حولنا من مطار الرياض يورو مبلغ يكفي ليومين فقط
والباقي نصرف حسب الحاجة من أجهزة الصرف
من كذا حساب
وهذي سياستنا بكل رحلة
السكن
في منطقة اللاديفانس
اداجيو لاديفانس اسبيلاند
استديو بسعر 800 ريال في الليلة
Aparthotel Adagio La Défense Esplanade
التخطيط للرحلة
تخطيط هالسفرة كان فيه قرارات حاسمة مني
كل رحلة أخطط لها من بدري تتكنسل
بالذات سفرة أوروبا
وهالمرة سويت إضراب ورفعت شعارات لا للتخطيط
وما راح اخط إلا قبل السفرة بأسبوع
لكن لا يهمكم أصلا حافظة الأماكن من تخطيطات سابقة تكنسلت
وسبق سويت برنامج سياحي أوروبي لبعض قرايبي
كان المخطط باريس ولندن
وبقدرة قادر تغيرت الخطة وصار باريس وسويسرا
.
.
يحق لي اضرب ولا مايحق
.
.
وطبعت المعلومات الي عندي
والشي الوحيد الي بحثت عنه المترو
وحدثنا جهاز قارمن بخرائط أوروبا
وطلعنا رخصة دولية من مكتب سياحة ب 150 ريال
وطلعت بنفس اليوم
الفندق
دائماً احرص يكون السكن اقتصادي وقريب من المترو
وقبل هذا يكون مجرب
وبما إننا حجزنا متأخر فكانت الخيارات محدودة
لكن كنت حاطه عيني على اثنين:
اداجيو و فريزر
كان مديرنا ابو خالد ذاكرها لي في المنتدى السابق
وبعد اخونا ارجنتيني سبق تكلم عنها جزاهم الله خير
وكان سعر اداجيو مسترد مثل سعر فريزر غير مسترد (مع عرض خاص)
وهنا كانت الحيرة
قلبي مع فريزر وعقلي مع اداجيو
وانتصر العقل على القلب هههههه
حجزت اداجيو
حطيت اسم الفندق (adagio)
في المترجم ابغى اعرف المعنى
وهذا الي طلع لي ههههه
دجه عندنا بمعنى (مفهي-منسم-اهبل)
والمعنى الحقيقي لكلمة (adagio)
مقطوعة موسيقية
موقع الفندق
بالقرب من محطة
Esplanade de La Défense
هذا الفندق من برى
وملاصق له فندق السوفتيل
يمين الصورة هذا طريق محطة المترو
.
.
والمنطقة الي فيها الفندق جادة مشاه يعني ما تدخل لها السيارات
و التاكسي اول ماوصلنا نزلنا في مواقف سيارات اعتقد إنها تابعه لسوفتيل
مباني اللاديفانس
الغرفة
الكنبة تنفتح سرير
المدخل وباب المطبخ
طاولة الطعام
المطبخ
ومابقيت شيء ماصورته لكم ههههه
أعجبتني تجهيزات الغرفة
حتى المكنسة فيه
.
.
