السلام عليكم ورحمة الله وبركاته اعرف اني مقصر كثير في حق المنتدى بس الواحد يجيه تبلد من كثر الشغل ويطب عليه كسل عجيب لانه مهما سوى يحس انه ماانجز شي
... عندي اشياء كنت بنزلها عن كذا مكان بس انها مع الايام راحت وبردت انا لان حسيت اني يمكن نسيت بعض المعلومات ...
اليوم تقريبا من كم ساعة رجعت من المانيا بعد اجازة موب طويلة بس الحمد لله المهم انها اجازة
... قلت لازم اسوي تقرير لو بسيط ومااعتقد اني يعني ابضيف للمنتدى او للمحتوى عن المنطقة هذي شي كثير بس اللهم ان اكثر الموجود حسب علمي هو ان المتوفر عنها هو وقت الصيف ويمكن محد يفضلها في الشتاء وانا كنت فعلا خايف وماكنت انصح ان احد يجي في الشتاء ... التقرير كثير من اماكنه جدا مشهورة ومعروفة وفيه منها اللي ماخذ حقه من المدح او الذم حتى اني صرت مثل اللي جالس بين الشمس والظلال
مدري وش اسوي ... وماتدرون وش سويت
.. الرحلة صار فيها احداث ومن اليوم الاول بعد !!
... بس الجميل ان فعلا السفر مو مجرد رحلة او اجازة تخلصها وترجع لحياتك العادية .. هو بتعدد السفرات واختلاف الوجهات راح يكون عند الواحد وهو مايدري رصيد خبرات يقدر بواسطته يسيطر على انفعالاته ويتخذ قراراته واللي ان شاء الله راح تكون صح ...
هذي مقدمة بس عشان اربط نفسي والتزم بوضع التقرير والا انا اعرف انها ميب مفيدة ابدا لكم واعتذر لكم عنها ...
اتمنى اني اقدر انقل صورة حقيقية للي شفته حسب استطاعتي وبحاول وانا اكتب اني مااتذكر بعض الناس من الكتاب هنا اللي ماشاء الله لااله الا الله ينقل الصورة ويحسسك انك كنت معه واتمنى تنسونهم بعد عشان مايجيكم احباط
رجعت لكم ....
جيت بحمل الصور وطلع لي ((لا يمكن معالجة طلبك، لأن رمز الأمن مفقود أو غير متطابق.اذا كان هذا حدث غير متوقع, الرجاء تبليغ الإدارة وتوضيح المشكلة وعلاجها قبل ظهور هذا الخطأ.))وتم الابلاغ وينقلني لصفحة بيضاء. عاد بسولف عليكم الين يزين مركز التحميل ...
فكرة السفر كانت قبل شهر ونص تقريبا ... كان فيه اجازة اسبوع ... فكنا نقول نروح ايطاليا ادفى شوي ومايعيقنا البرد كثير ... بس قلنا ليش مانجرب الشتاء خصوصا ان ولدي وده يشوف ثلج طوله وهذي فرصة اجازة وفي الشتاء .. واحترنا في المكان وين نروح ووقع الاختيار على المانيا وكانت الفكرة اننا نقسمها الى مرحلتين اساسيتين .. الاولى قارمش والثانية بادن بادن .. وبما ان الجو هناك مو واضح عندي مره وبما ان قرار السكن راح يكون في القرى والوقت راح يكون شتاء ونزول ثلوج ومالقيت مواضيع عن المنطقة في الشتاء فقررنا ان الوصول والمغادرة بتكون من مطار بادن بادن ... شيكت على حجز الطيران في اكثر من موقع وطيران يوصل بادن بادن من لندن ووقع الاختيار على طيران راين اير وهو طيران اقتصادي وكل شي لازم تدفع له وكل راكب له شنطة ظهر وحده بمقاس محدد اما شنطة الكبينة وشنطة الشحن فلازم تدفع لها للاتجاهين ( الروحه والرجعه ) وحجزت لشنطة كبينة وشنطة شحن وممكن ماتدفع للكبينه بس عند البوابة ياخذونها منك ويحطونها من الشحن وتستلمها في المطار من سير الشنط . ومع كذا كان سعرهم وقتها هو الافضل ويدعمه موعد وصولها الى المانيا كان جدا ممتاز وهو عشر الصباح
- حجز السكن والسيارة بتكم عنه في وقته ..
..وقت السفر كان من 11 فبراير 2018 الساعة 8 الصباح بتوقيت لندن من مطار ستانستد لندن الى مطار بادن بادن في المانيا ووقت الوصول الساعة 10بتوقيت بادن بادن ووقت الرحلة كان ساعة ( فيه فرق ساعة بالتوقيت بين بريطانيا والمانيا) والعودة 17 فبراير ..
الاماكن اللي تمت زيارتها متوزعة بدون اي عدل بين المانيا والنمسا وسويسرا وفرنسا لان بعضها صار تحت حكم ظروف الطقس ... بحاول اسرد الرحلة حسب تسلسلها الزمني مع الصور قدر الامكان ... عندي مئات الصور بس بختار منها مجموعة اتمنى تكون مفيده في نقل بعض الصورة والا فابداع الخالق جل جلاله لايبلغه وصف واصف ولا نقل ناقل حتى وان كانت صورة ...
من الاشياء اللي اسويها دايم من ضمن الحجوزات هو اني احجز موقف للسيارة في المطار قبل وقت وغالبا بعد حجز الرحلة مباشرة عشان اقدر احصل على سعر حلو ومايهم مكان الموقف لان كل المواقف فيها نقل ترددي ... وفيه طريقة انك تحجز موقف عند الصالة ويقابلك موظف الموقف وياخذ منك السيارة لخارج المطار وهي فكرة حلوه بعد وسبق جربتها ووقت وصولك تكلمهم ويجيبونها لك ....
المهم يوم السبت وهو قبل الرحلة بيوم طلعت الصباح من البيت بركب سيارتي الا والقاها مصدومه !!!!! طبعا اللي صادمها هرب والصدم كان بالليل لانها كانت مثلجه ... وسالفه على ماعرفت انها مصدومه او مسروقه .. وخفت يؤثر على سفري بس كلمت االتامين وقالوا سافر واذا جيت كلمنا ... وكانت هذي اول روعه ( تخويف او حدث سلبي ) والروعات واجد ...
مشينا من البيت قبل وقت الرحله بساعتين ونصف والحقيقه انه وقت غير كافي ابد خصوصا اني بداية رحت لموقف غلط !! ودلني الموظف هناك على المكان الصحيح وهو يبعد خمس دقايق بالسيارة بس يظل وقت ثمين جدا للمتأخر مثلي ورحت بسرعة وجتني الروعه الثالثه ( الثانية ان الموقف غلط ) المواقف جدا كبيرة وغير اللي انا متعود عليه ( متعود اسلمهم السيارة وعلى طول يوصلوني بفان او الباص يكون باقي عليه شوي وحولك موظفين تقدر تسالهم ) ولازم اوقف السيارة وانتظر بموقف الباص ونظامهم مثل المواقف العمومية بالشوارع توقف الين يجي الباص وماتدري متى بيجي ومافيه احد تساله وماتدي كانه توه ماشي او لا !! وانا اصلا متأخر وباقي على موعد الاقلاع ساعه ومعي شنطة لازم تنشحن !!! واشتغل بليس علي ماعنده غيري !! سيارتي مصدومه والرحلة تبي تفوتني .. والفلوس غير مسترده ...يالله الخيره ... الا ويوصل الباص الحمد لله ونركب والوقت للمطار تقريبا ربع ساعة وننزل بسرعة وطيران للكاونترات ... ونمسك سرى الين جاء دورنا ... قالت الموظفه وراكم توكم تجون !! يالله حط الشنطة واركضوا للبوابة يالله يمديكم .... والاها صادقه ... مطار صغير تشوفه بس انه مصير !! متلوي وزين !! بس ماشفنا من زينه شي ماامدانا .. ركض بالممرات + حسايف على سوقهم الحره .. يمكنه ينافس هيثرو ووقتها يمكنه ازين منه عشان ماقدرنا نشوفه ...واذا صرت مستعجل كل شي ممكن يعطلك لازم يصير لك ... واتعطل عند البوابة حقت التفتيش عشان سحاب البلوزة رن عليه الجرس وامسك سرى مع اللي ماسكين عشان يتأكدون ... ثم نكمل الركضة الين وصلنا بوابتنا وصرنا اخر ناس بالسرا ماورانا الا اثنين كانوا موجودين قبلنا بس جالسين ع الكراسي .... والحمد لله مشت امورنا ولحقنا طيارتنا ...
