اذربيجان نظره واقعيه

[دعاءء]

سيداتي سادتي .. ايها الشعب الكريم

السلام عليكم ورحمه الله وبركاته



اذربيجان باختصار بلد عادي جدا وليس فيه مايميزه

لكن ان كتب الله لك ورحت هناك كما فعلت فلك هالاضائات
السريعة عن رحلتي .. لعلها تكون مفيده بالنسبة لك ..


*الطيران الارخص هو فلاي دبي

* مطار اذربيجان جميل جدا ومرتب ولاوجود لطلب البخشيش
*اول ماتطلع من البوابة تجد كشك بيع شرائح الجوال تراه دبل السعر عن داخل المدينه ( دبل صدق)



عند الباب الخارجي وانت طالع ع يسارك ( ملاصق للباب من الخارج) هناك تذاكر الباص الجميل الجديد والفخم ب4 ريال يوديك لوسط المدينه .. ركبت وكان معي فقط 3 اشخاص خواجات



-التكاسي يطلبون ميه او 120 ريال والباص بـ 4 ريال

-اطلع مع الباص لاتكون "خليجي "

-الباص يجي كل 30 دقيقه طبعا جوني السواقين ويزامرون ويقولون لك ان الباص مايجي وهم نصابين

( اثبت يابو خلجه لايهزك ريح )



-انزل بنص المدينه ميدان جميل وكله محلات وخذ لك شريحه جوال بنصف قيمه مبيعات المطار



-استخدم اوبر .. اعلى مشوار داخل باكو ماياصل 15 ريال

(طلبوا 250 ريال شريحه وتاكسي من المطار )

اختصرتهم الى 65 ريال

(4 ريال باص و55 ريال شريحه و6ريال اوبرمن نصف البلد للفندق)



- الفنادق رخيصه لكن يغلب على بعضها وجود الملاهي الليليه المزعجه



-خل معك كاش يكفيك لاطلعت من باكو .. لاتبلش

لان مافيه الا دفع كاش والريال السعودي ماراح تلقا احد يقبله خل معك دولار امريكي واصرف من المطار اول ماتنزل (عملتهم اللي يكفيك يومين ثلاثه ) لين تضبط امورك



-صراااف الراجحي يشتغل هناك للطواري .. ابو رجح عابر القارات

-باكو تحتاج منك يومين بالكثير .. ليس هناك مايميزها .. سوى المدينه القديمه وهي مكان يستحق الزيارة



-مطعم فيروز لايفوتك .. مطعم تركي ولايحبون العرب بس مشي حالك



- عند الشرطه اسمنا عربستان

-استاجرت سياره يوميتها حول 100 ريال بس موديلها 2010
لااااا تدور سيارات حديثه في باكو معظم سيارات المكاتب من 2010 -2012



-يقولون لك تامين شامل والغالب يكذب لكن البوليصه مكتوبه بالاذربيجاني فمالك الا توكل على الله وتاخذها وافحصها قبل



- اول مامشيت لفيت من تحت الكوبري واذا بالدوريه وراي وانا ادعس كأني ماانتبهت وهو يدعس وراي .. وانا اتلها لين لحم الصدام بالصدام وولع السفتي قلت ياولد مابدهاش .. وقف بس مع اني كنت اني مشغل شيله حماسية

مالكم بالطويله شد وجذب ويقولي انت عربستان قلت نعم

العلم يافلان قال .. مية للحكومه ( مخالفه) او 50 كاش لي

قلت لك ولا للذيب واعطيه خمسين ويركبني يمين بالدوريه ويوريني اللابتوب ويسوي لمخالفتي (ديليت )

- قوبا كمدينه كذبه كبرى ومافيها شي .. بعد الساعه 9 مساء لو تطلع من الفندق مافيه الا انت والدوريه برا



- سكنت في قوبا بفندق ماودي اقولكم انه بـ 30 ريال

-طلعت الجبل من الصباح التالي جوار قوبا .. ووصلت الى القمه .. مناظر جميلة جدا ..



