السلام عليكم ورحمة الله وبركاته ...
حيا الله اهل فرنسا وعشاقها ...
تتقلب الافكار في راسي بين شاردة وواردة ، بين تأييد ورفض ، فما انت فاعل بين كوكبة الخبراء ، وما صنيعك عند من سبروا هذه البلاد قبلك مرات ومرات ، قبل سفري ادندن حولهم ابحث عن خبر او مكان ، وبعد عودتي البس جبة الخبير العارف ...
مااعرف اكتب فصحى وبطلع لكم على حقيقتي
... كل ماجيت اطق في ارض وتد - من رداة الحظ وافتني حصاة . كل مادخلت اكتب تقرير شفت اربع مواضيع مثبته كانها تقول لي وش تبي انت !!! واقوم اضغط زر للخلف
.. عطوا الواحد فرصه يقول شي
.
حقيقة ماقصروا مشرفي البوابة والله يعطيهم العافيه بس معليش بكتب تقرير صغير
ووعد مايكون طويل
وبكتبه على كم جزء وماراح يكون على طريقة سرد الايام ... وما اعتقد بتلقون اي شي جديد ...
عدنا ...
الرحلة كانت من 2/11 الى 2016/2/16
كانت الفكرة اننا نروح باريس نهاية 2015 بسبب اجازة المدارس عندنا ومافيه فرصه مناسبة لباريس قبل الوقت هذا ... وكنت ناوي نطلع منها
على امستردام بالقطار .. ومجهز حجوزات الطيران والفنادق بباريس وليون وامستردام .. وتصير سالفة باريس اللي انتم عارفين وقالوا لي بعض البريطانيين كنسل السفره ماودنا تروح بعد الاحداث ... والناس هنا يقولون الوضع عادي وابو سعد الله يسلمه مسوي موضوع يقول خلوا حجوزاتكم ...
وكنت بين وبين مثل مايقولون بالنهاية الغينا السفر ... وراح علينا حجز الطيران بس الفنادق اشوى مسترجع كان ... هو انا كنت معلم واحد اني بروح باريس
... وبعدين عرفت انه ينظل ( عينه حاره ) فشكل خوينا زي الجسمي وتجمعوا على باريس
..
رتبنا الامور على اجازة المدارس الثانية ومدتها اسبوع وكانت النيه بس باريس + ديزني واحنا نحب بالسفر اننا نزور اغلب المكان اللي نسافر له ونستمتع به قدر المستطاع بدون كثرة تنقلات ورحلات ...ومنها معد نرجع للمكان هذا مستقبلا ...
في بريطانيا عندهم نظام حلو ليتهم يسوون مثله بالسعودية وهو انه فيه قريب من المطارات مواقف تجاريه تحجز فيها بعدد الايام اللي تبي وعندهم نقل ترددي للمطار يمر على كل الصالات بواسطة باص ، والرحلة كل نص ساعة تقريبا ..وكانت المسافة من بيتنا لمطار جاتويك تقريبا ساعة ونصف بدون زحمه والرحلة الساعة 4.30 فطلعنا من البيت الساعه 11.30 عشان حساب زحمة لندن لان بنمرها وسط النهار وصار اكثر من اللي كنت خايف منه .. مع الزحمه اللي اخذت مننا وقت اكثر من المتوقع طلع الطريق مقفل !! وطفى علي برنامج ( سايجك ) الله لايرده ثاني مره يسويها فيني مع اني مشتريه .. وبسرعه حولت على خرائط قوقل ومشى الحال وزاد في الطريق نصف ساعه بدون الزحمه اللي احنا فيها.. ومن جد خفنا تفوتنا الرحله ..وتصير المشكلة بباريس موب فينا ولا بخويي اللي ينظل ولا بالجسمي
.. الحمد لله فكت الزحمه بعد التحويله ووصلنا المواقف ووقفنا سيارتنا عندهم واخذونا بالباص مع مجموعة مسافرين الى مطار جاتويك بلندن وكانت رحلتنا مع طيران ايزي جت ..
