السلام عليكم .. موجة حر استثنائية هذه السنة ضربت ولا تزال تضرب في جوانب اوربا المختلفة ... تنتقل من مكان لاخر ... تشتد في بقعه دون اخرى ... الشتاء الاخير كان جدا مميزا في الدول الاوربيه وكان نزول الثلج كثيف على كثير من المدن الاوربية التي افتقدته ربما في الثلاث سنوات الاخيرة ... عودة الثلوج والشتاء القارس وكثافة الامطار كانت توحي بشكل او باخر بصيف ممتع وجميل .. لكن الذي حدث هو صيف حار وجاف جدا ... درجات حرارة مرتفعة تصل الى 38 درجة في بعض الاماكن ... توقف هطول الامطار لمدة بلغت اكثر من 60 يوم في بعض الاماكن مثل لندن وغيرها مما كان له كثير من الاثار السلبية مثل جفاف الحدائق العامة كالهايد بارك مثلا وتذمر كثير من السياح بسبب سوء الاحوال الجوية وارتفاع درجة الحرارة بل ووصفهم لندن بانها مدينة غير سياحية ابدا ( ولا الومهم ) ... الله سبحانه وتعالى وحده يعلم بالتغير المناخي الذي يجري حاليا وربما تحذيرات علماء المناخ الذين كانوا ولا زالوا يحذرون من اخطار كثيرة تعصف بالكوكب بسبب سوء استخدام البشر للموارد الطبيعية ... ولاننا معشر العرب المسافرون يهمنا هنا موضوع السفر بالدرجة الاولى فإن من اسعد وامتع اللحظات هو التفكير بالسفر ثم وضع الخطه ( المكان ، الزمان ، الميزانية ، الحجوزات ) ...البحث عن المكان المناسب للمسافر هو بحد ذاته متعه رغم كونها مشقة الا انها مشقه محبوبة نتيجتها تكون غالبا جميله وممتعه ..لكن ان تخطط ربما لمدة عام لإجازتك السنوية وتكافح للوصول لمكان ينافس المكان الذي اتيت منه في درجة الحرارة( على غير العادة كلندن مثلا) هنا اتوقف واقول ( الله يعوضك بخير منها ) ...
رحلة اعددت انا لها لفترة ورسمت معظم تفاصيلها شرقا وغربا ..شمالا وجنوبا .. ليكون مسار قلم الرحلة مسارا للمحاة ايضا لتعديلها ... النمسا ...وورقة جديدة في كتاب ذكرياتي .
القاكم قريبا جدا ان شاء الله تعالى ...
*** ملاحظة ***
المسافرون للنمسا لا عليكم فالنمسا لازالت هي النمسا
السلام عليكم من جديد واعتذر عن التاخر بس حوسة الوقت ورفع الصور الخ ... كان ترتيب الرحله قبل اربع شهور تقريبا ...وهو بعد رحلتي الى المانيا في الشتاء الماضي وكتبت عن الرحله
طبعا جمال الاماكن بالشتاء خلاني افكر باعادة المكان بالصيف مع بعض التعديلات لاني مااحب اكرر نفس المكان ... وبنفس الوقت استفيد اماكن جديده ... لانهم يقولون اذا نزل ثلج كثير بالشتاء فالصيف يكون جميل مررره واكثر خضرة ..
بعد تحديد الاجازة والوجهة وهي،جنوب المانيا والنمسا وشمال ايطاليا و بعد لفة سريعه ( اسبوع يمكن) على مواقع الطيران لقيت ان مطار سالزبورج في النمسا خيار مناسب جدا ،،،طبعا اختيار المطار يكون معه ايجار سياره ان كانت السفره تحتاج وبالتالي لازم نجيب المسطره والفرجار والمساحة والبرايه ونكتب ونمسح ونقرب من الحجز ونهون ... وكل ادوات الهندسه تشارك في رسم الخطه وباخر الليل اقفل الصفحات بدون حفظ شي واروح انام !!!ومن بكره ابدا من جديد!!
