السلام عليكم
اول شئ شكراً لهذا الصرح الي استفدت منه كم معلومة وعشاك كذا تحمست اكتب تقرير مختصر عن رحلتي
كرد للجميل ولعل احد يستفيد من تجربتي زي ما استفدت من تجارب البقية
رحلتي كانت فجر يوم السبت 16 ديسمبر على الخطوط السعودية مباشرة
والعودة صباح يوم الاربعاء 27 ديسمبر على الخطوط السعودية مباشرة
الطيران كان عادي جداً وطيارة صغيرة مثل الطيران الاقتصادي ثلاث ركاب على اليمين وثلاثة على اليسار
في الذهاب كانت الطياره شبه مليانه والعوده مليانه
استغربت في الذهاب أن فيه نسبة كبيره من الهنود أو البنغالية مسافرين قروب بعوائلهم
ولا فيه اي سعودي غيرنا
مدة الرحلة تقريبا 6 ساعات
الذهاب والعودة
الرياض - ميلان
ميلان - الرياض
خطة الرحلة
يوم الوصول ميلان ثم ناخذ السيارة وننطلق لكومو نجلس ليلة ونطلع بعدها للبندقية
جلسنا ليلتين ثم الانطلاق الى فلورنسا ايضا ليلتين ثم مرينا بيزا ساعة زمان
متوجهين الى بورتفينو
بنجلس فيها ليلة لكن السكن كان في ربالي تبعد 20 دقيقه عن بورتفينو ثم باقي الايام في ميلان
أول ما وصلنا ميلان اظاهر ماكان فيه الا رحلتنا ورحلة معنا فاضية الجوازات وما طولنا وحتى الشنط على طول وصلت
كانت الخطة باخذ شريحة من المطار وثم اخذ السياره لان حاجزها من موقع SIXT كان عندهم عرض تخفيض 20% وتدفع عند الاستلام وقابل للالغاء في اي وقت
مع ان مواقع التاجير زي رينتال كار وكايك وغيرها تطلع لي ان فيه سعر ارخص لسيارات وعن طريق شركة SIXT الا اني قلت اتعامل مع الشركة اضمن لي واوضح لان قد استاجرت عن طريق هالمواقع ويوم وصلت طالبوني ادفع مبلغ تامين على السيارة يقولون مانقبل تامين الشركة خلهم يرجعونه لك
دورت محل اتصالات في المطار ماحصلت لكن سالت مطعم هناك يتكلمون انجليزي مكسر زي محدثكم
وقالوا لي تحصل شرايح عند محل تبديل العملات ويوم رحت حصلت عنده شريحة فودافون عندهم عرض
بس 45 يورو شريحتين وحده نت بس والثانيه نت واتصال وحده فيها 10 جيجا والثانيه 8 جيجا
لكن اشك في كلامهم لان فيه وحده من الشرايح على طول خلصت الثانية كنا نشغلها للضروروة بنبحث عن لوكيشن ولا نشغل سناب شوي ونصور
يوم خذت الشريحة قلنا خل ناكل لنا شئ دامنا خلصنا امورنا .. خذنا لنا كوروسان وقلنا لهم نبي كوروسان مع جبن بدون لحم وخرابيط و
والمدام طلبت لاتيه <<< يوم وصل انصدمت وهي انصدمت من اللاتيه
طلع اللاتيه عندهم حليب ساه .. فلازم تقولهم لاتيه مع قهوه فيسوون لك حليب ويصبون عليه شوي قهوه
وصراحه كنت متخوف من ردت فلعهم وتعاملهم مع الاجانب واللغة لكن طلعوا زي العسل
عاد استلام السياره واضح تتبع لوحة ايجار السيارات والباص نفس الطريق في الدور الارضي
وحصلت شركة سكست لحالهم لهم مكتب كبير تحت واضح خلصت اموري وخذت السيارة
هنا بدت اللخمة
حركت السيارة يوم جيت اطلع حصلت بوابات ماتفتح الا بكرت، وفيه كرت معي ادخله يقول غلط
واجرب بوابه ثانيه نفس الشئ ..
الا رحمه من ربي جت عاملة تنظف ماتفهم انقليزي اشرت لها وخذت الكرت وعلى طول فتح
طلع المشكله فيني مدخله مقلوب
طبعاً السيارة فيها شاشة ونفقيشن انجليزي فما يحتاج تطلب منهم جي بي اس شيك على السياره لاجيت تطلبها وشف مواصفاتها عشان لاتخسر عمرك
واصلا انا محمل خريطة اوف لاين من قوقل ماب لايطاليا
وانطلقنا بحفظ الله نتبع الخريطتين عشان نتاكد ان الوصف صح
والحمد لله الامور تمام لكن الي موب تمام ان العالم طايره وانا مهدي ما اعرف كم السرعة القصوى
وودي اسرع مثلهم وراي 40 دقيقة على ما اوصل
بعد مسافة جتنا بوابات كثيرة
وش السوات يا ام محمد ..!! وين نروح معه بعضها عليها علامة قروش وفلوس وشي اسفر ومكتوب تيلي باس
وانا اذكر اني دافع من ضمن الرسوم ضريبة طريق.. قلت بدرعم مع الي تيلي باس الي بدون بوابه
وتوني معدي الا تولع اشارة حمراء وتطقني الغلقة
من اول يوم يقفطوني .. واذكر دبي عندهم مخالفه كبيره على سالفة بوابات سالك لاتصير مثلهم
وانا قاري في تويتر قبل ان فيه واحد جته غرامه كبيرة وطول الطريق قافلة
جتني بوابة ثانية بس ما اذكر هو انا بس دفعت 2 يورو ولا اني خذت كرت
الزبدة سالفة هالبوبابات هي في الطرق السريعة لاجيت تدخل واذا جيت تطلع منها لازم تمرها وتوقف تحصل فيه كرت طالع تسحبه وتمشي ولاجيت للبوابة الثانية
بتحصل فيه بوابات فيها كاشير وفيه بوابات زي المكاين تعطية الكرت او تدخل الكرت في المكينة ويطلع لك السعر في الشاشة وتدفع هلل ولا ورق واظاهر بعد فيه بطاقة بعض البوبات
طبعاً حط حسابك لهالبوابات من قطة السفرة اذا انت بتستخدم السيارة
اقل شئ 2 يورو او 1.70
ومره وصلت اظاهر 20 يورو
المهم يوم دخلنا كومو بدت الشوارع الي رايح جاي صغيره ويمينك البحيره بس انت فوق جبل
وفي هالمسارين يمشي معك سياكل ودبابات ومنعطفات فلازم تركز وفيه اشارات مؤقته يصير فيه صيانه فيجبرونك تدخل على المسار الثاني تعكس
ووصلنا الفندق اظاهر الساعة 11 وكان تسجيل الدخول الساعة 2 لكنهم ماقالوا شئ وكان كل شئ جاهز ومتعاونين وبشوشين وانا كنت ماخذ فكرة سيئة عن الايطالياً بسبب سمعتهم وسمعت الديرة
هذي اطالالة الغرفة .. خذنا لنا غطة ابو ساعتين ترريحة عقب الرحلة والخط
ثم طلعنا نتمشى في المدينة ونشوف وش علومها .. كنت متصور انك تمشي وتوقف سيارتك على اي رصيف
طلع فيه مواقف منتشره في المدينة طبعاً بفلوس والقريب زحمة واوقات ادخل مع طرق الناس تمشي فيها ضيقة والجي بي اس يقول طريقك صح لحسة مخ
في النهاية حطيت موقع مواقف ثاني على اساس انه ابعد من الاول وطلع قريب
لان المدينة اصلا صغيرة لكن الخريطة مكبرتها وقلت ليتني موقف من زمان في هذي المواقف بدال الفرفره
نظام المواقف تحصل في الشارع لوحة مكتوب بالازرق P وبعضها مكتوب تحتها كلمة بالاخضر معناتها متاح
تاخذ ورقة وبالساعة وقبل لا تطلع فيه مكينة تحت في المواقف تسدد وانت طالع تحط الكرت تفتح البوابة
المكينة ماتقبل اكثر من 50 يورو عملة ورقية لكن تقبل بطاقة <<- ماكان معي فكه بس 100 يورو وابيهم يفكون لي
في النهاية استخدمت البطاقة
كان وسط المدينة الدومو زحمة لانه صادف عطلة الكريسمس وحاطين اضاءه على الكنيسه والمباني الي جنبها عالم.. وقلنا بنجرب مطعم ممدوح لنا في هالساحة ودخلنا بنطلب لنا شئ يشبعنا ويدفينا
العالم اغلبهم شراب وانا دايخين نبي ناكل ونزبن من البرد
جاب المنيو ندور شورة ؟؟ قال مافيه واستغرب يوم سالنا
في الاخير طلبنا بيتزا وسلطة سيزر ومكرونه وكانت اول وجبه فعليه من ايطاليا
احس اني كثرت كلام .. خلني بكره ان شاء الله اكمل لكم باقي السوالف عشان لا اقلب راسكم ... يالله نراكم على خير
ثانياً أعتذر عن الاخطاء الاملائيه بسبب الاستعجال في الكتابة
ثالثاُ: بالنسبه للصور للاسف اغلب التصوير يكون فديو ولا صور بالسناب وتكون من باب مشاركة الاهل والاصدقاء باللحظات
نستكمل أ؛داث السفره، طبعاً رجعنا للسيارة وقلنا نمر سوبر ماركت نتقضى لنا خفايف ومويه
وبحثنا الا فيه كارفور واظاهر انه هو اشهر سوبر ماركت عندهم
الزبده وقفنا الموتر وبدينا رحلت البحث واول مادخلنا الا قسم الخضار وكل سفره لنا نمر محل خضار لازم ناخذ من عندهم (فندي ، يوسفي، يوسف افندي، اخو البرتقال
)
الزبده النظام اخدم نفسك بنفسك حتى الميزان، ونعبي كم حبه وتورطنا اشلون نحط التسعيره وحاولنا نراقب الي قبلنا وش يسوون في الجهاز
لكن للاسف هو عباره عن ميزان الكتروني وفوقه زي اللوحه فيها ارقام الى 33 تقريباً
كل واحد يحط الخضار او الفاكه ويضغط الرقم ويطبع له السعر والوزن
واناظر الخضره الا كل نوع فوقه كلام وسعر ورقم وقلنا نجرب بعض الارقام
مرتين كل مره يطلع لنا سعر غير سعر الكيلو المسجل
في الاخير ام محمد قالت جرب هذا الرقم ونجرب الا ضبط وتنفسنا الصعدا مشتهين الفندي وقتها
ثم جلسنا ندور خبز طبعاً كل مرحله نشوف اهل الديره وش يسوون ونقلدهم
المشكله اهل الديره يشترون خبز بالكيلو بعد
والمشكله ناشف مدري وش يحبون فيه زي الخبز الفرنسي لكن اشكال واحجام
الى ان فتحنا عيونا وحصلنا قسم ثاني حق خبز توست وصامولي، وخذنا مويه
الشاهد جينا نحاسب .. وحاسبت الا ادور كيس بعبي اغراضي !!
واسالها وتطلع لي وحده من تحت .. انا قد سمعت انهم يحسبونها بفلوس بس ماجاء في بالي لكن ذولا يعطونك اذا طلبت ... وفي ميلان عطونا كين نايلون قلنا لهم نبي كيس ورقي احلا شكل عشان هديه قال لا هذا بفلوس
ورجعنا للفندق ميزته عنده مواقف خاصه فيه مجانية واطلاله مباشره على البحيره لكن يبعد عن مدينة كومو تقريبا 20 الى 30 دقيقة وسعره يناسب فندق حق ليلة نوم بس
لكن عيبه اثاثه قديم وكان بررد التدفئة فيه وسط ..
Ristorante Hotel Villa Belvedere
يوم اصبحنا نزلنا نفطر طبعا اغلب فنادق ايطاليا الي تعاملت معهم الفطور ينتهي على 10.30 الى 11 اخر شي
الفطور كان بسيط جداً جبن عسل مربى فواكه كورنفلكس بيض مسلوق او مفيوح الي تسمونه كوروسان
تبي اومليت تدفع زياده .. اطلالة مطعمهم راايق ومودرن واجهه قزاز كامل على البحيره
الصوره من قوقل لتوضيح الصورة
رتبنا شنطنا عشان نسجل خروج ونمر عاد المطل على البحيره ثم نروح للبندقية
واستعدينا للرحيل .. لكن فيه شئ نسيت اقول لكم عنه يمكن تضحكون
أم العيال راعية قهوة عربية وقبل لا نسافر مرتبه العده ومتحمسه ومجهزه الترمس والمعاميل والتمر السكري المجروش
الشاهد تقهوينا في الطيارة وكيفنا .. وعاد يوم جاء صباح طلعتنا من كومو عشى اساس بتضبط لنا قهوة عشان الخط طلع الفندق مافيه غلايه
وش الطريقه ورانا خط ثلاث ساعات وحسوفه القهوه وطلع ناسين غلايتنا ماجبناها الحين وش السوات !!