Book direct for our guaranteed cheapest prices - easyJet
.. والطيران هذا اقتصادي مثل طيران ناس او فلاي دبي ويوفر خيار حجز طيران+ فنادق بأسعار حلوه مره ( احيان كثيره ) بس توني مابعد جربت الخيار هذا وهو في البال ... وهم يوصلون الى مطار الغردقة .. فانصح اللي بيجي اوربا وله اماكن كثيرة بيروح لها انه يجرب يضبط حجوزات الطيران منهم بدري وبيطلع له اسعار حلوه ... وصنا للمطار وهو مطار وسط واول شي سويناه رحنا لغرفة الصلاة ( موجوده بالدور الاول ) -اذا جا وقت الصلاة اسألوا عن غرفة الصلاة واذا مافهموا قولوا لهم multi-faith room -وصلينا الظهر والعصر وختمنا جوازاتنا ودخلنا وكان باقي تقريبا ساعه على الرحلة ولسى ماحددوا البوابة فحولنا بعض الفلوس الى يورو
ورحنا لمنطقة المطاعم نترزق الله ومع الروعه ان الرحله تفوت جعنا زود ...
ادري كثيرين ودهم يصفقوني بسبب التفاصيل غير المفيده بس وش اسوي موضوعي قصير وابي امططه شوي
...
هذي دايم مع المقبلات وهنا حاطينها طبق رئيسي واخذته لاني مااكل لحومهم
واحلى شي انك تصير بليد احيانا .... توصل متأخر وتروح للمطاعم بعد ... يوم انتبهنا والاه خلاص الوقت بح ... وخفت تروح الرحله هالمره بسبب شفاحتي ع الاكل .. ونروح للوحه نشوف رقم البوابة وننطلق لها ووصلنا على اخر الداخلين ( الحين عرفت متعة اللي يجون متأخرين والا يجلسون يدورونهم ) ...
واقلعت الرحلة بموعدها وكانت الرحلة مليانه .. وتحركت البسطة حقتهم واخذنا شاهي وما امدانا نخلصه لان اعلنوا عن الوصول ... الرحلة من
الاقلاع للهبوط 50 دقيقه لدرجة ان الصف الاول اعتقد وصلتهم العربية واعلنوا لاندنق والوصول الى مطار شارل ديغول..وصلنا وركبوا درج على الباب الخلفي للطياره وفتحوا الباب الامامي بعد وانطلقنا ..
كثير من المطارات احس انها بتكون هيبه وضخامه واذا وصلت تكون اقل من المتوقع ... مابعد شفت مثل مطار دبي.. مثل مطار جنيف ومطار جنيف وطلع مطار جنيف كبر الملحق
... الرحله اقصر من رحلة الرياض دبي بكثير ..خلصت الاجراءات بسرعه وكان موظف الجوازات الفرنسي ( طاق الضحكه لنا ) وقلت بداية خير ...
بعد ماطلعنا من الصالة كنت محتاج الى (نت ) عشان الخرايط وعشان اقدر اوصل لشقتي اللي مااادري وينهي فيه .. رحنا لمحل وكان فيه فرنسية انجليزيتها موب مره وجاء زميلها المغربي وتكلمنا عربي واخذنا شريحتين من شركة sfr .... فيها 1 جيجا نت و 60 دقيقه مكالمات و 500 رسالة واخذتها من المطار ب 30 يورو (للوحده ) وما قصر فعلها لنا ..وتغطيتها حلوه مره .... وكملت معنا للنهاية ... رجعنا والنت ماخلص ..مرينا مكتب السياحه واخذنا خريطة المترو وحدد لنا مكان شقتنا ووين نبدل ... وتوجهنا لمحطة القطار بالمطار ...
وبعد مانزلن الدرج وتوا روعة الغربة موجوده ونلقى رجل امن ونروح له بنتاكد منه من وجهتنا ونكلمه انجليزي ويكلمنا فرنسي ... لا عرف لنا ولا عرفنا له ... قلنا نحول على نظام الاشارات ... واجلس ااشر على الخريطه ويؤشر لي على الدرج !!! وبالاخير اشر لنا الحقوني ونلحقه وقالت لي زوجتي يمكن يقصد التذاكر
... قام رد بالعربي ايه اقصد التذاكر ... طيب ياخي تكلم ... مبين على وجهي اني اوربي مثلا !!! قال انا
مغربي بس اتكلم فصحى فقط ... وماقصر والله مشى معنا لمكينة التذاكر ثم يوم شافنا عند البوابة واقفين لان كنت ادخل الصغار ورى بعض وحس ان عندي مشكلة جانا يركض والله ... فجزاه الله خيرا والله ييسر له امره ... عموما التذاكر كانت طريقتها سهله يعني لااحد يزمل او يحس بصعوبه ...