بعد فتره حطيت ريشة على صفحة مطار سالزبورج ،عيني،عليه ،لاقي رحلة رخيصه،بس السيارة غالية! وغالبا مااستعجل بالحجز حتى لوكان رخيص الين اتأكد انه مناسب لي ... المهم فتحت قوقل ماب وجلست اشوف،مطار سالزبورج واقول وش اسوي الحين ،مابي سيارة صغيرة ،ابي شي مريح لان السيارة الصغيرة مره متعبه وتتعب المسافرين وتهد الحيل لو فيه،مشوار ...شفت قرية المانية قريبة من سالزبورج اسمهافرايلسين Freilaasing وفيها مكتب لسيكست ..بعد ماشيكت على السيارة اللي،ابي وهي،اودي A4 لقيت الفرق تقريبا اكثر من 1200 ريال ... المكتب يبعد عن المطار :
- ساعه مشي
-خمسين دقيقه مواصلات عامة ( تكلف بالحجز اون لاين اعتقد 20 يورور ذهاب وعوده )
- من عشر الى خمسطعش دقيقه بالتاكسي ( كلفني ذهاب وعوده 67) يورو. اقل من 300 ريال ..
خلصت حجز الطيران + موقف للسيارة بمطار ستانستد + حجز السيارة واخترت الدفع الان لانه كان ارخص بمبلغ حلو بعد بالاضافة الى انه قابل للالغاء حتى يوم قبل الوصول .
بما انه الخطه كانت زيارة النمسا وقارمش وجزء من شمال ايطاليا ومايمنع من اضافة بعض المشاوير البعيده لان النهار طويل والمخطط توقف اكثر من مرة بالمشوار الواحد .. فححدت على الخريطة دائرة البحث للسكن ولقيت سكن مناسب من ناحية الموقع والسعر والتقييم وكان بقرية نمساوية هاينزبرغ Hainzenberg بيجي الكلام عليها ان شاء الله .
الان كل شي جاهز الحمد لله وباقي ننتظر وقت السفر بعد كم شهر ..... الفترة هذي كانت مزحومه شوي لنا بالاضافة الى انها شهدت موجة حر جدا قوية لدرجة انه الامطار انقطعت في اجزاء من بريطانيا لمدة تجاوزت الشهرين ..( وجعلنا من الماء كل شيء حي ) سبحان الله توقف المطر وتغير كل شي ..الحدائق يبست .. الجو اصبح جدا حار ولايطاق وخلاص ماعاد فيه طلعه من البيت الا لمشوار مهم .. وقبل السفر بيومين تقريبا بدا الجو يتحسن ونزل شوي مطر الحمد لله ... وفي يوم الرحله توجهنا للمطار بدري مره ...تقريبا الساعه 4 الفجر ( المره الماضيه يوم المانيا يالله لحقنا ع الرحله ) ووقفنا سيارتنا بمواقف المطار وكانت بعيده شوي عن المطار لانها فئات وكل ماكان اقرب كان اغلى ..انا اخترت الارخص وكان تقريبا بـ 41 جنيه استرليني (200 ريال تقريبا) للفترة من 1-8 اغسطس والسعر شامل التوصيل من المواقف لصالة المطار والعكس ..وقفت السياره وكانت عند موقف الباص رقم 22
وماطول الباص ووصل ( يمر كل ربع ساعه ) وكان فاضي وماوصلنا المطار الا وهو زحمه من كثر الناس فيه
انتظرنا تقريبا ساعه في المطار اواكثر الى وقت فتح كاونترات تسجيل الدخول وكان المطار مليان بكل معنى الكلمه خصوصا انه كان فيه رحلات تأخر اقلاعها ... وفي هذا الوقت صلينا الفجر في غرفة الصلاة ( المطار فيه غرفتين صلاة وحده قبل تجاوز بوابات الامن والثانيه بعد السوق الحرة وفيها مكان للوضوء ) سجلنا دخول وشيكوا على فيزا الشنقن حقتنا ودخلنا مع البوابات وتعدينا التفتيش ووصلنا للسوق الحرة ... وقلنا نفطر بما ان فيه فرصه .. واخترنا بريت
وما كان فيه اماكن جلوس فجلسنا ع الارض
بعد الفطور اخذنا جولة في المكان
الى وقت تحديد البوابة والتوجه لصعود الطائرة
صعدنا الطائرة في الوقت المحدد وكانت رحلتنا على طيران رايان اير
وصلنا الحمد لله وكانت مدة الرحله ساعة ونصف تقريبا
ويبدوا انهم ينظمون زيارات للاطفال
المطار كان فاضي تقريبا وماكان وقتها الا رحلتنا واصلة ..فما طولنا في الجوازات وماسالونا عن حجز السكن ولا العودة ..
