الاجواء الشتوية فى امستردام

[nanaa]

اليوم الثامن 24/12/2014


من بعد باريس وديزني لاند




ومن بعد احلى وامتع ايام قضيناها بالشتا ... انطلقنا الى امستردام عن طريق القطار ثاليس

تم حجز القطار عن طريق موقع b europe train

يتعامل الموقع مع اكثر من شركه قطارات وافضلها ثاليس


حجزنا على الدرجه الاولى وبسعر جدا معقوووول 190يورو اذا ما خانتني الذاكره .. وكان الحجز ل شخصين بالغين و طفلين

4 كراسي على طاوله

القطار مريح وسريع .. كل كابينه في مكان لتخزين الجنط واغلب المسافرين مايستخدمونها لانه معاهم شنطه وحده صغيره

وفي مكان للتخزين الشنط بعد فوق كل كرسي مثل الطياره ..

انا وايد كنت متخوفه من تجربه القطار واللي كان متابع القسم يدري شكثر سألت عن القطار قبل لا اسافر

لكن الحمدلله سهالات و مافي زحمه ولا دور بسرعه دخلنا جناطنا وقعدنا بمكانه والحمدلله



القطار يوقف بأكثر من محطه حسب تقسيم الرحله ولازم تثبتون عدل انتو باي محطه نازلين

هذا القطار اللي ركبنا فيه وقف بمحطه وحده بس .. وتقدرون تسالون موظفين القطار اذا ضيعتو وماعرفتو متى تنزلون ...

الرحله مدتها 3 ساعات تقريبا بس كلش ما حسينا بالوقت لانه المناظر حلوه والطبيعه خلاااابه صج متعه

وغير جذي في خدمه واي فاي

حتى وصلنا امستردام

محطه القطار قريبا جدااااا من الدام سكوير

واحنا كنا حاجزين فندق nh amsterdam grand hotel krasnapolsky


الفندق بالضبط على الدام سكوير

اخذنا تاكسي بدقايق وصلنا الفندق

الغرفه حييييل صغيره بس حبيتها

ارضياتها باركيه .. حسيت نفسي ساكنه في يخت او رايحه كروز

بسرعه حطينا اغراضنا ورحنا نتعرف عالمنطقه المحيطه

وايد سمعت عن امستردام قبل لا اروح انها بلد الممنوعات وماتصلح للعوايل و الاطفال

لكن حاولنا نبتعد عن شارع الرد لايت وما رحنا صوبه كلش فما شفت شي

و الاشياء اللي قالولي عنها موجوده بمحلات السوفونيرز يعني بالضبط ويمكن اقل من اللي موجود بتايلند

فاللي يحرص على نفسه يقدر مايشوف

طبعا اول شي لازم نجرب البطاطا الهولنديه

طحت بغرامها

لزييييييييييزه

بعدها رحنا مكتب سياحي نحجز حق رحله باجر نشوف فيها هولندا

عندهم خصومات عالمتاحف

حجزنا حق رحله مصنع الجبن والاحذيه الخشبيه .. من الساعه 9 الصبح وحتى الساعه 2



وبعد ماحجزنا طلعنا نتمشى في دامراك

بما انه مو موسم ورد .. نشتري ورد خشبي



والليقو لاحقنا بكل مكان

و C&A بعد

العيب الكبير اللي انا اشوفه في امستردام محلاتهم تسكر مبجر الساعه 6

واحنا تونا باول الليل .. وماكو شي نسويه ولا مكان نروحله

وين ايام باريس والشانز اللي موجود على طووول

تمشينا نشوف المحلات المسكره وحطيت ببالي جم محل علشان اليوم الثاني ارجع لهم

وشفنا محل يبيع وافل وفروزن يوقرت واخذنا منهم

الحمدلله عالنعمه .. وافل فرنسا الذ

ونجرب محل بطاط ثاني

طبعا ماراح تتخيلون كميه البطاط اللي اكلناها

وسميت سراي موجود .. بس خلاص ماكو مجال للاكل

وكنت بجرب معز بس ماكو مجال نخليه حق بكره

وبس ردينا الفندق ننام لانه باجر ورانا رحله لازم نقعد قبل الموعد بساعتين عالاقل




​

 

[nanaa]

اليوم التاسع 25/12/2014


صباح الخير ....

