رحلتنا كانت للتمشي بعيده كل البعد عن السووووق ومن اختياري كانت للطبيعه فقط لاغير
حجزت الطيران مباشره من بعد عيد الفطر وبعدها باسبوعين حجزت الفنادق
الطيران من موقع اكسبيديا و اول مره احجز منه وكنت خايفه منه لان اللي قريته اغلبهم يمدحون حجز داخلي مو دولي وفي ناس امدحته وبيني وبينكم كان اهو افضل سعر احصله ان كانت حجوزات نت او مكاتب سفر عندنا ...
التذكره كانت بسعر 325 دينار كويتي من تاريخ 1-11 اكتوبر2014
كويت-ابوظبي-جنيف
زيورخ-ابوظبي-كويت
على طيران الاتحــــاد
الطيران ممتاز من خدمه وترفيه بس حصل اشويه تأخير يعني مو بس الكويتيه اتأخر يا ربعنا اللي يذمونها
حجوزات الفنادق لاربع مناطق بسعر 410 دينار كويتي للشخص
يعني كل وحده تدفع 806 د.ك شامل الفندق الطيران السياره
واخيرا وبعد تقريبا 20 سنه رديت لسويسرا واشوفها وانا شباب مو ياهل
يوم المغادره والحمدلله ما حشتنا زحمه الحجاج
وهذي بعض الصور من الطياره
وصلنا يوم الخميس 2 اكتوبر الساعه 8 ص
خلصنا اجراءات الجمارك ورحبوا فينا وهلا بالكاكاو
اول شي سوينا في مطار جنيف حطينا خطوط وشغلنا النت
وبعدها خذينا الشتل ووصلنا مواقف سيارات التأجير عشان نستلم سيارتنا
وهذي صوره لها من النت للاسف ماصورتها بروحها نسيت
كانت هيونداي i 40 - قير اتوماتيك - ديزل
وبعدها ركبنا القارمن وكان المفروض نروح انسي بس اشوي المجندات تعبانين ويبون يريحون استسلمت لهم بعد راي الاغلبيه
صور من الطريج الى فندقنا وكان الفندق في مونترو الهاديه اللي لو تقطون ابره تسمعون صوتها
واحنا بالطريج وقفنا ونزلت جمعيه coop اللي وصاني عليها اخوي اوشنز لانها كانت في دربنا شرينا بعض القروضات والخرابيط وبعدها وصلنا بالسلامه فندقنا وهذي صوره من البلكونه
بما اني اول مره اسوق في ديره جبال استانست على الطريج وقلت اشوه الطريج حلو وسهالات عالاقل احسن من بريطانيا اللي يننوني في السرعه والسكان العوي لكن العوي طلع اهون
نرد على فندقنا
اسم الفندق رويال بلازا
royal plaza montreux
على البحيره مباشره يطل وغرفنا عالبحيره فندقنا هذا من غير ريوق كان
وهذا موقعه الالكتروني
Royal Plaza Montreux & SPA in Montreux - Book a Luxury hotel in Lake Geneva
المفروض انه 5 ستار لكن اثاثه قديم للاسف يعني ممكن اقيمه 4 احسن من 5 بس موقع ممتاز وغرف وسيعه وحمامات عزكم الله وسيعه
بعض الصور من برا
اللوبي وتحت يكون الريوق على شارع التمشي والبحيره
الغرفه من داخل
الحمام عزكم الله
البلكونه وصور منها
اهني يتني فكره اني اهاجر بس بحكم القوي اخ بس اخ
عفيه لاتلومني اذا في صور مكرره مو مني من اللي قاعده اشوفه سبحانك ربي عكس الاجلحه والملحه بس هم يازينها من جلحه
مونترو ترا حييييل هاااااديه مو اشويه على قولت البنات يقولون ابرار هذي مو لنا حق كبلز احنا سناقل نبي اماكن صيحه ولويه قلت ماكو كل الاماكن لنا
واحنا نسوي صيحه ولويه
وهذي صوره ليليه من مونترو الرومانسيه
والصوت الجريح كان حاضر معاي بقوه في هالرحله
واسري بليل وانته بيدي سراي
امشي على نورك يجرني شعورك
خطوه ورا خطوه ألوذ في سورك
ماخلصنا يومنا الاول بكمل معاكم باجر ان شاءالله
وسامحوني راح اعيد التقرير لاني ماعرفت انقله كامل
صبـــــح الصباح فتاح يا عليم
والجيـــب مفهــــــش ولا مليـم
بس المزاج رايـــــــــق وسليـم
باب الامل بابك يارحيــــــــــــم