واخذنا بطاقة نافيجوا اتجاه واحد لان خلاص الوقت ليل وماراح نروح لشي اللي والبطاقة اليومية تنتهي الساعه 12 بالليل ...(( بباريس كلها بتلقون بكل محل وبدون مبالغة احد يتكلم عربي ))
وبالمناسبة :
القطارات ( الرير ) تشتغل الى الساعه 12.30 ليلا .
المترو يشتغل الى الساعه 1.30 ليلا
وترجع تشتغل الساعه 5 صباحا .
المتروا يغطي من زون 1 الى زون 3 فقط وخارج الزونات هذي تستخدم القطار ( رير )
صورة للرير :
وهذا موضوع لي عن شرح استخدام تطبيق للجوال راح يساعدكم كثير وماراح تحتاجون تسألون احد او تضيعون ان شاء الله
بس مهم تعرفون الكلمه هذي ( Sortie ) وتعني مخرج بعد ماتنزلون من القطار او المترو وتبون تطلعون للشارع
كان الطريق فيه تبدلين الى شقتنا اللي كانت بزون 2 ووصلنا لها خلال ساعه وحده .. وكنا خلال الفترة هذي كل نتناقش الخريطه ونقوم نشوف خريطة المسار اللي فوق الباب ( في كل قطار فيه خريطه بالمسار فوق الباب ) وكان فيه واحد بعيد عننا بمقعدين يمكن بس كان متبع معنا شوي .. شوي ماقدر يصبر وجا لي وسلم وقال انا محمد مغربي عايش هنا وين بتروحون انتم ؟ علمته وكنا عارفين طريقنا بس ما حبيت اقول له اننا عارفين وبالعكس من شرحه انتبهت لنقطة اتجاه الطريق ( عارفها بلندن بس نسيتها هنا ) وركز على الاتجاهات ووين نروح واعطاني كرته وقال اي شي تحتاجونه بباريس اتصلوا ...جدا كان محترم وخدوم ... وهذي رابع نقطه ايجابيه ... الاولى موظف الجوازات والثانيه المغربي بمحل الجوالات ثم المغربي حارس الامن ثم المغربي بالقطار ... وصل محمد لمحطته وقبل ماينزل اكد علينا بالمحطات وراح بحال سبيله ...
من اول تجربة للقطار والمترو اقول ان قطارات ومترو باريس اسهل بكثير من قطارات ومترو لندن واقل زحمة... واكثر توافر يعني بالكثير تنتظر 3 دقائق وماتأخرنا الا مره وحده بقطار الرير تاخر يمكن حوالي 15 دقيقه بمحطه اعتقد كانوا متعودين تتأخر فيها القطارات اللي هي محطة هاوسمان ..
وصلنا لمححطتنا ونزلنا وشغلت خرائط قوقل عشان اروح اخذ مفتاح الشقه وكانوا حاطينه بمكان لانهم مقفلين ومعطينا باسوورد الباب وصندوق الامانات ... وصلنا واخذنا المفتاح ولقينا معه خريطة ان الشقه بمبنى اخر ...ورحنا ندور عليها وكانت قريبه بس ماعرفنا نوصلها ...وكانت على طريق رئيسي ... فجاة وقف سيارة بنص الاشارة ويؤشر لنا فهمت منه انه يقول تحتاجون مساعده .. ورحت له وكان ايضا مغربي او جزائري واعطيته الخريطه قال انا موب من هنا بس شوي اشوف الجوال ... وكان فيه شباب فرنسيين يوم شافوا الوضع سألوه وكلمهم وقال خلاص روح لهم ... وجاء واحد منهم بسرعه وشاف الورقه معنا وطلعنا جنب العماره وعلمنا كيف ندخل ( بالاشارة طبعا ) وراح ... وهذا موقف جيد ايضا ومن الفرنسيين انفسهم ...ودخلنا شقتنا اللي كنت ماخذها 6 ايام بـ 340 يورو ... (( حقين السفر الاقتصادي يجون
)) اسبوع في باريس ب 1400 ريال
..