طلعنا من المطار على مواقف الباص وماكان فيه باص ..
اخذنا تاكسي من قدام المطار ووصلنا في ربع ساعه تقريبا لان الطريق الاسرع كان مقفل صيانه وكلفنا 37يورو... وكانت وجهتنا لمكتب شركة سيكست
دخلنا المكتب وكانت سيارتنا جاهزة قدام الباب ... وقعنا عقدنا واستلمت السياره وكانت تكلفتها للفتره من 1-8 اغسطس 409.41 يورو شامل التأمين الشامل بنسبة تحمل (صفر) وسوو بلوك على مبلغ 500 يورو ( رجع المبلغ بعد اعادة السيارة باقل من 24 ساعه ) ... انا بعد الحجز ارسلت لهم ايميل كم المبلغ اللي بيحجزون عليه وردوا علي ثاني يوم بانه راح يتم حجز مبلغ 500 يورو .... طلعنا بالسياره وكان جنبهم محل (الدي) فدخلنا وقضينا بعض الاشياء ..سناكات ومويه وخلافه ...والمحل هذا منتشر باروربا وهو رخيص وممتاز جدا وممكن تاخذون منه وجبات جاهزة للعشاء مثلا ( احنا مانحب نجلس بعد المغرب برا فكان خيار مناسب ولذيذ بالنسبة لنا )
درجة الحرارة كانت 33 وشمس قويه ..الشي هذا خلانا نعيد ترتيب حسابات الرحله من جديد ... واول شي كنسلناه جولة سالزبورغ ..واتكنسل اماكن ثانيه ... يهمني اكون مرتاح على ان الشمس،تصقعني وانا اتمشى ... السنه هذي احس المدن لاتطاق ابدا على الاقل بالنسبة لي ... خصوصا ان الشمس والحر تستهلك الطاقة وتجيب الخمول والملل ... مكان شقتنا جنوب انسبروك في (وادي زيلرتال) قرية تطل على زيل ام زيلر اسمها هاينزبرغ ... كانت ثلاث غرف و دورتين مياه وصالة بمطبخ جانبي وبلكونه للصالة ووحدة من الغرف بمبلغ 725 يورو (3148 ريال ) لكل الفترة ... ماكانوا يقبلون البطاقة ولازم كاش ويلزمك تحول 125يورو بعد الحجز مباشرة لحساب صاحبة الشقة ..الشقة موقعها وصورها وتقييمها كان حلو
... وكنا معطين خبر لصاحبة الشقة ان وصولنا بيكون بين خمس وست مساء ..لان بنمر على اماكن بطريقنا ..
بعد الغاء سالزبورغ قررنا نمر المطعم البانورامي القريب من بيرتساو...حطيت الموقع بقوقل ماب وتوكلنا على الله
وقفنا بالمواقف القريبة من المطعم ولقينا الممشى هذا فقلنا نلقي نظرة
المشي حلو ... بس الجو حررر مره
رجعنا مع طريقنا للمطعم
المطعم كبير وفيه جلسات داخليه وخارجيه
الاسعار عاديه بس نسيت الان كم كانت ... طلعنا منه للكوخ المقلوب اللي كان ايضا قريب وعلى الطريق
متاجر سبار موجوده بكل اوروبا بس تعتبر غاليه مقارنة ب الدي او ليدل
الجو كان مره حر وشمس ساطعه بس قلنا بندخله ...
التذكره اعتبرها غاليه نوعا ما 2 كبار و2 صغار بـ 48 يورو وتقدر تدخل بها للبيت وحديقة فراشات وطيور قريبه منها (يفصل بينهم شارع ) ومتوفر مواقف كثيرة للسيارات سواء عند البيت او فوق عند الحديقة ..
