شكرا لكل الأخوة والأخوات اللى ردوا على إستفساراتى عن السفر لفرنسا بعد الأحداث الإرهابية فى باريس
و أعتذر عن التأخر فى الكتابة عن رحلتى بالتفاصيل للتتابع الرحلة بشكل كبير لأنى سافرت لفرنسا ثم إيطاليا وألمانيا و هولندا و أسبانيا ثم إلى مصر و العودة لإمارات . لكن أيضا أنا قمت بتطمين كل الأعضاء هنا فى موضوع أحداث فرنسا أن الأمور على مايرام و الحمد لله ولم أقابل أى مشاكل
ندخل فى الموضوع كنت الحمد لله حصلت على تأشيرة شنجن فرنسا من مركز التأشيرات فى مركز وافى بدبى يوم 28 سبتمبرالماضى بعد تقديم كل الأوراق المطلوبة من حساب بنكى لأخر 3 شهور و تعبئة الأبليكشن والصور الشخصية المطلوبة و ورقة عدم الممانعة من العمل و تأمين السفر وحجوزات الفندق و الطيران بالإضافة لصور جواز السفر وإقامة دبى و الهوية و ذهبت لتقديم الورق و بعد 12 يوم الحمد لله الموافق 28 سبتمبر حصلت على الفيزا من أول مرة غير إنى تأخرت فى السفر لأنى من هواة كرة القدم وأعشق الزمالك بجنون و كأن لابد من حضور مباراة الزمالك والأهلى اللى أقيمت فى العين منتصف أكتوبر حيث أنى بلا فخر رئيس رابطة مشجعى الزمالك بالإمارات و كان فى ترتيبات كبيرة للمباراة لابد أن اقوم بها و لم اتفرغ للترتيب للرحلة غير بعد المباراة بفترة
و عندما بدأت بالترتيب للرحلة و الدول اللى حازورها وحجز تذاكر الطيران و الفنادق فوجئت بأخداث باريس قبل ميعاد السفر بأسبوعين حيث كان التاريخ المقرر لمغادرة دبى إلى باريس هو يوم 26 نوفمبر الماضى و طبعا أصابتنى ربكة و حزن شديد خصوصا ما شاع من غيقاف تأشيرات الشنجن و منع العرب من السفر لأوربا و خطورة السفر وإحتمالية التعرض للإيقاف فى المطارات لأنى عربى مسلم و ملتحى أيضا و كثير من الأصدقاء طلبوا منى عدم السفر و قتها و إلغاء الرحلة أو على الأقل عدم السفر لفرنسا و كان الأمر صعب على جدا
لأنها أول مرة أسافر لأوربا وبالنسبة لى كانت رحلة العمر و خصوصا زيارة باريس و تحقيق الحلم بزيارة برج إيفل ومتحف اللوفر و الشانزليزيه أيضا التأشيرة كانت multi و صالحة حتى 20 يناير 2016 و الوقت المتبقى حتى لو فكرت فى الإلغاء أو التأجيل مش كبير ز
أول ما فكرت فيه بعد يومين من الأحداث هو أن اقطع الشك باليقين حول إلغاء التأشيرة ممن عدمه بمراسلة مركز التأشيرات فى دبى ( القسم الفرنسى ) بعيدا عن إجتهادات الصدقاء و عدم دقة ما يثار فى الميديا و كأن الرد بأن على أن اسافر أولا لفرنسا و هو ماينصحون به وأننى من حقى دخول الشنجن من أى دولة أخرى ولكن سيتم فحص تأشيرتى فى جوازات الدولة اللى حادخلها و لم يتطرقوا نهائيا إلى غلغاء التأشير من عدمه فأرسلت لهم إيميل أخر أطلب رد واضح هل تم منع السفر وإلغاء التأشيرة فكان الرد إن التأشيرة سارية و لكن دخول فرنسا يرجع لسلطات الحدود الفرنسية كمان أفادت بعض الأخبار من سفارات الإمارات و السعودية فى فرنسا أن خبر إلغاء الدخول غير صحيح