من شباك الغرفه ... بدايه الشروووق للحين ما طلع الصبح

بس لانه ورانا رحله حاجزينها من المكتب الساعه 9 لازم نكون متواجدين بالمكتب للانطلاق




من بوفيه الافطار .. البوفيه متنوووع وكل شي موجود

الحمدلله




طلعنا بعدها للمكتب السياحي

هدووووء الصباح

الناس قاعده من الصبح مع انه يعتبر يوم اجازه كريسماس

سبحان الله المناظر الجميييله كفيله بأنها تخليك محترف تصوير ...

وركبنا الباص .. الباص دورين ... قعدنا بالدور العلوي

والجو مطر خفيف وبرررد

وانطلقنا

ابي بيت جذي

ووصلنا الطواحيين



الطواحين تطحن المكسرات وتسوي منها زبده مثل زبده الفول السوداني (معلومه عرفتها) ماكنت اعرف الطواحين حق شنو

الناس بهذي المنطقه ماشالله صحتهم جيده .. شباب وشياب الكل قاعد من الصبح ويركضون (رياضه الصباح)

ماينلامون الجو جميييل والمناظر تسااااعد

البيووووت حبيييتها

البساطه جميله ... احسها مريحه

وايد مصوره بيوت

احاول اخفي احساسي ولكن بالعشق مفضوووح

ورحنا الباص للانطلاق الى فالندام

ووصلنا الى مصنع الجبن

لذااااذه

المصنع عباره عن وحده تتكلم لا شفنا شلون يسووون الجبن ولا شي

بس تكلمت و ذقنا انواع الجبن



في وحده قالتلي قبل لا اروح انه في انواع جبن فيها حشيش فتأكدو قبل

لكني ماشفت هالنوع

النوع اللي كان لونه اخضر قريت عليه بس كان داخله هيربل مو حشيش

اللي شعرها ابيض كانت قايد الرحله .. واللي لابسه فستان احمر اهي اللي اشرحت لنا عن الجبن



قالت لنا شي مفييييد (للسيدات فقط )

طلبت منا نخمن عمرها


انا حطيت عليها 50 سنه


والصدمه


لمن قالت لنا عمرها 70 !!


ماشالله ماشالله تتمتع بصحه ممتازه واقفه عدل .. وتمشي وتتحرك ووجها ماشالله


جان تقول لنا


سررر للسيدات


تقول انا كل يوم الصبح اشرب عالريج (وي بروتين) اللي نقول عنه بالعربي مصل اللبن

تقول انه طعمه سيء وريحته سيئه بس فوواااايده كثييييره


تقول شفتوني انا شلون واقفه وويهي مافيه تجاعيد من هذا اللي اشربه كل يوم عالريج

من زماااان طبعا تشرب لانها تشتغل بالمصنع فكل يوم الصبح تاخذ لها كاس





خلصت شرح


شريت نوع جبن هولندي (ماسدام) و شريت نوع بالكمون (لذيييييييييذ)