المعزبه الا تبي قهوه قالت قلهم يصلحون لنا عطهم الطريقه ولا قلهم انا بصلحها ..
والله واروح على استحياء واشوف لي ذاك الخال الشقردي واساله وحاولت افهمه وراح كلم الشيف حق المطبخ وقال ولا يدخلون زينها لهم في البار زي مكينة الكبتشينو
اخترع
وفيه موظفة الريسيبشن حاولت في الشيف لكنه مصر مافيه مالكم الا البار وقالت للخال الشقردي ضبطهم
والله يطلع لنا بريق ويحط لنا فيه مويه حاره شوي وحطينا القهوه وجلس ماسكها يسخنها بالبخار شوي شوي
لوني مكانه قلت له توكل على الله ذي شغلانه .. لاكنه شقردي جعل ربي يهديه ويسلم
وفي النهايه طلعنا بقهيوه مقبوله تنشرب
وانطلقنا للمطل فيه له طريقتين عشان تطلع له
يا قطار مخصص للمطل ولا تطلع له بالسياره وفيه مواقف فوق
انا قلت بروح بالسياره ودي اتمشى في الديره ومره طلعت بالتلفريك في تركيا وتحسفت قلت ليتني مشيت بسيارتي احلا
لكن هالمره تحسفت لان ايطاليا شوارعها وسخه تخيل تطلع جبل بشارع رايح جاي مايتحمل الا سيارتين وبعض الاماكن سياره وحده وفيه منعطفات خطره جداً ومافيه حاجز الحاجز شجر وحاطين ماصورتين يقالهم حمايه وهي لاتغني ولا تسمن من جوع
يوم طلعنا فوق فيه مواقف على حظنا كانت مجانيه لانه يوم السبت او الاحد
,فيه مقاهي تطل على البحيره من فوق الجبل المنظر جميل وانت تشوف الجبال والبحيره
ماطولنا ثم انطلقنا الى البندقية فينيسيا بلد العشاق على قولتهم
لكن فيه واحد كان مقفل والثاني ما انتبهت له فدخلت لهذي المواقف
Garage San Marco Venezia
واتوقع انهم موحدين السعر للمواقف القريبه .. هي عباره عن مواقف ادوار اول ماتدخل من البوابه يستقبلك واحد يعطيك ورقه ويقولك اي دور تروح له .. واذا وصلت للدور بتحصل واحد ثاني يستقبك يسالك كم بتجلس ويسجل على الورقه شئ مدري وش
لكن من خلال اطلاعي عن المواقف انهم يقولون لك خل مفتاح السياره في السياره اذا نزلت لان احتمال انهم يحركونها في اوقات الزحمه ويرصون السيارات قدام بعض، بس على وقتي كان فيه مجال ولا قالوا لي شئ
وصولنا كان على المغرب وبرد ومعنا ثلاث شنط
ادري ان كل من راح يحذر من كثرت الشنط بس وش نسوي خفت اخلي شئ في السياره
وقلت باخذ تاكسي اسرع ويوصلني للفندق مباشرة وكنت متوقع ان الفندق له باب على القناة المائية لكن طلع هو يطل على قناة صغيره لكن ماله باب ولا تدخل التكاسي مثل هالممرات
طبعاً التاكسي مكتوب لوحة انهم موحدين السعر لكن يمكن في المواسم الميته انك تكاسرهم
واذا انت منتب مستعجل ولا وراك شئ بينزلون لك
انا خذت التاكسي الى وسط المدينة القديمة ب 60 يورو .. طبعاً موقف التاكسي جنب موقف الباص مكتوب عليه TAXI
الحساب كاش مافيه بطاقة
وصلني لاقرب موقف باص جنب الفندق وانا اختياري للفندق كان جنب موقف الباص دقيقتين مشي الا انا عند الفندق
الجندول ماتقدر تاخذه من مواقف المطار او مواقف التاكسي له مواقف خاصه حول المدينة وكل موقف له جوله خاصه فيه، انا غلطت واستعجلت وخذت جندول جنب الفندق وخذ بي لفه في الممرات المائية لكن توقعته بيوديني لجسر التنهيدات وجسر مدري وين لكن طلع بس يلف للممر المائي الي حول موقفه
ادري خشيت عرض بسالفة الجندول بس لاني كنت اسال عنها هل الجندول يوصل من المطار للفندق بحيث اخذه مره وحده ياخذ بي جوله ويوصلني للفندق ولا لا
طلع مايوصل زي ماقلت له جولات مدوده وحده تقريبا 30 دقيقه واشك اتوقع اقل ما حسبتها وفيه اطول لكن اغلب العالم ياخذون ام 80 يورو الي هي 30 دقيقة
وحتى الجندول قابل للمكاسر وبيقولك السعر موحد وبيوريك لوحه لكن في غير المواسم واذا شافك صامل بيقولك تعال انا خذته ب 60 يورو مرتين ومن منطقتين مختلفه لكن ماركبته الا مره وحده لان المره الثانيه ماكان معي كاش وقال ما اقبل الا كاش
ونكتفي بهذا القدر اليوم ونكمل لكم ان شاء الله بكره ولا بعد جولتنا في البندقية وتصوري عنها
نشوفكم على خير
نستكمل جولتنا ..
وصولنا للفندق كان تقريبا على العشاء كنت حاجز عن طريق موقع الفندق
وهذي معلومه طلعت لي بالصدفه
أنا عندي طريقة لاجيت احجز اول شئ اروح لموقع بوكينج <-- دعاية غير مدفوعة الثمن
ثم اقراء التعليقات اذا شفت كثير يذمون ربعنا والاجانب اخليه واروح اذا والله فيه وفيه
اروح ابحث عنه في تريب ادفايزور واشوف كلامهم عنه<-- دعايه غير مدفوعة الثمن
ومنها اشوف صور المسافرين الواقعيه للغرف ودورات المياه والاطلاله
اذا والله ارتحت اكتب اسم الفندق في قوقل يطلع لي بقائمة بكم موقع عارضينه بالاسعار <-- دعاية غير مدفوعة الثمن
ثم اشوف ارخص سعر واقارنه مع بوكينج طبعاً اقارنه قابل للالغاء وغير قابل واذا كان قابل للاغاء الى متى قابل بعضم نصابين يقول بعد 14 يوم من تاريخ الحجز تقدر تعدل وبعضهم قبل يوم من الوصول
الشاهد في البندقية وميلان طلع لي الحجز عن طريق موقع الفندق ارخص من كل المواقع بفرق 100 ريال تقريبا وميلان اظاهر 300 ريال
وزيادة على كذا عطوني تسجيل متاخر زيادة ساعة عن الوقت العادي الي هو 11 انا خلوه لي الى 12
وحاطين لي هديه قناع بالقماش وحلاو ومغناطيس فنيسيا حق الثلاجة
كل ديره نروح لها ناخذ لنا واحد ذكرى
نرجع ونذكر سبب اختيار الفندق انه قريب من الساحة وقريب من موقف الباص والفندق فيه مصعد ومقبول نوعا ما ويكون على ممر مائي ومطل
لان اغلب الفنادي اشوف اثاثها قديم جداً واسعارها ميب رخيصه على شكلها
في الصور فمدري هي مقصوده ولا هي اصلا قديمه وفيه فنادق بدون مصاعد
دخلنا الغرفه كان ديكور قديم كلاسيك مرتبه ونظيفه لكن الاثاث طرازه قديم وانا صراحه احب المودرن
فتحت الاطلاله بشوف عساها تجوز للمعزبه
الا طلع ممر مائي ضيق لوني ماخذ فندق ثاني ابعد ويطل على ممر مائي كبير احلا وافضل
فيها شرفه صغيره بس لازم توقف عشان تتفرج
اسمه
Hotel Ala
سجلوا الدخول بسرعة وشالوا الشنط لنا الي وصل الشنط كان ينتظر مني شيء لكن للاسف مامعي فكة
وسويت نفسي ما انتبهت له وجلست اتفقد الغرفة
وخذنا لنا جوله سريعه عشان ناكل لنا شئ قبل ننوم
اول ملاحظة لاحظناها على الديره انها صغيره على طول وصلنا للساحة والمدينه قديمه جداً وتقول مهجوره
مزينين الممرات بالاضاءات والناس تتمشى ومبسوطه لكن برد
يوم وصلنا للساحه كانت المحلات اغلبها مقفله كئابه
رحنا لمطعم الا مكتوب توه فاتح الساعه 7 الليل
لان زي ماقلنا عندهم نظام يقفلون العصر ويرجعون يفتحون بعض المحلات
جاب المنيو ونفس الشئ سالنا عن الشوربه وقال ايه فيه ويوم شفتها في المنيو هي عباره عن مرق خضار موب شوربه شوربه
تعشينا وحمدنا الله وقلنا شكل ذا الديره نهاريه يبي لنا نصحى بدري ونشوف وش وضعها ودايخين من صباح الله خير نفتر وماسكين خط وبرد ولا فيه مطر
رجعنا للفندق وعينا من الله خير ويوم اصبحنا وافطرنا في الفندق
طلعنا نستكشف المدينة في النهار
كنا حاطين في البال ان المدينة كبيره وتضيع ودواعيس
لكن فعلياً هي صغيره وصح ممرات لكن في النهاية بتطلع على شئ واضح وبترجع
يعني خلال يومياً احس اني عرفت اهم المناطق واقدر ارجع للساحه ولا الفندق بدون قوقل
هذا جسر التنهيدات الي يقولون انهم سموه كذا لانه اخر ممر للمحكوم عليه بالاعدام يمرون عليه قبل السجن او الاعدام طبعاً انا كنت متصور انه جسر ضخم وعالم عنده طلع صغير وبعيد عنك لانك توقف على جسر ثاني فوق الممر المائي
طبعاً الحياة فرقت النهار عالم يخترشون خاص سياح شرق اسيا
قرووبات مليانين
ولاحظت في الساحات في كل مدن ايطاليا بنجاليه شغالين يبيعون العاب ولا مظلات وخاصه في ساحة البندقيه معهم حب يوكلون الحمام ويجون يحطون على راسك ولا يعطونك بيدهم عادي عادي ويضحك ويقولك حبيبي ولا السلام
واذا خذت وخلصت وقلت وصورت جاك قال هات كم يورو
انا اعرف حركاتهم لكن شفتهم يقولون لوحده صينيه هاتي وعطتهم حول 10 يورو
ويوم مشينا شوي لقيت محل يبيع نفس الكيس معه كامل ب 2 يورو
انا يقهرني الي كذا يستغفل العالم
فيه شارع اغلب المحلات فيه ويوصلك من ساحة سان ماركو الى جسر Rialto Bridge
كله سياح
وفي هالممر المائي الي عليه الجسر فيه مطاعم ومقاهي جلساتها على الممر المائي ماجربت ولا واحد فيهم لكن غالبا كل اكلهم نفس الشئ واغلب وجباتي كانت اسبغتي مع ماكولات بحريه <<-- عاجبتني
ومن خلال جولاتنا وبحثنا عن مطاعم
بعض المطاعم او مقاهي نحصلها مقفله وكاتب ورقه عليها
المحل مقفل من يوم كذا الى كذا اجازة
اغلبهم عشان الكريسمس لكن الفنادق في بعض مدن ايطاليا زي كومو وبورتفينو يقفلون ثلاث شهور بسبب موسم الشتاء
الي يبي برجر اظاهر مافيه الا هارد روك كافيه هم الي عندهم برجر وبطاطس مقلي
كثير من الناس تقول لاتتقضاء من البندقيه لانها غالية
لكن من خلال جوله سريعة طبعا موسم تخفيضات ، زي زارا مثلا اسعارهم ارخص من السعودية مع الضريبة بعد حتى ان المدام حصلت كوت شاريته من الرياض قبل تسافر وحصلته هناك نفسه اخوه مع الضريبه يفرق 400 ريال تقريبا
لكن فيه محلات اسعارها مبالغ فيه زي مثلا سالت عن بلوزه او كوت ناسي سعرها 4000 يورو
محل صغير فتحه وحده زي البوتيك ولا نعرف وش الماركه
طبعا مارحن لاي متحف مالنا مزاج اغلبها كنايس ولا تماثيل ومجسمات ميب جونا
وبالنسبه لي عشان مافيه مطر كل المدن الي مريتها الى الان تعتبر عاديه عشان مافيه مطر ولا سحاب
المهم مرينا لنا مقهى في الساحة ساحت سان ماركو ومافيه الا ثلاث مقاهي وواحد منهم مطعم
وكلهم نفس الطراز وكلهم عندهم جلسات خارجيه على الساحة
المهم هذا زحمه وطرازه قديم جداً لكنه مكتوب لان جلنا داخل وموب شين لكن مقاهي ودبي والرياض احلا منه بمليون مره