صليت إستخارة وانشرح قلبى للسفر و توكلت على الله و أنا مازال عندى خوف من تعرضى للإيقاف عند دخول أى دولة فى أوربا و حتى أننى لم أخبر الوالدين و أخى الأوسط عشان ما أسبب لهم أى قلق لأن ما كان يقال فى الميديا لا يبشر بخير
قمت بعمل تعديل على الرحلة وأختصرت ايام الإقامة فى باريس ليومين فقط بدل من 4 ايام تحسبا لأى مشاكل قد تحدث لا قدر الله كما أن تذكرة الطيران من باريس لروما على راين اير كانت ب 10 يورو فقط
و بالفعل حددت مسار الرحلة كالأتى دبى إلى باريس ( ترانزيت فى براغ ) و الإقامة فى باريس يومين ثم السفر لفينيسيا بالطيران و الإقامة يومين وبعدها السفر لروما بالقطار و الإقامة اربع ايام يتخللها يوم لزيارة بيزا ثم الطيران لكولن و لقاء صديق مغربى يوم و من ثم السفر لدزسلدورف بالقطار ومن دسلدورف لهولندا بالباص لمدينة ايندهوفن و الطيران لمدينة لمدريد من مطار ايندوف و الإقام هناك لمدة 3 أيام ثم السفر لبلدى إسكندرية ترانزيت فى اسطنبول وافقامة 10 ايام بغسكندرية لزيارة الأهل و الصحاب ثم العودة إلى الإمارات
يوم 25 نوفمبر قبل السفر بيوم جانى غيميل من موقع booking أنه تم إلغاء حجزى فى الفندق بباريس فأول شئ فكرت فيه بالطبع إن الإلغاء لأسباب أمنية خصوصا إن لى زميل المانى فى العمل ادعى إنه تم إيقافه فى المطار عند السفر لدبى فعلى الفور إتصلت بموقع booking للسؤال عن السبب فبلغونى إن بيانات الكرديت غير صحيحة فعدت الحجز على نفس الفندق لك صباح يوم السفر جانى إيميل مرة تانية بالإلغاء فاتصلت بالبنك للإستفسار فأخبرونى غن الفندق بيدخل بيانات الكرديت بشكل خاطئ فاتصلت بموقع booking مرة أخرى و هما اتصلوا بالفندق لحد ما الموظف أدخل بيانات الكرديت كارد بشكل صحيح و تم تأكيد الحجز طبعا كلها لحظات رعب فى رحلة محفوفة بالمخاطر لكن استفدت من إعادة الحجز لأن ال rate نزل و حجزت أخص 100 درهم خير وبركة الحمد لله
مساء يوم 26 نوفمبر توجهت ل terminal 2 فى مطار دبى و ذهبت لكاونتر الطيران التشيكى check air و ادونى البورد الخاص برحلة دبى براغ فقط و بلغونى إن البوردينج باس لباريس حاخده من مطار براغ طبعا كان توتر أخر لكن قلت لعله خير و خلصت الخروج من الجوازات لأن ما كان معى إلا شنطة هاند باج و انتظرت الصعود للطيارة و لما تم النداء على طيارة براغ توجهت للباص و بدأنا الصعود للطيارة و أكرمنى الله إن اللى كان بجوارى اسرة عربية أعتقد مواطنين إمارتيين
بعد طيران 6 ساعات و صلت لمطار براغ الساعة 12 بالليل بتوقيت براع و كان على الإنتظار 7 ساعات ترانزيت لأن طيارة باريس الساعة 7 و نص صباحا بتوقيت براغ فدخلت و تجولت فى المطار كونه أول مطار غير عربى أدخله فى حياتى و الغريب أن المطار كان شبه خالى تماما و كأنه مهجور اللهم إلاأحيانا يظهر شرطى أو عامل و كنت تقريبا لوحدى فى المطار حتى الكاونترات و مكاتب الإستعلامات و الجوازات خالية تماما المطار شبه خالى من أى بشر حتى المنطقة الحرة دخلتها أشترى شئ أكله و طبعا لا يوجد تقريبا غير الخمور و السجائر و حلويات وشوكولاته أخبرتنى الموظفة أنهم أغلقوا . اول مرة اشوف منطقة حرة فى مطار تقفل !!!! مطار لا يعمل ليلا !!!!!!