طلعنا من المصنع عطونا ساعه فري ناكل فيها

دلونا على مطعم سمك وبطاط



وبعدها دخلنا محل السوفنير

والوافل والبان كيك لزوووم التحليه



اختاروووو

انا اخترت بان كيك

يمي .. اطيب من وافل امس

ومن بعدها ركبنا المركب .. علشان يودينا ماركن


لمصنع الاحذيه

يقولون البحريه هذي تتجمد لمن ينزل الثلج

مصنع القبقاب الخشبي


اشرحت لنا و بعد سوت لنا قبقاب خشبي جدامنا

بالقديم كان عمل القبقاب يدوي .. اما الحين عندهم مكاين

واللي حاب يشتري


اييي قالت انه الخشب مايدخل ماي .. يعني النوع المستخدم ضد الماي


طبعا هذا كان سؤالي لهم لانه منطقه بحريه ومطر وثلج شلون يستخدمونه

حتى البقره ملبسينها قبقاب

وافكار للاستخدام

وهني انتهت الرحله

وكان الباص ناطرنا .. الباص راح قبلنا الى ماركن وانتظرنا هناك


وردينا الفندق

ريحنا شوي

وانا ببالي السووووق



الصدمه


الصدمه

كل شي مسكر لانه يوم 25/12 يوم اجازه الكريسماس




انزين لييييييش


في احد يسكر بالعطله


احنا عندنا حتى يوم العيد فاتحين


اهي فرصه للسياحه والشراء والاكل

بس الظاهر الاجانب يحبون يتجمعون ويقعدون بالبيت بهاليوم

للاسف ضاع هذا اليوم بعد بس استفدنا من الصبح منه

تمشينا بالشوارع نشوف الناس بس ماكو شي ثاني




ولي وقت العشا



تعشينا بيتزا


المطعم موجود بنفس الشارع اللي فيه البطاط ومعز

اي على فكره في مطاعم كاتبين عليها حلال واسلاميه بس انا مو وايد مع الاكل بالسفر

اكل اي شي

اصلا ما احب المطاعم العربيه بالسفر .. شبعانين منها بالديره عندنا





وتصبحون على خير

على امل انه السوق يفتح باجر

​

 

[nanaa]

اليوم العاشر 26/12/2014

مشكووورين جميعا عالكلام الجميل...


بس اخاف هالجزء يخذلكم

لانه مافي صور وايد



اليوم يوووم السوووووق ... خلااااص طفح الكيل ...

مليت وانا انطر سوقهم وكله مسكر



استعداد من الصبح وحماااااس




نزلنا نتريق

قاعه البوفيه


صحون للاطفال

ما احلى الجبنه الهولنديه مع الماسترد .... لذيذ

نصور شوووي قبل لا نروح نبدل ونطلع

هذا المجمع يصير بالضبط ورا الدام سكوير

الصدمه انه مسكر .. وكل المحلات مسكره وكل الشوارع فاضيه


سألنا وحده عن اذا كانو بيفتحون اليوم

قالت اي بس متأخر عالساعه 11:30 او 12

لييييييييييش




شنسوي



رحنا مكتب سياحي نحجز حق متحف البودي وورد اسمه جذي .. طبعا انا ماحب المتاحف بس بناء على طلب بدر .. لانه كل ما مرينا عند المتحف قال ابي ادخل

واهو اختار المتحف مع انه شكله ما يشجع ابد .. بس مادري ليش عاجبنه

حجزنا بسعر اقل من المكتب والاطفال اقل من 6 سنوات مجانا ..

المهم قبل لا ندخل هذا المتحف انا كانت رفيجتي قايلتلي عن متحف هم يتكلم عن جسم الانسان بس فكرته غير

انه تدخل داخل الجسم وتشوف الاعضاء شلون تشتغل .. بس لمن سألت المكتب عنه قالو برا امستردام ومايودون رحلات

فاللي يبي يروح لازم سياره



هذا شكله من برا

واسمه

corpus human body museum amsterdam




واحنا حجزنا حق هذا

شكله من برا عارضين جثه انسان وبقره .. بس بدون الجلد بس العضل واللحم

المتحف 6 ادوار .. تبدون من الدور السادس وتنزلون بالسلم


بصراحه مادري شنو فكرته بس كل الكتابات اللي داخل تدعو للسعاده

وان السعاده مصدرها من داخل الانسان مو من العوامل الخارجيه


ويعني بعض العبارات اللتي تدعو للتامل والتفاؤل والحب

ممنوع التصوير داخل المتحف .. بس انا صورت الكلام اللي عجبني



خلصنا بسرعه الادوار ال 6 والموظفين مستغربين

لانه الناس تطوووول على كل جثه وعلى كل كلمه واحنا بسرعه

كلش مو مال متحاحف احنا

واخيرا فتح السوق

المجمع اللي صورته لكم بالبدايه .. مافي شي يسوى


طلعنا نتمشى بالشوارع ..