الحمد لله لحقنا الطياره ومااخفيكم رغم اني ضاق صدري على سوقهم ماشفته زين بس اني عرفت احساس الناس اللي يجون متاخرين كيف ... ماتجلس ساعتين قدام البوابة تحتريها تفتح ثم ساعه او اكثر في السرا عشان تركب الطياره ... من دخلنا المطار الين جلسنا على الكرسي في الطياره واحنا مشغوووولين حتى ماتكلمنا مع بعض يمكن .. كلها ركض .. وعشان كذا بتشوفون ايش سوينا في الرجعه ... اقلعت طيارتنا في الوقت المحدد لها الحمد لله ... عاد ولدي الله يصلحه اي وسيلة مواصلات سواء برية او بحرية او جوية نركبها لازم يغرف قلبي !! ( يزرع في قلبي الرعب ) يقول عطني جوالي واقول له انتظر الين تطير الطياره .. قال الين تطيح !!!
الحمد لله وصلنا سالمين لمطار بادن بادن الساعة عشر وربع الصباح تقريبا واستقبلتنا بسنو خفيف ( ثلج خفيف ) وماكان الجوا بارد جدا ( طبعا كنت متابع الطقس قبل نجي ويعطي قياسات توصل الى 13 تحت الصفر عشان كذا الشناط مليانه شتوي ونصه رجع بدون ماينلبس ) ... نزلنا من الطيارة للباص ومن الباص للصالة ... مطارهم اصغر من جنيف بكثير واصغر من كولمبوا بعد ... لدرجة ان بعض الركاب في سرا الجوازات ( وانا منهم )واقفين عند الباص برا الصاله مع ان فيه اربع كاونترات مفتوحة ... مطار يجيب الغلقة للي يشتغل فيه من صغره .. لدرجة ان سوقهم الحرة محل واحد وشكله مفتوح عشان مايقال ماعندهم سوق !!! فاللي يبي يرجع من هالمطار لايستعجل بالجيه ترا مافيه شي يستاهل ابدا ..هم للامانة مقفلين قسم صغير منه الان يمكن عشان يكبرون بقالتهم شوي !!
وصل دورنا للجوازات وكان الموظف جدا بشوش وسالنا :
- ليش جايين ؟
- كم بتجلسون ؟
- وين بتروحون ؟
وماطلب اي اثبات لاي شي مثل حجز عودة او حجز سكن .. وبصمنا وختم لنا ودخلنا ...
- السيارة :
حجزت سيارة من سيكست وكانت السيارة مو متوفرة في فرع المطار ولازم اروح مدرينة كارلسوه Karlsruhe عشان استلمها وبعد لازم ادفع رسوم استلام لان باخذها في خارج وقت الدوام ...
اخذت باص من عند المطار الى مدينة راستات ومنها بالقطار الى كارلسوه ( موظف الاستعلامات قص لي تذكرة الباص وتذكرة القطار من المكينة قدام موقف الباص وكان جدا خدوم وشكله من الهند اوذيك المناطق ...سعر التذكرتين لـ2 كبار و طفلين 24 يورو ..
كان مشوار الباص تقريبا 40 دقيقة
وصلنا المحطة وتوجهنا لرصيف القطار المتوجه الى كارلسوه
المشوار كان تقريبا 20 دقيقة وكان معنا في القطار فرقة سيرك وكنت واقف عند باب القطار عشان الشنطة كبيرة والمشوار مو مستاهل الجلوس ... وكان فيه واقف جنبي شايب الماني وجلس يشرح لي عن حقين السيرك بالالماني وانا اقول له انقليزي وسافهني جالس يشرح لي فقمت اهز له راسي كني فاهم عليه ... وصلنا لوجهتنا وكانت المحطه كبيرة ... وطبعا بما ان المدينه شكله مو سياحية فالانقليزي والعربي سوا هناك ... اعطيت سواق التاكسي ورقة الحجز ووريته المكان وخذنا لهناك بـ 15 يورو ... سعر العداد كان 21 يورو .. بس قال انا قايل 15 لكم لاني سالته قبل نركب معه .....
كان موعد حجزنا الساعة 12:30 الظهر ووصلنا المكتب قبل الموعد بخمس دقايق وكان مقفل ... اتصلنا على الرقم الموجود ع المكتب ورد الموظف وقال انا جايكم بالطريق ... هو ماتأخر عن الموعد بس قلت اتأكد وش السالفة ...
تكلفة السيارة اودي A4 لـ 6 ايام كانت 432 يورو ( شامل تأمين شامل ( صفر ) + رسوم استلام السيارة في غير وقت الدوام + رسوم تسليمها في المطار ( اختلاف المكان ) وكان التامين 950 جنيه استرليني ( مدري كم باليورو بس اكثر شي بسيط ) .
كنت حاجز ببطاقة بنك لويدز وكانت ديبت كارد وسبق حجزت بها كم مره من قبل بس عنده جربها وماقبلها .. قال ماقدرت استخدمها للتأمين ( عشان يحجز التامين ) وحسيت اني توهقت وان كل مخططات السفره طارت ... لان كل شي معتمد على السيارة ... وقلت له دبرنا احنا كذا صارنا عالقين في المكان هذا .. وهل فيه احد ممكن يقبلها ؟ قال اليوم الاحد وكل الناس مقفله .. وكل شركات السيارات ماراح تقبلها لان النظام واحد ... وكل مديره يساله كان فيه حل ومامشت الامور .. والحقيقه انه ماقصر ابد .. قال خذ وقتك كان تقدر تدبر امورك !! وانا مدري وقتها وش اسوي !! بس انه كان احباط مره !! والقهر اني حاجز السيارة من شهر ومدخل بيانات البطاقة حقتي ومرسلين لي تاكيد الحجز .. يعني ماكنت احس فيه اي مشكله ... المهم تذكرت بطاقة تسوق الراجحي .. شافها قال مااعتقد تمشي بس ابجربها ..قلت مافيها فلوس ولازم اشحنها .. واخاف اشحنها ولاتقبلها وتتعلق الفلوس فيها بعد !! قال خل اجرب واذا تمشي بيطلع انه مافيها رصيد ... قلت اوك .. وجربها وجت رسالة الراجحي ان العلمية مرفوضة عشان الرصيد ... شحنت البطاقة وتمت العملية الحمد لله .. كان حجزي مرسيدس ولو ماتوفر اودي فهو يوم وراني الاودي الحقيقه ماركزت فيها لو معطيني اي شي ابي اقبله ..المهم سيارة ... وبما ان السيارات الان كلها يجي معها نافقيشن فماله داعي وقت الحجز تدفع حق واحد .. وقوقل ماب يقوم باللازم واكثر بعد لو احتجت ... فوقت ترتيب شنطة السفر خذ معك حامل للجوال عشان السيارة ...
بما انه الوقت كله ركض ثم شد اعصاب مع السيارة فمعليش الفقرة هذي مافيه صور .. وازيدكم من الشعر بيت انه نسينا الكاميرا معلقة على باب الصالة .. بس الجوالات قامت بالواجب ....