لفيت شوية فى المطار و دورت على لوحة الرحلات و عرفت بوابة رحلة باريس و مكانها و فرحت جدا لأنى لقيت غرفة صلاة وفيها سجاجيد صلاة و مصاحف و محدد مكان القبلة لأنه خفف لحد ما التوتر اللى عندى و لما حان وقت صلاة الفجر رجعت غرفة الصلاة وصليت فيها الحمد لله
كان فى كافيتريا أو اتنين مفتوحين و كنت جعان جدا لأن الأكل على الطيران التشيكى مافيهوش أكل حلال لكن كل الأكل ايضا فى المطار مش حلال فدخلت كافيه و طلبت نسكافيه و كرواسون
وبعد صلاة الفجر حوالى 5 و نص ظهرت أخيرا موظفة تشيك إير أخدت منها البوردينج باس لرحلة باريس و روحت للبوابة انتظر هناك للنداء على طائرتى و كان الغريب إنى اللى أمامى ال passport control و لقيت ناس واقف لختم جوازات سفرها بعد ظهور موظف جوازات أخيرا فى المطار المهجور خفت إن ممكن يكون حاخد ختم دخول الشنجن فى براغ بدل باريس رغم إنى ترانزيت وإنى ممكن أكن منتظر فى المكان الغلط النداء على الطيارة فوقفت فى الطابور و اللى ارعبنى إن ظابط الجوازات رجع اتنين ستات و مافهمتش السبب لأنى مش فاهم اللغة اللى بيتكلموها و أنا طبعا اترعبت تانى لأنى اساسا جاى خايف من اللى باسمعه فى الميديا إن فى نظاهرات ضد المسلمين فى براغ وصلت للظابط فتح الجواز و قعد بحلق لى شوية و ختم الجواز و دخلت الحمد لله لسير فحص الشنط ومنه للبوردينج و الحمد لله ماقابلت مشاكل وركبت الباص إنتظار للصعود للطيارة فى رحلة المجهول و عقلى بيفكر ماذا يخبئ لى القدر فى مطار شارل ديجول فى باريس وكنت اذكر الله لكى أخفف القلق ( الا بذكر الله تطمئن القلوب )
الوصول لمطار شارل ديجول
المرحلة الأصعب في الرحلة الوصول لمطار شارل ديجول. ركبت الطيارة من مطار براغ ووصلنا تقريبا بعد حوالى ساعة طيران لمطار شار ديجول بباريس و طول الرحلة طبعا كان عندى قلق شديد من كلام الميديا و رفض الأصدقاء لسفرى و ما انتظره من مجهول فى باريس و حاولت طول الرحلة أكثر من الدعاء و الأذكار .
معظم الرحلة السحاب مغطى الأرض منظر جميل و عند بداية الهبوط التدريجي كان في ضباب شديد يحجب الرؤية لدرجة إنى فوجئت إن الطيارة نزلت على الممر مرة واحدة و كنت أعتقد أننا لسه طايرين على إرتفاع عالى .
هبطت الطائرة فى مطار شارل ديجول كان الوقت تقريبا 9 و نص صباحا مش متذكر الضباب حاجب الرؤية تماما و خرجت من الطيارة لل Aero bridge عقلى بيفكر يا ترى إيه منتظرنى
دخلت صالة الوصول ووضعت ثقتى في الله سبحانه وتعالى و مشيت بكل ثقة و كانت المفاجأة القوية بالنسبة لى الحياة طبيعية تماما و هناك محجبات و مسلمين لا يوجد اى مشاكل مشيت على لوحات Exit / Sortie و تقريبا لقيت نفسى بأخرج بره صالة الوصول مفيش أى حد بيوقفنى و لا بيسألنى رايح فين و مفيش جوازات لأنى ختمت دخول فى براغ.
]
لحد ما وصلت لباب خروج نهاية الصالة كان في مكتب عرفت من طبيعة الأسئلة انه جمارك كان ممكن أمر على طول للخارج من غير وقوف لكن عدم تصديقى للى شايفه و إن الأمور طبيعية غير ما يقال فى الميديا خلانى أقف عشان استوعب كان فى مسافر شكله من شرق أسيا و موظف من أصول أفريقية يبدو إنه بيفتش شنطة المسافر الآسيوي. و نظر لى كأنه مستغرب إنتظارى خصوصا إن ماكانش معايا غير هاندباج على ضهرى . ثانى جه شاب فرنسى ظريف رحب بى ودار بينا الحوار التالى
سالنى عن سبب الحضور لفرنسا
_ سياحة لمدة يومين
- سالنى جاى منين
-من دبى
-فقال لي لكن البوردينج من براغ
- قلت له لا ترانزيت فقط فى براغ
-سالنى عندك مكان تسكن فيه
- نعم عندى حجز فندق
- طيب معك فلوس تعيش منها 2000 أو 3000 يورو
- قلت له لأ معايا 400 يورو لأنى معايا كروت إئتمان صالحة دوليا
- سألني هل معاك توباكو يقصد سجائر
- لأ مش معايا
- فكرر السؤال مش معاك توباكو فى الهاندباج
- هنا فهمت إنه موظف الجمارك فقلت له لأ و اتفضل فتشها لو عاوز
- رد على لأ اتفضل و رحب بى مرة تانية
و انا طبعا فى قمة الذهول كده خلاص ادخل باريس مفيش بوليس و لا أسئلة و لا إتهام بدون دليل لأنى عربى . للأسف كل ما سمعناه في الميديا كذب في كذب الموظف كان في قمة الذوق معايا كنت عاوز ارجع أسأله هو كده خلاص بجد أنا دخلت باريس و لا بتهزروا معايا
و فعلا خرجت و انا بأحمد الله على فضله و منه على و وجدت الأمور أكثر من طبيعية عرب و مسلمين ومحجبات كتير . بلد لايمكن تتصور إن كان فيها آحداث دامية من أسبوعين فقط أو أن بها حالة طوارئ كما يقال
طبعا اول شيء عملته طمنت اخويا و اصحابى إن الامور كلها طيبة و ما واجهتنيش اى مشاكل و بالمناسبة اخى الصغير بيشتغل فى جمرك إسكندرية و دايما بيكلم أصحابه في مطار إسكندرية عشان ادخل بسرعة و أقسم بالله دخلت مطار شارل ديجول أسهل من دخولى مطار برج العرب في إسكندرية.