العيب الوحيد بالنسبة لي
دورة المياه (أعزكم الله)
جزء المرحاض مافيه أي مصدر للموية
إطلالة الغرفة
كافيهات ومطاعم لها مدخل من الفندق
الكافيهات والمطاعم تحت الفندق
في الساحة الخارجية
من عيوب اللاديفانس
الصباح مليانة بشر وناس رايحة وناس جاية
وبالليل بسم الله رررررعب
حتى الكافيهات الصباح خرشة وطاولات وكراسي والمساء ماتشوف محل أصلاً
بس نظام الدخول للفندق حلو ماتدخل من الباب الخارجي للفندق إلا بكرت الغرفة
حتى وقت الوصول والشيك إن تضغط الجرس ويأخذوا اسمك يتأكدوا انه عندك حجز
إيجابيات وسلبيات الفندق
الإيجابيات:
قربه من المترو (على بعد خطوات)
تعامل طاقم الاستقبال
نظام أمان الدخول
حجم الاستديو مناسب
وجود آلة(مرطبات+تسالي)
في مدخل الفندق
وجود مطاعم في المنطقة حول الفندق
السلبيات
مكان الفندق مخيف بالليل
صعوبة الوصول له بالتاكسي
عدم وجود مواقف للسيارة
الاستقبال في الدور الثاني
رائحة الممرات (طبخ)
دورة المياه جزئيين مفصولات
(مرحاض)(مغسلة+شاور)
تنظيف الغرف مشروط
رحلتنا كانت الساعة 12 بالليل
طلعنا المطار ورحنا نغلف الشنط
نحاول نقلل من الإصابات
دخلنا الصالات والمكان فاااااضي
وين العالم وين الناس
قعدنا حوالي ساعة وبعدها الدنيا ازدحمت
ودخلنا الطيارة
والناس نامت
وإحنا مو قادرين ننام
والحمد لله وصلنا اعتقد على الساعة 6 ونص صباحاً
والمطار شبه فاضي
كنا ناوين نأخذ شرايح جوال
بس من التعب ماقدرنا
استلمنا عفشنا وطلعنا نأخذ تاكسي
الجو بااااااارد درجة الحرارة 7
والسماء سبحان الله كلها خطوط من الطيارات
المنظر مره جميل
وركبنا التاكسي
والواضح من الدبدوب والورد إن السائق حرمه
أعطيتها اسم الفندق والإحداثيات واللوكيشن
ولما وصلنا
قلت لزوجي مو هذا المكان
هذا فرع ثاني
فقالت لنا الحرمة
انتظروا لا تنزلون لحد ما أتأكد من المكان
طلع اداجيو (لاديفانس كليبر)
ووصلنا للمكان الصح
ونزلتنا في مواقف داخليه
وأشرت لنا على الطريق الي نروح معاه لان السيارة ماتدخل
و سعر التاكسي من المطار للفندق (75 يورو)
وشفنا لوحة الفندق بس ما شفنا مدخل
ما فيه إلا باب مسكر
ولفينا من الجهة الثانية قلنا يمكن هذا الباب الخلفي
ولا فيه شي
وبما ان الوقت بدري ما فيه ناس بالساحة
انتظرنا لحد ما مر احد وسألناهم وين المدخل
الي ما يعرف .. والي يقول هذا هو
وأخيرا مرت وحده وسألناها
قالت انتم معكم حجز فقلنا لها ايه معنا حجز
قالت طيب تعالوا
ووقفت عند الباب ودقت الجرس ههههههه
طلع فيه جرس واحنا ما نعرف
المهم سألوني باسم مين الحجز
وفتحوا لنا الباب
.
.
.
كنت مراسلة الفندق قبل الوصول انه وصولنا بدري اذا فيه إمكانية
الشيك إن قبل مواعيده الي هي الساعة (12)
ردوا لي انه ما نقدر نضمن لك
.
.
.