ورحنا له مرتين نحلي فيه ماعندهم اكل يقول انا مقهى فيه سناك ساندويش وكذا
Caffè Florian
هذا اسمه
فيه صور بس في الكاميرا لبعض مناظر البندقية لكن يبي لي افرزها ولا عندي فوتوشوب اضبطها
لكن الجود بالماجود
ورجعنا للفندق لان في اليوم التالي بنسجل خروجنا وننطلق لفلورنسا
كنت شايل هم الصباح كيف برجع للمواقف خاصه ان التاكسي سعره مبالغ فيه لكن في النهايه قررت اني اخذه عشان الشنط وعشان المعزبه راحمها ماودي تسحب معي هالشنط
رحنا لموقف الباص الي نزلنا فيه التاكسي اول ماجينا واسال الايطاليين مافيه تاكسي طبعا هم مكسر الانجليزي عندهم اردى مني
لكنهم فهموني اني احصل في ساحت سان ماركو وبعيده علي بالشنط هم كانوا ينتظرون الباص
في النهاية قررنا نركب الباص مشوار نسحب الشنط ونجرب
سالتهم كيف اوصل لمواقف السيارات ووريتهم على قوقل وشرحوا لي بالي يقدرون عليه وفهمت
وسالتهم عن التذاكر قال تشتريها من الباص نفسه
طلع الباص سهل اذا قريت الخريطه تعرف وين يوصل فيه مسارات الوان وارقام
والله وانتظرنا الا جاء الباص عباره عن قارب كبير ركبنا وركبنا العفش وشريت تكت من موظف الباص الي يفتح الباب ويقفله يعطيك تكت لمدة 3 ساعات بعده يصير غير صالح لازم تشتري غيره ب 7.5 يورو
يمشي ويوقف محطه ورى محطه يمين يسار ومسجله في مقدمة الباص داخل المحطات
وبالنسبه للتذاكر مايدققون لكن الي فهمته انهم يسوون جولات فجائيه بين رحله ورحله على التذاكر
ووصلنا اخر محطه وخذنا السياره والدفع يكون قبل لاتاخذ سيارتك او وانت ناظل توقف وتدفع وتمشي
فيه زي الصرافين موجودين تحاسب كاش ولا بالبطاقة وفيه اظاهر مكينه الي تبي
اعذروني جالس اكتب بسرعه لاني مستعجل ومتحسف امسح واكتبه مره ثانيه
البندقيه في الصيف اتوقع يوم واحد من النهار الى الليل يكفيها تفرها لكن في الصيف اتوقع فيها روائح بسبب المويه والممرات الراكده وفيه بعوض لان في الفندق محطوط تحذير وحاطين لنا صيادة بعوض اذا تبي تشغلها
حاول ماتكثر اغراض اذا قدرت
الجندول حاول تاخذ جوله على المدينه ثم تختار وش تركب
اغلب المحلات يتعاملون بالبطاقه عادي
الامن في تصوري ممتاز في وقت سفرتي
نستكمل باقي الأيام لكن للاسف ما اوعدكم بالصور لانها قليلة جدا جداً وكانت زي ماقلت سنابات
طلعنا تقريبا من البندقية على نهاية العصر وانطلقنا لفلورنسا Florence
الطريق بالسياره تقريبا 2.40 الى 3 ساعات
كان الطريق كل ماننزل جنوب يبين العشب والخضار لكن في الشمال كان كل شئ بني لكن الجبال البعيده
روعه فوقها ثلج
ومرينا مزارع واطرقتهم حلوه مافيها حفر لكن من البندقيه لفلورانس اظاهر كان مسارين الايسر طايرين والايمن شاحنات والشيبان الي يمشون على مهلهم والخوافين مثلي
يوم خذنا لنا مسافه قلنا خل نوقف ناخذ لنا تصبيره ومويه ونطلق رجولنا وتوابعها
انا مدري توفيق ولا كل محطاتهم كذا حلوه مرتبه
تحصل السوبر ماركت فيه قهوه ومطعم صغير مرتب بيتزا وساندويتشاتهم الي لحم وخرابيط
ودورة مياه وانتو بكرامه نظيفه مجاناً
وحده من المحطات حصلت واي فاي مجاني بعد
واتوقع الطريق في الصيف بيكون ممتع جداً انا للاسف ماقد رحت لاوروبا في الصيف كل رحلاتي شتويه
يوم اقبلنا على فلورنسا انا ماشي على جي بي اس السياره
دخلنا مع طريق ثم نشوف لوحه اجباري يسار وهو يقول سيده .. ايووه بدينا اللخبطه هنا
ونشغل ال3G نستعين بالشيخ قوقل
طبعاً الطريق مسار واحد ماتقدر توقف الا واروح يسار على ما يشتغل قوقل ويعطينا العلم
الا نشوف حق السياره يقول طريقك مضبوط وامشي معه الا قوقل اشتغل ثم يقول نفس طريق السياره تطمنت
شوي جاني تقاطع فيه لوحة وجنبها اشارة والجي بي اس يقول على طول ووراي سياره وخلفها دوريه شرطة
المعزبه تقول شف الجوال وانا عيني على المرايه واللوحه ليش لمبه حمراء !!
حتى ما امداني اقراء وش مكتوب الا واسيد شوي اشوف الي وراي موقف والعسكري يكبس عليه النور العالي يبيه يحرك .. انا هنا تورت قلت صادوني
وحاولت استعجل شوي بس مابي الفت انتباه اني منحاش
الا يصادفني دوار فيه اشاره واوقف غصب وتجي الدوريه نفسها وراي
واعمل نفسك غبي الى الان كاد المريب ان يقول خذوني
وحركنا الى ان دخلنا في المنطقه القديمه ووحركت ناس على رجولهم وطبعاً الفندق مرسلين لي هالنقطه
وقريت عنها في المواقع انك لاتستغرب من موقع الفندق عادي تمشي بين الناس
وماشي على الخريطه الا ادخل مع سكه وفجاءه شرطيه تاشر بيدها
وش تبي ذيي صادوني
المشكله الجي بي اس وقوقل كلهم يقولون وصفك صح قلت مالك الا وضع اعمل نفسك غبي
وانا اصلا ضايع من جد
ويوم وصلت عندها قالت هنا عكس مسار واحد ارجع
ثم قلت اهاا طيب وين ذا الفندق ووريتها الجوال قلت ذا الفندق وينه ناظرت ورى قالت هذاك هو
الي مبين في الصوره جنبي
طاح قلبي وقلت الحمد لله اوووف
وانزل بسرعه للفندق واقولهم معي سياره لان هم قالوا لي نقدر نوفر لك موظف المواقف للقراج الي جنبنا يجي ياخذها منك من عند الفندق ويرجعها لك لابغيتها
طبعا المواقف دقيقتين على امتداد الشارع وانا متعمد احجز هذا الفندق عشان المواقف جنبي
Hotel della Signoria
تعاملهم حلو وصارت لي معهم نفس سالفة القهوه في كومو
غلايتهم الي في الغرفه متعبه تغلي المويه ثم تطفي الى ان تبرد ثم تشغلها فماتصلح للقهوه عشان تقلب
فضبطوني بس موب مثل خوينا في كومو الخال الشقردي
والفندق زي نظام ibis تقريبا
اثاث مودين وغرفه حلو حجمها بالنسبه لزوجين لكن مافيه اطلاله وقريب من الاماكن السياحيه
وصلنا اظاهر الساعه سبع او ثمان وجوعااانين لكن قلنا نصلي وننزل اغراضنا ثم ننزل ناكل شئ
يوم نزلنا الجو كان ادفا من كومو شوي مقبول لكن جوعانين واشوف قوقل ابحث عن مطاعم الي نبيه مكتوب مقفل وقلنا خل نمشي نشوف الي يجوز لنا ندخله
وصلنا اقرب ساحه لنا تبعد خمس دقايق مشي الا نشوف مطعم مرتب فيه الويتر او الجرسون يرتب الي على الطاولات قربنا بنشوف المنيو الا يقول قفلنا خلاص
تونا طيب ووين تقفلون الحين
الا الي عقبه واحد يرتب واول ما قربن الا يجينا تعالوا كل شئ عندنا قربوا وفيه جلسات داخليه الا تبون ادفاء
ناظرنا بعض وانا جوعانين ولا فيه حل خوفك يقفل هو بعد
قلنا يالله ويدخلنا للقبو
قلت في نفسي هذي اولتها اخر الليل عندهم وقبو .. توكلت على الله
يوم نزلنا الا لقينا فيه عائله متحجبين لكن موب من جماعتنا اظاهر باكستانيين ولا هنود الزبده مسلمين
تطمنت شوي دام معنا مسلمين اهون لا يجتمعون علينا
ويجيب المنيو ونطلب لنا ذيك البيتزا المارقريتا وذيك الاسبغيتي البحريه خويتي بس اهم شي مافيه اي نوع من اللحوم الخرابيط خنزير بورك هام بيكن بابروني
وشغل لنا الواي فاي
شوي الي ورانا يطلبون واسمع ابوهم يقول للطباخ لاتحط واين ولا كحول ولا خرابيط
قلت ايووه انا اخبرهم يطبخون بالواين والموضوع فيه شبهه
يااا معلم ياا معلم تعال
شف انا طلبت بس اكد على الشيف لا يحط لنا من هالخرابيط بعد في الطبخ قال ايه ايه سمعت ذوليك ابشر ابشر وكان ماجاز له العلم
الزبده اكله دسسسسسم بس حلاته في البرد يشبع ويدفي وتصلح للجوعانين لكن لو بروح مره ثانيه منيب رايح له
وبعد ماخلصنا طلبت الحساب وجاب الفاتوره وقالي هذا الحساب والاكراميه اذا ودك على كيفك حط الي تبي وعطاني ذيك الابتسامه طبعاً عطيته الحساب ورقة 100 ورجع الباقي وانا اتابعه وعطاني مثلا 10 يورو وباقي 3 يورو مفروض يعطيني 13 بس يوم عطاني ال 10 قال اوكي مع ابتسامه خايف اقول له لا قلت اوكي
الصراحه ماكنت بعطيه بس عشانه زبنا في وضعنا هذا قلت دفعت بلا وانبسط وقال ماقصرت وبردها لك في الجايات والي تبي انا جاهز <<-- خروج عن النص
وعينا من الله خير وعبينا بطونا ثم اتجهنا للبيت الا كل المحلات قفلت لكن فيه ناس تتمشى والي تلعب وتضحك والممرات مزينه باللمبات عشان الكريسمس فالمدينه صايره حيه حتى في الليل وونيسه لكن دايخين وفينا نوم قلنا نرجع ننوم والصباح رباح بنجلس يومين لاحقين نفرها
وان شاء الله بكره نكمل حديثنا عن فلورنسا وبحط لكم كم صوره ورايي في هالديره
نشوفكم على خير
واطلع فوق للدور اظاهر 6 وصاير اول ماتدخل فيه موزع وفيه قزازه كبيره تشوف البار او المطبخ واشوف وحده تكلم قلت شكلها جالس تشرح لها الله يستر بس زين حرمه اهون شوي
واروح لها واعطيها نفس الابتسامه
معليش بنتعبك معنا شوي بس تعرفين الخرمه
قالت اسمع شف تدخل المطبخ معصي <--- اظاهر شكله من البلديه ممنوع احد يدخل المطبخ من غير العاملين لان كلهم يعييون
قالت ياولد العرب ترى علمك غانم وما طلبت شئ <-- كاني فليتها لا بس الله يصلحها ويهديها ماقالت شئ قالت ابشر بس انت علمني خطوه خطوه انا بشب على الفرن وانت علمني
طبعا كلهم يتوقعونها زي قهوتهم الا واحد شكله معلم قهوه قالي هذي زي القهوه التركية تحتاج طبخ وتطلع لها رغوه بس ذا بيجيكم علمه الايام الجايه
والله واطلع جوالي واقول يامعلمه
شوفي هذا فديو مصوره للخال الشقردي من كومو وهو يضبطنا شوفي اشلون ضبط القهوه وسوي زيه اسهل
ميب صابره علي اخلي القهوه على النار 15 دقيق
الشاهد وبدت تسويها لكن الضعيف عورتها يدها من مسكت البريق قلت لها امسكه عنك قالت لا ولا تقربه
قلت بكيفك وكل شوي تقول يكفي اقولها لا وش يكفي دقيقتين تستهبلين يبي لها اقل شئ عشانك تعبتي خمس دقايق وكل شوي تناظر الساعه وتبين لي انها تعبت بس مع ضحكه
يوم شفت الوضع كذا تلميح قلت هاتي هاتي خلاص ماقصرتي المهم ريحة قهوه
وتقهوينا طلعت حليوه تمشي الحال
