكم طبعاَ انطلقنا صباحاً الى مطار القاهرة الدولي وتوجهنا الى صالة الانتظار لرجال الأعمال الصالة كانت
معقولة وتفي بالغرض، بعدها تم النداء على الركاب المتوجهين الى نيويورك وطلعنا من الصاله متوجهين الى بوابة الطيارة .. كانت درجة رجال الاعمال مليانة واخذنا كراسينا وجلسنا بإنتظار الإقلاع .. مدة الرحلة من القاهرة إلى نيويورك 12 ساعة تقريباً .. بصراحة كبينة درجة رجال الاعمال كانت حلوه ومريحة والحمدلله زال الخوف اللي كان عندي قبل الركوب للطيارة وطاقم الضيافة بشوش ويتسابقون لخدمة المسافر

..

​

طبعا العيال مبسوطين وكل واحد فيهم لاهي إمال بالآيباد او بدفتر التلوين في بداية الرحلة،قبل الوصول الى مطار نيويورك (جون كاندي) اعلن كابتن الطائرة دخول الأجواء وعلى المسافرين التزام الجلوس وتعبئة بطاقات الجمارك الخاصة بهم ،، بحمدالله هبطت الطيارة في مدرج مطار جون كاندي وتوجهت الى الخرطوم الخاص بها .. ومن هنا بدت الرحلة في الأراضي الأمريكية، بعدها توجهنا إلى طوابير الجوازات تمهيدا للخروج إلى منطقة الشنط واخذ السيارة ، كان وصولنا لنيويورك قريب منتصف الليل والساعة كانت 10 مساء ، بعد طابور طووووويل خلصنا اجراءات الجوازات وانتقلنا إلى منطقة الشنط، طبعا لما تطلعون من منطقة الجوازات راح تحصلون الشنط على طول في وجهكم، اخذنا عربة للشنط وكان في شاب اسيوي يعمل هناك ساعدنا في اخذ الشنط والتوجه لباب المطار الخارجي هذا الشخص انت تعطيه مبلغ معقول على خدمته لك، انا كنت حاجز قبل وصولي سيارة تنقلي من المطار الى الفندق في منهاتن والشركة كان اسمها (Go Airlink Shuttle)

طبعا انا اخترت هالسيارة الفان لان كان عندنا شنط كثيرة .. عند الدخول للموقع تحجز وكأنك تحجز لطيارة تختار التاريخ والوقت وهل حاب يكون وجهه وحده او وجهتين انا اخترت(من المطار الى الفندق ـ من الفندق الى المطار) وكان السعر 350 دولار، وكان عندي نسخه من الفاتورة طبعتها اون لاين ولما خلصت اتصلت على الرقم الموجود وعطوني رقم الفان اللي كان بإنتظاري وتوجهنا الى فندقنا في التايم سكوير ..

بعد الانطلاق بمدة بين 30 الى 45 دقيقة وصلنا الى منهاتن المدينة التي لاتنام ..

وحجزنا كان بفندق Hyatt Times Square الفندق كان حلو وسعره جداً مناسب حجزنا فيه ليلتين قبل سفرنا الى لوس أنجلوس ..

في صباح اليوم الثاني لنا في نيويورك واللي صادف 20-12-2014 توجهت الصباح لفرع بنك Wells Fargo حتى اودع مبلغ في حسابي عندهم، طبعا انا كنت فاتح عندهم حسابي بنكي من فترة وخذت عليه بطاقة صراف آلي (ATM) وهذا كان بهدف اني استغني عن حمل الكاش معاي اثناء سفري في الولايات الامريكية بالاضافة لبطاقة الإتمان اللي عندي من مصرف قطر الاسلامي واللي هي اساسية ..

بعد ماخلصت مشوار البنك اخذنا لنا جولة في منهاتن والجو كان بارد جداً، وهذي بعض الصور في جولتنا ..

وهنا المكان صار للتزلج على الجليد في Rockefeller Center

وراح اسرد لكم بعض الأماكن اللي ممكن ان المسافر لنيويورك يزورها :
- Central Park
- The Metropolitan Museum of Art
- Times Squire
- Ripley's Believe it or Not! Times Square
- 5Th Ave
-Statue of Liberty
والكثير من الأماكن السياحية، بالنسبة للي يزور نيويورك لأول مره انصحه يركب الباصات السياحية اللي منتشرة في المدينة وممكن تحصل مندوبينها في التايم سكوير على مدار اليوم، هذي الباصات تاخذكم في رحلة تعريفية للمدينة ومن خلالها تعرفون أهم ماهو موجود بالمدينة واهم نقاط واماكن السياحة وسعر الفرد اذا ماخانتني الذاكرة للبالغ 25 دولار..

وفي نهاية اليوم وقبل مانروح للفندق توجهنا لمطعم Ruby Tuesday للعشا .. هالمطعم اعشقه وتحضير الوجبات اللي عنده ألذ من الفروع الموجوده عندنا في الخليج ..