ماعندي لها صور لانها فقط كانت للنوم وميب كشخه ... تبعد عن الشانز 15 دقيقه بالمترو ... والمترو عنها 5 دقايق مشي ... كانت صغيره بس نظيفه وفيه مطبخ صغير وغساله ... الحين فلوس القاهره توديك باريس
- للمقتصدين ومعهم اطفال انصح بأخذ شقه بدل الفندق لانك بتستفيد من المطبخ ومن الغساله .. علبة صابون ب واحد يورو تكفيك السفره كلها .
نمنا والصغار اعينهم على صباح الجمعه وموعدهم مع ديزني لاند ...
ديزني لاند :
التذاكر تختلف حسب المواسم وحسب ايام الاسبوع ... يعني الويكند غير ايام الاسبوع الباقية ... وطبعا اكيد بنفضل ايام الاسبوع على الويكند
اللي ممكن يكون مزدحم ...
وكان افضل سعر من موقع ديزني لاند ..ونظامهم تشتري منهم التذاكر ويرسلونها بالبريد وبما انه يوم نحجز كان باقي على سفرنا 3ايام وهي تاخذ 3 ايام بالبريد ويمكن تتأخر ... كلمناهم وقالوا خلاص نرسلها ايميل واطبعوها ملون ... وروعونا قالوا اطبعوها ملون نسختين عشان لو صار شي للنسخه يصير معكم نسخه ثانية .... وفعلا سوينا مثل ماقالوا لنا ...
في الصباح توجهنا لمحطة الميترو واخذنا تذكرة الى ديزني ذهاب وعوده لـ 2 كبار و2 صغار ...
وكنا طالعين يمكن الساعه 8 وشوي
ولازم نبدل الميترو بقطار ...
كان اليوم غيم ومطر ...
على ماوصلنا محطة ديزني الا والعربة اللي احنا فيها فاضيه ومافيه اي احد .... قلت شكل ما معنا احد ...
وبس وقف الا نزلوا الناس من باقي العربات ... رقينا الدرج وطلعنا والا هذي والله ( عين حميده ) هذي ديزني اللي يقولون ... ورحنا نمشي الخطوة بخطوتين ... وقدمنا تذاكرنا المطبوعه واحنا (نترقب ) بس اشوف ناس كثير طابعين تذاكرهم اسود وابيض ويدخلون عادي ... ودخلونا
هنا اوقف معكم ... كني طولة الكلام عليكم ... الجزء القادم بيكون عن ديزني لاند ان شاء الله ...اتمنى مااكون ازعجتكم بسواليفي
* قبل نكمل احب اقول انه الافضل تشترون التذاكر اون لاين عشان تتجنبون انكم تصفون طابور لشراء التذاكر ...
* تقدر تجيب اكل او سناك معك .
* تذكرتنا كانت لـ ( حديقتين ) وهي 4 حدائق + الاستوديو .
* كل الشخصيات تظهر في القرية الساعه 10 صباحا و 10 بالليل ويمكن التصوير معها ..احنا ماجلسن للساعه 10 بالليل .
طبعا قبل الدخول فيه ساحات خارجية وفيه فعاليات ممكن تشوفها قبل ندخل ( كنا مفهين بقوووه وتعدينا كل شي ) لان في مخيلتي حسب اللي قريته هنا انها زحمات ووقوف بالساعات وحرق سعرات اتعبت نفسك ايام وايام وانت تجمع فيها ...وبالاخير تطيرها في سرى لعبه !!
طبعا حنا جايين بوقت الشتاء وموب اجازة لاي احد ... الا ببريطانيا وجينا ديزني باخير يوم دراسه ...يعني غبنا يوم
... واكيد بالصيف والمواسم الوضع غيييير
كان الوصول مع الافتتاح تقريبا ...
بس كنا بمشكلة عويصة ...
الجو كان بارد ... وبنتي مالبست جاكيتها ... وكانت تنتفض برد من ركبنا القطار .. يوم وصلنا ديزني كان الجو جدا برد .. ومستحيل الواحد يستمتع في برد مثل كذا ...بس كنا مأملين على متاجر ديزني اننا نلقى شي ... أي شي ..