ودخلنا على أساس بناخذ يوم إضافي لأننا مررررره مرهقين
قالت لنا الموظفة من حظكم الغرفة جاهزة
وعلى السرير مباشرة ههههههههه
بعدها صحينا وصلينا وبدلنا وطلعنا
وعلى المترو
هذي التذاكر وأنواعها وأسعارها
أخذنا باريس فزيت
والفرق بين النوعين على حسب فهمي
أن باريس فزيت تحسب المدة من تاريخ الاستخدام
اما نافيغو تبدأ وتنتهي بأيام محدده (تبدأ الاثنين وتنتهي الاحد)
ونافيغو الارخص
ولدي جنني مع الات المترو لازم يشتري في الروحه والرجعة
و آلاتهم تعباااانه تاخذ العملة ومايطلع الطلب ويجلس يضيع وقتنا إلا يبي ياخذ
كانت معي خريطة حصلتها بالبحث في قوقل
فادتني كثير الله يجزاه خير الي سواها
طول الرحلة وإحنا نردد "خريطة يوكو" "خريطة يوكو"
بالرغم من انها مو واضحه بس استفدت منها كثير
وكنت ناوية اعيد صياغتها من جديد وفعلاً بديت فيها
لكن وانا اتصفح المنتدى لقيت مشرفنا المسافر مسويها
جزاه الله خير
هذي هي
نزلنا عند محطة Charles de Gaulle Étoile
عند قوس النصر تماماً
وبداية الشانز
قوس النصر تم بنائه بطلب من نابليون بونابرت تخليد لانتصارات الجيوش
ونقش على جدرانه الداخلية أسماء القادة العسكريين المشاركين في هذي الحروب
وأسماء الحروب التي انتصروا فيها
السفارة القطرية قريبة من قوس النصر
موقعها استراتيجي
من العروض في الشانز
عروض مالها داعي
يحرك رجله اليمين وبعدين اليسار ويأخذ له دوره هههههه
قسم الحلويات في مطعم ماك
بيجو
الشانز
وخلاص هلكنا الجوع
وبما انه الرحلة رحلة الدجة هههه
يعني رحلة بدون تخطيط حتى المطاعم مارحت للمطاعم الي في القائمة
الي نحصله في طريقنا ندخل
سألنا وين مطاعم كويسه وقريبة
قالوا في اللفة
ولفينا
اذكر واحد مسمي هالشارع "شارع العصارات" لأنه مليان مطاعم
والي مايعرف شارع العصارات
هذا شارع قديم بالرياض زي شارع التحلية بس تحلية الطيبين ههههه
وحصلنا مطعم انتركوت بس زحمة
شوفوا كيف الناس طالعة برى
محطات الرير تختلف عن محطات المترو
محطات الرير كبيرة وكذا تعطيك احساس إنك في قلعة ههههههه
مناظر من الطريق
من بعد ماتطلع من محطة الرير تحتاج شوي مشي عشان توصل للقصر
الصراحة تعبنا واحنا نمشي ههههه
وأخيراً وصلنا
والتذاكر تحصلونها في المبني الي على اليسار اول ما تدخلون
وهذا مكانها
والتذاكر فئات
تذكرة شاملة لكل اجزاء القصر اعتقد ب 18 يورو
وتذكرة ثانية غير شاملة ب 15 يورو
والي اعمارهم اقل من 18 سنة الدخول مجاني
بس لازم اثبات
وممكن تشتري التذاكر من المكائن اقل زحمة
واطلب منهم خريطة القصر باللغة العربية
وفيه عند المكائن اشخاص ممكن يساعدونك
احنا صادفنا واحد مرررره كيوت
تراه رجال كبير هههههههه
غاية في اللطف والبشاشة
اسأله بالإنجليزي ... يرد علي بالعربي
بس مو اي عربي عربي مشبك هههههه
وبعد ما أخذنا التذاكر ورحنا بوابة الدخول
شيء لا يعقل طوابير خيالية
هذا واحنا حاطين في بالنا مانروح في الويك اند
شوفوا كيف هذا الصف الطويل
فيه واحد ثاني نفسة يعني تأخذ الصف اليمين ويعدين يلف فيك يسار
الحمد لله ان الجو كان غيم
وبالنظام كل شي يمشي بسرعة
مو مثل عندنا يرتفع ضغطك وانت تشوف العالم تسقط عليك
وهذا اول مادخلنا
اسم قصر فرساي مرتبط بماري أنطوانيت
ملكة فرنسا صاحبة المقولة المشهورة
"إذا لم يكن هناك خبزٌ للفقراء.. دعهم يأكلون كعكاً"