ضبطنا شغلنا والجي بي اس وخذينا قروضاتنا للطريج وتوكلنا على الله
الطريج كان ممتع بس وايد نلف على الجبال و هذيل بعض صور الطريج الى وجهتنا المقصوده
ولما الحين بالطريج
قبل هالطريج تقريبا بمسافه كيلو كانوا البيوت على يمينا ويسارنا منظرهم من احلى مايكوون والله لي اليوم اقول حق امي تحسفت مانزلت اصور المكان صورتهم مو راضيه تروح من بالي
ان شاءالله ارد واسافر لهم مره ثانيه
وداع يا شوق يا ذكرى وداع يا زمان كان
وكل اللي اقوله الان اباركلك بالنسيان
الحين وصلنا وجهتنا اللي خذت منا تقريبا مسافه طريج من مونترو لها ساعه ونص
والقارمن وقوقل ماب شغالين على جهازين عشان نتأكد من طريجنا
من montreux الى chamonix
الطريج كان جبلي وهذي اول تجربه لي اسوق خط جبلي عكس جنيف الى مونترو كان خط سريع الجبال وااايد وترتني وانا اسوووووق مااخفي عليكم كنت خايفه بس بالعتها عشان نبع الحنان ماتعطيني اسطوانتها المعهوده اللي مايطيع يضيع وانا قلتلج خلينا عالقطارات انتي ماتسمعين الحجي ف اضطريت اسكت واسوي روحي الوضع طبيعي
)
وصلنا شامونيه عشان نصعد قمه مون-بلان وفي ماركه رجاليه على اسمها واشيائهم اتينن
اجرنا وانتوا بكرامه جواتي لان خفنا نزلق ال 3 ساعات ب 12 يورو تقريبا وصعدنا للسحتني
الارتفاع 3842m
سعر التذكره 55 يورو للشخص
ركبنا التلفريك لصعود القمة
بدينا نشوفهم وقلبي يفرفر عليهم
وهذي شامونيه كل مالها وماتبين
هذيل الصور من الوقفه الاولى لان بعدها نصعد تليفريك ثاني ونكمل لي فوق ولما الحين امورنا طيبه
بنوصل المحطة الثانيه قمه مون بلان
وصلنا بالسلامة للقمه وهذي بعض الصور منها
جهه خضره وجبال وجهه ثلوج سبحانه
اللقطات اللي تحت التعليق حصيلت هالتفكير والتعليق
طبعا اهني انا شبه انهد حيلي اللي قلت بيني وبين نفسي وااي انا صج عيزت وكبرت كسرت خاطر نفسي
شنو اللي صار لما وصلنا طلعنا برا نصور وفي جسر يدخلنا على الكهف الثلجي والجبل الثاني الجوتي عزكم الله احسه بالمشي صار ثقيل وخطوتي اثقلت قمت اتعب قلت الله يا الفشله ابرار وانتي شباب جذي شخليتي حق العياييز واتم امشي معاهم وساكته ماابي ابين اشفيني
المهم ونشوف في مكان نصعد فوق غرفه زجاجيه نوقف فيها قالت اختي امشي نروح قلت مااقدر تعبت انا جان تضحك علي شنو مسويه ومن هالحجي قلت ماسويت شي بس احس بتعب
جان تقولي عيوز انتي ترا كلهم جم دريه امشي وراحت عني المهم امي وبنت عمي اقعدوا تحت واختي اصعدت قبلي وانا رحت الحقها بطلع العيوزه اللي فيني اشوف الدري اقصر من دري بيتنا قلت زين سهالات المهم صعدت جم ادريه الله وكيلكم الا النفس عندي حسيته خلص والله في مكان عقب الدري الاول يوفقون عنده الاوادم يوقفون دقيقه والله انا ربع ساعه واخذ بخاخي احس تعبانه حيل وانا اصعد الدري ريلي ثقيله واشوف عايله هنديه مع عيالهم صغار ولا الصغير يتحلطم على اهله ويقولهم انا تعبان والام تقول انا بعد قلت اشوه مو بروحي
صعدت اكمل لي الاخير على ماوصلت السطح مااشوف الا اختي طايحتله تصوير وانا ويهيي وصل لي ركبتي من التعب جان تقولي قعدي عالكرسي واقعد واشوفها واقول في قلبي شلون انا تعبت وليش مع انه الدري قصير والله ضاق خلقي وبعد ماريحت قمت كملت تصوير
صورنا ويتنا بنت عمي وبعدها نزلنا حق امي ورحنا الجهه الثانيه