وااايد محلات معروفه وغير معروفه


وللاطفال لازم نساحلهم شوووي

طوووول اليوم سوووق لي بالليل



في عندهم ستور كبير اسمه bijenkorf كله ماركات عالميه بالضبط على الدام سكوير .. يم فندقنا

اقصد لي الساعه 6 المحلات تبدي تسكر

دخلت محل جبن اشتري بعد غير اللي من المصنع

وتقريبا نفس السعر

تعشينا يومها من معز


بس ماصورت


اول شي وااايد زحمه عليه

بعدين فوضى ..

يسوي خبزه داخلها يمكن 6 حبات فلافل صغار والحشوه شنو تبي انت تحط

حاط مثل بوفيه صغير ومكشوف وكلمن ايي يحط .. مادري حسيت بالفوضى شوي

والاكل وقافي حاط بس طاولتين برا


يبيله ترتيب ويصير تمااام


باختصار امستردام اللي يبي يروح لازم كل يوم يحجز رحله علشان يستانس فيها لانه لافيها محلات و لا قهاوي ومطاعم نفس باريس ولا شوارع حلوه نتمشى فيها .. رحلات وبس هذا رايي فيها


والشعب الهولندي حبيييته جدا متعاون ومبتسمين على طووول واخلاقهم حلوووه

وبس

اي هذا كان اخر يوم لنا باجر موعدنا لرحله بلجيكا

​

 

[nanaa]

اليوم الحادي عشر 27/12/2015


اخر يوم لنا في هولندا .. موعدنا مع القطار اللي بينقلنا الى بوكسيل الساعه 11 تقريبا


نزلنا نتريق .. اخر ريوق بالفندق

وكنا لامين اغراضنا ومزهبين كل شغلنا علشان نطلع من الفندق


طلبنا سياره تنقلنا لمحطه القطار


مثل ما قلت لكم قبل انه المحطه قريبه ممكن تمشون لها بس معانا اغراض واطفال مانقدر نمشي



طلعنا من باب الفندق ولااا برررررد غير عن كل يوووم


وثلج خفيف

وصلنا المحطه ..



راح زوجي يسأل عن مكان القطار واي كابينه


ولا اشوووفه يتكلم مع الموظف ويأشر و وعلامات ويهه تغيرت

شالسالفه !!!



رجع جان يقولي القطار متكنسل بسبب عاصفه ثلجيه قادمه من جهه بلجيكا

والحل؟؟


قالوله روح على خط منطقه ثانيه ومنها شوووف اذا يودونكم بروكسل من هناك او لا


( سوووري والله نسيت اسم المحطه اللي قالولنا نروح عليها )


المهم شلنا اغراضنا ونطرنا

طبعا شكلنا ابوو البهدله


سميت الرحله ( رحله غوار )

ركبنا القطار .. فرررق بينه وبين القطار الاول اللي نقلنا من فرنسا

راحت ايام العز


كأنه باص مواصلات

مادري ليش ما يحطون خطط للتعامل بالظروف الجويه السيئه

وصلنا المحطه

وراح زوجي يسأل ولا اثاري مو بس احنا

وايد ناس متبهدلين نفسنا


ولا يقولون في باص ناطركم برا راح يوصلكم



والحمدلله الشعب الهولندي متعاون

سايق الباص ساعدنا شال اغراضنا معانا والاطفال

ومشى الباص

ومشى


ومشى

ومشى


الرحله اللي المفروض بساعه نوصل بروكسل صارت 6 ساعات



اظن ان غفت عيني شوي ونمت

لمن بطلت عيني ولا زوجي يقول شوفي


كأنه احنا بلجيكا !!