اخذنا السيارة وكانت فل ومدري هي بنزين او ديزل والله ... كانت الخطه بما انه وقتنا توه بدري والمشوار لوجهتنا الاولى تقريبا 4 ساعات انه نوقف بميونخ خصوصا انه مبلغين اصحاب الشقه انه ممكن نتاخر وانه بنبلغهم عن طريق رسايل الموقع قبل وصولنا بوقت كافي بس بعد الحوسة ذي والروعة الغينا الفكره مؤقتا وحطيت وجهتنا الاولى اللي هي ويلين باخ Wielenbach https://www.google.com.sa/maps/place...7!4d11.1602926
طبعا سبب اختيار القرية هذي اني كنت ادور في airbnb عن سكن بقارمش وشفت مكانه ع الخريطه وكان حلو ... بس يوم حجزته مدري وراه نزل شوي عن مكانه ههههه .. مكان السكن متوسط بين ميونخ وقارمش وانا اعتبره كموقع انطلاق يومي حلو للي مايبي يغير سكن كثير او يبي سكن رخيص ومنه يقدر يوصل انسبروك او حتى شمال ايطاليا( بعيده شوي ) ويقدر يوصل ميونخ بالراحه ... عيوبها انها فعلا فعلا قرية صغيرة وماعندهم الا بقالة وحده تبع محطة البنزين بس فيه حولهم قرى اكبر مخدومة بالمطاعم وكذا ...بس هذا بالنسبة لنا ماكان نقطة سلبيه ابد ...
السكن هو عبارة عن شقة فوق في بيت عائلة المانية مكونه من رجل وزوجته او امراه وزوجها ( شكلها قوية ) ... والشقة عبارة عن غرفتين وصالة ومطبخ ودورة مياه اجلكم الله ...وموقف السيارة بالشارع ومجاني ... وكان سعرها 188 جنيه استرليني للفترة من 11-14 فبراير
الصالة صغيرة ومافيه الا طاولة اكل .. شكلها تعشوا ونوموا لاحد يسهر ... وفيه بلكونه فيها كراسي وطاوله تطل على الحديقة
طرف المطبخ .. وهو مجهز بكل شي وفيه غسالة صحون ..
الغرفة الاولى وفيها بلكونه صغيره وتلفزيون ( نظام العجوز غريب الغرف فيه تلفزيونات ومكتبة ) وفيها منشورات وخرايط سياحية ( بالالماني)
الشقه مررررره نظيفة وجديده بس عيبهم يسكرون الدفايات الساعة 11 بالليل !! والمشكلة الرجال مايعرف انقليزي والعجوز كلمة انقليزي وعشر الماني وانت وفهمك عاد .. واللي فهمته منه انه يقول بالنهار طول على الدفايات لاخر شي عشان يجلس البيت دافي كل الليل ... وموفرين كمية كبيرة من البطانيات ....وبما انه الاحد وكل شي مقفل حتى بقالة المحطه .. فكان لازم نروح للقرية اللي جنبهم عشان العشاء ...
نمنا والصباح قمنا على جو يعجبنا وهو انه كان الثلج ينزل والدنيا بيضاء ...
اوقف معكم هنا ... وارجع لكم مع بداية رحلتنا وتمشياتنا + الصور
قمنا الصبح بدري قبل طلوع الشمس وصلينا الفجر وطبعا مثل ماقلت الدنيا برا كانت بيضاء والثلج ينزل بشويش .. نسيت اقول انه من سلبيات الشقه انه مافيها نت بس بالنسبة لنا ماكان مشكله لانه كان معنا نت ... انا معي تجوال 4جيجا ومكالمات مفتوحة من فودافون وام عبدالله معها عرض نت مفتوح كل يوم نت شركة ثري بـ 5 باوند باليوم وتقدر توزع منه نت ...
احنا قبل السفر بفترة عارفين وين بنروح ومسوين جدولنا اللي قابل للتغير وقابل للالغاء حسب ظروف الجو .... فما فيه يوم فاضي او نصحى موب عارفين وش بنسوي بس محتمل نصحى ونكنسل الطلعه هههه ... لان من شفت العجوز حاطه اونو والعاب جماعية وانا حاس انه ممكن يصير شي يجلسك بالبيت ..
استعدينا للخروج وبما انه معانا سيارة فأخذنا شنطة ملابس اضافيه تحسبا لاي ظروف خصوصا مع الصغار يمكن ملابس تتبلل من اللعب بالثلج او المطر ... وطبعا ماخذين احتياطنا بقفازات التزلج عشان الواحد ياخذ راحته باللعب في الثلج او مناطق التزلج ونفس الشي ماخذين ابوات .. فصايرة شنطة السيارة جاهزة للنزول بمناطق الثلج ...
سيارتنا الصباح
ركبنا سيارتنا وتوكلنا على الله للمدينة الصغيرة وايلهايم اللي جنبنا عشان نفطر فيها ...
وقفنا بمواقف السنتر واحب اصور مكان السيارة والاماكن اللي حولها
كنا مختارين محل من قوقل ماب بس مالقيناه ورحنا لغيره ...
لقينا مولر ودخلناه
طعم الخبز في المانيا جدا غير .... معجناتهم جدا جدا لذيذة مدري اذا احد لاحظ كذا ؟ انا اجبتني هي والفرنسية ...
السنتر حق القرية كان حلو ومرتب ... بعد الفطور كانت لنا اكثر من وجهة في هذا اليوم اللي هو يوم 12 وطبعا المنطقة مليانة جدا فعاليات شتوية يصعب اني احصرها ... وكثير من الاماكن المشهورة مامريت عليها لان نحب اذا لقينا مكان زين خلاص نستمتع به ومو مهم نغطي اكثر من مكان .. وبما انه شتاء فكان اللعب في الثلج هدف اساسي ... وعشان كذا كنت محدد اكثر من مكان للشي هذا ....
الجو كان في القرية كان شمس وثلج ( عاد مشوها عشاني ) ودرجة الحرارة مقبولة ... توجهنا للمواقف واخذنا السيارة ( سعر الموقف كان رخيص بس نسيت كم ) واليوم تبدا تمشيتنا ... ماكنا مرررره مأملين اننا بنلقى تمشية او اماكن ننزل فيها ومتقبلين الوضع فكان عندنا قريتين بنروح لهم ان صاروا مناسبين والا كملنا لانسبروك النمساوية ...
الدنيا بيضاء من كل جهة
الطرق كلها مجروف عنها الثلج بس الواحد لازم ينتبه خصوصا وقت نزول الثلج
مستوى ارتفاع الثلج يختلف من مكان لاخر
هنا فيه ممرات المشي مختفيه
القرى الصغيرة احيانا يكون الدخول لها صعب شوي بسبب نزول الثلج
فيه سيارات ( شيول ) يجرف الثلج وتمشي باستمرار عشان مايتسكر الطريق بس احيانا مايلحقون لطول المسافة على الطريق ... وحتى الارصفة فيه مكاين اشوف يدفونها عشان تشيل الثلج .. بس بعد مايلحقون خصوصا اذا كان نزول الثلج بالليل ... وكثير بيوت نمرها نلقى احد قدامه بمجرفة كبيرة يشيل الثلج عشان يفتح طريق لسيارته ....