يذكرني فيلم BFG
انا في الحقيقه ماتستهويني الاماكن هذي .. وكنت اتجاهلها في اماكن ثانيه بس قلنا نجرب ونشوف ... الحقيقه اللي ماكنت اعرفها .. وماسبق قريت عنها هي ان احساسك داخل المكان يتغير كليا وتحس انك مقلوب ومستحيل اذا زرتوه تمشون باستقامه مثل مشيكم بالشارع او ببيوتكم ..بتشوفون الناس يمشون على جنب ... يمكن يجيكم شوي غثيان .. الوضوع ماراح يكون طبيعي ابدا وموب سيء ايضا .. في نظري التجربة تستحق ...
طلعنا منها للحديقة وبعض الناس كانت تروح للحديقة بالسيارة من شدة الحر
يبيعون اكل للببغاوات اعتقد بواحد يورو وقالوا لنا اننا ما نحاول نجذب انتباه الببغاء الاحمر ولا نحاول نعطيه اي اكل لخطورته اللي ممكن توصل انه ممكن يقطع الاصبع ! وورونا مفتاح يقولون هو قاصه بمنقاره ! بس البقية عادي
شكله جالده الاحمر
مراحل نمو الفراشة
المكان لاباس به بس الجو كان استوائي والجو اللي داخلين منه حار فما طولنا هنا وطلعنا ..
البيت المقلوب من عند الحديقة
سبحان الله العظيم الفرق كبير قبل الدخول مع هذا النفق والخروج منه .. نفق وادي زيلرتال وبيجي له صور كثيرة ان شاء الله
اللي داخل المربع الاخضر مواقع سياحية
بداية الصعود للشقة
الطريق متعرج لانه في منتصف الجبل يمكن بس ماكان يشكل اي ازعاج
وصلنا للشقة اللي حطيت رابطها من بوكينق فوق وسعرها
استقبلتنا صاحبة الشقة وكانت جدا بشوشة .. انجليزيتها ركيكه شوي بس سهل التفاهم معها جدا
هذي الصالة
التفلزيون فيه قناة وحده اعتقد .. بس من يدور تلفزيون مع البلكونه اللي فيه ..وقنواتهم ماتنفهم بعد
المطبخ جانبي وفيه ثلاجه وغسالة صحون بس مافيه غسالة ملابس ..
الموية من الحنفيه لاتفوتكم يا جماعه ... حتى الانهار من الجبال شربنا منها شي ماسبق مر علي ..
مدخل الشقة
تقييمي للشقة 10/8 بس لو فيها غسالة ملابس . والنت ماكان يشبك دايم معنا بس اللي مو مهم له النت والغساله فهي 10/10 واحنا كان معنا نت مفتوح فما كان مسوي مشكلة ولا حتى الغسالة.
صاحبة الشقة جايبها زبالة اكرمكم الله في البلكونة وهي تجمعها كل ما امتلت وفي زبالة مستقله صغيره لباقي الاكل تجمعه بعد .. الحقيقه هي مهتمه مره بالمكان وبالناس وساكنه بنفس المكان لانه بيت كبير تسكن في جزء منه والباقي شقق تأجرها .
السلام عليكم .. رجعت لكم ثانيه مع التقرير اللي كنه صار يوجع القلب شوي ( ياخي ابي ارجع هناك ) ... التقرير اذا ماكتبته على طول بتصير وانت تكتب عين على التقرير وعين على مواقع الحجوزات وعين مغمضه على الحساب البنكي وتصير كنك ولدي وانا رايح اخذه من المدرسه اذا اخذته يسألني معك فلوس ( عشان ندخل البقاله جنب المدرسة ) فاحيانا اصير ناسي محفظتي ماجبتها او متأخرين على اخته او تصير البقاله زحمه واقوله بكره او اقول ايه معي ونروح للبقاله ... فاحتمالات لا اكثر من احتمالات نعم
... المهم نرجع للبقاله .. قصدي التقرير ...
اليوم الجزء صغير وهو لمكان واحد وهو لباقي يوم زيارات الجزء السابق ... المنطقة هذي غنيه جدا جدا جدا بالاماكن ولو يجلس الواحد فيها ومايبعد ماراح يمل ابد ... المكان مااردي اذا احد كتب عنه بالعربي او لا ..