... بعد مادخلنا شفت اول متجر قابلنا وانطلقنا له ...
اخذنا جاكيت على ذوقها ... وكانت الاسعار صدمه !! جدا اسعارهم معقوله ... كان سعر الجاكيت 33 يورو ...واعتقد اسعارهم نفس اللي على موقعهم .. بس فيه اشياء كثيرة ميب موجوده على الموقع ... وتتميز الاشياء من المحل عن الموقع انه مكتوب عليها "ديزني لاند باريس" اعتقد كل الاشياء .. وهذي خاصة باللي تشتريها من المتجر وماتلقاها على النت او بمتاجر ديزني ستور المنتشرة .... لان دخلنا متجرهم اللي ع الشانز ولقينا الاشياء بس ماكتب عليها ديزني لاند باريس ... فهذي ميزة للي يشتري من داخل ديزني لاند عن اللي يشتري من ديزني ستور ...
اول ما دخلنا
نشوف القرية بدون اي زحمه !!! وش العلم ؟
عطله وحنا جينا !!! بس هم فاتحين !!!
نشوف اماكن الالعاب فاضية تقريبا ... وين السرا اللي يقولون تصف فيه ساعه !!!
وهنا بينت العلامه
الله يا ايام افلام كرتون !!!
اول زيارة لنا لها
اول مادخلنا جلسنا نمشي وندور الزحمه ... اكيد الاماكن الفاضية هذي مش ولا بد ... والناس منقشين للزين !!!
المكان جدا حلو للتمشية !!
هذا سرا وحده من الالعاب ...
افتتاحيه جميله وبدون انتظار تقريبا ... مااعتقد انتظرنا ولاخمس دقايق
المكان على انه في فصل الشتاء ... يعني الشجر بدون ورق الا انه جدا جميل ... كيف بالربيع والصيف !! والا الوان الخريف!!
المتاجر منتشرة بكل محل ... وهذا نكبنا .. سألناه متى تقفل قال لنا الساعه 6 ... مدري يحسبنا نسأله عن الاكشاك ...بس انه تسبب بطلعتنا قبل
يقفلون ...
تشوفون كيف السماء !! برد ومطر ... عشان كذا حلو جاكيت المطر يكون بالشنطه ( وافضل من غثاثة المظلة )
هذي وحده من الالعاب وكام الانتظار ربع ساعه تقريبا
على اني ما احب الالعاب اللي اني قررت اغير رأيي ..بس لاحد يقول جرب الافعوانيات
اليوم بكفر عن سيئاتي في التأخير واحط الجزء الأخير ... مثلث قوس النصر مرور بالكونكورد الى اللوفر ثم العودة الى برج ايفل منطقة جميلة
وكل باريس جميلة .. بس المكان هذا يمكن تغطيته سيرا على الاقدام لمن اراد خصوصا انه جميل للمشي وفيه زوايا رؤيا حلوه لايفل من بعيد او
الكونكورد ودخول الحدائق ... وطبعا المواصلات العامة متوفرة بكثرة ومحطات الميترو ايضا منتشرة وان كانت بعض المحطات (تقبع في ارض
الجن) ربما ... لبعدها تحت الارض ... حتى اننا في مره من المرات نزلنا في محطة وبدأنا صعود الدرج ...ثم اكملنا الصعود ... ثم واصلنا
الصعود .. ثم ارهقنا الصعود ... وارهبتنا فكرة النزول للبحث عن ( اصنصير ) يمكن مانلقى ... لان بعض المحطات قديمه بس اعتقد فيه .
هي فرصه لتجديد النشاط وطرد الخمول والكسل والاستمتاع ( بالتمشي وتطليق الرجلين ) ... في يوم جديد وكعادة الطافين بالشي الجديد قمنا
منحاشة ....
هذا طريقنا اليومي من الشقة للميترو والعكس ...
في نهاية اليوم السابق رحنا لمنطقة اللاديفانس بس كان اماكن كثيرة مقفله فرحنا له في اليوم التالي والصور القادمه مختلطة بين الليل والنهار ...
يمكن الوصول لها عن طريق محطة La Défenseب بالرير او الميترو ..