القرية الاولى كنا بنروح لها ودخلنا شوي الين وصلنا طريق مسدود بكمية ثلج كبيرة جدا ومانقدر نتعداها وبنفس الوقت كان الثلج ينزل والطريق ضيق فما كان فيه مكان نوقف فيه فقلنا نروح للمكان الثاني اللي هو قرية ايتال ... تعديت المدخل اللي كنت بدخل معه وقررت اني ادخل بشارع جانبي والف فيه براحتي لان كان المنطقة بداية الجبال والشوارع لافه وثلج والناس تسرع شوي ... لفيت ( وكان درس لباقي الرحلة ) كان واحد داخل قدامي المهم جا يبي يلف من مكان وزحلقت سيارة وغير فكرته ومشى قدام لان المكان كان نزول ... انا قلت هين شكله مايعرف يسوق ( مثلي ) تعرفون راعين نفود وتطعيس ... شفته راح قدام ولف السيارة بشار صغير وجلس ينتظرني ... هديت مرررره ثم رجعت ولفيت بشويس ثم تقدمت بطلع وكان الشارع طلوع الان وزحلقت السيارة وصدمت بسور بيت ( صدمة خفيفه ) جيت ابي ارجع ورا ماقدرت !! لانه وراي طلوع ... الحين تعلقت بالمكان .... واتذكر اني مااخذت مااخذت سلسة الثلج ولا اعطال الطريق !!! بس تذكرت اني مأمن شامل بعد ... لفيت الدركسون بجهة الصدمة ومشيت قدام .. يعني صدمت زيادة .. وانا اصلا اصدم طبقة ثلج والحمد لله تعدلت السيارة ...ورحت على منكس قروني لاخر الشارع وتعديت صاحبنا الاول ... وماالتفت عليه ... طلع هو بسرعه وراح .. رجعت بمحله وطلعت عادي ... باخر الشارع من جهة الخروج كان الشارع طبعا طلوع فما قدرت السيارة تطلع ... جربت مرتين ارجع ونفس الشي ... الثالثه توكلت على الله واسرعت والحمد لله طلعنا ...
انا خايف اسرع تزحف على الشارع الرئيسي بعدين !! ويقابلنا المليح هذا اللي يجرف الثلج لانه يمشي بسرعة ....
لو تشوفون بشاشة السيارة فيه نور احمر طالع عند النور الامامي ... انا توقعته النور الامامي انكسر يوم اصدم الجدار ... بس كان مزعج التنبيه اللي يطلعه ... وطلع عشان كمية ثلج متراكمه عليه مسحتها وخلاص ....
قصدي من السالفة الطويلة هذي انه فكر الف مرة قبل تدخل شارع جانبي عليه طبقة ثلج كبيرة ... وان اضطريت فالموضوع مو صعب بس يحتاج تركز شوي لاني دخلت بعدها كم دخله والحمد لله مشت الامور ....
المكان اللي كنا نبغاه بعد كان شبه مقفل وقررنا نمشي مع الجبال شوي
وسبحان الخلاق ... الدنيا ثلج ... بس اللي شفته هناك كان رائعه من روائع الدنيا عندي ... ومن اجمل الاماكن اللي شاهدتها وماكنت متوقع انها مكان مثلج بيطلع بالجمال هذا !!!
الصور ماراح تنقل الا اقل القليل من جمال المكان
الشجر الل على جوانب الطريق الثلج اللي عليه تحس فيه لمعه .. كأنه فضي ... مره غير عن كل الاماكن
الطريق فيه مواقف جانبية ... ووقفت هنا ماقدرت اكمل من جمال المكان ..
الطريق كان مليان لوحات اماكن سياحية وتلفريك فلحقنا وحده منها ....
ووصلنا لمنطقة تزلج ...المنطقة مليانة على طول الطريق بأماكن تزلج بانواع مختلفة .. يعني فيه مناطق ينقلون المتزلجين بالتلفريك للقمة فوق ومجهز مطان التزلج ينزلون معه .. وفيه مكان مثل اللي رحنا له مو عالي مره وينقلون المتزلجين بسحبهم على الثلج لمنطقة عالية شوي ...
دخلنا ووقفنا سيارتنا وعند الدخول ناخذ كرت المواقف لان الموقف مو مجاني ( دفعنا 4 يورو لتقريبا 2.5 )
ولان مناطق التزلج كثيرة فالاماكن موب زحمة والواحد يقدر يتزلج براحه بدون محد يضايقة او هو يضايق اححد ....
وبما ان المكان مليان اطفال فلو كنت هنا وتعثر طفل او اي شي ماعليك منه ولاتلتفت له حتى ... لانه ممكن يعتبر تحرش .. كل واحد ينتبه لعياله وماعليه من عيال الثانين ....
اخذنا زلاجتين للعيال وكان سعرهم وحده بـ 6 ووحده بـ 9 يورو والوقت مفتوح ( العب حتى تتعب يعني ) المانيا رخيصة في اغلب الاشياء اذا مو كل شي وبتشوفون بعد بعض الاماكن اللي دخلناها اسعارها حلوه ...
انا رحت اتمشى في المكان شوي
هذا اللي جايين يتزلجون من فوق حاطين حاجز على نهر صغير يمر
تقريبا قبل وقت الاغلاق بنصف ساعة طلعنا .. رجعنا للشقه وقابلنا الشايب والعجوز وسألونا وين رحتوا له ؟ وعلمناهم .. قالوا بكرة في كرنفال يستمر 3 ايام وقالوا انه في المدن الكبيرة .. والصدق انه مالنا مزاج بس عاد قلنا له اي خلاص لازم نشوفه .. ورحنا شقتنا ... بعد نص ساعة الا الشايب جايب لنا اوراق طابعه من النت ( بالالماني ) تتكلم عن المهرجان واماكنه ومتى يبدا ... اخذتها وشكرته وكان محدد على قرية حولنا بيكون فيها بس يبدا الساعة وحدة ... ( يعني يخرب البرنامج اليومي لك ) واحنا ناويين بكره يكون جزء منه في انسبروك .....
ففي الجزء القادم تشوفون وش سوينا في انسبروك وكرنفال قرية شايبنا !!
كالعادة ننام بدري ونصحى بدري ومثل ماقلت انه اليوم بداية الكرنفال واللي يستمر مدة 3 ايام في المدن والقرى الكبيرة شوي ... القرية اللي كنا ساكنين فيها عبارة عن شارعين ومحطه فما راح يكون فيها شي ... افطرنا في البيت شي سريع وتكلنا على الله الى انسبروك النمساوية ... خطة الزيارة كان من ضمنها توقف في زحليقة ايمست Winter - Imster Bergbahnen & Alpine Coaster Imst والزحلقة هذي طول مسارها 3.5 كيلو والصعود لنقطة البداية يكون بالكرسي المعلق ثم نكمل منها لانسبروك بس شيكت بالليل عشان اشوف اوقات دوامهم وطلع معي انهم بالشتاء الزحليقة تشتغل بالويكند بس وحسب الطقس بعد اذا كان ثلج قوي ماتشتغل ( ثلج قوي يقصدون يندفن مسار الزحليقة ) فصار الحين وقتها مو مناسب لنا لان ماراح نكون بقارمش !! الحقيقه كان احباط شوي لان في البداية كنت متوقع ان الزحاليق ماتفتح بالشتاء وانها فقط صيفية ..بس يوم عرفنا انها تشتعل بالشتاء تحمسنا ويوم صار الوقت مايناسبنا انقهرنا !! بس انا ماكنا نعلم الصغار بأي شي لان كنا متوقعين كل شي قابل انه يتغير لاخر لحظه ....الحمد لله عوضناها في بادن بادن بوحده مقاربة لها بالطول وبذكرها بوقتها ان شاء الله ... توكلنا على الله لانسبروك والطريق بحد ذاته كافي للاستمتاع بقدر كبير ... يكفي انه كان افضل بمراحل من اللي كنا متوقعينه وجربنا السياحة الشتوية في الارياف والجبال وكانت بالنسبة لي تستحق التجربة وما امانع من تكرارها ...
الطريق جدا ممتع وملتوي لانه صاعد في الجبال وفيه لفات خطيرة للي يسرعون بس انا كنت ماخذ وضع الشايب .. مو مستعجل على شي ...