بعدها سألت موظفة الاستعلامات اشترى خط تليفون منين فدلتنى على ال book Shop و فعلا اشتريت خط اورانج ب 40 يورو فيه 120 دقيقة دولى و 1 جيجا بيانات اقدر استخدمهم في كل أوربا .
مشيت على اللوحات بتاعة المترو و سألت فى مكتب استعلامات آخر عن مكان المترو و التذاكر و فعلا دلتنى الموظفة و عكس ما يشاع عن الفرنسيين إنهم مش بيتكلموا إنجليزي كويس كانوا بيتكلموا انجليزى كويس جدا و ودودين جدا و مبتسمين عكس ما بيشاع عنهم تماما.
طبعا ابتعدت عن ماكينات التذاكر و دخلت على شباك التذاكر و طلبت من الموظفة تيكت لكل المواصلات لمدة يومين دفعت 35 يورو و خدت التيكت
المطار كبير جدا فتحت عم جوجل الله لا يكسبه و توهت داخل المطار حوالى ساعة و نصف و لما زهقت سألت موظف الاستعلامات و وريته مكان الفندق على جوجل فى passay.
موظف الاستعلامات ده لوحده حكاية أولا باله طويل جدا ولو قعدت ساعة تقوله مش فاهم ما يزهقش و لا يتضايق و حافظ بلده شبر شبر و فاهم جوجل ابليكشن كويس جدا بص فى الموبايل و قال لى لأ جوجل مديلك مسار بعيد حيخليك تغير مواصلة 3 مرات والباص اللى محددهولك شركة خاصة و ما يقبلش التيكت اللى معاك و كمان غالى. إدانى خريطة و قالى انا حاقولك على مسار أسهل و رسم لى على الخريطة. الصراحة شرح لى مرتين مافهمتش كويس لدرجة إنى اتحرجت تانى مرة و قلت له تمام شكرا لكن بال eye contact فهم إنى لسه مش فاهم و أصر يشرح لى تانى و فعلا دلنى على طريق أسهل بالمترو من المطار ل محطة Denfert- Rechereau و هناك باعدى ال subway و اخد الخط الأخضر 6 بإتجاه Charles de galle Etoile مش Nation و أنزل فى محطة Passay. و فعلا توجهت المترو و سألت موظف المترو و أكد نفس الكلام و فعلا ركبت المترو بإتجاه الفندق
ملحوظة هامة احذر من المتسولين و اللي بيدعوا جمع تبرعات للصم و البكم ويقولك وقع للتعبير عن مساندتك لمش عارف مين حيقابلوك كتير أرفض تماما لأن بعد متوقع حيشاورلك على مبلغ التبرع
وصلت محطة Passay و توجهت على الخريطة لمكان الفندق في شارع Rue de passay و المرة دى استخدمت برنامج Here بدل جوجل ماب الفندق على مسافة 400 متر فقط من المترو . المنطقة جميلة جدا و باريس بلد رائعة ونظيفة جدا
دخلت الفندق موظفة الاستقبال بتتكلم انجليزى كويس جدا خدت مفتاح غرفتي. الفندق نظيف و ممتاز لكنه أصلح للشباب لأنه مكون من طابقين بسلم حلزونى ضيق . لكن الغرفة نظيفة و مرتبة و فيها كل شئ
وصلت الفندق حوالى الساعة 2 ظهرا و منه لله عم جوجل اللى توهنى ساعتين داخل المطار
صليت الضهر و العصر قصر و رتبت هدوم بسرعة لأن حجز برج إيفل الساعة 3 العصر وقبل التحرك باشيل موبايل سقط الباور بانك بالكابل على الأرض و لقيت الباور بانك مايشحن
ظروف معاكسة غريبة طول الرحلة لكن قدرت احط الكابل فى ال USB port بشكل مائل فشحن الحمد لله
. و جريت طبعا على برج إيفل اللي ما يبعد عن الفندق غير 10 ل 15 دقيقة مشى و سألت موظف الفندق لأن فاضل ربع ساعة بس على معاد تذكرتى و الموظف بشوش جدا و بيتكلم انجليزى بطلاقة و ودود و متعاون جدا و مشيت على الخريطة اللى ادهالى و فعلا عشر دقائق و وصلت البرج .