طبعاً هالمقولة مافيه شيء يأكد انها هي صاحبتها
لكن فيها من الحقيقة الشيء الكثير
لان ماري انطوانيت كانت منغمسة في الملذات
وصرف الاموال على الحفلات
وما تدري عن اللازمة المالية للبلد
وبالرغم من كره الفرنسيين لها
إلا انها كانت من أشهر "نجوم" الثورة الفرنسية
وكان فيه كثير من الاعمال الي تتكلم عن قصتها
منها
افلام كرتون
ليدي اوسكار
خريطة اقسام القصر
هالخريطة لقيتها في رد من ردود مشرفنا ابو سعد
اول ماتدخل القصر فيه تماثيل ومعلومات
شوفوا جمال القصر
ما كأنها حقيقة
طبعاً ماطولنا فيه رحنا ندور الباب الي يطلع على الحديقة هههههه
وهذي خريطة الحديقة
طلعنا ووقفنا في صف ثاني عشان القطار الي يلف فيك بالحديقة
وبيني وبينكم انا خلاص وصلت حدي وطفشت و باقي شوي واعصب
بس مجرد ركبت القطار وشفت اول منظر
انغسل كل الغضب
ولو الوقت يسمح كان خليت يوم كامل له
مكان لتأجير القوارب في البحيرة
وفيه سيارات القولف بعد تتأجر
بس اضن لازم تكون معك الرخصة
أول ما طلعنا مرينا ديزني ستور في الشانز
عشان نحجز لديزني
وما فيه إلا موظف واحد بس للتذاكر
استغليت الوقت وأخذت لفه على المحل
وهالصورة ذكرتني الي حاب يشتري هدايا على شكل برج ايفل (حلويات,اكواب,....)
احلى المحلات الي شفتها محل الهدايا الي في برج ايفل ومحل في مونمارت ومحل في المطار
ولمى جاء دورنا ودفعنا قالوا الطابعة خربانه
قلنا ناخذ لنا لفه على الشانز لحد ما يصلحوا الطابعة
وللمعلومية الي راح يأخذ تذاكر دزيزني من المحل
مايقدر يروح لها بنفس اليوم يعطونك تذاكر لليوم الي بعده
بعدها رحنا للحي اللاتيني
الحي جميل وممتع والاهم انه ذكرني بالحب ديالي (اسطنبول)
واغلب الحي مطاعم وكافيهات
والي يشتغلون فيها عرب (تونس+المغرب+الجزائر)
محل حلويات تونسية
الشعب التونسي الطف شعب مر علي
وفيه محلات هدايا اسعارها حلوه
ولا بد من الكريب
نافورة سانت ميشيل
من احلى مناظر نهر السين
من الحي اللاتيني وجسر بونت نيوف
حبيبتي إن أخبروك أني ........ لا أملك العبيدا والقصورا
وليس في يدي عقد ماس ..... به أحيط جيدك الصغيرا
قولي لهم بكل عنفوان .......... يا حبي الأول والأخيرا
قولي لهم .......................... كفاني بأنه يحبني كثيراً
كاتدرائية نوتردام
الي تدور فيها أحداث رواية (احدب نوتردام)
وطبعاً طلع منها فيلم كرتون
وبعد هاللف والدوران اكيد ندور مطعم
مطعم بيتزا يشتغل فيه تونسي
والمطعم الي قدام مطعم شاورما بعد الي يشتغلون فيه تونسيين
بس شاورمتهم غريبة على شكل قمع كان ودي اجربها بس حسيت الموضوع فيه تلطيخ
وفي انتظار الطلب
وبعد الجولة الجميلة في الحي اللاتيني كانت وجهتنا لمتحف اللوفر
هذي محطة اعجبتني
اجمل محطة شفتها في باريس
وهذي اسوأ محطه دايم نمر عليها
صار لنا موقف في محطة المترو اول ما دخلنا المحطة فيه هوشة كبيرة
بين بنت وولد اعمارهم في ال 15 _17
والله ضرب شديد وصراخ و فيه رجال يفك بينهم
والتموا الناس وبعدها بشوي جت الشرطة
المهم ركبنا المترو ورحنا لوجهتنا
وبعد ما خلصنا وإحنا راجعين بالمترو
انا والاولاد بعيدين عن زوجي بس اشوفه
وقفت جنبه وحدة وانا اقول في نفسي مو غريبة علي هالبنت
طلعت نفس البنت الي كانت تتضارب
ولمى نزلنا قال زوجي انه البنت الي واقفه جنبه دخلت يدها في جيبه !!!