الطريق مخدوم لانه يمر على عدد كبير من القرى والاماكن السياحية بس ماجربت اطلع لان كنا بدري شوي وجرافات الثلج توها مابعد غطت كثير من المناطق باستثناء الطريق الرئيسي اللي ماواجهت في مشكلة الحمد لله ... وماكنت ابي يضيع يومي وانا متعلق بشارع جانبي !! لان مااخذت سلسلة معي للسيارة ..والسلسلة احس انها مفيدة وتركيبها سهل في اعتقادي ... هي تركب على الكفر الرئيسي اللي يحرك السيارة وشفتهم يفرشونها بالارض ويمشي فوقها ثم يقفلها ... ماتاخذ وقت وسهل تركيبها وفكها .... وتساعد على المشي بالثلج .. واللي يركبها لازم يفكها واعتقد مو مسموح يمشي بها في الشوارع اللي مافيها ثلج .... وصلنا انسبروك الحمد لله وكانت الشمس طالعة والجو كان برد بس يظل حلو ... وقاعدتي ان البرد حلو بس انت البس واستمتع ... فكنا قبل السفر شارين بعض الاشياء من حقين مستلزمات التزلج مثل القفازات مثلا عشان اللعب بالثلج ..... وماخذين جزم وابوات المطر اكرمكم الله وكانت جدا مناسبة في الثلج بدل الجزم او الكاوتش العادي وتاركينها بالسيارة ونستعملها وقت الحاجة ..اشياء صغيرة بس تحدث فرق كبير في الرحله ... وكانت الخطه جولة في انسبروك ونطلع بالتلفريك لقمة النورد بارك ... وقفنا السيارة في مواقف سبار هنا ( تاخذ الكرت حق الموقف واانت داخل وتخليه معك مو بالسياره عشان وانت راجع تسدد داخل السوبر ماركت من المكينة اللي جنب المصاعد ) https://www.google.com.sa/maps/place...6!4d11.3981371
دايم كل موقف لازم اصور السيارة عشان مااضيعها ولو ضيعتها ممكن احد يساعدني اذا كان فيه رقم او لوحه او مدخل شي معين وهنا مدخل السوبر ماركت ....
طلعنا برا وكانت محطة القطار اللي يطلع للجبل قدام المواقف واسم المحطه Hungerburgbahn والمحطة هذي هي تعتبر اول توقف في الصعود اذا كنت طالع من البداية من محطة Nordkette Cable Car ... طبعا كالعادة عند اول مكان اجديد افهي شوي واجلس اشوف الناس وش تسوي !! جاء قروب كبار سن وطلبوا المصعد وطلعوا فوق لرصيف المحطة ..
رحنا للمكينة نشتري التذاكر وبما انه نبغى القمة فما لقينا خيار الصعود لها !! ومااعرفنا وش نسوي !! هو نقدر نشتريها من فوق مو من هنا بس ماكنا نعرف الشي هذا .. قررنا نصعد لاخر نقطة اللي هي Hungerburgstation Hungerburg ... وقبلها محطتين وحده فيها حديقة حيوان اسمها Alpine zoo station ومحطة ثانية ... شرينا التذاكر بس ماقدرت استعمل فيزا التسوق هنا لان طلب رقم سري وانا ماكنت حاط لها رقم ( تقدر تسوي لها رقم سري من المباشر ) وحاسبت ببطاقة صراف عادي ومشى الحال .... اعتقد اذا كان المبلغ اكثر من 50 يورو فبيطلب منك رقم سري لها ....
هنا تستعمل التذاكر وهنا حصل معنا مشكلة !!!
الى الان انا ماادري المشكلة وين .... عشان نطلب المصعد لازم نسوي سكان للتذاكر والا مايشتغل زر المصعد ... سويت سكان وطلبت المصعد وما جاء .. جربت بتذكرة ثانية ونفس الشي .... وكل التذاكر !! جيت اجرب ثانية رفض وطلع احمر يعني التذكرة مستعمله خلاص !! وش نسوي !! انتظرنا واللي يمر نساله كان يتكلم انقليزي ... الين لقينا وحدة تتكلم ... وكانت جدا متعاونه واخذنا من وقتها يمكن 10 دقايق .....جربت معنا المصعد ونفس الشي وجربنا مع المدخل الدرج ونفس الشي !! فيه تلفون جربت معه ومحد رد !! هنا خلاص قلت خلاص روحي شوفي شغلك وشكرا لك ... قالت بقي حل اخير اللي هو روحوا للمحطه الاولى وتبعد عن هنا 500 قدم يمكن وهناك فيه مكتب اشرحوا لهم ... علمتنا عن المحطة اللي هي Nordkette Cable Car وشكرناها ورحنا على وصفها ...
نهر اين ( طوله 500 كيلو يمر سويسر والنمسا والمانيا ومنبعه جبال الالب ومصبه في الدانوب وهنا اعتقد نصف طوله ...
الدنيا مثلجه والناس وحركة المرور قليلة
لقينا المحطه وكانت جنب مبنى كبير ...وشرحنا للموظفة سالفتنا وشيكت تذاكرنا وقالت خلاص مو مشكلة اطلعوا من هنا وفتحت الحاجز لنا وركبنا بالقطار ... القطار ثلاث عربات اعتقد والافضل اعتقد الاولى والاخيرة لانك تقدر تشوف المسار قدامك بعكس العربة الوسطى اللي رؤيتك بتكون محصورة بالجوانب فقط ... واعتقد ان محطات القطار من تصميم المهندسة العراقية زها حديد والمكان مليان بصورها وطبعا لها انجازات كثيرة مثلا مبنى شركة بي ام دبليو ومركز الملك عبد الله للدراسات والبحوث البترولية واوبرا دبي والمبنى العائم في دبي ومسجد الافنيوز في الكويت واماكن اخرى كثيرة ...
الناس اللي طالعين مررره قليلين ... وبعضهم معهم معدات تزلج ... فكنت مستغرب !! لان كيف بيصعدون .. بس قلت انتظر واشوف ...
صورة القطار بعد ماوصلنا فوق
صورة المحطة من برا
الاطلالة كانت قطعة من الجمال والروعة ( لاأكثر )
اتوقع حسب مشاهداتي ان الاماكن اللي تتغطى بالثلوج في الشتاء تكون زاهيه الخضرة اكثر من الاماكن الممطورة فقط ...
هنا في الاعلى لقينا محطة التلفريك اللي تاخذك للقمة وتاخذ تذكرة التلفريك منها هنا ... بس الغريب انه ماكان موضح تحت كذا الا كاني ماانتبهت ... فاللي يبي القمة لازم يصعد بالقطار الى هنا ثم يحجز التلفريك من المكتب خارج محطة الوصول ...ومكتب التذاكر منفصل عن مبنى التلفريك للمعلومية ....هنا في الاعلى موجود دورات مياه عامة ... ومطعم وكوفي وقرية صغيرة ...احس مع كثرة الصور عندي وكثرة الجوالات كاني فقدت شي من الصور او تجاوزته وقت الفرز فالعذر اني ما ارفقت صور لبعض الاماكن والا فالحق لكم اني اوثق كل شي .... المطعم يطل على انسبروك من اعلى بس كان وقت زيارتنا مقفل ... نقطة البداية للصعود والنهاية للنزول من القمه هنا
اعتقد الكبينة تشيل حتى 40 شخص في كل مره ... ومدري هل فيه كبينه ثانيه فوق او لا واعتقد تتحرك كل 30 دقيقه ووقت الرحلة 10 دقايق ... والصعود يكون على مرحلتين ( فيه محطة نزول )
بالبداية قلنا ناخذ جولة بالمكان ...
اللي ع اليسار مدخل مبنى التلفريك
طبعا برد ومع البرد الواحد يجوع شوي مثل ماانتم عارفين والاكل يدفي ايضا.... فقلنا نجدد النشاط شوي في الكوفي الموجود ...
الفلافل كانت حلوه
شاهي اخضر مالقينا غيره
طبعا كنسلنا فكرة الصعود للقمة لان كان فيه رحلة مدرسية وكان زحمه والانتظار بيطول شوي ومافيه شي مغري للصعود ....
اخذنا جولة صغيرة ونزلنا ...