​

 

[nanaa]

في صباح يوم 21/12/2014 سكرنا شنطنا وحضرنا نفسنا حتى نطلع للمطار .. وكان في انتظارنا حسب الموعد نفس الفان اللي استأجرناه من الشركة (Go Airlink Shuttle) حتى يوصلنا الى مطار جون كاندي للتوجه الى مدينة الأحلام لوس انجلوس

.. ركبنا الفان وحطينا الشنط وتوجهنا للمطار خلال 30 دقيقه ورحنا الى محطات الرحلات الداخليه وعمل التشك ان مع شركة فيرجن أمريكا

وكانت هذه المره الأولى اللي اطير على هالطيران، من قبل رحلاتي الداخليه الأمريكية كانت مع أمريكان أير لاين او دلتا وبصراحه هالشركتين طيرانهم الداخلي جدا جدا تعيس وكان سبب من الاسباب اللي تضايقني في الرحلات الداخليه في امريكا، لكن واحد من ربعي نصحني بفيرجن أمريكا وان طياراتهم جداً نظيفه وحتى مستوى كباين السياحية فيها مريحة وحلوه فقلت الدنيا تجارب خلني اجرب ما راح اخسر شي، وفعلا دخلت على موقع الشركة(طبعا هذا قبل السفر بشهر تقريبا) وحجزت 6 تذاكر سياحية من نيويورك الى لوس انجلوس ذهاب وعودة والسعر طلع علينا للتذاكر السته 2 بالغين و 4 اطفال تحت ال12 سنه ب 3200 دولار السعر كان اغلى من امريكان اير لاينس ودلتا لكن قلت اكيد الغالي سعره فيه

، طبعا كان في وقت قبل لاتطير الطياره تقريبا ساعه ونص فقلت حق العيال في واحد لازم نروح نسلم عليه في المطار لانه يستاهل السلام .. تعرفون من ؟

الحجي شيك شاك

​

هالمطعم في كل مكان في العالم زحمه ودي مره اعدي على فرع له مايكون زحمه

وبعد ماخلصنا هالوجبه الخفيفه اللذيذه توجهنا الى بوابتنا حتى نركب للطياره، وكان عندي فضول كبير كيف راح تكون الطياره

؟ واللحين اترك لكم الصوره وانا ما راح اعلق على الطياره التعليق لكم

الرحلة من نيويورك الى لوس انجلوس مباشره 5 ساعات ونص طويله بس اللي خلها تعدي ان الطياره فيها واير ليس

، شبكت عليه واشتريت لي باقة نت لمدة الرحلة عن طريق الكريدت كارد ..

في الحلقة الجاية ان شاءالله بتكون التغطيه الوصول لمطار lax وشركة ايجار السيارات

 

[nanaa]

وصلنا بحمدالله الى مطار لوس انجلوس في كاليفورنيا Lax وبعد النزول من الطياره توجهنا على طول الى قسم الامتعة لأخذ الشنط

واللحين تبدأ المرحلة الثانية استلام السيارة، طبعا في مطار Lax كل شركات السيارات خارج المطار مكاتبها وللوصول لها لازم الخروج برا المطار وفي رصيف خاص تنتظرون فيهم باص الشركة اللي انتوا مأجرين من عندهم السيارة بالنسبه لي استأجرت السيارة من شركة Dollar Car Rental وقفت على الرصيف وجلست انتظر باص الشركة طبعا الباصات شغاله 24 ساعة بس توقف ع الرصيف وتنتظر باص شركتك وهذي صورة لرصيف الانتظار

ركبت انا وعيالي ومعانا الشنط متوجهين للشركة لاستلام السيارة، المسافة من المطار تقريبا 10 دقايق، بعدها وصلنا للشركة ووقفت في الدور لاستلم السياره، وكنت طابع الحجز اللي سويته اون لاين

وهذي هي المحروصه جاهزة للاستلام وبداية المغامرة

حطينا الشناط بالسيارة وتوكلنا على الله متوجهين للشقة اللي حجزتها - الحجز كان عن طريق موقع شركة اوك وود
وهنا موضوع شرحت فيه طريقة الحجز عن طريقهم


طبعا دخلت عنوان الشقه في برنامج خرائط قوقل على الايفون ووصلني الى باب المجمع
اللي فيه الشقه بسانتا مونيكا Santa Monica .