عاد امي تقول ابرار جوتيهم تعبني قلت سكتي انا ذبحني وانا صاعده نفسي نقطع جان تقول انا ييت بصعد لكم صعدت دريتيين وماقدرت قلت اشوه انج ماكملتي انا انهد حيلي جان اشكي لها الحال ليش تعبت اقولها جان تقول من الجوتي والجاذبيه لان مافي جاذبيه تتعبين اقولها اللي حارني انه الدري قصير جان تقول اي من الجاذبيه وقلة الاوكسجين اهني تطمنت قلت اشوه ماعيزت
بعدها اختي وبنت عمي اعترفوا انهم تعبوا واهما يصعدون عاد زفيتهم ليش ماتقولون لي انكم تعبتوا بس شاطرين تضحكون علي انا راعية ربو مو مثلكم
نصيحه اي شخص راعي ربو قلب او مافي لياقه لايصعد والله متعبه بشكل خيالي هالصعده للسطح
نكمل الصور
الثلج ودي اغوص داخله
قبل لا ننزل من الجبل في مطعم فوق بس عقب ماشفنا الدري هونا وقررنا نزل مع انه المنظر في اينن والدري قصير بس التعب هد حيلنا .. واختكم من كثر ما اهي تعبانه افصخت الجوتي عزكم الله ومشت حافيه
والله اني ارتحت
بس انزفيت من نبع الحنان فشله لبسي احد يشوفنا يما تكفين انا تعبانه مو لازم احد عيب الفاهمه
وبعدها نزلنا بسلام
خلصنا من مون بلان وبنطلع من شامونيه الى .... والحين بنتجه الى مكان ثاني وحلوووو
كان الله يسلمكم طريجنا من مونترو الى آسرة القلووووب انترلاكن
from : montreux to interlaken
الطريج كان حلوو مع اشويه جبال وتعب بس الحمدلله
واخذ منا وقت ساعه ونص
وصلنا الى ملكة الجمال انترلاكن
وكان فندقنا اسمه : Lindner Grand Hotel Beau Rivage
مصنف : 5 نجوووم
لكن للاسف حتى 2 وايد عليه
الفندق من برا وشكله اللي يشوفه يقول وااو بس داخل يقول واويلاه شنو هالحظ
تقيمي للفندق جدا سيء الاثاث ولابيزة قدييييم ومتهاااالك والغرف صغيره
البرده (الستاره) ابسط شي وصخه
- بصراحه ماحبيت الفندق وضاق خلقي عليه حتى قلت للقروب نكسله وناخذ فكتوريا بس للاسف كان فل رضينا بالامر والواقع وقعدنا فيه وقزرناها بما ان مدتنا مو طويله.
بس انا ما انصح فيه حتى لو مده قصيره بصراحه حسيت B & B
عطونا نظام شقه فيها غرفتين وحمامين عزكم الله وهذيل بعض الصور وبتشوفون الحجم والاثاث ..
اللي تعجبت منه كان متروس خليجين مع انه موحلووو
الفندق من الجهه الامامية
ومن الجهة الخلفيه
الشقه
وحده من الغرف على النهر ووحده على مواقف السيارات
الحمام عزكم الله واحد صغير وواحد جبير
تكملة الغرف
وهذي الجهه اللي تطل على النهر
الممر
مكان الريوق
بعد ما ضاق خلقي من الفندق القروب كان يبي يريح قلت ماكو راحه الا وقت النوم لما نكون متليشين عدل نرتاح
بعد المطل والتصوير والسرحااااااان الى اخر مدى رجعنا ادراجنا
قطينا السياره الفندق وعطونا كروت الباص
طبعا اهني اقتراح اختي نتمشى في الباص اهي ونبع الحنان
رحنا ركبنا خذينا الباص اللي يم فندقنا وقطنا على محطة القطار الثانيه يعني طالعين فيها نبي ينزلنا لي البحير
اللله وكيلكم ماكو احد بالباص غير العيايز اللي حسيت نبع الحنان عمرها 30 واحنا الياهال من كثر ما اهما كبار مشاءالله
المهم ركبنا الباص الثاني ويصعد فينا ويبعد عن البحيرات ويصعد الجبل قلنا لا بالله لاطبنا ولا غدا الشر وين رايحين وشلون نرد قلت حق بنت عمي شوفي الجهه الثانية اذا في محطة عشان اطق الجرس ننزل ونبدل بالثانية اشوه حصلنا عقب مانزلنا والله ماقصر السايق قال وين بتروحون احنا في الجبل قلنا بنروح انترلاكن جان يقول نطروا ويدق على الباص الثاني ويقوله اوقف في قروب اخذهم معاك والله ضحكنا على اشكالنا واحنا نركض نعبر للجهه الثانية وناخذ الباص والعياييز كلهم يضحكون علينا اثاريهم رايحين بيوتهم فوق الجبل