رجعنا واخذنا سيارتنا واخذنا لفة بالسيارة في المنطقة ورجعنا لقارمش ... مرينا القرية اللي قال لنا صاحب البيت انه بيحتفلون وكانت بطريق الرجعه وكان مرورنا لانه معنا وقت ساعة قبل المغرب بس كانو مخلصين احتفال وشفناهم بالشوارع لابسين ملابس تنكرية ... الحمد لله اليوم كان حلو وممتع والطريق رغم انه متعرجع صعود ثم هبوط بس كان جميل ومخدوم وسيارات الثلج كانت قايمه بشغلها تمام ....
الجزء القادم ان شاء الله بيكون ميونخ ولقطات سريعه من اماكن محدوده منها مثل مركز فونف هوف وفكتولين ماركت وغيرها ....سامحونا ع القصور ...
اليوم هو يوم مغادرة قارمش وما اخفيكم انه كلنا تحسفنا على انه الايام مره شويه هنا ومع انه الوقت شتاء الا انه الحياة ماتتوقف هنا ويمكن ماتأثرت كثير او ماتأثرت ابدا ... لانه اسلوب ونمط حياة عندهم لفترة طويلة من السنة ... تصحى الصباح تلقى 20 سنتي ثلج فوق سيارتك والوضع عادي ، وهنا في بريطانيا جا اقل من كذا ولمدة يومين وعطلت المدارس وكثير من الشركات لمدة ثلاث ايام وانحجزوا الناس في بعض المناطق وتقفلت بعض الطرق السريعة ... مااقول ان الالمان جبارين وذولي تورطوا .. لا هو نمط الحياة في كل مكان المفترض اهل المكان نفسهم تلقاهم متعايشين معه وعارفينه ... بس مايتفاجئون فيه كل سنه وكأنه شي جديد عليهم !! قارمش منطقة كبيرة تستحق فعلا كم يوم للي يحبون الارياف والمشي او حتى التمشية بالسيارة وبالصيف حدث ولا حرج عن الجمال وين مارحت والاماكن فيها كثيرة وماتنتهي سبحان الله .. ميونخ كانت في طريق رجعتنا من قارمش الى بادن بادن وفي بادن بادن بنجلس باقي الايام ... الطريق الى بادن بادن تقريبا ثلاث ساعات ونص يمكن بس بنوقف بالطريق في ميونخ اللي تبعد ساعة عن شقتنا في قارمش ... بعد ماصحينا الصباح قفلنا شناطنا وحطينا المفتاح على الطاوله مثل ماقالت لنا صاحبة الشقة وتوكلنا على الله الساعة تسع الصباح تقريبا الى ميونخ ثالث اكبر مدينة في المانيا وعاصمة ولاية بافاريا
...كنا محددين وين بنروح في ميونخ لان ماكنا ناوين نطول فيها مع انه مزاراتها كثيرة وتستاهل بس هذا اللي صار !! كنت محدد من الليل موقف سيارات على قوقل ماب عشان مايضيع الوقت ادور موقف بس لقيته مقفل ! لحقت لوحة مواقف وهي كثيرة ولقيت لي موقف قريب ... لازم تدفع للمواقف طبعا والدفع بالعملة المعدنية او بطاقة البنك والدفع يكون مسبق وبعض الاجهزة الحد الاعلى للوقت ساعتين وانت اذا بتطول فلازم تشوف لك موقف وقته مفتوح وهذي غالبا تكون اسفل البنايات وتحاسب وقت خروجك ... المواقف المحددة بوقت معين او اللي لها دفع مسبق يطلب منك احيانا تكتبت رقم اللوحة فخذ احتياطك وصور اللوحة من اول عشان لو كان في سرا عند المكينة مايضيع وقتك روحة ورجعه وسرا جديد !! وكل شي مكتوب غالبا بالالماني ... ممكن تلقى مكاين فيها خيار انقليزي .. المكينة هذي كانت لغتها المانية فالافضل بدال ماتخبص وتضيع وقتك تشوف احد من اللي يمرون حولك ويساعدك ... انا دايم كذا اسئل ... سئلت واحد وطلع انقليزي مايعرف الماني وسئلت ثاني كان بياخذ سيارته وقال اعرف شوي انقليزي ( عشان يتفاهم معنا ) وزينها لنا ... احيانا تكون فاهم والشغله سهلة بس تبي احد يؤكد لك الشي هذا لانك ماتبي تكون مشغول بالك باحتمالات ثانيه !! .. كان اكثر وقت ممكن هو ساعتين واعتقد كان بـ 4 يورو وشوي ( ماوصل 5 ) ورجعت جددته مرة ثانية ...
حط الفلوس للوقت اللي تبي ثم اضغط الاخضر وانتظر شوي وتنزل لك التذكرة بالصندوق تحت .. خذها وحطها على طبلون السيارة بحيث ان موظف المواقف يشوفها اذا مر
طبعا خزنت مكان الموقف بالجوال وصورت كم جهة حول السيارة عشان لو ضيعت ممكن استدل بالمكان او احد يساعدني ..
تركنا السيارة ورحنا ...
اول شي كنا نبي كوفي او مطعم عشان نفطر ولقينا البوفيه هذا .. وكان كبير شوي وخياراته كثيرة ... والمهم انه بيقضي حاجتنا الان ( بعض المرات في السفر يكفيك اي شي ) وبعض المرات يكون نوع المطعم او الكوفي شي اساسي ...
جولتنا اليوم بتكون فقط في جزء من التاون سنتر او مركز المدينة او المدينة القديمة او ALTSTADT والمنطقة تاسست مع بدايات تاسيس مينوخ القديمة في القرون الوسطى وهي مليانه اماكن تمشية ومحلات وساحات وجدا جميلة وممتعه وتستاهل لو الواحد بيخصص لها يوم كامل ... وليتنا جلسنا فيها اكثر لان ماشفنا الا جزء بسيط منها ... المنطقة ميب كبيرة مره بس مليانه والتفرعات فيها كثيرة تاخذك لاماكن اخرى واعتقد تخصيص يوم لهذي المنطقة مناسب بس يمكن ماراح تغطيها .. دخلنا مع شارع اسمه Theatinerstra?e وكان دخولنا من ساحة اوديون بلاتز
والشارع هذا ينتهي بساحة المارين بلاتز وعشان كذا معروف بكذا والساحة موجود فيها نصب او مسرح فلد هارن هول Feldherrnhalle ورغم انك بتمر بالمكان هذا وكانه مكان عادي الا انه صار احداث كثيرة مختلفة بالمكان هذا سواء احتفالات او انقلابات او حتى حروب .. وانت واقف بالمكان هذا اعرف انك واقف بمكان دبابة او سقوط قذيفة او عرض عسكري في يوم من الايام ...
الساحة عند التقاطع هذا
شارع الاوديون الى الامام
وشارع برينر او برينر شتراسه ( شتراسه بالالماني يعني شارع ) وهو شارع تسوق ايضا
برينر من جهة ثاني
خلينا النصب هذا على يسارنا و ( دلفنا ) للشارع مثل اي سائح يمشي ويتلفت ( كنه احد مضيع شي ) ... الشارع مخصص بالكامل للمشاة .. فاخذنا راحتنا نمشي ونصور هنا وهناك وبدا المكان كأنه جميل ومبشر بأنه اختيار جيد والحلو انه الشمس طالعه ومافيه مطر ... ماتدري تطالع يمين او يسار .. تمشي بشويش لايفوتك شي .. احيانا الاشياء تتكرر عليك في اكثر من بلد بس مستحيل يتكرر الترتيب او طريقة البناء لازم يكون فيه شي مختلف .. فيه طرق جانيبه احيانا صغيرة جربوا تدخلون معها بتاخذكم لساحات صغيرة جميله ...
وهو عبارة عن سوق شعبي فيه تقريبا 160 كشك يباع فيه خضروات وفواكه وورود ومنتجات اجبان و ( اسر منتجه )
وهو يستاهل الاطلالة عليه بشكل سريع للي يزور المنطقة وفيه اكشاك مطاعم ....