شلون عرفت


لاحظ زوجي اختلاف الكتابه ( الاحرف) على المحلات

والسيارات حاطين على الرقم حرف B يم علم الاتحاد الاوربي

اخيراااا



حتى وصلنا المحطه

سألنا السايق هذي اهي المحطه الي بروكسل قال اي



الحمدلله يعني وصلنا

الجو فعلا كان بااارد و ثلج ينزل


اخذنا تاكسي قلناله وصلنا فندق كراون بلازا



(المفروض الفندق قريب من المحطه)


بس مشى وايد جان يطلع زوجي ورقه الحجز يقوله الفندق قريب

وين رايح


جان يشوووف الورقه جان يقول

اوووو كراون بلازا بروسيل !!!

قلناله اي

قال انتو في Antwerp مو بروسيل


قال اوكي بوصلكم



ووصلنا صج طواله صارت السالفه بس خلاص تعبنا .. نبي نشتري راحتنا



ولا السايق طلع باكستاني مسلم

ويسولف يقول ليش رايحين بروسيل

وليش ماقعدتو فيي انتيروب احلى وفيها محلات الالماس

والكاكاو



وطلع يعرف ناس من اهله يشتغلون بالكويت


والله خوش واحد ووصلنا عالعداد يمكن طلع الحساب 55 يورو

وصلنا الفندق

الفندق يبعد عن سالحه القراند بلاس 15 دقيقه مشي تقريبا


وقريب حوالينه في محلات


وبس نعبر الشارع يصير مجمع City2 Shopping Mall

الدور اللي احنا فيه

الصوفا اللي قاعدين عليها تصير سرير

بسرعه بدلنا وغسلنا وصلينا وطلعنا


راح الوقت ونبي ناكل

دخلنا المول وتغدينا .. باستا لذيذه

اغلب سكان المنطقه من العرب المهاجرين

واغلب الاكل حلااااال


طلعنا نتمشى بالشوارع ونسأل عن القراند بلاس وين صاير

محلات وكشكات على طووول الشارع

ووصلنا القلاند بالاس

وشغلو موسيقى وعرض ليتات

ودام انه بلجيكا لازم كل يوووم شوكولا

وتصبحون على خير​

 

[nanaa]

اليوم الثاني عشر 28/12/2014



اليوم مو مثل كل يوم


قعدنا الصبح نزلنا نتريق بالفندق ..


شوي ولا

يغنون لي هابي بيرثداي وكيكه من الفندق



اليوم عيد ميلادي الصجي .. اللي بديزني كان قبل الموعد



الكيكه لذيذه

المهم خلصنا الريوق والاحتفال .. مشكورين اداره الفندق







الوجهه الحين حق مكان ... احنا رايحين بلجيكا علشانه


طبعا الهدف الاول الجوكلت ..


الهدف الثاني حق ولدي بدر .....


Belgian Comic Strip Center, in Brussels



المتحف هذا


بدر ولدي من محبين شخصيه تان تان Tin Tin

يمكن الشخصيه هذي مو الكل يعرفها او بالاصح الجيل الجديد مايعرفها بس ولدي مغرم فيها

ولانه موطنها بلجيكا قلت لازم اوديه يشوفه



طبعا كان المكان متعه لولدي .. يمكن الاطفال الثانيين مايعجبهم لانه مايعرفون الشخصيه


بس اهو جدااااا استمتع بالمكان



مكان المتحف قريب من فندقنا وبالصدفه ماكنا ندري

سألنا موظفين الفندق عن المكان ودلونا بالوصف

ووصلنا


اول شي موجود محل تشترون منه

بس احنا رحنا نشوف المعرض بعدين نشتري اخر شي


المتحف فيه اكثر من شخصيه بلجيكيه

مثل السنافر وتان تان وكاليميرو

تان تان والكابتن

مستمتعييين بالمكان

المتحف دورين

خلصناه ورحنا الشوب نشتري

اخذ الكولكشن كامل

والقصص .. قصص مغامرات تان تان
واقلام وكروت

خلصنا طلعنا ..