المراد لا حد يتفلسف ويركب الباص ويعدي البحيرات من تشوفونهم طقوا الجرس ونزلوا لاتصيرون مثلنا
بعض الصور من طريج الباص
ناطرين الباص الثاني اللي صعدنا معاه لي الجبل
)
ونعدي البحيره بكل ثقه
مهما نصير ابعاد
لابد نلتقي لابد لنا ميعاد
اسفه امون اذا شفت هذا الشي ما اقاومه وانسى ابو القهوه ومنو يقول اني اشرب قهوه للاسف موراعية قهوه اكل الكاكاو صرف
اهما طلبوا بس انا ظليت قاعده اهني
بعد ماخلصوا من قهوتهم وانا من ككاوي
رحنا تغدينا في المطعم الامريكي
Hooters
بعض الصور من طاولتنا
وصلت المقبلات
الاطباق الرئيسية
للاسف الشديد ماجربتهمنبع الحنان مارضت وحلف وزف
البارشوتات
الحديقه اللي ينزلون فيها المظليين
قلبي يفرفر عليهم
مقدر على بعدك لحظه ولا أصبر
كل دنيتي بقربك يا سيدي واكثر
أنا إلي حبيتك وأنا إلي شلتك فوق
وأنا إلي عزيتك وشلون أداري الشوق
ياحبيبي ياحبيبي وبصبر
بعد يومنا امس اللي قضيناه انترلاكن قعدنا اليوم مبجر وحاطين لنا جدول نمشي على وكان على حسب الاقرب والابعد ..
من ضمن الزيارات كنت حاطة 3 شلالات بس لازم ارسي على واحد لان بنروح اماكن غير الشلالات ..
ف رسينا على Giessbach fall
شلالات جيس باخ
قعدنا على الغيمة اللي اشوي وتدخل الغرفه عندنا
بعد ماتريقنا بالفندق شغلنا سيارتنا والغارمن وتوكلنا على الله للشلال
صوت الماي بس يرد الروح ف ما بالكم ماي وخضره و ويح حسن
) احم احم
واهني وصلنا مقصدنا وهذيل بعض الصور والفيديو للشلال
والله هالمناظر اتنسينا الدنيا ومافيها
سبحان الله
اهني صعدنا الثلاثي الكوكباني وخلينا نبع الحنان تحت
اليوم الثالث والاخير من انترلاكن كالعاده قعدنا مبجر تريقنا وجهزنا اغراضنا لان ورانا سفره لمنطقة ثانيه فلازم نستغل اليوم عدل ..
قلنا الساعه 9 الصبح نطلع ونحرك وفعلا تحركنا ورحنا صبينا بانزين .. المهم واحنا نصب سألت اختي قلت لها اهي قالت 91 اللي سلمتنا السياره مو تنسين وسجلنا بالورقه رقم النوع وصبينا ومشينا الى وجهتنا
مشينا وتوكلنا على الله
وجهتنا كانت نمر على فوكس اوت لت وبعدها ندش منطقتنا لكن اللي حصل شي ما كان يخطر على البال ..
فجأه وانا اسوق دواسه البانزين مو قاعده تدوس خففت السياره بروحها واهني كنت قاطعه مسافه ساعه وربع تقريبا يعني مو باجي شي على وصولنا الاوت لت لان اهو ياخذ وقت ساعتين و 38 دقيقه ..
جان توووووقف السياره وسط الشارع وفووووووق الجبل وطريج بس حارتين رايح راد وتحتنا الوادي .. واختكم اهني ماهي عارفه شتسوي ونزل من السياره اشوف اشفيها واجيك ياربي كل شي اوكي شنو صار ارد اشغلها مافي فايده مو راضيه اجيك على الماي والمكينه والدهن كل شي تمام .. بس انا كنت شاكه في البانزين بس انا سويت اللي اهما قالوا عنه الرقم 91 .. وبدينا نعدل حركه المرور والسيارات رايحه راده علينا انا جهه وبنت عمي جهه المهم واتصل على الشركه يا انهم ما يردون او مشغوول ينيت .. لاني قاعده احاتي امي ادري اهي قاعده وساكته بس ادري انه سكرها مشلل بالعلالي والوسواس لاعب فيها .. واحاتي ابرتها ف تنرفزت مو عارفه شسوي فجأه وقف لنا اماراتي وزوجته ومسكين ماقصر معانا يحليله بس قلناله توكل على الله مانبي نعطلكم .. جان اقول بدق على الشرطة ...