نتابع تفاصيل الرحلة و بأعتذر عن التأخير لظروف العمل. بعد 10 دقائق مشى وصلت أسفل برج إيفل الساعة 3 عصرا بالظبط فى معاد حجز التيكت بتاعى و الافضل دايما الحجز اونلاين من موقع البرج لتجنب الطابور . الأجواء كانت عادية جدا لا يوجد أى شئ طبيعى و التعامل بإحترام و ذوق شديد الجو أسفل البرج كان بارد لكن مشمس.
كان في طابور مزدحم للتيكت لكن اللى معاه حجز اونلاين بيمر على طول حتى فى الدخول و التفتيش فى مكان مخصص للى معاه تذكرة اونلاين و جاى في معاه. مريت على التفتيش بسرعة شديدة تفتيش عادى جدا و بسيط و مريت هاندباج على السير و دخلت الموظف عمل سكان للباركود على التيكت و دخلت بهو صغير فى سلالم بسيطة تصعد عليها للوصول للمصعد و ووقفت أنتظر وصول المصعد . مدخل البرج راقى و فخم جدا.
شكل المصعد من الداخل و الخارج و هو بيتحرك بشكل مائل مش عمودى.
وصلنا بالمصعد للدور الأول أما للصعود لقمة البرج بترجع تانى الاسانسير الخاص بالقمة المنظر رائع و باريس جميلة جدا و الجو بارد شوية لكن مشمس و محتمل و إن كنت أول مرة أقابل جو شديد البرودة.
اخدت جولة كبيرة و التقطت عدد كبير من الصور للذكرى ما أعرفش طبعا هل يكون لى نصيب فى العودة مرة أخرى إن شاء الله . لكن ما كانش معايا كاميرا و استخدمت التليفون البطارية ما بتستمر كتير و الباور بانك لا غنى عنه .
ركبت المصعد مرة أخرى إلى قمة البرج الجو بارد جدا و درجة الحرارة تحت الصفر و مضطر أخلع الجوانتى عشان أعرف استخدم التليفون .
قمة البرج دورين جزء مقفول يوجد فيه صور نادرة للبرج و أشهر زواره منذ بناؤه و أسماء أشهر الأبراج في كل العالم ثم توجد سلالم توصل للقمة المكشوفة لمن يستطيع التواجد .
و يوجد محل لبيع الكحول الساخن و الاجانب طابور أمامه عافانا الله
هذه الصورة تم تصغيرها . الحجم الافتراضي لها هو 1024x640.
ظباط الأمن غير موجودين كثيرا في القمة المكشوفة لشدة البرد و لا يوجد أى شخص للمساعدة على إلتقاط الصور بعلم الزمالك
لكن اتصرفت و قمت بمغامرة بتعليق علم الزمالك على السلك . طبعا الضباب فى الخلف يحجب الرؤية تماما
ثم بدأت رحلة النزول بعد ساعات من التواجد في الأعلى
يتبع
نزلت إلى الدور الأول مرة أخرى و التقطت صور أخرى ليلية لكن صورة الموبايل مش بتكون واضحة بالليل . يوجد الستورز و ممكن شراء هدايا تذكارية جميلة و أيضا مطاعم و كافيتريات و معرض يعرض فيديو لتاريخ بناء و تشغيل البرج. و أيضا توجد فى الدور قبل الأرضى قبل الخروج الكرة الكبيرة المعلقة شكلها رائع و جميل
قضيت أوقات جميلة و ممتعة جدا حوالى 3 ساعات و نصف و خرجت التقطت بعض الصور من الخارج سريعا ثم توجهت للفندق متعب جدا لأنى ما نمت من يومين وصلت الفندق و نمت نوم شديد . الفجر فى باريس 7 صباحا تستطيع النوم براحتك
اليوم الثانى للرحلة كان يوم مكوكى كان على زيارة متحف اللوفر و شارع الشانزليزيه لمشاهدة قوس النصر و ميدان الكونكورد و تروكير و إلتقاط صور تذكارية نهارا و ليلا و زيارة كاتدرائية نوتردام بسبب إختصار الإقامة في باريس ليومين فقط . الساعة 8 ونص تحركت لمحطة المترو و وصلت سريعا لمحطة Charles de Gaule و من هناك ركبت الخط الأصفر لمحطة palais Royal Musée de Louvre.