- التنقل في باكو ليلا امن جدا .. حتى اني راجع من الستي سنتر لفندقي مشي حوالي 4 كلم نصف الليل عادي



-كل المصاريف اللي يذكرونها هنا في المواضيع غير صحيحه

باعتقادي المسافر المنفرد لو حاول يصرف كثير مايقدر .. سياره وفندق ومعيشه ماتاصل كلها 300 ريال باليوم



- في طريقي لقوبا وجدت عائله اصولهم تركيه واركبتهم ( مراد وزوجته وبنته ) ويسولف علي بالاذربيجاني ويحاول يكون لطيف وانا اقوله يس يس والله مااعلم وش يقول

-يعرف ابوظبي لاني قلت له اني اماراتي

- شغلت له شيله (يافاطمه ) الاماراتيه ويحسب انها اهازيج شيعيه واستانس يقول اااه فاتيمه

المهم عزمني على الشاي يوم نزلته وحلفت ومشيت

-لاتدور مساجد في اذربيجان الا ماندر وبين كل مسجد والثاني كيلومترات .. اذان لاتدور .. واللي على الطرق مافيها احد يصلي



- من ضمن نقاط الجذب السياحي الخنفشاريه في قوبا :

ساحه الشهداء >>> في الحقيقه انها مقبره ههههههه
مسجد مسعود مدري وش اسمه>>>> مسجد قديم عادي جدا



بالعربي بيحطون فيها سياحه غصب ..

قلت لاحدهم وانا في باكو اني متجه لقوبا فضحك يدري ان مافيها شي



:::::::::::
البلد رخيص جدا جدا للي يدور الخيارات الرخيصه

الفنادق متوفره وباسعار رمزية جدا وفيه خيارات ارخص

للهوستلات -اللي يحب يخالط الاجانب - لكن معظمها

مستواها نازل

​

 

[دعاءء]

مكتب التاجير حاولت اخذ من اللي سمعته زينه

وبقوقل مابس عليه لايكات واراء جيده والا فالمستندات واضح
انها خنفشاريه .. لو تسوي حادث لاسمح الله ممكن تبلش معهم

لان مافيه اوراق واضحه .. مكتوبه بلغتهم وبالروسي ومعها ورقه خارجيه

ترجمه عربيه سقيمه

:::::::

وجدت سائق اوبر يعرف انجليزي بطلاقه فقلت له اني استاجرت سياره وانها
مومنه قال غير صحيح ماعندنا في اذربيجان تامين شامل .. قلت له لقد شرحوا لي واشاروا
لختم دائري على الزجاج الامامي قال هذا تامين طرف ثالث اما شامل مافيه

وكان يظهر من كلامه انه صادق ...


-يطلبون رخصتك الدولية



-المكاتب ياخذون تأمين كاش بالدولار .. اشترط عليهم انهم

يرجعونك لك فوريا في حال اعادتك للسياره حتى لايقولك يومين او ثلاثه ونرجعه لك
خاصه ان كنت ستسلم السياره يوم سفرك ..



انا طلبت احد يتكلم انجليزي وقلت له انا اعرفك انت مباشرة

وتضمن لي الاعاده الفوريه فوافق على مضض بعد ان ذكرني

قائلا اننا بلد اسلامي .. قلت الاسلام خابره بالسعوديه اهم شي

تصدق في تعاملك

لكن باختصار القياده لديهم امنه جدا .. والطرق السريعه السرعه فيها معقوله جدا

وليست الطرق مزدحمه



- اللي يسافر لاي بلد ( دركسونهم يسار) ولا يستاجر سياره فهو مضيع متعته







​

 

[دعاءء]

سر :

دائما اجد معارضه وعدم تصديق من البعض في عرضي لمصاريف

رحلاتي ..لأن جماعتنا ثقافتهم استهلاكيه ..



لا احب اهايط واجيب كلام خنفشاري وارقام فلكيه للمصاريف حتى اكون كشخه
اني شخص عادي جدا ورحلاتي لله الحمد محافظه والفنادق نظامي فيها اهم شي
فندق نظيف وهادي
-احسن عندي من الفنادق الكبيره الصاخبه -



لذلك كل مره لما اقول للاصدقاء والزملاء عن ميزانية السفر الاقي انتقاد وتشكيك باني اقلل من الرقم



ليست المتعه بالسفر بالتكلفه ​