كلمت الشرطة جان يقول انتوا وين قلت وانا شدراني ماكو يافطات ولا شي عشان اعرف اللي اعرفه اني فوق جبل وتحتي وادي وطالعين من انتر رايحين الاوت لت جان يقول لازم اعرف انتي وين بالضبط
وقف ورانا ريال جبير مع مرته علبالهم في اشاره انتهزت الفرصه وقلت اكلمهم قبل ما اسوي لهم درب وانا اكلم الشرطي قلت لحظة الحين يقولك هذا احنا وين رحت اسألهم ولا الطيبين مايتحجون انجليزي ... ياااااليل الليل يا ابرار شتسوين جان يقولي اتعرفين الماني قلت لا الماني ولا فارسي عربي وانجليزي غيرهم مافي .. وانا اكلمهم قلت انطر واكتب لهم في العم قوقل للترجمه بالالماني وعرفوا شنو انا ابي ( قلت قول حق الشرطي احنا واقفه سيارتنا ونبي احد ياخذنا ووين واقفين اشوه فهموا بعد الترجمه وكلموا الشرطي ) بعدين سويت لهم طريج وراحوا
المكان اللي احنا واقفين فيه اسمه سوستن الاسم اللي بالصوره فوق .. جان يقولي الشرطي خلاص احنا كلمنا الشركة واهما راح ايونكم .. والله ونقعد ساعه على ما وصلنا الونش جود اهني الساعه تقريبا 1 يعني راح علينا الاوت لت المهم ويشيل سيارتنا الونش وامي واختي فيها وانا وبنت عمي جدام مع السايق
) والمنظر مخيييييف واحنا في الونش صراحه .. الحين انا استانست الونش شفته مكمل الطريج قلت زين يقص باجي الدرب ولا ياخذ فوق تحت ويردنا عايدي قلت ليييييييييييييييييش حرام وساعه وربع اللي صعدتهم والله دخت يكفي اني خايفه وانا اصعد هالجبل اللي احس ماله نهايه جان يقول نرجع شركتنا وياخذكم تاكسي يوصلكم انترلاكن عشان تاخذون سياره من اهناك قلت لااااااا مو من صجكم والله حراااااام وصلنا كراج راعي الونش واقوله شنو فيها السياره لاني شاكة انه المكينه طقت من بعد ال 91 بعد الفحص جان يقولي المكينه قلتله عشان البانزين صح جان يقول ايي لازم تصبون ديزل مو 91 قلت ادري ولان في استيكر مكان البانزين مكتوب ديزل بس مو مني لان الشركة اهما اللي قالوا لي 91 وبعدها قال خلاص الحين تدفعون تصليحها وتروحون واتناجر معاهم واكلم الشركة وقالوا لا مو منكم من موظفتنا ومادفعنا اشوه ..
وصل التاكسي الساعه 2:15 الظهر وراااااح اليوم علينا يالله الحمدلله يت على جذي .. على ما وصلنا انترلاكن الا الساعه 3 وننزل واتهاوش مره ثانية قلت شلون ماتردون ادق محد يرد او مشغول خليتونا ندق على الشرطة وقعد يعتذر وقلت ليش ماتيبون سياره بديله بدال ماترجعونا جذي يروح الوقت جان يقول لا اهني نظامنا غير لازم من المكتب تاخذون المهم جيكنا على سيارتنا اليديده وتوكلنا على الله
وهذي سيارتنا اليديده
وكانت فولفو
قبل ما ناخذ السياره امي حنت علينا الا نروح بالقطار قلت يما ماكو الا العافيه خلينا على السياره واحنا حاجزينها وخالصين وبعدين القطار بعيد وتبديل مايسوى .. اقتنعت ومشت معانا .. ضبطنا القارمن وتوكلنا على الله ومشينا في هالجبل الى ماله نهاااااااااااااااااااااااااااايه والله كل اشوي نصعد وانا في قلبي اقول يا ابرار وين صاعدين احنا احس مافي نهايه وابي اعرف شنو راح اشوف وطبعا الطبيعه كل اشوي اتغير من تحت لي فوق من تحت الخضره اتينن وكل ما صعدنا خفت الخضره والله انا حسيت انه راسي افتر من دورة الجبل وقاعده احاتي طريج الرده انه مايصادفني جذي جبل ثاني ..