خرجت من المترو و تحركت لساحة المتحف و الهرم الزجاجى الشهير. إلتقطت بعض الصور و تحركت لمكتب التذاكر لأنى ماكنتش حاجز التيكت أونلاين لكن الحمد لله ما كان فى طابور مريت على التفتيش بسرعة شديدة تفتيش عادى جدا و دخلت بهو المتحف الرائع جدا اشتريت التيكت و طلبت الخريطة الخاصة بالمتحف باللغة الإنجليزية وللأسف بعد نهاية الجولة عرفت إن فى عربى كمان.
]
صورة جابت لى ذهول أنا لابس دولاب ملابس و شبه متجمد و دول بيجروا بشورت
متحف اللوفر مساحته كبيرة جدا كنت ناوى فقط أشاهد لوحة الموناليزا و قسم الأثار المصرية و لا تتجاوز الزيارة الساعة و نصف لكن استمرت الجولة حوالى 4 ساعات. المتحف ممتع و يحتاج يوم كامل لوحده.
ركبت المترو من محطة palais Royal Musée de Louvre مرة أخرى للتوجه لساحة كونكورد و محطة كونكورد قريبة جدا تقدر تروح لها مشى لكن سفرى تانى يوم خلانى استخدم المواصلات توفيرا للوقت و عشان استفيد شوية من تذكرة المواصلات اللى دفعت فيها 35 يورو و استخدمتها مرتين فقط
وصلت بسرعة لساحة الكونكورد المسلة المصرية الشهيرة و ساقية الملاهى الكبيرة لكن أجلت التصوير لبعد الظهر لأن الشمس قوية و الإضاءة ماتساعد.
دخلت شارع الشانزليزيه السير فيه ممتع جدا و الشارع مثال صارخ على كذب الإعلام و الميديا. الشارع ملئ بالحياة و الصخب و عرب كثيرين و محجبات يسيروا في أمان تام بلا أى قلق و المحلات تسمع فيها أغانى جزائرية. أيضا كان فيه زفة فرح لتوانسة في الشانزليزيه عبارة عن 6 سيارات كل سيارة مغطاة بعلم تونسي ضخم .
أخدت بعض الصور والفيديو فى الشانزليزيه و سرت حتى قوس النصر الشهير.
الساعة 4 ركبت الباص المكشوف من عند قوس النصر ب 30 يورو و طبعا فى كل الأماكن و المواصلات تقدر تدفع بكروت الفيزا و الإئتمان. الباص متعة حقيقية يلف بيك كل باريس و يعمل لحدالساعة 7 بالليل و يقف فى كل الأماكن السياحية فى باريس و تقدر تنزل و تركب تانى فى أى وقت طول اليوم .
ركبت المترو من محطة palais Royal Musée de Louvre مرة أخرى للتوجه لساحة كونكورد و محطة كونكورد قريبة جدا تقدر تروح لها مشى لكن سفرى تانى يوم خلانى استخدم المواصلات توفيرا للوقت و عشان استفيد شوية من تذكرة المواصلات اللى دفعت فيها 35 يورو و استخدمتها مرتين فقط
وصلت بسرعة لساحة الكونكورد المسلة المصرية الشهيرة و ساقية الملاهى الكبيرة لكن أجلت التصوير لبعد الظهر لأن الشمس قوية و الإضاءة ماتساعد.
دخلت شارع الشانزليزيه السير فيه ممتع جدا و الشارع مثال صارخ على كذب الإعلام و الميديا. الشارع ملئ بالحياة و الصخب و عرب كثيرين و محجبات يسيروا في أمان تام بلا أى قلق و المحلات تسمع فيها أغانى جزائرية. أيضا كان فيه زفة فرح لتوانسة في الشانزليزيه عبارة عن 6 سيارات كل سيارة مغطاة بعلم تونسي ضخم .
أخدت بعض الصور والفيديو فى الشانزليزيه و سرت حتى قوس النصر الشهير.
الساعة 4 ركبت الباص المكشوف من عند قوس النصر ب 30 يورو و طبعا فى كل الأماكن و المواصلات تقدر تدفع بكروت الفيزا و الإئتمان. الباص متعة حقيقية يلف بيك كل باريس و يعمل لحدالساعة 7 بالليل و يقف فى كل الأماكن السياحية فى باريس و تقدر تنزل و تركب تانى فى أى وقت طول اليوم .