وبدينا مشوارنا مروقين ومكيفين وقلنا يالله هيا الى العمل
نبي الحين نفطر وين نروح .. الا اشوف في قوقل حولنا مقهى تقييمه زين قلت خل نشروح له
عندهم كوروسان واومليت وقريب
جينا نطلب كوروسان قلنا عندكم زعتر جبن لبنه سااده طيب
قالت لنا لا مافيه فيه مربى قلنا هات يالله
وثم جلسنا وطلبنا اومليت وعصير برتقال
اكتشفت ان الايطاليين يعشقون الجريبفروت
بس كل مطعم او مقهى تختلف فيه نسبت الجريب فروت مع البرتقال
لازم تقولهم برتقال ساده مامعه شي
وفيه نقطه ثانيه غريبه لاحظتها في هالمقهى وفيه مطعم ثاني في ميلان مايستخدمون مناديل عاديه
منديل رقيق مخلوط معه ورق بلاستيك زي الي يغلفون به الشاورما او الي يجي مع الدونات
ماله فايده
وخلال هاليومين من السفره لاحظنا الايطاليين يعشقون القهوه ويتقهوون وهم واقفين عند البارات كبار وشباب نفس الشئ مايجلسون
بعد ما افطرنا وروقنا بدت رحلت الاستكشاف وجلسنا نفر على رجولنا الديره صغيره وحلوه للي يحب المدن الي بالطراز التاريخي الحجري وممرات صغيره، ولاحظت عندهم محلات جلد كثيره للقلفزات والجزم وانتو بكرامه مدري هم مشهورين بها او وش
يوم ابعدنا شوي في المشي تعبت المدام قلت يالله نرجع بالباص
نظام التذكره اظاهر موحد في ايطاليا التذكره مدتها 3 ساعات ثم تشتري غيرها
دخلت بقاله قال مخلصه دخلت البار مدري مقهى قباله وخذت منهم تذكرتين بس ناسي بكم
هو بيورو ولا يورو وشوي في هالحدود
طبعا معتمدين على خرايط قوقل قال لنا اركبوا الباص الفلاني وتراه بيجيكم بعد شوي
والله وننلطع ولا جاء كل شوي باص وخوينا ما جاء وشفته وقف في موقف ثاني مقابل للي انا جالسين فيه
قلت يا ام محمد سرينا شكل الموقف غلط .. ومشينا وننتظر لحالنا
بس الشارع حركه وفيه طلاب مدارس وشكله اخر يوم مبسوطين ويتبادلون القبل عيني عينك
وثم جت عجوز تنتظر معنا تطمنت الحين ان فيه امل يجي خوينا ما مقلب بنا قوقل
والله وجاء وركبنا المشكله مدري وش نظام باصاتهم مع التذاكر انا اذكر فيه كرت تحطه على الجهاز فيه شريحه ذولا لا ورقه صغيره ورق
واركب واوري السواق التذكره ولا قال شئ وجلسنا وجلست اراقب الي يركبون في كل وقفه الا وحده ركبت وحطت التذكره في جهاز في الوسط يسحب البطاق ويرجعها لك هنا فزيت وسويت نفسي ابو العريف
وادخل تذكرتي وتذكرت المدام واجلس
ووصلنا للوجهه الي نبيها النهر عشان بنشوف الجسر المشهور عندهم ناسي وش اسمه
الزبده يعتبر معلم عندهم
الغريب مدري لي مايخلون العالم تنزل تحت بمحاذات النهر زي باريس فيه زي كذا مسوين زي الممر قريب من النهر ذولا فيه بس مقفل مدري ليه
الشاهد وصلنا جسرهم المنشود وطلع عنده عالم وطلع خرابه وهو كان اول جسر يربط بين المنطقتين وفيه مبني عماير على الجسر ومحلات وصغير في الصور كانه كبير
اغلبه محلات ذهب يمين ويسار وفيه مطل في الوسط حلو
وفيه مجسم عليه اقفال زي حقت باريس حقت الحب ويصورون معها الناس
ثم رجعنا قلنا نكم لفه في المدينه وناكل لنا شئ
ومدحو لنا هالمقهى هو حلو وجلساته حلوه على ساحه فيها ذيك اللعبه الي تدور الاحصنه وفيه ناس يسوون عروض .. وبتحصل كل جيرانكم الخليجيين موجودين هناك
نفس الحكايه ماعندهم شوربه وخذنا رزيتو وسبغتي بحري والمدام خذت عندهم حلا مشهور مدري وشو
فوقه بودره بنيه
صادف يوم زيارتنا للمدينه مدري عشان كريسمس او يوم وطني او حروب صليبيه الزبده سوو مسيره لابسين لبس عسكري قديم ويمشون مسيره الى ان يوصلون للدومو وكل شوي يضربون مدفع
كان هذا اليوم حلو تحس المدينه حيه وزحمه كانك في ملاهي موب مدينه من الحركة
وكانت الشوارع ونيسه حتى الليل ماتخاف لان كلن طالع يتشمى وحتى يووم قفلت المحلات
بس مدري هي طول السنه كذا ولا بس عشان وقت زيارتنا
حاولنا نفر كل شء عشان نحرك بكره بدري الى بيزا وبورتفينو نبي يكون الخط نهار ونشوف الدنيا اونس من الظلام
فرجعنا الفندق ورتبنا اغراضنا استعدادا ليوم غد
في ردنا القادم نستكمل صباح فلورنسا وبيزا وربالو وبرتفينو
أدري تاخرت في باقي الرحلة لكن صادف عندي شغل وإجازة مدارس <-- مالها دخل
عذراً على الانقطاع ..
نستكمل من حيث توقفت .. الي هو اخر يوم في فلورنسا رتبنا اغراضنا الليل عشان نصحى بكير ونفطر وننطلق الى بيزا وبورتفينو
نفس المنوال الصباح نضبط القهوه عند الحجيه لكن هالمره ماطولت لن من نظرتها حسيتها ماودها قلت سوي واحد قهوه سريع سريع ..
وتقهويت مع ام حمودي
وقلنا يالله ننزل نفطر فطور سريع وقبل لا نطلع من الفندق قلنا للاستقبال جهزوا السيارة ترانا ماشين..
رجعنا حصلنا السياره عند الباب وانا كنت مسوي تشيك اوت قبل لا اطلع والشنط عندهم بس باقي حساب المواقف للسياره عطيته الاستقبال وما ياخذون الا كاش لانه موب تبع الفندق خذوا علي يومين ب 50 يورو
وقلنا قبل لا نطلع من هالديره لازم وداعيه خل نروح للمطل حقهم
بالسياره تقريبا ربع ساعة اظاهر او ثلث
وفيه مواقف بالساعة عند المطل وفيه كم كوشك يبيع تذكارات واطلاله على المدينة كاملة حلو موب شين
واشوف في خرائط قوقل انه في الصيف يزيدون عدد المواقف .. وفيه باصات اظاهر توصل لهالمطل
وفيه ايضا حديقتين يمين ويسار لكن مارحت لها لان اتوقع في الربيع او الصيف تكون حلوه ومزهره الورود
وفيه مطعم او مقاهي في مكان اعلى من المطل لكنه خلف المطل اشلون اوصف
ماطولنا لان ورانا خط فقلنا بسم الله توكلنا على الله .. وانطلقنا
الان الوجهه بيزا نتمشى فيها ساعتين الى ثلاث ساعات مبدئياً واحتمال تزود
والطريق كان حلو مع انه شتاء لكن كنا نمر بمزارع حلوه مرتبه ومرتفعات وجبال كان فيها خضار عكس طريقنا من كومو الى فينيسيا فيه خضار وشجر وتشوف الكنايس تصميمها كانها مساجد لها منارات واضحه بين البيوت
وحاولت اقراء عن كنايسهم فيه بعضها يقولون كانت مساجد وقلبوها وفيه ناس تقول لا هم تاثروا بالمسلمين ذيك الفتره وبالمسلمين في اسبانيا الزبده منظرها حلو وهي فوق الجبل وحولها بيوت صغار .. جاني شعور ودي ارجع بالزمن فتره واشوف كيف كانوا عايشين وقتها في عز وقت المسلمين والمسيحيين
في امريكا دخلت كم مره كنيسه وفي باريس ولندن شفت كنايسهم لكن طرازهم للبناء غير وماشدتني وعندهم كنائس نفس باقي اوربا بس الشاهد وانت تمشي في الخط وتشوفها من بعيد
وطراز البناء للبيوت تقريبا واحد قرميد <--- زي الطراز الاندلسي او المغربي الي فوق يكون فيه زي المظلة ديكور يا احمر ولا ازرق ولا اخضر هو زي البرتغال واظاهر اغلب اوربا نفس اللون اللون الاحمر الي يميل على البرتقالي
وقربنا من بيزا .. الصدمه
اشيك على اللوكيشن في الجوال وفي السياره كلهم يقولون عشر دقائق وتوصل للوجهه الي انا حاطها مواقف عند برج بيزا اشلون وش هالديره ؟؟ شكلي غلطان في اللوكيشن
عن سمعت بيزا وبيزا واسمها مرتبط بالبيتزا والبرج المائل واول ماتقول بيزا يجيك علم ايطاليا واذا مارحت بيزا كانك ما رحت ايطاليا .. الصوره الي في بالي عنها انها مدينه كبيره وفيها حياة عمائر وتاريخيه
طبعاً قريت عنها قبل وماحصلت شئ فيها الا الدومو والبرج المائل وفيه شارع تسوق ولوحة جداريه لفنان مشهور والعالم تقول نمرها ساعتين ونروح .. كنت اقول اشلون اكيد ما سلطوا عليها الاضواء ولا اشلون بيزا هذي
جاني شعور وانا امشي حسيتها احدى المحافظات عندنا في السعودية
وصلنا قال اللوكيشن باقي دقيقه على الوجهه الا اشوف زحمة ناس لكن ماشفت البرج ولا شئ بس زحمه
ودخلت المواقف ووقفت وانا منصدم بس على قولتهم الكتاب باين من عنوانه
المواقف يعطيك زي القرش بلاستيك تخليه معك وانت طالع تحاسب وقفنا والسياره فيها اغراضنا وقلت الله الحافظ كان الوقت العصر
وفيه مخرج واحد للمواقف على سكه صغيره غير مدخل السياره المشكله هالمخرج والسكة
متجمعين فيها افارقه اشكالهم ونظراتهم تثير الريبه
طلع متجمعين يبيعون شنط تقليد واتوقع وراهم مصايب بعد لكن الحمد لله فكنا الله منهم وانطلقنا للبرج المائل
تدخل بين اكشاك تذكارات كلهم تقريبا يبيعون نفس البضاعة
ثم تشوف سور كبير وبوابه تدخل تشوف الدومو والبرج سعنون
وهالساحات الخضراء محوطينها ممنوع تدخل ولا تجلس عليها بس تناظر والعالم كل واحد يتفنن في الصورة
ورحنا شوي نستكشف المنطقة الا اغلب الاماكن مقفله عشان الشتاء او عشان اجازة الكريسمس
صايره المدينه كئيبه تجيب الهم تحسفت اني مريتها .. ماطلونا فيها ساعة تقريبا ثم مشينا
وانا طالعين قلت وش رايك ناخذ لنا بطاطس ماك ننقنق عليه في الخط
دخلنا الا زحمه طبعاً لاحظة ان مطاعم الفاست فود قليله عندهم ماك وبرجركينق وخاصه برجركينج هو الي نشوفه في اغلب المدن لكن ماك الي كل ماسافرت ديره لازم اشوفه في كل زاويه عندهم نادر
الشاهد دخلت وطلبت بطاطس قالت تبي كاتشب قلت ايه قالت بمدري كم سنت
الله يفقرهم
وانا انتظر الا اشوف فيه ورقه مكتوب اذا تبي تستخدم دورة المياه وانتو بكرامه
لازم تعطيهم فاتورة الطلب بس لزوار المطعم البلديه عندهم مستكثره تبني لهم دوراة عامه جنب البرج
انطلقنا وانا متحسرين على هالزياره الخائبه .. الي يبي يمرها يمرها مرور الكرام ماتستاهل نص يوم
الوجهه الان من بيزا الى ربالو وبرتفينو تقريبا ساعتين
طبعاً هنا الطريق بداء يتغير لاننا بدينا نرجع من الجنوب الى الشمال فكان الطريق عبارة عن جبال وشجر وانفاق وانهار او مجرى سيل وفي بعض الاماكن فيه بقايا ثلج وفيه قرى صغيره تشوفها على الجبال او بيوت تقول ذولا اشولون يوصلون هناك ولا اشلون سياراتهم تمشي .. المشكله ودي اتامل في الخط وفي نفس الوقت لازم انتبه للخط ...