وصور اسم المنطقه مره ثانية عشان ما انساها ولايمكن انسها من بعد هالموقف
)
المهم كانت وجهتنا نروح الاوت لت ومن بعد الاوت لت منطقتنا المقصوده واهي ميلان
) مدينه التسوق ...
بس هالصور اللي صورتهم في هاليوم من اللويه اللي صارت نسيت التصوير والله ..
الطريج اخذ منا من انترلاكن الى ميلان 3 ساعات و 45 دقيقه من غير توقف وصلنا على الساعه 7 المغرب ميلان وعلى طول عالفندق وهذي صور فندقنا
اكمل معاكم اليوم الثالث في ميلان ..
قعدنا وتريقنا قلنا نروح نتمشى في سوقها بما انها مشهوره بالفاشن وننزل ونروح ساحه الدومو واهناك نوقف بنص الساحه وقلنا من وين نبتدي كل سكه فيها محلات وبدينا في الشارع اللي كله اعلام
وهذي بعض الصور و صور الدومو
اول الصور يستقبلنا علم لبنان والحب البحرين
و وصلنا الدومو
كاتدرائية ميلانو (بالإيطالية: Duomo di Milano) هي كنيسة كاتدرائية في ميلانو في لومبارديا في شمال إيطاليا. مخصصة لسانتا ماريا ناسينتي و هي مقر رئيس أساقفة ميلانو الحالي الكاردينال ديونيجي تيتامانزي. تصميم الكنيسة مشابه إلى حد كبير كنيسة نوتردام مع بعض الاختلافات البسيطة , تعد كاتدرائية ميلانو في إيطاليا ثالث كنيسة في أوروبا ضخامة، بعد كاتدرائية سان بيتر في روما وكاتدرائية سان ميشيل بأسبانيا. أرسى قواعدها جيان فاسكونتي عام 1385م، واكتمل بناؤها بأمر من نابليون الأول بين عامي 1805م و 1813م.
وأصل كلمة دومو (Duomo) لاتيني (domus) ويعني المنزل ويقصد هنا منزل الله كما هو الحال لمعنى كلمة الكاتدرائية (Cathedral) والتي تحمل نفس المعنى (house of God) أو( domus Dei)
وتضم الكاتدرئيه من الداخل الكثير من اللوحات لاشهر الرساميين العالمين كما تضم تماثيل واعمال فنيه اكثر من رائعه وعلى حدود القاعه من اليمين تجد توابيت زجاجيه وفد حفظ بداخلها جثمان بعض الاساقفه السابقين للكاتدرائيه وفى الامام تجد بيانو ضخم جدا وقد نقش بنقوش فنيه تبهر كل من يراها..
من ويكيبيديا
وهذا نسيت اسمه شي غالري
طبعا وقفنا بنص الساحه واتفقنا ننقسم انا ونبع الحنان واختي وبنت عمي وعطيتهم تايم في الوقت الفلاني لازم انتوا خالصين لان ورانا مكان ثاني مانبي يومنا يضيع في السوق لان وراهم سوق في لندن وقت الكريسماس
)
فوافقوا واتفقنا الحمدلله
وانا مع نبع الحنان نتمشى على الراحه ونتسوق وانا اصور
استعداداتهم لميلانو اكسبو
وهذا احدى وسائل النقل اللي احبهااا اكثر من الباص (الترام )
وطني.. وطن النهار إنت النهار يا وطني
إنت الأمل لي هل.. وانت النهار لي طل
آه.. آه.. يا وطن يا وطن يلي إنولدت من جديد
إنت محيط الأرض يا موج البحار وطن النهار
وياك آه عبرت الزمن عبرت الزمن الله إشكثر يا كويت
اشكثر يا كويت
قلبي خفق يا كويت يا كويت.. شلتك بيوفي وطن..
وطن.. قلبي خفق يا كويت يا كويت
وياك آه آه عبرت الزمن.. عبرت الزمن الله إشكثر
يا كويت يا كويت وياك آه.. قلبي خفق يا كويت يا كويت
إنت الوطن بس إنت.. إنت الأصل بس إنت
إنت الحياة بس انت.. غصبن على الآلام ترجع
وطن من جديد..
آه.. آه.. آه.. يا وطن يا وطن يلي إنولدت من جديد
إنت محيط الأرض يا موج البحار
وطن النهار..
وطني وطن النهار.. إنت النهار يا وطني
إنت الأمل لي هل.. وانت النهار لي طل
آه.. آه.. يا وطن يا وطن يلي انولدت
من جديد..