بعد ماطلعنا من البحيرة كملنا مع نفس الطريق وسبحان الله جمال شفناه في الطريق سبحان من ابدعه لدرجة فيه مكان وقفنا فيه وعجزنا نتحرك وطولنا فيه الين الناس بدو يتجمعون للتصوير وانزحم شوي فمشينا لانه مكان صغير والجزء القادم بحط صورته ومكانه ان شاء الله لاننا كملنا مع الطريق الين وصلنا لبوابة شلالال كريميل ... وبعد ماكنا نعرف عنها ( احس هالسفرة ما قرينا كثير لان كنا بس نبي نرتاح شوي بماكن حلو وبس ) الوقت كان العصر وكل شي بيقفل والدخول للسيارة ب 10 يورو . فقلنا نجي لها بدري ان شاء الله افضل ... ورجعنا مع طريقنا .. الوقت وقت اغلاق الاماكن تقريبا وبدري على الرجوع للشقة فكان عندي مكان ماادري وشو بس كنت شايفه بقوقل ماب حولنا وقلت نروح له في الوقت الفاضي هذا .. تمشيه وأسوأ شي ان ماكان حلو اكيد التمشية بتكون حلوه ...
وادي زيلرتال يعج ( حنا اللي نعج والله ) بالاماكن ... الدعاسيق بين جبال الالب مليانه اماكن هاديه ، عجيبه ، سياحها قليلين ... احيانا تكون محتاج لمكان مافيه الا انت واسرتك ، موب لشي .. بس كذا !!
المكان تابع لقرية مايرهوفن والقرية بعد شكلها حلو بس ماوقفنا فيها .. مرينا وهم فاتحين ورجعنا وهم ( يمكن راقدين ) كان كلش مقفل ...
المكان اسمه بحيرة شتيل اب Stillup
واحنا بالطريق له الجوال ودانا لداخل القرية والطريق كان مقفل !! بس اعتقد كان فيه غلط او شي .. فرجعنا للمدخل اللي قبل المدخل اللي ودانا معه قوقل ماب ومشى الحال ...
واللي مامعه سيارة فيه باصات تودي لها ..او مايبي يسوق معه لأن الطريق لسيارة وحده بس ولو احد قابلك لازم تتتفاهمون من يرجع ( فيه اماكن تجي وسيعه شوي عشان لو احد قابلك فالاقرب يرجع لها ) ...
واحنا نمر من خلال القرية
بداية الطريق من هنا .... يقال ان الدخول ب 8 يورو بس ماادري عن صحة الكلام هذا لان البوابة مفتوحه ...
بسم الله .. الطريق لان مافيه حواجز والمنحدر عالي فيمكن يسبب توتر شوي !! اقبل اني اسوق في الصيف وبدون مطر .. بس في الشتاء والارض ثلج !! اعتقد صعب !!
بتشوفون مثل ذولي كثير ... وانا شربت من كم وحده هههه
المكان بين جبال واخر العصر ... وهذا على سيكل .. انا عساي افتح الدريشة !!
المنطقة زراعية وقروية لابعد حد يمكن ...
مزارع على جانبي الطريق
اماكن الجداول والشلالات واضحه بس لان الوقت صيف والسنه هذي المطر قليل فللاسف الاغلب كان واقف بس واضح الاثر
كل ماسمح المكان بالوقوف وقفنا ونزلنا من السياره ...
اذا وصلتوا النفق هذا شغلوا كاميرا الفيديوا الين تطلعون او السناب او اي شي يسجل لحظة بديعة سبحان الله العظيم وقت الخروج منه ...
بداية الوصول وتشوفون الشلال نازل من الجبل
فندق صغير يمكنه 10 غرف بس !! وفيه مطعم ومسبح
سموا بالله ...
ثم عدنا
المكان من بداية الطريق الى النهاية سبحه من لآلئ الجمال ... من اجمل ما رأيت ... ريف حقيقي .. تقييمي له 10/10 وانصح بزيارته واللي يحبون الطبيعه متاكد بيعجبهم .. الصور ماتعرض ولا واحد بالميه حتى من جمال المكان .. ودي اخذكم لهناك عشان تصدقون
.... وبصراحة اتمنى اخذ الطريق مشي بدون سيارة ... كل هذا الجمال ثم يجي واحد منهم ينتحر يقول ضايق صدره من الدنيا !! قال الله تعالى ( ومن أعرض عن ذكري فإن له معيشة ضنكا ) .. طيب قبل تنتحر اكتب البيت بإسمي ..