ومن خلال الخط لاحظة شئ في سواقتهم فيه كلمه نسيت وشي لكنها بالايطالي وعند لوحه اذا قربوا عندها يهدون مع انهم يكونون مسرعين قبل يوصلون واول ما يتعدونها يسرعون .. فكان استنتاجي لها انها كاميرات او رادارات سرعة
وثم وصلنا بحفظ الله ورعايته لربيالو هي مدينه صغيره كنت بسكن فيها بس واطلع اتمشى في بورتفينو
الزبده نفس المشكله رجعت معي بخصوص اللوكيشن والجوال
المعزبه قلت لها الان الشوارع صغيره فانتي وجهيني
ونمشي فجاءه كان الوقت المتوقع 20 دقيقه فجاءه صار 50 دقيقه اشلون ؟؟
وكل شوي الوقت يزود واللوكيشن يقول ارجعوا ؟؟
قلت فيه شئ غلط ما اذكر ان الفندق كان فوق جبل اذكره قريب من البحر ومواقف القوارب اشلون
وقف وقف خل نشوف الخريطه زين
ثم قلت خل نرجع ونشوف وش يقول كل مانتعدى يزود الوقت خل نمشي مع الحرامي لباب الدار ونشوف ودخنا وجوعانين صراحة المود قفل
يوم رجعنا ونمشي معه خطوه بخطوه ومهدي السرعه الا طلع اني تعديت اللفه الي مفروض الف معها ويوم مسكت اللفه الثانيه طلعتني الجبل ... ويوم مشينا صح وثلنا للفندق على طول وراح وقتنا على الفاضي لوه نهار كان اهون نشوف مناظر
الفندق هذا قديم وعادي وكنت ماخذه عشان فيه مواقف عامة جنبه وبس عشان ننوم ونطلع
لو برجع مره ثانيه منيب ساكن فيه مع ان الموظفين الي فيه محترمين جداً ومتعاونين لابعد درجة ونفسيتهم عسل ومؤدبين
اول ما وقفت السياره قلت له عندي حجز وقال حياك الله نزل اغراضك وتعال كل امورك جاهزه
وسالته فيه مواقف هنا قال ايه وعادي وقف مجانيه قلت زين وتوني مشغل السياره الا اشوفه يركض ويقول لي حرمتي بتطلع الحين وقف مكانها مقابل الفندق وتجي حرمته تركض توخر سيارتها وزياده يوقف لي الشارع عشان اديور
وزياده على كذا يوم طلعنا الغرفه حصلتهم حاطين لي سرير طفل مع انه في الحجز كاتبين الطفل عليه رسوم زياده وغرفتك صغيره تقدر تسوي اب قريد اذا وصلت لغرفه اوسع ولكن ماعطيتهم الاوكي لاني غيرت رايي ماجبت ولدي معي برد ولا حاسبوني عليه ولا حتى سالوني عن ولدي بس تشكرت منهم وانا طالع وقلت لهم لانه برد ماجبته معي عشان مايقولون يستهبل ذا <--- مادروا عنك
هذي الاطلاله من الفندق
حطينا اغراضنا وقلنا بنروح ناكل لنا شئ ورحن لبورتفينو تقريبا 20 دقيقه الطريق مسارين رايح جاي يمينك جبل ويسارك سفح جبل وبحر
المنظر روعة لكن للي يخافون مايصلح لهم
والمشكله لليل ويطيرون هالايطاليين بسياراتهم الصغيره فيه واحد قفلها معي لاصق فيني وانا مهدي زي الي يقول اسرع والله ويطلع المارد السعودي الي فيني واسوق سواقتي في الرياض
بس ابي اعلمه ترى اعرف اسرع واتهور بس موب وقته يا تعدني ولا امش زي الناس
وصلنا بورتفينو تقولون خاويه على عروشها
كل شئ مقفل وهدوووء
في الخريطه كنت متخيلها اكبر من كذا طلعت ولا شئ وش اقولكم كبره جد جد صغيره مدري كيف تكون في الصيف اذا زحمه فيه كراجين مواقف بفلوس واحد كان مقفل يوم نجي وكلهم جنب بعض الي دخلناه ادوار مرتب لكن مدخله المواقف ضيق وصاير منعطف اتوقع اصحاب السيارت الكبيره او الي سواقته موش ولا بود بيتعب زي مواقف الابراج في مكه ولا البحرين مداخلها ضيقه
نزلنا نتمشى الا هدووء ووصلنا للمارينا وكل المطاعم مقفله الا اثنين يمكن ونقرب من واحد ويستقبلنا حياكم
انا توقعته بيقفل طلع يقول تونا بنفتح 7.30 السهره عشاء لكن تفضلوا اجلسو وتمقلوا في المنيو على ما نجهز طبعا مافيه الا مطعمين وانا جوعانين فما فيه خيار ادخل لو انه عادي
منيب متكلم عن طفاصيل الطلب لكن يوم طلبنا جاب لنا باديتين شوربه قال هذي من الشيف ترحيبيه
وكان تقديمه حلو
صراحه طعمها ما انساه الى اليوم غريب شوربه فيها لذعه حلوه المدام تقول نكهة القرقاص كان تعرفونه نبته بريه .. انا مدري اشون اوصفها لكنه تحس لسانك يتكهرب وانت تاكلها يحرك كل حواسك الوقيه
ورجعنا للفندق عشان ننوم نومه هنيه ونرجع للديره الصباح نشوفها وهي مصحصه ومنتعشه
وان شاء الله نستكمل لكم الرحه غدا او بعده ان شاء الله ونختمها بميلان ديرة الاناقه والموضه
بعد وصولنا لبورتفينو الليل وعقب بيزا صراحة قلت شكل الديره رايقه ليتني مددت يوم فيها
طبعاً فيه ميزه حلوه في فطور فنادق ايطاليا فطورهم غالبا ينتهي 10.30 الى 11
وعلى ما نصحى ونتقهوى ونلبس الا تكون الساعه 10 طبعاً هالمره نفس المنوال وسالفة القهوه
وانزل واقابل معلم البار حقهم رهيب وواضح انه راعي كيف واسولف له ووريته المقطع حق القهوه وقلت له لازم تقلب فقال هذي زي القهوه التركية يطلع منها رغوه ولازم تداريها .. واظاهر قلت لكم بس بعيدها عشان ما اتلخبط فقلت له هذي يبي لها تقلب ترى حول ربع ساعه .. قال ذي شوربه ميب قهوه
وهي تقلب شاف فيها مسمار قال اووه هذي ميب قهوه بس قلت ايه قال فيها شئ ثاني موب بس قهوه ومسمار ريحتها ..
قلت لا الرجال راعي قهوه قلت له فيها زعفران قال اهاا يسمونه زافرينو اظاهر حولنا يعني
الزبده قلت له على طاري الشوربه وش سالفتكم كل مارحت مكان قالوا مافيه ويستغربون !!
قال ايه انا الشوربه مانشربها الا اذا مرضنا
وجونا غالبا حار فمانحرص عليها واذا بتحصل شوربه بتحصلها زي المرق وخضار ميب شوربه .. قلت اهاا كذا نظامكم اجل
يوم خذنا لنا عشر دقايق قلت ماقصرت يابو فلان ورايتك بيضاء وسلام عليكم مع انه نقد علي قال غريبه ماتحب القهوه الايطاليه جاي من ديرة العرب وجايب قهوة العرب معك .. قلت عاد وش نسوي الخرمة
ويوم خلص قال باقي القهوه انطله قلت ايه خلاص مانحتاجها قال اجل باخذها بصلح لي واذوقها قلت اجل دامك بتمخمخ عليها خلها تقلب لما يصير لونها بني موب مثل الي سويتها لي غسال اسم قهوه
طبعاً جهزنا القهوه عشان الخط لميلان ورتبنا اغراضنا ونزلنا نفطر قبل لا نمشي نزلنا تقريبا 11 او 11 ونص ولا فيه احد عند الفطور وضافين كل شئ .. !!
قلت للاستقبال الفطور خلص قالت لا لا عادي رح ونروح الا الباب مقفل وسوينا استنفار مع انه عادي لوهم قالو ايه خلص طلعنا ولا قلنا شئ لاننا تاخرنا بس لانهم قفلوا توقعوا مافيه احد خلاص
والله ويجي خويي راعي القهوه ويرتب الطاوله ويقول وش تبون بس وبجيبه لكم ماتنلامون انتوم متقهوين قهوه عربيه .. دقه
بس الصراحه استحيت منه قلت له استرح انا بخدم نفسي بنفسي قال لا ولا تقوم انت ضيف عندنا <-- من كيسي ذي
الزبده يوم خلصنا وافطرنا الحمد لله طلعنا وسوينا تشيك اوت وانا نازلين حطيت كم تمره سكري في كاس بلاستيك ورحت لخوينا راعي القهوه وقلت له هذي اشربها مع قهوتنا .
وقبل لا اسافر كنت اقراء تعليقات الناس على فطور الفنادق فكلهم مجمعين انه فطور عادي ولا فيه خيارات
الا في بعض الفنادق الي غالبا تكون 5 نجوم يكون فيه تنوع في الفطور
فاغلب الفنادق فطورهم يكون عباره عن (كوروسانات ومربى وجبن وبيض مسلوق او مفيوح
خذنا لنا فطور خفايف عشان نتنشط وننطلق لبورتفينو نشوفها في الصباح بعد ما كانت نايمه امس
طبعاً الحين نهار ودليت الدرم امس رايح لها
صراحه الطريق في النهار رااايق تمشي على حافة الجبل وتشوف البحر من فوق لونه حلو تركوازي وشوي تمر مرسى قوارب وشوي شجر لوه ربيع ومعك سياره كشف اووووه شئ
هذا توضيح للمواقف الي رحت لها اول يوم وثاني يوم وفيه مواقف اقرب وفي اللوحه مكتوب فيه مواقف ثانيه يمين لكن هذي مكانها حلو قريب وادوار
تاخذ كرت وانت طالع تحاسب عند المكينه قبل لا تطلع لاني اول مره جيت بطلع على اساس بحاسب عند بوابة الخروج وتورطت زين محد كان وراي فرجعت من جديد للمواقف .. فيه مكينه خدمه ذاتيه وفيه كاشير مالك عذر
هذا الممر امتداد للصوره الاولى اذا تعديت المواقف بتشوف فارشين لك البساط الاحمر الى نهاية الممر الي بيوصلك للمارينا .. لاتمشي الا عليه
لا عادي بس العب على نفسك وقل حاطينه لي
بس الغريب اشوف في قوقل ماب مافيه هالفرش التصوير كان في 2015
فيه محلات صغيره يمين ويسار ومطاعم وفيه مكينة صراف للي يبي
يوم وصلنا كان الجو حلو فيه سحاب على جوي
بس مافيه ذيك الحركه قليلين يعدون على اليد الي موجودين وحتى يوم شفت قوقل ماب شفت فيه عالم وحتى المرسى كله يخوت كبيره فخمه لكن وقتنا مافيه الا قليل وتقدر تجلس على المرسى تشوف المويه صافيه وسمك يتحرك دلع
المهم وانا نتمشى على المرسى شفنا لكم على الجبل مجسمات شئ ملون وشيء اسود كانه وشوي اشوف ممر قلت شكله متحف خل اطل عليه وارجع لك ..