الاماكن اللي اعرفها في ميونخ كثيرة واللي مااعرفها اكثر ومن الظلم ان اقول اني زرت ( ميونخ ) ... اربع ساعات هنا في جزء بسيط وما كفاه بس اقول انها من المدن اللي جدا اعجبتني ..
بعد الماركت رجعنا للساحه واخذنا لفة سريعه ورجعنا للسيارة لان وقت الموقف تقريبا خلص وورانا مشوار ثلاث ساعات الى بادن بادن ... ان قلت لكم اني متحسف ( ندمان على ترك ميونخ) بميونخ فانا الحقيقه متحسف مررره لانها تستاهل كم يوم على الاقل في نظري يومين ... وبتعرفون في بادن بادن الندم زاد او زال او زي مايقولون سو سو !!
اليوم قبل الاخير لنا في السفر وكالعادة نصحى بدري شوي وتوكل على الله على اللي كنا راسمينه من اول اول في الليلة السابقة ... اليوم كنا ناوين نروح كولماررالفرنسية وهي اعتقد غنية عن التعريف وتبعد عن بادن بادن 130 كيلو بالسيارة ....
طريق النبيذ اللي في بادن بادن
جزء من الغابة
الجو اليوم كان حلو وصحو شوي ..
المكان هذا كانت تراودنا انفسنا نكنسل كل شي ونجلس فيه !!
الصور عندي كثيرة مرررره وتراجعت عن وضع كثير منها عشان ماتملون بس سبحان الله العظيم الطريق جدا جميل ومتنوع مابين جبال وسهول وانهار وقرى ومصبات مياه ....
بالنهاية وصلنا
المواقف متوفرة وقريبة
لازم تكتب رقم اللوحة بالبداية عشان تقدر تدفع وتاخذ تذكرة الموقف
لوحة مفاتيح لكتابة رقم اللوحة ... وزر الماكس عشان تاخذ الحد الاقصى المسموح للوقوف وزر الزائد عشان تحدد بنفسك الوقت اللي تبي مثلا ساعة او ساعتين الخ ...
الجو الحمد لله كان مره حلو ومشمس ( مااحب المطر الا في السعودية ) ....
هي حلوه بس الاكيد انها بالصيف بتكون احلى مع خضرة الشجر ووجود انواع الزهور
الحقيقه في رايي الجلسة في كولمار او الطريق منها او لها لايمل ووجود السيارة شي اساسي لاكتمال جمال الرحلة بحيث تقدر توقف بأي مكان يعجبك
وبما انه اخر يوم لنا هو اليوم وبكرة طيارتنا وتعتبر الفرصة الاخيرة في الرحلة هذي لزيارة تودناو مرة اخرى ولعلها تكون مناسبة لتجربة الزحليقة ... غادرنا كولمار الجميلة باتجاه تودناو المتجمدة ... انتقال سلس وبسيط من مناطق خضراء ومشمسه لمناطق اخرى متجمده وبارده جدا !!
الطريق موب زحمه ابدا يمكن عشان الشتاء ومافيه سياح كثير او مافيه سياح اصلا ...
وصلنا تقريبا ....
الجو كان برد وغيم بس بدون هواء... بس قلنا نلحق نطلع قبل ينزل الثلج .. وكننا مترددين شوي لان ماشفنا احد طال او نازل والمكان شبه فاضي .. الين شفنا ناس نازلين من فوق بالزحليقة .. فتشجعنا ..
فدخلت اول شي انا وعبدالله وكانت تذكرتنا ب 18يورو اذا منيب غلطان ... والصعود يكون بواسطة الكراسي المعلقة ( تشير لفت )
يوم دخلنا نظام الكراسي ايش ؟
بين كل كرسي وكرسي معلاق او مساحة لتعليق العربات ( الزحليقات ) ونقلها من جديد للأعلى ... الموظف قال لنا يلا تعالوا هنا وكلنا فهمنا انه ننتقل للجهة الثانيه الين يقول لنا نركب واحنا ماسبق جربنا الكراسي الا اللي في سكي دبي ... فهو قال لي لا وقف هنا عشان تركب ( السير طبعا مايوقف او يهدي فكل شي يصير بسرعه ) الوقت هذا الكرسي وصلني وولدي رايح للجهة الثانية !! وانا كنت اناديه يوقف فتخيلوا الموقف .. لو وقف خلاص بيضربه الكرسي لو ركبت ولو وقفت بيضربنا سوا !! والموظف خلاص استسلم معد يقدر يسوي شي ... وانا على طول بدون تفكير اصلا سحبت ولدي مع جاكيته لي والكرسي شالني بسرعه ومشى بنا وولدي معلق بالهواء والموظف يلحقنا يبغى ينزل حديدة الامان علينا بس ما طالها وماراح يقدر لان ولدي صار يردها تنزل لانه مابعد جلسته بمكانه وصار الكرسي يتهزهز قدام وورا من قوي الحركة اللي فوقه لاني اسحب ولدي واحاول اعدله واجلسه فصاير الكرسي كانه بينقلب قدام ... وانا تقريبا فاقد توازني شوي وكنت متوقع اننا نطيح بنسبة كبيره مره ... جلست ولدي بمكانه جنبي وانا تقريبا كنت بالمنتصف يعني مو جنب الطرف عشان اتمسك كويس ومااقدر ازحف اترك الولد والكرسي لازل يتمرجح بقوه ... هدا الكرسي واحنا خلاص تقريبا صرنا بمكان مرتفعا شوي يمكن تعدينا او بنتعدا اول عامود .. وانا الى الان مومستوعب وش الهبال هذا !! وكيف بنصعد بالكرسي هذا اللي ممكن اي احد لاي سبب يسقط منه ( مابعد انتبهت للحديدة حقت الامان اللي فوق ) ... رفعت راسي وشفت حبل مدري حق ايش !! بس سحبته من باب الفضول وعشان احاول اغير الموضوع اللي انا فيه وخلاص انا قدام امر واقع الحين !! سحبت الحبل ونزل معه الحاجز حق تأمين الركاب !! ...اووووف الحمد لله ... الوقت اللي راح رغم انه قصير الا انه كأنه دهر كان وبأحداث كثيرة !!! الان الواحد يبدا يستمتع بالمكان بالرغم من انها اول تجربة حقيقية لي مع الكراسي هذي ...
تقريبا الصعود يمكن عشرين دقيقه ( ماادري بالضبط ) وبصراحه رغم انه شتاء وثلوج الا انها تجربة رائعه جدا اذا طلعنا منها البداية والمناظر كانت سبحان الخالق العظيم ...
قربنا من الووصول
نزلنا من الكرسي وتوجهنا للعربات ( التذكرة اللي دخلت بها عشان تركب الكرسي بتحتاجها فوق عشان تدخل عند العربات فلا ترميها لان تحت يمكن مايبلغونك لان محد قال لي شي ) ولان التذاكر نوعين فيه منها شي تصعد وتنزل بالكرسي فانتبهوا للنقطه هذي ..
فوق فيه كافي واحس المكان بالصيف بيكون قمة في الجمال وممكن العائلة تجتمع فوق وتجلس فترة لجمال المكان ثم النزول بالعربات )
احنا رحنا على طول للعربات لان المكان صعب المشي فيه عشان الثلج ... وصلنا للعربات والحمد لله مارميت التذاكر ودخلنا
... وطبعا انا وعبدالله بعربة وحده ... الزحليقة سبق جربناها بهولندا وانا سبق جربتها بالطايف زمااااان ... طبعا يخلون بينك وبين اللي قدامك مسافة كافيه عشان السلامة ... وانطلقنا ... لابسين كويس وقفازات تزلج فكان الوضع مررره مريح الحمد لله وماشكينا من البرد .... الزحليقة تقريبا 3 كيلو وهي يمكن اطول زحليقة بالمانيا وماادري كم اخذ مننا النزول من وقت بس كنا مسرعين جدا ومستمتعين .... وصلنا النهاية وماكان فيه احد بس هديت قبل السير اللي يسحب العربات لان اذا بدا يسحب مالك مجال تهدي العربة او توقفها ... ونزلنا منها الحمد لله ... الغريب انه وضعها بالنهاية غير امن ومافيه موظف ولو احد مايعرف وتأخر بالنزول العربة بتنسحب ويمكن ترمي اللي فيها على ظهره !! فالافضل توقف اول ماتوصل قبل نقطة السحب وتنزل منها ثم فكها تمشي ...انا اعتقد انه فيه موظف بس يمكن لانه مو موسم فما كان فيه احد ويمكني ( موسوس حبتين ).