نهاية الجزء هذا هنا ولعله يكون مفيد ولو بشي بسيط ..واللي يروح له على نصيحتي لا ينساني بدعوه لي (موب علي ) ... كونوا بخير ...
الحمد لله الجو لابأس به وبالنسبة لي الشمس ولا المطر في السفر وكل ايام هذي الرحلة كان المطر بالليل وصحو بالنهار ( مع شمس قوية ) .. اليوم كنا ناوين نروح لاوت لت في ميونخ والصدق المشوار هو موب للسوق .. بس كان ودنا نمر المانيا بالصيف بعد زيارتنا لها الشتاء الماضي ..
ووقفنا بكوفي في المانيا على الطريق ..الخبز الالماني طعمه جدا لذيذ حتى لو تاكله ساده بدون اي حشوة ..
الجزء هذ ماراح اتكلم عنه لاني مالقيت له صور عندي !!
لما خلصنا من السوق قلنا بنرجع من جهة انسبروك لان الطريق كان مرره عاجبنا بالشتاء ونمر المناطق اللي زرناها ع السريع ...
كان فيه منطقة بنوقف فيها اللي هي منطقة القرية الاولمبية في قارميش بس غيرنا راينا لسببين : الاول مافيه مواقف متوفرة والمنطقة مره زحمه يمكن عشرات الالاف من الناس موجودين والسبب الثاني الشمس الحاره جدا .. كانت الشمس جدا ساطعه ذاك اليوم ولو وقفنا بعيد بنستهلك طاقتنا ماوصلنا ثم نعلق بالزحام الموجود ( ماحسينا الشغله تستاهل هالتعب ) خصوصا الصغار بيكون متعب لهم بعد ... فكملنا الطريق ..
الطريق مره ممتع ... واطلالالته من فوق الجبال كانت حلوه ..
قبل نهاية طريق جبال الالب توقفنا في مطعم التورنيت
وهذا عنوانه على قوقل ماب
المكان له اطلاله حلوه على انسبروك واللي حولها .. كنا داخلين نتقهوى بس غيرنا راينا شوي
الجلسه فيه حلوه ..
جلسنا فيه ساعه وشوي ثم مشينا ...
رجعنا لقريبتنا زيل ام زيلر ووقفنا نتمشى فيها شوي ...
يخرفون تفاحهم
التمشي بدون سيارة مره ممتع
وعلى المغرب ... رجعنا لشقتنا ..
اصبحنا اليوم التالي ... وكانت الوجهة لـ امست .. طبعا هي كانت ناوين نروح لها ثاني يوم من الوصول وتكون مع هايدي وليختنشتاين ... طبعا امست فيها اشياء ثانيه غير الزحليقة مثل الدراجات النارية والساقوي ونطيطات وغيرها ...
الزحليقة هنا تعتبر اطول زحليقة بالعالم ويجي بعدها زحليقة تودناو في المانيا والفرق بينهم تقريبا 500 متر .. بالنسبة لي زحليقة تودناو احلى لان منحدرها اقوى بس امست منبسطة شوي ( تصلح للي يخافون ) بس اجمالا حلوه
ويتوفر مواقف مجانية
كنا جايين للزحليقة فصفينا بالسرى واخذنا تذاكر واللي كانت نوعين اما انك تصعد مشي وفيه مسار بس اعتقد متعب وماشفت احد يروح معه الا قليل مره او تصعد باللفت ( تلفريك ) ..طبعا طلعنا بالتلفريك ...
*****بس انتبهوا *****
اذا معكم شنطة ظهر او شنطة يد كبيرة شوي فخلوها بالسيارة او خذوا لها وقت حجز التذاكر صندوق امانات لان بتقدرون تطلعون بها بس اذا جيتوا تركبون الزحليقة بيرفضون تاخذونها معكم وبيخلونكم ترسلونها تحت في التلفريك وتحت بيرمونها بصندوق الشناط وطبعا مافيه كرت ولا اي شي وممكن اي احد ياخذ شنطتك لانك بترسلها على مسؤليتك ...انا تهاوشت معهم وهم اصلا اخلاقهم ((زباله هنالك )) تكرمون ... ومافيه اي تنبيه تحت بالشي هذا لا عربي ولا انقليزي ولا اي شي ... طبعا اخذت جوازتنا والاشياء اللي نخاف عليها وارسلنا الباقي ....