كاني هونت وشو موب لازم كلها كم مجسم وش يعني وش الفكرة
والله ياهو رفيع ومبني بناء قديم حصى موب متساوي .. المشكلة الفضول سيطر علي الا بشوف الي فوق
والله واطلع كم درجه شوي اللياقة مااش وبرد .. قلت دامك مشيت كمل خلاص هانت ووصلت لاخر درجه الا يطلع فيه ممر يسار
طلع هالمكان الي وصلت له ترييحه فيه درج ثاني اخيس من الي راح ... مدري وش اسميه سلم ولا درج ولا ممر جبلي طبعا مايكفي الا شخص واحد هذا وانا جسمي يعتبر نحيف يعني لو فيه احد بينزل وانا طالع لازم نمشي على جنب واذا سمين مايمشي الا واحد وزين فيه واحد اقترح عليهم وركبوا ماصورة حديد زي الدرابزين تتمسك فيها وانت طالع ونازل ولا لو يجي مطر عز الله انواع الطيحات والتزحلق فيه لان الحجر يزحلق
الزبده زاد عندي الفضول الا اشوف وش النهاية واطلع واطلع... الا يجيني ممر يمين ولا يسار يسار تطلع زياده لكنه زي الممر موب درجات وامشي معه الا اشوف منظر قلت زين اني طلعت وشفت هالمنظر الرايق
هو يعتبر زي الا طلاله البنوراميه على المدينة وفيه كنيسه اظاهر وفيه من الجهه الثانيه اطلاله على البحر
بعد ما تغذينا بصرياً ونفسياً .. جت حزة الوداع ..
ورجعنا مع نفس الممر .. ومثل ما استقبلنا بحفاوه ودعنا بنفس الممر
والان استعدينا وصلينا في المواقف الظهر والعصر وانطلقنا الى اوت ليت سراييفو او مدري وش اسمه الزبده كلن يمدحه على طريقنا لميلان قلت نتقضى وثم اروح ارجع السياره في مطار ميلان ثم من المطار على الفندق في ميلان .. وان شاء الله الجوله القادمة بتكون عن ختام الرحله ميلان وسوالفها
ونراكم على خير
انطلقنا من بورتفينو للاوت ليت الي مدحوه لنا وقريت عنه في النت وعلى طريقنا
والخطه نوصل له نتقضى فيه لكني محدد ايجار السيارة اني برجعها لهم الساعه 5 العصر
هذا وانا يوم اخطط قبل السفرة حاط 5 العصر قلت اخاف اتاخر شوي ولا الخطه اني اكون في ميلان على 2 او ثلاث
لكن تجري الرياح بما لا تشتهي السفن
وانطلقنا للشمال وزي ماقلت الطبيعة تغيرت جبال لكن باين الشتاء عليها والشجر كله بني ودرجة الحراره كل مالها تنقص تبرد
يوم قربنا من الاوت ليت الا اشوف لوحات تدل على ان فيه مدينه اسمها سيرفال موب اسم الاوت ليت لان يوم دخلت مع المخرج الا اشوف فيه كم اوت ليت وفيه لوحه تبي الاوت ليت الفلاني رح يسار ال هذا يمين
طبعا انا شايف صوره في قوقل قبل اروح ولا ادري عن الباقيه وصراحه مابي اتاخر على ميلان مابي اوصل ميلان الليل ومعي شنط وقروشه
المهم وصلنا العصر الا المواقف فل العالم تضف عشان الكريسمس ونهاية السنة
وطبعاً انا حاطين في بالنا بنضف معهم
بشكل عام المكان مرتب وحديث وفيه كل الخدمات والمواقف وسيعه
على طاري المواقف ..
المعزبه وضعها ذاك اليوم ماتتحمل تمشي كثير وبرد فقلت بنزلك وادور لي موقف ..
وكنت احاول ابي قريب بس راح علي الوقت قلت يارجال وقف بعيد شكلهم معششين موب طالعين الا الليل
طبعا كل سياراتهم صغير ومواقفهم بعد على مقاسهم
واحصل موقف وادخل السياره بالريوس وكان فيه عامود اناره يخلي مقدمة السياره تطلع شوي عن الموقف
يوم فكرت قلت لا اخاف على الموتر ماتسوى علينا يجي احد يحكها وسالفه مع اني مامن شامل
واطلع ادور موقف مره ثانيه .. ولعلي من الملل طلعت على وحده كانت مستعجله وضربت بوري وفكني الله ماصدمتني الغلط علي 100 بال 100
وانا الي استخدم سياسة اعمل نفسك ميت وادخل مع اقرب لفه
واشوفها في المرايه عطتني نظرة ال.. طوووط طووط طيييط
والله واكمل لفلفه وحصلت واحد طالع واوقف مع انه بعيد الشاهد توني موقف ونازل بقفل الا اشوف سكيورتي يدور على السيارات الي في الصف الي وراي ويسجل مخالفات للي موقف على الخط الي بين الموقفين ولا الاي سيارته خارج الموقف
وانا الي اطلع من موقفي واضبطه تضبيطه بالمسطره
راح وقتي على هالموقف
وننطلق نستكشف الاوت ليت .. في البدايه بيضيعك لكنه واضح لانه مصمم تقريبا زي الهلال ولا هوب ذاك الضخامه يعني سوق تقريبا كبر سوق الرياض جلري لكن دور واحد وممرات .. وفيه واي فاي مفتوح ودورات مياه وانتو بكرامه منتشره ونظيفه
وبالنسبه للاسعار فيه شئ رخيص وفيه شئ نفس عندنا .. وخاصه ان الايطالين عندهم نظام بايخ في التاكس فري .. لازم مشترياتك من المحل الواحد تكون 150 يورو اظاهر عشان نعطيك تاكس فري
موب زي فرنسا وبريطانيا اي شئ تشتريه يعطونك عليه تاكس فري في الاخير تجمع الفواتير وتاخذ التوتل
بس ذا الاوت ليت فيه ميزه حاطين لك مكتب حق التاكس فري في المجمع اذا خلصت لازم تمرهم ويعطونك الفلوس بدون مايشوفون وش شريت ولا وش معك لكنهم يقولون لك لازم معك فيزا ويقولون لك وانت في المطار لاجيت تطلع من ايطاليا عطهم هالورقه المختمه الي تفيد انك استلمت المبلغ ولا ترى بتاريخ بنسحب من فيزتك المبلغ الي عطيناك اياه
المهم ما طلعنا من السوق الا العشاء تغدينا في برجر كينج واغلب ربعنا فيه يتغدون
وفيه باصات تاخذك من ميلان وتردك بس ناسي المبلغ اظاهر 60 يورو ذهاب وعوده ؟؟ منيب متاكد
واظهر كاني منيب واهم وقت نا كانوا يقفلون الساعه عشر الليل عشان موسم اجازه فيبيلك تشيك على اوقات دوامهم قبل تروح
وتوكلنا على الله وانطلقنا الى ميلان بلد الذوق والاناقة والموضة والطريق ممتاز لكن المشكله في السرعة العالم تشطفني وانا امشي على بيض
الوجهه الى مطار ميلان الدولي لتسليم السيارة وثم الذهاب الى الفندق بالقطار .. ومرسلين لي قبل يوم شركة ايجار السيارة اذا جيت ترجعها رجعها للمواقف رقم كذا البوابه كذا الدور كذا
وطبعا شارطين علي ارجع البنزين زي ماخذته الي فل بس ما تدري هو فل الفل ولا بس اهم شئ يكون المؤشر على علامة فل
الشاهد قبل لا نوصل شيكت على الجي بي اس اقرب محطه من المطار وين وانطلقنا
عشان نسلمها لهم فل لو ماسلمتها فل بيحاسبونك بسعر اللتر تبعهم والغالب يكون اغلب من السوق
والله واحصل محطه داخل موب على الطريق السريع صراحه مغامره في ديره ما اعرفها وليل الساعه اظاهر 9 او 10 الليل
والله واحصل المحطه مافيها احد مقفله خدمه ذاتيه انتهى دوامهم .. طبعا انا عبيت قبل في محطه لكن واحد ضبطني لكني اذكره معبي لي ديزل سبيشل الزبده ديزل معه كلمه ثانيه
واناظر المكينه الا كله ايطالي
انا قد جربت اعبي بنفسي لكن مكينتهم ذي جديده علي ولا فيها انجليزي افهم وش يقول
الزبده فتحت التانكي وحطيت البيب لكن مايعبي ...ويجي واحد ان شاء الله انه ولد حلال
واقوله ياحبيبنا افزع لنا ترانا من بلاد العرب بلاد الكرم والنخوه ترانا مسافرين وعلى باب الله محتاجين قيمة البنزين بس <-- استغفر الله الحمد لله على النعمه
الشاهد والله قال ابشر وجاء ويقراء حسسني انه اول مره يعبي زيي ..
قال بكم تعبي <-- هنا اشتغل التحري قلت هو بيسال عشان يبي يعرف كم معي .. بس والله خله يضبطني بس لاسوى حركه بايخه اضرب ولا تشاور
قلت له 50 يورو .. لان الموتر باقي فيه اظاهر ربع او نص فقلت خله يعبي ويرجع الباقي البطاقه ما اضمنهم
والله وسحب البيب رجعه مكانه ثم قال حط الفلوس وحطيتها ثم قال يالله عب وبداء يعبي وعطتني فاتوره ويوم عبيته فل الفل طلع اظاهر 20 يورو
اناظر في المكينه احتريها ترجع لي الباقي احاول اقراء الكلام شئ طلعت البيب ودخلته من جديد ماش مافيه
وانادي صديقي قبل لا يروح تعال وين الباقي ..؟؟ ويرجع يقراء الجهاز والتعليمات
قال مدري قلت وش مكتوب في الفاتوره طيب هنا هالكلمه .. ناظرني وابتسم وقال هذي معناتها مع السلامه
قلت طيب اشلون وش العلم .. !! قال مالك الا تجيهم بكره وتعلمهم يرجعون لك الباقي ..الله يخلف علي
قلت الحمد لله انها على بس 20 ولا زرفو شئ اكبر
والله واكمل طريقي للمطار وكان فاضي مافيه احد الحمد لله عادي اضيع واهدي اقراء اللوحات على روقان
والله وكل شئ واضح زي ماقالوا في الرساله .. واوقف الموتر وانزل الاغراض ويجيني الموضف واعطيه الورقه وشك على السياره .. مع اني مامن شامل الا انه يشيك
ثم قال خلاص بحفظ الله .. قلت طيب ورقه شئ والمبلغ المحجوز .. قال خل العقد معك وخلال هاليومين بنفك الحجز خلاص انا ارسلت بالجهاز ان ماعليك مشاكل وانك سلمت السيارة
ما ارتحت يوم دخلت المطار رحت سالت الموظف الي داخل قال ايه كذا نظامنا .. قلت خير ان شاء الله
الان خل ناكل لنا شئ ميتين جوووع بنفطس.. طلعنا للمطار الدور الاول في دور المغادرون فيه المطاعم
والله ونطلع المطار فاااضي يمكن مافيه الا رحله وحده ونحصل مطعمين ماك وفيه مطعم ايطالي مرتب
قلنا نبي اكل يشبع لان بنرجع للفندق ننوم على طول مافينا حيل من الصباح نفر .. خذنا لنا بيتزا وسلطه..وانا صراحه على اعصابي ودي اطلع بسرعه تاخر الوقت تقريبا الساعه 11 والطريق في قوقل يقول 50 دقيقه للفندق من المطار.. قطار ومعك ثلاث شنط ووقت متاخر ولوني لحالي عادي بس المعزبه انا بدبر اموري
المهم يوم خلصنا قلنا يالله وين لل
القطار ..