السكن
هذي بعض الصور للشقة اللي حجزتها
باب الشقه مزين بزينة الكريسمس

مدة رحلتنا في لوس انجلوس كانت 3 اسابيع منها كانت 4 ايام في لاس فيغاس، وقسمنا مدتنا في لوس انجلوس الى ثلاثة أقسام:
قسم للسياحة
قسم للترفيه
قسم للمشتريات

بالنسبه للسياحة اخذنا جولات في بعض المناطق السياحية وراح اذكرها وهي:
The Grove

Farmers Market

سوق مفتح وفيه مطاعم وقهاوي ومحلات تجارية وسينما بالاضافه لسوق المزارعين
يبيعون فيه المنتجات المحلية حلو ويستحق الزيارة
Third Street Promenade

شارع طويل ويمتد على جانبيه محلات تجاريه ومطاعم وسينما صغيره بالاضافه لبعض العروض الفرديه اللي يأدونها بعض الاشخاص مثل العزف والعاب الخفة والحركات البهلوانية
Americana at Brand

محلات تجارية مفتوحة وفيها مطاعم وقهاوي لها جلسات خارجية
Hollywood Walk of Fame

شارع مشهور ومعروف فيه والك اوف فيم اللي هي اسماء المشاهير المحفورة على الارض،
وبجنبه شارع الهوليود وود بوليفارد الشهير بالاضافه لمجمع تجاري مفتوح
Santa Monica State Beach

شارع شاطئ سانتا مونيكا
Big Bear Lake
هذي المنطقة مازرتها لكن قريت عنها وناوي ازورها في سفرتي الجايه في الصيف ان شاءالله، وهي عباره عن بحيره كبيره وبجانب هذه البحريه توجد بيوت او اكواخ للايجار للي حاب يعيش جو الرحله من شوي وصيد في البحيره، وهذا موقع للمنطقه في الفعاليات والحجوزات للسكن ​

 

[nanaa]

اليوم راح اتكلم عن زيارة ديزني لاند كاليفورنيا وراح احاول اني اعرض تفاصيل التخطيط للزيارة، بداية تم حجز تذاكر المدينة من خلال
طبعا سعر التذكرة يختلف بحسب العمر وعدد الايام المطلوبه واذا كان الدخل لحديقه واحد او الحديقتين (للعلم يوجد حديقتين لديزني لاند كاليفورنيا والحديقه الوحده تحتاج على الاقل يومين حتى تستمع بكل الفعاليات والالعاب الموجود بداخلها)، راح اعيطكم تفصيل التذاكر اللي اخترتها وهي :
تم شراء عدد تذكرتين لعمر عشر سنوات وطالع وعدد 4 تذاكر من 3 الى 4سنوات لمدة يوم واحد شامل حديقتين، وكانت التذكرة الواحده لعشر سنوات وطالع ليوم واحد شامل الدخول لحديقتين هي 155 دولار وقيمة التذكرة لعمر 3الى 4 سنوات لمدة يوم واحد شامل الدخول لحديقتين هي 149 دولار ، بقيمة اجمالية 906 دولار ( طبعا هذه المده واللي هي يوم واحد لدخول حديقتين غير كافيه نهائيا لكن بالنسبه لي كانت هذه الزيارة الثالثة لي مع الاطفال لها خلال 4 سنوات لكن بصراحه بعد نهاية اليوم تمنيت لو اني خليتها لمدة يومين) طبعا بعد اتمام عملية الشراء اون لاين تم طباعة التذاكر وحملها لشباك المدينة لاستبدالها بتذاكر كرتونية للدخول للحديقه، بعد ماتم الحجز (قبل الذهاب ب3 ايام) توجهنا صباحا الى مدينة الأحلام ديزني لاند كاليفورنيا، بعد الوصل للمنطقه توجهنا الى مبى وقوف السيارات وفيه يتم سداد رسوم دخول السياره واللي هو 18 دولار لمدة يوم واحد، بعد ماوقفنا السيارة نزلنا من مبنى مواقف السيارات وتوجهنا لرصيف انتظار العربات اللي تقلنا الى بوابة دخول الحديقة ( العربات شغالة على مدار اليوم تقريبا كل ربع ساعه في حركة يعني لحد يستعجل للركوب ويخاف انه ماراح يلحق) بعد وصول العربه ركبنا وتوجهنا الى مدخل المدينة

، توجهنا الى كشك التذاكر وبدلنا تذاكرنا الورقيه المطبوعه تذاكر كرتونيه ودخلنا بها للمدينة ، طبعا قبل الدخول راح تحصلون استاندات فيها خريطة المدينة ومافيها من العاب وفعاليات واوقات العروض اليومية متوفرة باللغة الانجليزية بالاضافة للغات عديدة عدا اللغة العربية

لكن قرايتها سهله وبسيطة، بعد الدخول من البوابه ممكن تسأجرون للاطفال مشايات او عربات خصوصا للاطفال الصغار واللي يتعبون من المشي وكذلك فيه عربات كهرباية لكبار السن لكن بصراحه ماذكر السعر لان كان معانا عربة الطفل الخاصة بنا، واللحين راح اتركم مع بعض الصور اللي ان شاءالله تعجبكم ..
صورة لمبنى مواقف السيارات :

صورة لبوابة الحديقة :

صورة لخريطة الحديقة موضح فيها الالعاب والفعاليات(وهي تتغير سنوي

صور منوعة من الحديقة:

​