بس حس عليها وعلى طول هي سوت نفسها منشغلة بشي ثاني
طلعت سالفة الهوشة ان هذي حركة من حركات السرقة في باريس
يسوونها عشان الناس تتجمهر وتنشغل بالهوشة وياخذون راحتهم بالسرقة
انتبهو من السرقات في باريس بالذات في محطات المترو كثير حالات السرقه في المترو
ولا تحطوا المحفظة في جيب البنطلون
والشنطة بالنسبة للبنات ماتكون من النوع المفتوح لازم تكون مسكره
متحف اللوفر
المدخل بااااارد ورطب كأنك في كهف
طبعاً ما كان هدفنا زيارة المتحف هدفنا الهرم الزجاجي هههههههه
متحف اللوفر في الاصل كان قلعة
وبعدها صارت قصر سكنه كثير من ملوك فرنسا
وبالنسبة لي كانت رغبتي بزيارته مرتبطة بالافلام الي شفتها و الروايات الي
قريتها وكانت أحداثها تدور في المتحف مثل رواية
شيفرة دافينشي
والجو كان مرررره جمييييل
لقينا هالكافية قلنا بس هذا المطلوب
مول جميل ويستحق الزيارة
وطبعاً كالعادة الصينيين فيه زي النمل على الماركات
قسم المكتبة والادوات المكتبية
قسم الهدايا والاكسسوارات
وهذي اختام شمع واسعارها معقولة
مو مثل الانستقرام بس ما ادري اذا يسوون ختم بعبارة خاصة
وكنا متفقين انا وزوجي على وقت محدد نتقابل فيه عند محطة المترو
والحمدلله وصلت قبله وجلست انتظره عشان اكتبها في التاريخ
ورحنا على هضبة مونمارت نلحق على المنظر قبل الغروب
ولمى شفت المحلات تسمرت في مكاني
بس قلت نطلع على الهضبة وبعدين ارجع
عشان ما اشيل معي اغراض زيادة
وطلوع الهضبة
اما بالدرج
او بالعربة
تروح للعربة من الخلف من هذي الطلعة اذا مو ناسية
وبما اننا ناس رياضية وعندنا لياقة اخترنا العربة
المنظر جمييل
وفيه اشخاص يسوون عروض
وفي قمة الهضبة فيه كنيسة القلب المقدس
قولي أحبك كي تزيد وسامتي
فبغير حبكٍ لا أكون جميلاً
الآن قوليها .. قوليها ولا تترددي
بعض الهوى لا يقبل التأجيلا
سأغير التقويما لو أحببتني
أمحو فصولا ًأو أضيف فصولاً
ومعروفه منطقة مونمارت بحي الرسامين
واشهر الرسامين الي عاشوا في هالحي
فان غوخ
ومن صغري وأنا مغرمه بطريقة رسمه
سلفادور دالي
ما احب رسوماته
بيكاسو
وعشان الفنانين الكبار عاشوا في مونمارت
هالشي شجع كثير من الرسامين للعيش بنفس المكان
وهذا سبب تجمع الرسامين
وهذا اضن مطعم كنا ناوين ندخل بس زحمة
وطبعاً كنت مخططة مثل ماقلت قبل اني ارجع للمحلات الي بنفس المكان
وكنت اضن وكنت اضن وخاااااب ضني
لمى رجعت لقيتها مسكرة