يوم دخلنا الصاله الا فيها حركه ارتحت شوي فيه ناس لكن مافيه الا مكاين الكترونيه عشان التذاكر
طيب وش الطريقه الا اشوف موظفين يسولفون وانا من اول ماش قلبي ناغزني
وانا اقرب منه طلعت الجوال بطلع اسم المحطه الي ابيها عشان يعلمني كيف اقص التذكره
الا يقول اهلا ياباشه اخدمك بحاقه <-- طلع مصري وانا كنت شاك انه عربي لكن لان اشباه الايطاليين بعضهم قريبه منا فخفت اخش فيه وينلخم .. قلت له ضبطني ابي اروح هنا
قال تعال وختار المسار والمحطه وخويه الي معه قال انا بعد رايح لنفس الموحطه قلت زين
وننزل تحت الا القطار باقي له خمس د ويوصل ومعنا ناس موب لحالنا ومعهم اغراضهم
يوم وصل القطار الا اركب اول واحد مدري اشولن اوصف القطار لكن للي قد راح لدزني باريس بيعرف وش اقصد بالقطار موب ميترو
اول ماتدخل فيه ممر موزع يمين ويسار الكباين وفيه واحده تطلع بدرج ووحده تنزل درجتين انا وقفت في الموزع مع شنطي لانها كبيره صعب انزلها شوي الا احصل كل واحد من الي ركبوا معنا حط شنطته جمب شنطنا وراح وخلاها وجلس .. استوعبت انه كذا نظامهم مع العفش تخليه في الممر عند الباب وتجلس والله واتكي واجلس ورانا ساعه على ما نوصل وكنت اتبع كل محطه بالجوال واقراء اسمها
الى ان وصلنا ونزلنا مع العالم وانطلق معهم هم بيدلونك على المخرج ... وصلنا لبواباااات كثيره جنب بعض
وتحط كرتك تسحبه المكينه وترجعه ويفتح الباب .. واشوف بعضهم يدخلون ورى بعض بدون كرت مخالفين بس شكلهم متعودين
جاء دوري ودور المدام والله والبطاقه تقول خطاء ماتفتح .. الا وحده ايطاليه معها عيالها دفت ولدها ودخلت بتكت واحد وعطت حرمتي تكت ودخلت ... وانا جالس لحالي بالعفش اناظرها من خلف الحاجز والعبره في عيني وفيه وجلس يعزف ناي <-- لا ابالغ بس اعطيكم جو
المهم وش السوات المصري شكله غلط باسم المحطه فالحين وش السوات ماتفتح لي الا ذيك المحطه
ايه نسيت اقولكم في القطار فيه واحد جاء يدور يشيك على التذاكر
المهم جلست انتظر احد يجي عشان اسوي نفس الحركه مافيه حل الا كذا مافيه موظفين ولا عسكر بجلس الى بكره كذا لحالي المهم جاء شباب واناظره وحس اني بدخل وراه وضحك وقال كلمه ايطاليه زي الي ادخلك عطيته ابتسامه والله وحط الكرت وتاخر شوي عشان ادخل على الحساس مايقفل علي وتشكرت منه ماقصر
انحلت هذي المشكله جينا للمشكله الثانيه بجلس اسحب الشنط الفندق تقريبا خمس الى عشر دقايق مشي في هالبرد .. وقتها كنت اتشوف لتكسي لو يقربنا شوي مع انها ماتسوى بس عشان الليل
طبعا الصوره الي في بالي عن ايطاليا الان رجعت انها مافيا وعصابات وغالبا المدن في الليل تشوف متشردين
لكن كان الجو هادي ورايق وذكرتني بباريس من حيث التصميم العام
والله وقلت يالله بس نمشي قريب ونسحب هالشنط بس والله تعبتنا الشطن لان شوارعهم زي البلاطات المكعبات فمتعب تسحيب الشنط عليها ... ويوم وصلنا للفندق كنت صراحه بعد خايف منه انه مايكون مثل الصور او تكون الصور قديمه لكن الحمد لله توفقنا في الفندق ووصلنا بسلام وحصلتهم مجهزين كل شئ لاني حاجز غير مسترد عن طريق موقعهم ومعطيني غرفه حلوه وسيعه ولها اطلاله وفي اعلا دور
وخذ لك احلا نووومه الرايقه الي خلاص ما وراك شئ تشيل همه وحتى عندك وقت تتمشى في المدينه بدون استعجال فعادي لو ماتصحى الا المغرب
اعتذر لكم ما اقدر اكمل لان حصل لي شغل .. فنكتفي بهذا القدر اليوم والباقي ان شاء الله بكره ولا عقبه ونختم على خير
الصراحه ودك الواحد يكتب يومياته او التقرير وهو في نفس السفرة ولا أول ما يرجع مباشره
تفوتك اشياء كثيره ولا تذكرها الا عقب
ميلان جلست فيها تقريبا خمس ايام لكن قل اول يوم ما يحسب لان ماوصلنا الا دايخين الليل واخر يوم طلعنا من صباح الله خير عشان الرحله بدري الصباح يعني اربع ايام
الفندق
UNA Hotel Cusani
اظاهر 4 نجوم
يبعد بالمترو عن منطقة الدومو 4 دقائق
ومشي على الرجول 10 دقائق
الشارع الي عليه خط احمر هذا زي الممر وسيع فقط للمشاة وفيه محلات ومطاعم ومقاهي واظاهر فيه واي فاي مجاني لكن ما انتبهت للوحه الا في اخر يوم من السفره
طبعا فعلياً ماكان لنا جدول لهذي السفره فكنا وقتها نقول وين نروح ونمشي والي نشوفه على الطريق نروح له .. فكنت محدد الاماكن في الخريطه الي قريب نمره
ثاني يوم في السفره كنا مخططين نركب الباص السياحي عشان يلف فينا المدينه ونشوفها والي يستاهل نرجع له نحط عليه علامه والي ما يستاهل يصير مريناه بالباص
هالحركه طبقتها في كذا ديره واعجبتني الفكره (لندن - باريس - اسطنبول) اسطنبول او لندن نظامهم افضل في الباص السياحي لانه يمر مع اماكن سياحيه يوصلك لعندها قريب وتستخدم الباص 24 ساعه من وقت شراءك للتذكره يعني شريتها الساعه 5 العصر معك الى اليوم الثاني الساعه 5 العصر
ميلان لا شريتها الصبح ولا الليل تنتهي في نفس اليوم
وضبطنا القهوه
فتقريبا طلعنا على الساعه 1 الظهر وقالوا لنا اخر رحله الساعه 5 العصر <-- لكن عرفت عقب ان اخر رحله 5 العصر تنطلق من المكان الي كنت اسال فيه عن الباص لكن اخر رحله فعليا يقفلون الساعه 10 الليل توصل لاخر نقطه وصول
قلنا اجل نخليها بكره عشان نحلله
وانطلقنا طبعاً اغلب تنقلنا على رجولنا لان فعلياً الي يحب المشي تعتبر المدينة صغيره
يعني ابعد منطقه مشيناها تقريبا 30 دقيقه بالنسبه لي عادي لكن المدام هي الي تعبتها معي ولا ودنا نركب الميترو لان نقول قريب لكن نقول لا عادي لان جربنا الميترو في لندن وباريس ماتشوف الدنيا تحت الارض والترام اشوفه زحمه احسه متعب
المهم بعد ماقررنا اول يوم نتمشى اول هدف كان ساحة الدوم وهي في كل مدن ايطاليا السنتر واهم معلم
اذا تبي تبحث عن افضل منطقه سياحيه ابحث عنها .. طبعا جوعانين بنتغدا ما افطرنا اول يوم
فكانت الوجهه لحبيب الشعب
البيتزا الي تاكلها وقافي .. مطعم فتحه وحده او فتحتين يبيع بيتزا بالقطعه واظاهر لازانيا بس ولا فيه كراسي بس طاولات ولا يحطون مناديل
اسمه Spontini
القطعه اظاهر ب 3.50 يورو دسمه لانها عشجينه منفوخه ولا نطلب الا مارجريتا في كل المطاعم لانها بس جبن
لكن فعليا بالنسبه لي لو خيروني بينها وبين دومينز باخذ دومينز لكن هذي حلاتها لانها قطعه وحده منفخه وتجيك من الفرن مباشره حااره ومتفخه والجبن يتمطط ومقطعه فصاير لها طعم غير
للمعلوميه يمكن كلنا فيه يمكن اربع مرات
هذا وهو عادي بالنسبه لي
يوم عبينا بطونا الحمد لله انطلقنا نستكشف المنطقه طبعا العالم تقول حج من الزحمه كتف بكتف وزي ماقلت قبل غريبه توقعت وقتي مافيه احد مسافر بررد
لكن يمكن عشان اجازتهم والكريسمس
زحمه ميب طبيعيه
وصلنا لمجمع قالريا او مدري وش اسمه اشر شئ عندهم كنت متوقعه سوق رسمي يعني سوق سوق بمعنى سوق لكن طلع عباره عن مجمع مطاعم ومحلات ماركات وفيه كم فندق وعباره عن علامة زائد + تقدر تدخله من هالاربع ممرات، بس كل العالم متراصين فيه يصورون
وكل ما نمشي ندخل محل ونطلع فانقلبت روسنا اول يوم مع البرد فرجعنا بدري على العشاء للفندق
طبعاً ثاني يوم صحينا بكير وافطرنا ومرووقين وقلنا بنرح نركب الباص السياحي يوصلنا لمنطقة ميلان الجديده
تشبه دبي والك عمائر قزاز واعمده خشبيه مودرن ونوافير .. وقنا ننتظر الباص وطول وحسبناها قلنا لو مشينا تقريبا نص ساعه وتونا مصحصحين مروقين ليه ما نمشي وناخذه اذا خلصنا من هناك يصير يرجعنا
هذي يقولون تسمع يمكن احد يكلمك في احد السماعات او انت تكلم يمكن احد يرد عليك هي عباره عن مواصير ممده للدور الارضي وفيه ناس مثلك يمشون
فكنا رايحين لهالمنطقه ومادحين لنا مقهى حولها اسمه
10 Corso Como Café
حلو صاير حولك شجر وفيه عصافير تنطط حولك تدور فتات الخبز <--- متعة جربتها في تركيا تاكل العصافير وانت تفطر او تتقهوى
لكن صارت لنا سالفه معهم طلبنا شاهي بنعناع وقالوا اوكي
وراحت كانت بنت صغيره وانا نطلب قالت لي معليش انا توني جديده في الشغل
مافهمت وش تقصد بس صارت كل ما اطلب شئ تقول بروح اسال وارد لك
الشاهد يوم طلبنا الشاهي راحت ونامت ماصار شاهي
في الاخير جابت لنا شاهي
لونه اغمق من لون النعناع بشوي ونذوقه الا شاهي معطر او مدري وش يسمونه شاهي فيه نكهة اعشاب
ناديتها قلت انا طالبين شاهي مع نعناع .. قالت
معليش ماحصلت نعناع فسويت لكم هذا بنفسي
قلنا لا اجل مانبيه عطونا عصير طازج برتقال .. قالت طيب وراحت
اظاهر والله اعلم انها راحت تزرع شجرة برتقال وتسقيها وتنتظرها على ما تنبت عشان تقطفها وتعصرها لنا
في الاخير قلنا لهم كنسلوا الطلبات ماعاد نبي شء بنحاسبكم على الكوروسان بس ماصار ذا عصير برتقال
فككوا جونا على الصباح .. وطلعنا تمشينا في المنطقه بدون نفس ورجعنا لموقف الباص على اساس بنركب الباص السياحي يقربنا .. جلسنا ربع ساعه او اكثر ولا احد مر قلنا شكله مطول او انه موب جاي اليوم ويك اند خل نمشي رجليه نتمشى
والله ونطيح لنا في سكه حلوه ماتمشي السيارات فيها وفيها مطاعم ومحلات صغيره لكن رايقه ومليانه من الاجانب يصورون
على ما وصلنا الا المغرب قلنا اجل مايستاهل ناخذ الباص نخليه بكره بس
ورحنا للممر الي حطيته في اول الرد نتمشى في المحلات وخذنا لنا من نفس البيزا عشاء
----
اليوم الي عقبه صادف يوم الكريسمس 25 طبعا انا عندي خبر فيه مدن في امريكا ليلة الكريسمس يقولك تقض واشتر كل الي تحتاج لان يومه بيقفل ولانتب محصل احد كلهم مع عيالهم على قولتهم العيد الكبير
بس قلت ميلان ديره سياحيه ما اتوقع يقفلون ..
لكن الصدمه يوم الكريسمس طليت من الدريشه الحركه تاخرت عن الايام الي راحت فيه ترام وفيه كم واحد يمشي لكن العاده على الساعه 9 او 10 الا تشوف العالم تخترش في الشوارع اليوم لا ماتحركو الا على 11
نزلنا افطرنا في الفندق وانطلقنا الا والله المحلات مقفله والمطاعم
مع ان فيه ناس كثير مثلنا تتمشى لكن اغلب الاماكن مقفله يمكن تحصل محل ولا محلين
وكل مانقرب من الدوم نحصل بعض المطاعم فاتحه .. الا احصل عسكري قلت بساله ..