إنت محيط الأرض
يا موج البحار
وطن النهار
ونرجع للترام
بعض البوابات لميلانو اكسبو 2015
هذيل اللي وافين جدامكم يصورون صاحبتهم اللي واقفه مع كل جياس الماركات العالميه وماسكتهم يعني جنها اهي صج متسوقه وشاريه من كل الماركات .. طبعا عشان اتصورون مع الجياس لازم تدفعون حق صاحبهم وبعدين تصورون
)
حي الله هل القطري حي الله
بعدها قعدنا انا ونبع الحنان في كافيه ننطر دلي وملي على مايرجعون ونروح الفندق ونطلع طلعه ثانيه
طلب نبع الحنان برييد بالفراوله (جيلاتو)
نشبببه
امممووووون ارتحتي جذي طلبت كابتشينو وتيراميسو
اوقف معاكم لي اهني وباجر ان شاءالله اكمل الجزء الثاني و وين رحنا
اكمل معاكم الجزء الثاني من اليوم الثالث في ميلان
عقب ماخلصوا سوق رحنا على السريع الفندق نصلي ونقط الاغراض وناخذ السياره لرحلتنا اليايه ..
مسكنا دربنا وتوكلنا على الله وحطينا وجهتنا وكانت هذي الوجهه المقصوده ...
انها ديره
جورج كلوني
COMO
وصلنا بالسلامه اعتقد الطريج اخذ منا ساعه
وقفنا في مواقف تحت الحديقه ورا نادي كومو مع انه في مواقف يم النادي بس ما دليت المواقف قلنا ننزل نتمشى ونوصل البحيره
ونزلنا تمشينا وخذيت لكم جم صوره .. والرحله هذي انا قاصدتها لشي معين ابيه بتشوفونه في الصور
المرسى ( الجوووو كااان بااارد )
وصلنا المقصود وهذا كراجهم
وهذا مكتبهم
بعد عرفتوا ليش يايه
بجرب الطيران وفوق بحيره كومو وبيت جورج كلوني
هذا موقعهم ( aero club como )
الشخص 80 يورو
بس انا واختي ركبنا - تقريبا مده الرحله كلها 45 دقيقه
وطرنا فوووووق بيت جورج كلوني
وقالنا الكابتن اذا يخته مو واقف عند بيته يعني اهو مو موجود وللاسف كان موجود
طبعا انا كنت الضحيه قعدني الكابتن جدام واختي ورا وخلاني اصير نص دريشه الباب عند الدقم وازره الطياره قلت لا بالله طيحتنا ببيزه .. طبعا اهني بد الوسواس يلعب فيني ليش لان الطياره بصراحه مافيها سيفتي تركبون على الله واللي يصير يصير اوك هانت انه تحتي ماي لكن انا قاعده نص الباب يعني مااقدر افتح الباب واطلع ولا اختي تقدر تطلع قلت واي ياج الموت يا تارك الصلاه وفكر وفكر جان اقول حق اختي خلج بالنص علشان لو صار شي تطبين جدام معاي ونطلع من الباب بسرعه
))) الشيطان ينني بالافكار بس الحمدلله كانت من احلى التجارب وهذيل الصور .. والفيديوهات
وقت الاقلاع
فيديو الاقلاع
تنبيه : في موسيقى
الكابتن يسلم عليكم
المنظر فوق البحيره واااااو اينن
الفيديو الثاني
تنبيه : في موسيقى
بيت جورج اللي عاليسار الصف الاول في عامود
الله يرضى جذي مقعدني مع الازره ويشغلني بعد
المنطقه كلها بيوت اغنيا ومشاهير
الفيديو الثالث
تنبيه : في موسيقى
بيته اللي جدام الكنيسه
الفيديو الرابع
تنبيه : في موسيقى
الفيديو الخامس
تنبيه : في موسيقى
هذي اوضح صوره لمكان البيت
الفيديو الاخير
تنبيه : في موسيقى
وقت الهبوط نفتر على الارض بعدين ننزل على الماي
وهذي طيارتنا صافطة
وهذي الدومو بالليل
انتهى يومنا الاخير في ميلان بس ما انتهى التقرير باجي لنا اخر محطه واخلص التقرير ان شاءالله
وان شاءالله يعجبكم
الطيران كانت التجربه واايد حلووه بس ينقصها السيفتي بصراحه
القاكم بالجزء الاخير
مسائكم خير ياحلوين واسفه على التأخير
اكمل معاكم الجزء الاخير من رحلتنا واخر ليلتين
طلعنا من ميلان بتاريخ 9 اكتوبر 2014 يوم الخميس
واحنا بالطريج وحاسبين حسابنا انه نوقف عند مكان كان المفروض نوقف عنده من قبل بس قدر الله وماشاء فعل تعطلت سيارتنا ومارحناله ..