وانا بالتلفريك ...
الوقت طويل بصراحة بالتلفريك بس انه المناظر جدا حلوه ...
بعد الوصول تقدر تحجز من جديد وتكمل للقمه بس احنا ماررحنا ...
درجة الحرارة ... بس الشمس مره قويه
**** ملاحظة ثانية **** احس التنظيم عندهم ابو ريالين ...
اذا وصلت فوق لا تقعد تتمشى وتتقهوى واذا تعبت قلت بروح للزحليقة وانزل تراك بتنصدم مثلي ... يوم وصلنا قلنا نتمشى لان فيه ممشى وفيه كوفي وفيه اماكن نبغى نشوفها ...
ولقينا هالممشى شكله يوصل لشلال او شي ...
مسافة المشي طويله .. يمكن 2 كيلو او شي ...وما كملناها لان شمس قوية والشي الثاني الوقت كان كله قل امطار الفترة هذيك فيصير قهر تمشي مسافة طويلة ومعك هالصغار وتوصل ماتحصل شي !! ومافيه اشجار بالطريق تقريبا تظللك ..
رجعنا بناخذ الزحليقة وننزل ...
وصلنا كشك وسرا !! الوضع مايطمن ...
سئلت قال لازم تاخذ رقم عشان تنزل ( بالتذكره اللي معك ماتدفع شي ) قلت طيب مو مشكلة هذي تذاكرنا وعطنا رقم ... عطانا ارقام وقال بعد 40 دقيقه تعالوا !!!! عمى يعميك مايبطيك وش 40 دقيقه !! قال مافيه هذا النظام وشف الناس واقفه تحتري دورها ... رحنا نقطه هالـ 40 دقيقه ..
الكوفي مليان ومافيه مكان ..
الين جاء وقتنا ... رحنا ويوم جينا ندخل قال الشناط ممنوع .. قلت وش نسوي ؟ قال ارسلوها مع التلفريك تحت ( واحنا طالعين اشوف كراسي التلفريك تقابلنا فيها شناط ومستغرب موب وحده ولا ثنتين يعني موب معقول احد ناسيها او طايح او شي ) واخذنا جوازتنا واشياءنا وارسلناها ورجعنا لسرانا ودخلنا ...
وانطلقنا
الزحليقة حلوه الا اذا كان قدامك احد خواف او يهدي يتفرج ويصور .. المكان هنا بالذات موب محل تصوير ... اللي يهدون يخربون متعة اللعب على اللي وراهم وهذا اللي صار لنا قدامنا كان وحده وماخذه الموضوع بسعة صدر وانرصينا تقريبا 4 عربات وراها وهي ولا همها والله ....
خلصنا من الزحليقة واخذنا جوله بالمكان .. الموظفين هناك نفسياتهم جدا سيئة وبالنسبة لي ماراح ارجع هنا ثانيه ...
رجعنا لوادينا وادي زيلرتال ( حتى اسمه يفتح النفس موب امست تحس وانت تقوله يجيك كتمه .. احس حاقد عليهم )
بعدا مادخلنا الوادي كان فيه شوي زحمه وكنا شوي جوعانين فشفنا مطعم وقلنا نلف له ...
مطعم بيتزا وباستا ... يملكه اتراك ...
هذي صورته من برا
المطعم الجلسه فيه جدا ممتعه خصوصا جلساته الخارجيه لان بتكون اطلالتك على الجبال برا
الاكل 10/10 جدا لذيذ وكثير ...
بعد ما تنشطنا طلعنا
وقلنا بنروح جهة البحيرة اللي زرناها امس ..
المكان هذا بعد البحيرة اللي سبق قلت وقفنا فيه ...سبحان الله من اجمل الاطلالات اللي شفتها بحياتي .... والصورة ماتعطي ولا 1% من روعته ...
رجعنا للبحيرة لان تحتها فيه عباره ( مكان لتصريف المياه من البحيره )
المكان صغير بس حلو التمشية فيه ...
ماكان فيه احد غيرنا
رجعنا لشقتنا ...
هذا المكان جنب الشقة
نوقف هنا معكم ونشوفكم بالجزء القادم ان شاء الله ... وسامحونا على القصور ...