زوجتي وبنتي لسا ما طلعوا وشجعناهم وراحوا وقلنا بنستناكم هنا ... راحوا هم وقال عبدالله ليش مانلحقهم ؟ قلت يلا ... ولحقناهم وجلسنا فوق شوي على المطل ... ثم نزلنا بالعربات ...
مع ان الجو كان برد والنهر جاي من فوق ومويته انتم تصوروها الا اني ( تحاليتها ) وغسلت لصلاة المغرب منها .. طبعا خففت من اللبس على الشجره القريبة عشان اقدر اغسل ومايطيح شي بالنهر مني ... وصلينا المغرب والعشاء هناك جنب الشلالات ..
كملنا طريق الرجعه وبكره هو يوم المغادرة وودنا نطلع للاماكن القريبة من شقتنا والمطار ... فجهزنا شناطنا من الليل وقفلناها عشان ما يكون عندنا شي الصباح ....
صحينا بيوم المغادرة بدري وقلنا بنشوي مكان نفطر فيه غير المخابز من باب التجربة ... رحنا لاوتيل قريب وماكان عندهم فطور !!
لقينا كوفي فاتح ودخلنا
والحقيقه كنا مررره مبكرين احنا وكان فيه عجوز وكان معروض بس حلى
وكلمناها ونفس الشي الكلام بالاشارات بس توهم فاتحين وماعندها شي بس كنها قررت تفطرنا بس مافيه وسيلة نعرف وش فيه ولا تعرف وش نبي ... بس لقينا الكلمة المفقودة ( تشيز ) جبن يعني ... وفهمتها وقلنا خلاص جبن وطماط وشاهي ( مانبي نفشلها ) جلسنا وجلست تجهز الفطور وقامت زوجتي بتجيب الشاي معها بس رفضت هي وقالت اجلسوا بس ...
لذيذ حتى بدون حشوة
افطرنا وحاسبنا وشكرناها وطلعنا بناخذ جوله
ومع الصعود في الجبال بدت تطلع الثلوج
مع المشي طحنا فجأة بالـ ( وززززز ) اللي قالت صاحبة الشقه وماعرفنا نوصلها اول ... الزحليقة هذي ( زحليقة ميلوسكوبف ) كانت جدا قريبة مننا على بعد يمكن ربع ساعة من شقتنا و ثلاثين دقيقة من وسط بادن بادن وهذا مكانها على خرايط قوقل
دخلنا وجانا موظف المواقف اللي كانت شبه فارغه ( تونا مابعد جت تسع الصباح ) وتكلمنا معه عن سعر المواقف ( 2 يورو باليوم ) ومتى تفتح الزحليقة ويوم شافني اكلم زوجتي عربي تكلم عربي وطلع من الجزائر وكان جدا جدا محترم وسولف معنا شوي ثم تركناه لشغله مع السيارات اللي تجي ... قررنا بما انه لسى بدري والجو كان مقبول انه نطلع للزحليقة ...
بس توها مافتحت
فجأة وبدون مقدمات بدا السنو ينزل بكثرة مع هواء قوي
وكل ماله يزيد ... فاصبح الوضع مزعج خصوصا المحلات اللي هنا مقفله توها فرجعنا للسيارة والغينا الفكرة خصوصا ماندري عن الوضع لانه كان ينزل بقوة وبدا يتشكل طبقة جديده على الارض ولو جلس شوي خفننا مانقدر نطلع من المكان ونوصل للطريق ... تحركنا بالسيارة وبدينا بالنزول باتجاه المطار بس بدون استعجال ... كان المطار تقريبا 40 دقيقه ...اخذناها بساعتين تقريبا لان كنا نتمشى .... وكنا نبغى نشوف المنطقة الحرة اللي في المطار عشان كذا قلنا نبكر شوي
مدخل مواقف شركات التأجير
سلمنا السيارة للمكتب وبلغنا انه التأمين بيرجع خلال ثلاثة ايام عمل وفعلا رجع خلالها ...
المطار فااااااااضي
ومافيه احد تقريبا
وش هالمطار !!!!!!
لقينا كاونتر خطوط الطيران يفتح قبل الرحلة بساعة واعتقد ماكان فيه الا رحلتنا اللي كنا اول الواصلين لها قبل ساعتين !!
لففنا في المطار ومافيه محلات فاتحه الا محل صغير حق تذكارات .... تعرفون اذا صرتوا تعشمون نفسكم بشي ؟! المطار صغير مره ومع كذا نقول اكيد فيه سوق حلو داخل !! بالقبوا مثلا !!! وقفنا بالسرا لحالنا قبل 20 دقيقه من فتح الكاونتر عشان نطلع اول ناس ... شوي شافونا الناس وصفوا معنا .....فتح الكاونتر وخلصنا منه واخذنا البوردنقات ... ودخلنا للتفتيش وعيني على مابعد التفتيش مافيه الا بقالة صغيرة بس !! دخلنا للسوق الحرة ( البقالة الحرة ) وكانت صغيرة ومافيها شي يسوا وطلعنا ... الحين معنا ساعة بنجلسها وحتى سناك مامعنا ومافيه بوفيه ولاشي ... والبقالة تعديناها وبينا وبينها تفتيش ... ومكاين البيع الذاتي بالصالة اشوف واحد جالس يجلد له مكينة خذت الفلوس وماطلعت سناكه !! وراح يكلم له عسكري وجاء جلدها معه ولاطاعتهم .... جلسنا على الجوالات الى موعد الطيارة
الجو كان شوي شمس وشوي ثلج !!
انتهى تقريري اللي اتمنى انه قدم اي فائده مهما كانت وسلط ضوء ولو بسيط على منطقة معينة في وقت معين انا كنت من المعارضين للسفر فيه بسبب عوامل الطقس واللي انقلبت فيه وجهة نظري للتأييد .... اتمنى لكم سفرا سعيدا وامنا واياما جميلة بصحبة من تحبون ... شكرا خاص لكل من شاركني ودعمني بمشاركته هنا رغم تقصيري معهم ... شكرا لكم ودمتم بخير
... عندي اشياء كنت بنزلها عن كذا مكان بس انها مع الايام راحت وبردت انا لان حسيت اني يمكن نسيت بعض المعلومات ... 
... قلت لازم اسوي تقرير لو بسيط ومااعتقد اني يعني ابضيف للمنتدى او للمحتوى عن المنطقة هذي شي كثير بس اللهم ان اكثر الموجود حسب علمي هو ان المتوفر عنها هو وقت الصيف ويمكن محد يفضلها في الشتاء وانا كنت فعلا خايف وماكنت انصح ان احد يجي في الشتاء ... التقرير كثير من اماكنه جدا مشهورة ومعروفة وفيه منها اللي ماخذ حقه من المدح او الذم حتى اني صرت مثل اللي جالس بين الشمس والظلال
مدري وش اسوي ... وماتدرون وش سويت
.. الرحلة صار فيها احداث ومن اليوم الاول بعد !!
... بس الجميل ان فعلا السفر مو مجرد رحلة او اجازة تخلصها وترجع لحياتك العادية .. هو بتعدد السفرات واختلاف الوجهات راح يكون عند الواحد وهو مايدري رصيد خبرات يقدر بواسطته يسيطر على انفعالاته ويتخذ قراراته واللي ان شاء الله راح تكون صح ...
..