والحين بعض الصور من الطريج
يتراوالي بين مقصدنا
اهو حبيب الحريم اكثر هههههه
فوكس تاون اوت لت fox town outlet
طبعا نزلنا وعطيتهم وقت معين لكن اذن من طين واذن من عيين تقريبا قعدنا 3 ساعات وهذا شي متعب لي لاني مااحب اقعد في السوق كل هالمده اتنرفز ف حنيت عليهم حنه عشان يطلعون يعني هال3 من بعد حنه ورنه فوق روسهم
اشكر كل الشباب اللي ساعدوني في الطريج من ميلان الى زيورخ وسهلوا لي الطريج بدال جبال هاي وي ( القطري - qa6ar911 - مقدام وان شاءالله مانسيت احد اشكرهم كل الشكر )
وصلنا زيورخ بعد طريج من احلى مايكون من طبيعه وخضره
وبالتحديد على فندقنا
وهذا اسم فندقنا
4 ستار ويطل على النهر مبااااشره ماادري بحيره احترت
Steigenberger Hotel Bellerive au Lac
الفندق ممتاز من كل النواحي - الا الريوق اللي مايغيرونه في كل الفنادق نفس الشي
وهذي بعض الصور من النت من برا الفندق
لوبي الفندق
المنور عجيب
نصعد غرفنا
هذي الغرفه اللي على النهر حق نبع الحنان
اخييييه على هالمناظر اللي نقعد ونصبح عليها الواحد مايطلع من الفندق
تكرمون الحمام الشور بروح والتواليت بروح
ابي ارجع اقعد اهني
((
الغرفه الثانية twin bed وتطل على داخل الفندق
الحمام عزكم الله
والكبت
هذا اللي تطل عليه الغرفه الثانيه
بعد ماخلصنا الفندق وريجنا رحنا نتمشى في شوارع زيورخ الجميله
بصراحه حيل حبيتها وراح ارد ازورها ان شاءالله
وخليك هنا خليك .. بلاش تفارق ..
بتقول يومين .. وتغيب سنة .. بلاش تفارق ..
زيورخ تنقسم الى زيورخ القديمه بمبانيها البسيطه وبيوتها الحلوووه وزيورخ اليديده بأبراجها هذا على كلامهم
بس انا ما شفت وايد ابراج والحلو وحببني في زيورخ سكيكها اموت على السكيك
الترامات الحلوه وسهلة الاستخدام ترا استخدمناهم
برد وكاياك فراغه انتوا
) كلش مو محتره
جزء من زيورخ القديمه
شارع السوق في زيورخ اليديده
تقريبا نفس اوكسفورد على اليمين واليسار محلات
فندق سافوي على اليسار
نرجع على زيورخ القديمه وسكيكها
اتمشى تحت هالسور واناظر بيتك المهجور وينك يافنر هالبيت
بعدك انطفى العالم ومابقى بالشوارع نور
من اعز المحلات اللي فقدتها في لندن C&A
ناديت بأعلى الصوت يا صاح انا مجروح
محد سمع صوتي ومحد درا بي اه لو اشوفك يا هوى البال والروح
تأخرتي يا عمري الذي اقبل
تأخرتي وهذا الموعد الاول
احسب له انا الايام والساعات واللحظات
بعد ما تمشينا وحاشنا اليوم وبدينا نتهاوش قلت لازم ندور مطعم بأسرع وقت واحنا نمشي شفت واحد امريكي كنا نتشاور علية ما اشوف الا نبع الحنان تقول فلااافل قلت شنو فلافله يما مافي الحين جان تقول كاهوو شوفي ولا محل صغير كنسولوا الامريكي وراحوا للفلافل جان يطلع الفلافل مطعم شكبره لبنـــــــــــاني واخيرا بناكل اكل عربي والله على اول طاوله ونطلب وطبعا ماتغير حتى لليوم الثاني
)
موجود بزورخ القديمه بالساحه على النهر وجدامه مسرح مكانه وايد حلو وشرح
المقبلا
حمص - لبنه - فلافل - سلطة - عرايس
جبده دياي بدبس الرمان
الاطباق الرئيسية
كباب - شيش طاووق
الحساب ماادري جم للاسف لان نبع الحنان الله يخليها اهي اللي ادفعت
وتم القصف والحمدلله
ونطروني في اخر يوم في زيورخ وينتهي تقريري واودع البوابه الساحره ( ســـــويســـــرا )