انا كان ببالي نروح اليوم ميني يورب والاتوميوم



شفنا الباص السياحي سألناه عن النقطا اللي بيوقف عندها

وطلع يوقف عن الاتوميوم


ركبنا معاه

بالطريييق


اليوم كان بااااارد جدا

ووصلنا

الدووور طويييييييييييييل للصعود


والاطفال مو متحملين الانتظار


قررنا مانصعد


بس نروح ميني يورب


الفكره طبعا واضحه للكل

مجسمات مصغره عن معالم اوربا

مغطيها الثلج


اي قريب من الميني يورب اطعم وكافيه والعاب للاطفال بس كانو مسكرين

اااه يا لندن

كل معلم حاطين معلومت وعلم الدوله





ثللللج

باريس الحب

خلصنا

عند الباب اول مادخلنا صورونا


واستلمنا الصوره واحنا طالعين



ردينا مع الباص عند الفندق



ونزلنا نتغدا

بيتزا .. جيز مع مشروم و سلطه



خلصنا كملنا اليوم بالتسوووق


مادي اذا ذكرت لكم من قبل او لا


كنو فاتحين بريمارك قبل اسبوعين تقريبا من وصولنا



وزحمه عليييه ودوووووور



بنهايه اليوم رحنا القراند بالاس


وشريت علب شوكولا هدايا



من قوديفا .. اسعارهم معقووووله جدااا وارخص من عندنا

ولابد نتدفى بالهوت جوكلت والوافل البلجيكي اللذيذ ​

 

[nanaa]

اليوم الثالث عشر 29/12/2014

من الصبح قعدنا للتسوووق

اليوم رحت وقفت دووور علشان بريمارك


وبعد ماخلصنا من بريمارك


تسووقنا بباقي الملات


انا وااايد شريت وعجبني سوقهم اكثر من امستردام


وطبعا لانه وااايد شريت وماكفت الشنط اللي عندنا



رحنا شرينا شنطه

وردينا الفندق حطينا الاغراض وطلعنا

بعدها رحنا نفس مطعم الباستا اللي اكلنا فيه باول يوم في بروكسيل


عجب الاولاد

وبدر للحين يتذكر الطعم ويقول ابي منه

تحلايه

الشي الممتع انه تشوفون رسومات تان تان بكل مكان بشوارعهم


يحبونه


واحنا نحبه بعد

تمشينا بأغلب الشوارع وحسيتها كلش ماتضيع يعني بسهوله دليناها






بعدها قعدنا في ستاربكس الموجود في ساحه القراند بالاس


واحنا قاعدين


مرت وحده بيدها كيس عليه صورة تان تان



جان زوجي يقولي شفتي قلت له اييييي

قال اكيد في محل


قلت لا مو معقوله يمكن لانه يحبونه كل شي مسوينه عليه



شوووي ولا تمر وحده ثانيه بعد شايله كيس تان تان


قال لي لاااااا اكيد في محل وقريب



سألنا الناس


جان يقولون اي موجود تان تان بوتيك ودلونا عليه

شرينا منه ملابس .. تي شيرتات للاولاد على صورته .. وانا شريت كوب للقهوه على صوره تومسون اند تومسون


وبعد شرينا قصص

و العاب

هذي كانت درجه الحراره

وفي نهايه اليوم لابد من


قهوه نسبرسيو

​

 

[nanaa]

اليوم الرابع عشر 30/12/2014





اليوم اخر يوم لنا في بروكسيل


جاهزين للانطلاق الى باريس

عن طريق قطار TGV انتقلنا الى باريس نزلنا بالضبط عند محطه مارني marne la vallee

المحطه اللي بديزني لاند


القطار مريح بس يبقى ثاليس احسنهم


حجزنا كان 4 كراسي على طاوله بدون وجبات ولا شي ...

الرحله تقريبا ساعه ونص

والبقيه في الجزء الفرنسي


.............



شكرااا لكل متابع


شكراااا لكل كلمه كتبت


شكرا على الاطراءات



وان شالله اكون اضفت ولو جزء بسيط من المعلومات

: (114):

​