طوال الطريق الحياة طبيعية و يوجد صخب و زحام لا يوحى ابدا بما كنت أسمعه فى الميديا.
و وصلت إلى نوتردام و كانت المفاجأة إنها مفتوحة و الحياة طبيعيه جدا و الدخول مجانا لكن كان في طابور طويل .
عند الدخول يطلبوا منك خلع الكاب و عدم إستخدام فلاش أثناء التصوير.
نزلت من الباص و مشيت فى شارع الشانزليزيه من ميدان الكونكورد إلى قوس النصر فى أجواء رائعة جدا محلات جميلة و كرنفالات رائعة لكن الجو كان برد جدا جدا جدا و أكاد اتجمد .
قابلت بعض الشباب المصريين طلبوا التصوير معايا عشان زى الزمالك . كانوا جايين من مصر لتغطية مؤتمر المناخ و سألتهم هل واجهوا أى مشاكل فى الجوازات عند الدخول قالوا ما كانش فيه أى مشاكل إطلاقا مجرد ختم الدخول فقط رغم إنهم حضروا لفرنسا قبلى بخمس أيام.
طبعا سألتهم عن مطاعم حلال لأن الجوع وصل بى إلى مرحلة صعبة جدا حيث اليوم التالت عل قطعة كرواسون و شوكولاته و نسكافيه. تتابع الرحلة و ضيق الوقت و عدم وجود مطاعم حلال فى طريقى كانت مشكلة . الشباب دلونى على مطعم فى نوتردام لكن للأسف أنا لسه جاى من نوتردام.
التوقف لدقائق في البرد القارص خلى إيدى ترتعش بشكل مرعب خوفنى جدا كأنها متكهربة
رغم إنى لابس جوانتى. حطيت إيدى فى جيوبى وكملت الجولة للأسف المحلات مليئة بال hot wine لا و يترجموها كمان للعرب كحول ساخن و طوابير عليه لكن الحمدلله ما كان فى طابور على القهوة
شربت قهوة ساخنة للتدفئة.
المنيوهات في المحلات كلها بالفرنسية
آخر مازهقت سألت فى أحد المقاهى عن أكل نباتيين و أمرى لله و اخدت بيتزا مارجريتا و كافيه اوليه و ماء كلفت 33 يورو . باريس غالية شوية لكن الجرسونات فى منتهى المرح و يرحبوا بك جدا و يرحبوا بالعرب جدا منها لله الميديا. استمتعت جدا بالدفاية في الكافيه
و الهواء فى الخارج يكاد يشيل الكافيهات .
كملت السير حتى قوس النصر و اخدت بعض الصور. لازم تزور الشانزليزيه و تتصور فيه بالليل و بالنهار
بعد كده خدت المترو مرة تانية لتروكير لتصوير ب برج إيفل بالليل كان منظره رائع .
قعدت شوية للراحة و الاستمتاع بالمكان الجميل و توديع باريس لأنى كنت مسافر فى الصباح إلى فينيسيا.
ركبت المترو و نزلت محطة Passay محطة واحدة فقط تروكير و رغم إن الفندق قريب جدا مشى لكن كنت تعبت جدا من التجول و وصلت الفندق حوالى الساعة 12 بالليل رتبت شنطتى عشان الصبح بدرى أعمل check out و أروح مطار beauvais
طيارتى لفينيسيا الساعة 11 صباحا من مطار beauvais بحثت عنه فى جوجل طلع لى Beauvais shuttle Airport .
خدت شنطتى و عملت check out من الفندق و سألت موظفة الفندق قبل الخروج هل مكان المطار كده صحيح زى ما جوجل يوضح فأكدت لى صحة المسار اللى على جوجل.
وصلت محطة Passay وكان كده مر يومين على التيكت و مش عارف أقدر استخدمها ولا لأ سألت موظف الاستعلامات فقال لي اليوم الأحد و غدا الاتنين المواصلات free
سرت على الطريق اللى دلنى عليه ال GPS و نزلت محطة la mutte على ما أتذكر مش فاكر قوى إسم المحطة و كان اللى شايفه فقط باصات ولا يمكن يكون في مطار فى المنطقة دى. أكثر من نصف ساعة الف و ال GPS مصمم إنى وصلت فاصطريت أسأل دلونى الناس على مكان الباصات . كيف يعنى فين الطيارة
قالوا روح عند البوكس اللى خلف الباصات و سألت هناك قالوا لى اقطع تيكت ب 17 يورو عشان تركب الباص ده يوصلك مطار beauvais جبت التيكت ووريت الموظف تذكرة السفر لأن الساعة بقت 9:40 و معاد الطيارة 11:00 فقالوا لى كده مش حتلحق الطيارة كيف،؟ لأن الباص ياخد ساعة و ربع الصراحة صعقت لأن عندى حجز اوتيل كمان فى فينيسيا و مش عارف أعمل إيه . الفرنسيين ودودين جدا و helpful قوى الموظفين و بعض المسافرين عملوا consulting على حالتى
و قالوا لى لو خدت تاكسي ممكن يكلف 160 يورو هههههههه هم يبكى و هم يضحك تيكت الطيارة ب 36 يورو
قالوا اركب و روح يمكن يوافقوا تركب متأخر . وصلت قبل إقلاع الطيارة بربع ساعة
.