سلام سلام وش الاخبار علوم بونجورونو الحين يابو سند المحلات كلها مقفله اليوم ميب فاتحه ؟؟
قال والله يابو محمد اظاهر انهم حول الساعه 5 يمكن يفتحون بس موب كلهم
قلت افاا اشلون .. قال جاك العلم
المهم قلنا خل نروح لفندق نتقهوى فيه الافترنون
وعلى دربنا نمر شارع الماركات طبعاً كل المحلات مقفله لكن الشارع مليان من العالم زي الي يقول تعالوا نفرجكمعلى الماركات هذي هدية العيد
وصلنا الى فندق ارماني هبال اسعاره ولا كان ودي ادخله صراحه وفيه مطعم اظاهر ياباني او صيني لكن وقتها كان مقفل ورجعنا قلنا خل نروح للفور سيزون .. يوم دخلنا طلع مليان عالم مشخصين واغلبهم كبار في السن عجز وشيبان لابسين كانهم رايحين لعرس لبس العيد
قال المطعم اليوم عشان الكريسمس عندنا منيو خاص تدفع مدري كم كامل تجيك كم وجبه وقرينا المنيو مايصلح لنا وكنا شبعانين بس نبي حلا وقهوه سالنا المطعم لان كنا نبي نجلس على الحديقه قال هذي للاكل بس
يوم تقهوينا طلعنا نتمشى في المنطقة والدومو والي حولها
والي بالخط الاخضر هذا شارع تسوق ماركات معروفه ميب غاليه زارا اديداس دزني سيفورا وهالطقه
طبعاً المحل الي تحصله مفتوح في هاليوم تحصله زحمه امة محمد عليه
طبعاً هذا اليوم رجعنا بسرعه لان كل شئ مقفل والمطاعم المفتوحه تحصلها فل ويكون لها منيو محدود عشان الكريسمس
ويقولك انتظر برى اذا طلع احد .. قلنا ما لنا الا ماك حبيب الشعب ... والله ياعنده عالم وقتها وكل شوي يقفلون الباب الى ان تطلع دفعه ثم يفتحون عشان الزحمه
يوم رجعنا للفندق على العشاء الا انا جوعانين خوينا راعي البيتزا مقفل وماك الي كلناه ما يوكل عيش
دقيت على الفندق قلت فيه خدمة عشاء اليوم قالوا ايه ماطلبت شئ لجل عين تكرم مدينه لو تبي حاشي جبناه لك
قلت لا بس ابي اسبغتي وبيتزا .. والله وكانت دسمه لكن الجوعان بياكل لو تراب
والمهم يوم شبعت قلت خل اشيك على الطقس وانا كل يوم اشيك على الطقس اتحرى السحابه يهديها الله
الا ويقول اليوم الساعه 8 الليل وانا الي كل شوي اطل من الدريشه اشوف السحاب وكل شوي البرنامج يتاخر ساعه الى ان جت 11 قلت بكيفه طفيت انا جالس يطقطق علي كل شوي يقول عقب ساعه
والله الا يوم جت الساعه 12 او وحده الليل وتسمع المدام صوت تيك توك تييك
وترحمني وتقومني شوي شوي مطر مطر
:y olks00740:
كل ملامح السعادة وقتها والاحاسيس انتابتني وقتها والله وافتح الشباك في البرد ابي المس المطر واشم ريحته
واصور فديو والمطر ينقط على القزازه .. غرفتنا صايره في اعلى دور فصاير الشباك يفتح على فوق فاشوف المطر يضرب في القزاز
واستمر يقوى ويخف واشيك على الطقس يقول بيجلس ان شاء الله طول اليوم بكره
قلنا اجل ننوم شوي ونصحى بكير نتقهوى ونفطر ونروح نتمشى بالامبريلا جايبينها معنا من الرياض عشان هاللحظه
طبعاً طلعنا عقب الفطور وخذنا الباص السياحي اخيراً في اخر يوم لنا عن الخاطر قلنا يمكن يمر مكان ما شفناه
طلع فيه شركتين باصات سياحيه وحده منهم ماتشتغل في الكريسمس والثانيه تشتغل
الي لونه احمر بق بص اظاهر او هوب اند هوب ناسي والشركه الثانيه مدري وش اسمها
لكن لو بجي مره ثانيه لميلان منيب ماخذ هالباص لان فعلياً مايوصلك الى الاماكن السياحيه لكنه يقربك منه يعني اغلب الطريق الي يمشي فيه تشوف الشوارع والمباني موب المعالم نفسها الا بعض الاماكن
طبعا خذناه من موقف قريب من الفندق وانطلقنا الى الدومو وقلنا بناخذ لنا خفايف من مطعم يطل على الدومو اسمه Duomo 21
صراحه مدري ما ارتحت له نفسياً وتعليقات الناس عليه في قوقل وسط
صاير مدخل صغير عند القالريا تطلع المصعد ثم يستقبلونك وفيه بار طبعا قريت عنه في النت ان فيه قاعات للي يبي يسوي مناسبات عرض ازياء ولا اجتماعات
لكنهم اكثر شيء يغرون فيه الاطلاله على الدومو جلسات خارجيه مسموح التدخين فيها من تعليقات الناس في النت انه ممنوع تطلب قهوه بس في هذي الجلسات الخارجيه لازم اكل ولازم طلبك مايقل عن سعر معيا
وفيه ناس تقول قبل تدخل لازم تدفع مبلغ
بالنسبه لنا موب موسم وماعندهم احد دخلنا ولا دفعنا شي وجلنا في الجلسات الخارجيه وطلبنا عصير راح الويتر ورجع مره ثانيه قال لازم طلبين ك واحد طلب قلت اجل جب لنا سلطة سيزر
وانا زي ماقلت لكم من الاساس ما ارتحت لهم يوم خلصنا قلت الفاتوره وجابوها حطوها وراحوا ... قريت الفاتوره ... الا بالايطالي بس انا بالعدد قلت هذي حقت الخدمه وذي سلطه وذي عصير فيه شي زياده مكتوب كوفي ؟؟
وهو اسعاره اصلا ميب رخيصه بعد ..!!
يوم جاء وخذها رجعت وحده عقب دقيقتين قالت معليش عطيناك الفاتوره الغلط <--- سبحااان الله واحد زينا طالب نفس طلباتنا عصير وسيزر وقهوه وش جوه ذا
طبعا الي مخليني ادقق في الفواتير في المطاعم لانهم سووها فينا في تركيا فصرت دايام ادقق لين رحت لمطعم خاصه الي يسوي لك فيها انه خمس نجوم
وبعد ماطلعنا رجعنا لخوينا الباص وكان مطر حلو شوي ديم وشوي قوي الباص مفتوح من فوق وتحت ببلاستيك مقفل يعني تشوف كل شئ من خلف البلاستيك حلو
وكانت اخر جوله لنا في ميلان النظره الاخيره لها وحلت يوم جاء المطر
طبعا رجعنا الفندق نرتب اغراضنا ونتفقد النواقص لاننسى شئ
وبلغت الفندق قلت توفرون تاكسي قال ايه اي وقت تبي قلت لو الصباح بدري قال ايه قلت زين
والله ورتبنا كل شء واستعدينا وخذنا لنا نومه حلوه لان الرحله الاقلاع الساعه 11 الصباح
والشئ الحلو ان الامطار مستمره من الليل الى الصباح
صلينا الفجر والدنيا مطر وكل شئ مرتب قلنا نصلح القهوه ونتقهوى ثم ننزل نفطر وعقب نروح المطار
طبعاً كانت الخطه اننا بناخذ تاكسي ولا اوبر لمحطة القطار ثم للمطار
لكن لعلنا وسعنا الصدر في الفطور والقهوه وتاخر الوقت وقوقل يقول القطار ساعه والسياره تقريب 40 دقيقه لكن القطار تاكسي وتنزل وتذكره والقطار ماتدر يمتى تبداء رحلته فقلت مالي الا تاكسي اضمن وغالي
الفندق قالوا التاكسي للمطار 100 يورو وبرنامج اوبر يقول من 80 الى 95 يورو وفيه التاكسي العادي من 60 الى 75 تقريبا يورو لكن سبحان الله مدري وش الي معميني ومخليني اطلب التاكسي من الفندق الي ب 100
الشاهد الدنيا مطر وانا افكر في الطريق لاتروح الطياره وننتظر التاكسي الي تاخر الا شوي يجينا باص مرسيدس زي حقات اوبر
انا هنا منيب رايق اتاخر لو دقيقه مابقى شئ على الرحله
وركبنا وزين ان السواق مستعجل حتى انه قطع اشاره بالغلط والمطر تقول منشقه السماء من قوته
يوم وصلنا المطار وانا قاص البوردينق بس بحط العفش وادور وين كونتر الخطوط رايح جاي راح علي ربع ساعه بس عشان ادور ويوم سالت ولقيت الكاونتر ضيعت المعزبه
لااء موب وقته اول شئ متاخرين وثاني شئ اشلون بحصلها في هالزحمه ولا معها جوال
بس الحمد لله القمر يبين بين النجوم <<--- تستاهل نتغزل فيها غزل عفيف شوي
المهم انه مابقى على الصعود الا نص ساعه تقريبا يعني وصلنا على الوقت .. ويوم وصلنا الكونتر شافني حق الخطوط وشاف الرحله قال رح لكونتر درجة الاعمال عشان ماعنده احد عشان يخلصونا بسرعه
يوم سلمت الشنط وخذت البوردنق تنفست الصعداء
نسيت ان فيه جوازات وتفتيش وحوسه
والله ونسحب رجولنا ورحت لحقين التاكس فري اختم الفاتوره
قم وصلنا للتفتيش الا زحمه لكن يمشي كل واحد يحط البوردينق على الجهاز ثم يفتح لك البوابه وقبل لا تدخل زي العاده انطل السوائل الي معك
يوم رحلتنا من الرياض حبيبين ما يدققون على هالاشياء .. ويوم وصلنا للتفتيش نسينا ان معنا شنطه حقت هدايا وحده من الهدايا عطر 200 مل .. فطولت الشنطه في الجهاز ماطلعت ثم شوي قال تعال افتح الشنطه
وافتح انا واثق مافيه شي ويقلب ثم ذكرنا العطر فقال هذا وش قلنا عطر قال افتحه فتحنا قال ما يمشي
الا المدام طارت عيونها متعنيه عشانه في ميلان خاطرها فيه
قال ما يمشي
يابن الحلال هديه مقفل وما ندري ثم قال يالله امشو بس لاتعلمون احد احسه مشانا عشان الخطوط السعوديه لو امريكا ماهقيت يمشيها
ودخلنا للسوق الحره وكنا نبي نشتري هديه عالسريع وانا اشوف الساعه باقي 40 دقيه على الاقلاع
هذا ولا هذا لا هذا ريحته احلا وانا على اعصابي وحاسبنا وجينا عند الجوازات زي مافيه زحمه
على بالنا الطريق قريب للبوابه من السوق الحره طلع يبي له مشي شوي .. وانا نتمشى واثقين الا شوي اسمع ينادون علي يقولون يابومحمد وينك عجل علينا ترى الطيار شغل الطياره
والله وادعس واترك المعزبه لحالها قلت بروح وااخرهم بس عشان يدرون اننا قريبين يوم وصلت الا متجمعين عند الباب يحتروني وياشر المضيف على الساعه وينك ياخوي اخرتنا اخر ناس نركب .. عاد ما احب هالحركه
والطياره ملياانه فل بعكس يوم اقلاعنا كان فيه اماكن فاضيه
وتيتي تيتي خلصة الحتوتيه
الصراحه اعتذر على الاطاله وقل الصور وحاولت اني استعجل في السرد في اليوميات وفيه اشياء نسيتها لكن حاولت بالي جاء معي فلعل وعسى انكم تستفيدون بشئ لو بسيط من رحلتي ولنا لقاء ان شاء الله مع رحله جديده في القريب العاجل ان شاء الله
واشكركم جميعا على مروركم واطلالتكم وخاصه لكل من تفاعل ورد على الموضوع
متوجهين الى بورتفينو
وودي اسرع مثلهم وراي 40 دقيقة على ما اوصل
في النهاية استخدمت البطاقة