قوس الدفاع
مول الفصول الاربعه
وهو مكان جميل جدا ويمكن زيارته بالمساء ومن باب حب الخير لكم لاتنسوا نسيان محافظكم بالاوتيل ... المكان جميل وكبير ومن اماكن التسوق
الجميله والمناسبة وردهة المطاعم في حلوه ...
مقابل الفصول الاربعه او Les Quatre Temps سوق ثاني اللي هو Cnit La Defense وهو مجمع اصغر من الفصول الاربعه بس
انه جميل وفيه فندق الهيلتون ...
- قرية بيرسي bercy village -
طحنا على منطقة جميله مدري هي معروفة او لا وطريقة الوصول لها عن طريق الخط البنفسجي اللي هو رقم 14 واسم المحطة Cour
Saint-Émilion
منطقة تسوق صغيره وهادية وفيها كافيهات ومطاعم وجوها حلو مررره ..
تعجبني المناطق اللي مثل كذا وفيه شبه كثير من جنيف القديمه بس هنا احلى واكبر ونشاط اكثر ...
رقينا مع الدرج هذا وما كنت عارف عن العربة اللي تطلع فوق ... والدرج فيه استراحة بالنص ..
وبتجينا صور المصعد ووين نلقاه فيه ...
ساحة الرسامين
قطار شكله ياخذ جولة ... ماعندي معلومات عنه ..
ايفل من الهضبة
المطل قدام الكنيسة
وايضا المصعد قريب منها
العربة او المصعد تستعمل له تذكرة الميترو .. وهذي صورة من داخلها
بعد مانزلنا رحنا يمين ولقينا محل بيتزا ومكتوب عليه حلال ... ودخلنا وصار العامل فيه بنقالي وقلنا نريح عنده شوي ..
ثم طلعنا وحلينا برا ... وكملنا تمشية ... وكان الوقت ليل
المنطقة جميله جدا ولتغطيتها بشكل حلو والاستمتاع بها اعتقد تحتاج الى يوم او نصف يوم على الاقل ... اقل من كذا اسفين ما نقدر..
في باريس رحنا لبعض الاسواق مثل اللي على شارع Boulevard Haussmann وهو شارع جميل فيه عدد من مراكز التسوق الشهيرة
على طاري اوسمان ... محطة او سمان عند العودة للمطار ... كان التغيير فيها بس يمكن تاخرت قطاراتها يمكن نص ساعة ... فاللي يبي يروح عن طريقها ينتبه للنقطه هذي ويروح بدري شوي ...
باريس حلوه وبالنسبة لي غنية بالاماكن وفعالياتها واماكنها كثيرة مررره ... استمتعوا بوقتكم ولا تلتفتون للي يحاول يوقفكم خصوصا بالشوارع الجانبية لطلب المساعده لانكم احسن ناس .
تقريري على قدي وصدقا مااقدر اسوي مثل من التقارير .. التقرير المرتب له ناس واكيد ياخذ منهم وقت وجهد عظيم .. وانا لا الوقت معي ولا السن يخدمني ( احسن شي قل انك شايب ) وتعكز على عصا بعد ... بس انه جهد المقل وشكر المقصر لهذا الصرح وعمالقته الذين افنوا كثير من اوقاتهم لينعم غيرهم بالراحة والسعادة في سفرهم ... فلهم كل الشكر مع ان الشكر لا يوفيهم حقهم ولهم اخلص الدعاء بالتوفيق والنجاح والسعادة في الدارين .ولمن تابعني له كل الاعتذار عن سقوط سقف التوقعات وانهيار خيالات المتعه على صخرة واقع تقريري الهزيل ... كل الشكر لكم ... بس وعد منيب تارككم وقريبا ان شاء الله في نشبة جديده والله يعينكم تتابعون من جديد او بزعل
... كل ماجيت اطق في ارض وتد - من رداة الحظ وافتني حصاة . كل مادخلت اكتب تقرير شفت اربع مواضيع مثبته كانها تقول لي وش تبي انت !!! واقوم اضغط زر للخلف
.. عطوا الواحد فرصه يقول شي
. 
ووعد مايكون طويل
وبكتبه على كم جزء وماراح يكون على طريقة سرد الايام ... وما اعتقد بتلقون اي شي جديد ...