طبعا ال check in و البوردينج انتهى و رفضوا اطلع الرحلة . روحت لمسؤول التذاكر فى شركة Ryanair قالى ممكن تطلع بكره في نفس المعاد و تدفع 50 يورو طبعا مستحيل لأنى عملت check out بالفعل من الفندق فى باريس و عندى حجز فندق في فينسيا حيضيع على.
الخيار التانى من الموظف إنى ادفع 100 يورو و اطلع أى مطار أخر فى إيطاليا برده صعب لأنى حاحتاج مواصلات لفينيسيا و مش عارف الطرق و التكلفة و حأتوه .
قعدت شوية أفكر مع نفسى وعملت بحث فى النت لقيت تيكت على شركة transavia ب 82 يورو لفينيسيا بعد 5 ساعات من مطار أورلى حجزت بالكرديت و رجعت الباص عشان اركب و ارجع لباريس لكن التيكت بتاع الباص ذهاب بس فقطعت تيكت تانى ب 17 يورو
تيكت الرحلة اللى فاتتنى كان 36 يورو و دفعت نفس المبلغ عشان أروح للمطار و أرجع بخفى حنين لكن الصراحة الطريق من و إلى المطار كأنه قطعة من الجنة ويستاهل المبلغ .
رجعت لمحطة la mutte و منها ركبت لمحطة Charles de Gaule Etoile فضلت الف على الباص اللى بيروح مطار أورلى لحد ما لقيته أخيرا ب 12 يورو و أثناء ما بدور على الباص راح منى الجوانتى و أنا مستغرب من الظروف المعاكسة اللى بتحصل دى
ركبت الباص و عملت check in online و نزلت ال boarding pass mobile version على تليفونى الطريق اخد حوالى ساعة للوصول لمطار أورلى غير ساعة ونص للعودة من مطار beauvais لباريس .
دخلت مطار أورلى قبل معاد الطيارة بساعتين و نصف الحمدلله و سألت موظف السيكيوريتى انا معايا البوردينج على الموبايل هل حاحتاج نسخة مطبوعة قال لأ إذا ما كان معاك غير الهاندباج روح على gate 9 و قالى 9 بالفرنسية و انا كنت خلاص مش فاكر إسمى عديت الأرقام بالفرنسية على صوابع إيدى أن دو تروا كاتر سانج سيس سيت ويت نيف ههههههههههه
بوابة 9 جرى على هناك . اشتريت شوية حاجات من المنطقة الحرة و لأول مرة أقابل شخص ما يعرف انجليزى الكاشير لكن المبلغ يظهر على الماكينة
على سير الشنط طلبوا تفتيش الشنطة . ملحوظة هامة اذا معاك برفانات أو أدوية خليها بره عند مرور الشنطة على سير الفحص و نقطة أخرى مهمة بعض ال souvenirs عبارة عن معالم سياحية داخل كريستالة مملؤة بسائل ممكن يفتشوا الشنطة بسببها لأن سوائل أكتر من 100 ملى غير مسموح بيها على الطيارة فى باريس ما سألوا عليها لكن فى مطار ايندهوفن فتشوا الهاندباج بسببها.
خلصت كل الإجراءات و قعدت ارتاح من الضغط العصبي اللى مريت بيه طول اليوم الصعب. خسائر حوالى 200 يورو لكن الصراحة استمتعت بالمغامرة و الحمد لله كان عندى حسن تصرف
. عملوا سكان للبوردينج من على الموبايل و توجهت للطيارة أخيرا بإتجاه فينيسيا. و كده انتهت أيامى في مدينة النور باريس. ما لقيت فيها إلا كل ود و ترحاب شعب ودود جدا و مرح و متعاون و حسبى الله و نعم الوكيل فيمن قاموا بالأعمال الإرهابية والدين برئ منهم .
